ပြည်တွင်းကုန်သွယ်မှုသတင်း

     မန္တလေးတိုင်းဒေသကြီး ၊ ကျောက်ဆည်ခရိုင်သည် အပူပိုင်းဒေသဖြစ်သည့်အလျောက် ထနောင်းပင်၊တမာပင်နှင့်မန်ကျည်းပင်များလည်း‌ အလေ့ကျပေါက်ရောက်လျက်ရှိရာ ၄င်းအပင်များ အနက် မန်ကျည်းပင်များအား မိမိဝိုင်းခြံအတွင်းတွင်လည်း အရိပ်ရအောင် စိုက်ပျိုးကျသူများလည်း ရှိပါသည်  ။  မန်ကျည်းပင်သည် အပင်တစ်ပင်လုံး အသုံးဝင်ကြောင်း ၊ အရွက်နုသည်မှ  အသီး သီးချိန်အထိအသုံးဝင်ပါကြောင်း ၊ မန်ကျည်းသီးစိမ်း နုနုလေးများကိုလည်း ခူး၍ရောင်းချရကြောင်း၊ ခူးယူရောင်းချသူများမှာ ဈေးထဲသို့ ကိုယ်တိုင်လဲရောင်းချကြသလို ကုန်စိမ်းသီးနှံဆိုင်များသို့လည်း ဖောက်သည်ပေး ရောင်းချလျက်ရှိကြောင်း ၊ မန်ကျည်းပင်စိုက်ပျိုးခြင်းဖြင့် အရိပ်လဲရသလို အိမ်နောက်ဖေး ဈေးဆိုင်တည်သကဲ့သို့ အရွက်နုချိန်မှာလည်း အရွက်သုတ်၊ အချဉ်ရည်ဟင်းများ လည်း ချက်သောက် ၍ရပါကြောင်း၊ အသီးနုချိန်မှာလည်း မြေပဲဆံ၊ မျှစ်တို့ဖြင့် မန်ကျည်းသီးစိမ်း ချက်ကိုလည်း စားသုံးကြသလို မန်ကျည်းသီးမှည့်ချိန်မှာလည်း မန်ကျည်းသီးမှည့်များ ရောင်းချရ သဖြင့် မီးဖိုချောင်အသုံးစရိတ်များ ရရှိသောကြောင့် မန်ကျည်းပင်ကိုလည်း စိုက်ပျိုးသင့်ကြောင်း မန်ကျည်းသီးစိမ်းကို ဇွန်လတွင် ထွက်ပေါ်လျက်ရှိရာ မန်ကျည်းသီးစိမ်း တစ်ဆယ်ကျပ်သားလျှင် (၃၅၀၀/-)ကျပ် ဈေးနှုန်းရကြောင်း၊ ဇူလိုင်လတွင် မန်းကျည်းသီးစိမ်းများ လှိုင်လှိုင် ထွက်ပေါ် လာ သောကြောင့် မန်ကျည်းသီးစိမ်း တစ်ဆယ်ကျပ်သားလျှင် (၁၅၀၀/-) ကျပ် ဈေးနှုန်းကျဆင်းသွား ကြောင်း ကုန်စိမ်းရောင်းချသူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)

          စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ သာစည်ဈေး၊ ပြည်ထောင်စုဈေးနှင့်  ဝန်ထမ်းအိမ်ရာရှိ နန္ဒဝန်ဈေးသစ်တို့တွင် ရာသီစာ ဟင်းသီး ဟင်းရွက်များ၊ စားဖိုဆောင်သီးနှံများ၊ အသား၊ ငါးနှင့် ဒေသထွက်ကုန်များ ရောင်းချလျက်ရှိပါသည်။ ၂၀၂၅ခုနှစ်၊ ဇူလိုင်လ ပထမပတ်အတွင်း ရောင်းချနေသော အသား/ငါးဈေးနှုန်းများအနေဖြင့်  CP ကြက်သားတစ်ပိဿာလျှင် (   ၂၄၀၀၀       )ကျပ်၊ ဆိတ်သား အသားသန့်  ( ၁ ) ပိဿာလျှင် (  ၂၅၀၀၀  ) ကျပ်၊ ဆိတ်သား အသားပါ အရိုး ( ၁) ပိဿာလျှင် (၁၂၀၀၀)၊ အရိုး (၁) ပိဿာလျှင် ( ၈၀၀၀)၊ အမဲသား တစ်ပိဿာလျှင် (   ၃၅၀၀၀ )ကျပ်၊ ငါးကြင်း ခုတ်သား ( ၂၅)ကျပ်သားလျှင် (     ၆၅၀၀)      ကျပ်၊ ဝက်သား ( ၁ )  ပိဿာလျှင်( ၃၇၀၀၀)ကျပ်၊ ပုဇွန်ဆိတ် တစ်ပိဿာလျှင် (၄၀၀၀၀)ကျပ်ဖြင့် ရောင်းချလျက်ရှိပြီး ယခင်အပတ်ဈေးနှုန်းများနှင့် နှိုင်းယှဉ်ပါက ဈေးနှုန်းအနည်းငယ်မြင့်တက်လာကြောင်း သိရသည်။

