ပြည်တွင်းကုန်သွယ်မှုသတင်း

     ပြည်ခရိုင်၊ ပန်းတောင်းမြို့နယ်၊ ဖောင်းကံရပ်ကွက်တွင် မိရိုးဖလာအိုးလုပ်ငန်းများ လုပ်ကိုင် ဆောင်ရွက်နေသော လုပ်ငန်းရှင်နှင့်တွေ့ဆုံရန် စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံနှင့် ဝန်ထမ်းများသည် (၂၁.၁၀.၂၀၂၂) နေ့ နံနက်ပိုင်းတွင် အိုးအမျိုးမျိုး ထုတ်လုပ်ရောင်းချခြင်းနှင့် ဈေးနှုန်းဈေးကွက်အခြေအနေများအား သိရှိနိုင်ပါရန် သွားရောက်ခဲ့ပါသည်။

     စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံ ဒေါ်သန်းသန်းအေး နှင့် ဝန်ထမ်းများ သည် ဖောင်းကံရပ်ကွက်တွင် ယနေ့အထိ အိုးဖုတ်လုပ်ငန်းကို လုပ်ကိုင်ဆောင်ရွက်လျက်ရှိသော လုပ်ငန်းရှင် ဒေါ်လှလှဌေးထံသို့သွားရောက်၍ ကွင်းဆင်းလေ့လာခဲ့ရာ ဖောင်းကံ ရပ်ကွက်တွင် အိုးဖုတ် လုပ်ငန်းလုပ်ကိုင်သူ (၂၀)ဦးခန့်ရှိပြီး ၊ ရိုက်ပြီးသားအိုးစိမ်းကို ဝယ်ယူ၍ အိုးဖုတ်သူ (၁၅)ဦး ခန့်ရှိသည် ဟုသိရှိရပါသည်။ အိုးကို တန်ဆောင်မုန်း၊ နတ်တော်၊ ပြာသို၊ တပို့တွဲလနှင့် တပေါင်းလများတွင် အိုးစိမ်းရိုက်၊ အိုးဖုတ်လုပ်ငန်းကို လုပ်ကိုင်ဆောင်ရွက်ကြပါသည်။ အိုးဖုတ် လုပ်ငန်းလုပ်ကိုင်ရာတွင် လုပ်သားဦးရေ(၉)ဦးဖြင့် လုပ်ကိုင်ဆောင်ရွက်ကြပြီး အိုးဖုတ်သည့် ဖိုတစ်ဖိုလျှင် အိုးအလုံးပေါင်း သောင်းပြောင်း အလုံး(၁၀၀၀)ခန့် ပါရှိသည်ဟု သိရှိရပါသည်။ အိုးဖုတ်သည့် ဖိုတစ်ဖိုလျှင် ကုန်ကျ စရိတ်မှာ (၃)သိန်းကျပ်ခန့် ကုန်ကျပြီး ထွက်ရှိလာသော အိုးများကို ဖောင်းကံရွာထဲဖြစ်သော ပန်းတောင်း၊ ဥသျှစ်ပင်ကားလမ်းမကြီးပေါ်တွင် ရောင်းချလျက်ရှိပါသည်။ ရောင်းချသော အိုးဈေးနှုန်း များမှာ အင်တုံတစ်လုံးလျှင် ၁၃၀၀ကျပ်၊ အင်တုံ(အလတ်) တစ်လုံးလျှင် ၈၀၀ကျပ်၊ အင်တုံ(အသေး) တစ်လုံးလျှင် ၇၀၀ကျပ်၊ သောက်ရေအိုးတစ်လုံးလျှင် ၈၀၀ကျပ်၊ အိုးအလတ် တစ်လုံးလျှင် ၅၀၀ကျပ်၊ ရေခပ်အိုးတစ်လုံးလျှင် ၂၀၀ကျပ်၊ စုဗူးအသေးတစ်လုံးလျှင် ၁၅၀ကျပ်၊ သင်္ကြန်အိုးတစ်လုံးလျှင် ၁၅၀ကျပ်ဖြင့် လက်ကားရောင်းချလျက်ရှိကြောင်း သိရှိရပါသည်။ ဖောင်းကံအိုးများကို ပြည်ဈေးကွက် မှလည်း ဝယ်ယူတင်သွင်း ရောင်းချလျက်ရှိ ကြောင်းသိရှိရပါသည်။

