ပြည်ပကုန်သွယ်မှုသတင်းများ

           အင်ဒိုနီးရှားနိုင်ငံသည် ရုရှားနိုင်ငံမှ ခေါင်းဆောင်၍ ဘီလာရုစ်၊ ကာဇတ်စတန်၊ အာမေးနီးယားနဲ့ ချက်ခ်နိုင်ငံတွေ ပူးပေါင်းထားတဲ့ စီးပွားရေးပေါင်းဖွဲ့မှု အဖွဲ့တစ်ခု ဖြစ်သော Eurasian Economic Union (EAEU) နှင့်  အခမဲ့ကုန်သွယ်ရေးစာချုပ် (Free Trade Agreement - FTA) များ ချုပ်ဆိုသွားမည် ဖြစ် ကြောင်း ဇွန်လ ၂၃ ရက်နေ့က တရားဝင်ကြေညာခဲ့ပါတယ်။ အဆိုပါ စာချုပ်ပါသဘောတူညီချက် များ ကြောင့် အင်ဒိုနီးရှားနိုင်ငံသည် ၎င်း၏အဓိကစိုက်ပျိုးရေးထုတ်ကုန်များဖြစ်သော ဆီအုန်း နှင့် ကော်ဖီများ ကို EAEU ၏ ဈေးကွက်သို့ ပိုမိုလွယ်ကူစွာ တင်ပို့လာနိုင်မှာဖြစ်သည့်အပြင် EAEU ၏ အဖွဲ့ဝင် နိုင်ငံ များဖြစ်သော ရုရှား၊ ကာဇတ်စတန်၊ ဘီလာရုစ်၊ အာမေးနီးယားနှင့် ချက်ခ် တို့ထံမှ ဓာတ်မြေသြဇာများကို အင်ဒိုနီးရှားနိုင်ငံထံသို့ အခွန်လျော့နည်းစျေးနှုန်းဖြင့် တင်သွင်းလာနိုင်မည်ဖြစ်ပါတယ်။ ဤကဲ့သို့ အပြန်အလှန်ဝန်ဆောင်မှုများသည် စိုက်ပျိုးရေးထုတ်လုပ်မှုအတွက် အကျိုးရှိစေမည် အပြင် ပုံမှန်အခွန်များ လျော့နည်းခြင်းကြောင့် ထုတ်ကုန်ဈေးပြိုင်နိုင်မှု မြင့်မားလာမည်ဟုလည်း မျှော်လင့်နေကြပါတယ်။

DOCA(ဧရာဝတီ)

   ထိုင်းနိုင်ငံသည် ပြည်တွင်းရှိ တောင်သူများ၏ အကျိုးစီးပွားကို ထိခိုက်စေနိုင်သော အရည် အသွေးနိမ့် ထုတ်ကုန်များကို ဝင်ရောက်မှုကာကွယ်ရန်နှင့် ဈေးကွက်တည်ငြိမ်မှုကို သေချာစေရန် အတွက် ကမ္ဘောဒီးယားမှ ပီလောပီနံတင်သွင်းမှုများကို ပိုမိုတင်းကျပ်စွာ ထိန်းချုပ်လာသည်။

    ထိုင်း စီးပွားရေးနှင့် ကူးသန်းရောင်းဝယ်ရေးဝန်ကြီး Pichai Naripthaphan က နှစ်နိုင်ငံ နယ်စပ်တွင် ကမ္ဘောဒီးယားမှ တင်သွင်းလာသော ပီလောပီနံများ၏ အရည်အသွေးကို ပိုမို တင်းကျပ်စွာစစ်ဆေးရန် နိုင်ငံခြားကုန်သွယ်ရေးဦးစီးဌာနသို့ ညွှန်ကြားထားသည်ဟု ထုတ်ဖော် ပြောကြားခဲ့သည်။ အဆိုပါ အစီအမံသည် ထိုင်းတောင်သူများ လက်ရှိရရှိနေသည့် ဈေးနှုန်းများကို ထိခိုက်စေနိုင်သော အရည်အသွေးနိမ့် ပီလောပီနံများ ဝင်ရောက်လာခြင်းကို တားဆီးရန်ဖြစ် ကြောင်း သိရှိရသည်။

