ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ မြင်ကဝ၊ အောက်ဆိပ်၊ ချင်တောင်၊ ကူရှည်၊ ရွာမ၊ အလယ်စု၊ တပေါင်း၊ လိပ်ခြံ၊ ကုန်းရွာ၊ ကျောင်းရွာ၊ ညောင်နီချောင်းကျေးရွာ များနှင့် အခြားကျေးရွာများတွင် (မိုး)စပါးများ စိုက်ပျိုးလျက်ရှိရာ ဆင်းသုခနှင့်ဧရာပဒေသာစပါးမျိုးကို အဓိကထားစိုက်ပျိုးကြပြီး ဧရာမင်း၊ ရတနာတိုး စသည့် စပါးမျိုးများ စိုက်ပျိုးပြီး စိုက်ဧက အနေဖြင့် (၁၀၀၀၀)ခန့် စိုက်ပျိုးကြောင်း သိရှိရသည်။

          (မိုး)စပါးများကို ၂၀၂၅ခုနှစ်၊ ဇူလိုင်လ(ဒုတိယပတ်)မှ စတင်စိုက်ပျိုးကြပြီး ရက်ပေါင်း (၁၂၀) အကြာတွင် ရိတ်သိမ်းရကြောင်း၊ စိုက်ပျိုးရာတွင် တိုက်ရိုက်အစေ့ချစိုက်ပျိုးခြင်းနှင့် ပျိုးထောင်ပြီး ပျိုးပင်စိုက်ခြင်း နည်းလမ်းနှစ်မျိုးဖြင့် စိုက်ပျိုးရပြီး ပျိုးထောင်စိုက်ပျိုးပါက စပါးမျိုး တစ်တင်းခွဲခန့် ကုန်ကျပြီး တိုက်ရိုက် အစေ့ချစနစ်ဖြင့် စိုက်ပျိုးပါက တစ်တင်းခန့် ကုန်ကျကြောင်း၊ မိမိဒေသထွက် စပါးမျိုးကို စိုက်ပျိုးပြီး တစ်တင်းလျှင် ငွေကျပ်(၃၀၀၀၀)ဈေးဖြင့် ဝယ်ယူစိုက်ပျိုးရကြောင်း၊ စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ မြေပြုပြင်ခ၊ သွင်းအားစု၊ အလုပ်သမားခအပါအဝင် တစ်ဧက ငွေကျပ်(၁၀)သိန်းခန့် ကုန်ကျမည်ဖြစ်ကြောင်း၊ အထွက်နှုန်းအနေဖြင့် ယခင်နှစ် တစ်ဧက လျှင် အထွက်တင်း(၈၀-၉၀)တင်းထိ ထွက်ရှိပြီး တစ်တင်းလျှင် ငွေကျပ်(၃၀၀၀၀)ဈေးဖြင့် ရောင်းချ ရကြောင်း၊ ဈေးကွက်အနေဖြင့် ဆိပ်ဖြူ မြို့နယ်တွင်းရှိ ဆန်ရောင်းဝယ်ရေးလုပ်ငန်းရှင်များမှ ဝယ်ယူ ကြောင်း၊ ယခုနှစ်တွင်လည်း အထွက်နှုန်း ကောင်းမွန်ပြီး ဈေးကောင်းရရှိပါက အကျိုးအမြတ်ပိုမိုရရှိ နိုင်ကြောင်း စပါးစိုက်တောင်သူတစ်ဦးထံမှ သိရှိရပါသည်။

DOCA(မကွေး)

