ပြည်ပကုန်သွယ်မှုသတင်းများ

              မကြာသေးမီက ၀င်ငွေတိုးမြင့်လာမှုများ၊ အခြေခံအဆောက်အအုံ အဆင့်မြှင့်တင်မှုများ နှင့် အတူ ပါကစ္စတန်ဝန်ကြီးချုပ် Shehbaz Sharif က နိုင်ငံသည် စီးပွားရေးတိုးတက်မှုအတွက် ရထား လမ်းများ ခေတ်မီအောင် အာရုံစိုက်လုပ်ဆောင်နေသည်ဟု ပြောကြားခဲ့သည်။ "ပါကစ္စတန် မီးရထားလမ်းများ၏ ဒစ်ဂျစ်တယ်စနစ်များ ခေတ်မီတိုးတက်လာစေရန်နှင့် ခေတ်မီသော အဆောက်အဦများ ပံ့ပိုးပေးခြင်းသည် နိုင်ငံတော်၏ စီးပွားရေးကို အားကောင်းစေမည့် အဓိက အခန်းကဏ္ဍမှ ပါဝင်ကြောင်း နိုဝင်ဘာလ ၁၇ ရက်‌နေ့က ကျမ်းသစ္စာကျိန်ဆိုပွဲ အခမ်းအနားတွင် မိန့်ခွန်းပြောကြားစဉ် ပြောကြားခဲ့သည်။ နိုင်ငံတစ်ဝှမ်းရှိ မီးရထားဘူတာရုံများအားလုံးကို အဆင့် မြှင့်တင်ရန် အစိုးရက စီစဉ်နေပြီး စုစုပေါင်း ရထားဘူတာပေါင်း ၅၄ ရုံကို ခေတ်မီပြီး စွမ်းဆောင် ရည် မြှင့်တင်ပေးခြင်းဖြင့် ဒေသတွင်း စီးပွားရေးလုပ်ငန်းများကို ပံ့ပိုးပေးလျှက်ရှိ ကြောင်း ၎င်းက ပြောကြားခဲ့သည်။ ထို့အပြင် တောင်ပိုင်း Sindh ပြည်နယ်မှ အနောက်တောင် ဘက် Balochistan သို့ ပါကစ္စတန် မီးရထားလမ်းများ အဆင့်မြှင့်တင်ရန်အတွက် အာရှဖွံ့ဖြိုးရေးဘဏ်နှင့် ဆွေးနွေးမှု များ ပြုလုပ်နေကြောင်း Sharif မှ ပြောကြားခဲ့ပြီး ရထားလမ်း ကွန်ရက် တစ်လျှောက် ခေတ်မီ တိုးတက်ရေးနှင့် စီးပွားရေး တည်ငြိမ်စေရန်အတွက် ပြည်နယ်များ အကြား ပူးပေါင်းဆောင်ရွက်မှု များတိုးမြှင့်ရန်လိုအပ်ကြောင်း ပြောကြားခဲ့သည်။ ဗဟိုအာရှသို့ မီးရထား လမ်းကွန်ရက်ကို တိုးချဲ့ ရန်အတွက် ပြည်နယ်အားလုံးနှင့် ပူးပေါင်းဆောင်ရွက်သွားမည်ဖြစ်ကြောင်း ဝန်ကြီးချုပ်ကပြောကြားပြီး အဓိကအချက်မှာ ဥဇဘက်ကစ္စတန်-အာဖဂန်-ပါကစ္စတန် မီးရထားလိုင်းစီမံကိန်းကို မီးမောင်းထိုးပြနေပါသည်။

DOCA(ရန်ကုန်)

