ပြည်တွင်းကုန်သွယ်မှုသတင်း

     ပွင့်လင်းရာသီတွင် ပဲခူးတိုင်းဒေသကြီး၊ တောင်ငူမြို့နယ်ရှိ အုတ်လုပ်ငန်းလုပ်ကိုင်သည့်လုပ်ငန်းရှင်များ၏ မြေအုတ်လုပ်ငန်းများမှာ အရောင်းသွက်နေကြပါသည်။ အုတ်လုပ်ငန်းကို မိုးအကုန်နှင့် ဆောင်းအကူးဖြစ်သော နိုဝင်ဘာလတွင် စတင်လုပ်ကိုင်ကြပါသည်။ သက်ဆိုင်ရာဌာနများ၏ ခွင့်ပြုချက်များရရှိမှသာ လုပ်ငန်းများစတင်ဆောင်ရွက်သည်ဟု သိရှိရပါသည်။

      လုပ်ငန်းခွင်တွင် လုပ်ကိုင်နေကြသည့်လုပ်သားများအတွက် နေထိုင်မှုအဆင်ပြေစေရန် ယာယီတဲများထိုးပေးခြင်း၊ လုပ်သားခများမရရှိမီ လုပ်ငန်းခွင်တွင်အဆင်ပြေစေရန် ဆန်အိတ်၊ ဆီပုံးများကို ကြိုတင်ထုတ်ပေးခြင်းများဆောင်ရွက်ရပါသည်။ လုပ်ငန်းခွင်တွင် အထိုင်ကျလာသည့်အခါ၊ လုပ်သားခများစုမိလာသည့်အချိန်တွင် ကြိုတင်ငွေများကို ပြန်လည်ခုနှိမ်ပါသည်။

     လုပ်ငန်းများစတင်သည်နှင့် ရွှံ့အုတ်များနေလှန်းရန် မြေနေရာရှင်းလင်းခြင်း၊ ထင်းစုဆောင်းခြင်းများဆောင်ရွက်ရပါသည်။ နေလှန်းအုတ်များခြောက်လာသည့်အခါ မီးဖုတ်ရန် အုတ်လုံးရေ ၁၅၀၀၀လုံးခန့်စီ၍ ဖိုဆင်ရပါသည်။ ဖိုဆင်ပြီးလျှင် ထင်းထိုးရန်မီးတင်ရပါသည်။ ထင်းဖြင့် မီးတင်သည့်အုတ်ဖိုများရှိသကဲ့သို့ စပါးခွံဖြင့် မီးတင်သည့်အုတ်ဖိုများလည်းရှိပါသည်။

   ကြယ်သုံးလုံးအုတ်လုပ်ငန်းသည် အုတ်များကိုထင်းမီးဖြင့်သာ ကျက်အောင်ဖုတ်ရပါသည်။  ယခင်နှစ် ၂၀၂၂ခုနှစ်က ထင်းဖောကားတစ်စီးလျှင် ၆၅၀၀၀ကျပ်ပေးရပြီး ယခုနှစ် ၂၀၂၃ခုနှစ်တွင် ၈၀၀၀၀ကျပ်ပေးရပါသည်။ ယခင်နှစ်က အုတ်ဈေးနှုန်းမှာ အထိုင်ဈေးတစ်လုံးလျှင် ၉၀ကျပ်ဖြစ်ပြီး ယခုနှစ်တွင် အထိုင်ဈေးတစ်လုံးလျှင် ၁၀၅ကျပ်ဖြစ်ပါသည်။ တောင်ငူမြို့တွင်း အရောက်ပို့ပေးရလျှင် အုတ်လုံးရေ ၂၀၀၀လုံးအောက်ဖြစ်ပါက တစ်လုံးလျှင် ၁၂၀ကျပ်၊ အုတ်လုံးရေ ၂၀၀၀လုံးအထက်ဖြစ်ပါက တစ်လုံးလျှင် ၁၁၅ကျပ်ဖြင့် ပို့ဆောင်ပေးပါသည်။

     ကြယ်သုံးလုံးအုတ်လုပ်ငန်းတွင် လုပ်သားအင်အား ၁၂၀ဦးခန့်ရှိကြောင်း၊ ပွင့်လင်းရာသီတွင် ဆောက်လုပ်ရေးလုပ်ငန်းများဆောင်ရွက်ကြသည့်အတွက် အရောင်းသွက်ကြောင်း၊ ဧပြီလနောက်ပိုင်းတွင် အုတ်ကျင်းမှမီးဖုတ်အုတ်များကို ဂိုဒေါင်ထဲထည့်ကာ လှောင်ထားကြောင်း၊ မိုးရာသီတွင် အုတ်ဈေးအနည်းငယ်တက်ကြောင်း၊ အကျိုးအမြတ်များစွာမရရှိသော်လည်း လုပ်သားများအား အလုပ်အဆင်ပြေစေရန်ဆောင်ရွက်ပေးနိုင်သည့်အတွက် ကျေနပ်အားရပါကြောင်း လုပ်ငန်းရှင်၏ပြောပြချက်အရ သိရှိရပါသည်။

