ပြည်ပကုန်သွယ်မှုသတင်းများ

          တရုတ်ကော်ဖီဆိုင်လုပ်ငန်းစုများသည် ယခင်က ဈေးနှုန်းအလွန်ချိုသာစွာရောင်းချသည့် နည်းဗျူဟာဖြင့် ဆိုင်ခွဲပေါင်း ထောင်ချီဖွင့်လှစ်ကာ လျင်မြန်စွာတိုးတက်လာခဲ့သော်လည်း ယခုအခါ ထိုနည်းလမ်းမှာ ထိရောက်မှုလျော့နည်းလာပြီဖြစ်သည်။ ထို့ကြောင့် အဆိုပါ အမှတ်တံဆိပ်များသည် ထုတ်ကုန်အရည်အသွေးနှင့် ဝန်ဆောင်မှုအတွေ့အကြုံများ ပိုမိုကောင်းမွန်လာစေရန် အာရုံစိုက်လာကြသည်။

       Cotti Coffee သည် ယခုနှစ်မှစတင်ကာ အဖျော်ယမကာတစ်ခွက်လျှင် ၉.၉ ယွမ် (၁.၄ ဒေါ်လာခန့်) ဖြင့်ရောင်းချသည့် လျှော့ဈေးအစီအစဉ်များကို လျှော့ချခဲ့သည်။ အဆိုပါ နည်းဗျူဟာမှာ ၂၀၂၂ ခုနှစ် စတင်တည်ထောင်ချိန်မှစ၍ နိုင်ငံပေါင်း ၂၈ နိုင်ငံတွင် ဆိုင်ခွဲပေါင်း ၁၈,၀၀၀ အထိ တိုးချဲ့နိုင်ရန် ကူညီပေးခဲ့ခြင်းဖြစ်သည်။ ယခုအခါ ၎င်းတို့သည် မြို့ကြီးများတွင် အကျိုးတူပူးပေါင်းဆောင်ရွက်မှု လျှောက်ထားမှုများကိုရပ်ဆိုင်းထားပြီး ဝန်ဆောင်မှုအတွေ့အကြုံကောင်းမွန်စေရန် ကိုယ်ပိုင်ဆိုင်ခွဲများ တည်ဆောက်ရေးကိုသာ ဦးစားပေးတော့မည် ဖြစ်သည်။

           တစ်ချိန်တည်းမှာပင် Mixue Bingcheng သည်လည်း ကော်ဖီမှုန့်သုံးစွဲမှုအစား ကော်ဖီစေ့ကို ကိုယ်တိုင်ချက်ချင်းကြိတ်၍ ဖျော်စပ်သည့် စနစ်သို့ ပြောင်းလဲရန် ပြင်ဆင်နေကြောင်း သတင်းများထွက်ပေါ်နေသည်။ ထို့အပြင် အလိုအလျောက်ကော်ဖီ ဖျော်စက်များ၊ ကော်ဖီစေ့ အမျိုးအစားသစ်များနှင့် နို့အစရှိသည့် ပါဝင်ပစ္စည်းများကို အဆင့်မြှင့်တင်ရန် စီစဉ်နေသည်။

          တရုတ်ပြည်တွင်း စားသောက်ကုန်နှင့် အဖျော်ယမကာဈေးကွက်သည် ပြည့်နှက်နေပြီဖြစ်သောကြောင့် လုပ်ငန်းစုများသည် ပြည်ပသို့ ခြေဆန့်လာကြခြင်းဖြစ်သည်။ Luckin Coffee သည် ပြီးခဲ့သည့်လက ဆိုင်ခွဲပေါင်း ၃၀,၀၀၀ ပြည့်မြောက်ခြင်းကို ဆင်နွှဲခဲ့ပြီး ဟောင်ကောင်၊ စင်ကာပူနှင့် မလေးရှားတို့သို့ ချဲ့ထွင်ခဲ့ပြီးဖြစ်သည်။ Luckin Coffee သည် အမေရိကန်စတော့ ဈေးကွက်သို့ ပြန်လည်ဝင်ရောက်ရန် ပြင်ဆင်နေသကဲ့သို့ ၎င်း၏ အဓိကရှယ်ယာရှင်ဖြစ်သူ Centurium Capital ကလည်း နာမည်ကြီး Blue Bottle Coffee ၏ ဆိုင်ခွဲပိုင်ဆိုင်မှုများကို Nestle ထံမှ ဒေါ်လာ ၄၀၀ သန်းအောက်ဖြင့် ဝယ်ယူရန် သဘောတူညီခဲ့သည်။