                ရဝမ်ဒါသည် တရုတ်နိုင်ငံနှင့် ထောပတ်သီး တင်ပို့မှု ပရိုတိုကောအသစ်ကို လက်မှတ် ရေးထိုးခဲ့ပြီး၊ တရုတ်စားသုံးသူများအတွက် ရရှိနိုင်သော ရဝမ်ဒါ ထုတ်ကုန်အမျိုးအစားများကို ပိုမိုကျယ်ပြန့်စေခဲ့သည်။ ရဝမ်ဒါမှ တရုတ်နိုင်ငံသို့ လတ်ဆတ်သော ထောပတ်သီးများ တင်ပို့မှု အတွက် စစ်ဆေးရေး၊ သီးသန့်ခွဲထား ရေးနှင့် သန့်ရှင်းရေးစသော လိုအပ်ချက်များဆိုင်ရာ ပရိုတို ကောကို တရုတ်နိုင်ငံရှိ ရဝမ်ဒါသံရုံးမှ နိုဝင်ဘာလ ၁၂ ရက်နေ့တွင် လက်မှတ်ရေးထိုးခဲ့သည်။ ထို သဘောတူညီချက်အရ အရည်အသွေးကောင်းမွန်သော ရဝမ်ဒါ ထောပတ်သီးများအား တရုတ် ဈေးကွက်သို့ ဝင်ရောက်နိုင်စေမည်ဖြစ်ပြီး စားသုံးသူ ၁.၄ ဘီလီယံ၏ စျေးကွက် ဖြစ်သော ရဝမ်ဒါ စိုက်ပျိုးရေးထွက်ကုန်များအား တရုတ်နိုင်ငံသို့ တင်ပို့နိုင်စေမည်ဖြစ်ကြောင်း သံရုံးက ဆိုရှယ် မီဒီယာပလပ်ဖောင်း X တွင် ရေးသားခဲ့သည်။ ရဝမ်ဒါ၏ ထောပတ်သီးများအား တရုတ်နိုင်ငံတင်ပို့ သော ပရိုတိုကောသည် ပို့ကုန်ကို သိသာစွာ မြှင့်တင်ပေးနိုင်မည်ဖြစ်ကြောင်း၊ တိုးတက်မှု အလား အလာများအား ရဝမ်ဒါနိုင်ငံမှ အကောင်းမြင်ပြီး တရုတ်မိတ်ဖက်များနှင့် လက်တွဲရန် မျှော်လင့် ကြောင်း ရဝမ်ဒါ စိုက်ပျိုး မွေးမြူရေးနှင့် စိုက်ပျိုးရေး ပို့ကုန်ကုမ္ပဏီ Bahage Foods Ltd ၏ တည် ထောင်သူနှင့် ပိုင်ဆိုင်သူ Angel Uwantege က မကြာသေးမီက ပြုလုပ်သော အင်တာဗျူးတစ်ခု တွင် ဆင်ဟွာသို့ ပြောကြားခဲ့သည်။ ကုန်သွယ်မှုသဘောတူညီချက်များ၊ ရင်းနှီး မြှုပ်နှံမှုများနှင့် ယဉ်ကျေးမှုဖလှယ်မှုများ ပိုမိုရရှိမည်ဟု မျှော်လင့်ကြောင်း သူမ၏ကုမ္ပဏီသည် ရဝမ်ဒါထုတ်ကုန် များ အထူးသဖြင့် ထောပတ်သီးများကို တရုတ်ဈေးကွက်သို့ ပြသရန် China International Import Expo ကဲ့သို့သော ပလပ်ဖောင်းများတွင် ပါဝင်နိုင်ရန်  စိတ်အားထက်သန် လျှက်ရှိ ကြောင်း သူမက ပြောကြားခဲ့သည်။ တရုတ်နိုင်ငံသို့ ထောပတ်သီး တင်ပို့ခွင့်ပြုသည့် ပရိုတို ကော ကို အပြီးသတ်ရေးဆွဲရန် ရဝမ်ဒါနိုင်ငံ၏ ကြိုးပမ်းဆောင်ရွက်မှုသည် ရဝမ်ဒါနိုင်ငံ၏ ပန်းမန် ကဏ္ဍ အတွက် အဓိကဖွံ့ဖြိုးတိုးတက်မှုတစ်ခုဖြစ်ကြောင်း Rwanda နိုင်ငံထုတ် အင်္ဂလိပ်ဘာသာ သတင်းစာ The New Times က မှတ်ချက်ပြုခဲ့သည်။ ရဝမ်ဒါမှ စီးပွားရေးလေ့လာသုံးသပ်သူ Teddy Kaberuka က ထောပတ်သီး တင်ပို့မှု ပရိုတိုကောကို နှစ်နိုင်ငံ ကုန်သွယ်မှု နက်ရှိုင်းစေသည့် အရေးပါသော ခြေလှမ်းအဖြစ် ချီးကျူးခဲ့သည်။ တရုတ်နိုင်ငံခြားရေးဝန်ကြီးဌာန၏ အချက် အလက်များအရ ၂၀၂၄ ခုနှစ်တွင် တရုတ်နှင့် Rwanda နှစ်နိုင်ငံ အကြား ကုန်သွယ်မှုသည် အမေရိကန်ဒေါ်လာ ၆၆၉ သန်းအထိ ရောက်ရှိခဲ့ပြီး တစ်နှစ်ထက်တစ်နှစ် ၂၁.၄ ရာခိုင်နှုန်းတိုးမြင့် လာခဲ့ကြောင်းသိရသည်။

