ပြည်တွင်းကုန်သွယ်မှုသတင်း

      ပြည်တွင်း၌ စားသုံးမှုများသော အသီးအနှံများတွင် သံပုရာသီးလည်း တစ်မျိုးအပါအဝင် ဖြစ်ပါသည်။ သံပုရာသီးကို ဗမာသံပုရာ၊ ရှမ်းသံပုရာစသည်ဖြင့် အမျိုးအစားခွဲခြား စိုက်ပျိုးလာကြပါသည်။ သံပုရာပင်ကို မြန်မာနိုင်ငံအနှံ့အပြားတွင် စိုက်ပျိုးကြပါသည်။ သံပုရာပင်ကို အစေ့စိုက်၍ လည်းကောင်း၊ မြေထုပ်စည်းနည်းဖြင့်လည်းကောင်း မျိုးပွားယူကြပါသည်။ မြေထုပ်စည်းနည်းဖြင့် စိုက်ပျိုးပါက အပင်ကြီးထွားမြန်၍ အသီးလည်းသီးမြန်သော်လည်း ထိုနည်းဖြင့်မစိုက်ပဲ အစေ့မှ စိုက်ပျိုး ကြသည်သာများကြပါသည်။ သံပုရာပင်စိုက်ပျိုးသောအခါ အတန်းလိုက် တစ်ပင်နှင့် တစ်ပင် အနည်းဆုံး (၁၅)ပေခန့်ခွာစိုက်ပျိုးမှသာ အသီးများစွာ သီးနိုင်ပါသည်။ သံပုရာပင်သည် ပင်ပုမျိုးဖြစ်၍ အပင်အမြင့်မှာ (၈)ပေမှ (၁၅) ပေအထိသာရှိပါသည်။ စ၍စိုက်သည်မှ (၃)နှစ် သို့မဟုတ် (၄)နှစ်သားအရွယ်တွင် စ၍ အသီးသီးပါသည်။ အသီးသည် အချို့ငယ်၍ အချို့ကြီးလျက် အချို့မှာလုံး၍ အချို့သည် ဘဲဥပုံမျိုး ဖြစ်သည်။ ဒီဇင်ဘာလ ပထမပတ်မှစတင်၍ ယနေ့အထိ ပြည်မြို့ရဲ့ဈေးကွက်တွင် သံပုရာသီးမှာ ဈေးကောင်းရနေပြီး အရောင်းအဝယ်လည်းဖြစ်လျက်ရှိပါသည်။ သံပုရာသီးမှာ လှိုင်လှိုင်ပေါ်ချိန် မဟုတ်သောကြောင့် စားသုံးသူများမှ ဈေးကြီးပေး၍ ဝယ်ယူစားသုံးကြရပါသည်။ မြန်မာ့ရိုးရာ အစားအစာတွေမှာက အသီးအရွက်သုပ်လေးတွေစားသုံးကြတဲ့အခါ သံပုရာသီးကို အသုံးများ လာကြပါသည်။ သံပုရာသီး၏ မွှေးရနံ့က အနံ့အသက်ကိုလည်းထိန်းပေးပါသည်။ အအီစာ၊ တတ်စာတွေစားပြီးတဲ့အခါ သံပုရာသီး ဆေးအနေဖြင့် စားသုံးလာကြပါသည်။ ယခုနောက်ပိုင်း တွင် သံပုရာသီးကို ယိုထိုး၍လည်းကောင်း၊ သံပုရာသီးသနပ်လုပ်၍လည်းကောင်း၊ သံပုရာသီး ဆားရေစိမ်ပုလင်းများဖြင့် ရောင်းချလာ သောကြောင့် သံပုရာသီးမှာဈေးကွက်ဝင် ရောင်းတန်းဝင်ဖြစ်လာပြီး တစ်ပိုင်တစ်နိုင် စီးပွားရေးလုပ်ငန်းအဖြစ် လုပ်ကိုင် လာသောကြောင့် အလုပ်အကိုင် အခွင့်အလမ်းများပွင့်လင်းလာပြီး တန်ဖိုးမြှင့်ထုတ်ကုန်သီးနှံအဖြစ် ပိုမို စိုက်ပျိုးသင့်ပါသည်။ ပြည်မြို့ မြို့မစည်ပင်သာယာဈေးကြီးနှင့် အခြားဈေးများတွင် ဒီဇင်ဘာလဒုတိယပတ်အထိ ဈေးကောင်းရနေပြီး အရောင်းအဝယ်လည်း ဖြစ်လျက်ရှိပါသည်။ သံပုရာသီးအချောအလုံးကြီး တစ်လုံးလျှင် ကျပ် (၅၀၀)၊ အလုံးလတ် တစ်လုံးလျှင် ကျပ် (၃၀၀)၊ အလုံးသေးတစ်လုံးလျှင် ကျပ် (၂၀၀) ထိဈေးကောင်းပေး ၍ ဝယ်ယူစားသုံးရကြောင်း သိရှိရပါသည်။

