သတင်းနှင့် လှုပ်ရှားမှုများ

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ပတ်ဝန်းကျင်ထိန်းသိမ်းရေးဦးစီးဌာနက ကြီးမှူးဖွင့်လှစ်သည့် အမျိုးသမီးနှင့် ပတ်ဝန်းကျင်ကဏ္ဍဆိုင်ရာ စွမ်းဆောင်ရည်မြင့်တင်ရေးသင်တန်းကို ဩဂုတ် လ(၁၉မှ ၂၁ထိ) အဆိုပါရုံး ခန်းမ၌ကျင်းပခဲ့သည်။ အဆိုပါသင်တန်းသို့ ခရိုင်အဆင့်ဌာနဆိုင်ရာများမှ အမျိုးသမီးဝန်ထမ်း သင်တန်းသား(၁၆)ဦးတက်ရောက်ပြီး၊ ပြန်လည်ဆန်းစစ်ခြင်း မေးခွန်းဖြေဆိုရာတွင် ရမှတ်အများဆုံးရရှိသူ(၅)ဦး ရွေးချယ်ခဲ့ရာ စားသုံးသူရေးရာဦးစီးဌာနမှ ဒေါ်အိမွန်ကျော် အကြီးတန်းစာရေးက ဆုရရှိခဲ့ကြောင်း သိရသည်။

         သင်တန်းဖွင့်လှစ်ရခြင်း ရည်ရွယ်ချက်ကတော့ အမျိုးသမီးများအနေဖြင့် ပညာရေး၊ ကျန်းမာရေး၊ လူမှုရေးနဲ့စီးပွားရေးနယ်ပယ်တွေသာမှာမက ပတ်ဝန်းကျင်ထိန်းသိမ်းရေးကဏ္ဍတွေမှာလည်း အသိပညာဗဟုသုတ တိုးပွားလာစေရန်နှင့် သဘာဝပတ်ဝန်းကျင်ထိန်းသိမ်းရေးလုပ်ငန်းစဉ်များမှာ ပူးပေါင်းဆောင်ရွက်ခြင်းဖြင့် သန့်ရှင်းကောင်းမွန်တဲ့ ကမ္ဘာမြေကို မျိုးဆက်သစ်များဆီ လက်ဆင့်ကမ်းနိုင်သော အမွေအနှစ်များ ပေးစွမ်းနိုင်စေရန်အတွက် ရည်ရွယ်ဖွင့်လှစ်ခြင်းဖြစ်ပါတယ်”ဟု ပတ်ဝန်းကျင်ထိမ်းသိမ်းရေးဦးစီးဌာန ခရိုင်တာဝန်ခံ ဦးညီညီစိုးက‌ ပြောသည်။ ဆက်လက်၍ သင်တန်းဆရာ/ ဆရာမများက အမျိုးသမီးနှင့် အိမ်တွင်းလေထုညစ်ညမ်းမှု၊ စွန့်ပစ်ပစ္စည်းစီမံခန့်ခွဲမှု၊ ရာသီဥတုနှင့်လိုက်လျောညီထွေနေထိုင်ခြင်း၊ ရေချွေတာသုံးစွဲရေးနှင့် ပလပ်စတစ်လျှော့ချသုံးစွဲခြင်းအကြောင်း စသည်တို့ကို ဆွေးနွေးပို့ချခဲ့ကြောင်း သိရှိရပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ညွှန်ကြားရေးမှူးချုပ်၏လမ်းညွှန်မှုဖြင့် ဌာနတွင်းရှိဝန်ထမ်းများ စုပေါင်း၍ မိတ်ဆုံစားပွဲများ လစဉ်ဆောင်ရွက်လျက်ရှိရာ စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံး၏ ဩဂုတ်လမိတ်ဆုံစားပွဲအား ၂၀၂၅ ခုနှစ်၊ ဩဂုတ်လ(၂၆)ရက်နေ့၊ နေ့လယ် (၁၂:၀၀) နာရီအချိန်တွင် ပြည်နယ်ဦးစီးမှူးရုံးအစည်းအဝေးခန်းမ၌ ခေတ္တပြည်နယ်မှူး ဦးဆောင် ၍ ဝန်ထမ်း( ၁၃ )ဦးဖြင့် ဆောင်ရွက်ခဲ့ပါသည်။