DOCA(ရန်ကုန်)

              ဗီယက်နမ်အစိုးရသည် ၂၀၂၅ ခုနှစ် စတုတ္ထသုံးလပတ်အတွင်း ပြည်တွင်းအသားတင် ထုတ်လုပ်မှု (GDP) တိုးတက်မှုကို ၈.၄ ရာခိုင်နှုန်းကို ပစ်မှတ်ထား သတ်မှတ်ထားပြီး နှစ်စဉ် GDP တိုးတက်မှုနှုန်း ၈ ရာခိုင်နှုန်း ကျော်အထိ ရောက်ရှိရန် ရည်ရွယ်ထားကြောင်း ဗီယက်နမ်သတင်း အေဂျင်စီက နိုဝင်ဘာလ ၁၇ ရက်နေ့တွင် ထုတ်ပြန်ခဲ့ပါသည်။

          ဗီယက်နမ်အစိုးရက စတုတ္ထသုံးလပတ်တွင် စက်မှုကဏ္ဍ ၉.၄ ရာခိုင်နှုန်းကျော်၊ ဝန်ဆောင်မှု ကဏ္ဍ ၈.၃ ရာခိုင်နှုန်းကျော်နှင့် စိုက်ပျိုးရေးကဏ္ဍ ၄ ရာခိုင်နှုန်းခန့် တိုးတက်ရန် ကြိုးစားလျက်ရှိ ကြောင်း အစီရင်ခံစာတွင် ဖော်ပြထားပါသည်။ ဗီယက်နမ်နိုင်ငံ၏ GDP သည် ၂၀၂၅ ခုနှစ် တတိယသုံးလပတ်တွင် ယခင်နှစ်ကထက် ၈.၂၂ ရာခိုင်နှုန်း တိုးတက်ခဲ့ကြောင်း သိရှိရပါသည်။

DOCA(ရန်ကုန်)