         ဘဲကိုလွန်ခဲ့သော နှစ်ပေါင်း (၄၀၀၀)ကျော်ကပင် အိမ်မွေးတိရိစ္ဆာန်များအဖြစ် စတင်မွေးမြူခဲ့ကြပါသည်။ ဘဲမွေးမြူရေးကို မြန်မာပြည်အနှံ့အပြားစီးပွားဖြစ်သောလည်းကောင်း၊ တစ်ပိုင် တစ်နိုင်အဖြစ်သောလည်းကောင်း မွေးမြူခဲ့ကြပါသည်။ ဘဲမွေးမြူရာတွင် မိုးရွာသွန်းမှုအကောင်းဆုံး မြို့နယ်များတွင် အများဆုံးမွေးကြသည်ကို တွေ့ရှိရပါသည်။ အထူးသဖြင့် ဧရာဝတီ၊ ရန်ကုန်နှင့် ပဲခူးတိုင်းတို့တွင် ဘဲကိုအများဆုံး မွေးမြူလျက်ရှိကြောင်း သိရှိရပါသည်။ ၄င်းဒေသများသည် မြစ်ချောင်း၊ အင်းအိုင်နှင့် ရေနက်ကွင်းစသည့်နေရာပေါ်များသည့်အတွက် ဘဲများ၏ သဘာဝ ဓလေ့နှင့်ကိုက်ညီပြီး ၎င်းတို့လိုအပ်သည့် အစားအစာများကို အလွယ်တကူစားသောက်နိုင်သဖြင့် မွေးမြူရေးလုပ်ငန်း ဆောင်ရွက်ရာတွင် ကုန်ကျစရိတ်သက်သာပြီး ဘဲမွေးမြူရာ၌ အရင်းအနှီး နည်းပါးပြီး စီးပွားရေးအကျိုးအမြတ်ပိုမိုရရှိနိုင်ပါသည်။ မွေးမြူရေးလုပ်ငန်း ဆောင်ရွက်ရာ၌ ရင်းနှီးမြှုပ်နှံမှု စုစုပေါင်း (၇၀%)သည် အစာအာဟာရ ဝယ်ယူကျေးမွေးစရိတ်ဖြစ်သည့်အတွက် ယခုကဲ့သို့ သဘာဝအစားအစာပေါများသည့် နေရာဒေသများတွင်  ဘဲမွေးမြူရန်အတွက် ပို၍ အကောင်းဆုံးခွင့်လမ်းတစ်ခုဖြစ်ပါသည်။ ယခုအခါ မန္တလေးတိုင်းဒေသကြီး၊ ကျောက်ဆည်ခရိုင်တွင်လည်း တစ်ပိုင်တစ်နိုင် ဘဲမွေးမြူလာသည်ကိုလည်း နေရာဒေသအတော်များများတွင် တွေ့ရှိခဲ့ရပါသည်။ ယခု ဘဲမွေးမြူသူများသည် အစားအစာစရိတ် သက်သာစေရန်အတွက် လူကိုယ်တိုင်ဘဲအုပ်များကို စပါးခင်းများအတွင်း လွှတ်ကျောင်းစေကာ စပါးခင်းအတွက်လည်း ပေါင်းပင်နှင့်ပိုးမွှားများ ရှင်းလင်းစေပြီး၊ စပါးခင်းအတွက်လည်း အထူးကောင်းမွန်စေပါသည် ။ ဘဲများသည် အာဟာရဓါတ်များ နေ့စဉ်မှန်မှန်စားသုံးရသည့်အတွက် ဘဲဥများပိုမိုဥချနိုင်ပြီး ဘဲအုပ် အကောင်(၁၀၀)မွေးမြူထားပါက ဘဲဥအလုံးရေ (၁၅၀-၂၀၀)လုံး ရရှိကြောင်း၊ ဘဲဥစျေးနှုန်းအနေဖြင့် တစ်လုံးလျှင် လက်လီ(၇၀၀-၈၀၀)ကျပ်၊ လက်ကားစျေး(၅၀၀/-)ကျပ် စျေးနှုန်းများဖြင့် ရောင်းချလျက်ရှိပြီး မိသားစု စားဝတ်နေရေး အဆင်ပြေစေသော ဘဲများကို တစ်ပိုင်တစ်နိုင် မွေးမြူသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

      မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ ပိန်းဥကို ပွင့်ဖြူမြို့နယ် အတွင်း ရှိကျေးရွာများမှမှာယူရောင်းချပြီး ၂၀၂၅ခုနှစ်၊ ဩဂုတ်လ (စတုတ္ထပတ်)တွင် စတင်ဝင်ရောက်ပြီး ယခု စက်တင်ဘာလ(ပထမပတ်)တွင် အရောင်းအဝယ်သွက်လျက်ရှိကြောင်း သိရသည်။

          ၂၀၂၅ခုနှစ်၊ စက်တင်ဘာလ(ပထမပတ်)တွင် ပိန်းဥ(၁)ပိဿာလျှင် ကျပ်(၅၀၀၀)ဖြင့် အရောင်းအဝယ်ဖြစ်လျက်ရှိပြီး စတင်ထွက်ပေါ်ကာစဈေးနှုန်းအတိုင်းပြောင်းလဲမှုမရှိကြောင်း သိရ သည်။ ပိန်းဥသည် အာဟာရဓါတ်ပြည့်ဝစွာပါဝင်ပြီး ကျန်းမာရေးအတွက်အကျိုးကျေးဇူးများစွာရှိ ကြောင်း၊ ပိန်းဥကိုစားပေးခြင်းဖြင့် သွေးလည်ပတ်မှုကောင်းစေခြင်း၊ အစာချေစနစ်ကောင်းမွန်စေခြင်း၊ ကင်ဆာရောဂါကာကွယ်ပေးနိုင်ခြင်းနှင့် ကယ်လိုရီလျှော့ကျစေခြင်း စသည့်အကျိုး ကျေးဇူးများစွာရရှိကြောင်း သိရှိရသည်။

DOCA(မကွေး)

           ပြင်ဦးလွင်မြို့နယ်အတွင်းတွင် ထောပတ်သီးများကို ယခင်က မိရိုးဖလာ အိမ်ခြံဝန်းအတွင်းမှာသာစိုက်ပျိုးခဲ့ရာမှ ၂၀၁၈-၂၀၁၉ ခုနှစ်ဝန်းကျင်တွင် ဒေသမျိုးများအပြင် နိုင်ငံခြားမျိုးများဖြစ်သော Hass၊ ဗာကေးနီးယား၊ ပင်ကာတန် စသည့်မျိုးများကိုတိုးချဲ့ပြီး စီးပွားဖြစ်စိုက်ပျိုးလာကြကြောင်း၊ ယခုအချိန်တွင် စိုက်ဧက(၆၀၀)ကျော် စိုက်ပျိုးလာသည်ကိုသိရှိရပါသည်။ ပြင်ဦးလွင် ထောပတ်သီးအသင်းမှလည်း ဒေသတွင်း ထောပတ်သီးစျေးကွက်ခိုင်မာရေးနှင့် အရည်အသွေးကောင်းမွန်ရေးတို့အတွက် အသင်းဝင်အဖွဲ့များ၊ ခြံရှင်လုပ်ငန်းရှင်အဖွဲ့များနှင့် ကျေးရွာအထိ ကွင်းဆင်းကာလိုအပ်ချက်များ၊ ပိုးကျရောက်မှုများ၊ အသီးမတင်ခြင်းများကို စုပေါင်းဝိုင်းဝန်း လုပ်ဆောင်နေကြောင်း၊အသင်းဥက္ကဌ ဦးအောင်ကိုထွန်းနှင့်တွေ့ဆုံဆွေးနွေးမှုအရသိရှိရပါသည်။ ယခုလအတွင်းတွင် ခရီးသွားဧည့်သည်များဝင်ရောက်မှုများနေတဲ့အပေါ်မှာ ထောပတ်သီးဝယ်ယူ သုံးစွဲမှု လွဲမှားမှုမရှိအောင် လမ်းဆုံ၊လမ်းခွများတွင် အသိပညာပေးလက်ကမ်းစာစောင်များ ဖြန့်ဝေသွားရန်ဆောင်ရွက်နေကြောင်း ယခုအချိန်တွင် ဒေသမျိုးများကောင်းစွာရင့်မှည့်ခြင်းမရှိသေးသော် လည်းစျေးကွက်ထဲသို့စတင်ရောင်းချနေပြီဖြစ်ကြောင်း၊ ထောပတ်သီးစျေးနှုန်းအနေဖြင့် တစ်လုံးလျှင် (၅၀၀-၇၀၀-၁၀၀၀)ကျပ်စျေးနှုန်းများဖြင့် အရောင်းအဝယ်ဖြစ်နေကြောင်း၊ နိုင်ငံခြားမျိုးများလည်း မကြာခင်စျေးကွက်ထဲသို့ အများအပြားဝင်ရောက်လာတော့မှာဖြစ်ကြောင်း သိရှိရပါသည်။