           ပညာရှင်များ၏ အဆိုအရ ဤဝယ်ယူမှုသည် Luckin Coffee အတွက် အဆင့်မြင့် (Premium) ကုန်အမှတ်တံဆိပ်တစ်ခုအဖြစ် ရပ်တည်နိုင်ရန် ဖြည့်ဆည်းပေးခြင်းဖြစ်သည်ဟုဆိုသည်။ တရုတ်ကော်ဖီအမှတ်တံဆိပ်များဖြစ်သော Lucky Cup (Mixue အုပ်စုဝင်)၊ Luckin နှင့် Cotti တို့သည် ဆိုင်ခွဲပေါင်း သောင်းနှင့်ချီ ရှိလာသော်လည်း ပြည်ပဈေးကွက်တွင် အောင်မြင်မှုရရန်မှာ မသေချာကြောင်း သိရသည်။

         ပြည်ပနိုင်ငံများတွင် ဆိုင်ခန်းငှားရမ်းခ၊ လုပ်အားခနှင့် ဥပဒေကြောင်းအရ လိုက်နာရမည့် ကုန်ကျစရိတ်များမြင့်မားသဖြင့် ဈေးနှုန်းချိုသာစွာ ရောင်းချခြင်းမှာ ရေရှည်တွင် အကျိုးအမြတ်ရရန် ခက်ခဲနိုင်သည်။

        အနောက်နိုင်ငံရှိ စားသုံးသူများသည် ဈေးနှုန်းထက် ကုန်အမှတ်တံဆိပ်၏ ပုံရိပ်၊ အရည်အသွေးနှင့် ဝန်ဆောင်မှုကို ပိုမိုတန်ဖိုးထားကြသည်။ အရှိန်အဟုန်ဖြင့် တိုးချဲ့ခြင်းကြောင့် ဆိုင်ခွဲအချင်းချင်း ဈေးကွက်လုခြင်းနှင့် ဈေးနှုန်းစစ်ပွဲများ ဖြစ်ပေါ်လာကာ အကျိုးအမြတ်ကို ထိခိုက်စေနိုင်သည်။

        သို့သော်လည်း လက်ရှိတွင် အရည်အသွေးမြှင့်တင်သည့် နည်းဗျူဟာမှာ ရလဒ်ကောင်းများ ပြသနေသည်။ ဥပမာအားဖြင့် Tianlala လက်ဖက်ရည်ဆိုင်ခွဲသည် ကော်ဖီစက်များ စတင်တပ်ဆင်ပြီးနောက် ကော်ဖီရောင်းအား ၂၇ ရာခိုင်နှုန်း မြင့်တက်ကာ စုစုပေါင်းဝင်ငွေ ၅၀ ရာခိုင်နှုန်းကျော် တိုးတက်လာခဲ့သည်။

          တရုတ်ကော်ဖီဆိုင်များသည် ကမ္ဘာလုံးဆိုင်ရာ အမှတ်တံဆိပ်များအဖြစ် ရပ်တည်နိုင်ရန်အတွက် ဈေးနှုန်းအပြင် အရည်အသွေးနှင့် ဒေသဆိုင်ရာ ယဉ်ကျေးမှုများတွင် ပေါင်းစပ်ဝင်ဆံ့နိုင်မှုကို အဓိကထား၍ ပြောင်းလဲလုပ်ဆောင်နေကြပြီဖြစ်ကြောင်း သိရှိရပါသည်။

Source : VN Express                                                                           

DOCA (ရန်ကုန်)

        ဖိလစ်ပိုင်နိုင်ငံ၏ စိုက်ပျိုးရေးထုတ်ကုန်စွမ်းအား မြှင့်တင်ရန်နှင့် ရာသီဥတုဒဏ်ခံနိုင်ရည်ရှိသော စားနပ်ရိက္ခာစနစ်တစ်ခု တည်ဆောက်ရန်အတွက် အမေရိကန်ဒေါ်လာ ၁ ဘီလီယံ ချေးငွေထုတ်ပေးရန် ကမ္ဘာ့ဘဏ်က အတည်ပြုလိုက်ကြောင်း သိရသည်။

