ပြည်တွင်းကုန်သွယ်မှုသတင်း

         ကျွန်းလှမြို့၊ ပိတောက်မြိုင်ဈေးတွင် ကြက်သွန်နီ နှင့်ကြက်သွန်ဖြူများကို မိမိတို့ဒေသထွက် အနည်းငယ်နှင့် ရှမ်းပြည်နယ် အောင်ပန်းမြို့နှင့်မန္တလေးတိုင်းဒေသကြီး၊ မြစ်သားမြို့တို့မှ အများဆုံး မှာယူရောင်းချလျက်ရှိ ကြောင်း သိရှိရပါ သည်။

        ၂၀၂၅ ခုနှစ်၊ ဩဂုတ်လ တတိယပတ်တွင် ကြက်သွန်ဖြူဈေးနှုန်း အနေဖြင့် ဗမာကြက်သွန်ဖြူ အကြီးစ တစ်ပိဿာလျှင်(၁၀၀၀၀)ကျပ်၊ ဗမာကြက်သွန်ဖြူ အလတ်စ တစ်ပိဿာလျှင်(၈၀၀၀)ကျပ်၊ ဗမာ ကြက်သွန်ဖြူ အသေးစ တစ်ပိဿာလျှင်(၇၀၀၀)ကျပ် နှင့် ကြက်သွန်ဖြူ(ကြူကုတ်)တစ်ပိဿာလျှင် (၁၇၀၀၀)ကျပ်ဈေးနှုန်းဖြင့်လည်းကောင်း ကြက်သွန်နီ ဈေးနှုန်းအနေဖြင့်  ကြက်သွန်နီ မြစ်သား အမျိုး အစား တစ်ပိဿာလျှင်(၁၈၀၀)ကျပ်နှင့် ကြက်သွန်နီ ရိုးရိုး အမျိုးအစား တစ်ပိဿာလျှင်(၁၅၀၀)ကျပ် ဈေးနှုန်း အသီးသီးတို့ဖြင့် အရောင်းအဝယ်ဖြစ်လျက်ရှိကြောင်း  သိရ သည်။

DOCA (စစ်ကိုင်း)

         ကျွန်းလှမြို့နယ်အတွင်းရှိ ကျေးရွာများတွင် စိုက်ပျိုးရေးနှင့်မွေးမြူရေးကို အဓိကလုပ်ကိုင်ကြရာမှ စားဖို ဆောင်သီးနှံတစ်ခုဖြစ်သည့် ကန်ဇွန်းဥကို တစ်ပိုင်တစ်နိုင် နှင့် မိမိပိုင်ယာမြေများတွင် စီးပွားဖြစ် စိုက်ပျိုးရောင်းချလျက်ရှိပါသည်။

        ၂၀၂၅ ခုနှစ်၊ ဩဂုတ်လ ဒုတိယအပတ်တွင် ကျွန်းလှမြို့၊ သစ်ရာမြိုင်ဈေးအတွင်း ဖြစ်ပေါ်နေသော  ကန်ဇွန်းဥ ဈေးနှုန်းမှာ ကန်ဇွန်းဥ တစ်ပိဿာလျှင်(၃၀၀၀)ကျပ်၊ ကန်ဇွန်းဥ ၅၀ကျပ်သားလျှင်(၁၅၀၀) ကျပ် နှင့် ၂၅ကျပ်သားလျှင်(၈၀၀)ကျပ် ဈေးနှုန်းများဖြင့် ရောင်းချလျက်ရှိခဲ့ပြီး ဩဂုတ်လ တတိယ အပတ်တွင် ကျွန်းလှမြို့၊ သစ်ရာမြိုင်ဈေးအတွင်း ဖြစ်ပေါ်နေသော  ကန်ဇွန်းဥ ဈေးနှုန်းမှာ ကန်ဇွန်းဥ တစ်ပိဿာလျှင်(၃၂၀၀)ကျပ်၊ ၅၀ကျပ်သားလျှင်(၁၆၀၀)ကျပ် နှင့် ၂၅ကျပ်သားလျှင်(၈၀၀)ကျပ် ဈေးနှုန်း များဖြင့် ရောင်းချသောကြောင့် ယခင်အပတ်ထက် ကန်ဇွန်းဥ တစ်ပိဿာလျှင်(၂၀၀)ကျပ် မြင့်တက်ပြီး အရောင်းအဝယ်ဖြစ်လျက်ရှိကြောင်း  သိရပါသည်။

DOCA (စစ်ကိုင်း)