    ထိုင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည် ပြည်နယ် ၅ ခုရှိ ဝင်ပေါက် ၆ ခုမှတစ်ဆင့် ကမ္ဘောဒီးယားမှ ပီလောပီနံများ တင်သွင်းရန် ခွင့်ပြုထားခြင်းဖြစ်သည်။ ပီလောပီနံ တင်သွင်းသူများသည် ကြိုတင်၍ မှတ်ပုံတင်ရမည်ဖြစ်ပြီး တင်သွင်းမည့် ပီလောပီနံနှင့် ပတ်သက် သည့် အသေးစိတ်အချက်အလက်များကို တင်ပြရမည်ဖြစ်ကြောင်း၊ တင်သွင်းလာသည့် ကုန်စည် များကို ပြည်တွင်းမှဝယ်ယူထားသော ပီလောပီနံများနှင့်ရောနှောမှုမရှိပဲ သီးသန့်ခွဲခြား၍ သိုလှောင် ရမည်ဖြစ်ကြောင်း၊ သက်ဆိုင်ရာ အာဏာပိုင်များထံသို့လည်း စဉ်ဆက်မပြတ် အစီရင်ခံတင်ပြရန် လိုအပ်ကြောင်း သိရှိရသည်။

    နိုင်ငံခြားကုန်သွယ်ရေးဦးစီးဌာနသည် နယ်စပ်ဖြတ်ကျော်စခန်း (၆) ခုတွင် တင်သွင်းလာ သော ပီလောပီနံများ၏ အရည်အသွေးကို ကျပန်းစနစ်ဖြင့် စစ်ဆေးရန်အတွက် ဝန်ထမ်းများကို လည်း ထပ်မံတာဝန်ချထားမည်ဖြစ်ပြီး စံချိန်မမီသော ပီလောပီနံတင်သွင်းမှုများကို စစ်ဆေး တွေ့ရှိပါက လိုအပ်သော စံချိန်စံညွှန်းပြည့်မီသည်အထိ အဆိုပါတင်သွင်းသူ၏ မှတ်ပုံတင်ခြင်းကို ယာယီရပ်ဆိုင်းမည်ဖြစ်သည်။

    ထို့အပြင် ပြည်တွင်းကုန်သွယ်ရေးဦးစီးဌာနသည် လတ်ဆတ်ပီလောပီနံနှင့် ပီလောပီနံ အချပ်များ၏ ဈေးနှုန်းပြောင်းလဲမှုကို ထိန်းချုပ်ရန် စည်းမျဉ်းများ ချမှတ်ထားကြောင်း၊ ကီလိုဂရမ် ၁၀၀၀၀ သို့မဟုတ် ၎င်းပမာဏထက်ပိုသော အဆိုပါကုန်စည်များအား ပြည်နယ် ၁၆ ခု အတွင်း ခရိုင်ပေါင်း ၆၀ ရှိ ကန့်သတ်ထားသော နယ်မြေများအတွင်း သို့မဟုတ် နယ်မြေပြင်ပသို့ ကြိုတင် ခွင့်ပြုချက်မရှိပဲ သယ်ယူပို့ဆောင်ခြင်းကို တားမြစ်ထားကြောင်း၊ တားမြစ်ချက်ကို ဖောက်ဖျက် ကျူးလွန်သူများသည် ပြစ်မှုထင်ရှားစီရင်ခြင်းခံရလျှင် ထောင်ဒဏ် ၅ နှစ်အထိဖြစ်စေ၊ ငွေဒဏ် ဘတ် ၁၀၀,၀၀၀ အထိဖြစ်စေ သို့မဟုတ် ဒဏ်နှစ်ရပ်လုံးဖြစ်စေ ချမှတ်ခံရနိုင်ကြောင်း သိရှိရသည်။

