ပြည်တွင်းကုန်သွယ်မှုသတင်း

            မန္တလေးစျေးကွက်အတွင်းသို့ ဆောင်းရာသီစာ ကုန်စိမ်းသီးနှံမျိုးစုံ အများအပြား ဝင်ရောက် လာကြောင်း တွေ့ရှိရပါတယ်။ ဇန်နဝါရီလပထမပတ်တွင် မန္တလေးစျေးကွက်အတွင်း ကုန်စိမ်း မျိုးစုံသို့ အဝင်များသကဲ့သို့ ကုန်စိမ်းသီးနှံစျေးနှုန်းများ ကျဆင်းလျက်ရှိရာ ပန်းဂေါ်ဖီစိမ်းစျေးမှာ   ဒီဇင်ဘာလစျေးနှိုင်းယှဉ်ပါက  စျေးကွာခြားမှုရှိကြောင်း သိရှိရပါတယ်။ မန္တလေးဒေသပတ်ဝန်းကျင် ဖြစ်သည့်အမရပူရ၊ ပုသိမ်ကြီး၊ မတ္တရာ၊ ပြင်ဦးလွင်ဒေသများနှင့် ရှမ်းပြည်နယ် တောင်ပိုင်းဒေသ များမှ ထွက်ရှိသည့်ပန်းဂေါ်ဖီပွင့်ဖြူနှင့် ပန်းဂေါ်ဖီပွင့်စိမ်းများ စျေးကွက်အတွင်း ဝင်ရောက်မှုများ ကြောင်း တွေ့ရှိရပါတယ်။ စျေးကွက်အတွင်း ပန်းဂေါ်ဖီပွင့်ဖြူနှင့် ပန်းဂေါ်ဖီ ပွင့်စိမ်းမှာ အရောင်း သွက်သည့်ကုန်စိမ်းအမယ်များဖြစ်ပြီး၊ ပန်းဂေါ်ဖီစိမ်းမှာ နူးညံ့မှု ပိုသည့်အတွက် စျေးပိုရကြောင်း သိရှိရပါတယ်။ ပန်းဂေါ်ဖီစိမ်းသည် ကယ်လ်လိုရီနည်းသည့် ဟင်းသီးဟင်းရွက် အမယ်တစ်မျိုး ဖြစ်ပြီး၊ အမျှင်ဓါတ်၊သတ္တုဓါတ်နှင့်ဗီတာမင်များနှင့် Antioxidants များကြွယ်ဝခြင်း တို့ကြောင့် ကျန်းမာရေးအတွက်အကျိုးပြုသောဟင်းသီးဟင်းရွက်တစ်မျိုးဖြစ်ပါတယ်။ ပန်းဂေါ်ဖီပွင့်စိမ်းမှာ မန္တလေးကုန်စိမ်း စျေးကွက်အတွင်း ဒီဇင်ဘာလတွင် လက္ကားစျေး တစ်ခုလျှင် ၁၈၀ဝိ/-နှင့် ၂၀၀ဝိ/-စျေး၊လက်လီစျေးတစ်ခုလျှင် ၂၀၀ဝိ/-နှင့် ၂၂၀ဝိ/-စျေးတို့ဖြင့် ရောင်းချခဲ့ပြီး၊ ဇန်နဝါရီလ ပထမပတ် အတွင်း ပန်း‌ဂေါ်ဖီပွင့်စိမ်းလက္ကားစျေးမှာ တစ်ခုလျှင်  ၁၀၀ဝိ/-နှင့် ၁၂၀ဝိ/- စျေး၊လက်လီစျေးမှာ  ၁၃၀ဝိ/- နှင့် ၁၅၀ဝိ/-စျေးတို့ဖြင့် ရောင်းချလျက်ရှိရာ ဝင်ရောက်မှုများသည့်အတွက် ‌စျေးအနည်း ငယ် ကျသွားကြောင်း သိရှိရပါတယ်။ပန်းပွင့်စိမ်းများမှာ အရွယ်အစားအလိုက်စျေးအနည်းငယ် ကွာခြားမှုများရှိပြီး၊အရောင်းသွက်လျှက်ရှိသည့်ဟင်းသီးဟင်းရွက်အမယ်တစ်မျိုးဖြစ်ကြောင်း  သိရှိရ ပါတယ်။ မန္တလေးကုန်စိမ်းရောင်းချသည့်သီရိမာလာစျေး(ပိုက်ကျုံးစျေး)တွင် ပန်း‌ဂေါ်ဖီဖြူနှင့် ပန်း ဂေါ်ဖီစိမ်း ကားဝင်ရောက်မှုမှာ တစ်ရက်လျှင် Center (၆) ဘီးကား (၈)စီးနှင့် (၁၀)စီး အကြားဝင် ရောက် လျက်ရှိကြောင်း သိရှိရပါတယ်။

