Main menu

ပြည်တွင်းကုန်သွယ်မှုသတင်း

Powered by Drupal

သီရိမင်္ဂလာဈေးရှိ သစ်သီးဝလံဈေးနှုန်းများ

            ရန်ကုန်တိုင်းဒေသကြီး၊ လှိုင်မြို့နယ် သီရိမင်္ဂလာဈေးတွင် မေလ (၂၄) ရက်နေ့မှ မေလ (၃၁) ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ဟင်္သာတ မှ  ပိန္နဲသီး (ယိုးဒယား) ကိုင်းဆက် အလုံးကြီး တစ်လုံးလျှင် ကျပ် ၂၀၀၀၀ ၊ အလုံးလတ် တစ်လုံးလျှင် ကျပ် ၁၀၀၀၀ ၊ အလုံးသေး တစ်လုံးလျှင် ကျပ် ၅၀၀၀၊ ဘီးလင်းမှ ပိန္နဲသီး (မြန်မာ သီး) အလုံးကြီး တစ်လုံးလျှင် ကျပ် ၅၀၀၀၊ အလုံးလတ် တစ်လုံးလျှင် ကျပ် ၂၀၀၀၊ အလုံးသေး တစ်လုံးလျှင် ကျပ် ၁၀၀၀၊ ၊ ကျိုက်ကော် မှ နာနတ်သီး အလုံးကြီး တစ်လုံးလျှင် ကျပ် ၁၅၀၀ မှ ၁၂၀၀၊ အလုံးလတ် တစ်လုံးလျှင် ကျပ် ၁၀၀၀ မှ ၈၀၀ ၊ အလုံးသေး တစ်လုံးလျှင် ကျပ် ၅၀၀ မှ ၃၀၀၊ ဝမ်းတွင်း မှ ဖရဲသီး (211) အလုံးကြီး တစ်လုံးလျှင် ကျပ် ၃၀၀၀ မှ ၂၀၀၀၊ အလုံးလတ် တစ်လုံးလျှင် ကျပ် ၂၅၀၀ မှ ၁၀၀၀၊ အလုံးသေး တစ်လုံးလျှင် ကျပ် ၁၅၀၀ ၊  မှော်ဘီ၊ တိုက်ကြီးမှ မာလကာသီး အလုံးကြီး တစ်လုံးလျှင် ကျပ် ၅၀၀၊ အလုံး လတ် တစ်လုံးလျှင် ကျပ် ၄၀၀ မှ ၃၀၀၊ အလုံးသေး တစ်လုံးလျှင် ကျပ် ၂၀၀ မှ ၁၀၀၊ ပုပ္ပါး မှ သရက်သီး (စိန်တလုံး)အိပ်စွပ် အလုံး ၂၇ ပါ ဂျပ်ဖာ တစ်ဖာလျှင် ကျပ် ၁၅၀၀၀၊ အလုံးလတ် အလုံး ၃၆ ပါ ဂျပ်ဖာ တစ်ဖာလျှင် ကျပ် ၁၂၀၀၀၊ အလုံးသေး အလုံး ၄၅ ပါ ဂျပ်ဖာ တစ်ဖာလျှင် ကျပ် ၉၀၀၀ ၊ တွံတေး မှ သရက်သီး (ရင်ကွဲ) အလုံးကြီး ၅၅ လုံးပါ တောင်းတစ်တောင်းလျှင် ကျပ် ၁၀၀၀၀၊ အလုံးလတ် အလုံး ၆၅ ပါ တောင်းတစ်တောင်းလျှင် ကျပ် ၉၀၀၀၊ အလုံးသေး အလုံး ၈၅ ပါ တောင်း တစ်တောင်းလျှင် ကျပ် ၇၅၀၀၊ ဟင်္သာတ မှ သရက်သီး (စိန်တလုံး)  အလုံးကြီး အလုံး ၂၇ လုံးပါ တောင်း တစ်တောင်းလျှင် ကျပ် ၁၀၀၀၀၊ အလုံးလတ် အလုံး ၃၆ ပါ တောင်းတစ်တောင်းလျှင် ကျပ် ၈၀၀၀၊  အလုံးသေး အလုံး ၄၅ ပါ တောင်းတစ်တောင်းလျှင်   ကျပ် ၇၀၀၀၊ ရေး မှ ဒူးရင်းသီး အလုံးကြီး တစ်လုံးလျှင်  ကျပ် ၈၀၀၀၊ အလုံးလတ် တစ်လုံးလျှင် ကျပ် ၅၀၀၀၊ အလုံးသေး တစ်လုံးလျှင် ကျပ် ၄၀၀၀ မှ ၃၀၀၀၊ မော်လမြိုင်မှ ကြက်မောက်သီး (မြန်မာ သီး) အလုံးကြီး ၁၀၀ ပါ ကျပ် ၆၅၀၀၊ အလုံးသေး ကျပ် ၃၅၀၀ ဈေးတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန်ဟင်းသီး ဟင်းရွက်စိုက်ပျိုး ထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

ကြက်သွန်နီ(အနှံယူမျိုးစေ့) စိုက်ခင်းများ စိုက်ပျိုးထွက်ရှိမှု အခြေအနေ

           ဆိပ်ဖြူမြို့နယ်သည် မကွေးတိုင်းဒေသကြီး၊ ပခုက္ကူခရိုင်အတွင်းတွင်ရှိပြီး ကြက်သွန်နီ ဆောင်းစိုက်/ပင်စိုက်ကို စိုက်ဧကအများဆုံး စိုက်ပျိုးထုတ်လုပ်ပြီး ရောင်းဝယ်ဖောက်ကားလျက်ရှိပါသည်။ ကြက်သွန်နီစိုက်တောင်သူနှင့် စိုက်ဧကနှစ်စဉ်များပြားသော်လည်း ကြက်သွန်နီ (အနှံယူ မျိုးစေ့) စိုက်ပျိုးတောင်သူနည်းပါးပြီး စိုက်ဧကမှာလည်းနည်းပါးကြောင်း၊ ယခုနှစ် ဆိပ်ဖြူမြို့နယ် ရွာသစ်ကျေးရွာတွင် ကြက်သွန်(အနှံယူ)စိုက်တောင်သူ(၂၅)ဦးခန့်ရှိပြီး၊ (၅)ဧကခန့်စိုက်ပျိုးထားရှိ ကြောင်း၊ ရွှေဖလား(ထိပ်မောက်)အခွံထူ(ဒေသမျိုး)ကိုသာ စိုက်ပျိုးပြီး ကိုင်းကျွန်းမြေမာများတွင် အများဆုံး စိုက်ပျိုးကြောင်း တောင်သူမှတစ်ဆင့် သိရှိရပါသည်။

          ကြက်သွန်နီ(အနှံယူ) (၁)ဧကစိုက်ပျိုးလျှင် ကြက်သွန်နီ(အလတ်စ)ပိဿာ(၃၅၀)ခန့်ဝယ်ယူ စိုက်ပျိုးရကြောင်း၊ (၁)ပိဿာလျှင်(၂၀၀)ကျပ်ခန့်ဝယ်ယူစိုက်ပျိုးခဲ့ရပြီး ယခင်နှစ်စိုက်ပျိုးချိန်တွင် (၁)ပိဿာလျှင် (၈၀၀)ကျပ်ဈေးနှုန်းဖြင့် ဝယ်ယူစိုက်ပျိုးခဲ့ရကြောင်း၊ ကြက်သွန်ဥမျိုးဈေးနှုန်းအပေါ် မူတည်ပြီး ကုန်ကျစရိတ်အနည်းအများ ကွာခြားကြောင်း၊ ဒီဇင်ဘာလတွင်စတင်စိုက်ပျိုးပြီး မတ်လတွင် ပွင့်နှံများကို ဆွတ်ခူးရိတ်သိမ်းကြောင်း၊ ကိုင်းကျွန်းမြေသားအမာများတွင် စိုက်ပျိုးခြင်းဖြစ်ပြီး ရေသွင်းစိုက်ပျိုးရသော သီးနှံတစ်မျိုးဖြစ်ကြောင်း၊ စိုက်ပျိုးချိန်မှစတင်ပြီး ရိတ်သိမ်းချိန်အထိ ရေ(၅) ကြိမ်ခန့်သွင်းရကြောင်း၊ ရေသွင်းအကြိမ်တိုင်း ရေမသွင်းခင်ရှေ့က မှိုဆေး၊ ပိုးသတ်ဆေး၊ အားဆေးများပက်ဖြန်းခြင်း၊ သွင်းအားစုအနေဖြင့် နွားချေးမှုန့်၊ နှမ်းဖတ်၊ ပဲဖတ်အမှုန့်များကို ပက်ဖြန်းခြင်းဖြင့် အပင်ကြီးထွားပြီး အထွက်နှုန်းကောင်းမွန်စေကြောင်း သိရှိရပါသည်။

