သတင်းနှင့် လှုပ်ရှားမှုများ

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့် ဝန်ထမ်းများ၊ အထွေထွေအုပ်ချုပ်ရေး ဦးစီးဌာန၊ စိုက်ပျိုးရေးဦးစီးဌာနတို့ ပူးပေါင်း၍  (၂၁.၁၀.၂၀၂၅)ရက်နှင့် (၂၂.၁၀.၂၀၂၅)ရက်နေ့များ တွင် ပခုက္ကူမြို့ပေါ်ရှိ MyRO မှတ်ပုံတင်ထားသော ဆန်ဆိုင်များနှင့် လက်လီဆိုင်များအား ကွင်းဆင်း စစ်ဆေးခဲ့ကြောင်း သိရသည်။

   ပခုက္ကူမြို့တွင် ဆန်ရောင်းချသောဆိုင်(၆၀)ကျော်ရှိပြီး (၄၇)ဦးမှာ MyRO မှတ်ပုံတင်ထားပြီး ဖြစ်ပါသည်။ ကျန်ဆန်ဆိုင်များမှာ  ဆန်သိုလှောင်ထားရှိမှု အိတ်(၅၀၀)အောက် ရှိသော ဆန်ဆိုင် များဖြစ်ပါသည်။ မှတ်ပုံတင်ပြီး (၄၇)ဦးတွင် (၂၃)ဦးမှာ ရ၊ ထုတ်၊ ကျန် စာရင်းများ ဖြည့်သွင်း ပြီး ကျန်(၂၄)ဦးမှာ စက်တင်ဘာလအထိ ဖြည့်သွင်းခြင်းမရှိကြောင်း တွေ့ရှိရသဖြင့် ကွင်းဆင်းစစ်ဆေး ခဲ့ခြင်းဖြစ်ပါသည်။

   ဆန်ဆိုင်များ My RO မှတ်ပုံတင်ထားခြင်းရှိ/မရှိ၊ ရ၊ ထုတ်၊ ကျန် စာရင်းများ ဖြည့်သွင်း နိုင်ရေးသည် ယခုအချိန်တွင် အရေးကြီးကြောင်း၊ လစဉ်ဖြည့်သွင်းရန်လိုအပ်ကြောင်း၊ ရေးသွင်း ထားသော စာရင်းများနှင့် မြေပြင်လက်ကျန်စာရင်းများ ကိုက်ညီမှုရှိရန် လိုအပ်ကြောင်း ရှင်းလင်း ဆွေးနွေးခဲ့ပါသည်။

   အဓိက ဆန်ရောင်းဝယ်နေသော ဆန်လုပ်ငန်းရှင်(၆)ဦး၏ ဆိုင်များအား ကွင်းဆင်းစစ်ဆေးခဲ့ရာ MyRO တွင် ရ၊ ထုတ်၊ ကျန် စာရင်းများ ဖြည့်သွင်းထားမှုနှင့်် မြေပြင်လက်ကျန်များ တိုက်ဆိုင် စစ်ဆေးရာတွင် အနီးစပ်ဆုံး ကိုက်ညီမှုရှိကြောင်း တွေ့ရှိရပြီး ဆန်လုပ်ငန်းရှင်များမှ ရောင်းဝယ်မှု အခြေအနေများကို ပြန်လည်ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

      ၂၄.၁၀.၂၀၂၅ ရက်နေ့ နေ့လယ် (၁၄:၀၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၌ မွန်ပြည်နယ် ဆန်စပါးလုပ်ငန်းကြီးကြပ်ရေးအဖွဲ့ လုပ်ငန်းညှိနှိုင်း အစည်းအဝေး (၁/၂၀၂၅) ကျင်းပပြုလုပ်ခဲ့ရာ အဆိုပါအစည်းအဝေးသို့ မွန်ပြည်နယ် ဆန်စပါးလုပ်ငန်းကြီးကြပ်ရေးအဖွဲ့ ဥက္ကဋ္ဌ စီးပွားရေးရာဝန်ကြီးနှင့် ကော်မတီအဖွဲ့ဝင်များ တက်ရောက်ခဲ့ကြသည်။