DOCA(စစ်ကိုင်း)

   မန္တလေးတိုင်းဒေသကြီး ညောင်ဦးခရိုင်သည် လယ်ယာစိုက်ပျိုးရေးနှင့် မွေးမြူရေးလုပ်ငန်း များကို လုပ်ကိုင်ကြပြီး သီးနှံစုံစိုက်ပျိုးလျက်ရှိရာ မိုးပဲတီစိမ်းကိုလည်း စိုက်ပျိုးလျက်ရှိကြောင်း သိရသည်။ ညောင်ဦးမြို့နယ်တွင် (၂၀၂၅-၂၀၂၆) ခုနှစ် ဇွန်လကုန်အထိ မိုးပဲတီစိမ်း (၂၆၁၉) ဧက၊ ငါ့သရောက်မြို့နယ်တွင် မိုးပဲတီစိမ်း (၁၈၀၆)ဧက စိုက်ပျိုးပြီးဖြစ်ကြောင်း ကြေးတိုင်နှင့်မြေစာရင်း ဦးစီးဌာန စာရင်းများအရ သိရသည်။
   ၂၀၂၅-၂၀၂၆ ခုနှစ် ဇူလိုင်လ ဒုတိယပတ်အတွင်း ဖြစ်ပေါ်နေသော ပဲတီစိမ်းဈေးနှုန်းမှာ ပဲတီ စိမ်းတစ်ပိဿာလျှင် (၆၇၀၀) ကျပ်ခန့်နှင့် တစ်တင်းလျှင် (၁၀၇၂၀၀) ကျပ်ခန့် အရောင်းအဝယ်ဖြစ် လျက်ရှိကြောင်း၊ ယခင်လနှင့် ဈေးနှုန်းနှိုင်းယှဉ်ကြည့်လျှင် ပဲတီစိမ်း တစ်ပိဿာလျှင် (၂၀၀)ကျပ်ခန့်၊ တစ်တင်းလျှင် (၃၂၀၀) ကျပ်ခန့် ဈေးနှုန်းမြင့်တက်လာလျက်ရှိပါကြောင်း သိရသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့်  မြန်မာနိုင်ငံစက်သုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအသင်းတို့ ပူးပေါင်းစီစဉ်မှုဖြင့်  ပြည်သူများ သက်သာသောဈေးနှုန်းဖြင့် ဝယ်ယူရရှိနိုင်ရန် ရည်ရွယ်၍ သတ်မှတ်ရည်ညွှန်းဈေးများအား အပတ်စဉ် သောကြာနေ့တိုင်း ထုတ်ပြန်လျက်ရှိကြောင်း  သိရှိရသည်။
   မြင်းခြံမြို့၏ စက်သုံးဆီ အရောင်းဆိုင်များမှာ ပုံမှန်အတိုင်း ဖွင့်လှစ်ရောင်းချလျက်ရှိကြောင်း၊ ယခုလ ဇူလိုင်လ ဒုတိယပတ်တွင် စက်သုံးဆီ တစ်လီတာဈေးများနှုန်းမှာ 92 Octance (၃၀၇၀) ကျပ်၊ 95 Octance (၃၁၂၅)ကျပ်၊ ရိုးရိုးဒီဇယ်(၂၇၅၀)ကျပ်၊ ပရီမီယမ်ဒီဇယ်(၃၃၈၀)ကျပ် ဖြစ်ကြောင်းသိရှိရသည်။ ဇွန်လ ပထမပတ်တွင် စက်သုံးဆီ တစ်လီတာဈေးနှုန်းများမှာ 92 Octance (၃၁၂၅)ကျပ်၊ 95 Octance (၃၁၉၀)ကျပ်၊ ရိုးရိုးဒီဇယ်(၂၇၅၀)ကျပ်၊ ပရီမီယမ်ဒီဇယ်(၃၃၇၅)ကျပ် ဖြစ်ခဲ့ကြောင်းသိရှိရသည်။ ယခင်တစ်ပတ်ထက် ယခုဇူလိုင် ဒုတိယပတ်တွင်  ပြောင်းလဲခဲ့သော စက်သုံးဆီ တစ်လီတာဈေးများနှုန်းများအနေဖြင့် 92 Octanceတွင်(၅၅)ကျပ်၊ 95 Octance တွင် (၆၅)ကျပ်ဖြင့် ဈေးနှုန်းကျဆင်းခဲ့ကာ ပရီမီယမ်ဒီဇယ်တွင်(၅) ကျပ်မြင့်တက်ခဲ့ကြောင်းနှင့် ရိုးရိုးဒီဇယ်တွင် ဈေးနှုန်းပြောင်းလဲမှုမရှိကြောင်း၊ စက်သုံးဆီများကို  အများပြည်သူများအား နေ့စဉ် ရောင်းချပေးလျက်ရှိကြောင်းသိရှိရသည်။