          အဆိုပါမိတ်ဆုံစားပွဲတွင် စားသုံးသူရေးရာဦးစီးဌာန၊ ခေတ္တပြည်နယ်ဦးစီးမှူးက ထမင်း၊ ဟင်းများဖြင့် ဧည့်ခံကျွေးမွေးပြီး ဝန်ထမ်းများကလည်း အသင့်ပါလာသော ထမင်း၊ဟင်းများ လဲ လှယ်၍ ချစ်ခင်ရင်းနှီးစွာဖြင့် အတူတကွ သုံးဆောင်ခဲ့ကြပါသည်။ ဝန်ထမ်းမိတ်ဆုံစားပွဲများ လစဉ် ဆောင်ရွက်ခြင်းအားဖြင့် ဌာနအတွင်းရှိ ဝန်ထမ်းအချင်းချင်း ချစ်ခင်ရင်းနှီးမှုများပိုမိုရရှိကာ လုပ် ငန်းခွင်အတွင်းတွင်လည်း ခိုက်ရန်ဖြစ်ပွားခြင်း၊ ဝန်ထမ်းများ လုပ်ငန်းခွင်ပျော်ရွင်မှုရှိခြင်း၊ စည်းလုံး ညီညွှတ်မှုပိုမိုရရှိခြင်း၊ ရုံးလုပ်ငန်းများပိုမိုပြီးမြောက်အောင်မြင်ခြင်းစသည့် အကျိုးကျေးဇူးများရရှိ ကြောင်း သိရှိရပါသည်။

DOCA(ကယား)

     ပြည်နယ်စားသုံးသူရေးရာကော်မတီ ( ၃/၂၀၂၅ )လုပ်ငန်းညှိနှိုင်းအစည်းအဝေး ဆုံးဖြတ်အရ စားသုံးသူရေးရာဦးစီးဌာန ကယားပြည်နယ်ဦးစီးမှူးရုံးမှ ၂၀၂၅ခုနှစ်၊ ဩဂုတ်လ(၂၀)ရက်နေ့ နံနက် (၁၀:၀၀)နာရီအချိန်တွင် လွိုင်ကော်မြို့ပေါ်ရှိ စက်သုံးဆီအရောင်းဆိုင်(၈)ဆိုင်သို့ သတ်မှတ်ရည်ညွှန်းဈေးနှုန်းဖြင့် ရောင်းချခြင်း ရှိ/မရှိနှင့် အချိန်အတွယ် ဂါလန်၊ လီတာ ပြည့်မီမှုရှိ/မရှိ တို့အား သက်ဆိုင်ရာမိတ်ဖက်ဌာနများဖြစ်သော ပြည်နယ်ရဲတပ်ဖွဲ့၊ ပြည်နယ်မီးသတ်ဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီ၊ မြို့နယ်စည်ပင်သာယာ ရေးအဖွဲ့၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာနမှတို့နှင့်ပူးပေါင်း၍ ကွင်းဆင်းစစ်ဆေး ဆောင်ရွက်ခဲ့ပါသည်။ထိုသို့ကွင်းဆင်းစစ်ဆေးဆောင်ရွက်ရာတွင် စက်သုံးဆီအရောင်းဆိုင်များ၌ အချိန်အတွယ် ဂါလန်၊ လီတာများကိုလည်း ရေနံထွက်ပစ္စည်းကြီးကြပ်ရေးစစ်ဆေးရေးဦးစီးဌာန၏ (၂၀)လီတာစံခွက်များဖြင့် တိုက်ဆိုင်စစ်ဆေးခဲ့ရာ ပြည့်မှီမှုရှိကြောင်း စစ်ဆေးတွေ့ရှိရပြီး စက်သုံးဆီအရောင်းဆိုင်များတွင် သတ်မှတ်ရည်ညွှန်းဈေးနှုန်းဖြင့် ရောင်းချခြင်းရှိ/မရှိနှင့် အချိန်အတွယ် ဂါလန်၊ လီတာ ပြည့်မီမှုရှိ/မရှိ ကွင်းဆင်းစစ်ဆေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးတင်မောင်ထွန်း သည် ၂၆.၈.၂၀၂၅ ရက်နေ့၊ ၁၀:၃၀ နာရီအချိန်တွင် မြစ်ကြီးနားမြို့၊ တပ်ကုန်းရပ်ကွက် အတွင်းရှိ လက်လီဖြန့်ဖြူးရောင်းချသော မိုင်(စတိုးဆိုင်) သို့ သွားရောက်၍ စားသုံးသူများ ဘေးအန္တရာယ် ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်း မှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့် ပတ်သက်၍ ကိုက်ညီမှု ရှိ/ မရှိ ဈေးကွက်စောင့်ကြည့်စစ်ဆေးခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးခဲ့ရာ Wah-Lah အမှတ်တံဆိပ်၊ ပုဇွန်အရသာ ဆီချက် ခေါက်ဆွဲတွင် ညွှန်ကြားချက်အမှတ်(၂/၂၀၁၉)အရ ကုန်စည်အမျိုးအစားအလိုက် သတ်မှတ်ချက်များ နှင့်အညီ မြန်မာဘာသာဖြင့်ပြည့်စုံစွာဖော်ပြရမည့်ကုန်စည်၏ အမျိုးအမည်၊အရွယ်အစား၊အရေအတွက်၊ အသားတင်ပမာဏနှင့် သုံးစွဲပုံနည်းလမ်းတို့ ပြည့်စုံစွာဖော်ပြထားရှိခြင်း ရှိ/မရှိ ဈေးကွက်စောင့်ကြည့် စစ်ဆေးခဲ့ရာ ကုန်အညွှန်းအမှတ်အသားပြည့်စုံစွာဖော်ပြထားရှိကြောင်းစစ်ဆေး တွေ့ရှိရပြီး စတိုးဆိုင် လုပ်ငန်းရှင်အား ကုန်အညွှန်းအမှတ်အသား ပြည့်စုံ မှန်ကန်မှုမရှိသော ကုန်စည်များကိုရောင်းချခြင်း မပြုရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်း စာစောင်များ ဖြန့်ဝေခဲ့ပါသည်။