    အဆိုပါ အစည်းအဝေးတွင် မွန်ပြည်နယ် ဆန်စပါးလုပ်ငန်းကြီးကြပ်ရေးအဖွဲ့ ဥက္ကဋ္ဌ စီးပွားရေးရာဝန်ကြီးမှ အဖွင့်အမှာစကားပြောကြားခဲ့ပြီး မွန်ပြည်နယ် ဆန်စပါးလုပ်ငန်း ကြီးကြပ်ရေးအဖွဲ့ အတွင်းရေးမှူး၊ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးတင်အောင်ကျော်က ဆန်စပါးလုပ်ငန်းဆိုင်ရာ လုပ်ငန်းဆောင်ရွက်ချက်များအား ရှင်းလင်း ခြင်း၊ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဦးစီးအရာရှိ ဒေါ်ငြိမ်းမြတ်ကျော် က အမှာစာများဖတ်ကြားခြင်း၊ မွန်ပြည်နယ် ဆန်စပါးလုပ်ငန်းကြီးကြပ်ရေးအဖွဲ့၊ အဖွဲ့ဝင် များက ဆွေးနွေးခဲ့ပြီး မွန်ပြည်နယ် ဆန်စပါးလုပ်ငန်းကြီးကြပ်ရေးအဖွဲ့ ဥက္ကဋ္ဌ၊ စီးပွားရေးရာဝန်ကြီးမှ နိဂုံးချုပ်စကားပြောကြားခဲ့ကြောင်း သိရှိရပါသည်။

DOCA (မွန်)

    ၂၈.၁၀.၂၀၂၅ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူရေးရာ ဦးစီးဌာန၊ မော်လမြိုင်ခရိုင်၊ မုဒုံမြို့နယ်တာဝန်ခံ ဦးညီလွင်အေးသည် မုဒုံမြို့နယ်တာဝန်ခံရုံး၌ အွန်လိုင်းစနစ်ဖြင့်ရောင်းချခြင်းနှင့်စပ်လျဉ်း၍ မှတ်ပုံတင်ရရှိထားသည့် လုပ်ငန်းရှင်များအား အသိပညာပေးဆွေးနွေးခဲ့ကြောင်း သိရသည်။

     ထိုသို့ အသိပညာပေးရာတွင် မုဒုံမြို့နယ်တာဝန်ခံမှ အွန်လိုင်းစနစ်ဖြင့်ရောင်းချသည့် လုပ်ငန်းဆိုင်ရာအမိန့်ကြော်ငြာစာများအားလည်းကောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားဖော်ပြချက်များအားလည်း ကောင်း အသိပညာပေး ဆွေးနွေးခဲ့ကြောင်း သိရှိရပါသည်။

DOCA (မွန်)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွန်မှုဖြင့်  ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်သည် ခရိုင်ဦးစီးမှူးရုံး၊ CICC ခန်းမ၌ (၂၀.၁၀.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် ပခုက္ကူမြို့ပေါ်ရှိ ဆန်ကုန်သည်၊ ဆန်လက်လီ/ လက်ကားရောင်းချသူလုပ်ငန်းရှင်များနှင့်တွေ့ဆုံခဲ့ရာ ဆန်လုပ်ငန်းရှင် (၃၄)ဦး တက်ရောက်ခဲ့ကြောင်း သိရသည်။

