ပြည်တွင်းကုန်သွယ်မှုသတင်း

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့၊ မြို့မစည်ပင်သာယာဈေးနှင့် အမှတ်(၂)ဈေး တို့တွင် ရာသီစာပဲစိမ်းစားဥများ လှိုင်လှိုင် ရောင်းချလျက်ရှိပါသည်။ ရာသီစာပဲစိမ်းစားဥများကို ပခုက္ကူမြို့ ဧရာဝတီမြစ်၏ တောင်ဘက် တွင်ရှိသော မြေနုကျွန်းများနှင့် မန္တလေးတိုင်းဒေသကြီး ညောင်ဦးခရိုင် အတွင်းရှိကျေးရွာများမှ မြေနုကျွန်းများတွင် အများဆုံးစိုက်ပျိုးလျက်ရှိသည်။ ပခုက္ကူမြို့မဈေးနှင့် အမှတ်(၂)ဈေးတို့တွင် တောင်ဘက် ကမ်းမှ ပဲစိမ်းစားဥများကို ဖောက်သည်ယူ၍ ရောင်းချနေကြောင်း သိရှိရပါသည်။

          ၂၀၂၅ခုနှစ်၊ ဇန်နဝါရီလ(ပထမပတ်)တွင် ပဲစိမ်းစားဥများ စတင်ပေါ်ထွက်နေပြီး တစ်ပိဿာတွဲ တစ်တွဲလျှင် ကျပ်(၃၀၀၀)ခန့်ဖြင့် ရောင်းချနေကြောင်း၊ ပဲစိမ်းစားဥသည် အရည်ရွှမ်းသော မြေအောက် ပင်စည်မျိုးဖြစ်ပြီး ဆီးချိုသမားများနှင့်တည့်သော သရေစာအစားအစာလည်းဖြစ်ပါသည်။ ဇန်နဝါရီလ (ဒုတိယပတ်)တွင် တစ်ပိဿာတွဲတစ်တွဲလျှင် ကျပ်(၂၅၀၀)ဖြစ်ပြီး (ပထမပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၅၀၀)ခန့် ဈေးကျနေပြီး အရောင်းသွက်လျက်ရှိပါသည်။ ဝင်ရောက်မှုအနေဖြင့် နေ့စဉ် ပိဿာချိန် (၅၀ မှ ၁၀၀ ထိ)ဝင်ရောက် အရောင်းအဝယ်ဖြစ်လျက်ရှိကြောင်း မြို့မဈေးသည်များ ထံမှ သိရှိရပါသည်။

DOCA(မကွေး)

          မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်တွင် စပါး၊ ပဲမျိုးစုံနှင့် ဆီထွက်သီးနှံများ၊ ကုန်စိမ်းသီးနှံများအပြင် မိသားစုအပိုဝင်ငွေရရှိရန်အတွက် စားဖိုဆောင်သီးနှံတစ်မျိုးဖြစ်သည့် ပဲစောင်းလျား သီးများကို တစ်ပိုင်တစ်နိုင် စီးပွားဖြစ် စိုက်ပျိုးလာကြပြီး အောက်တိုဘာလတွင် စိုက်ပျိုးပြီး ဒီဇင်ဘာ လဆန်းပိုင်းတွင် အသီးစတင်ဆွတ်ခူးရောင်းချရသည်။ ပဲစောင်းလျားသီး စိုက်ပျိုးရာတွင် မျိုးအနေဖြင့် ယခင်နှစ် မိမိစိုက်ခင်းထွက်သီးနှံမှတစ်ဆင့် မျိုးစေ့ရယူပြီး စိုက်ပျိုးကြောင်း၊ မြေအောက် ရေအပြင် လိုအပ်ပါက ရေသွင်းစိုက်ပျိုးကြောင်း၊ တစ်ဧက စိုက်ပျိုးထုတ်လုပ်မှု ကုန်ကျစရိတ် အနေဖြင့် သွင်းအားစု ဝယ်ယူခနှင့် အလုပ်သမားငှားရမ်းခစုစုပေါင်း ကျပ်(၁၀)သိန်းခန့် ကုန်ကျကြောင်း သိရှိရသည်။