       ဝါရှင်တန်အခြေစိုက် ကမ္ဘာ့ဘဏ်၏ အမှုဆောင်ညွှန်ကြားရေးမှူးများအဖွဲ့သည် “ဖိလစ်ပိုင် ရေရှည်တည်တံ့သော စိုက်ပျိုးရေးကဏ္ဍ အသွင်ကူးပြောင်းမှုစီမံကိန်း” (PSAT) အတွက် အဆိုပါ ရန်ပုံငွေကို တရားဝင်ခွင့်ပြုပေးခဲ့ခြင်း ဖြစ်သည်။ ဤစီမံကိန်းသည် ဖိလစ်ပိုင်တစ်နိုင်ငံလုံးရှိ လယ်သမား ၅ သန်းကျော်ကို တိုက်ရိုက်အကျိုးပြုမည်ဖြစ်ပြီး အဓိကအားဖြင့် စိုက်ပျိုးရေးလုပ်ထုံး လုပ်နည်းများကို ခေတ်မီအောင် ဆောင်ရွက်ခြင်း၊ စားနပ်ရိက္ခာနှင့် အာဟာရဖူလုံမှုကိုမြှင့်တင်ခြင်း၊ အလုပ်အကိုင်အခွင့်အလမ်းသစ်များ ဖော်ဆောင်ပေးခြင်းတို့ကို လုပ်ဆောင်သွားမည်ဖြစ်သည်။

        ကမ္ဘာ့ဘဏ်၏ ဖိလစ်ပိုင်၊ မလေးရှားနှင့် ဘရူနိုင်းဆိုင်ရာ ညွှန်ကြားရေးမှူး Zafer Mustafaoğlu က ဤရင်းနှီးမြှုပ်နှံမှုသည် ဖိလစ်ပိုင်စိုက်ပျိုးရေးကဏ္ဍအတွက် အလှည့်အပြောင်းတစ်ခု ဖြစ်လာမည်ဖြစ်ပြီး မှန်ကန်သည့် မူဝါဒများ၊ စနစ်များနှင့် ပူးပေါင်းဆောင်ရွက်မှုများမှ တစ်ဆင့် လယ်သမားများ ဝင်ငွေပိုရလာမည်ဟု ပြေားကြားခဲ့သည်။ ရာသီဥတုပြောင်းလဲမှုဒဏ်ကို ခံနိုင်ရည်ရှိလာပြီး ပြည်သူများအတွက်လည်း ဈေးနှုန်းသက်သာပြီး ဘေးကင်းတဲ့ အစားအစာများကို ပံ့ပိုးပေးနိုင်မည်ဖြစ်ကြောင်းလည်း ၎င်းက ဆက်လက်ပြောကြားခဲ့သည်။

          PSAT စီမံကိန်း၌ ရာသီဥတုနှင့် ကိုက်ညီသော စိုက်ပျိုးရေးနည်းစနစ်များ၊ မျိုးစေ့နှင့် မြေဩဇာစီမံခန့်ခွဲမှု၊ ရေချွေတာရေးနှင့် ဖန်လုံအိမ်ဓာတ်ငွေ့လျှော့ချရေး နည်းပညာများကို မိတ်ဆက်ပေးသွားမည်ဖြစ်သည်။ လယ်ယာသုံးသွင်းအားစုများကို မြန်ဆန်ပွင့်လင်းမြင်သာစွာ ဖြန့်ဝေနိုင်ရန် Digital Voucher System အသစ်ကို ကျင့်သုံးသွားမည်ဖြစ်သည်။