DOCA(မန္တလေး)                                                                                                                       

          ဇန်နဝါရီလပထမပတ်အတွင်း  မန္တလေးစျေးကွက်အတွင်းသို့  ခရမ်းချဉ်သီးများ  ဝင်ရောက်မှု များသည့်အတွက် စျေးအနည်းငယ်ကျဆင်းသွားကြောင်း တွေ့ရှိရပါတယ်။  စျေးကွက်အတွင်းတွေ့ရှိ  ရသည့်ခရမ်းချဉ်သီးများအား ဗမာသီးနှင့်အင်းသီးဟူ၍ ခွဲခြားရောင်းချလျက်ရှိပါတယ်။  ခရမ်းချဉ်သီး အရသာအနည်းငယ်ချဉ်သည့်မျိုးအား ဗမာခရမ်းချဉ်သီး(သို့မဟုတ်)ကိုင်းသီးဟုခေါ်ဝေါ်ပြီး၊အင်းလေး ဒေသမှဝင်ရောက်သည့် အရသာချိုသည့်ခရမ်းချဉ်သီးများအား ‌(အင်းသီး)ဟုခေါ်ဝေါ်ကြောင်း တွေ့ ရှိ ရပါတယ်။ မန္တလေးစျေးကွက်အတွင်းသို့  အမရပူရ၊  ပုသိမ်ကြီး၊ မတ္တရာ၊  ကျောက်ဆည်၊ မြစ်သား၊ စဉ့်ကိုင်၊တံတားဦးဒေသထွက်ခရမ်းချဉ်သီးများအပြင်    စစ်ကိုင်းတိုင်းဒေသကြီးနှင့်    ရှမ်းပြည်နယ် တောင်ပိုင်း၊အင်းလေးဒေသတို့မှ ထွက်ရှိသည့် ခရမ်းချဉ်သီး(အင်းသီး)များဝင်ရောက်လျှက်ရှိကြောင်း သိရှိရပါတယ်။ မန္တလေးစျေးချို၊ကိုင်းတန်းစျေးရှိ ခရမ်းချဉ်သီးပွဲရုံများ၊ကုန်စိမ်းလက္ကားရောင်းချသည့် သီရိမာလာစျေး(ပိုက်ကျုံးစျေး) နှင့် ၄၁ လမ်း၊ကမ်းနားလမ်းရှိ ကုန်စိမ်းလက္ကားစျေးတို့တွင် ခရမ်းချဉ် သီးအမျိုးအစားအလိုက်သေတ္တာများဖြင့်လည်းကောင်း၊ တောင်းများဖြင့်လည်းကောင်း ဝင်ရောက် လျက်ရှိပြီး၊မန္တလေးမြို့ပေါ်ရှိစျေးငယ်များသို့ပြန်လည်ရောင်းချလျက်ရှိကြောင်းသိရှိရပါတယ်။ စျေး ကွက်အတွင်းခရမ်းချဉ်သီးများအား ခေါင်သီးနှင့်အလတ်စသီးအလိုက် အမျိုးအစားခွဲခြား၍ ရောင်းချ သည့်အတွက် အသီးအရွယ်အစားအလိုက်စျေးနှုန်းများမှာ အနည်းငယ်ကွာခြားမှုရှိကြောင်း သိရှိရ ပါတယ်။ဒီဇင်ဘာလပထမပတ်အတွင်း ခရမ်းချဉ်သီး(ဗမာသီး)လက္ကားစျေးမှာ (၂၀ပိဿာပါ)သေတ္တာ တစ်လုံးလျှင်၄၀၀၀ဝိ/-နှင့် ၄၂၀၀ဝိ/-စျေး၊ တောင်း(၈ပိဿာပါ) တစ်လုံးလျှင် ၁၁၀၀ဝိ/- နှင့် ၁၁၅၀ဝိ/- စျေး၊ လက်လီစျေးအနေဖြင့် တစ်ပိဿာလျှင် ဗမာသီး ၃၀၀ဝိ/-နှင့် ၄၀၀ဝိ/-စျေး၊ အင်းသီးမှာ ၄၀၀ဝိ/-နှင့် ၅၀၀ဝိ/-စျေးဖြစ်ပေါ်ခဲ့ပါတယ်။ ဇန်နဝါရီလပထမပတ်အတွင်း ခရမ်းချဉ်သီး လက်က္ကားပေါက်စျေးမှာ (၂၀ပိဿာပါ) သေတ္တာတစ်လုံးလျှင် ၃၅၀၀ဝိ/-နှင့် ၃၈၀၀ဝိ/စျေး၊ (၈ပိဿာပါ)တစ်တောင်းလျှင်၁၀၀၀ဝိ/-နှင့်၁၁၀၀ဝိ/-စျေး၊လက်လီစျေးတစ်ပိဿာလျှင်ခရမ်းချဉ်သီး (ဗမာသီး) ၂၅၀ဝိ/-နှင့် ၃၀၀ဝိ/-စျေး၊ အင်းသီးတစ်ပိဿာလျှင်၃၀၀ဝိ/-နှင့် ၃၅၀ဝိ/- စျေးတို့ ဖြစ်ပေါ် ခဲ့သည့်အတွက်ဒီဇင်ဘာလပထမပတ်အတွင်း ဖြစ်ပေါ်ခဲ့သည့်ပေါက်စျေးနှင့်နှိုင်းယှဉ်ပါက  ခရမ်းချဉ် သီးဝင်ရောက်မှုများလာသည့်အပေါ် စျေးအနည်းငယ် ကျဆင်းသွားကြောင်းတွေ့ရှိရပါတယ်။ ခရမ်းချဉ်သီးအား အစားအသောက်ချက်ပြုတ်ရာတွင် သာမက ဖျော်ရည်များ၊ ယိုများ၊ အသုတ်စုံ များတွင် ထည့်သွင်းစားသုံးခြင်းနှင့် ကျန်းမာရေးအတွက် သုံးစွဲမှုများလာသည့်အတွက် စျေးကွက် လိုအပ်ချက်များသည့် အသီးနှံဖြစ်ကြောင်း တင်ပြလိုက်ရပါတယ်။