          အထွက်နှုန်းအနေဖြင့် မြေအမျိုးအစားနှင့် သွင်းအားစုသုံးစွဲမှုအပေါ်မူတည်ပြီး တစ်ဧကလျှင် ပိဿာ(၁၅၀၀-၁၇၀၀)ထွက်ရှိကြောင်း၊ ဈေးကွက်အနေဖြင့် ရာသီပေါ်စအချိန်တွင် တစ်ပိဿာလျှင် ဖောက်သည်ဈေး ကျပ်(၄၀၀၀)၊ လက်လီဈေး ကျပ်(၆၀၀၀)ဈေးဖြင့် ရောင်းချရပြီး ယခု သီးနှံလှိုင်လှိုင် ပေါ်ချိန်တွင် တစ်ပိဿာလျှင် ဖောက်သည်ဈေး ကျပ်(၃၀၀၀)၊ လက်လီဈေး ကျပ်(၄၀၀၀)ဈေးဖြင့် ရောင်းချရ၍ တောင်သူ အကျိုးအမြတ်အနေဖြင့် တစ်ဧကကျပ်သိန်း(၄၀)ခန့် ရရှိကြောင်း၊ စိုက်ပျိုးစရိတ် သက်သာပြီး မိသားစုအပိုဝင်ငွေ ရရှိလျက်ရှိကြောင်း၊ ယခုနှစ်တွင် ပဲစောင်းလျားသီးစိုက် တောင်သူများ သီးနှံအထွက်ကောင်းပြီး ဈေးကောင်းရရှိ၍ အကျိုးအမြတ်များစွာရရှိကြောင်း သိရှိရသည်။

DOCA(မကွေး)

              မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်၌ ၂၀၂၅ ခုနှစ်၊ ဇန်နဝါရီလ (ဒုတိယပတ်)တွင်  ကြက်သွန်နီဈေးကွက်သို့ မိုးကြက်သွန်နီဥစိုက်(အသစ်)များ လှိုင်လှိုင်ဝင်ရောက်ပြီး ဈေးတက်၍ အရောင်းအဝယ်ဖြစ်လျက်ရှိပါသည်။  ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးထွက်ရှိ သော ရွာသစ်ရပ်ကွက်နှင့် ကိုးတောင့်၊ ရေလယ်ကျွန်း၊ သံဇလုံ၊ ပဒေသာကျွန်း၊ အောက်ဆိပ်၊ ချင်တောင် ကျေးရွာများမှ အများဆုံးဝင်ရောက်လျက်ရှိသည်။ တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ (၅)သောင်းခန့် တစ်ပတ်အတွင်း ပိဿာချိန်(၃)သိန်းခန့် ဈေးကွက်သို့ ဝင်ရောက်အရောင်းအဝယ်ဖြစ် ကြောင်း သိရှိရသည်။

          ဈေးနှုန်းအနေဖြင့် ၂၀၂၅ခုနှစ်၊ ဇန်နဝါရီလ(ဒုတိယပတ်)တွင် မိုးကြက်သွန်နီ(အသစ်)များ ဈေးကျပြီး အရောင်းအဝယ်ဖြစ်လျက်ရှိပြီး  ကြက်သွန်နီအရည်အသွေးနှင့် အရွယ်အစားလိုက်၍ တောဈေး(ဂျွန်) တစ်ပိဿာလျှင် အမြင့်ဈေး ကျပ်(၂၆၀၀-၂၈၀၀)၊ အလတ်ဈေး ကျပ်(၂၃၀၀-၂၅၀၀)၊ အနိမ့်ဈေး ကျပ်(၁၄၀၀-၁၉၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ ယခင်ဇန်နဝါရီလ (ပထမပတ်)နှင့်နှိုင်းယှဉ်ပါက မိုးကြက်သွန်နီ (အသစ်)တစ်ပိဿာလျှင် ကျပ်(၃၅၀)ခန့် ဈေးကျပြီး အရောင်း အဝယ်ဖြစ်ကြောင်း၊ ဈေးကွက်သို့ ကုန်ဝင်ရောက်မှု များလာ၍ ဈေးအနည်းငယ်ကျဆင်းကြောင်း၊ ယခုနှစ် မိုးကြက်သွန်နီ(ဥစိုက်) တောင်သူများ သီးနှံရိတ်သိမ်းချိန် ဈေးကောင်းရရှိ၍ အကျိုးအမြတ်ရရှိကြောင်း သိရှိရသည်။

          ဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်၊ ဘင်္ဂလားဒေ့ရှ်နိုင်ငံများသို့ တင်ပို့လျက်ရှိကြောင်း၊ ဇန်နဝါရီလ(ပထမပတ်)တွင် မိုးကြက်သွန်နီ ကုန်ချိန်ပိဿာ(၃)သိန်း၊ တန်ချိန်အားဖြင့် (၄၉၀)တန်ခန့် ကုန်စည်စီးဆင်းခဲ့ကြောင်း ဈေးကွက်မှ သိရှိရ ပါသည်။

DOCA(မကွေး)

            ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ သဖန်းချိုကျေးရွာတွင် ပန်းဂေါ်ဖီများ စိုက်ပျိုးထားလျက်ရှိပြီး အောက်တိုဘာလဆန်းတွင် စတင်စိုက်ပျိုးကြောင်း သိရပါသည်။ ပန်းဂေါ်ဖီများကို စိုက်ပျိုးထားသော သဖန်းချိုကျေးရွာရှိ တောင်သူဦးဌေးဝင်းနှင့်တွေ့ဆုံ၍ စိုက်ပျိုးထွက်ရှိမှုနှင့် အကျိုးအမြတ်များသိရှိစေရန် ကွင်းဆင်းလေ့လာခဲ့ကြောင်းသိရသည်။