         စိုက်ပျိုးရေးဝန်ကြီးဌာန၏ ဘတ်ဂျက်သုံးစွဲမှု၊ အချက်အလက်စီမံခန့်ခွဲမှုနှင့် ပစ္စည်းဝယ်ယူမှု လုပ်ငန်းစဉ်များကိုလည်း ပိုမိုခိုင်မာအောင် လုပ်ဆောင်သွားမည်ဖြစ်သည်။ ကမ္ဘာ့ဘဏ်၏ စိုက်ပျိုးရေးဆိုင်ရာ အကြီးတန်းပညာရှင် Mio Takada က ယခုစီမံကိန်းကြောင့် လယ်သမားများ ၏ ဝင်ငွေတိုးတက်လာမည့်အပြင် ရိတ်သိမ်းချိန်အလွန် လေလွင့်ဆုံးရှုံးမှုများကိုလည်း လျှော့ချနိုင်မည်ဖြစ်ကြောင်း အလေးပေးပြောကြားခဲ့သည်။

​Source : VN Express                                                                           

DOCA (ရန်ကုန်)

         ၂၀၂၆ ခုနှစ်၏ ပထမသုံးလပတ်အတွင်း နိုင်ငံတကာကုန်သွယ်မှုပမာဏသည် အမေရိကန် ဒေါ်လာ ၂၄၉.၅ ဘီလီယံအထိ ရောက်ရှိခဲ့ပြီး ယခင်နှစ်ကာလတူထက် ၂၃ ရာခိုင်နှုန်း သိသိသာသာ မြင့်တက်လာကြောင်း ဘဏ္ဍာရေးဝန်ကြီးဌာနအောက်ရှိ အမျိုးသားစာရင်းအင်းရုံး (NSO) က ဧပြီလ ၅ ရက်နေ့တွင် ထုတ်ပြန်ကြေညာခဲ့သည်။

        ယခင်နှစ်က ပိုငွေပြခဲ့သည့် ကုန်သွယ်မှုအခြေအနေမှာ ယခုနှစ်တွင် ဒေါ်လာ ၃.၆၄ ဘီလီယံခန့် လိုငွေပြန်လည်ပြသခဲ့ကြောင်း သိရသည်။ သုံးလတာကာလအတွင်း စုစုပေါင်းပို့ကုန် တန်ဖိုးမှာ ဒေါ်လာ ၁၂၂.၉၃ ဘီလီယံရှိပြီး ၁၉.၁ ရာခိုင်နှုန်း တိုးတက်ခဲ့သည်။ ထူးခြားချက်အနေဖြင့် နိုင်ငံခြားရင်းနှီးမြှုပ်နှံမှုလုပ်ငန်းများ (FDI) ၏ တင်ပို့မှုမှာ ၃၃.၃ ရာခိုင်နှုန်းအထိ မြင့်တက်ခဲ့ပြီး စုစုပေါင်းပို့ကုန်၏ ၈၀ ရာခိုင်နှုန်းကျော်ကို ကိုယ်စားပြုနေသည်။ တစ်ဖက်တွင်မူ ပြည်တွင်းလုပ်ငန်းရှင်များ၏ တင်ပို့မှုမှာ ၁၆.၆ ရာခိုင်နှုန်းခန့် ကျဆင်းသွားသည်ကို တွေ့ရသည်။

      ပို့ကုန်အမျိုးအစားများတွင် စက်မှုကုန်ချောပစ္စည်းများမှာ အဓိကကျလျက်ရှိပြီး ဒေါ်လာ ၁၁၀.၅၂ ဘီလီယံ (ပို့ကုန်စုစုပေါင်း၏ ၉၀ ရာခိုင်နှုန်းနီးပါး) တင်ပို့နိုင်ခဲ့သည်။ စိုက်ပျိုးရေးနှင့် သစ်တောထွက်ကုန်များမှ ဒေါ်လာ ၉.၃၄ ဘီလီယံနှင့် ရေထွက်ကုန်များမှ ဒေါ်လာ ၂.၆၄ ဘီလီယံ အသီးသီး ရရှိခဲ့သည်။

          သွင်းကုန်ပမာဏမှာ ၂၇ ရာခိုင်နှုန်းအထိ မြင့်တက်ခဲ့ပြီး စုစုပေါင်း ဒေါ်လာ ၁၂၆.၅၇ ဘီလီယံ ရှိခဲ့သည်။ တင်သွင်းမှု၏ ၉၄ ရာခိုင်နှုန်းခန့်မှာ ကုန်ထုတ်လုပ်မှုအတွက် လိုအပ်သောစက်ပစ္စည်းများ၊ ကိရိယာများနှင့် ကုန်ကြမ်းပစ္စည်းများဖြစ်ကြောင်း NSO ၏ အစီရင်ခံစာတွင် ဖော်ပြထားသည်။

