ပြည်တွင်းကုန်သွယ်မှုသတင်း

        အာတာလွတ်ဥပင်သည် ယနေ့အချိန်အခါတွင် ဈေးကောင်းရရှိပြီး တောင်သူများအတွက် အကျိုး ဖြစ်ထွန်းသော သီးနှံတစ်မျိုးဖြစ်ပါသည်။ အာတာလွတ်ပင်သည် အကြမ်းခံရုံသာမက စိုက်ပျိုးစဉ်ကာလ တစ်လျှောက်တွင် အခြားသောသီးနှံများကဲ့သို့ အသေးစိတ်ဂရုစိုက်စရာ မလိုအပ်ပေ၊ နေရာဒေသမရွေး စိုက်ပျိုးကျရသော သီးနှံဖြစ်ပါသည်။ အထွက်နှုန်းအနေဖြင့် တစ်ဧကလျှင် ပျမ်းမျှပိဿာ (၃၀၀၀) ကျော် ထိ ထွက်ရှိပါသည်။ ယခုအချိန်အခါတွင် ပြည်မြို့ အတွင်းရှိ ဈေးကွက်များတွင် အာတာလွတ် (ခေါ်) ဝါးဥ များ ဝင်ရောက် ရောင်းချလျက်ရှိနေပြီ ဖြစ်ပါသည်။ ၎င်းအာတာလွတ် (ခေါ်) ဝါးဥများကို ရွှေတောင်မြို့ နှင့် အနီးတဝိုက်ရှိ ကျေးရွာများတွင် စိုက်ပျိုးကြပြီး ထွက်ရှိလာသော အာတာလွတ် (ခေါ်) ဝါးဥကို ရွှေတောင်မြို့ရှိဈေးကွက်များနှင့် ပြည်မြို့နယ်အတွင်းရှိ ဈေးကွက်များတွင် ရောင်းချလျက်ရှိကြောင်း သိရှိရပါသည်။ ပြည်မြို့နယ်အတွင်းရှိ ဈေးကွက်များတွင် ရောင်းချလျက်ရှိသော အာတာလွတ် (ခေါ်) ဝါးဥကို တစ်ပိဿာလျှင် (၄၀၀၀) ကျပ်နှုန်းဖြင့် ရောင်းချလျက်ရှိကြောင်း သိရှိရပါသည်။

DOCA (ပဲခူး)

   ကျွဲကော်ပင်များအား ပြည်မြို့နှင့် ဒေသတစ်ဝိုက် ကျေးလက်ဒေသများနှင့် ရွှေတောင်မြို့နယ်အတွင်းရှိ ကျေးလက်ဒေသများတွင် တစ်နိုင်တစ်ပိုင် စိုက်ပျိုးကြပါသည်။ ယခုအချိန် ဈေးကွက်အတွင်း ရောင်းချနေကြသော ကျွဲကော်သီးများမှာ ဝါဆိုသီးများဖြစ်ပါသည်။ သီတင်းကျွတ်နှင့် တန်ဆောင်မုန်းလများတွင် လှိုင်လှိုင်ထွက်ရှိကြပါသည်။ ဒေသထွက် ကျွဲကော်သီးများကို ဒေသတွင်း သစ်သီးဒိုင်များမှ တစ်ဆင့် ရန်ကုန်မြို့ရှိ သီရိမင်္ဂလာဈေးနှင့် ဒညင်းကုန်းဈေးများသို့ တင်ပို့ရောင်းချ ကြပါသည်။ ကျွဲကော်သီးအကြီးတစ်လုံးလျှင် (၃၅၀၀) ကျပ်၊ အသေးတစ်လုံးလျှင် (၂၀၀၀) ကျပ်ဖြင့် ဈေးကွက်အတွင်း အရောင်းအဝယ်ဖြစ်လျက်ရှိပါသည်။

DOCA (ပဲခူး)

        ရန်ကုန်တိုင်းဒေသကြီး မရမ်းကုန်းမြို့နယ် ဘုရင့်နောင်ကုန်စည်ဒိုင် ပဲနှမ်းအသင်းမှ ၃၀.၁၀.၂၀၂၅ ရက်နေ့ရှိ ပဲလက်ကျန်စာရင်းမှာ မြေပဲတစ်ပိဿာလျှင် မြေပဲလုံးဆံ ၈၂၀၀ ကျပ်ခန့်၊ မြေပဲဆီဆံ တစ်ပိဿာလျှင် ၇၆၀၀ ကျပ်ခန့်ရှိပါသည်။ နှမ်းဖြူ မန္တလေးဈေးမှာ ၄၅ ပိဿာ တစ်အိတ်လျှင် ၂၉၀၀၀၀ ကျပ်ခန့်ရှိပါသည်။ နှမ်းနက်(ရိုးရိုး) ဈေးနှုန်းမှာ ၄၅ ပိဿာတစ်အိတ်လျှင် ၆၇၀၀၀၀ ကျပ် ခန့်ရှိပြီး ရန်ကုန်ဈေးကွက်တွင် မုန့်ညှင်းဈေးကွက်မရှိပါ။ ပဲပုတ် ၂၀၂၅ အတွက် တန်ချိန် (၁၅၅၀၀) ဝန်းကျင်ရှိမည်ဟု ခန့်မှန်းခဲ့ပါသည်။ ယခုတစ်ပါတ်တွင် မြေပဲဆီဆံတစ်ပိဿာလျှင် ၇၅၀၀ ကျပ်ခန့် ရှိရာမှာ ၇၆၀၀ ကျပ်ခန့်၊ ပဲပုတ် ၂၀၂၅ အတွက် တန်ချိန် ၁၅၆၀၀ ဝန်းကျင်ရှိရာမှ တန်ချိန် ၁၅၅၀၀ ရှိမည်ဟုခန့်မှန်းကြောင်း ဘုရင့်နောင်ကုန်စည်ဒိုင် ပဲနှမ်းအသင်းမှ သိရှိရပါသည်။