DOCA(မန္တလေး)

    ငါးခြောက်သည် မြန်မာနိုင်ငံတွင်ရှေးအစဉ်အလာကတည်းက အသုံးပြုလာခဲ့သော အစား အစာတစ်မျိုးဖြစ်ပြီး ပရိုတင်းဓာတ်ကြွယ်ဝ၍ ချက်ပြုတ်ရန်လွယ်ကူပြီး လူကြိုက်များ၍ အထား အသိုခံသောကြောင့် စားသုံးမှုများကြောင်းသိရှိရသည်။
     မြင်းခြံဈေးကွက်သို့ ရေထွက်ကုန်ပစ္စည်းများဖြစ်သည့် ငါးခြောက်၊ ပုဇွန်ခြောက်နှင့် ငါးပိများ အား ရန်ကုန်မြို့ ဘုရင့်နောင်နှင့် ဧရာဝတီတိုင်းတို့မှ ဝင်ရောက်လျက်ရှိကြောင်းသိရသည်။ ၂၀၂၅ ခုနှစ် ဇူလိုင်လဒုတိယပတ်အတွင်း ရောင်းချလျက်ရှိသော ရေထွက်ကုန်ပစ္စည်း အမျိုးအစားအလိုက် တစ်ပိဿာဈေးတို့မှာ အာဗြဲခြောက် (၃၂၅၀၀ - ၃၅၅၀၀) ကျပ်၊ ငါးပုတ်သင်(အလတ်) (၁၉၅၀၀) ကျပ်၊ ငါးပုတ်သင်(ကြီး) (၂၆၅၀၀) ကျပ်၊ ငါးတံခွန်ခြောက် (၂၀၀၀၀-၂၂၀၀၀) ကျပ်၊ ငါးပူတင်းခြောက်(အပြား) (၃၇၅၀၀)ကျပ်၊ ငါးနီတူခြောက်(အလတ်) (၂၃၀၀၀) ကျပ်၊ ငါးကွမ်းရှပ် (၆၁၀၀၀) ကျပ်၊ ပုဇွန်ခြောက် (၄၆၀၀၀-၆၀၀၀၀) ကျပ်နှင့် ငါးပိ (၈၅၀၀ - ၁၂၅၀၀) ကျပ် ပေါက်ဈေးတို့ဖြင့်အသီးသီးရောင်းချလျက်ရှိကြောင်း  ယခုအချိန်သည် မိုးရာသီကာလ ဖြစ်သော ကြောင့် ဒေသတွင်းကျေးရွာများမှ ဝယ်ယူမှုများ၍ စားသုံးမှုများပြီး အရောင်းအဝယ် ကောင်းကြောင်း အေးမြသီ တာဈေးအတွင်းရှိ ရေထွက်ကုန်ပစ္စည်းရောင်းချသူတစ်ဦး၏ ပြောပြချက်အရသိရှိရသည်။

DOCA(မန္တလေး)