         မတ်လတစ်လတည်း၏ ကုန်သွယ်မှုမှာ သိသိသာသာ အရှိန်မြင့်တက်ခဲ့ပြီး ပို့ကုန်နှင့် သွင်းကုန်စုစုပေါင်း ဒေါ်လာ ၉၃.၅၅ ဘီလီယံရှိခဲ့ကာ ဖေဖော်ဝါရီလထက် ၃၉.၂ ရာခိုင်နှုန်း တိုးတက်လာခဲ့သည်။ သို့သော်လည်း မတ်လအတွင်း သွင်းကုန်ပမာဏ ပိုမိုများပြားခဲ့ခြင်းကြောင့် အဆိုပါလတွင်လည်း ဒေါ်လာ ၀.၆၇ ဘီလီယံ ကုန်သွယ်မှုလိုငွေပြခဲ့ကြောင်း သိရှိရပါသည်။

Source : VN Express                                                                           

DOCA (ရန်ကုန်)

       အီရန်စစ်ပွဲကြောင့် ဖြစ်ပေါ်လာသည့် ပြတ်လပ်မှုများကြောင့် အစိုးရက အရေးပေါ်လုပ်ပိုင်ခွင့်များကို အသုံးပြုကာ ဒေသတွင်းထွက် ဓာတုပစ္စည်းများကို ချက်ပြုတ်ဂတ်စ် ထုတ်လုပ်မှုဆီသို့ လွှဲပြောင်းပေးခဲ့ရပြီးနောက်၊ အိန္ဒိယနိုင်ငံသည် ပလတ်စတစ်နှင့် ဆေးဝါးပစ္စည်းများ ထုတ်လုပ်ရာတွင် အသုံးပြုသည့် ရေနံဓာတုပစ္စည်းများအပေါ် ကောက်ခံသော သွင်းကုန်ခွန်ကို ပယ်ဖျက်လိုက်ကြောင်း သိရပါသည်။

          ထုတ်ကုန် ၄၀ မျိုးအပေါ် သွင်းကုန်ခွန် ကင်းလွတ်ခွင့်သည် ဇွန်လ ၃၀ ရက်နေ့အထိ အကျုံးဝင်ကြောင်း ဧပြီလ ၃ ရက်နေ့ ထုတ်ပြန်သည့် အစိုးရ၏ ထုတ်ပြန်ချက်အရ သိရပါသည်။ အိန္ဒိယနိုင်ငံသည် ထိုကဲ့သို့သော ရေနံဓာတု ဆင်းသက်လာပစ္စည်းများကို အသားတင် တင်သွင်းနေရသည့် နိုင်ငံဖြစ်သော်လည်း၊ အရည်ပျော်ရေနံဓာတ်ငွေ့ (LPG)၊ နက်ဖ်သာ (Naphtha) နှင့် အီသိန်း (Ethane) ကဲ့သို့သော ကုန်ကြမ်းများကိုအသုံးပြု၍ ပြည်တွင်း၌လည်း ထုတ်လုပ်လျက်ရှိကြောင်း သိရပါသည်။

          အီရန်နိုင်ငံအပေါ် အမေရိကန်-အစ္စရေး တိုက်ခိုက်မှုများဖြစ်ပွားပြီး ရက်ပိုင်းအကြာတွင်၊ အိန္ဒိယအစိုးရသည် ပြည်တွင်း၌ ထုတ်လုပ်သော ရေနံဓာတု အစိတ်အပိုင်းများကို အဓိကအားဖြင့် ချက်ပြုတ်ဂတ်စ်အဖြစ် အသုံးပြုသည့် LPG ထုတ်လုပ်မှုသို့ လွှဲပြောင်းအသုံးပြုရန် ကုမ္ပဏီများကို အမိန့်ကြေညာခဲ့ကြောင်း သိရပါသည်။

