ပြည်တွင်းကုန်သွယ်မှုသတင်း

     တနင်္သာရီတိုင်းဒေသကြီး၊ မြိတ်မြို့နယ်တွင် ဒေသထွက်ကုန်များ၊ ရေထွက်ကုန်များနှင့် စိုက် ပျိုးသီးနှံများကို တစ်နိုင်တစ်ပိုင်ရောင်းချလျက်ရှိပါသည်။ သခွားသီးသည်အများအားဖြင့် တနင်္သာရီ မြို့မှ ဝင်ရောက်လျက်ရှိပြီး ဒေသတွင်း တစ်နိုင်တစ်ပိုင်စိုက်ပျိုးလျက်ရှိသည်။ ယခုဆောင်းဦး အစတွင် လတ်ဆတ်သော စားဖိုဆောင်သီးနှံများ အများအပြားရောင်းချလျက်ရှိရာမှ သခွားသီးသည်လည်း အရောင်းသွက်သောသီးနှံတစ်ခုဖြစ်ပါသည်။

      မြိတ်မြို့ပေါ်ရှိစျေးများတွင် သခွားသီးဈေးနှုန်းစုံစမ်းချက်အရ အောက်တိုဘာလတွင် အကြီး တစ်လုံး (၁၅၀၀)ကျပ်ဖြင့် ရောင်းချလျက်ရှိရာမှ ယခုနိုဝင်ဘာလ ပထမပတ်တွင် အကြီးတစ်လုံးလျှင် (၁၀၀၀) ကျပ်ဖြင့်ရောင်းချလျက်ရှိသည့်အတွက် ကျပ် (၅၀၀)ခန့် ဈေးနှုန်း ကျဆင်းသွားကြောင်း ကုန်စိမ်းရောင်းချသူထံမှ သိရှိရပါသည်။

DOCA(တနင်္သာရီ)

     မြိတ်ခရိုင်သည် ပင်လယ်ရေပတ်လည်ဖြင့်ဝန်ရံလျက်ရှိပြီး ရေထွက်ကုန်ပစ္စည်းများ အဓိက ထွက်ရှိသော ဒေသတစ်ခုဖြစ်သည်။ ‌ရေထွက်ကုန်များထဲမှ ပုဇွန်ခြောက်သည် စျေးကောင်းရလျက် ရှိပြီး ဒေသထွက်လက်ဆောင်ပစ္စည်းအဖြစ် ထင်ရှိလျက်ရှိပါသည်။ ပုဇွန်ခြောက်ပြုလုပ်ရာတွင် ပုဇွန် များကို သန့်ရှင်း၍အပူဖြင့် ခြောက်သွေ့စေခြင်းဖြင့် ရရှိသော ထုတ်ကုန်ဖြစ်ပြီး အစားအသောက် အတွက်သာမက စီးပွားရေးအတွက်လည်း အရေးကြီးသော ကုန်ပစ္စည်းတစ်မျိုး ဖြစ်သည်။

     မြိတ်ခရိုင်တွင် ပုဇွန်ခြောက်ထုတ်လုပ်မှုသည် ရိုးရာနည်းဖြင့် အများအားဖြင့် လုပ်ဆောင် ကြပြီး အရည်အသွေးနှင့် အရသာကို ပိုမိုကောင်းမွန်လျက်ရှိသည်။ မြိတ်ခရိုင်တွင် ပုဇွန်ခြောက်သည် မိသားစုစီးပွားရေး၊ ဒေသခံ ငါးဖမ်းသမားများ၏ အဓိကဝင်ငွေတစ်ရပ်အဖြစ်လည်း အရေးကြီးပြီး၊ ဒေသအတွင်း စားသောက်ကုန်များတွင် ထည့်သွင်းအသုံးပြုမှုများပြားသည်။ မြိတ်ခရိုင်တွင် ပုဇွန် ခြောက် တစ်ပိဿာလျှင်(၁၂၅၀၀၀) ကျပ်နှင့် (၄၀) ကျပ်သား လျှင် (၄၁၃၀၀)ကျပ်ဖြင့်ရောင်းချ လျက်ရှိပြီး ရန်ကုန်နှင့် အခြားဒေသများသို့ရောင်းချလျက်ရှိကြောင်းသိရှိရပါသည်။

DOCA(တနင်္သာရီ)

      စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ၃၁-၁၀-၂၀၂၅ ရက်နေ့တွင် ထုတ်ပြန်ထားသည့် မန္တလေးတိုင်းဒေသကြီးအတွင်း စက်သုံးဆီတစ်လီတာ၏ သတ်မှတ်ရည်ညွှန်းဈေးများမှာ 92 Octance(၂၈၁၅)ကျပ်၊ 95 Octance(၂၉၁၅)ကျပ်၊ ရိုးရိုးဒီဇယ် (၂၅၇၀)ကျပ်၊ ပရီမီယမ်ဒီဇယ်(၃၁၀၀)ကျပ်ဖြစ်ကြောင်း သိရှိရသည်။