         စိုက်ပျိုးထွက်ရှိမှုမှာ ကြက်သွန်နီ(အနှံယူမျိုးစေ့) (၁)ဧကလျှင် ကြက်သွန်နီ ပိဿာ(၃၅၀)ခန့် စိုက်ပျိုးကြောင်း၊ (၁)ပိဿာစိုက်ပျိုးလျှင် မျိုးစေ့(၂)ဗူးခန့်ထွက်ရှိကြောင်း၊ (၁)ဧကစိုက်ပျိုးလျှင် ပျမ်းမျှမျိုးစေ့ (၅)တင်းခန့် ထွက်ရှိကြောင်း သိရှိရပါသည်။ ပြန်လည်ရောင်းချဖြန့်ဖြူးရာတွင် ဆိပ်ဖြူမြို့နယ်ဒေသတွင်းရှိ ကြက်သွန်နီချောင်းစိုက်/ပင်စိုက်၊ လယ်ကွက်မြေသား ပင်စိုက်တောင်သူများမှ ကြက်သွန်စိုက်ပျိုးရန်အတွက် မျိုးစေ့များ ဝယ်ယူခြင်းနှင့် စလင်းမြို့နယ်ဒေသတွင်းနှင့် နီးစပ်ရာ မြို့နယ်များရှိ ပွဲစားများမှ လာရောက်ဝယ်ယူကြောင်း၊ ဈေးနှုန်းဈေးကွက်အနေဖြင့် ကြက်သွန်နီရောင်းဈေး အနိမ့်အမြင့်ပေါ်တွင် မူတည်ပြီး မျိုးစေ့ဈေးကွက် ကောင်းမွန်ကြောင်း၊ ယခင်နှစ်များတွင် ကြက်သွန်နီမျိုးစေ့(၁)ပြည်လျှင် (၃၅၀၀၀ မှ ၂၅၀၀၀)ကျပ်အထိ ဈေးနှုန်းများဖြင့် အရောင်းအဝယ်ဖြစ်ခဲ့ပြီး မျိုးစေ့(၁)တင်းလျှင် ကျပ်(၄)သိန်းဝန်းကျင်ခန့် အရောင်းအဝယ်ဖြစ်ခဲ့ကြောင်း၊ (၂၀၂၀-၂၀၂၁) ဘဏ္ဍာနှစ်တွင် ကြက်သွန်နီ မျိုးစေ့ (၁)ပြည်(၁၀၀၀၀)ကျပ်၊ (၁)တင်းလျှင် (၁)သိန်း၆သောင်းကျပ်ဖြင့် အရောင်းအဝယ်ဖြစ်ခဲ့ကြောင်း၊ မျိုးစေ့ဈေးနှုန်းများ ကျဆင်းသွားရခြင်းမှာ ယခင်(၂)နှစ်ခန့်က ကြက်သွန်နီဈေးနှုန်းများ (၂၀၀)ကျပ်ထိ ဈေးနှုန်းကျဆင်းသွားခြင်းကြောင့် အရှုံးပေါ်မှုများ၍ စိုက်ပျိုးတောင်သူနှင့် စိုက်ဧကများလျော့နည်းသွားခြင်း၊ ကြက်သွန်နီမျိုးစေ့များ ဝယ်သူမရှိသလောက်နည်းပါး၍ မျိုးစေ့အရောင်းအဝယ်မဖြစ်ခြင်းကြောင့် ဈေးနှုန်းများကျဆင်းသွားခြင်းဖြစ်ကြောင်း၊ ကြက်သွန်နီအရောင်းအဝယ်ဖြစ်မှု ဈေးနှုန်းအတက်အကျပေါ်  မူတည်ပြီး မျိုးစေ့ဈေးကွက်မှာလည်း အပြောင်းအလဲရှိကြောင်း၊ ယခုနှစ်ကြက်သွန်နီသီးနှံပေါ်ချိန် ဈေးနှုန်းဈေးကွက်ကောင်းပြီး ဈေးနှုန်းများမြင့်တက်လာပါက ကြက်သွန်နီမျိုးစေ့ ဈေးနှုန်းလည်းကောင်းလာမည်ဖြစ်ကြောင်း၊ ကြက်သွန်အနှံယူစိုက်ခင်းများ၏ တစ်ဧကကြက်သွန်ဥ အထွက်နှုန်းမှာ မျိးစေ့ယူစိုက်ခင်းဖြစ်၍ အလေအလွင့်များပြီး ကြက်သွန်ဥတွင် အနှံအူတိုင်များပါ ရှိပြီး ကျစ်လစ်သိပ်သည်းမှုမရှိ၍ အလေးချိန် လျော့နည်းခြင်းကြောင့် ကြက်သွန်နီပိဿာ (၁၀၀၀) ဝန်းကျင်ခန့်သာ ထွက်ရှိကြောင်း၊ အနှံများကိုဆွတ်ခူးပြီး ကျန်ရှိသောကြက်သွန်ဥများကို ပြန်လည်တူးဖော်ရာတွင် ဝင်ငွေနှင့်ကုန်ကျစရိတ်မမျှတမှုကြောင့် တူးဖော်ခြင်းမရှိဘဲ အလုပ်သမားများမှ တူးဖော်ယူပြီး ကြက်သွန်များကို ကြက်သွန်ကြော်လုပ်ငန်း၊ အကြော်ဖိုများသို့ တစ်ပိဿာလျှင် (၂၀၀)ကျပ်ဖြင့် ရောင်းချရကြောင်း သိရှိရပါသည်။   

       ကြက်သွန်နီမျိုးစေ့(အနှံယူ)(၁)ဧကစိုက်ပျိုးလျှင် မျိုးဥဝယ်ယူခ၊ မြေပြုပြင်ခ၊ နွားချေး၊ အာမို၊ မြေဩဇာမျိုးဝယ်ယူခ၊ ရေသွင်းခ၊ အလုပ်သမားငှားရမ်းခ စုစုပေါင်း(၇)သိန်းကျပ်ခန့် ကုန်ကျပြီး ယခုနှစ်တွင် မျိုးစေ့(၁)ပြည်(၂၅၀၀၀)ကျပ်၊ (၁)တင်းလျှင်(၄)သိန်းကျပ်ဖြင့် ရောင်းချရပါက (၁)ဧက ဝင်ငွေမှာ သိန်း(၂၀)ကျပ်ခန့်ရရှိ၍ အကျိုးအမြတ်အနေဖြင့် (၁၃)သိန်းခန့်ရရှိကြောင်း စိုက်တောင်သူ ၏ ပြောကြားချက်အရ သိရှိရပါသည်။ တောင်သူများအနေဖြင့် ကြက်သွန်နီ(အနှံယူ)စိုက်ခင်းများကို တစ်ပိုင်တစ်နိုင်သာ စိုက်ပျိုးကြပြီး ဈေးကွက်စီးပွားဖြစ် ဧကအများအပြားစိုက်ပျိုးမှုနည်းပါးရခြင်းမှာ မျိုးစေ့ပေါ်ချိန်စောသော်လည်း ပြန်လည်ရောင်းချချိန်နောက်ကျ၍ ငွေပေါ်ချိန် နောက်ကျခြင်း ကြောင့် တောင်သူများမှာ စိုက်ပျိုးမှုနည်းပါးကြောင်း၊ ယခုနှစ်တွင် ကြက်သွန်ဈေးကွက်(၁)ပိဿာ လျှင်(၇၀၀)ကျပ်ဝန်းကျင်ခန့် ဈေးနှုန်းရှိ၍ ယခင်နှစ်ထက် ဈေးနှုန်းသိသိသာသာ မြင့်တက်လာ၍ ကြက်သွန်မျိုးစေ့ ဈေးနှုန်းများလည်း မြင့်တက်လာနိုင်မည်ဟု ထင်ရကြောင်း၊ ကြက်သွန်မျိုးစေ့ ဝယ်လိုအားကောင်း၍ ဈေးကွက်ကောင်းလျှင် စိုက်ပျိုးတောင်သူများအနေဖြင့် ယခင်နှစ်များထက် တိုးချဲ့စိုက်ပျိုးလာနိုင်မည်ဖြစ်ကြောင်း  ကုန်သည်လုပ်ငန်းရှင်တစ်ဦး၏ ပြောကြားချက်အရ သိရှိရပါသည်။

DOCA(မကွေး)

 