DOCA(ပဲခူး)

   တောင်ငူမြို့နယ်၊ ညောင်ပင်လေးဈေးတွင် ရာသီချိန်အလိုက် နာနတ်သီးများရောင်းချလျက်ရှိရာ ပေါ်ဦးပေါ်ဖျားတွင် တစ်လုံးလျှင် (၁၃၀၀)ကျပ်မှ (၂၀၀၀)ကျပ်နှုန်းထိ အရောင်းအဝယ်ဖြစ်လျက်ရှိပါသည်။ နာနတ်သီးသည် အရည်ရွှမ်းပြီး အရသာရှိသည့်အသီးတစ်မျိုးဖြစ်၍ ကျန်းမာရေးအတွက် ကောင်းမွန်သောအကျိုးအာနိသင်များစွာပါဝင်ပါသည်။

    နာနတ်သီးတွင် ဗီတာမင်စီ၊ ဖောလိတ်၊ သံဓာတ်၊ မဂ္ဂနီဆီယမ်၊ ကြေးနီနှင့် ဗီတာမင် B6 စသည့် အာဟာရဓာတ်များလည်း ကြွယ်ဝစွာပါဝင်ပါသည်။ နာနတ်သီးစားခြင်းဖြင့် ဗီတာမင်နှင့် သတ္တုဓာတ်များပြည့်ဝစွာရရှိခြင်း၊ အစာကြေညက်စေခြင်း၊ ရောင်ရမ်းခြင်းကိုသက်သာစေခြင်း၊ ကိုယ်ခံစွမ်းအားကောင်းစေခြင်း၊ အဆစ်ရောင်ခြင်းကိုသက်သာစေခြင်း၊ နလန်ထမြန်စေခြင်းနှင့် နှလုံးကျန်းမာရေးကိုကောင်းစေခြင်း စသည့်အကျိုးကျေးဇူးများရရှိပါသည်။

    နာနတ်သီးသည် အရည်ရွှမ်းသောအသီးဖြစ်သောကြောင့် ယခုကဲ့သို့ ပူအိုက်သောရာသီတွင် အသီးအနေဖြင့်လည်းကောင်း၊ ဖျော်ရည်အနေဖြင့်လည်းကောင်း စားသုံးနိုင်ပါသည်။ ယခုရာသီတွင် နာနတ်သီးများအရောင်းသွက်လျက်ရှိကြောင်း သိရှိရပါသည်။

DOCA(ပဲခူး)

      မြန်မာလူမျိုးတို့၏ သားရည်စာအဖြစ် စားသုံးသောမုန့်များတွင် ရခိုင်မုန့်တီ (ခေါ်) အာပူလျှာပူလည်း တစ်ခုအပါအဝင်ဖြစ်ပါသည်။  ရခိုင်မုန့်တီ (ခေါ်) အာပူလျှာပူပြုလုပ်ရာတွင် ပါဝင်သောကုန်ကြမ်းပစ္စည်းများမှာ မုန့်တီမုန့်ဖတ်(အသေး)၊ ငါး၊ ငါးပိ၊ ငံပြာရည်၊ စပါးလင်၊ ပတဲကော၊ ချင်း၊ ကြက်သွန်ဖြူနှင့် ငရုတ်ကောင်းများဖြစ်ပါသည်။

     အာပူလျှာပူဟင်းရည်ချက်ပုံမှာ ရှေးဦးစွာ စပါးလင်၊ ပတဲကော၊ ကြက်သွန်ဖြူနှင့် ငရုတ်ကောင်းများအား ထောင်းထားရပါမည်။ ထို့နောက် ကြိုက်နှစ်သက်ရာငါး၊ ထောင်းထားသောစပါးလင်၊ ပတဲကောနှင့် ကြက်သွန်ဖြူများအား ရောနှော၍ပြုတ်ပြီး ငါးပိ၊ ငံပြာရည်၊ အချိုမှုန့်၊ ကြက်သားမှုန့်များကို လိုအပ်သည့်အတိုင်းထည့်လိုက်လျှင် စားကောင်းသောအာပူလျှာပူဟင်းရည်ရရှိမည်ဖြစ်ပါသည်။ မုန့်တီမုန့်ဖတ်ထဲသို့ ထိုဟင်းရည်ထည့်လိုက်ပြီး အာပူလျှာပူအဖြစ် စားသောက်ကြပါသည်။