          ထိုသို့ ဆွေးနွေးရာတွင် ခရိုင်ဦးစီးမှူးက ဆန်ရောင်းချသူလုပ်ငန်းရှင်များအား  MyRO တွင် မှတ်ပုံတင်ထားသည့် ဆန်သိုလှောင်ရုံများ၏ ကုန်ရ၊ ကုန်ထုတ်၊ ကုန်လက်ကျန် များကို လစဉ် လဆန်း(၁)ရက်နေ့မှ (၇)ရက်နေ့ထိ မပျက်မကွက် ဖြည့်သွင်းရန်လိုကြောင်း၊ ဆန်လက်ကျန် များကို လုပ်ငန်းရှင်ကိုယ်တိုင် ဖြည့်ရမည်ဖြစ်ပြီး နည်းပညာအခက်အခဲရှိလျှင် ခရိုင်ဦးစီးမှူးရုံးမှ ဖြည့်သွင်း ပေးမည်ဖြစ်၍ လက်ကျန်စာရင်း လာရောက်ပေးပို့ရန်လိုကြောင်း၊ ဆန်ကုန်သည်များကို  ကုန်သည် ကြီးများအသင်း( ကုန်စည်ဒိုင်)တွင် အသင်းမဝင်ရသေးလျှင် အသင်းဝင်ရမည်ဖြစ်ကြောင်း၊ အသင်း ဝင်မည့် ပုံစံလျှောက်လွှာများ တစ်ပါတည်း ယူဆောင်နိုင်ကြောင်း၊ လက်ရှိအချိန်ထိ ဆန်လက်ကျန် များကို မှန်မှန် ကန်ကန် ပြောရန်လိုအပ်ပြီး သက်ဆိုင်ရာဌာနများဖြင့် ပူးပေါင်း၍ ကွင်းဆင်းစစ်ဆေး သည့် အခါအများအပြား ကွဲလွဲမှုများရှိပါက လုပ်ငန်းရှင်ကိုယ်တိုင် တာဝန်ယူရမည်ဖြစ်ကြောင်း၊ မိမိအနေဖြင့် အထက်ဌာနမှ ညွှန်ကြားထားသည့် အမိန့်ညွှန်ကြားချက်များကို ချပြရှင်းလင်း ဆွေးနွေး ပြီးဖြစ်ကြောင်း၊ လုပ်ငန်းရှင်များမှ အခက်အခဲရှိလျှင် ပွင့်ပွင့်လင်းလင်း ပြောကြားနိုင်ကြောင်း၊ သတ်မှတ်ထားသည့် သယ်ယူပို့ဆောင်ခွင့် အိတ်ရေ ပမာဏများကို သယ်ယူခွင့်မရလျှင်  အဆင်ပြေ စေရန် အကြီးအကဲများသို တင်ပြပေးမည်ဖြစ်ကြောင်း ဆွေးနွေးခဲ့ပါသည်။ ဆန်ရောင်းချသူ လုပ်ငန်း ရှင်များက သိလိုသည်များမေးမြန်း၍  အပြန်အလှန် ဆွေးနွေးခဲ့ကြပြီး MyRO မှတ်ပုံမတင်ရသေးသော လုပ်ငန်းရှင်မှ  မှတ်ပုံတင်ရမည့် ပုံစံများဖြည့်သွင်း၍ မှတ်ပုံတင်ခြင်း လုပ်ငန်းအား တစ်ပါ တည်း ဆောင်ရွက် ခဲ့ကြောင်း သိရှိရပါသည်။

DOCA(မကွေး)

         ဆန်စပါးသိုလှောင်မှုလုပ်ငန်းများ၊ သိုလှောင်မှုအခြေအနေများနှင့် နိုင်ငံအနှံ့ရှိ သိုလှောင်ရုံများကို ဒီဂျစ်တယ်နည်းလမ်းဖြင့် စနစ်တကျမှတ်ပုံတင်နိုင်သည့် မြန်မာဆန်စပါး အွန်လိုင်း (Myanmar Rice Online - MyRO) အား စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း၍ ၂၀၂၃ ခုနှစ် နိုဝင်ဘာလ ၃ ရက်နေ့မှ စတင်၍ အကောင်အထည်ဖော်ဆောင်ရွက်လျက်ရှိပါ သည်။

         မြန်မာဆန်စပါးအွန်လိုင်း (MyRO) တွင် အွန်လိုင်းစနစ်ဖြင့် သိုလှောင်ရုံမှတ်ပုံတင်ခြင်း လုပ်ငန်းများကို သိုလှောင်ရုံအကျယ်အဝန်း သတ်မှတ်ချက်များအလိုက် အုပ်စု ၄ စုခွဲ၍ ကောက်ခံလျက်ရှိရာ ၂၀၂၃ ခုနှစ်၊ နိုဝင်ဘာလ ၃ ရက်နေ့မှ ၂၀၂၅ ခုနှစ်၊ အောက်တိုဘာလ ၃၁ ရက်နေ့ထိ ပြည်ထောင်စုနယ်မြေနေပြည်တော်၊ တိုင်းဒေသကြီး၊ ပြည်နယ်အလိုက် မှတ်ပုံတင်ထားသည့် ဆန်စပါးသိုလှောင်ရုံ ၅,၁၉၇ လုံး မှတ်ပုံတင်ထားရှိပါသည်။

ITQM