ဆိပ်ဖြူ ကြက်သွန်နီ မေလ(စတုတ္ထ)ပတ်အတွင်း စီးဆင်းမှုအခြေအနေ

             ဆိပ်ဖြူမြို့အနောက်ပိုင်းရပ်ကွက်ရှိ ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင်သို့ မေလ(၂၂)ရက်မှ(၃၁)ရက်အတွင်း ကြက်သွန်နီအသစ်များ ဆိပ်ဖြူမြို့နယ်ဒေသတွင်း နေရာအနှံ့အပြားမှ နေ့စဉ်ဝင်ရောက်လျက်ရှိပါသည်။ တစ်ရက်လျှင်ပျမ်းမျှ ကြက်သွန်နီ ကုန်ချိန်ပိဿာ (၃) သောင်းခန့် (၁)ပတ်အတွင်း စုစုပေါင်းပိဿာ (၃)သိန်းဝန်းကျင်ခန့် ကုန်စည်ဒိုင်သို့ ဝင်ရောက်ခဲ့ပြီး  မြို့ပေါ်ရှိ ကြက်သွန်ကုန်သည်ဂိုဒေါင်များသို့ (၁)ပတ်အတွင်း ကုန်ချိန် (၃)သိန်းခန့် ဝင်ရောက်ခဲ့ကြောင်း၊ မေလ(စတုတ္ထပတ်)အတွင်း ကုန်စည်ဒိုင်နှင့် ကုန်သည်(ဂိုဒေါင်)များ အရောင်းအဝယ်ဖြစ်မှု စုစုပေါင်းမှာ ကြက်သွန်နီပိဿာ(၆)သိန်း ဝန်းကျင်ခန့်ရှိကြောင်း ကုန်စည်ဒိုင်အသင်းဝင် ကုန်သည်ပွဲစားမှတစ်ဆင့် သိရှိရပါသည်။

            (၁)ပတ်အတွင်း ကြက်သွန်နီ(၁)ပိဿာ ထိပ်စရှယ်အမြင့် ဆုံးဈေးနှုန်းမှာ(၇၂၅)ကျပ်မှ (၆၅၀)ကျပ်ထိ အနိမ့်စ အမြင့်ဆုံးဈေးနှုန်းမှာ (၅၅၀)ကျပ်မှ (၅၀၀)ကျပ် ထိ ဈေးနှုန်းအသီးသီးဖြင့် အရောင်းအဝယ်ဖြစ်ခဲ့ကြောင်း၊ ကြက်သွန်နီထွက်ကုန် အရည်အသွေးများ မတူညီခြင်းကြောင့် ဈေးနှုန်းများ ကွာခြားကြောင်း၊ ယခင်(၁)ပတ် ကြက်သွန်နီ အမြင့်ဆုံး ဈေးနှုန်း မှာ(၇၀၀)ကျပ်ဖြစ်ပြီး ယခု(၁)ပတ် အမြင့်ဆုံးဈေးမှာ(၇၂၅)ကျပ် ဈေးဖြင့် အရောင်းအဝယ်ဖြစ်၍ ယခင်(၁)ပတ်ထက် (၂၅)ကျပ်ခန့် ဈေးနှုန်း မြင့်တက်သွားကြောင်း၊ အနိမ့်စအမြင့်ဆုံး ဈေးနှုန်းမှာ ယခင်(၁)ပတ်က (၅၅၀)ကျပ်၊ ယခု(၁)ပတ် (၅၅၀)ကျပ်ဖြစ်၍ ဈေးနှုန်းအတက်အကျမရှိကြောင်း၊ ယခု(၁)ပတ်အတွင်း ပြည်ပဝယ်လက်အနည်းငယ်လိုက်၍ ဈေးနှုန်းအနည်းငယ် မြင့်တက်ကြောင်း၊ သိသိသာသာ ဈေးမြင့်တက်ခြင်း မရှိသေးကြောင်း  ကုန်စည်ဒိုင်အသင်းဝင်ကုန်သည်တစ်ဦးထံမှ သိရှိရပါသည်။

           ဆိပ်ဖြူမြို့တွင် ကြက်သွန်နီအသစ်(၁)ပိဿာလျှင် လက်လီဈေးနှုန်းအနေဖြင့် ထိပ်စရှယ် (ကျပ်၁၀၀၀/၉၀၀)၊ လတ်(ကြီး)(ကျပ် ၈၀၀/၇၀၀)၊ လတ်(သေး)(ကျပ် ၆၀၀/၅၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ ကုန်စည်စီးဆင်းမှုအနေဖြင့် မေလ(တတိယပတ်)အတွင်း ဆိပ်ဖြူမြို့မှ ရန်ကုန်တိုင်းဒေသကြီး ဘုရင့်နောင်ပွဲရုံ၊ ပြည်မြို့၊ ဧရာဝတီတိုင်းဒေသကြီး ပုသိမ်မြို့နှင့် မြဝတီ၊ မော်လမြိုင်၊ စစ်တွေမြို့များသို့ နေ့စဉ် (၆/၁၂)ဘီး မော်တော်ယာဉ်များဖြင့် ကြက်သွန်နီ ပျမ်းမျှပိဿာ (၆)သိန်း/တန်ချိန်(၃)သောင်းခွဲခန့် ကုန်စည်စီးဆင်းခဲ့ကြောင်း သိရှိရပါသည်။

DOCA(မကွေး)

 

မုံရွာကုန်စည်ဒိုင် ဈေးကွက်အခြေအနေ

              မေ ၃၀ ရက် မုံရွာကုန်စည်ဒိုင်၏ ကုန်စည်ဈေးနှုန်းပေါက်ဈေးများမှာ ဂျုံဖြူ (၁)တင်း ကျပ် ၄၄၀၀၀၊ ဂျုံအထွက်တိုး (၁)တင်းကျပ် ၃၉၀၀၀၊ 929(ကုလားပဲ) (၁)တင်းကျပ် ၄၆၀၀၀၊ ထိုင်ဝမ်(ကုလားပဲ) (၁)တင်း ကျပ် ၄၅၀၀၀၊ V2 (ကုလားဖြူလုံးကြီး) (၁)တင်း ကျပ်၄၉၀၀၀၊ ပဲစဉ်းငုံ (၁)တင်း ကျပ် ၄၂၂၀၀၊ ပဲတီစိမ်းကြီး(သစ်) (၁)တင်း ကျပ် ၄၆၀၀၀၊ ပဲတီစိမ်းသေး(သစ်) (၁)တင်း ကျပ် ၃၉၀၀၀၊ ပဲကြီး (၁)တင်း ကျပ် ၆၄၀၀၀၊ ပဲနီရိုးရိုး (၁)တင်း ကျပ် ၄၄၀၀၀၊ ပဲနီကြား (၁)တင်း ကျပ်၄၆၅၀၀၊ ပဲလွန်းပြာ (၁)တင်း ကျပ်၂၈၀၀၀၊ ပဲလွန်းဖြူ (၁)တင်း ကျပ် ၃၀၀၀၀၊ ပဲပုတ် (၁)တင်း ကျပ်၆၀၀၀၀၊ မတ်ပဲ (၁)တင်း ကျပ် ၄၆၀၀၀၊ ပဲယင်းဝါကြီး (၁)တင်း ကျပ် ၄၂၀၀၀၊ ပုဂံပဲ (၁)တင်း ကျပ်၆၀၀၀၀၊ ထောပတ်ပဲ (၁)တင်း ကျပ် ၄၀၅၀၀၊ မြေထောက်ပဲ (၁)တင်း ကျပ် ၅၄၀၀၀၊ နှမ်းဖြူ (၁)တင်း ကျပ်၅၂၀၀၀၊ နှမ်းနက် (၁)တင်း ကျပ်၆၅၀၀၀၊ နှမ်းညို (၁)တင်း ကျပ် ၅၁၀၀၀၊ နှမ်းနီ (၁)တင်း ကျပ် ၅၁၀၀၀ ၊ ပြောင်းဖူး စီပီ (၁)တင်း ကျပ် ၁၈၀၀၀၊ ပြောင်းနီ (၁)တင်း ကျပ်၁၂၀၀၀ အသီးသီး ဖြစ်ပေါ်နေကြောင်း သိရသည်။

            ဧပြီလ၏ ဈေးနှုန်းနှင့်နှိုင်းယှဉ်ပါက ဂျုံဖြူ (၁)တင်း ကျပ် ၇၀၀၀၊ ဂျုံအထွက်တိုး (၁)တင်းကျပ် ၆၀၀၀၊ ထိုင်ဝမ်(ကုလားပဲ) (၁)တင်း ကျပ် ၄၀၀၀၊ V2 (ကုလားဖြူလုံးကြီး) (၁)တင်း ကျပ်၄၅၀၀၊ 929(ကုလားပဲ) (၁)တင်းကျပ် ၄၅၀၀၊ ပဲစဉ်းငုံ (၁)တင်း ကျပ် ၅၀၀၊ ပဲတီစိမ်းကြီး(သစ်) (၁)တင်း ကျပ် ၁၅၀၀၊ ပဲတီစိမ်းသေး(သစ်) (၁)တင်း ကျပ် ၂၀၀၀၊ ပဲကြီး (၁)တင်း ကျပ် ၂၀၀၀၊ ပဲနီရိုးရိုး (၁)တင်း ကျပ် ၂၀၀၀၊ ပဲနီကြား (၁)တင်း ကျပ်၄၀၀၀ ၊ပဲပုတ် (၁)တင်း ကျပ်၁၀၅၀၀၊ ပုဂံပဲ (၁)တင်း ကျပ်၁၅၀၀၊ ထောပတ်ပဲ (၁)တင်း ကျပ် ၅၀၀၊ မြေထောက်ပဲ (၁)တင်း ကျပ် ၆၀၀၀၊ ပဲယင်းဝါကြီး (၁)တင်း ကျပ် ၂၀၀၀ ခန့် ဈေးများတက်နေပြီး ပဲလွန်းပြာ ၊ပဲလွန်းဖြူ ၊မတ်ပဲ ၊ပြောင်းနီ ပဲများ ဈေးငြိမ်နေ၍ နှမ်းဖြူ (၁)တင်း ကျပ်၈၀၀၀၊ နှမ်းနက် (၁)တင်း ကျပ်၅၀၀၀၊ နှမ်းညို (၁)တင်း ကျပ် ၁၀၀၀၊ နှမ်းနီ (၁)တင်း ကျပ် ၁၀၀၀ ၊ ပြောင်းဖူး စီပီ (၁)တင်း ကျပ် ၁၂၀၀ခန့်ကျဆင်းနေကြောင်း သိရသည်။