DOCA(မန္တလေး)                                                                                                                       

          မန္တလေးစျေးကွက်အတွင်းသို့  ထောပတ်ပဲစိမ်းများ    ဝင်ရောက်မှုများသည့်အတွက်  စျေး အနည်းငယ်ကျဆင်းသွားကြောင်း တွေ့ရှိရပါတယ်။ မန္တလေးစျေးကွက်အတွင်းသို့  ပြင်ဦးလွင်ခရိုင်၊ မိတ္ထီလာခရိုင်၊ရမည်းသင်းခရိုင်နှင့် မြင်းခြံခရိုင်တို့မှ စိုက်ပျိုးထွက်ရှိသည့် ထောပတ်ပဲစိမ်းများအပြင် စစ်ကိုင်းတိုင်းဒေသကြီးနှင့် ရှမ်းပြည်နယ်တောင်ပိုင်းမှ  ထွက်ရှိသည့်ထောပတ်ပဲစိမ်းများ  လည်းဝင် ရောက်ကြောင်း တွေ့ရှိရပါတယ်။ မန္တလေးမြို့၊ ၄၁ လမ်း၊ ဝေယံထွန်းစျေး၊ ကုန်စိမ်းလက္ကား ရောင်းချ သည့်စျေးတွင်  ထောပတ်ပဲစိမ်းများအား နို့ဆီဗူးဖြင့် ချိန်တွယ်ရောင်းချလျက်ရှိပါတယ်။ လက္ကားစျေး အနေဖြင့် ဒီဇင်ဘာလပထမပတ်အတွင်း ထောပတ်ပဲစိမ်းတစ်ထုတ်(နို့ဆီဗူး ၁၁ ဗူးပါ) လျှင် ၇၀၀ဝိ/- နှင့် ၈၀၀ဝိ/-စျေး၊ လက်လီစျေးတစ်ဗူးလျှင် ၁၂၀ဝိ/- နှင့် ၁၃၀ဝိ/- ဖြစ်ပေါ်ခဲ့ပြီး၊ဇန်နဝါရီလပထမပတ် တွင် လက္ကားစျေး တစ်ထုတ်လျှင် ၆၀၀ဝိ/- နှင့် ၇၀၀ဝိ/- စေျး၊   လက်လီစျေး တစ်ဗူးလျှင် ၁၀၀ဝိ နှင့် ၁၁၀ဝိ/- စျေးဖြင့်ရောင်းချလျက်ရှိပါတယ်။ဇန်နဝါရီလပထမပတ်အတွင်းထောပတ်ပဲစိမ်း ဝင်ရောက် မှု များပြားသည့်အတွက်  စျေးအနည်းငယ်ကျဆင်းသွားကြောင်း   ထောပတ်ပဲရောင်းချသူတစ်ဦးထံ မှ သိရှိရပါတယ်။ ထောပတ်ပဲအမျိုးအစားမှာ    ပြည်တွင်းစားသုံးမှုသာမက    ပြည်ပသို့တင်ပို့သည့် စျေးကွက်ဝင် ပဲအမျိုးအစားဖြစ်ပါတယ်။   မန္တလေးပွဲစား၊ ကုန်သည်၊ စက်ပိုင်များ မဟာကထိန်တော် အသင်းတွင်  ဇန်နဝါရီလပထမပတ်အတွင်း ဖြစ်ပေါ်လျက်ရှိသောစျေးမှာ   တစ်တန်လျှင်ထောပတ်ပဲ ကြီး (သစ်)    ၄၁၃၇၀၃၅ ကျပ်  နှင့်   ၄၂၄၅၉၀၄ကျပ်၊   ထောပတ်ပဲ(လတ်)  ၃၈၁၀၄၂၇ ကျပ်  နှင့် ၄၀၂၈၁၆၅ ကျပ်၊ ထောပတ်ပဲ(သေး) ၃၂၆၆၀၈၀ ကျပ်စျေး၊တစ်ပိဿာပေါက်စျေးများမှာထောပတ်ပဲ (ကြီး)(သစ်) ၆၇၅၆ ကျပ်နှင့် ၆၉၃၃ ကျပ်၊ထောပတ်ပဲ(လတ်) ၆၂၂၂ကျပ်နှင့်၆၅၇၈ကျပ်၊ ထောပတ်ပဲ (သေး) ၅၃၃၃ ကျပ် အသီးသီးဖြစ်ပေါ်လျက်ရှိပြီး၊ ရက်အလိုက်ထောပတ်ပဲပေါက်စျေး  အနည်းငယ် ပြောင်းလဲမှုရှိကြောင်း သိရှိရပါတယ်။

DOCA(မန္တလေး)