   ထိုင်းနိုင်ငံနှင့် ကမ္ဘောဒီးယားနိုင်ငံတို့တွင် ပီလောပီနံထုတ်လုပ်မှု ရာသီကာလ ကုန်ဆုံးခါနီး ဖြစ်သော်လည်း ဝန်ကြီးဌာနအနေဖြင့် ထိုင်းတောင်သူများ၏ အကျိုးစီးပွားကို ကာကွယ်ရန် အတွက် သွင်းကုန်များကို တင်းကျပ်စွာ ထိန်းချုပ်ရန် ကတိကဝတ်ကို ဆက်လက်စောင့်ထိန်း လုပ် ဆောင်လျက်ရှိကြောင်း၊ ထို့အပြင် ကမ္ဘာ့စျေးကွက်တွင် ရေရှည်တည်တံ့သော ယှဉ်ပြိုင်နိုင်မှုရှိ စေရန် ထိုင်းပီလောပီနံ၏ စံချိန်စံညွှန်းများ မြှင့်တင်ရေးကိုလည်း ဦးတည်ဆောင်ရွက်လျက်ရှိ ကြောင်း ဝန်ကြီး Pichai ကပြောကြားခဲ့သည်။

Source: The Nation Thailand, 21 June 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ထိုင်းနိုင်ငံ၌ စပါးဈေးနှုန်းများသည် ၂၅ ရာခိုင်နှုန်းခန့် သိသာစွာကျဆင်းလျက် ၁ တန်လျှင် ဘတ်ငွေ ၅၀၀၀ ကျော်နှုန်းထားဖြင့် ၁၇ နှစ်အတွင်း အနိမ့်ဆုံးအဆင့်သို့ရောက်ရှိခဲ့မှုအပေါ် တုံ့ပြန် ဖြေရှင်းရန်အတွက် အမျိုးသားဆန်စပါးမူဝါဒနှင့် စီမံခန့်ခွဲမှုကော်မတီ (NRPMC) ၏ ဥက္ကဋ္ဌဖြစ်သူ ဒုတိယ ဝန်ကြီးချုပ်နှင့် ဘဏ္ဍာရေးဝန်ကြီး Pichai Chunhavajira က ဇွန်လ ၂၆ ရက်နေ့တွင် အရေးပေါ် အစည်းအဝေးကျင်းပရန် ခေါ်ယူခဲ့ကြောင်းသိရှိရပါသည်။

      ဇွန်လ တတိယပတ်အတွင်း အဓိကဆန်တင်ပို့သူများက ဝယ်ယူသည့်ဈေးနှုန်းများကို သတ် မှတ်ဆုံးဖြတ်မှုကြောင့် ထိုကဲ့သို့ စပါးဈေးနှုန်းများ ကျဆင်းခဲ့ခြင်းဖြစ်ပြီး ဆန်စက်လုပ်ငန်း အများ အပြားကလည်း အလျင်စလိုရောင်းချလျက်ရှိခြင်းကြောင့် ဈေးနှုန်းထပ်မံကျဆင်းမှုကို ဖြစ်ပေါ်စေ လျက်ရှိကြောင်း The Nation သတင်းဌာနက ဖော်ပြပါသည်။