DOCA(စစ်ကိုင်း)

မုံရွာမြို့နယ်အတွင်း ပဲမျိုးစုံဈေးနှုန်းနှင့် ဈေကွက်အခြေအနေ

           စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် Online စနစ်ဖြင့် အရောင်းဝယ်ဖြစ်နေကြောင်း သိရပါသည်။ ဇွန်လ ပထမပတ်တွင် ဖြစ်ပေါ်နေသော ပဲဈေးနှုန်းများမှာ ပဲတီစိမ်း(ကြီး)တစ်တင်းကျပ် ၄၅၅၀၀၊ ပဲစဉ်းငုံ တစ်တင်းကျပ် ၄၂၀၀၀၊ မတ်ပဲ တစ်တင်းကျပ် ၄၆၃၀၀၊ ကုလားပဲ ထိုင်ဝမ် တစ်တင်းကျပ် ၄၄၃၀၀၊ ကုလားပဲ 929 တစ်တင်းကျပ် ၄၂၇၀၀၊ ကုလားပဲ V2(သစ်) တစ်တင်းကျပ် ၄၈၀၀၀၊ ကုလားပဲ V3,7 တစ်တင်းကျပ် ၅၁၀၀၀ ဈေးနှုန်းများဖြင့် အရောင်းအဝယ် ဖြစ်နေကြောင်း သိရပါသည်။

            ဂျုံဖြူသန့်တစ်တင်း ကျပ် ၄၄၃၀၀၊ ပဲကြီး(သစ်) တစ်တင်း ကျပ် ၆၆၀၀၀၊ ပဲနီလုံး ရိုးရိုး တစ်တင်း ကျပ် ၄၃၀၀၀၊ ပဲနီလုံးကြား တစ်တင်းကျပ် ၄၅၅၀၀၊  ပဲပုတ်စေ့(ဗမာ) တစ်တင်း ကျပ် ၄၉၃၀၀၊ ပဲပုတ်စေ့ (ရှမ်း)တစ်တင်း ကျပ် ၄၁၇၀၀၊ ထောပတ်ပဲ တစ်တင်းကျပ် ၄၂၀၀၀၊  မြေထောက်ပဲ တစ်တင်းကျပ် ၅၇၀၀၀၊ ပုဂံပဲ တစ်တင်းကျပ် ၆၀၀၀၀၊ ပဲလွန်းဖြူတစ်တင်း ကျပ် ၃၂၀၀၀၊ ပဲလွန်းပြာ တစ်တင်း ကျပ် ၃၀၀၀၀၊ ပဲယင်းဝါတစ်တင်း ကျပ် ၄၂၀၀၀၊ အစေ့ထုတ်ပြောင်း(CP) တစ်တင်း ကျပ် ၁၈၃၀၀၊ ပြောင်းနီ တစ်တင်း ကျပ် ၁၃၆၅၀၊ ပြောင်းဖြူ တစ် တင်းကျပ် ၁၄၅၀၀၊ ဆီထွက်သီးနှံများ ဖြစ်သော နှမ်းသီးနှံ ပေါက်ဈေးနှုန်း များမှာ နှမ်းညိုတစ်တင်းကျပ် ၅၁၀၀၀၊ နှမ်းနက်တစ်တင်းကျပ် ၇၂၀၀၀၊ နှမ်းဖြူ တစ်တင်းကျပ် ၅၃၀၀၀၊ မြေပဲလုံး ဆံနီ တစ်ပိဿာ ကျပ်၃၉၅၀၊ မြေပဲလုံးဆံဖြူ တစ်ပိဿာကျပ် ၄၂၀၀၊ ပဲဖတ်တစ်ပိဿာကျပ် ၁၉၅၀၊ နှမ်းဖတ် တစ် ပိဿာကျပ် ၁၃၅၀၊ နေကြာဖတ် တစ်ပိဿာကျပ် ၁၀၇၀ ဈေးနှုန်းအသီးသီးဖြင့် အရောင်းအဝယ် ဖြစ်နေကြောင်း သိရပါသည်။

           ယခုအပတ်ဈေးနှုန်းများမှာ ယခင်အပတ်နှင့် နှိုင်းယှဉ်လျှင် ပဲဈေးနှုန်းများနှင့် ဆီထွက်သီးနှံဈေးနှုန်းများဖြစ်သော မြေပဲဆံနှင့် နှမ်းသီးနှံ ဈေးနှုန်းများမှာလည်း အနည်းငယ်‌ ဈေးမြင့်တက်နေကြောင်း သိရှိရပါသည်။

DOCA(စစ်ကိုင်း)

တမူးနယ်စပ်ကုန်သွယ်ရေးစခန်းမှ ပို့ကုန်၊သွင်းကုန် တင်ပို့နိုင်မှုအခြေအနေ

            မြန်မာ-အိန္ဒိယနယ်စပ်ရှိ တမူးကုန်သွယ်ရေးစခန်း၏ ၂၀၂၂ ခုနှစ်၊ မေလ တတိယပတ်တွင် လယ်ယာထွက်ပစ္စည်းအနေဖြင့် မက်မွန်သီး(၅.၄၀၀)တန်၊ တန်ဖိုးအမေရိကန်ဒေါ်လာသန်း (၀.၀၀၁)၊ စက်မှုကုန်ချောအနေဖြင့် စီးကရက်(၂၂.၅၁၂)တန်၊ တန်ဖိုးအမေရိကန်ဒေါ်လာသန်း (၀.၀၅၄)၊ အခြား ပစ္စည်းအနေဖြင့် နန့်ဖာလုံကုန်စုံ တန်ဖိုး အမေရိကန်ဒေါ်လာသန်း (၀.၀၃၀)၊ စုစုပေါင်း (၈၄.၀၁၂) တန်၊ တန်ဖိုးအမေရိကန်ဒေါ်လာသန်း(၀.၄၅၆)တင်ပို့နိုင်ခဲ့ပြီး သွင်းကုန်အနေဖြင့် လုပ်ငန်းသုံး ပစ္စည်းများဖြစ်သည့်ဓာတ်မြေသြဇာ(၄၅.၀၀၀)တန်၊ တန်ဖိုးအမေရိကန်ဒေါ်လာသန်း(၀.၀၂၃)၊ ဂျုံမှုန့် (၅၂.၄၆၀)တန်၊တန်ဖိုးအမေရိကန်ဒေါ်လာသန်း(၀.၀၂၆)၊ စုစုပေါင်း(၉၇.၄၆၀)၊ တန်ဖိုးအမေရိကန်ဒေါ်လာ သန်း (၀.၀၄၉)တင်သွင်းနိုင်ခဲ့ကြောင်း  သိရှိရသည်။

          ၂၀၂၂ ခုနှစ်၊ မေလ စတုတ္တပတ်တွင် လယ်ယာထွက်ကုန်ပစ္စည်းအနေဖြင့် မက်မွန်သီး (၂.၃၀၀)တန်၊ တန်ဖိုးအမေရိကန်ဒေါ်လာသန်း(၀.၀၀၁)၊ စက်မှုကုန်ချောအနေဖြင့် စီးကရက် (၈၁.၇၁၂)တန်၊ တန်ဖိုးအမေရိကန်ဒေါ်လာသန်း(၀.၃၄၀)၊ အခြားပစ္စည်းအနေဖြင့် နန့်ဖာလုံကုန်စုံ တန်ဖိုးအမေရိကန် ဒေါ်လာသန်း(၀.၁၁၅)၊ စုစုပေါင်း(၈၄.၁၀၂)တန်၊ တန်ဖိုးအမေရိကန်ဒေါ်လာသန်း (၀.၄၅၆) တင်ပို့နိုင်ခဲ့ကြောင်းသိရှိရသည်။ လုပ်ငန်းသုံးပစ္စည်းဖြစ်သည့် ဂျုံမှုန့် (၄၇.၅၄၀)တန်၊ တန်ဖိုး အမေရိကန်ဒေါ်လာသန်း(၀.၀၂၄) စုစုပေါင်း(၄၇.၅၄၀)တန်၊ တန်ဖိုးအမေရိကန် ဒေါ်လာသန်း (၀.၀၂၄)  တင်သွင်းနိုင်ခဲ့ကြောင်း သိရှိရသည်။ ယခင်အပတ်နှင့်နှိုင်းယှဉ်လျှင် ယခုအပတ်တွင် တမူးနယ်စပ် ကုန်သွယ်ရေးစခန်းအနေဖြင့် ပို့ကုန် (၅၆.၁၀၀)တန်၊ အမေရိကန် ဒေါ်လာသန်း(၀.၃၇၁) ပိုမိုတင်ပို့နိုင်ခဲ့ပြီး သွင်းကုန်(၄၉.၉၂၀)တန်၊ တန်ဖိုးအမေရိကန်ဒေါ်လာသန်း (၀.၀၂၅)လျော့နည်းတင်သွင်းနိုင်ခဲ့ကြောင်း ကုန်သွယ်ရေးဦးစီးဌာန၊ တမူးနယ်စပ်ကုန်သွယ်ရေးစခန်းမှတစ်ဆင့် သိရှိရပါသည်။

