မအူပင် ခရိုင်ဦးစီးမှူးရုံး အနေဖြင့် စားသုံးသူကာကွယ်ရေး အသိပညာပေးဟောပြောပွဲများ အပြင်၊  စီးပွားရေးလုပ်ငန်းရှင်များအား တွေ့ဆုံပြီး ဦးစီးဌာနမှထုတ်ပြန်ထားသည့် ဥပဒေ၊ အမိန့်နှင့်ညွှန်ကြားချက်များ ရှင်းလင်းဆွေးနွေးခြင်းများကို ဆောင်ရွက်လျက်ရှိရာ (၁၁.၈.၂၀၂၆)ရက်နေ့၊ နံနက်(၁၀:၀၀)နာရီ အချိန်တွင် မအူပင်ခရိုင် စားသုံးသူရေးရာ ဦးစီးဌာနမှ ခရိုင်ဦးစီးမှူး၊ ဒု-ခရိုင်ဦးစီးမှူး၊ စားသုံးသူရေး ရာဌာနခွဲ တာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံ နှင့်  မအူပင်မြို့၊ အမှတ်(၉)ရပ်ကွက်ရှိ စာကလေးခွေနှင့် ငှက်ပျောကျော်ထုတ်လုပ်ဖြန့်ဖြူး ရောင်းချသည့်လုပ်ငန်းရှင်မှ ခရိုင်ဦးစီးမှူးရုံးသို့ လာရောက် တွေ့ဆုံ၍ ကုန်အညွှန်းအမှတ်အသားနှင့် စပ်လျဉ်း၍ ထုတ်ကုန်တွင် ဖော်ပြပါဝင်ရမည့် အခြေအနေအား စိစစ်နိုင်ရေး လာရောက်မေးမြန်းဆွေးနွေးခဲ့သဖြင့် တာဝန်ရှိသူများမှ ကူညီဆောင်ရွက်ပေးခဲ့ကြောင်းသိရ သည်။

           တွေ့ဆုံဆွေးနွေးရာတွင် မအူပင်ခရိုင်၊ စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ဒု-ခရိုင်ဦးစီးမှူးက စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ စားသုံးသူများသာ မက စီးပွားရေး လုပ်ငန်းရှင်များအနေဖြင့် စားသုံးသူကာကွယ်ရေးဥပဒေအရ စီးပွားရေးလုပ်ငန်းရှင်များသည် ရောင်းချသည့် ကုန်စည်များတွင် ကုန်အညွှန်းအမှတ်အသား (Label) ကို မြန်မာဘာသာဖြင့် ရှင်းလင်းစွာ ဖော်ပြရမည်။ ကုန်စည်အမျိုးအစားအလိုက် ကုန်အမည်၊ အရွယ်အစား၊ အရေအတွက်၊ အသားတင်ပမာဏ၊ ထည့်သွင်း ပစ္စည်းများ၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် သက်တမ်းကုန်ဆုံးရက်တို့ကို မဖြစ်မနေ ထည့်သွင်း ဖော်ပြရန် တာဝန်ရှိကြောင်းရှင်းလင်းပြီး ဖော်ပြရမည့် အဓိကအချက်များမှာ ကုန်စည်၏ တံဆိပ်အမှတ် အသား နှင့် အမည်အစစ်အမှန်။ထုတ်လုပ်သူ၏ အမည်၊ လုပ်ငန်းတည်နေရာနှင့် ထုတ်လုပ် သည့်ရက်စွဲ။ အသားတင်ပမာဏ၊ အရေအတွက်နှင့် ပါဝင်သည့်ပစ္စည်းများ၏ အချိုးအစား။ ဖော်ပြပါဝင်ရမည့် အကြောင်းအရာများ လုပ်ငန်းရှင်မှ ထုတ်လုပ်သော ကုန်စည်တွင် ဖော်ပြရမည့် အမှတ်တံဆိပ်နှင့် အချက်အလက်များ၊ လိုအပ်သောအထောက်အထားများကို ခရိုင်ဦးစီးမှူးရုံးသို့ တင်ပြပြီး ဆက်လက်၍ အထက်ဌာနသို့ တင်ပြနိုင်ရေးဆောင်ရွက်ပေးခဲ့ကြောင်း ဌာနမှဆောင်ရွက်လျက်ရှိသော လုပ်ငန်းများ ကိုသိရှိလိုပါက ရုံးဖွင့်ရက်ရုံးချိန်အတွင်း Consumer Call Center No 1535လိုင်းခွဲ(၁) နေပြည်တော်၊ လိုင်းခွဲ(၂)ရန်ကုန်၊ လိုင်းခွဲ(၃)မန္တလေးသို့ ဆက်သွယ်မေးမြန်းနိုင်သည့်အကြောင်းများ၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ပါအကြောင်းများ၊ အသင့်စားမုန့် အမျိုးမျိုးတွင် ထည့်သွင်းဖော်ပြရမည့fကုန်အညွှန်းအမှတ်အသားအကြောင်းများအသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်သည် ဆန်စပါးအဓိကစိုက်ပျိုးထုတ်လုပ်ပြီး အခြားတိုင်းဒေသကြီးသို့ ဆန်စပါးတင်ပို့ရောင်းချခြင်းလုပ်ငန်းများ ဆောင်ရွက်လျက်ရှိရာ ၂၀၂၆ခုနှစ်၊ ဩဂုတ်လ(၆)ရက်နေ့ (၁၆:၃၀)နာရီအချိန်တွင် မြိတ်မြို့သို့ တင်ပို့မည့်ဆန်တင်ရေယာဉ်အား ကွင်းဆင်းစိစစ်ခဲ့ကြောင်း သိရသည်။