       ညောင်ဦးမြို့နယ်တွင် စက်သုံးဆီအရောင်းဆိုင်(၁၇)ဆိုင်မှ စက်သုံးဆီများကို နေ့စဉ် ပုံမှန်ဖွင့်လှစ်ရောင်းချလျက်ရှိရာ ၂၀၂၅ခုနှစ်၊ အောက်တိုဘာလ(၃၁)ရက်နေ့ စက်သုံးဆီတစ်လီတာ အရောင်း ဈေးနှုန်းများ အနေဖြင့် 92 Octance(၂၈၆၅)ကျပ်၊ 95 Octance(၃၀၂၀)ကျပ်၊ ရိုးရိုးဒီဇယ် (၂၆၂၅)ကျပ်၊ ပရီမီယမ်ဒီဇယ်(၃၁၇၀)ကျပ်ဝန်းကျင်ဖြင့် ရောင်းချလျက်ရှိကြောင်း သိရှိရသည်။ သတ်မှတ်ရည်ညွှန်းဈေးများသည် ယခင်အပတ် ထက် တစ်လီတာလျှင် 92 Octanceတွင်(၃၅)ကျပ်၊ 95 Octanceတွင်(၄၀)ကျပ်၊ ရိုးရိုးဒီဇယ်တွင် (၇၅)ကျပ်နှင့် ပရီမီယမ်ဒီဇယ်တွင်(၉၀)ကျပ်တို့ အသီးသီး ဈေးနှုန်းမြင့်တက်ခဲ့ကြောင်း သိရှိရပါသည်။

DOCA (မန္တလေး)

     ဘူးသီးပင်သည် မြန်မာနိုင်ငံ အပူပိုင်းနှင့်သမပိုင်းရာသီဥတုတွင် ကောင်းစွာဖြစ်ထွန်းသော ဟင်းသီးဟင်းရွက်အပင်မျိုးဖြစ်ပြီး နွယ်ပင်အမျိုးအစာဖြစ်ပါသည်။ ဘူးသီးပင်မှ ဘူးသီးများအပြင် ဘူးရွက်များလည်း စားသုံးနိုင်ကြပါသည်။ ဘူးပင်နှင့် ကျောက်ဖရုံသီးပင်သည် အိမ်တိုင်းနီးပါ စိုက်ပျိုးလေ့ရှိရာ စိုက်ပျိုးရလွယ်ကူပြီး အာဟာရဓာတ် ကြွယ်ဝသော အသီးအနှံဖြစ်သောကြောင့် နေ့စဉ်စားသင့်ကြောင်း သိရှိရသည်။

    ၂၀၂၅ ခုနှစ်၊ နိုဝင်ဘာလ ဒုတိယပတ်တွင် မုံရွာမြို့၊ မြသလ္လာဈေးကွက်တွင် ဘူးသီးတစ်လုံးလျှင် (၁၀၀၀-၁၈၀၀-၂၅၀၀) ကျပ် ပေါက်ဈေးများရှိပြီး အသီးလတ်ဆက်မှုနှင့် အရွယ်အစားအကြီး၊ အသေးပေါ်တွင်မူ၍ ဈေးနှုန်းများကွာခြားလျက်ရှိပြီး ကျောက်ဖရုံသီး အကြီးတစ်လုံးလျှင် (၄၂၀၀)ကျပ်၊ အလတ်တစ်လုံးလျှင် (၃၇၀၀) ကျပ်၊ အသေးတစ်လုံးလျှင် (၂၈၀၀)ကျပ်နှင့် ရောင်းချကြောင်း သိရှိရပါသည်။ စားသုံးမှုများ၍ ဈေးကွက်တွင် ရောင်းအားကောင်းကြောင်း၊ ကုန်စိမ်းရောင်းချသူတစ်ဦး၏ ပြောပြချက်အရ သိရှိရသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ မုံရွာမြို့၊ ချင်းတွင်းရတနာဈေးတွင် အသား၊ ငါးများအပြင် ဒေသထွက်အသီးအရွက်များဖြစ်သည့်   မန်ကျည်းသီးအစိမ်းနှင့် မန်ကျည်းသီးအမှည့်များကိုလည်း ရောင်းချလျက်ရှိကြောင်း သိရှိရပါသည်။

          ၂၀၂၅ ခုနှစ်၊ နိုဝင်ဘာလ ဒုတိယပတ်တွင်  ချင်းတွင်းရတနာဈေးတွင် ဖြစ်ပေါ်နေသော  မန်ကျည်းသီးအစိမ်းဈေးနှုန်းမှာ  နို့ဆီဘူး (၁)ဘူးလျှင် (၇၀၀)ကျပ်၊ တစ်ပြည်လျှင် (၅၀၀၀)ကျပ်ဖြင့် လည်းကောင်း၊ မန်ကျည်းသီးအမှည့်ဈေးနှုန်းများမှာ မန်ကျဉ်းသီးမှည့် အစေ့လွတ် (၁) ပိဿာလျှင် (၇၀၀၀) ကျပ် မှ (၇၅၀၀) ကျပ် ၊ မန်ကျဉ်းသီးမှည့်အစေ့ပါ(၁) ပိဿာလျှင် (၅၀၀၀) ကျပ်မှ (၅၅၀၀) ကျပ်ဖြင့်  ရောင်းချလျက်ရှိကြောင်း  သိရှိရပါသည်။

DOCA(စစ်ကိုင်း)