DOCA(စစ်ကိုင်း)

 

စစ်ကိုင်းခရိုင် သရက်သီးစိုက်ပျိုးထုတ်လုပ် ရောင်းဝယ်မှုအခြေအနေ

            စစ်ကိုင်းမြို့နယ်အနေဖြင့် ၂၀၂၁-၂၀၂၂ သရက်သီးစိုက်ဧက (၂၇၁၂) ဧကရှိပြီး အထွက်နှုန်းမှာ တစ်ဧကလျှင် အလုံး(၄၀၀၀)မှ (၇၀၀၀)ခန့်ထွက်ရှိကြောင်း၊ သရက်ပင်သည် ပုံမှန်အားဖြင့် စတင်စိုက်ပျိုးပြီး (၃)နှစ်သားအရွယ်တွင် အသီးစတင်သီးကြောင်း၊ ဒီဇင်ဘာလကုန်နှင့် ဇန်နဝါရီလအစတွင် အဖူးစတင် ထွက်ရှိကြောင်း၊ ပန်းပွင့်ပြီး (၄၅-၆၀)ရက်အတွင်း အသီးသည် ကြက်ဥလုံး အရွယ်သို့ ရောက်ရှိလာလျှင် အိတ်စွပ်ခြင်းလုပ်ငန်းကို စတင်ဆောင်ရွက်ပြီး အိတ်စွပ်ပြီး (၁)လ သို့မဟုတ် (၄၅)ရက်အခန့်အကြာတွင် အသီးစတင်ခူးဆွတ်နိုင်ကြောင်း၊ အသီးခူးဆွတ်ခြင်းကို ဧပြီလမှ ဩဂုတ်လကုန်အထိ ခူးဆွတ်ရောင်းချ နိုင်ကြောင်း သိရှိရပါသည်။

           ယခုနှစ် အပွင့်ပွင့်ချိန်တွင် လေပြင်းတိုက်ခတ်၍ အထွက်နှုန်းမှာ ယခင်နှစ်နှင့် နှိုင်းယှဉ်ပါက (၃)ပုံ (၁)ပုံခန့် လျော့နည်းမှု ရှိသည်။သရက်သီးစွပ်အိတ်များကို တရုတ်နိုင်ငံနှင့် စင်္ကာပူအခြေစိုက် မြန်မာရွှေကုမ္ပဏီမှ ဝယ်ယူကြောင်း၊ ပုလိပ်မြို့တွင် ရုံးခွဲနှင့် စက်ရုံရှိကြောင်း၊ သရက်သီးရောင်းချပြီးမှသာ ငွေချေသည့် စနစ်ကျင့်သုံးကြောင်း၊  အသီးစွပ်အိတ်ဈေးနှုန်းမှာ (၁)ထပ်အိတ် (၂၀)ကျပ်မှ (၂၃)ကျပ်၊ (၂)ထပ်အိတ် (၃၀)ကျပ်၊ (၃၅)ကျပ်၊ (၃၈)ကျပ် ဖြစ်ကြောင်း၊ (၁)ထပ်အိတ်ကို အသီးမလှ၊ ပယ်သီးများအတွက်သာ အသုံးပြုပြီး ဈေးကွက်တင်ပို့ရန်အတွက် (၂)ထပ်အိတ်များကို အသုံးပြုကြောင်း၊ (၂)ထပ်အိတ်များအား စနစ်တကျ အသုံးပြုပါက (၃)နှစ်ထိ သုံးစွဲ၍ ရကြောင်း၊ ယခုနှစ် အသီးစွပ်အိတ် (၁)သိန်း ဝယ်ယူ အသုံးပြုမည်ဆိုပါက  စနစ်တကျအသုံးပြုပါက အသီးစွပ်အိတ် (၈)သောင်းခန့်အား နောက်နှစ် ပြန်လည်သုံးစွဲရန်အတွက် သိမ်းဆည်းထားနိုင်ကြောင်း သိရှိရပါသည်။

          ဈေးနှုန်းဈေးကွက်အနေဖြင့် ယခုလက်ရှိ ပြည်တွင်းဈေးနှုန်းမှာ တစ်လုံးလျှင် (၃၀၀)ကျပ်မှ (၅၀၀) ကျပ်၊ ပြည်ပဈေးနှုန်းမှာ စိန်တစ်လုံးသရက် (၃၅-၄၀)လုံးပါ ၁၆ ကီလို တစ်ခြင်းလျှင် (၁၆၅)ယွမ်၊ ပယ်သီး (၁၂၀)ယွမ် ဈေးရှိကြောင်း သိရှိရပါသည်။

         ထွက်ရှိလာသော သရက်သီးများအား ဖြန့်ဖြူးရောင်းချရာတွင် မူဆယ်၊ ရန်ကုန်၊ မန္တလေး၊ ရွှေဘို၊ စစ်ကိုင်း၊ မြင်းမူနှင့် မုံရွာ အစရှိသည့် မြို့အသီးသီးမှာ အဝယ်ဒိုင်များနှင့် မြန်မာရွှေကုမ္ပဏီတို့မှ ကိုယ်စားလှယ် ပွဲစားများမှ တဆင့်လည်းကောင်း၊ ခြံပြတ်စာချုပ်ချုပ်ဆို၍ သရက်ခြံသို့ လာရောက်ဝယ်ယူခြင်း(သို့မဟုတ်)ကားများဖြင့် ရွာသို့ တိုက်ရိုက်လာရောက်ဝယ်ယူနိုင်ကြောင်း သတင်းရရှိပါသည်။

DOCA(စစ်ကိုင်း)

စစ်ကိုင်းတိုင်းဒေသကြီးအတွင်း ဖြစ်ပေါ်နေသော စပါး/ဆန်ဈေးနှုန်းများနှင့် စီးထွက်မှုအခြေအနေ

                 စစ်ကိုင်းတိုင်းဒေသကြီးသည်မေလ(နောက်ဆုံး)ပတ်၌ စပါး/ဆန်ဈေးနှုန်းများမှာ ဆန်ပိုဒေသများ ဖြစ်သော ကလေးခရိုင်၊ ကသာခရိုင်၊ စစ်ကိုင်းခရိုင်၊ မုံရွာခရိုင်နှင့် ရွှေဘိုခရိုင်တို့တွင် ဈေးအေးနေပါသည်။

              စစ်ကိုင်းတိုင်းဒေသကြီးအတွင်း မေလ(နောက်ဆုံးပတ်)တွင်ဖြစ်ပေါ်နေသော အခြေခံစားကုန်ဈေးနှုန်းများမှာ ရွှေဘိုခရိုင်တွင် ရွှေဘိုပေါ်ဆန်း(စပါး) တင်း၁၀၀လျှင် ကျပ်(၁၅၅၀၀၀၀)၊ ပေါ်ဆန်း (ဆန်)၂၄ ပြည်ပါ တစ်အိတ်လျှင်ကျပ်  ၅၅၀၀၀၊ ဧရာမင်း(စပါး)တင်း ၁၀၀လျှင် ၁၀၅၀၀၀၀၊ ဧရာမင်း(ဆန်) ၂၄ ပြည်ပါ တစ်အိတ် ကျပ် ၄၄၀၀၀၊ ရေဦးမြို့မှ ပေါ်ဆန်း (စပါး) တင်း ၁၀၀လျှင် ကျပ် ၁၃၅၀၀၀၀၊ ပေါ်ဆန်း(ဆန်) တစ်အိတ်လျှင်ကျပ် ၅၂၀၀၀၊  ဧရာမင်း (စပါး) တင်း၁၀၀ လျှင် ၉၀၀၀၀၀၊ ဧရာမင်း (ဆန်)၂၄ ပြည်ပါ တစ်အိတ်  ၄၀၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။

         ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၈၅၀၀၀၀၊ ဧည့်မထ(ဆန်)‌ ၂၄ ပြည်ပါ တစ်အိတ်မှာ ကျပ် ၂၇၀၀၀၊ ငစိန်(စပါး) တင်း ၁၀၀ လျှင် ၈၀၀၀၀၀ ၊ ငစိန်(ဆန်)၂၄ပြည်ပါ တစ်အိတ်မှာ ၂၆၅၀၀၊ ဧရာမင်း (စပါး)တင်း ၁၀၀ လျှင် ကျပ် ၁၀၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ်မှာကျပ် ၃၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