       အဆိုပါကွင်းဆင်းစစ်ဆေးခြင်းကို မြို့နယ်စီမံခန့်ခွဲရေးနှင့်အုပ်ချုပ်ရေးဦးစီးဌာနဦးဆောင်၍ ခရိုင်စားသုံးသူရေးရာဦးစီးဌာန၊ မြို့နယ်စားသုံးသူရေးရာဦးစီးဌာန၊ မီးသတ်ဦးစီးဌာန၊ လ.ဝ.ကဦးစီးဌာန၊ အခွန်ဦးစီးဌာန၊ ရေကြောင်းပို့ဆောင်ရေးဦးစီးဌာန၊ ဆန်စက်ပိုင်ရှင်အသင်း စသည့် ပူးပေါင်းအဖွဲ့သည်(MV-အောင်တက်တိုး)ရေယာဉ်ပေါ်တွင် ပေါ်ဆန်းဆန်၊ ဧည့်မထဆန်အိတ်များ တင်ဆောင်၍ ဆန်များသယ်ဆောင်ရာတွင် ကန့်သတ်ကုန်ပစ္စည်းများ သယ်ဆောင်ခြင်း မရှိစေရေးနှင့် တရားဥပဒေနှင့် ညီညွတ်မှုမရှိသည့် ကိစ္စရပ်များ ဖြစ်ပွားမှုမရှိစေရေး ကွင်းဆင်းကြည့်ရှုစစ်ဆေးခဲ့ကြောင်း သတင်းရရှိပါသည်။

DOCA (ဧရာဝတီ)

       မအူပင်မြို့နယ်အတွင်း စားသုံးသူများ ဘေးကင်းလုံခြုံစွာ စားသုံးနိုင်ရေးနှင့် အစားအသောက်များ၏ အရည်အသွေးပြည့်မီမှုရှိစေရေးအတွက် (၁၀-၈-၂၀၂၆) ရက်နေ့တွင် အသင့်စားမုန့်အမျိုးမျိုး ရောင်းချသည့်ဆိုင်များအား ကျန်းမာရေးဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း၍ ကွင်းဆင်းစစ်ဆေးခဲ့ကြောင်း သိရသည်။

