ပြည်တွင်းကုန်သွယ်မှုသတင်း

အညာဒေသတွင် မီးဖိုချောင်အသုံးစရိတ်များကာမိအောင် တောင်သူဦးကြီးများက သီးနှံများ ကိုရာသီအလိုက် စိုက်ပျိုးလျက်ရှိပါသည်။မီးဖိုချောင်အသုံးစရိတ်မှသည် စီးပွားဖြစ်အထိ မျှော်မှန်း၍ တစ်နိုင်တစ်ပိုင်မှ ဧကအလိုက် စိုက်ပျိုးလာကြပါသည်။ ပဲစောင်းလျားသီးပင်သည် အသီးတစ်မျိုး တည်းသာစားရသောအပင်နှင့် အမြစ်၊ အညွန့်၊ အသီးအထိ စားရသောအပင်ဟူ၍(၂)မျိုးရှိပါသည်။ အသီးသာစားရသောအပင်သည် (၁)နှစ်ပတ်လုံးရှိပြီး သူရဲ့အသီးများမှာ မာဆတ်သည့်သဘောရှိပါ သည်။ အညာဒေသထွက် ပဲစောင်းလျားသီးမှာနူးညံ့ပြီး အရသာပိုချိုပါသည်။ယခုပေါ်ချိန် ပေါ်ဦးပေါ်စတွင် (၁၅)တောင့်တစ်စည်းလျှင် (၂၅၀/-)ကျပ်ဖြင့် ရောင်းဝယ်လျက်ရှိပါသည်။ မကြာမီကာလအတွင်း ပဲမြစ်များလည်း ထွက်ပေါ်လာတော့မည်ဖြစ်ကြောင်း၊ ပဲစောင်းလျားသီးများကို ကိုယ်တိုင်ခူးဆွတ်၍ အစည်းလေးများ စည်းကာရောင်းချသလို၊ အခင်းထဲအရောက် လာဝယ်သူများရှိပါကလည်း ပြန်လည် ရောင်းချနိုင်ရန်အတွက် စျေးနှုန်းချိုသာစွာဖြင့် ရောင်းချပေးကြောင်း ၊ ဖြိုင်ဖြိုင်ပေါ်ချိန်တွင် ပဲစောင်းလျားသီးများကို အနေတော်လှီးဖြတ်၍ အချဉ်တည်၍စားသုံးကြပါကြောင်း လေ့လာသိရှိရပါသည်။ ပဲစောင်းလျားသီးများကို ငပိရည်ဖြင့် အတို့အမြုပ်အဖြစ်စားသုံးကြသလို အသီးကို ပြုတ်ပြီး ပုဇွန်ခြောက်၊ ဆီကျက်ကလေးဖြင့် လက်သုပ်သုပ်စားကြပါသည်။ ပဲစောင်းလျားသီးကို ငါးရံ့၊ငါးကလေးများဖြင့် အိုးကပ်ချက်စားလျှင်လည်း ခံတွင်းကို မြိန်စေပါသည်။ပဲမြစ်(၁)ဧက စိုက်ပျိုးမှုအနေဖြင့် မျိုး၊သွင်းအားစု၊ လုပ်သားခအပါအဝင်(၈၀၀၀၀၀/-)ကျပ်ကျော်ခန့် ကုန်ကျကြောင်း၊ ယခင်နှစ်တွင်ပဲမြစ် (၁)ပိဿာ လျှင်(၁၆၀၀/-)ကျပ် စျေးနှုန်းဖြင့် ရောင်းချ ခဲ့ကြောင်း ၊ ပဲမြစ်အညွန့်ရောင်းရငွေ(၃၀၀၀၀/-)ကျပ် နှင့် ပဲစောင်းလျားသီး ပေါ်ချိန်မှ အသီး တုံးချိန်အထိ ခန့်မှန်းရောင်းရငွေ (၃၅၀၀၀/-)ကျပ် အထိရရှိကြောင်း၊ယခင် ပဲမြစ် အထွက်နှုန်းပိဿာ(၈၀၀-၁၀၀၀)အထိ ထွက်ရှိကြောင်း၊ ပဲမြစ်ပေါ်ချိန်တွင်လည်းစျေးကောင်းရရှိ ပါက ပဲမြစ်စိုက်တောင်သူများ အကျိုးအမြတ်ပိုမို ရရှိလာနိုင်မည်ဖြစ်ကြောင်း ၊ တောင်သူ ဦးကြီးများ အပိုဝင်ငွေတိုးသည့်အပြင် စီးပွားဖြစ်အကျိုး အမြတ်များရရှိသောကြောင့် ပဲမြစ်သီးနှံကိုစိုက်ပျိုးသင့် ပါကြောင်း ရေးသားတင်ပြအပ်ပါသည်။
DOCA(မန္တလေး)

