ပြည်တွင်းကုန်သွယ်မှုသတင်း

     မိတ္ထီလာဈေးကွက်တွင် ကုန်စိမ်းသီးနှံတစ်မျိုးဖြစ်သော ပန်းဂေါ်ဖီမှာ အဝင်ပုံမှန်၊ အရောင်း အဝယ်ပုံမှန်ဖြင့် ဈေးကောင်းရသော သီးနှံတစ်မျိုးဖြစ်သည်၊ ပန်းဂေါ်ဖီမှာ ရှမ်းပြည်နယ်တောင်ပိုင်း အောင်ပန်းမြို့မှ အများဆုံးဝင်ရောက်ပြီး ယခုအခါ ပုပ္ပါးနယ်မှလည်း ဝင်ရောက်ကြောင်း သိရသည်။ ဝင်ရောက်မှုအနေဖြင့် တစ်ရက်လျင် ပန်းဂေါ်ဖီ (၇၀၀-၈၀၀) ခန့် အဝင်ရှိပါသည်။ ဝင်ရောက်လာသော ကုန်စိမ်းအများစုမှာ မိတ္ထီလာမြို့ရှိ ဘဲကန် ကုန်စိမ်းဈေးမှ တစ်ဆင့် မြို့ပေါ်ရှိဈေးများသို့ ပြည်လည် ဖြန့်ဖြူးရောင်းချကြပါသည်။ ပန်းဂေါ်ဖီ ဈေးနှုန်း အနေဖြင့် အပွင့်အကြီး/အသေးပေါ်မှုတည်၍ တစ်ပွင့်လျှင် (၁၅၀၀-၂၀၀၀-၃၀၀၀) ကျပ် ဈေးများဖြင့် လက်လီပြည်လည်ရောင်းချကြကြောင်း ဈေးကွက်မှ သိရသည်။ ပန်းဂေါ်ဖီမှာ မိသားစုနေ့စဉ် စားသုံးသော ဟင်းလျာများတွင် စားသုံးမှုအပြင် စားသောက်ဆိုင် ဟိုတယ်များကလည်း ဝယ်လိုအားများသည့်အတွက် ဈေးကောင်းရသော ကုန်စိမ်း သီးနှံတစ်မျိုး ဖြစ်သည်။

DOCA(မန္တလေး)

    ၂၀၂၅ခုနှစ်၊ အောက်တိုဘာလ ပဥ္စမပတ်တွင် ရာသီစာဖြစ်သည့် ကရင်ပြည်နယ်ဒေသထွက် ကြက်ဟင်းခါသီးကို ဘားအံမြို့အနီးတစ်ဝိုက်ရှိ ကျေးရွာများမှ ဘားအံမြို့ပေါ်ဈေးများသို့ လာ ရောက် ရောင်းချကြပါသည်။ ဒေသခံတောင်သူများသည် ကြက်ဟင်းခါးသီးပင်ကို အပိုဝင်ငွေရရှိရန် အတွက် မိမိတို့၏ အိမ်ခြံဝင်းအတွင်း တစ်နိုင်တစ်ပိုင်စိုက်ပျိူးကြသည်။ ကြက်ဟင်းခါသီးကို ပုဇွန်ခြောက်နှင့် အတူ ကြော်စား၍ရသလို ငပိရည်တို့စရာနှင့်လည်း ပြုတ်တို့စားပါက ထမင်းမြိန်စေသည်။ ကြက်ဟင်းခါးသီးမှာပါဝင်သော အခါးဓာတ်နှင့် အဖန်ဓာတ်တွေဟာ သွေးထဲမှာ ရှိသော Glucose သကြားဓာတ်ကိုကြစေနိုင်သည့် သတ္တိရှိပါသည်။ ကြက်ဟင်းခါးသီးကို စားသုံးခြင်းဖြင့်လည်း သွေးတိုး၊ ဆီချိုရောဂါများ၏ ခန္ဓာကိုယ်အတွင်းရှိ သကြားဓာတ်ကို လျော့ကျပေးခြင်း ကင်ဆာရောဂါများနှင့် အခြားသောပြင်ပရောဂါများ ကူးစပ်မှုမှ ကာကွယ်စေပြီးသွေးလည်ပတ်မှု ကောင်းမွန်စေပါသည်။ ကြက်ဟင်းခါးသီးဈေးနှုန်းမှာ ကြက်ဟင်းခါးသီးတစ်ပိဿာလျှင် (၄၀၀၀)ကျပ် ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(ကရင်)

      ပဲစောင်းလျားသီးပင်သည် နွယ်ပင်တစ်မျိုးဖြစ်ပြီး ပဲစောင်းလျာသီးအပင်၏ အမြစ်သည် ပဲမြစ်ဖြစ်သည်။ ပဲစောင်းလျားသီးကိုနေရာ ဒေသအနှံ့အပြားတွင် စိုက်ပျိုးကြသည်။ ကရင်ပြည်နယ် ဒေသထွက်ပဲစောင်းလျားသီးကို ဘားအံမြို့အနီးတစ်ဝိုက် ကျေးရွာများနှင့်ကြာအင်းဆိပ်ကြီးမြို့နယ် များရှိ တောင်သူများက တစ်နိုင်တစ်ပိုင်စိုက်ပျိုးကြသည်။