            ကသာခရိုင်၊ အင်းတော်မြို့နယ်မှ မှော်ဘီ(၂)(စပါး) တင်း ၁၀၀လျှင် ကျပ်၈၅၀၀၀၀၊ မှော်ဘီ(၂) ဆန် ၂၄ပြည် တစ်အိတ်လျှင် ကျပ် ၃၅၀၀၀၊ ဆင်းဧကရီ(၃)(စပါး) တင်း၁၀၀လျှင် ကျပ် ၇၅၀၀၀၀၊ ဆင်းဧကရီ-၃ဆန် ၂၄ပြည် တစ်အိတ်မှာကျပ် ၃၀၀၀၀၊ ဧရာမင်း (စပါး) တင်း ၁၀၀ လျှင် ကျပ် ၉၅၀၀၀၀၊ ဧရာမင်းဆန် ၂၄ ပြည်ဆန်တစ်အိတ်လျှင် ကျပ် ၃၉၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

            မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၁၀၀၀၀၀၀၊  ဧရာမင်း(ဆန်) ၂၄ပြည် တစ်အိတ်မှာ ကျပ် ၄၁၀၀၀ ဖြင့် အရောင်းအဝယ် ဖြစ်နေကြောင်း သိရပါသည်။

           စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ မေလ(စတုတ္တ)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၃၂၀၀၀၊ မန္တလေးသို့ အိတ်ရေ ၄၆၃၀၀၊ မကွေးသို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း (တောင်)သို့ အိတ်ရေ ၆၅၀၀၊ ရှမ်း(မြောက်) သို့အိတ်ရေ ၆၅၀၀၊ စုစုပေါင်းအိတ်ရေ (၁၀၂၃၀၀) အိတ်၊ တန်အားဖြင့် (၅၁၁၅) စီးထွက်ခဲ့ပြီး၊ ယခု မေလ(နောက်ဆုံး)ပတ်တွင် စစ်ကိုင်းတိုင်းဒေသကြီးမှ အခြား တိုင်း ဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၂၈၀၀၀၊ မန္တလေးသို့ အိတ်ရေ ၄၁၇၀၀၊ မကွေး သို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း(တောင်)သို့ အိတ်ရေ ၆၀၀၀၊ ရှမ်း (မြောက်)သို့အိတ်ရေ ၆၀၀၀၊ စုစုပေါင်းအိတ်ရေ (၉၂၇၀၀) အိတ်၊ တန်အားဖြင့် (၄၆၃၅) စီးထွက်ခဲ့သည့်အတွက် ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၉၆၀၀)တန်အားဖြင့် (၄၈၀)လျော့နည်းစီးထွက်ခဲ့ပါကြောင်း သိရှိရပါသည်။

DOCA(စစ်ကိုင်း)

                                       

စီးပွားရေးနှင့်ကုန်သွယ်ရေးသတင်းများ

ထိုင်း အစားအစာ ပြည်ပတင်ပို့မှု ၅ % တိုးတက်မည်ခန့်မှန်း

          ရုရှား ယူကရိန်းပဋိပက္ခနှင့် နိုင်ငံအများအပြားတို့တွင် အစားအစာ မလုံလောက်မှုအ‌ပေါ် စိုးရိမ်မှုများ‌ကြောင့် ယခုနှစ်အတွက် ထိုင်းအစားအစာပြည်ပတင်ပို့မှုအနေဖြင့် ပထမသုံးလပတ်တွင် ၂၆ % တိုးတက်ခဲ့ပြီးနောက် ယခုနှစ်တစ်နှစ်လုံးအတွက် ၅% တိုးတက်မည်ဟု ထိုင်းအစားအစာ ပြည်ပတင်ပို့သူများကမျှော်မှန်းထားကြကြောင်း၊ ထိုင်းအစားအစာထုတ်လုပ်သူများအသင်းဂုဏ်ထူး ဆောင်ဥက္ကဋ္ဌက ရုရှား ယူကရိန်းပဋိပက္ခကြောင့် နိုင်ငံအများအပြားတို့အနေဖြင့်အစားအစာဖူလုံရေး နှင့်ပတ်သက်၍ စိုးရိမ်ပူပန်မှုများတိုးပွားလာကာ အစားအစာတင်သွင်းသူများအနေဖြင့်လည်း အစား အစာပြတ်လပ်မှုမရှိစေရေးအတွက် အရှိန်မြှင့်တင်ဆောင်ရွက်လျှက်ရှိကြကြောင်း၊ ထိုင်းနိုင်ငံသည် ရုရှား ယူကရိန်းပဋိပက္ခမှ အကျိုးအမြတ်ရရှိခဲ့ပြီး ပထမသုံးလပတ်တွင်ထိုင်းဘတ်ငွေ(၃၂၄) ဘီလီယံ အထိတင်ပို့နိုင်ခဲ့ပြီး ထိုင်းဘတ်ငွေအားနည်းခြင်းကလည်းအဓိကမောင်းနှင်အားတစ်ရပ်ဖြစ်ခဲ့ကြောင်း‌၊ အများဆုံးတင်ပို့နိုင်ခဲ့သည့် ထုတ်ကုန်(၁၀)မျိုးတွင်  အပင်နှင့်တိရစ္ဆာန်များမှ အဆီနှင့်စားသုံးနိုင်သောဆီ များ၊ သကြား၊ တင်လဲရည်၊ အစေ့အဆံများ၊ ပြောင်း၊ အသားများနှင့် အခြားစားသုံးနိုင်သောတိရစ္ဆာန် အစိတ်အပိုင်းများ၊ရေဘဝဲ၊အိမ်မွေးတိရစ္ဆာန်၊အစားအစာများ၊ ဆန်၊ငါးနှင့်ဟင်းခတ်အမွှေးအကြိုင်များ ပါဝင်ကြောင်း၊ တရုတ်နိုင်ငံအနေဖြင့် Zero Covid Policy  အရ  အဓိကနယ်စပ်စစ်ဆေးရေးဂိတ်များကို ပိတ်လိုက်ခြင်းကြောင့် လတ်ဆတ်၊ အေးခဲနှင့် အခြောက်ခံထားသော သစ်သီးဝလံများမှလွဲ၍ အစား အစာထုတ်ကုန်အများစုမှာ ပထမသုံးလပတ်တွင် တိုးတက်တင်ပို့နိုင်ခဲ့ကြောင်းသိရှိရပါသည်။

(ရင်းမြစ်- ဘန်ကောက်မြို့စီးပွားရေးသံမှူးပေးပို့သည့်သတင်း)