         အိန္ဒိယသည် ကမ္ဘာပေါ်တွင် LPG ဒုတိယအများဆုံး တင်သွင်းသည့် နိုင်ငံဖြစ်ပြီး၊ ၎င်း၏ လိုအပ်ချက် ၆၀ ရာခိုင်နှုန်းခန့်ကို ပြည်ပမှ ဝယ်ယူမှုများဖြင့် ဖြည့်ဆည်းနေရကြောင်း သိရပါသည်။ အဆိုပါလမ်းကြောင်းပြောင်းလဲလိုက်ခြင်းသည် ကုန်ကြမ်းရရှိမှုနည်းပါးခြင်း၊ ဈေးနှုန်းမြင့်တက်လာခြင်းနှင့် အပိုကြေးများ ပိုမိုပေးဆောင်ရခြင်းတို့နှင့် ရုန်းကန်နေရသည့် ရေနံဓာတု ထုတ်လုပ်သူများအပေါ် ဖိအားများဖြစ်စေခဲ့ကြောင်း သိရပါသည်။ အာရှတစ်လွှားရှိ ပလတ်စတစ်နှင့် ထုပ်ပိုးပစ္စည်း ထုတ်လုပ်သူများသည်လည်း ရေနံဓာတု စက်ရုံများ၏ ထုတ်ကုန်အပေါ် သက်ရောက်မှုရှိနေသည့် မြင့်တက်လာသော အပိုကြေးများနှင့် ရင်ဆိုင်နေကြရပြီဖြစ်ကြောင်း သိရှိရပါသည်။

Source: The Daily Star                                                              

DOCA (ရန်ကုန်)

           ဖိလစ်နိုင်ငံသည် ၎င်းနိုင်ငံအတွင်း မြင့်တက်လာသော တိရစ္ဆာန်ပရိုတင်းလိုအပ်ချက်ကို ဖြည့်ဆည်းရန်အတွက် ပြည်ပမှတင်သွင်းမှုများအပေါ် ဆက်လက်မှီခိုနေရသဖြင့် တင်သွင်းမှုပမာဏ ပိုမိုများပြားလာရာ ပြီးခဲ့သည့်နှစ်တွင် အစိုးရအနေဖြင့် ပြည်ပမှတင်သွင်းသောအသားများ မှ အကောက်ခွန်နှင့် အခွန်ငွေ စုစုပေါင်း ပီဆို ၂၂ ဘီလီယံကျော်အထိ စံချိန်တင်ရရှိခဲ့ကြောင်း သိရပါသည်။

        ပြည်သူ့လွှတ်တော်၏ ကွန်ဂရက်ဆိုင်ရာ မူဝါဒနှင့် ဘတ်ဂျက်သုတေသနဌာန (CPBRD) ၏ အစီရင်ခံစာတွင် အကောက်ခွန်ဦးစီးဌာန (BOC) ၏ အချက်အလက်များကို အသုံးပြု၍ ၂၀၂၃ ခုနှစ်မှ ၂၀၂၅ ခုနှစ်အထိ အသားတင်သွင်းမှုမှ အစိုးရ၏ အကောက်ခွန်နှင့် တန်ဖိုးသင့်အခွန် (VAT) ရရှိမှုများကို တွက်ချက်ဖော်ပြထားကြောင်း သိရပါသည်။