     ဖြူးမြို့နယ်ရှိထူးစွဲ ရခိုင်မုန့်တီဆိုင်တွင် အာပူလျှာပူရိုးရိုး(ငုံးဥပါ)တစ်ပွဲလျှင် ၅၀၀ကျပ်၊  အကြော်ထည့်လျှင် ၇၀၀ကျပ်၊ ငါးဖယ်ထည့်လျှင် ၈၀၀ကျပ်နှင့် အစုံထည့်လျှင် ၁၀၀၀ကျပ်ဟူ၍ လေးမျိုးခွဲခြားရောင်းချကြောင်း သိရှိရပါသည်။

     “ထူးကဲ” အာပူလျှာပူဆိုင်သို့ ခရီးသွားပြည်သူများနှင့် ဖြူးဒေသမှစားသုံးသူများ လာရောက်သုံးဆောင်ကြကြောင်းနှင့် ဈေးနှုန်းမှာလည်း အသင့်အတင့်သာရှိသဖြင့် လူတန်းစားမရွေးစားသုံးနိုင်သောကြောင့် အရောင်းအဝယ်သွက်လျက်ရှိကြောင်း သိရှိရပါသည်။

DOCA(ပဲခူး)

     ၂၀၂၃ခုနှစ်၊ မတ်လ (နောက်ဆုံးပတ်) အတွင်း ရွှေဘိုမြို့နယ်၌ အခြေခံစားကုန်များဖြစ်သော ရွှေဘိုပေါ်ဆန်းဆန်(သစ်)တစ်ပြည်လျှင် ၃၅၀၀ကျပ်၊ ဧရာမင်းဆန်(သစ်)တစ်ပြည်လျှင် ၂၈၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ကြက်သွန်နီ(သစ်)လက်လီဈေးမှာ (ကြီး)တစ်ပိဿာလျှင် ၁၅၀၀ကျပ်၊ (လတ်)တစ်ပိဿာလျှင် ၁၂၀၀ကျပ်၊ (သေး)တစ်ပိဿာလျှင် ၈၀၀ကျပ်နှုန်းဖြင့် အရောင်းအဝယ်ဖြစ်လျက်ရှိပါသည်။ ကြက်သွန်ဖြူလက်လီဈေးမှာ (ဗမာ)တစ်ပိဿာလျှင် ၄၀၀၀ကျပ်မှ ၅၀၀၀ကျပ်ထိ၊ ရှမ်းကြက်သွန်ဖြူတစ်ပိဿာလျှင် ၅၀၀၀ကျပ်မှ ၅၅၀၀ကျပ်ထိ၊ (ကြူကုပ်)တစ်ပိဿာလျှင် ၄၀၀၀ကျပ်မှ ၅၅၀၀ကျပ်ထိ၊ ချင်းတစ်ပိဿာလျှင် ၁၃၀၀ကျပ်မှ ၁၅၀၀ကျပ်ထိ၊ ငရုတ်သီးခြောက်တစ်ပိဿာလျှင် အမျိုးအစားအလိုက် ၁၆၀၀၀ကျပ်မှ ၁၆၅၀၀ကျပ်ထိ၊ အာလူးတစ်ပိဿာလျှင် ၁၈၀၀ကျပ်မှ ၂၆၀၀ကျပ်ထိ၊ ခရမ်းချဉ်သီးတစ်ပိဿာလျှင် ၁၂၀၀ကျပ်ဖြင့် အရောင်းအဝယ်ဖြစ်နေပါသည်။

   ကြက်ဥလက်လီဈေးနှုန်းမှာ (ကြီး)တစ်လုံးလျှင် ၂၅၀ကျပ်၊ (သေး)တစ်လုံးလျှင် ၂၃၀ကျပ်၊ ဘဲဥ(ကြီး)တစ်လုံးလျှင် (၃၀၀)ကျပ်၊ (သေး)တစ်လုံးလျှင် (၂၅၀)ကျပ်ရှိပါသည်။ ရွှေဘိုမြို့၏ အသားငါးဈေးနှုန်းများမှာ ကြက်သား(CP)တစ်ပိဿာလျှင် ၈၀၀၀ကျပ်မှ ၁၁၀၀၀ကျပ်ထိ၊ ကြက်သား(ဗမာ)တစ်ပိဿာလျှင် ၁၀၀၀၀ကျပ်မှ ၁၃၀၀၀ကျပ်ထိ၊  ဝက်သားတစ်ပိဿာလျှင် ၁၈၀၀၀ကျပ်မှ ၂၂၀၀၀ကျပ်ထိ၊ အမဲသားတစ်ပိဿာလျှင် ၁၄၀၀၀ကျပ်မှ ၁၆၀၀၀ကျပ်ထိ၊  ငါးမြစ်ချင်းတစ်ပိဿာလျှင် ၇၀၀၀ကျပ်၊ ငါးကြင်းတစ်ပိဿာလျှင် ၆၀၀၀ကျပ်ဖြင့် ရောင်းဝယ်နေကြောင်း သိရပါသည်။