မိတ္ထီလာခရိုင်အတွင်း ဆောင်းကြက်သွန်လက်ကျန်နည်းလာပြီး မိုးကြက်သွန်နီကို မလှိုင်မြို့နယ် ထန်းပင်ကန်၊ သပြေပင်ကျေးရွာတွင် စိုက်ပျိုးလျက်ရှိပါသည်။ လာမည့်ဒီဇင်ဘာလမှ စတင်ထွက်ပေါ် မည်ဖြစ်သော်လည်း ယခုနှစ်ကြက်သွန်နီ ဈေးကောင်းနေခြင်းကြောင့် မိုးကြက်သွန်မှာလည်း ဈေးကောင်း ရနိုင်ဖွယ်ရှိကြောင်းသိရသည်။ ဒေသတွင်း ကြက်သွန်နီ နယ်ဝေးတင်ပို့မှုမှာ ရန်ကုန်သို့ (၁၂) ဘီး ကား ဖြင့် အခြားကုန်များဖြင့်ရော၍ ကုန်ချိန် (၁၀) တန်ခန့် ၊ပဲခူးသို့ (၆) ဘီးကားဖြင့် အခြားကုန်များဖြင့် ရော၍ (၁၀) တန်ခန့် တင်ပို့ကာ ကုန်တင်ခအနေဖြင့် တစ်ပိဿာလျှင် ရန်ကုန်သို့ (၁၁၀) ကျပ် ၊ ပဲခူးသို့ (၁၀၀) ကျပ်ရှိကြောင်း၊ ကြက်သွန်ဈေးမှာ တစ်ပိဿာ လက္ကားဈေး (၃၀၀၀) ၊ လက်လီဈေး ( ၃၂၀၀-၃၅၀၀) ကျပ် ရှိကြောင်း သိရသည်။
DOCA(မန္တလေး)

မိတ္ထီလာဈေးကွက်တွင် ကြက်သွန်နီ လှောင်ကုန်သမားများမှ ဈေးမြင့်ခေါ်ရောင်းဝယ်နေသော်လည်း နယ်ဝေးပို့သော ကုန်သည်များမှာ ထိုဈေးဖြင့် မဝယ်ယူနိုင်ကြောင်းသိရသည်။ လက်ရှိဈေးကွက်တွင် အရောင်းအဝယ်ဖြစ်သော ကြက်သွန်နီများမှာ ယခင်နှစ် ဆောင်းကြက်သွန်များဖြစ်၍ အရည်အသွေးကျဆင်းခြင်း၊ မလှခြင်းများ ဖြစ်နေပါသည်။ ထို့အပြင် ရေရှည်အထားမခံသော်လည်း စားသုံးရန်သင့်လျော်သည့် ကြက်သွန်နီများ ထွက်ပေါ်လာသည့်အတွက် နယ်ပွဲစားများအနေနှင့် ၎င်းတို့ခေါ်ဈေးဖြင့်သာ ဝယ်ယူတင်ပို့နိုင်ကြောင်း သိရသည်။ ဒေသတွင်း စားသုံးရန်အတွက် ရန်ကုန်၊ ပဲခူး ဝယ်လက်တို့မှ ပုံမှန်ဝယ်လိုအားနှင့် မြဝတီမှလည်း ဝယ်လိုအားရှိနေကြောင်း ဈေးကွက်မှသိရသည်။
DOCA(မန္တလေး)

     အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၃ခုနှစ်၊ နိုဝင်ဘာလ(၈)ရက်နေ့မှ နိုဝင်ဘာလ(၁၄)ရက်နေ့အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်းသိရှိရပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်တစ်ပိဿာလျှင် ကျပ် (၁၂၀၀မှ ၁၈၀၀) အတွင်း၊ ဂေါ်ဖီထုပ်တစ်ထုပ်လျှင် ကျပ် (၄၀မှ ၁၀၀၀) အတွင်း၊ ပန်းဂေါ်ဖီတစ်ထုပ်လျှင်ကျပ် (၇၀၀မှ ၁၈၀၀) အတွင်း၊ အာလူးတစ်ပိဿာလျှင် ကျပ် (၃၂၀၀မှ ၃၅၀၀) အတွင်း၊ မုန့်လာဥနီတစ်ပိဿာလျှင် ကျပ် (၃၀၀၀မှ ၃၅၀၀) အတွင်း ရွှေဖရုံသီးတစ်လုံးလျှင် ကျပ် (၉၀၀မှ ၅၄၀၀) အတွင်း၊ ဘူးသီးတစ်လုံးလျှင် ကျပ် (၁၀၀၀မှ ၂၅၀၀) အတွင်း၊ မုန်ညှင်း(ထုပ်)တစ်ပိဿာလျှင် ကျပ် (၃၀၀၀မှ ၄၅၀၀) အတွင်း၊ ကြက်သွန်နီ(ဆိပ်ဖြူ)တစ်ပိဿာလျှင် ကျပ် (၂၇၀၀မှ ၃၇၀၀) အတွင်း၊ ကြက်သွန်ဖြူ(ရှမ်း)တစ်ပိဿာလျှင် ကျပ် (၁၂၀၀၀မှ ၁၄၀၀၀) အတွင်း၊ ကြက်သွန်ဖြူ (ကြူကုတ်) တစ်ပိဿာလျှင် ကျပ် (၁၂၀၀မှ ၁၅၀၀) အတွင်း၊ ချင်းတစ်ပိဿာလျှင် ကျပ် (၄၅၀၀မှ ၅၅၀၀) အတွင်း၊ ဆလပ်ရွက်တစ်စည်းလျှင် ကျပ် (၃၀၀မှ ၄၀၀) အတွင်း၊ ချဉ်ပေါင်ရွက်တစ်စည်းလျှင် ကျပ် (၁၀၀မှ ၃၀၀) အတွင်း၊ ခရမ်းသီး  (ရှည်) တစ်ပိဿာလျှင် ကျပ် (၁၃၀၀မှ ၁၈၀၀) အတွင်း၊ သံပရာသီးတစ်လုံးလျှင် ကျပ် (၈၀မှ ၁၂၀) အတွင်း၊ ငရုတ်သီးစိမ်း (ကျောက်စိမ်း) တစ်ပိဿာလျှင် ကျပ် (၃၀၀၀မှ ၄၅၀၀) အတွင်း၊ ဖရဲသီး (အကြီး၊ အလတ်၊ အသေး) တစ်လုံးလျှင် ကျပ် (၁၅၀၀မှ ၆၀၀၀) အတွင်းဖြစ်ကြောင်းသိရှိရပါသည်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပရာသီးအလုံးပေါင်း (၁၄၃၀၁၇၀)ကျော်၊ ခရမ်းသီး(ရှည်) (ပိဿာ) (၃၁၈၄၀)ကျော်၊ ဘူးသီးအလုံးပေါင်း (၁၀၇၁၇) ကျော်၊ ရွှေဖရုံသီးအလုံးပေါင်း(၁၈၁၀၀)ကျော်၊ ဂေါ်ဖီထုပ်ပေါင်း (၆၆၀၀၀)ကျော်၊ ပန်းဂေါ်ဖီထုပ်ပေါင်း (၄၃၇၆၅)ကျော်၊ မုန်ညှင်းထုပ်(ပိဿာ) ပေါင်း(၁၀၈၄၀) ကျော်၊ ဖရဲသီးလုံးပေါင်း (၂၆၃၅၀)ကျော် အသီးသီးကုန်အဝင်ရှိကြောင်းသိရှိရပါသည်။

DOCA(ရန်ကုန်)