သင်္ဘောပင်ကို မြန်မာနိုင်ငံအနှံ့အပြား အပူပိုင်းနှင့် အပူအနည်းငယ်လျော့ဒေသများတွင် အများဆုံးစိုက်ပျိုးကြပါသည်။သင်္ဘောပင်အဖိုပင်နှင့်အမပင် နှစ်မျိုးရှိပြီး အဖိုပင်မှာ အပွင့်သာ ပန်းခိုင်သဖွယ်တွဲလျက်ပွင့်ပြီး အသီးမသီးပါ။၄◌င်းသင်္ဘောဖိုအပွင့်ကို ပြုတ်၍ အသုတ်သုတ်စား၍ သော်လည်းကောင်း၊ အတို့အမြှုပ်လုပ်၍သော်လည်းကောင်း စားသုံးကြပါသည်။ကျန်းမာရေး အတွက်လည်း သင်္ဘောရွက်ကို အတို့အမြှုပ်လုပ်၍သော်လည်းကောင်း၊ သင်္ဘောဖိုရွက်ကို ကြိတ်ထောင်း၍ သတ္တူအရည်ကိုလည်းသောက်သုံးကြကြောင်း သိရှိရသည်။ သင်္ဘောအမပင်မှ သာ အသီးသီးပါသည်။ဗမာသင်္ဘောပင်အမျိုးအစားကို တပိုင်တနို်ငသာစိုက်ပျိုးကြပြီး ယခုအခါ ထိုင်ဝမ်သင်္ဘောပင်မျိုးကို စီးပွားဖြစ် စိုက်ပျိုးလာကြပါသည်။ ဈေးကွက်အတွင်း၌ သင်္ဘောသီးကို အစိမ်းအတိုင်းသော်လည်းကောင်း၊ အမှည့်သော်လည်းကောင်း ရောင်းကြပါသည်။ သင်္ဘောသီး အစိမ်းကို သင်္ဘောသီးသုတ်၊ ယိုးဒယားသင်္ဘောသီးထောင်း၊ ယိုးဒယားသင်္ဘောသီးအပြားသုတ်၊ သင်္ဘောသီးယိုနှင့် အသုတ်စုံများထဲတွင်လည်း အနည်းငယ်ထည့်၍ စားသုံးကြပါသည်။ သင်္ဘော သီးယိုကို SME လုပ်ငန်းတစ်ခုအဖြစ် လုပ်ကိုင်ကြပြီးအသင့်အတင့်ဝင်ငွေရရှိသော အသေးစား အလတ်စားစိးပွားရေးလုပ်ငန်းတစ်ခုဖြစ်ကြောင်းလည်းသိရှိရသည်။ သင်္ဘောသီးအစိမ်းတစ်လုံးလျှင် အရွယ်အစားအကြီးအသေးပေါ်မူတည်၍ ၁၅၀၀မှ ၃၀၀၀ကျပ်ဈေးဖြင့်လည်းကောင်း ရောင်းဝယ် ကြပါသည်။ သင်္ဘောသီးအမှည့်ကို ကျန်းမာရေးအတွက် ဝမ်းလဲမှန်၊ အမျှင်ဓာတ်နှင့် ဗီတာမင်များစွာပါဝင်သောကြောင့် လူကြိုက်များပြီး စားသုံးမှုများသည့် အသီးအနှံတစ်မျိုးလည်း ဖြစ်ပါသည်။ သင်္ဘောသီးကို အချိုပွဲအဖြစ်လည်းကောင်း၊ ဖျော်ရည်လုပ်၍သော်လည်းကောင်း စားသုံးကြပါသည်။သင်္ဘောသီးအမှည့်တစ်လုံးလျှင်အကြီး-၄၀၀၀ကျပ်၊ အလတ်-၃၀၀၀ကျပ်၊ အသေး-၂၀၀၀ကျပ် စသည့်ဈေးနှုန်းများဖြင့် ရောင်းဝယ်လျက်ရှိကြောင်း ဈေးကွက်အတွင်းမှ သိရှိရသည်။

DOCA(မန္တလေး)

      မကွေးတိုင်းဒေသကြီး၊ ပခုက္ကူမြို့တွင် ၂၀၂၄ခုနှစ်၊ ဒီဇင်ဘာလ(စတုတ္ထပတ်)တွင် ဘိလပ်မြေ ဈေးနှုန်းများမှာ ပစ္စည်းအနည်း ငယ်ပြတ်လတ်မှု၊ အဆင့်ဆင့်သယ်ယူရမှုတို့ကြောင့် ဈေးတက်လာသည်ကို တွေ့ရှိရပါသည်။ ကြံ့နှစ်ကောင် ဘိလပ်မြေ တစ်အိတ်လျှင် ကျပ်(၁၅၀၀၀)၊ အယ်လ်ဖာ ဘိလပ်မြေ တစ်အိတ်လျှင် ကျပ်(၁၅၀၀၀)၊ အပါချီဘိလပ်မြေ တစ်အိတ်လျှင် ကျပ် (၁၄၀၀၀)ဈေးဖြင့် အရောင်းအဝယ်ဖြစ်လျက်ရှိကြောင်း သိရသည်။