          ကွင်းဆင်းစစ်ဆေးရာတွင် အသင့်စားမုန့်များ၏ ထုပ်ပိုးမှုအပေါ် ကုန်အညွှန်းအမှတ်အသားဆိုင်ရာ သတ်မှတ်ချက်များနှင့် ကိုက်ညီမှုရှိ/မရှိ၊ ထုတ်လုပ်သည့်ရက်စွဲ၊ သက်တမ်းကုန်ဆုံးရက်၊ ထုတ်လုပ်သူအမည်နှင့် အခြားလိုအပ်သည့် အချက်အလက်များ ပြည့်စုံစွာဖော်ပြထားမှုရှိ/ မရှိတို့ကို စစ်ဆေးခဲ့ကြောင်း သိရသည်။

        ထို့အပြင် သက်တမ်းကုန်ဆုံးပြီးဖြစ်သည့် မုန့်များကို သက်တမ်းရှိမုန့်များနှင့် ရောနှော၍ ရောင်းချမှုရှိ/မရှိ၊ စားသုံးရန် မသင့်လျော်သည့် ကုန်ပစ္စည်းများ ဈေးကွက်အတွင်း ရောင်းချနေမှုရှိ/မရှိတို့ကိုလည်း စစ်ဆေးဆောင်ရွက် ခဲ့ကြောင်း သိရသည်။ ဆိုင်ရှင်များနှင့် လုပ်ငန်းရှင်များအား မုန့်နှင့် အစားအသောက်များ ရောင်းချရာတွင် ကုန်အညွှန်းအမှတ်အသားများ ပြည့်စုံမှန်ကန်စေရေး၊ သက်တမ်းကုန်ဆုံးသည့် ကုန်ပစ္စည်းများကို ဈေးကွက်အတွင်း ရောင်းချခြင်းမပြုရေးနှင့် စားသုံးသူများအတွက် အရည်အသွေးပြည့်မီပြီး ဘေးကင်းလုံခြုံသော အစားအသောက်များ ကိုသာ ရောင်းချရေးတို့ကို အသိပညာပေး လမ်းညွှန်ခဲ့ကြောင်း သိရသည်။

          မအူပင်မြို့နယ်အတွင်း စားသုံးသူများ၏ ကျန်းမာရေးနှင့် အခွင့်အရေးများ မထိခိုက်စေရေးအတွက် အသင့်စားမုန့်နှင့် အစားအသောက်များ၏ အရည်အသွေး၊ ကုန်အညွှန်းအမှတ်အသားနှင့် ဈေးကွက်အတွင်း ရောင်းချမှုအခြေအနေများကို သက်ဆိုင်ရာဌာနများနှင့် ပူးပေါင်း၍ ဆက်လက်စောင့်ကြည့် စစ်ဆေးသွားမည်ဖြစ်ကြောင်း သိရှိရပါသည်။

DOCA(ဧရာဝတီ)

         ဧရာဝတီတိုင်းဒေသကြီး၊ မအူပင်ခရိုင်အတွင်း ရေနက်ကွင်းများ၌ စိုက်ပျိုးပြီး လှေဖြင့်ရိတ်သိမ်းရသည့် လှေထိုးစပါး စိုက်ပျိုးထုတ်လုပ်မှု အောင်မြင်လျက်ရှိပြီး နှစ်စဉ် စပါးဈေးကွက်အတွင်း အရောင်းအဝယ်ဖြစ်ပေါ်လျက်ရှိကြောင်း စုံစမ်းသိရှိရသည်။