     ပန်းတောင်းမြို့နယ်တွင် ကျေးရွာတစ်ရွာထုတ်ကုန်တစ်မျိုးဖြစ်သော ဖောင်းကံအိုးလုပ်ငန်းသည်  မိရိုးဖလာအဆက်ဆက်မှ လုပ်ကိုင်လာသော လုပ်ငန်းများဖြစ်သဖြင့် နေ့စဉ်ဝင်ငွေများ ရှိသည့်အပြင် ခေတ်မီလှပသောပန်းအိုးများ၊ လူအသုံးအဆောင်ပစ္စည်းများ ဆန်းသစ်တီထွင်ပြီး ရောင်းချမည်ဆိုပါက ဒီထက်မကအမြတ်အစွန်းများရရှိနိုင်မှာဖြစ်၍ မြေကြီးမှ ရွှေသီးနိုင်ပြီး ကျေးရွာနေ လူတန်းစားများအတွက်လည်း အလုပ်အကိုင်အခွင့်အလမ်းများ ပိုမိုရရှိလာနိုင်မှာဖြစ်ကြောင်း လေ့လာသုံးသပ် တင်ပြအပ်ပါသည်။

DOCA(ပဲခူး)

     ပြည်ဈေးကွက်ရှိ ကြက်သွန်ဖြူ(ကြူကုတ်)မှာ လက်ကား(ပွဲရုံဈေး) တစ်ပိဿာလျှင် ကျပ် ၄၀၀၀-၄၂၀၀၊ လက်လီဈေး ကျပ် ၄၂၀၀-၄၃၀၀၊ ရှမ်းစ လက်ကား (ပွဲရုံဈေး) တစ်ပိဿာလျှင် ကျပ် ၃၂၀၀-၃၅၀၀-၃၈၀၀-၄၂၀၀၊ လက်လီ တစ်ပိဿာလျှင် ကျပ် ၄၀၀၀-၄၅၀၀ဖြင့် ဈေးငြိမ်လျက် ရှိပါသည်။ နေ့စဉ်ရှမ်းပြည်နယ်၊ အောင်ပန်းမှ အဝင်များရှိခဲ့သည့်အတွက် ဈေးလျော့လာခဲ့ရာမှ ယခုတစ်ပတ်တွင် ဈေးငြိမ်နေခြင်းဖြစ်ကြောင်း သိရှိရပါသည်။ အရောင်းအဝယ်အနေဖြင့် မြို့နယ်တွင်းရှိ လက်ကား ဝယ်ယူသူများ၊ အခြားမြို့နယ်များမှ အမှာရှိသူများနှင့် လက်လီဝယ်ယူသူအချို့ဖြင့် ပုံမှန် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

    ပြည်ဈေးကွက်တွင် ယခုအပတ်မန်ကျည်းမှည့်လက်ကျန် အဝယ်လိုက်ကာ ဈေးကောင်းရလျက်ရှိနေပါသည်။ ဒေသတွင်း ဝယ်လက်သမားများအပြင် ရန်ကုန်နှင့် ရခိုင်ဝယ်လက်များက အဝယ်ရှိနေသောကြောင့် မန်ကျည်းမှည့်လက်ကျန်နည်းလာသော်လည်း ဈေးကောင်း ရရှိလျက်ရှိနေပါသည်။ ယခုအောက်တိုဘာတတိယပတ်တွင် မန်ကျည်းမှည့်(ပွဲရုံဈေး) တစ်ပိဿာလျှင် ၄၃၀၀ ကျပ်ဖြစ်ပြီး ဒေသတွင်းလက်လီ တစ်ပိဿာလျှင်၅၀၀၀    ကျပ်ဖြင့် ရောင်းဝယ်လျက်ရှိနေပါသည်။ လက်လီသမားတို့လည်း အဝယ်ရှိနေသောကြောင့် မန်ကျည်းမှည့်ဈေးကောင်းလျက် ရှိပါသည်။

ပြည်ဈေးကွက်ရှိ ရှမ်းအာလူး ယခင်တစ်ပတ်ဈေးမှာ လက်ကား တစ်ပိဿာလျှင် (ပွဲရုံဈေး) ကျပ် ၂၀၀၀-၂၂၀၀-၂၃၀၀၊ လက်လီဈေး ကျပ် ၂၄၀၀-၂၈၀၀ဖြင့် ဈေးငြိမ်နေပါသည်။ ဝင်ရောက်မှုအနေဖြင့် တစ်ပတ်လျှင် အိတ် ၁၀၀-၁၅၀ အတွင်း ပုံမှန်အဝင်ရှိကြောင်း သိရှိရပါသည်။ အရောင်းအဝယ်အနေဖြင့် အခြားမြို့နယ်များမှ ကြက်သွန်ဖြူနှင့် တွဲလျှက်အမှာရှိသည့်အတွက် အခြားမြို့နယ်များသို့ပို့ပေးရသလို ဒေသတွင်းရှိ လက်လီဝယ်ယူသူများ၊ လုပ်ငန်းရှင်များနှင့် ပုံမှန် ရောင်းအဝယ်ဖြစ်ကြောင်း သိရှိရပါသည်။

