ပြည်တွင်းကုန်သွယ်မှုသတင်း

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်အတွင်းရှိ ကျေးရွာများ နှင့် ကျွန်းလှမြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်စားသောက်ကြရာမှာ စားဖိုဆောင်သီးနှံဖြစ်သည့် ခရမ်းသီးများကိုလည်း တစ်ပိုင်တစ်နိုင် စိုက်ပျိုးရောင်းချလျက်ရှိကြောင်း သိရသည်။

           ၂၀၂၅ ခုနှစ်၊ စက်တင်ဘာလ ပထမပတ်အတွင်း ဖြစ်ပေါ်နေသော ကျွန်းလှမြို့၏ ခရမ်းသီး ဈေးနှုန်းအနေဖြင့် ထောပတ် ခရမ်းသီး လက်လီ တစ်ပိဿာလျှင်(၂၄၀၀)ကျပ်၊ (၅၀)ကျပ်သားလျှင် (၁၂၀၀)ကျပ်၊ (၂၅)ကျပ်သားလျှင်(၆၀၀)ကျပ် နှင့် ပဒေသာ ခရမ်းသီး တစ်ပိဿာလျှင်(၁၈၀၀)ကျပ်၊ (၅၀)ကျပ်သားလျှင်(၉၀၀)ကျပ် နှင့် (၂၅)ကျပ်သားလျှင်(၅၀၀)ကျပ်ဈေးနှုန်းတို့ဖြင့် ရောင်းချသောကြောင့် ယခင်အပတ်ထက် ခရမ်းသီးဈေးနှုန်း ကျဆင်းပြီး  အရောင်းအဝယ်ဖြစ်လျက်ရှိကြောင်း ကျွန်းလှမြို့၊ သစ်ရာမြိုင်ဈေး၌ ကုန်စိမ်းသီးနှံ မျိုးစုံ  ရောင်းချနေသော ဈေးသည် တစ်ဦးထံမှ သိရသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ မုံရွာမြို့ ကန်သာယာဈေးအတွင်း ချဉ်ပေါင်ရွက်နှင့် ကန်စွန်းရွက် အများအပြား ရောင်းချလျက်ရှိကြပါသည်။ ချဉ်ပေါင်ရွက် နှင့် ကန်စွန်းရွက်ကို ဟင်းသီးဟင်းရွက်အဖြစ်လူသိများကြပြီး မြန်မာပြည်တွင် ဒေသမရွေး စိုက်ပျိုးနိုင်သည်။‌ ချဉ်ပေါင်ရွက် နှင့် ကန်စွန်းရွက်ကို ကြော်၊ လှော်၊ ချက်၊ ပြုတ်ရာတွင် အခြားသော အသားငါး၊ အသီးအရွက်တို့နှင့်ရော၍လည်း စားသုံးနိုင်သည်။

            ၂၀၂၅ ခုနှစ် ၊ စက်တင်ဘာလ ဒုတိယအပတ်အတွင်း မုံရွာမြို့ ကန်သာယာဈေးရှိ  ချဉ်ပေါင်ရွက်ဈေးနှုန်းမှာ (၃၀၀-၅၀၀) ကျပ်၊ ကန်စွန်းရွက် ဈေးနှုန်းမှာ (၃၀၀-၅၀၀) ကျပ်ထိ ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

   ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့နယ်တွင် စက်တင်ဘာလ ပထမပတ်တွင် ဖြစ်ပေါ်နေသော အခြေခံစားသောက်ကုန်များဖြစ်သော ဧည့်မထဆန်တစ်ပြည်လျှင်  ၂၅၀၀ ကျပ်၊ ကြက်သွန်နီ(အကြီး)တစ်ပိဿာလျှင် ၁၈၀၀ ကျပ်၊(အလတ်) တစ်ပိဿာလျှင် ၁၅၀၀ ကျပ်၊(အသေး) တစ်ပိဿာလျှင် ၁၃၀၀ ကျပ်၊ ကြက်သွန်ဖြူ(ကြူကုတ်) တစ်ပိဿာလျှင် ၂၁၀၀၀ ကျပ်၊ မြန်မာ ကြက်သွန်ဖြူ (တစ်ပိဿာ)လျှင် ၆၀၀၀ ကျပ်၊ ဂျင်း(တစ်ပိဿာ)လျှင် ၄၅၀၀ ကျပ်၊သကြား (တစ်ပိဿာ)လျှင် ၄၉၀၀ကျပ်၊ကုလားပဲ(တစ်ပိဿာ)လျှင် ၆၄၀၀ ကျပ်၊မြေပဲဆံ(တစ်ပိဿာ)လျှင် ၈၅၀၀ ကျပ်၊ငရုတ်သီးခြောက်(တစ်ပိဿာ)လျှင်၁၁၀၀၀ ကျပ်၊အာလူး(တစ်ပိဿာ)လျှင် ၅၀၀၀ကျပ်၊ ဆား(တစ်ပိဿာ)လျှင် ၁၆၀၀ ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