          ၂၀၂၅ခုနှစ်၊ ဆောင်းကာလ အောက်တိုဘာ ပဥ္စမပတ်တွင် ကရင်ပြည်နယ်ဒေသထွက် ပဲစောင်းလျားသီးများ၏ဈေးနှုန်းမှာ ဘားအံမြို့ရေပေါ်စံပြဈေးတွင် ပဲစောင်းလျားသီး လက်ကား ဈေးနှုန်း(၁၀)ပိဿာလျှင်(၂၈၀၀၀)ကျပ်နှုန်းနှင့် လက်လီဈေးနှုန်းတစ်ပိဿာလျှင် (၃၂၀၀/၃၅၀၀) ကျပ်နှုန်း တို့ ဖြင့် အရောင်အဝယ်ဖြစ်လျက်ရှိကြောင်း သိရသည်။

DOCA(ကရင်)

        မိတ္ထီလာမြို့ရှိ ငှက်ပျောသီးဈေးကွက်တွင် ဖီးကြမ်း၊ သီးမွှေး၊ ပြည်ဖီး တို့မှာ အရောင်းအဝယ် သွက်ရာ သီးမွှေးကို စစ်ကိုင်းတိုင်းဒေသကြီး၊ နေပြည်တော်နှင့် တောင်ငူတို့မှ ဝင်ရောက် ကြောင်းသိရသည်။ သီးမွှေးငှက်ပျောသီးမှာ ဈေးကွက်သို့ အခိုင်လိုက်ဝင်ရောက်ခြင်းမရှိပဲ အဖီး အနေဖြင့် ဝင်ရောက်ပါသည်။ တောင်ငူနယ်မှ ဝင်ရောက်သော သီးမွှေးမှာ အခွံတွင် ရွှေရောင်ရှိပြီး စစ်ကိုင်းနယ်မှ ဝင်ရောက်သော အသီးမှာ အခွံစိမ်းသည်ကို တွေ့ရသည်။ မိတ္ထီလာဈေးကွက်သို့ တောင်ငူမှ ၄-၅ ရက်ခြား တစ်ကြိမ် အဖီး (၁၀၀) ခန့် ဝင်ရောက်နေပြီး တစ်ဖီးလျှင် လက်လီဈေး (၇၀၀၀-၈၀၀၀) ကျပ်ဖြင့် ရောင်းချလျက်ရှိပါသည်။ သီးမွှေးငှက်ပျောသီးမှာ အချိုပွဲအနေဖြင့်ရော အစာပြေအနေဖြင့်ပါ လတ်လတ်ဆတ်ဆတ်စားသုံးနိုင်သော သစ်သီးဝလံဖြစ်သည့်အပြင် တောင်ငူ သီးမွှေးမှာ အရောင်အားဖြင့် လှပသည့်အပြင် အရသာမှာလည်း ချိုမွှေးသည့်အတွက် ဈေးကွက်တွင် နေရာရသော သီးနှံတစ်မျိုးဖြစ်ကြောင်း သိရှိရပါသည်။

DOCA(မန္တလေး)

       မုံရွာမြို့၊ ကျောက္ကာလမ်းဘေးတစ်လျောက်တွင် တွင်းမဒေသထွက် အုန်းသီးများ အဓိက ဝင်ရောက်လျက်ရှိပြီး အရောင်းအဝယ်ဖြစ်လျက်ရှိကြောင်း သိရှိရပါသည်။  အုန်းပင်ကို  အရွက်အလက်မှစ၍ အုန်းမြစ်အထိ လူသုံးကုန်ပစ္စည်းအမျိုးမျိုးလည်း ပြုလုပ်နိုင်ပါသည်။ အုန်းသီးအသားကို စားသောက်ကုန်အမျိုးမျိုး အသုံးပြုနေကြပြီး အုန်းစိမ်းရည်ကို ကျန်းမာရေးအရ ဆေးဖက်ဝင်အဖြစ် သောက်သုံးနေကြပြီးလည်း ဖြစ်ကြောင်း သိရသည်။

        မုံရွာမြို့၊ ကျောက္ကာလမ်းဘေးတွင် အောက်တိုဘာလ စတုတ္ထပတ်၌ ဖြစ်ပေါ်နေသော အုန်းသီးဈေးနှုန်းများမှာ အုန်းစိမ်းရေသောက် အုန်းသီး အနု/အရင့်၊  အကြီး/ အသေးပေါ်မူတည်၍  အုန်းသီးတစ်လုံးလျှင် (၂၅၀၀)ကျပ်မှ (၃၂၀၀)ကျပ်အထိလည်း‌ကောင်း၊ ရှောက်ပန်းသီး တစ်လုံးလျှင် (၂၂၀၀)ကျပ်မှ (၂၅၀၀)ကျပ်ဖြင့်လည်းကောင်း မုံရွာမြို့၊ ကျောက္ကာလမ်း‌ဘေး တစ်လျောက်တွင်  ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)