            CPBRD ၏ အဆိုအရ ပြီးခဲ့သည့်နှစ်တွင် အစိုးရသည် ပြည်ပမှတင်သွင်းသော အသားထုတ်ကုန်များမှ အခွန်ငွေ ပီဆို ၂၂.၄၅ ဘီလီယံ ရရှိခဲ့ပြီး၊ ၎င်းမှာ ၂၀၂၄ ခုနှစ်တွင် ကောက်ခံရရှိခဲ့သည့် ပီဆို ၁၇.၃ ဘီလီယံထက် ၃၀ ရာခိုင်နှုန်း မြင့်တက်လာခြင်းဖြစ်ကြောင်း သိရပါသည်။ ရရှိသောအခွန်ငွေ၏ ၉၉.၉ ရာခိုင်နှုန်းခန့်မှာ အကောက်ခွန်မှဖြစ်ပြီး ကျန်ရှိသောပမာဏမှာ တန်ဖိုးသင့်အခွန် (VAT) မှ ဖြစ်ကြောင်း သိရပါသည်။ အသားတင်သွင်းမှုအများစုမှာ စိုက်ပျိုးရေးကုန်စည်များဖြစ်သောကြောင့် VAT ကင်းလွတ်ခွင့် ရရှိထားကြကြောင်း သိရပါသည်။ အသားတင်သွင်းမှုအချို့ဖြစ်သော နှပ်ထားသည့်အသား၊ အမွှေးအကြိုင်ခတ်ထားသည့်အသား၊ ဆားနယ်ထားသည့်အသား သို့မဟုတ် စည်သွတ်ထားသည့် အသားထုတ်ကုန်များသည် ၁၂ ရာခိုင်နှုန်း VAT ပေးဆောင်ရကြောင်း CPBRD မှထုတ်ပြန်သော ထုတ်ပြန်ချက်များ အရသိရပါသည်။ တင်သွင်းလာသော အသားများအပေါ် ကောက်ခံသည့် အကောက်ခွန်နှုန်းထားမှာ အသားအမျိုးအစားနှင့် အမျိုးအစားခွဲခြားမှုအပေါ်မူတည်၍ ၅ ရာခိုင်နှုန်းမှ ၄၀ ရာခိုင်နှုန်းအတွင်းရှိကြောင်း သိရပါသည်။ ဝက်အတွင်းကလီစာများနှင့် စက်ဖြင့်အရိုးနွှင်ထားသော ကြက်သား (MDM) ကဲ့သို့သော အသားထုတ်ကုန်များကို ၅ ရာခိုင်နှုန်း ကောက်ခံပြီး၊ ဝက်သားကိုမူ နှစ်စဉ်ခွဲတမ်းပမာဏ အတွင်း သို့မဟုတ် အပြင် တင်သွင်းမှုအပေါ် မူတည်၍ ၁၅ ရာခိုင်နှုန်း သို့မဟုတ် ၂၅ ရာခိုင်နှုန်း အကောက်ခွန် ကောက်ခံလေ့ရှိကြောင်း သိရှိရပါသည်။

            စုစုပေါင်းရရှိငွေ၏ ထက်ဝက်ခန့်ရှိသော ဝက်သားတင်သွင်းမှုမှ အစိုးရ၏ အခွန်ရရှိငွေသည် ယခင်နှစ်က ပီဆို ၈.၉၂ ဘီလီယံ ရှိခဲ့ရာမှ ယခုနှစ်တွင် ပီဆို ၁၂.၇၂ ဘီလီယံအထိ တစ်နှစ်ထက်တစ်နှစ် ၄၂.၆ ရာခိုင်နှုန်း မြင့်တက်လာကြောင်း သိရပါသည်။ CPBRD အစီရင်ခံစာအရ ကြက်သားထုတ်ကုန်တင်သွင်းမှုမှ အစိုးရအတွက် အခွန်ငွေ ပီဆို ၇.၅၇ ဘီလီယံ ရရှိခဲ့ပြီး၊ အမဲသားတင်သွင်းမှုမှ ရရှိငွေမှာ ပြီးခဲ့သည့်နှစ်တွင် ပီဆို ၂.၁၆ ဘီလီယံအထိ ရှိခဲ့ပါသည်။

          ဘရာဇီးနိုင်ငံသည် ပြီးခဲ့သည့်နှစ်တွင် စုစုပေါင်းတင်သွင်းမှုပမာဏ၏ ၄၂.၅ ရာခိုင်နှုန်းခန့် သို့မဟုတ် မက်ထရစ်တန်ချိန် ၆၇၄,၀၄၆ တန်ခန့်ဖြင့် နိုင်ငံ၏ ထိပ်တန်းအသားတင်သွင်းရာ ရင်းမြစ်ဖြစ်လာခဲ့ပါသည်။ ၂၀၂၅ ခုနှစ်တွင် ဘရာဇီးသည် ဖိလစ်ပိုင်နိုင်ငံသို့ ဝက်သား၊ ကြက်သားနှင့် အမဲသားအများဆုံး တင်ပို့သည့် နိုင်ငံဖြစ်ခဲ့ကြောင်း သိရှိရပါသည်။

Source: Philstar                                                                        

DOCA (ရန်ကုန်)