DOCA(ပဲခူး)

      နိုင်ငံအသီးသီး လူမျိုးအသီးသီးတို့၌ အစားအသောက်နှင့် ပတ်သက်၍ မတူညီသည်ကို တွေ့ရှိရပါသည်။ နိုင်ငံတစ်ခုအတွင်းတွင်လည်း ဒေသအလိုက် အစားအစာများရှိကြပါသည်။ မြန်မာနိုင်ငံတွင် ရိုးရာအစားအစာများကို ရာသီအလိုက် ဒေသအလိုက် အစားအသောက်များရှိပါသည်။

      ပဲခူးတိုင်းဒေသကြီး(အနောက်) ပြည်ခရိုင်အတွင်းတွင်လည်း ဒေသထွက်ရိုးရာ အစားအစာ ထုတ်လုပ်ရောင်းချသည့် လုပ်ငန်းများအနက်မှ ကုန်ကြမ်းပစ္စည်း ဆန်ကွဲကိုသာ အဓိကအသုံးပြု ထုတ်လုပ်ရသည့် (ဆန်မရွေး/ဝေဖာ) ထုတ်လုပ်ရာတွင် အသုံးပြုရသည့် ပေါက်ပေါက်ထုတ်လုပ်မှု လုပ်ငန်းအကြောင်း လေ့လာတင်ပြလိုက်ရပါသည်။

    ပဲခူးတိုင်းဒေသကြီး (အနောက်) ပြည်မြို့နယ်အတွင်း ပေါက်ပေါက်လုပ်ငန်း လုပ်ကိုင်သူ (၁၅/၂၀)ဦး ခန့်ရှိ၍ ဂန္ဓမာ စက်မှုဇုန်(၁)အတွင်း လုပ်ငန်းရှင် (၁၀)ခန့်ရှိကြောင်း သိရှိရပါသည်။ ပြည်မြို့ ဂန္ဓမာစက်မှုဇုန် (၁)အတွင်းရှိ ပေါက်ပေါက်လုပ်ငန်းလုပ်ကိုင်သူ တစ်ဦးနှင့်တွေ့ဆုံ၍ ကျေးရွာတစ်ရွာ ထုတ်ကုန် တစ်မျိုး (OVOP) ထုတ်လုပ်မှုအခြေအနေအား ကွင်းဆင်းလေ့လာရန် သွားရောက် တွေ့ဆုံ မေးမြန်းခဲ့ခြင်းဖြစ်ပါသည်။ လုပ်ငန်းရှင်များမှာလည်း ၎င်း၏လုပ်ငန်းနှင့်ပတ်သက်၍ သိလိုသည်များကို ဖြေကြားပေးပါသည်။ လုပ်ငန်းရှင်မှပြောကြားရာတွင် ပေါက်ပေါက်လုပ်ငန်းလုပ်ကိုင်ခဲ့သည်မှာ (၁၀)နှစ် ဝန်းကျင်ခန့်ရှိပြီဖြစ်ကြောင်း ယခင်ကတစ်ရက်လျင်ဆန်ကွဲအိတ်(၄၀/၅၀)ခန့် ကြိတ်ခွဲနိုင်သော်လည်း ယခုကုန်ကြမ်းပစ္စည်းဈေးနှုန်း မြင့်တက်နေသည့်အတွက် တစ်ရက်လျှင် ၂၀အိတ်ခန့်သာကြိတ်နိုင် ကြောင်းသိရှိရပါသည်။ ပေါက်ပေါက်လုပ်ငန်းအတွက်အဓိကကုန်ကြမ်းမှာ ဆန်ကွဲဖြစ်ပါသည်။ မှော်ဘီနှင့် ခြံဧရာဆန်ကွဲများမှာပိုကောင်း၍ ဆန်ကွဲတစ်အိတ်လျှင် ပေါက်ပေါက် (၂၅/၂၆)ပိဿာခန့် ထွက်ရှိပါသည်။ ပေါက်ပေါက်ထုတ်လုပ်ပုံမှာ ဆန်ကွဲအိတ် တစ်အိတ်ကို ဝေဖာကြိတ်စက်ထဲသို့ထည့်၍ (၂)နာရီအကြာကြိတ်ဖွတ်ပါက ပေါက်ပေါက်ရရှိမည်ဖြစ်ပါသည်။ ဆန်သားကျစ်ပါက ဆားဆိုဒါ အနည်း ငယ် ထည့်ပေးရပါသည်။ ပေါက်ပေါက်ထုတ်လုပ်မှု ကုန်ကျစရိတ်အနေဖြင့် ဆန်ကွဲ၊ လုပ်သားခ၊ လျှပ်စစ်မီတာခများတွက်ချက်ပါက ဆန်ကွဲတစ်အိတ် ကြိတ်မည်ဆိုလျှင် (၄၄၄၇၅)ကျပ် ကုန်ကျ မည်ဖြစ်ပါသည်။ အကျိုးအမြတ်ရရှိမှုအနေဖြင့် ပေါက်ပေါက်တစ်ပိဿာလျှင် (၁၈၅၀)ကျပ်ဖြစ်၍ (၂၅)ပိဿာလျှင် (၄၆၂၅၀)ရရှိမည်ဖြစ်ပါသည်။ ဆန်ကွဲတစ်အိတ်လျှင် (၁၇၇၅)ကျပ် အကျိုး အမြတ်ရရှိမည်ဖြစ်ပါသည်။ တစ်ရက်လျှင် ဆန်ကွဲ (၂၀)အိတ်ခန့်ကြိတ်ဖွတ်လျှင် အကျိုးအမြတ်အနေဖြင့် (၃၅၅၀၀)ကျပ်ခန့် နေ့စဉ်အကျိုးအမြတ် ရရှိမည်ဖြစ်ပါသည်။