     ထိုင်းစိုက်ပျိုးရေးလုပ်ငန်းရှင်များအသင်း၏ ဥက္ကဋ္ဌ Pramote Charoensilp က လက်ရှိ ကာလ၌ တောင်သူများသို့ ကမ်းလှမ်းမှုပြုသည့် လွတ်လပ်သောဈေးကွက်ဈေးနှုန်းမှာ ထိန်းသိမ်း နိုင်မှုမရှိပဲ ကျဆင်းနေခြင်းကြောင့် အရေးပေါ်ကြားဝင်ဖြေရှင်းမှုကို လုပ်ဆောင်ရန် လိုအပ်လျက်ရှိ ကြောင်း၊ နွေစပါးစိုက်ပျိုးသော တောင်သူများသို့ စိုက်ဧရိယာ ၁ ရိုင်လျှင် ဘတ်ငွေ ၁၀၀၀ နှုန်းဖြင့် လယ်သမားတစ်ဦးလျှင်အများဆုံး ၁၀ ရိုင် အထိ တိုက်ရိုက်ငွေကြေးထောက်ပံ့ရန် NRPMC က အတည်ပြုပေးလိမ့်မည်ဟု မျှော်လင့်ကြောင်း၊ ဈေးကွက်လိုအပ်ချက်နှင့်အညီ စိုက်ပျိုးထုတ်လုပ် မှုကို လယ်သမားများက ပြန်လည်တည်ဆောက်ရာတွင် အကောက်အကူပြုစေရန်အတွက် ရည် ရွယ်ချမှတ်ထားသည့်  ဘတ်ဂျက်ရန်ပုံငွေကို ကနဦးမူလ၌ ဘတ် ၂.၈၆ ဘီလီယံ လျာထားရာမှ ဘတ် ၅ ဘီလီယံအထိ တိုးမြှင့်ပေးရဖွယ်ရှိကြောင်း ပြောကြားခဲ့သည်။

     စိုက်ပျိုးရေးပညာပေးဦးစီးဌာန၏ ပြောကြားချက်အရ ယခင်နှစ် နွေစပါးရာသီ၌ တောင်သူ အိမ်ထောင်စုပေါင်း ၃၃၇၀၀၀ က စပါးစိုက်ဧရိယာ ရိုင် ၅.၆၄ သန်း စိုက်ပျိုးမှုကို မှတ်ပုံတင်ထား ရှိခဲ့မှုနှင့် နှိုင်းယှဉ်ပါက ယခုနှစ်တွင် အိမ်ထောင်စုပေါင်း ၈၄၉၀၀၀ သည် နွေစပါးစိုက်ဧရိယာ ရိုင် ၁၁.၈၃ သန်းအထိ မှတ်ပုံတင်ခဲ့ကြောင်း၊ လယ်သမားမိသားစု မှတ်ပုံတင်မှုအရ ၁၅၁ ရာခိုင်နှုန်းနှင့် စိုက်ပျိုးမှု ဧရိယာအရ ၁၁၀ ရာခိုင်နှုန်း တိုးတက်လာခြင်းဖြစ်ကြောင်း သိရှိရသည်။

     ဈေးကွက်စီမံဆောင်ရွက်မှုများဆိုင်ရာ ဆပ်ကော်မတီသည် ရှေ့လာမည့် ၂၀၂၅-၂၀၂၆ သီးနှံ ရာသီနှစ်အတွက် စပါးစိုက်ဧရိယာ တစ်ရိုင်လျှင် ဘတ်ငွေ ၂၀၀၀ ထောက်ပံ့ပေးအပ်မည့် အစီအစဉ် ကို အတည်ပြုထားပြီး ဖြစ်ကြောင်း၊ မကြာမီသေးမီကာလ၌ ဓာတ်မြေဩဇာဈေးနှုန်း တစ်တန် လျှင် ဘတ် ၂၀၀ ပိုမိုမြင့်တက်လာမှု၊ လူနေမှုစရိတ်ကြီးမြင့်မှုများနှင့် စပါးဈေးနှုန်းကျဆင်းမှုတို့ကို ကာမိစေရန်အတွက် ယခင်နှစ်ထက် ပိုမိုလျက် တောင်သူတစ်ဦးလျှင် ၁၀ ရိုင်မှ ၂၅ ရိုင် အထိ ထောက်ပံ့ရန် ကနဦးဆွေးနွေးမှုများ ပြုလုပ်ထားကြောင်း၊ စပါးဈေးနှုန်းကျဆင်းခြင်း၊ ငွေကြေး ဖောင်းပွခြင်းနှင့် သွင်းအားစုစရိတ်မြင့်မားခြင်း စသည့် ဘက်ပေါင်းစုံမှ ရိုက်ခတ်မှုများကို တောင်သူ များခံစားနေရသဖြင့် ဖြေလျော့မှု အစီအမံများ အရေးပေါ် လုပ်ဆောင်ပေးရန် ၎င်းတို့အသင်းက အစိုးရသို့ တိုက်တွန်းထားကြောင်း Mr. Pramote က ပြောကြားခဲ့ပါသည်။