DOCA(ရန်ကုန်)

       ပဲခူးတိုင်းဒေသကြီး၊ ပြည်မြို့နယ်တွင် မိသားစုစားဝတ်နေရေးအတွက် မုန့်ဟင်းခါး(မုန့်ဖတ်) လုပ်ငန်းများကို စီးပွားဖြစ် တစ်နိုင်တစ်ပိုင်လုပ်ကိုင်ကြကြောင်းသိရသည်။မုန့်ဟင်းခါး(မုန့်ဖတ်) များကို အနီးအနားကျေးရွာရပ်ကွက်များမှ ဝယ်ယူစားသုံးကြကြောင်း၊ မုန့်ဟင်းခါးရောင်းချနေသူများ၊ ရခိုင်မုန့်တီရောင်းချသူများ၊ အလှူ၊ မင်္ဂလာ၊ မွေးနေ့ပွဲနှင့် ဘုရားပွဲများတွင် အသုံးပြုရန်အတွက် ဝယ်ယူကြသဖြင့် အရောင်းအဝယ်သွက်လျက်ရှိကြောင်း သိရသည်။

          ၂၀၂၅ ခုနှစ်၊ အောက်တိုဘာလ၊ တတိယပတ်တွင် ရောင်းချလျက်ရှိသော မုန့်ဟင်းခါး၊ မုန့်တီ မုန့်ဖတ်ဈေးနှုန်းများမှာ မုန့်ဖတ်(၂၅)ကျပ်သားလျှင် (၅၀၀)ကျပ်၊ (၅၀)ကျပ်သားလျှင် (၁၀၀၀) ကျပ်နှင့် (၁)ပိဿာလျှင် (၂၀၀၀)ကျပ်နှုန်းဖြင့် အရောင်းအဝယ်ဖြစ်နေကြောင်း အောင်ဆန်းရပ်ကွက်တွင် မုန့်ဖတ်လုပ်ကိုင်ရောင်းချသူ ဦးသန်းဦးထံမှ သိရသည်။

DOCA (ပဲခူး)

        ပဲခူးတိုင်းဒေသကြီး၊ ပြည်ခရိုင်အတွင်းရှိ ကျေးရွာများဖြစ်ကြသော မှော်ဇာ၊ သန္ဓပင်၊ တောင်လုံးညိုကျေးရွာများတွင် ဂန္ဓမာပန်းများကို အများအပြားစိုက်ပျိုးကြသည်။ ဂန္ဓမာပန်းတွင် အမျိုးကွဲပေါင်းများစွာရှိပြီး ပန်းပွင့်ပုံစံ၊ အရွယ်အစားပေါ်မူတည်ပြီး အမည်အမျိုးမျိုးခေါ်ဝေါ်ကြပါ သည်။ ပြည်ဒေသတွင်  ခေါ်ဝေါ်သော ဂန္ဓမာပန်းများစွာထဲမှ ဂန္ဓမာစံပါယ်ဖြူ၊ ဂန္ဓမာစံပါယ်ဝါ၊ ဂန္ဓမာဗူဖောင်းမျိုးများကို စိုက်ပျိုးရောင်းချကြသည်။ ပြည်မြို့၊ ဈေးကွက်များအပြင် အနီးအနားရှိ ကျေးရွာများသို့လည်း ရောင်းချကြောင်းသိရသည်။

     ပြည်မြို့အတွင်းရှိ ဈေးကွက်များတွင် ယခင်နှစ်ဂန္ဓမာပန်း (၁၀)ပွင့်စည်း တစ်စည်းလျှင် (၂၀၀၀-၂၅၀၀)ကျပ်ရှိခဲ့ရာ ယခုနှစ် အောက်တိုဘာလတွင် ဂန္ဓမာပန်း (၁၀)ပွင့်စည်း တစ်စည်းလျှင် (၄၀၀၀-၄၅၀၀)ကျပ်နှုန်းဖြင့် ရောင်းချလျှက်ရှိကြောင်းသိရသည်။

DOCA (ပဲခူး)