          ဒီဇင်ဘာလ(စတုတ္ထပတ်)တွင် ဓာတ်မြေဩဇာ ဈေးနှုန်းများမှာ နိုဝင်ဘာလ(စတုတ္ထပတ်) ဈေးနှုန်းအတိုင်း ဈေးငြိမ်နေသည်ကို တွေ့ရှိရပါသည်။ ယခုလက်ရှိဈေးနှုန်းများမှာ  အာမိုယူရီး ယား(50)kgပါ တစ်အိတ်လျှင် ကျပ်(၁၀၅၀၀၀)၊ ဩဘာယူရီးယား(50)kgပါ တစ်အိတ်လျှင် ကျပ်(၁၀၃၀၀၀)၊ ရွှေနဂါးယူရီးယား တစ်အိတ်လျှင် ကျပ်(၁၃၃၀၀၀)၊ တရုတ်တီစူပါ သံကွင်း (50)kgပါ တစ်အိတ်လျှင် ကျပ်(၁၆၅၀၀၀)၊ တရုတ်ပုလဲရွှေတောင် (50)kgပါ  တစ်အိတ်လျှင် ကျပ်(၁၀၁၀၀၀)၊ မြန်မာဩဘာ ရွှေကောမက် (50)kg ပါ တစ်အိတ်လျှင် ကျပ်(၁၆၂၀၀၀)၊ ဩဘာကွန်ပေါင်း (50)kg ပါ တစ်အိတ်လျှင် ကျပ်(၁၄၀၀၀၀)၊ ကောမက်ကွန်ပေါင်း ၁၅း၁၅း၁၅ (50kg)ပါ တစ်အိတ်လျှင် ကျပ်(၁၄၅၀၀၀)၊ တရုတ်အာမို ၁၆း၁၆း၁၆ (50kg)ပါ တစ်အိတ်လျှင် ကျပ်(၁၅၀၀၀၀)ဖြင့် အရောင်း အဝယ်ဖြစ်လျက်ရှိပါသည်။

          ယခု ဒီဇင်ဘာလ(စတုတ္ထပတ်)တွင် ဖြစ်ပေါ်နေသော ပိုးသတ်ဆေးဈေးနှုန်းများမှာ နိုဝင်ဘာလ (စတုတ္ထပတ်)ဈေးနှုန်းများအတိုင်း ဈေးငြိမ်နေသည်ကို  တွေ့ရှိရပါသည်။  အာမိုမက်နီ ဖော့(500)cc တစ်ဘူးလျှင် ကျပ်(၆၅၀၀၀)၊ အာမိုမက်နီဖော့ (၁)လီတာတစ်ဘူးလျှင် ကျပ်(၁၀၅၀၀)၊ အာမို စတား(၁)လီတာ တစ်ဘူးလျှင် ကျပ်(၆၇၀၀၀)၊ အာမိုအီမာ(၂၅၀)cc တစ်ဘူးလျှင် ကျပ်(၁၈၀၀၀)၊ (၅၀၀)cc တစ်ဘူးလျှင် ကျပ်(၂၈၅၀၀)၊ (၁)လီတာ တစ်ဘူးလျှင် ကျပ်(၅၃၀၀၀)၊ ဂျက်ကက် မင်းမဟော် (၁၀၀)cc တစ်ဘူးလျှင် ကျပ်(၁၆၅၀၀)၊ ဩဘာအဆီဖိတ် (500)gပါ တစ်ထုပ်လျှင် ကျပ်(၃၄၀၀၀)၊ ဩဘာငှက်ကြီးတောင်(၁၀၀)cc တစ်ဘူးလျှင် ကျပ်(၂၆၀၀၀)၊ ဩဘာငှက်ကြီး တောင်(၂၅၀)cc တစ်ဘူးလျှင်ကျပ်(၆၂၀၀၀)၊ မင်းမဟော်ဖော်ယူဘိုး (500)cc တစ်ဘူးလျှင် ကျပ်(၄၅၀၀၀)၊ (250)cc တစ်ဘူးလျှင် ကျပ်(၂၅၀၀၀)၊ မင်းမဟော် ဂုတ်မက်ပ် (၂၅၀)cc တစ်ဘူးလျှင် ကျပ်(၃၇၀၀၀)၊(၅၀၀)cc တစ်ဘူးလျှင်  ကျပ်(၆၈၀၀၀) ဈေးနှုန်းအသီးသီးဖြင့် အရောင်းအဝယ် ဖြစ်လျက်ရှိကြောင်း သိရှိရပါသည်။

     ယခု ဒီဇင်ဘာလ(စတုတ္ထပတ်)တွင် နိုဝင်ဘာလ(စတုတ္ထပတ်)ဈေးအတိုင်း အနည်းငယ်သာ ကျပြီး ဈေးငြိမ်နေသည်ကို တွေ့ရှိရပြီး  အရောင်းအဝယ်မှာ ပုံမှန်ဖြစ်လျက်ရှိကြောင်း လုပ်ငန်းရှင်များထံမှ သိရှိရပါသည်။

DOCA(မကွေး)