Source: The Nation Thailand, June 24, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အိန္ဒိယနိုင်ငံတွင် ပဲအဓိကစိုက်ပျိုးထုတ်လုပ်သည့် ကာနာတကာပြည်နယ်ရှိ Kalaburgi နှင့် မဟာရဋ္ဌပြည်နယ်ရှိ Latur တို့ကဲ့သို့သော နယ်မြေဒေသများတွင် ပဲစင်းငုံခွဲခြမ်းဈေးနှုန်းများသည် ၃ နှစ်တာ ကာလအတွင်း အနိမ့်ဆုံးအဖြစ် ၁ ကီလိုဂရမ်လျှင် ရူပီး ၁၀၀ နှုန်း၏ အောက်သို့ ကျဆင်း လျက်ရှိကြောင်း Hindu Business Line သတင်းဌာန၏ ဖော်ပြချက်အရ သိရှိရသည်။

 ၂၀၂၅ ခုနှစ် မိုးသီးနှံရာသီကာလ၌ စိုက်ပျိုးမှု အခြေအနေမှာ တိုးတက်လျက်ရှိပြီး ပဲစင်းငုံ နှင့် စားတော်ပဲဝါများ တင်သွင်းမှုများပြားလာခဲ့ခြင်းက ပဲစင်းငုံဈေးနှုန်းများ ကျဆင်းစေရန် အလေး ပေးလျက်ရှိသည်ဟု ပဲကုန်သွယ်ရောင်းဝယ်မှုနယ်ပယ်မှ လုပ်ငန်းရှင်များက ပြောဆိုကြသည်။

    Latur မြို့ အခြေစိုက် ပဲမျိုးစုံ ကြိတ်ခွဲပြုပြင်ရေးလုပ်ငန်းတစ်ခုဖြစ်သော Kalantri Food Products မှ အမှုဆောင်အရာရှိချုပ် Nitin Kalantri က အကောင်းဆုံး အရည်အသွေး အဆင့်ရှိ သည့် ပဲစင်းငုံခွဲခြမ်း ၁ ကီလိုဂရမ်လျှင် ၁၀၄ ရူပီးမှ ၁၀၅ ရူပီးခန့် ဈေးနှုန်း ဖြစ်ပေါ်နေချိန်တွင် ပျမ်းမျှအရည်အသွေးရှိသော ပဲစင်းငုံခွဲခြမ်း ၁ ကီလိုဂရမ်သည် ၈၉-၉၀ ရူပီးနှုန်းသာရှိကြောင်း၊ ယခင်နှစ် အလားတူကာလ၌ ဖြစ်ပေါ်ခဲ့သော ပဲစင်းငုံခွဲခြမ်း ဈေးနှုန်းများသည် ဝယ်လိုအား နည်းပါး မှုနှင့် ရောင်းလိုအားပိုလျှံမှုကြောင့် ၅၀ ရာခိုင်နှုန်းခန့် ကျဆင်းခဲ့ကြောင်း၊ လက်ရှိဈေးနှုန်းများသည် ၂၀၂၂ ခုနှစ်နောက်ပိုင်းတွင် အနိမ့်ဆုံးပင်ဖြစ်ကြောင်း ပြောကြားခဲ့သည်။