စီးပွားရေးစင်္ကြန်သစ်များအတွက် အခွင့်အရေးများပေးရန်ပြင်ဆင်လျှက်ရှိ

          ထိုင်းအစိုးရအနေဖြင့် စီးပွားရေးစင်္ကြန်(၄)ခုတို့တွင် ထုတ်ကုန်များ၏တန်ဖိုးကို မြှင့်တင်သွား ရန်နှင့်လူ့စွမ်းအားအရင်းအမြစ်ဖွံ့ဖြိုးတိုးတက်ရေးတို့အတွက် BCG စီးပွားရေးဟုခေါ်သည့်Bio၊ Circular နှင့် Green Economy လုပ်ငန်းများ၊ တီထွင်ဆန်းသစ်မှုနှင့် အဆင့်မြင့်နည်းပညာများ၊ R & D စသည့် လုပ်ငန်းများတွင် ရင်းနှီးမြှုပ်နှံသူများအား အမြင့်ဆုံးမက်လုံးများပေး၍ကမ်းလှမ်းသွားရန် စီစဉ်ထား ရာ အဆိုပါမက်လုံးအသစ်များကို ဝန်ကြီးချုပ် ပရာယွတ် ဉီး‌ဆောင်သည့် ရင်းနှီးမြှုပ်နှံမှုဘုတ်အဖွဲ့ အစည်းအဝေးတွင်မကြာမီဆုံးဖြတ်လိမ့်မည်ဖြစ်ကြောင်း၊ဝန်ကြီးချုပ်ဦးဆောင်သည့်အထူးစီးပွားရေး ဇုန်မူဝါဒကော်မတီက မေလ(၅)ရက်နေ့တွင် အထူးစီးပွားရေးဇုန်(၄)ခုကိုအတည်ပြုပေးခဲ့ပြီး အဓိက အားဖြင့် အရှေ့ပိုင်းစီးပွားရေးစင်္ကြန်နှင့်ဆင်တူဖြစ်စေရန်ရည်ရွယ်ကြောင်း၊ ဒေသတွင်းစီးပွားရေးကို မြှင့်တင်ရန်နှင့် တိုင်းဒေသကြီးများသို့ ဝင်ငွေနှင့်ပတ်သက်၍ ဗဟိုချုပ်ကိုင်မှုကိုဖြန့်ဝေပေးရန်ဖြစ် ကြောင်း၊ အဆိုပါဇုန်အသစ်(၄)ခုဖြစ်သည့် မြောက်ပိုင်းစီးပွားရေးစင်္ကြန်တွင် Digital ဗဟိုအချက် အခြာအဖြစ်မြှင့်တင်ရန် သတင်းဆက်သွယ်ရေး ကွန်ယက်ချိတ်ဆက်မှု၊ Smart City စီမံကိန်းနှင့် အော်ဂဲနစ်အစားအစာတို့အတွက် အခြေခံအဆောက်အဉီများကို ထောက်ပံ့ပေးရန်တို့အား အထူး အာရုံစိုက်သွားမည်ဖြစ်ကြောင်း‌၊ အရှေ့မြောက်ပိုင်းစီးပွားရေးစင်္ကြန်တွင် ဇီဝစီးပွားရေးနှင့် ၎င်း၏ ထောက်ပံ့ရေးကွင်းဆက်အတွက် ထုတ်လုပ်မှုအခြေစိုက်စခန်းဖြစ်လာရန် မျှော်မှန်းထားကြောင်း၊ အနောက်ပိုင်း ဗဟိုစီးပွားရေးစင်္ကြန်တွင် အော်ဂဲနစ်အစားအစာထုတ်လုပ်ရေး အခြေစိုက်စခန်း ဖြစ် လာစေရန်နှင့် Smart လယ်ယာစိုက်ပျိုးရေးမျှော်မှန်းထားပြီး အရှေ့ပိုင်းစီးပွားရေးစင်္ကြန်၊ မြန်မာ စသည်တို့နှင့် ကွန်ယက်ချိတ်ဆက်ဆောင်ရွက်သွားကာ ဖွံ့ဖြိုးတိုးတက်လာစေရန် ရည်ရွယ်ထား ကြောင်း၊ တောင်ပိုင်းစီးပွားရေးစင်္ကြန်တွင် မြေယာ၊ ရေကြောင်း၊ စွမ်းအင်၊ဒီဂျစ်တယ်နှင့်လူ့စွမ်းအား စသည့်နယ်ပယ်(၅)ခုတွင် ချိတ်ဆက်မြှင့်တင်သွားရန်ရည်ရွယ်ပြီး လယ်ယာကဏ္ဍ၊ ဇီဝ-ဓါတုနှင့်ဇီဝ စီးပွားရေးနှင့် ကျန်းမာရေးခရီးသွားလုပ်ငန်းတို့တွင် နည်းပညာနှင့် R & D တို့အတွက် အခြေခံ အဆောက်အဦ ဖွံ့ဖြိုးတိုးတက်ရေးကိုထောက်ပံ့ကူညီရန် ဒီဇိုင်းထုတ်ထားကြောင်းသိရှိရပါသည်။

(ရင်းမြစ်- ဘန်ကောက်မြို့စီးပွားရေးသံမှူးပေးပို့သည့်သတင်း)

ကမ္ဘာ့နိုင်ငံအသီးသီး၏ပို့ကုန်ကန့်သတ်ချက်များမြင့်တက်လာ

          ကမ္ဘာ့စားနပ်ရိက္ခာဈေးနှုန်းများ စံချိန်တင်မြင့်တက်လာခြင်း၊ စွမ်းအင်နှင့်ဓါတ်မြေဩဇာ ကုန် ကျစရိတ်များမြင့်တက်လာခြင်းနှင့်ရုရှားနှင့်ယူကရိန်းပဋိပက္ခတို့ကြောင့် နိုင်ငံအချို့သည်အစားအစာ တင်ပို့မှုကန့်သတ်ချက်များကို စတင်စေခဲ့ကြောင်း၊ မေလလယ်အထိ နိုင်ငံတကာ စားနပ်ရိက္ခာမူဝါဒ သုတေသနအဖွဲ့အစည်း(IFPRI)သည် အစားအစာနှင့်ဓါတ်မြေဩဇာထုတ်ကုန်များပေါ် တင်ပို့မှု ကန့် သတ်ပြုလုပ်ထားသည့်နိုင်ငံပေါင်း ၂၃ နိုင်ငံကိုမှတ်တမ်းတင်ခဲ့ကြောင်း၊ ပို့ကုန်ကန့်သတ်ချက်များ သည် ပို့ကုန်များကို ရပ်တန့်ရန်(သို့)ရပ်တန့်ရန်ရည်ရွယ်သောမူဝါဒများဖြစ်ကြောင်း၊ စားနပ်ရိက္ခာ တင်ပို့မှုကန့်သတ်ချက်များသည် ပြည်တွင်း စားနပ်ရိက္ခာဈေးနှုန်းများကို လျှော့ချရန်နှင့် ပြည်တွင်း စားနပ်ရိက္ခာ ဖူလုံမှုကို မြှင့်တင်ရန်ရည်ရွယ်ကြောင်း၊ ပို့ကုန်ကန့်သတ်ရေးမူဝါဒများတွင် ပို့ကုန်ခွန် ကောက်ခံခြင်း၊ ပို့ကုန်လိုင်စင်ခွင့်ပြုချက်လိုအပ်ခြင်းနှင့် ပို့ကုန်တားမြစ်ခြင်းတို့ပါဝင်ကြောင်း၊ ပို့ကုန် ကန့်သတ်ခြင်းကို တစ်နိုင်ငံတည်း‌ဆောင်ရွက်ပါက အချို့‌သောအခြေအနေများတွင် ပြည်တွင်း ဈေးနှုန်းများကိုလျှော့ချရန် အလားအလာရှိသော်လည်း နိုင်ငံအများအပြားက ကန့်သတ်ချက်ကို ကျင့်သုံးလာသည်နှင့်အမျှဈေးနှုန်းမတည်ငြိမ်မှု၊ထိတ်လန့်တကြားဝယ်ယူမှု၊ရှားပါးမှုနှင့်သိုလှောင်မှုတို့ ဖြစ်နိုင်ချေပိုများလာနိုင်ကြောင်း၊ ယနေ့အထိ ကမ္ဘာ့ဈေးကွက်အပေါ် သက်ရောက်မှုအကြီးဆုံး အစားအစာတင်ပို့မှုကန့်သတ်ချက်များမှာ အင်ဒိုနီးရှားက စားအုန်းဆီတင်ပို့မှုကို တားမြစ်ထားခြင်း၊ အိန္ဒိယနိုင်ငံက ဂျုံတင်ပို့မှုထိန်းချုပ်ထားခြင်းနှင့် ရုရှားက အစေ့အဆံ၊ဆီထွက်သီးနှံများနှင့် သကြား တင်ပို့မှုကိုကန့်သတ်ထားခြင်းနှင့် ကာဇက်စတန် က ဂျုံနှင့်ဂျုံမှုန့်ကိုခွဲတမ်းဖြင့် တင်ပို့စေခြင်းတို့ဖြစ် ကြောင်း၊ ဩစတြေးလျ သည်  ၂၀၂၂-၂၀၂၃ ခုနှစ် သီးနှံစိုက်ပျိုးရာသီအတွက် အပြုသဘောဆောင် သော အလားအလာကောင်းများရှိနေရာ ဩစတြေးလျ ပို့ကုန်လုပ်ငန်းရှင်များသည် ပို့ကုန်ကန့်သတ် ချက်များကြောင့် ဖန်တီးထားသောထောက်ပံ့မှုဆိုင်ရာကွာဟချက်အချို့ကို ဖြည့်ဆည်းပေးနိုင်မည့် အနေအထားသို့ရောက်ရှိနေကြောင်း၊ ကမ္ဘာ့ဈေးကွက်တွင် မသေချာမရေရာမှုများ တိုးတက်လာနေ ချိန်တွင် ဩစတြေးလျ၏အရည်အသွေးမြင့် စိုက်ပျိုးမွေးမြူရေးထုတ်ကုန်များကို ယုံကြည်စိတ်ချရ သောကုန်ပစ္စည်းများထောက်ပံ့သူဖြစ်ရေး ဂုဏ်သတင်းက အထူးအရေးကြီးကြောင်းသိရှိရပါသည်။

(ရင်းမြစ်-ကင်ဘာရာမြို့စီးပွားရေးသံမှူးပေးပို့သည့်သတင်း)

