မြန်မာနိုင်ငံမှ စိုက်ပျိုးထွက်ရှိသော ဒူးရင်းသီးများကိုပြည်ပစျေးကွက်သို့ ထိုးဖောက်နိုင်ရန် စီစဥ်ဆောင်ရွက်လျက်ရှိကြောင်း မြန်မာနိုင်ငံသစ်သီးဝလံ၊ ပန်းမန်နှင့်ဟင်းသီးဟင်းရွက်စိုက်ပျိုး ထုတ်လုပ်ရောင်းချသူများထံမှ သိရပါသည်။ တရုတ်နိုင်ငံသည် နှစ်စဥ်အမေရိကန်ဒေါ်လာ ၁၀ဘီလီယံခန့်ရှိသော ဒူးရင်းသီးများကို ပြည်ပနိုင်ငံများမှဝယ်ယူတင်သွင်းလျက်ရှိပြီး လက်ရှိတွင် ဗီယက်နမ်နိုင်ငံမှ အမေရိကန်ဒေါ်လာ၄ဘီလီယမ်ခန့်၊ ထိုင်းနိုင်ငံမှ အမေရိကန်ဒေါ်လာ ၄ဘီလီယမ်ခန့်နှင့်မလေးရှားနိုင်ငံမှ အမေရိကန်ဒေါ်လာ၂ဘီလီယမ်ခန့် တင်ပို့လျက်ရှိရာ မြန်မာနိုင်ငံ အနေဖြင့်လည်း စျေးကွက်ရရှိရန် ကြိုးပမ်းဆောင်ရွက်မည်ဖြစ်ကြောင်း သိရသည်။ ယခုအခါ မြန်မာ့ဒူးရင်းသီးများကို ပြည်ပသို့တင်ပို့ရောင်းချနိုင်ရေးအတွက် မြန်မာနိုင်ငံ ဒူးရင်းစိုက်ပျိုးထုတ်လုပ်ရောင်းချသူများ အသင်းကိုလည်းဖွဲ့စည်းထားပြီးဖြစ်ရာ ရန်ကုန်တိုင်းဒေသကြီး၊ ပဲခူးတိုင်း ဒေသကြီး၊ တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့မှ တိုင်းဒေသကြီး၊ ပြည်နယ်အဆင့်ဖွဲ့စည်းထားသည့်အသင်းများကို စုစည်းကာနိုင်ငံအဆင့်ဖွဲ့စည်းထားခြင်းဖြစ်သည်။
လက်ရှိတွင် ပြည်တွင်း၌ဒူးရင်းသီးမျိုးကွဲပေါင်း ၁၈မျိုးခန့်ရှိသည့်အနက် စျေးကွက်သေချာသည့် ဒူးရင်းသီးမျိုးများကို အရည်အသွေးမြှင့်တင်ကာတရုတ်နိုင်ငံအပါအဝင် ပြည်ပစျေးကွက်သို့ တင်ပို့ရောင်းချနိုင်ရန် စီစဥ်ဆောင်ရွက်မည်ဖြစ်ကြောင်း၊ အာရှနိုင်ငံများထဲတွင် တရုတ်နိုင်ငံနှင့် ဂျပန်နိုင်ငံတို့သည် ဒူးရင်းသီးစားသုံးမှုမြင့်မားသောနိုင်ငံများဖြစ်ကြပြီး နှစ်စဥ်ပြည်ပမှ ဒူးရင်းသီးတန်ချိန် အမြောက်အများတင်သွင်းလျက်ရှိကြောင်း သိရှိရပါသည်။
DOCA(ပဲခူး)