    လွန်ခဲ့သော ၂ နှစ် ကာလ၌ ပြည်တွင်းထုတ်လုပ်မှု ပြတ်လပ်ခြင်းကြောင့် အမြင့်ဈေးသို့ ရောက်ရှိနေသည့် ပဲစင်းငုံဈေးနှုန်းများသည် ရောင်းလိုအားများပြားလာစေရန် အစိုးရက တင်သွင်း ခွင့်ကို ဖွင့်လှစ်ပေးမှုနှင့်အတူ သင့်တင့်သည့် အခြေအနေသို့ ရောက်ရှိလာခဲ့သည်။ အိန္ဒိယ အစိုးရ သည် အကောက်ခွန်လွတ် ပဲစင်းငုံတင်သွင်းခွင့်ကာလကို ၂၀၂၆ ခုနှစ် မတ်လအထိ သက်တမ်း တိုးမြှင့်ပေးထားသည်။ ၂၀၂၄-၂၅ ဘဏ္ဍာနှစ်အတွင်း အိန္ဒိယ၏ ပဲစင်းငုံတင်သွင်းမှုမှာ တန်ချိန် ၁၂.၂၃ သိန်းကျော်ရှိပြီး ယခင်ဘဏ္ဍာနှစ်၌ တင်သွင်းခဲ့သည့် တန်ချိန် ၇.၇၁ သိန်းထက် ၅၉ ရာခိုင်နှုန်းခန့် ပိုမိုခဲ့ခြင်းဖြစ်သည်။

    ဈေးကွက်အခြေအနေမှာ အရောင်းအဝယ်အေးလျက်ရှိကြောင်း၊ လက်ရှိကာလ၌ ပဲစင်းငုံသည် ရောင်းလိုအားပိုလျှံသည့် ဇုန်အတွင်း ရောက်ရှိနေကြောင်း၊ ပွဲတော်ရာသီကာလ မတိုင်မီ ဝယ်လိုအားမြင့်တက်လာနိုင်မှုအရ ရှေ့လာမည့် သီတင်းပတ်များအတွင်း ဈေးနှုန်းများ မြင့်တက် လာနိုင်ခြေရှိကြောင်း၊ မုတ်သုံရာသီ၏ ဖြစ်ပေါ်တိုးတက်မှုက ဟင်းသီးဟင်းရွက်များ ထောက်ပံ့ ပေးသွင်းမှုအပေါ်ကို သက်ရောက်လျက်ရှိရာ ရှေ့လာမည့် နေ့ရက်များတွင် ပဲမျိုးစုံ စားသုံးမှုမှာ တိုးတက်လာမည်ဟု ခန့်မှန်းရကြောင်းဖြင့် Mr. Kalantri က ပြောဆိုထားသည်။

    Kalaburgi မြို့အခြေစိုက် ကာနာတကာပြည်နယ် ပဲစင်းငုံစိုက်ပျိုးသူများအသင်းမှ ဥက္ကဋ္ဌ Basavaraj Ingin ကလည်း ပဲစင်းငုံနှင့် စားတော်ပဲဝါတို့ကို တင်သွင်းမှု များပြားခြင်းကြောင့် ပဲစင်းငုံလုံးပြည့်နှင့် ပဲစင်းငုံခွဲခြမ်းတို့၏ ဈေးနှုန်းများကျဆင်းလာခြင်းဖြစ်ပြီး သီးနှံစိုက်ပျိုးရာသီအသစ် စတင်ချိန်တွင် စိုက်ပျိုးထုတ်လုပ်သူများက ၎င်းတို့လက်ဝယ်သိုလှောင်ထားသည့်ပဲများကို ဈေးကွက်သို့ ထုတ်ရောင်းခြင်းသည်လည်း ဈေးနှုန်းများအပေါ် လွှမ်းမိုးသည့် အချက်ဖြစ်ကြောင်း၊ ထို့အပြင် ဈေးနှုန်းပိုမိုသက်သာသော စားတော်ပဲဝါများ အလွယ်တကူဝယ်ယူရရှိနိုင်ခြင်းကလည်း ပဲစင်းငုံစားသုံးမှုအပေါ် သက်ရောက်လျက်ရှိကြောင်း၊ ၂၀၂၅ မိုးရာသီ၌ စိုက်ပျိုးထုတ်လုပ်သည့် ပဲစင်းငုံသီးနှံအတွက် အနိမ့်ဆုံးထားရှိ ဝယ်ယူမည့် အခြေခံရည်ညွှန်းဈေးနှုန်းကို ၁ ကွင်တယ်လျှင် ရူပီး ၈၀၀၀ နှုန်းသို့ တို့းမြှင့်လျက် ၂၀၂၄-၂၅ ဈေးကွက်ရာသီနှစ်အတွက် သီးနှံများအား ဝယ်ယူသည့် ကာလကို အိန္ဒိယအစိုးရက တိုးမြှင့်ပေးခဲ့ခြင်းတို့သည် ပဲစိုက်တောင်သူများကို အကျိုးဖြစ်ထွန်းစေလျက်ရှိကြောင်း ပြောကြားခဲ့သည်။