         ထိုတောင်သူမှ ပန်းဂေါ်ဖီစိုက်ဧက(၀.၂၅)ဧကရှိပြီး စိုက်ပျိုးအပင်ပေါင်းမှာ (၂၂၀၀)ခန့် စိုက်ပျိုးထားကြောင်း သိရပါသည်။ (၀.၂၅)ဧကတွက် စိုက်ပျိုးထုတ်လုပ်ကုန်ကျစရိတ်အနေဖြင့် (၁၃၀၅၀၀) ကျပ် ကုန်ကျပြီး ယခုဒီဇင်ဘာလတွင် ပန်းဂေါ်ဖီများစတင် ထွက်ရှိကြောင်း သိရပါသည်။ အပွင့် ထွက်ရှိမှုမှာ (၀.၂၅)ဧကတွင် အပွင့်ရေ(၂၀၀၀)ခန့်ထွက်ရှိပြီး ထွက်ရှိလာသော ပန်းဂေါ်ဖီများ ကို တစ်ပွင့် လျှင်(၄၀၀) ကျပ်ဖြင့်ရောင်းချကြောင်းသိရပါသည်။ ပေါက်ခေါင်းမြို့မှ ထွက်ရှိသော ပန်းဂေါ်ဖီများကို ပြည်၊ ပေါင်းတလည် ဈေးကွက်သို့တင်ပို့ရောင်းချသလို ထိုမှတစ်ဆင့် ရန်ကုန်မြို့သို့ တင်ပို့ရောင်းချကြောင်း သိရပါသည်။ ပန်းဂေါ်ဖီစိုက်ပျိုးသူတောင်သူအနေဖြင့် (၀.၂၅)ဧကတွက် ဝင်ငွေပေါင်း (၈၀၀၀၀၀) ကျပ်ရရှိပြီး၊ အကျိုးအမြတ်အနေဖြင့် (၆၆၉၅၀၀)ကျပ် ရရှိကြောင်းသိရပါသည်။ ထို့ကြောင့်ပန်းဂေါ်ဖီစိုက်ပျိုးသူတောင်သူများအနေဖြင့် ရာသီချိန်တွင် အကျိုးအမြတ်များစွာရရှိသဖြင့် ဧကများစွာစိုက်ပျိုးလျင် ပိုမိုအကျိုးအမြတ် ဖြစ်ထွန်းမည်ဖြစ်ကြောင်းသိရှိရပါသည်။

DOCA(ပဲခူး)

          ဆီးသီးအမျိုးပေါင်းများစွာရှိသည့်အနက်မှ လေးပင်ဆီးသီးကို မကွေးတိုင်းဒေသကြီး၊ မင်းဘူးမြို့ရှိ ရွှေစက်တော်ဘုရားသို့သွားသည့် လမ်းမကြီးပေါ်ရှိ လေးပင်ရွာမှထွက်ရှိပါသည်။ လေးပင်ဆီးသီးသည် အခြားဆီးသီးများနှင့်မတူဘဲ အရသာမှာ အသီးသီးစကပင် ကြွပ်ပြီးချိုသော အရသာရှိပါသည်။ အသီးရင့်မှည့်လာသည်နှင့်တစ်ပြိုင်တည်း အသီးတွင် အပွေးများတက်ကာ အရသာမှာ ပို၍ချိုမြလာပါသည်။ အရသာမှာချိုမြနေသော်လည်း ပိုမဝင်သောဆီးသီးဖြစ်ပါသည်။

          လေးပင်ဆီးသီးသည် နိုဝင်ဘာလမှ မတ်လအထိထွက်ရှိပါသည်။ လေးပင်ဆီးသီး ကိုယိုထိုး ၍စားသောက်ခြင်းမျိုးမရှိပါ။ ပြည်မြို့တွင် လေးပင်ဆီးသီးကို Online မှ အော်ဒါစနစ်ဖြင့်ရောင်းချ ခြင်းနှင့် ဈေးဆိုင်အချိုတွင် ရောင်းချခြင်းဟူ၍ (၂)မျိုးရှိပါသည်။ Online အော်ဒါစနစ်ဖြင့်ရောင်းချ ခြင်းမှာ အရောင်းအဝယ်ပိုမိုတွင်ကျယ်ပါသည်။ လေးပင်ဆီးသီးကို Order ကောက်ရာတွင် ပြည်ရာနှင့် ချီရောင်းချကြောင်း သိရှိရပါသည်။ လေးပင်ဆီးသီးကို ယခင်နှစ်က တစ်ပြည်ကို ၄၀၀၀ကျပ်နှုန်းဖြင့်ရောင်းချခဲ့ပြီး ယခုနှစ်ပေါ်ခါစတွင် တစ်ပြည်ကို ၆၀၀၀ကျပ်နှုန်းဖြင့် စတင်ရောင်းချကြောင်း သိရှိရပါသည်။

DOCA(ပဲခူး)