DOCA(ပဲခူး)

 ပဲခူးတိုင်းဒေသကြီး၊သာယာဝတီခရိုင်၊မင်းလှမြို့နယ်ရှိ စပါးဈေးကွက်အနေဖြင့် ဩဂုတ်လ နောက်ဆုံးပတ်တွင် ဆင်းသုခ၊မနောသုခဟောင်း ၄၆ပေါင်တစ်တင်းလျှင် ၁၃၈၀၀၀၀ ကျပ်၊နွေစပါး သစ် ၄၆ပေါင် ၁၀၀တင်းကို ၁၂၈၈၀၀၀ ကျပ်ရှိခဲ့ပြီး စက်တင်ဘာလပထမပတ်တွင် ဆင်းသုခ၊ မနောသုခ ဟောင်း ၄၆ပေါင်တင်း ၁၀၀ လျှင် ၁၃၈၀၀၀၀ ကျပ်၊နွေစပါးသစ် ၄၆ ပေါင်တင်း ၁၀၀ ကို ၁၂၈၈၀၀၀ ကျပ်သာရှိခဲ့ပါသဖြင့် စပါးဈေးအနည်းငယ် ကျဆင်းသွားပါကြောင်း စပါးကုန်သည် တစ်ဦးထံမှ သိရှိ ရပါသည်။

          ဆန်ဈေးကွက်အနေဖြင့် ဆင်းသုခ၊မနောသုခ တစ်ပြည်လျှင် ၂၅၀၀ ကျပ်၊အဟောင်းတစ်ပြည် လျှင် ၃၀၀၀ ကျပ်၊ဆန်သစ်တစ်အိတ်လျှင် ၅၅၀၀၀မှ၆၀၀၀၀ ကျပ်၊အဟောင်းတစ်အိတ်လျှင် ၆၀၀၀၀ မှ၆၅၀၀၀ ကျပ်၊ကောက်ညှင်းဆန်တစ်အိတ်လျှင် ၉၀၀၀ ကျပ်၊ ရတနာတိုးတစ်ပြည်လျှင် ၅၀၀၀ ကျပ်ဖြင့် ဈေးကွက်အတွင်းအရောင်းအဝယ်ဖြစ်နေကြောင်း ဆန်ကုန်သည်တစ်ဦးထံမှ သိရှိရပါသည်။

DOCA(ပဲခူး)

ဩဇာပင်ကို နတ်တလင်းမြိုနယ် အတွင်းရှိ ကျေးရွာများတွင် မိသားစုစားသုံးရန် ပိုလျှံသည်များကို ရောင်းချရန် တစ်ပိုင်တစ်နိုင် စိုက်ပျိုးကြပါသည် အများအားဖြင့် ဒေသမျိုးများကိုသာ စိုက်ပျိုးကြပါသည်။ နတ်တလင်း မြို့နယ်၊ မြို့မဈေးနှင့် ညနေဈေးတို့တွင် ၂၀၂၅ ခုနှစ် ဩဂုတ်လ စတုတ္တပတ်မှ စတင်ပြီး ရှားဖြူကုန်းကျေးရွာ၊ သခွတ်ကုန်းကျေးရွာ၊ အနောက်စုကျေးရွာနှင့် ကျေးရွာအချို့မှ ဩဇာသီးများ ဝင်ရောက်လာကြောင်း သိရှိရပြီး ပေါ်ဦးစ ဩဇာသီး  အကြီးတစ်လုံး လျှင် (၁၃၀၀)ကျပ်၊ အလတ်တစ်လုံး (၁၀၀၀)ကျပ်၊ အသေးတစ်လုံးလျှင် (၈၀၀)ကျပ်နှုန်း ဖြင့်ဈေးကောင်းရရှိခဲ့ပြီး ယခု စက်တင်ဘာလ ပထမပတ် အသီးထွက်ရှိမှု များလာသည့်အတွက် ဩဇာသီး  အကြီးတစ်လုံး လျှင် (၁၀၀၀)ကျပ်၊ အလတ်တစ်လုံး (၈၀၀)ကျပ်၊ အသေးတစ်လုံး လျှင် (၆၀၀)ကျပ်နှုန်းဖြင့် ရောင်းချနေကြောင်း၊ တစ်နှစ် တစ်ကြိမ်သာထွက်ရှိသည့် သီးနှံဖြစ်သည့်အတွက် စားသုံးသူများက ကြိုက်နှစ်သက်စွာ ဝယ်ယူစားသုံး ကြသလို လက်ဆောင်ပေးရန် ဝယ်ယူခြင်းများလည်းရှိ၍ အရောင်းသွက်လျှက်ရှိကြောင်း နှင့် ဥက္ကံမြို့၊  သုံးဆယ်မြို့များသို့ တင်ပို့ ရောင်းချကြောင်း ဩဇာသီး ရောင်းချသူများထံမှ သိရပါသည်။

DOCA(ပဲခူး)