      လှေထိုးစပါးသည် ရေတက်ရောက်လေ့ရှိသည့် ရေနက်ကွင်းများတွင် စပါးစိုက်ပျိုးပြီး စပါးရိတ်သိမ်းချိန်တွင် ရေပြင်အတွင်း လှေများအသုံးပြု၍ ရိတ်သိမ်းရသည့် စပါးမျိုးဖြစ်သည်။ အဆိုပါစပါးကို ဧပြီလတွင် စတင်စိုက်ပျိုးပြီး စိုက်ပျိုးပြီးနောက် လေးလခန့်အကြာတွင် ရိတ်သိမ်းထွက်ရှိကြောင်း သိရသည်။ လှေထိုး စပါးစိုက်ပျိုးသူ တောင်သူများအနေဖြင့် စိုက်ပျိုးရေးလုပ်ငန်းကို နှစ်ပေါင်း ၂၀ ခန့် ဆက်လက် လုပ်ကိုင်လာကြပြီး စိုက်ပျိုးရာတွင် စိုက်ပျိုးရေးဦးစီးဌာနမှ မျိုးစပါးများ ဝယ်ယူအသုံးပြုကာ စိုက်ပျိုးရေးဆိုင်ရာ နည်းပညာအကူအညီများကို သက်ဆိုင်ရာဌာနထံမှရယူ၍ စနစ်တကျ စိုက်ပျိုးလျက်ရှိကြောင်း သိရသည်။

        လက်ရှိစိုက်ပျိုးသည့် စပါးမျိုးများမှာ ဆင်းသုခ၊ ဆာဖိုးသာ၊ ၂၁၉ နှင့် GE-11 စသည့်မျိုးများဖြစ်ပြီး တစ်ဧကလျှင် မျိုးစပါး ၃ တင်းမှ ၄ တင်းခန့် အသုံးပြုစိုက်ပျိုးကာ အထွက်နှုန်းအနေဖြင့် တစ်ဧကလျှင် စပါး ၇၀ တင်းမှ ၁၀၀ တင်းခန့်အထိ ထွက်ရှိကြောင်း သိရသည်။ ယခုနှစ်တွင် လှေထိုးစပါးထွက်ရှိမှုမှာ ယခင်နှစ်များထက် အနည်းငယ်လျော့နည်းလျက်ရှိသော်လည်း လက်ရှိ စပါးတင်း ၁၀၀ လျှင် အစို ဈေးနှုန်းမှာ ကျပ် ၁၈ သိန်းခန့်ဖြင့် အရောင်းအဝယ်ဖြစ်ပေါ်လျက်ရှိကြောင်း သိရသည်။

       လှေထိုးစပါးကို ဝယ်ယူသည့် ကုန်သည်များအနေဖြင့် ၁၅ ဦးမှ ၂၀ ဦးခန့်ရှိပြီး မအူပင်ခရိုင် အတွင်းသာမက ဧရာဝတီတိုင်းဒေသကြီးအတွင်းရှိ ဈေးကွက်များသို့ ဖြန့်ဖြူးရောင်းချလျက်ရှိရာ အဓိကအားဖြင့် ကျိုက်လတ်မြို့ရှိ ကုမ္ပဏီများသို့ ပို့ဆောင်ရောင်းချလျက်ရှိကြောင်း သိရသည်။ ကုန်သည်များအနေဖြင့် တစ်နေ့လျှင် စပါးတင်း ၄,၀၀၀ မှ ၅,၀၀၀ ခန့်အထိ ဝယ်ယူရရှိလျက်ရှိကြောင်း သိရသည်။

          လှေထိုးစပါး စတင်ဝယ်ယူရရှိသည့်ကာလမှာ ၂၀၂၆ ခုနှစ် ဇူလိုင် ၁ ရက် မှ စတင်ခဲ့ပြီး ဇူလိုင် ၁၅ ရက် ခန့်တွင် လှိုင်လှိုင်ထွက်ပေါ်လာခဲ့ကာ ဩဂုတ် ၃၀ ရက်အထိသာ အရောင်းအဝယ် ဆက်လက်ဖြစ်ပေါ်နိုင်ကြောင်း ကုန်သည်များထံမှ သိရသည်။ လှေထိုးစပါးများ ဝယ်ယူရရှိရာနေရာမှာ မအူပင်–ဖျာပုံ–ကျိုက်လတ် လမ်းမပေါ်ရှိ ကျုံစုတ်ကျေးရွာ ရေလမ်းနှင့် ကုန်းလမ်းဆုံရာနေရာဖြစ်ပြီး အဆိုပါနေရာတွင် နှစ်စဉ် လှေထိုးစပါးများ စုစည်းရောင်း ဝယ်ဖောက်ကားလျက်ရှိကြောင်း သိရသည်။