             အိန္ဒိယဖယ်ဒရယ်အစိုးရသည် ပို့ကုန်မြှင့်တင်ရေးမစ်ရှင် (EPM) နှင့် ပို့ကုန်လုပ်ငန်းရှင်များ အတွက် ချေးငွေအာမခံအစီအစဉ် (CGSE) အတွက် အမေရိကန်ဒေါ်လာ ၅.၁ ဘီလီယံ အသုံး စရိတ်ကို နိုဝင်ဘာလ ၁၂ ရက်နေ့တွင် အတည်ပြုခဲ့သည်။ အိန္ဒိယဝန်ကြီးချုပ် Narendra Modi ဦးဆောင်သည့် အစိုးရအဖွဲ့အစည်းအဝေးအတွင်း အစိုးရ၏ ဆုံးဖြတ်ချက်အပြီးတွင် အိန္ဒိယ ပြည်ထောင်စုပြန်ကြားရေးဝန်ကြီးဖြစ်သော Ashwini Vaisnaw မှ ကြေညာချက်ထုတ်ပြန် ခဲ့ခြင်း ဖြစ်သည်။ ထိုကြေညာချက်တွင် အိန္ဒိယနိုင်ငံ၏ ပို့ကုန်ဂေဟစနစ် အားကောင်းစေရန်နှင့် EPM အတွက် ခြောက်နှစ်တာကာလအတွင်း ဒေါ်လာ ၂.၈၂ ဘီလီယံ ကုန်ကျမှုနှင့် ဘဏ်ချေးငွေအာမခံ ဒေါ်လာ ၂.၂၅ ဘီလီယံခွဲဝေပေးရန်တို့လည်း ပါဝင်သည်။ EPM သည် ကမ္ဘာလုံးဆိုင်ရာ ကုန်သွယ် ရေးစိန်ခေါ်မှုများနှင့် တိုးတက်ပြောင်းလဲ နေသော ပို့ကုန်လိုအပ်ချက်များကို လျှင်မြန်စွာ တုံ့ပြန် နိုင်သည့် တစ်ခုတည်းသော ရလဒ်ကို အခြေခံကာလိုက်လျောညီထွေရှိသော မဟာဗျူဟာ မြောက် ပြောင်းလဲမှုကို အမှတ်အသားပြုသည်ဟု အစိုးရမှ ပြောကြားခဲ့သည်။ CSGE သည် အရည်အချင်းပြည့်မှီသော ပို့ကုန်လုပ်ငန်းရှင်များထံဒေါ်လာ ၂.၂၅ ဘီလီယံ ထပ်တိုးချေးငွေဆိုင်ရာ အထောက်အကူပြုပစ္စည်းများကို တိုးချဲ့ရန်အတွက် National Credit Guarantee Trustee Company Limited မှ ၁၀၀ ရာခိုင်နှုန်း ခရက်ဒစ်အာမခံချက်ပေးကြောင်း သိရပါသည်။

DOCA(ရန်ကုန်)

    ကမ္ဘောဒီးယားနိုင်ငံ၌ စိုက်ပျိုးရေးဝန်ကြီးဌာနသည် စပါးရိတ်သိမ်းချိန်တွင်  လယ်သမားများ ကြုံတွေ့နေရသော အခက်အခဲများနှင့်  စျေးကွက်ရှာဖွေရေး စိန်ခေါ်မှုများကို ကိုင်တွယ်ဖြေရှင်းရန် နှင့် ဝယ်ယူစုဆောင်းမှု အမြင့်မားဆုံးကာလ၌ အရောင်းအဝယ်နှေးကွေး ပိတ်ဆို့မှုဖြစ်ပေါ်ခြင်းမှ ကာကွယ်နိုင်ရန် ရည်ရွယ်၍ အထူးလုပ်ငန်းအဖွဲ့ တစ်ရပ်ကို ဖွဲ့စည်းတာဝန်ပေးအပ်ခဲ့ကြောင်း သိရှိ ရပါသည်။

   အဆိုပါ အထူးလုပ်ငန်းအဖွဲ့တွင် စိုက်ပျိုးရေး အထွေထွေညွှန်ကြားမှု ဦးစီးဌာနနှင့် ဆန်စပါး ဦးစီးဌာနတို့မှ ပူးပေါင်းပါဝင်ပြီး ဈေးနှုန်းများ ဆက်လက်ကောင်းမွန်မှု မရှိသည့် အခြေအနေမျိုးတွင် ပင် စပါးဝယ်ယူရေးလုပ်ငန်းများ လွယ်ကူချောမွေ့စေရေး ပေါင်းစပ်ညှိနှိုင်းလျက် အဖြေရှာဖွေ ဆောင်ရွက်မည်ဖြစ်သည်။ ၎င်းအဖွဲ့၏ ဦးစားပေးလုပ်ဆောင်မည့်အချက်မှာ တောင်သူတိုင်းသည် လုပ်ငန်းလည်ပတ်နိုင်မည့် စျေးကွက်လမ်းကြောင်းတစ်ခုကိုသိရှိလျက် စပါးရောင်းချနိုင်မှုရှိစေရေး အာမခံချက်ပေးနိုင်ရန် ဆောင်ရွက်သွားမည်ဖြစ်ကြောင်း ဝန်ကြီးဌာနက ပြောကြားထားသည်။