       ၂၀၂၃ ခုနှစ် ၊ နိုဝင်ဘာလလ ဒုတိယပတ်အတွင်းမိတ္ထီလာမြို့နယ်တွင် အခြေခံစားသောက်ကုန်များဖြစ်သော စိုက်ပျိုးရေးထွက်ကုန်ဈေးနှုန်းများမှာ ဧည့်မထဆန် တစ်ပြည် ၅၇၀၀ အရောင်းအဝယ်ဖြစ်လျက်ရှိပါသည်။ စားအုန်းဆီ တစ်ပိဿာလျှင် ၅၂၀၀ကျပ်၊ မြေပဲဆီ တစ်ပိသာလျှင် ၁၃၅၀၀ ကျပ် ၊ နှမ်းဆီ တစ်ပိဿာလျှင် ၁၃၅၀၀ကျပ်တို့ဖြင့် အရောင်းအဝယ် ဖြစ်လျက်ရှိသည်။ ကြက်သွန်နီဈေးနှုန်းမှာ လက်လီတစ်ပိဿာ ၃၅၀၀ ကျပ် ၊ ကြက်သွန်ဖြူ တစ်ပိဿာလျှင် ၁၅၀၀၀ ကျပ်၊ ချင်းတက် တစ်ပိဿာ လျှင် ၅၀၀၀ကျပ် ၊ ငရုတ်သီးခြောက်အမျိုးအစားအလိုက် ၁၁၀၀၀ ကျပ်မှ ၁၂၀၀၀ ကျပ်ထိ ၊ အာလူး တစ်ပိဿာလျှင် ၂၈၀၀ ကျပ် ၊ ခရမ်းချဉ်သီးတစ်ပိဿာလျှင် ၁၅၀၀ ကျပ်နှင့် ကန်စွန်းရွက်၊ ချဉ်ပေါင်ရွက်၊ မုန်ညှင်းရွက်၊ ဆလပ်ရွက် တစ်စည်းလျှင် ၂၀၀ ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

     မွေးမြူရေးထွက်ကုန်များဖြစ်သော ကြက်ဥလက်လီဈေးနှုန်းမှာ အကြီးတစ်လုံး ၂၅၀ ကျပ်၊ အသေးတစ်လုံး ၂၀၀၊ ဘဲဥကြီး တစ်လုံး ၃၅၀ ကျပ်၊အသေးတစ်လုံး ၃၀၀ ကျပ်ရှိသည်။ မိတ္ထီလာမြို့၏ သား/ငါးဈေးနှုန်းနှင့် ငါးခြောက်ဈေးနှုန်းများမှာ ကြက်သား (ဒေသကြက်)တစ်ပိဿာလျှင် ၁၈၀၀၀ ကျပ်၊ ကြက်သား (CP)တစ်ပိဿာလျှင် ၁၀၀၀၀ ကျပ်၊ ဝက်သား တစ်ပိဿာလျှင် ၂၀၀၀၀ ကျပ်  ၊ အမဲသား တစ်ပိဿာလျှင် ၁၆၀၀၀ ကျပ်ထိ ၊ ငါးကြင်းတစ်ပိဿာလျှင် ၁၂၀၀၀ ကျပ်၊ ငါးမြင်းတစ်ပိသာ ၁၆၀၀၀၊ ငါးမြစ်ချင်းတစ်ပိဿာလျှင် ၈၀၀၀ ကျပ်၊ ငါးတန်တစ်ပိဿာလျှင် ၁၀၀၀၀ ကျပ် ၊ ငါးခူတစ်ပိဿာလျှင် ၁၀၀၀၀ ကျပ်၊ ငါးရံ့တစ်ပိဿာလျှင် ၁၂၀၀၀ ကျပ်၊ ငါးဖယ် တစ်ပိဿာလျှင် ၁၁၀၀၀ ကျပ်၊ ငါးခြောက်လက်လီဈေးနှုန်းမှာ အာပြဲခြောက် တစ်ပိဿာ ၂၃၀၀၀ ကျပ် ငါးရံ့ခြောက်တစ်ပိဿာ ၅၀၀၀၀ ကျပ်၊ ငါးတံခွန်ခြောက်တစ်ပိဿာ ၁၅၀၀၀ ကျပ်၊ ငါးနီတူခြောက် တစ်ပိဿာ ၁၂၀၀၀ကျပ်၊ ငါးရောင်ခြောက် တစ်ပိဿာ ၃၂၀၀၀ ကျပ်၊ ပုစွန်ခြောက် တစ်ပိဿာ ၃၅၀၀၀ ကျပ်တို့ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(မန္တလေး)