       လှေထိုးစပါးစိုက်ပျိုးမှုသည် ရေတက်ကွင်းများကို ထိရောက်စွာ အသုံးချ၍ စပါးထုတ်လုပ်နိုင်သည့် ဒေသအလိုက် ထူးခြားသည့် စိုက်ပျိုးရေးလုပ်ငန်းတစ်ရပ်ဖြစ်သည့်အပြင် တောင်သူများ၏ အသက်မွေးဝမ်း ကျောင်းလုပ်ငန်းနှင့် ဒေသတွင်း ဆန်စပါးဈေးကွက်အတွက်လည်း အထောက်အကူပြုလျက်ရှိကြောင်း သိရှိရပါသည်။

DOCA(ဧရာဝတီ)                                                                       

          စားသုံးသူရေးရာဦးစီးဌာန ဘိုကလေးမြို့နယ်တာဝန်ခံနှင့် ဝန်ထမ်းတို့သည် ခရိုင်ဦးစီးမှူးဦးဆောင်မှုဖြင့် ၂၀၂၆ခုနှစ် ဩဂုတ်လ (၁၀)ရက်နေ့ နံနက်(၁၀:၀၀)နာရီတွင် မြို့နယ်တာဝန်ခံရုံး၌ ဆီဖြန့်ဖြူးရောင်းချသူ လုပ်ငန်းရှင်အသင်း(ယာယီ)နှင့် တွေ့ဆုံဆွေးနွေးခဲ့ကြောင်း သိရသည်။

          ဆီကုန်သည်နှင့် ဆီလုပ်ငန်းရှင်အသင်း(ယာယီ)ကို ၂၀၂၄ခုနှစ် ဇန်နဝါရီလ(၁၆)ရက်နေ့တွင် ဆီလုပ်ငန်းရှင်(၁၁)ဦးဖြင့် ဥက္ကဌ၊ ဒုဥက္ကဌ၊ဘဏ္ဍာရေးမှူး၊ စာရင်းစစ်အမှုဆောင်အဖွဲ့ဝင်များဖြင့် အသင်းဖွံ့ဖြိုးတိုးတက်အောင် ဆောင်ရွက်နေပါကြောင်း၊ မြို့နယ်အနေဖြင့် ဆီလက်လီ/လက္ကား ကိုယ်စားလှယ်များအား ကျေးရွာရပ်ကွက်အိမ်ထောင်စုများ ဆီစာအုပ်များဖြင့် ရောင်းချရာတွင် မှန်(၆)မှန်ဖြင့် ရောင်းချရေးနှင့် ကစားရန်အလိုဌာ သိုလှောင်ခြင်းများကြောင့် ဈေးကွက်အတွင်း ပစ္စည်းပြတ်လပ်မှုမရှိစေရေးနှင့် ဖြစ်သင့်ဖြစ်ထိုက်သော ဈေးနှုန်းများဖြင့် ပြည်သူများထံသို ရောင်းချပေးရန် အသိပေး/ သတိပေးဆောင်ရွက်သွားရန် ရည်ညွှန်းပါစာဖြင့် အကြောင်းကြားမှုများအရ စားသုံးသူရေးရာဦးစီးဌာနနှင့်ပူးပေါင်း၍ အပတ်စဉ် လစဉ်ကွင်းဆင်းရာတွင် ပူးပေါင်းဆောင်ရွက်နိုင်ရေးကို စားသုံးသူများ စိတ်ကျေနပ်စွာ ရောင်းချပေးကြရန် ဆီအသင်းမှ ကြီးကြပ်ဆောင်ရွက်ပေးရန်လိုကြောင်း တွေ့ဆုံဆွေးနွေးခဲ့ကြောင်း သိရှိရပါသည်။

DOCA (ဧရာဝတီ)