     အိန္ဒိယ စားသုံးသူရေးရာဦးစီးဌာန၏ အချက်အလက်များအရ နိုင်ငံတစ်ဝန်း၌ ပဲစင်းငုံခွဲခြမ်း ၏ ပျမ်းမျှလက်လီရောင်းဈေးသည် ၂၀၂၄ ခုနှစ် ဇွန်လ ၂၂ ရက်နေ့တွင် ၁ ကီလိုဂရမ်လျှင် ၁၆၁.၃ ရူပီးနှုန်း ရှိခဲ့ရာမှ ၂၀၂၅ ခုနှစ် ဇွန်လ ၂၃ ရက်နေ့၌ ၁ ကီလိုဂရမ်လျှင် ၁၂၂.၄၅ ရူပီးနှုန်းသို့ ကျဆင်းခဲ့ကြောင်း သိရှိရသည်။

Source: The Hindu Business Line , 23 Jun 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

             အမေရိကန်အစိုးရက “Trade Expansion Act of 1962” ထဲမှ ပုဒ်မ ၂၃၂ ကိုအခြေခံ၍ အမေရိကန်နိုင်ငံ အတွင်းသို့ Steel နှင့် Aluminum များ တင်သွင်းလာပါက တင်သွင်းခွန် ၅၀% အထိ တိုးမြှင့် ကောက်ခံလိုက်ကြောင်း သိရှိရပါတယ်။ အမေရိကန်နိုင်ငံ၏ ကမ္ဘာ့စီးပွားရေးအကြံပေးကုမ္ပဏီ ဖြစ်တဲ့ Boston Consulting Group (BCG) ၏ ပြောကြားချက်အရ အဆိုပါ အခွန်နှုန်းများ တိုးမြှင့်ရခြင်းသည် အမျိုးသားလုံခြုံရေးနှင့် စက်မှုထုတ်လုပ်မှုကို ပြန်လည်သက်သက်သာသာဖွံ့ဖြိုးအောင် လုပ်ဆောင်ရန် ရည်ရွယ်ချက်ဖြစ်ကြောင်း ဖော်ပြခဲ့ကြပါတယ်၊ Steel နှင့် Aluminum အခွန်တိုးခြင်းသည် အစောပိုင်းတွင် စက်မှုလုပ်ငန်းများအပေါ် သက်ရောက်မှုရှိနိုင်သော်လည်း၊ ရေရှည်အတွေးအခေါ်ဖြင့်ကြည့်လျှင် အမေရိကန် ပြည်တွင်းထုတ်လုပ်မှုကို မြှင့်တင်ခြင်း၊ နည်းပညာတီထွင်မှုတိုးတက်ခြင်းနှင့် အလုပ်အကိုင်ဖန်တီးမှု များအတွက် အခြေခံဖြစ်လာနိုင်ကြောင်း ပညာရှင်များကလည်း သုံးသပ်နေကြကြောင်း နိုင်ငံတကာ သတင်းများအရ သိရှိရပါတယ်။

DOCA(ဧရာဝတီ)