   ဈေးကွက်အနေဖြင့် ထွက်ရှိလာသောပေါက်ပေါက်များကို (၁၀)ပိဿာပါ ပလတ်စတစ် အိတ်ခွံအတွင်း လေလုံအောင်ထည့်ပြီး ဒေသတွင်းမြို့နယ်များနှင့် တောင်ကုတ်၊ မြန်အောင်၊ ဟင်္သာတနှင့် မင်းတုန်းမြို့နယ်များသို့ တင်ပို့ရောင်းချလျက်ရှိကြောင်း သိရှိရပါသည်။

     ပေါက်ပေါက်လုပ်ငန်းသည် အကျိုးအမြတ်နည်းသော်လည်း ပုံမှန်ဝင်ငွေရရှိ၍ မိသားစု တစ်ပိုင်တစ်နိုင် လုပ်ကိုင်နိုင်သော လုပ်ငန်းတစ်ခုဖြစ်ပါကြောင်း လေ့လာတင်ပြအပ်ပါသည်။

DOCA(ပဲခူး)

     ပြည်ဈေးကွက်၌ အောက်တိုဘာလတတိယပတ်တွင် မြေပဲဆန်ဈေးများ ကျဆင်းလာသည်ကို တွေ့ရှိရပါသည်။ မြန်အောင်၊ ကြံခင်းနှင့် ပြည်- အောင်လံကြားရှိ ကျေးရွာများမှ ဝင်ရောက်မှု ရှိသော်လည်း တစ်နေ့လျှင် အိတ် ၁၅၀ခန့် သာ ဝင်ရောက်မှုရှိသောကြောင့်  အဝင်နည်းလာကြောင်း တွေ့ရှိရပါသည်။ လုံးဆန်ကို ယိုးဒယားသို့ တင်ပို့ရန်ဝယ်လက်များက အနည်းငယ်သာဝယ်ယူမှုရှိသလို မြို့တွင်း ဆီစက်သမားများကလည်း ဆီကြိတ်ရန်ဝယ်ယူရှိသော်လည်း ဈေးများကျဆင်းလာကြောင်း တွေ့ရှိရပါသည်။ ယခုအပတ် မြေပဲဆန်ဈေးများမှာ ဆီဆန်တစ်ပိဿာလျှင် ၄၅၀၀ကျပ်ဖြစ်၍ အောက်တိုဘာလဆန်းနှင့် နှိုင်းယှဉ်လျှင် (၅၀၀)ကျပ် ဈေးကျလာကြောင်း တွေ့ရှိရပါသည်။ မြေပဲလုံးဆန် (အနီ)တစ်ပိဿာလျှင် ၅၇၀၀ကျပ် ၊ ဆီဆန်(အဖြူ) တစ်ပိဿာလျှင် ၅၅၀၀ကျပ်ဖြင့် ယခင် အောက်တိုဘာလဆန်းထက်စာလျှင် တစ်ပိဿာလျှင် ၁၅၀-၃၀၀ကျပ်ခန့် ဈေးကျလာခဲ့ပါသည်။ မြေပဲဆန်ဈေးများကျဆင်းခြင်းကြောင့် တစ်နေ့လျှင် အိတ် ၁၀၀ခန့်သာ အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)