အင်ဒိုနီးရှားစားအုန်းဆီမူဝါဒပြောင်းလဲပြန်

          အင်ဒိုနီးရှားနိုင်ငံစက်မှုဝန်ကြီးဌာနက ဟင်းချက်ဆီလက်ကားရောင်းဈေးအတွက်  အစိုးရက ထောက်ပံ့ကြေးပေးသည့်အစီအစဉ် ရုပ်သိမ်းခြင်းကို ဇွန်လ (၇)ရက်နေ့မှစ၍သက်ရောက်သည်ဟု ကြေညာခဲ့ကြောင်း၊စားအုန်းဆီထုတ်လုပ်သူများက အဓိကကျသည့် စားသောက်ကုန်ဖြစ်သော ဟင်း ချက်ဆီကို ဈေးကွက်ပေါက်ဈေးထက်လျော့နည်းနေသော အစိုးရပြဌာန်းသည့်ဈေးနှုန်းဖြင့် ရောင်းချ ပေးရသည့်အတွက် စားအုန်းဆီထုတ်လုပ်သူများကို အစိုးရက ထောက်ပံ့ကြေးပေးအပ်နေသော အစီ အစဉ်ကို ရပ်ဆိုင်းလိုက်ခြင်းဖြစ်ကြောင်း‌၊ ကမ္ဘာ့စားအုန်းဆီကြမ်း Crude Palm Oil (CPO) ဈေးနှုန်း များ မြင့်တက်နေသည့်အလျောက် အင်ဒိုနီးရှား ပြည်တွင်း စားအုန်းဆီသန့်ဈေးနှုန်းက  တစ်လီတာ လျှင် ရူပီးယား ၂၀၀၀၀ ပေါက်ဈေး ဖြစ်နေချိန်တွင်  အစိုးရသတ်မှတ်သည့်ဈေးနှုန်း တစ်လီတာ လျှင် ရူပီးယား ၁၄၀၀၀ (၀.၉၆ ဒေါ်လာ)ဖြင့် စားအုန်းဆီထုတ်လုပ်သူများက ဈေးကွက်ကို ‌ပေးသွင်း ကြရကြောင်း၊ နစ်နာသည့်ဈေးနှုန်းကွာဟချက်ကို အစိုးရထံတွင်လျှောက်ထားပြီး ထောက်ပံ့ကြေး ရယူသည့်အစီအစဉ်ကိုရုပ်သိမ်းလိုက်ခြင်းဖြစ်ကြောင်း၊ ထောက်ပံ့ကြေးကို စားအုန်းဆီထောက်ပံ့ရေး ရန်ပုံငွေဌာန (Palm Oil Support Fund Agency)က ထုတ်ပေးနေရာ အဆိုပါထောက်ပံ့ကြေး ပေး သည့်အစီအစဉ်ကို ၂၀၂၂ ခုနှစ်၊မေလ(၃၁)ရက်တွင် ရပ်ဆိုင်းခဲ့ကြောင်း၊ထောက်ပံ့ကြေးအစီအစဉ်ကို လက်ကား ဟင်းချက်ဆီ ပြည်သူ့အစီအစဉ် Bulk cooking oil public program အစီအစဉ်ဖြင့် အစားထိုးလိုက်ကြောင်း‌၊ ၎င်းအစီအစဉ်က အများဆုံးဈေးနှုန်းများနှင့် ပြည်တွင်းဈေးကွက်အတွက်  ဟင်းချက်ဆီထုတ်လုပ်ရန် စားအုန်းဆီကြမ်းခွဲတမ်းများကိုလည်း ချမှတ်ကြောင်း၊ ကုန်သွယ်ရေး ဝန်ကြီးဌာန၊စိုက်ပျိုးစက်မှုဌာန ညွှန်ကြားရေးမှူးချုပ်က အစိုးရသတ်မှတ်ဈေးနှုန်းဖြင့် မပျက်မကွက် ရောင်းချရသည့်အတွက် နစ်နာရခြင်းများကို ငွေကြေးအစား ပြည်ပပို့ကုန် ခွဲတမ်းယူမည်လားဟု ကုမ္ပဏီ(၆၁)ခုအားမေးမြန်းခဲ့ရာ (၃၅) ခုက ပြည်ပတင်ပို့ရန် ခွဲတမ်းရယူလိုသည်ဟု ဖြေကြားခဲ့ကြ ကြောင်း၊ ကုမ္ပဏီ( ၆၁ )ခုတွင် ( ၅) ခုသာထောက်ပံ့ကြေးထုတ်ယူခဲ့သော်လည်း ကျန်ကုမ္ပဏီများက လိုအပ်သောစာရွက်စာတမ်းများတင်ပြရန် ပျက်ကွက်နေကြကြောင်း၊ မူဝါဒအသစ်အကြိုကာလ၌ အစိုးရက ဟင်းချက်ဆီလက်ကားဈေးနှုန်းကို အများဆုံးဈေးနှုန်း တစ်ကီလိုလျှင် ရူပီးယား ၁၅၅၀၀ သတ်မှတ်ထားပြီး ဈေးကွက်ပေါက်ဈေးက တစ်ကီလိုလျှင် ၁၆၆၂၀ ဖြစ်ကြောင်းသိရှိရပါသည်။

(ရင်းမြစ်-Myanmar Food Guide မှရရှိသည့်သတင်း)

သစ်သီးတင်ကားများအား ဇွန်လ(၁ )ရက်နေ့မှ စတင်၍ စစ်ဆေးမှုများဖြေလျှော့ပေး

          မြန်မာတရုတ်နယ်စပ်ဝမ်တိန်ဘက်မှ တရုတ်ပြည်မထဲသို့ထွက်ခွာမည့် သစ်သီးတင်ကားများ အား၂၀၂၂ ခုနှစ်၊ဇွန်လ(၁)ရက်နေ့မှစ၍ တရုတ်နိုင်ငံဘက်မှ စစ်ဆေးမှုများ ဖြေလျှော့ပေးခဲ့သည်ဟု မူဆယ်ကုန်စည်ဒိုင်အသင်းဥက္ကဋ္ဌက ဆင်ဟွာသတင်းသို့ပြောကြားခဲ့ကြောင်း၊ ယခင်က သစ်သီးကား များကို  နေရာ ၅ ခုခန့်၌ဆေးဖြန်းပြီး ယခု နေရာ ၂ ခု ခန့်၌သာဆေးဖြန်းရပြီး ဆေးဖြန်းဂိတ်များ လျှော့ပေးသော်လည်း လက်ရှိတွင် ယာဉ်မောင်းများကို အစားထိုးဖြင့်သာသွားရကြောင်း၊ကိုဗစ် ၁၉ ရောဂါနှင့်ပတ်သက်၍ ယခင်ကစာရွက်စာတမ်း ၄ မျိုးခန့်လိုသော်လည်းယခု ၂ မျိုးခန့်သာယူရ သဖြင့်သစ်သီးတင်ကားများနှင့်ပတ်သက်၍ဖြေလျှော့မှုများစွာဆောင်ရွက်ခဲ့ကြောင်း၊ ဆေးဖြန်းသည့် ဖြေလျှော့မှုများပေးသဖြင့်သစ်သီးများညှိုးနွမ်းမှုနည်းပါးသွားပြီးအသီးကားများအဆင်ပြေလာသကဲ့သို့ သစ်သီးကားများအချိန်ကြာရှည်စောင့်ဆိုင်းရခြင်းမလိုအပ်တော့သဖြင့် ကုန်သည်များအနေဖြင့် ဇွန်လ(၁)ရက်နေ့မတိုင်ခင်နှင့်နှိုင်းယှဉ်ပါကပိုမိုအကျိုးရှိလာကာမြန်မာတရုတ်နယ်စပ်ဂိတ်ဖြစ်သောကျင်စန်းကျော့ဂိတ်၌ နေ့စဉ်ကုန်တင်ယာဉ် အစီး(၄၀)ခန့်အဝင်အထွက်ရှိပြီးလက်ရှိတွင် မြန်မာ့ သရက်သီးများ တင်ပို့မှုများနေသည်ဟု အသင်းဥက္ကဋ္ဌက ပြောကြားခဲ့ကြောင်းသိရှိရပါသည်။

(ရင်းမြစ်-Myanmar Food Guide မှရရှိသည့်သတင်း)

စားအုန်းဆီ လက်ကားရည်ညွှန်းဈေးနှုန်း တစ်ပိဿာ ငွေကျပ် ၅၆၄၅ ဖြစ်ကြောင်း ထုတ်ပြန်ကြေညာ

နေပြည်တော် ဇွန် 5

               စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး   စားအုန်းဆီ အဓိက ထုတ်လုပ်တင်ပို့သည့် မလေးရှားနိုင်ငံ နှင့် အင်ဒိုနီးရှားနိုင်ငံတို့တွင် ဖြစ်ပေါ်နေသည့် FOB ဈေးနှုန်းများကို နေ့စဉ် စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်း တွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်း ဈေးနှုန်းကို ထုတ်ပြန်ပေးလျက်ရှိပါသည်။

               ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများ၌ စားအုန်းဆီ ဈေးနှုန်းများ ယခင် အပတ်ထက် အနည်းငယ် ကျဆင်းလာခဲ့ပြီး တစ်ပတ်အတွင်း ဖြစ်ပေါ်ခဲ့ သည့် FOB ဈေးနှုန်းများအပေါ် အခြေခံ၍ တွက်ချက်မှုအရ ၂၀၂၂ ခုနှစ်၊ ဇွန်လ 6 ရက်နေ့မှ ဇွန်လ 12 ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၅64၅ ကျပ် ဖြစ်ကြောင်း ထုတ်ပြန်ကြေညာထားသည်။

               ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

               အဆိုပါ အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm ၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

သတင်းစဉ်

Pages

Subscribe to RSS - ပြည်တွင်းကုန်သွယ်မှုသတင်း