DOCA(ကချင်)

     စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ စစ်ဆေးရေးမှူး ဦးကျော်မိုးလွင်သည် ၂၅.၈.၂၀၂၅ ရက်နေ့ ၁၀:၃၀ နာရီအချိန်တွင် မိုးညှင်းမြို့၊ အောင်သပြေရပ်ကွက်ရှိ ဦးအောင်ဇော်ဝင်း (ကုန်စုံဆိုင်) သို့ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ စားသုံးသူကာကွယ်ရေးဥပဒေပါ ပြဌာန်းချက် များနှင့် ကိုက်ညီခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

     ဈေးကွက်စောင့်ကြည့်စစ်ဆေးခဲ့ရာ ကလေးအသုံးအဆောင်ပစ္စည်းများကုန်စည်အုပ်စုတွင်ပါဝင်သော SUPER KIDDY အမှတ်တံဆိပ်ပါ တစ်ခါသုံးကလေးသေးခံ ဘောင်းဘီသည်  ကုန်စည်အမျိုးအစားအလိုက် သတ်မှတ်ချက်များနှင့်အညီ မြန်မာဘာသာဖြင့် ပြည့်စုံစွာ ဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက် အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မ တည့်ကြောင်းဖာ်ပြချက်၊ ဘေးထွက်ဆိုးကျိုးနှင့် ကြိုတင်သတိပေးချက်တို့ကို ကုန်အညွှန်းအမှတ်အသား ဖော်ပြထားရှိခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာ ဖော်ပြထားရှိကြောင်း စစ်ဆေးတွေ့ရှိရပြီး storeဆိုင်ပိုင်ရှင်အား ကုန်စည်များ ဖြန့်ဖြူးရောင်းချရာတွင် လည်း ကုန်အညွှန်းအမှတ်အသား ပြည့်စုံမှန်ကန်စွာ ဖော်ပြထားမှုမရှိသော ကုန်စည်များကို ဝယ်ယူ ဖြန့်ဖြူးရောင်းချခြင်း မပြုရန် အသိပညာပေး ဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)