           ကျောက်ဆည်မြို့ရှိ အေးမြကြည်လင်စျေးနှင့်မြို့မစျေးများသို့ မုန်ညှင်းဆလပ်များ ဝင်ရောက်လျက်ရှိရာ စျေးကွက်အနေဖြင့် အောင်ပန်း၊ ကလော၊ရွာငံနှင့်ရေဦးမြို့များမှ စျေးကွက်အတွင်းသို့ ဝင်ရောက်လျက်ရှိပြီး ယခင်လ(၁)ပိဿာကို(၂၃၀၀-၂၅၀၀)ကျပ်အထိရောင်းချရပြီး သြဂုတ်လမှ စတင်၍စျေးနှုန်းများမြင့်တက်လျက်ရှိကြောင်း၊ လက်ရှိ မုန်ညှင်းဆလပ်(၁)ပိဿာလျှင် ဖောက်သည် စျေး(၃၀၀၀/-)ကျပ်အထိအရောင်းချရကြောင်း၊ လက်လီစျေးအနေဖြင့် (၁)ပိဿာလျှင်(၄၀၀၀/-)ကျပ် စျေးနှုန်းဖြင့်ရောင်းချရသောကြောင့်ယခင်လနှင်းနှိုင်းယှဉ်လျှင် မုန်ညှင်းဆလပ်(၁)ပိဿာကို (၁၀၀၀-၁၅၀၀)ကျပ် စျေးနှုန်းမြင့်တက်ရောင်းချရသောကြောင့် မုန်ညှင်းဆလပ်စိုက်ပျိုးသော တောင်သူများ အကျိုးအမြတ်ဖြစ်ထွန်းလျက်ရှိကြောင်း၊ မုန်ညှင်းဆလပ်ကို အစိမ်းကြော်၊ ကင်ချီပြုလုပ်၍စားသောက်ကြကြောင်း၊ မုန်ညှင်းဆလပ်ကိုစားသုံးခြင်းဖြင့် ကျန်းမာရေးအကျိုးကျေးဇူးများရရှိစေပြီး ဝယ်လိုအားရှိသောမုန်ညှင်းဆလပ်ကို တောင်သူကြီးများတိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

          မလှိုင်မြို့နယ်ရှိ နှမ်းစိုက်တောင်သူအချို့မှာ ပြောင်းဖူးကို နှမ်းနှင့်ရော၍ စိုက်ပျိုးရာ အကျိုးအ မြတ်ရရှိခဲ့ကြောင်းသိရသည်။ နှမ်းခင်းအတွင်း ပြောင်းဖူးစေ့ကို နှစ်ပြည်ခန့် ရော၍ စိုက်ပျိုးကြပြီး၊ စိုက်  ပျိုးစရိတ်အနေဖြင့် သီးခြားကုန်ကျမှုမရှိဘဲ မျိုးစေ့ဘိုးအနေနှင့် တစ်ပြည် (၁၀၀၀၀) ကျပ်နှုန်းဖြင့်သာ ကုန်ကျခဲ့ကြောင်း၊ ထွက်ရှိလာသော ပြောင်းဖူးပင်ကို နွားစာအဖြစ် အသုံးပြုနိုင်ပြီး၊ ပြောင်းဖူးကို မိသားစုအတွက် သွားရည်စာအဖြစ်လည်းကောင်း၊ ဟင်းချက်၍လည်းကောင်း စားသုံးနိုသ်သည့်အပြင် ပြောင်းဖူးကို မလှိုင်မြို့ပေါ်သို့ သွားရောက်ရောင်းချရာမှာတော့ ကျပ်တစ်သိန်းကျော်ရရှိကြောင်း ပြောင်းဖူးစိုက်တောင်သူများထံမှ သိရှိရပါသည်။ မိုးတွင်းမှာ နှမ်းနှင့်ရော၍ စိုက်ပျိုးရာမှ ရရှိခဲ့သော ပြောင်းဖူးစေ့ကို မျိုးစေ့အနည်းငယ်ချန်ကာ လာမည့်ဆောင်းသီးနှံ ထောပတ်ပဲနှင့်ရော၍ စိုက်ပျိုးသွား မည်ဖြစ်ကြောင်း၊ ထောပတ်ပဲပင်အနွယ်တက်ရန်ကိုလည်း အထောက်အကူဖြစ်သဖြင့် အကျိုးကျေးဇူး များစွာ ရရှိကြောင်းသိရှိရပါသည်။

DOCA(မန္တလေး)

     တနင်္သာရီတိုင်းဒေသကြီး မြိတ်မြို့နယ်တွင် တောင်ယာလုပ်ငန်းကို အများဆုံးလုပ်ကိုင် ကြပါသည့်အပြင် ရာသီပေါ်သီးနှံနှင့် စားဖိုဆောင်သီးနှံများကို အများအပြားစိုက်ပျိုးကြပါ သည်။ စိုက်ပျိုးရေးလုပ်ငန်းများဖြစ်သည့် ကန်စွန်း၊ ခရမ်းသီး၊ ဘူးသီး၊ ပဲသီး အစရှိသည့် သီးနှံမျိုးစုံကို စိုက်ပျိုးကြပါသည်။ ကန်စွန်းရွက်ပင်ကို အိမ်တိုင်းလိုလိုစိုက်ပျိုးကြပါသည်။ ကန်စွန်းပင်သည် အပူပိုင်းဒေသတွင် ပေါက်ရောက်သော အပင်တစ်မျိုးလည်းဖြစ်ပါသည်။ ကန်စွန်းပင်သည် ရေထဲ (သို့မဟုတ်) စိုစွတ်သောမြေကြီးပေါ်တွင် ပေါက်လေ့ရှိပြီး ကန်စွန်းရိုး အဆစ်များမှ တစ်ဆင့်အမြစ် များထွက်ပြီး ကြီးထွားလေ့ရှိပါသည်။

    ယခု၂၀၂၅ခုနှစ်၊ သြဂုတ်လတတိယပတ်တွင် မြိတ်မြို့ပေါ်ရှိ ကန်စွန်းရွက်ဈေးနှုန်းမှာ ကန်စွန်းရွက်အချောတစ်စည်းလျှင်(၈၀၀)ကျပ်နှင့်ကန်စွန်းရွက်အကြမ်းတစ်စည်းလျှင် (၅၀၀) ကျပ်ရှိကြောင်း သိရှိရပါသည်။

DOCA(တနင်္သာရီ)