    စားသုံးဆီဈေးနှုန်းများမှာ ပဲဆီသန့်တစ်ပိဿာလျှင် ၁၂၅၀၀ကျပ်မှ ၁၃၀၀၀ကျပ်ထိ၊  စားအုန်းဆီတစ်ပိဿာလျှင် ၆၇၅၀ကျပ်နှင့် နှမ်းဆီတစ်ပိဿာလျှင် ၁၃၀၀၀ကျပ်ဖြင့် အရောင်းအဝယ်ဖြစ်နေကြောင်း သိရပါသည်။

DOCA(စစ်ကိုင်း)

    မုံရွာမြို့၊ သီရိမင်္ဂလာစျေးရှိ သစ်သီးဝလံများမှာ ရှမ်းပြည်နယ်၊ တောင်ကြီး၊ မြစ်ကြီးနား၊ သီပေါ၊  စစ်ကိုင်း၊ ပြင်ဦးလွင်နှင့် ဒေသတွင်းတို့မှ အသီးသီးဝင်ရောက်လျက်ရှိကြောင်း သိရပါသည်။

     ယခု ၂၀၂၃ခုနှစ်၊ မတ်လ (စတုတ္ထပတ်) တွင် ရွှေလိမ္မော်(၁)ပိဿာလျှင် ကျပ်(၇၀၀၀မှ ၈၀၀၀)ကြား၊ ပျားလိမ္မော်(၁)ပိဿာလျှင် ကျပ်(၆၅၀၀မှ ၈၀၀၀)ကြား၊ လိမ္မော်(ရိုးရိုး)(၁)ပိဿာလျှင် ကျပ်(၄၀၀၀မှ ၆၀၀၀)ကြား၊ စတော်ဘယ်ရီ(၁)ပိဿာလျှင် ကျပ်(၇၅၀၀ မှ ၈၅၀၀)ကြား၊  ပန်းသစ်တော်(၁)လုံးလျှင် ကျပ်(၁၅၀၀ မှ ၂၅၀၀)ကြား၊ ပန်းသီး(၁)လုံးလျှင် ကျပ်(၇၀၀ မှ ၁၅၀၀)ကြား၊ ထောပတ်သီး(၁)လုံးလျှင် ကျပ်(၅၀၀ မှ ၁၅၀၀)ကြား၊ ကျွဲကောသီး(၁)လုံးလျှင် ကျပ်(၁၀၀၀ မှ ၁၅၀၀)ကြား၊ တည်သီး(၁)လုံးလျှင် ကျပ်(၈၀၀ မှ ၁၀၀၀)ကြား၊ သခွားမွှေး (၁)လုံးလျှင် ကျပ်(၂၀၀၀ မှ ၃၅၀၀)ကြား၊ ဖရဲသီး(ကြီး)(၁)လုံးလျှင် ကျပ်(၂၅၀၀ မှ ၃၅၀၀)ကြား၊ ဖရဲသီး(သေး)(၁)လုံးလျှင် ကျပ်(၁၀၀၀ မှ ၂၀၀၀)ကြား၊ နာနတ်သီး(၁)လုံးလျှင် ကျပ်(၁၂၀၀ မှ ၁၅၀၀)ကြား၊ နှင်းသီး(၁)ပိဿာလျှင် ကျပ်(၅၀၀၀ မှ ၇၀၀၀)ကြား၊ နဂါးမောက်သီး(၁)လုံးလျှင် ကျပ်(၈၀၀ မှ ၁၅၀၀)ကြား၊ ငှက်ပျောသီးဖီးကြမ်းတစ်ဖီးလျှင် (၁၂၀၀)ကျပ်၊ ငှက်ပျောသီးမွှေးတစ်ဖီးလျှင် (၁၅၀၀)ကျပ်၊ စပျစ်သီး(၁)ပိဿာလျှင် ကျပ်(၈၀၀၀ မှ ၁၂၀၀၀)ကြားဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)