DOCA(မန္တလေး)

           ပြင်ဦးလွင်မြို့သည် ပင်လယ်ရေမျက်နှာပြင်အထက် ၃၅၃၅ ပေတွင်တည်ရှိပြီး အေးမြသော ရာသီဥတုရှိပြီး ပြည်တွင်းခရီးသွားဧည့်သည်များအတွက် စိတ်ပါဝင်စားမှုရှိသော တောင်ပေါ်မြို့လေး ဖြစ်ပါသည်။၂၀၂၄ခုနှစ်၊ဒီဇင်ဘာလဆန်း ပန်းပွဲတော်မှစ၍ ခရီးသွာများလာရောက်ခဲ့ရာ ၂၀၂၅ ခုနှစ်၊ မေလ၊ဇွန်လနှင့်ဇူလိုင်လများတွင် ခရီးသွားများ ပိုမိုဝင်ရောက်မှုများပြားလာကာ မြို့နယ်အတွင်းရှိ ဟိုတယ်၊တည်းခိုခန်းများပင် နေရာအပြည့်ဖြစ်ခဲ့ကြောင်းသိရှိရပါသည် ။ ယခုလို မြို့နယ်အတွင်း ခရီးသွားဝင်ရောက်မှုများပြားလာသလို ဒေသထွက်ပစ္စည်းများမှာလည်းရောင်းလိုအားများလာကာ စီးပွားရေးအရအကျိုးအမြတ်ရရှိလာပြီး ထိုအထဲတွင်မှ ၂၁မိုင် ပဲစိမ့်ကြော်ဟုအမည်နာမကြီးသော ပဲစိမ့်ကြော်သည်လည်း ခရီးသွားဧည့်သည်များလည်း ဒေသထွက်အပြန်လက်ဆောင်မပါမဖြစ် ဝယ်ယူကာ ဝယ်ယူသူများနှင့်စည်ကားလှသော ပဲစိမ့်ကြော် ဈေးဆိုင်တန်းကြီးကိုတွေ့ရှိပြီး ခရီးတစ်ထောက်နားကာ အပန်းဖြေလျှက်ရှိပါသည်။၂၁မိုင်ကျေးရွာသည် မန္တလေးမြို့မှပြင်ဦးလွင်သို့ လာလျှင် လမ်းခုလတ် ၂၁မိုင်ရောက်လျှင် ရောက်ရှိပြီး ဒေသခံပြည်သူများအနေဖြင့် တောင်သူ လုပ်ငန်းအပြင် ပဲစိမ့်ကြော်လုပ်ငန်းများကိုပါ မိသားစုတစ်နိုင်တစ်ပိုင်နှင့်စီးပွားဖြစ်လုပ်ငန်းကြီး လုပ်ကိုင်ကာ လုပ်ငန်းရှင်(၄၅)ဦးဖြင့် ကြော်လှော်ရောင်းချလျှက်ရှိပါသည်။ပဲစိမ့်ကြော်တွင် အဓိက ပါဝင်ပစ္စည်းအဖြစ် စားတော်ပဲ၊စားသုံးဆီ၊ကောက်ညှင်းတို့အသုံးပြုရပြီး ကုန်ကြမ်းပစ္စည်းများကို မန္တလေးမြို့မှဝယ်ယူကာဆောင်ရွက်နေကြောင်း ၊ ယခင်နှစ်များဆီက ပဲစိမ့်ကြော်လုပ်ငန်းရှင် အနည်းအကျဉ်းရှိကာ လုပ်ငန်းရှင်တစ်ဦးလျှင် စားတော်ပဲ(၃)ပြည်မှ(၇)ပြည်သာ အများဆုံးကြော်ရ ပြီးယခုလုပ်ငန်းရှင်များလည်းတိုးလာကာ ၂၁မိုင်ကျေးရွာကြီးသည် ၂၁ မိုင်ပဲစိမ့်ကြော်ရွာကြီးဖြစ်လာ နေကြောင်း၊ယခုအချိန် ပဲစိမ့်ကြော်လုပ်ငန်းရှင် မိသားစုတစ်နိုင်တစ်ပိုင်ဆိုလျှင်(၈)ပြည်ခန့်ကြော်နေ ပြီးစီးပွားဖြစ်လုပ်ကိုင်နေသောဆိုင်(၁၀)ဆိုင်ခန့်သည်(၁)တင်းမှ(၂)တင်းကြော်နေကြောင်း၊ စားတော်ပဲ (၁)ပြည်လျှင် စားဆီ(၁)ပိဿာသုံးစွဲရပြီး (၂၄)ရက်အတွက် စားတော်ပဲတင်းပေါင်း(၇၈၀)တင်း၊ စားသုံးဆီ(၁၁၃)ပေပါဖြင့် ကြော်နေလျှက်ရှိပြီး အကျိုးအမြတ်များရရှိကာ လူနေမှုအဆင့်အတန်း သည်လည်းတိုးတက်မြင့်မားနေကြောင်း၊လက်ရှိပဲစိမ့်ကြော် ရောင်းဝယ်မှုအနေဖြင့် လက်ဝိုင်းအသေး ထုတ် (၄)ခုပါ (၈)ထုတ်ပါကင် တစ်ခုလျှင် ဖောက်သည်ဈေးအနေဖြင့်(၂၀၀၀/-)ကျပ်၊ဆိုင်ရောင်း (၂၅၀၀/-)ကျပ်၊ (၄)ခုပါ (၁၀)ထုတ်ပါကင်တစ်ခုလျှင် ဖောက်သည်ဈေးအနေဖြင့်(၂၅၀၀/-) ကျပ်၊ဆိုင်ရောင်း (၃၅၀၀/-)ကျပ်၊အဝိုင်းအသေး(၆)ခုပါ တစ်ထုတ်လျှင် ဖောက်သည်ဈေးအနေဖြင့် (၇၀၀/-)ကျပ်၊ဆိုင်ရောင်း(၁၀၀၀/-)ကျပ် ၊ အဝိုင်းလတ်(၆)ခုပါတစ်ထုတ်လျှင် ဖောက်သည်ဈေး အနေဖြင့်(၈၀၀/-)ကျပ်၊ဆိုင်ရောင်း(၁၃၀၀/-)ကျပ်၊အဝိုင်းကြီး(၆)ခုပါတစ်ထုတ်လျှင်ဖောက်သည်ဈေး အနေဖြင့် (၁၁၀၀/-)ကျပ် ၊ ဆိုင်ရောင်း(၁၈၀၀/-)ကျပ်၊ အဝိုင်းကြီးရှယ်(၇)ခုပါ တစ်ထုတ်လျှင် ဖောက်သည်ဈေးအနေဖြင့်(၁၅၀၀/-)ကျပ်၊ ဆိုင်ရောင်း(၂၀၀၀-၂၅၀၀)ကျပ်တို့ဖြင့် ရောင်းဝယ်နေ ကြောင်းသတင်းရရှိပါသည်။

DOCA(မန္တလေး)