    အပတ်စဉ် ရိတ်သိမ်းမှုပမာဏကို ခန့်မှန်းရန်နှင့် ရိတ်သိမ်းပြီး စပါးများ ဝယ်ယူနိုင်စွမ်းရှိသည့် ဆန်စက်များနှင့် ကုန်သည်များကို ချက်ချင်းဖော်ထုတ် ဆောင်ရွက်ရန် ဝန်ကြီးဌာနက လုပ်ငန်းအဖွဲ့ အား ညွှန်ကြားထားသည်။ ထိုသို့ ညွှန်ကြားမှုတွင် လယ်သမားများထံမှ တိုက်ရိုက်ဝယ်ယူနိုင်မည့် ဆန်စက်များကို တည်နေရာသတ်မှတ်ခြင်း၊ ဝယ်သူများနှင့် ရောင်းချသူများ တစ်နေရာတည်းတွင် တွေ့ဆုံပြီး ရောင်းဝယ်ဖောက်ကားနိုင်စေရန် ခရိုင်တစ်ခုချင်းစီ (ကျေးရွာဧရိယာ) ၌ စုရပ်နေရာများ သတ်မှတ်ခြင်းတို့ ပါဝင်သည်။

    ဤကဲ့သို့ ကြိုးပမ်းဆောင်ရွက်မှုကို အထောက်အပံ့ပြုနိုင်ရေးအတွက် ဝန်ကြီးဌာနသည် ဆန် စက်များ၏ အမည်၊ ဖုန်းနံပါတ်များနှင့် တည်နေရာများကို အများပြည်သူ သိရှိနိုင်ရန် ထုတ်ပြန်ထား သည်။ သို့မှသာ တောင်သူများ အနေဖြင့် အလားအလာရှိသော ဝယ်လက်များထံ လျင်မြန်စွာ ဆက် သွယ်နိုင်စေမည် ဖြစ်သည်။

    ကုမ္ပဏီ ၃၃ ခုနှင့် ဆန်စက်များမှ နိုင်ငံတစ်ဝန်းရှိ တောင်သူများထံမှ စပါးတန်ချိန် ၁၆၇၉၀ ခန့်ကို နိုဝင်ဘာလ ၁၃ ရက်နေ့၌ စုပေါင်းဝယ်ယူခဲ့ကြောင်း ဝန်ကြီးဌာနမှ ပြောကြားခဲ့သည်။ အစိုးရသည် ဆန်ဈေးနှုန်း တည်ငြိမ်ရေးကို မကြာမီက လုပ်ဆောင်ခဲ့အပြီးတွင် ဈေးကွက် အတက် အကျ ပြောင်းလဲမှုများကြောင့် ဝင်ငွေသိသာစွာ ကျဆင်းခဲ့သည်ဟု လယ်သမားများက အစီရင်ခံ တင်ပြခဲ့ပြီးနောက် အဆိုပါစီမံချက်ကို အကောင်အထည်ဖော်ခဲ့ခြင်းဖြစ်သည်။ အဆိုပါကိစ္စရပ်ကို ဖြေရှင်းနိုင်ရေး  တောင်သူလယ်သမားများထံမှ စပါးကို သင့်လျော်သောနှုန်းထားဖြင့် ဝယ်ယူနိုင်ရန် လယ်ယာစိုက်ပျိုးရေးနှင့် ကျေးလက်ဒေသဖွံ့ဖြိုးရေးဘဏ်မှတစ်ဆင့် အစိုးရက ရန်ပုံငွေ အမေရိကန် ဒေါ်လာ သန်း ၄၀ ကို ခွင့်ပြုပေးခဲ့သည်။

    စိုက်ပျိုးရေးဝန်ကြီးဌာနသည် အခြေအနေ အရပ်ရပ်ကို အနီးကပ် စောင့်ကြည့်လျက်ရှိပြီး လက်ရှိ စပါးရိတ်သိမ်းရာသီအတွင်း အချိန်မီ စုဆောင်းပြီး စျေးကွက်သို့ မျှတစွာ ဝင်ရောက်နိုင်စေရန် ပြည်နယ် အာဏာပိုင်များနှင့် ဆန်စက်များမှ ညှိနှိုင်း ဆောင်ရွက်သွားမည်ဖြစ်ကြောင်း သိရသည်။

Source: Khmer Times, 14 Nov 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)