DOCA(ပဲခူး)

      ရွက်ကျပင်ပေါက်သည် မြန်မာပြည်အနှံ့အပြားတွင် ပေါက်ရောက်သောအပင် တစ်မျိုးဖြစ် ပါသည်။ အရည်ရွမ်းသော နှစ်ရှည်ခံပင်ငယ်သက်ပြင်မျိုးလည်းဖြစ်ပါသည်။ ထူးခြားချက်မှာ ရွက်ဖျား ပတ်ပတ်လည်အရွက်ပိုလေးများသည် မြေသို့ကျရာမှ မျိုးစေ့သဖွယ်အပင်ပြန်ပေါက်၍ ကြွေကျသော အရွက်မှ ပေါက်တတ်သော အပင်တစ်မျိုးဖြစ်သောကြောင့် ရွက်ကျပင်ပေါက်ဟု ခေါ်ဆိုကြောင်း သိရှိရပါသည်။ ဒီဇင်ဘာလ ပထမပတ်မှစတင်၍ ရွက်ကျပင်ပေါက် (သို့) ဘောက်သီးဘုရားပန်းများ ကို ဈေးကွက်တွင် ရာသီပေါ်ပန်းအဖြစ် စတင်ရောင်းချနေပြီး ဈေးကောင်းရရှိကြောင်း သိရှိရပါသည်။ အဆိုပါပန်းများကို ပြည်မြို့အနီးတဝှိက်ရှိ တစ်ပိုင်တစ်နိုင် ပန်းစိုက်ပျိုးသူများနှင့် ပြည်မြို့အနီး တဝှိက်ရှိ ကျေးရွာများမှ ဖြစ်သော မှော်ဇာ၊ အင်းမ၊ ဝက်ပုတ် အစရှိသော နယ်ဘက်များမှလည်း ပြည်မြို့ မြို့မစည်ပင်သာယာဈေး ကြီးနှင့် အခြားဈေးများသို့ တင်ပို့ရောင်းချကြောင်း သိရှိရပါသည်။ အရွက်မှအပင်များပြန်ပေါက် တတ် သောကြောင့် တချို့အိမ်များတွင် တကူးတကဝယ်ယူကာ ရွက်ကျပင်ပေါက်ပန်းကို ပန်းအိုးဖြင့်အလှ စိုက်ပျိုးကြပြီး ဆေးဘက်ဝင်သော အပင်တစ်မျိုးလည်း ဖြစ်ပါသည်။ ယခုအချိန်သည် ပန်းပေါ်စဖြစ်၍ ရန်ကုန်သို့တင်ပို့ရောင်းချခြင်းမျိုးမရှိသော်လည်း နယ်ဘက်တွင် ပေါ်ဦးပေါ်ဖျားဖြစ်၍ ဈေးကောင်းရသောကြောင့် ပြည်မြို့နှင့်အခြားသော နယ်မြို့များ ၌သာ တင်ပို့ရောင်းချကြကြောင်းသိရှိရပါသည်။ ရာသီပေါ်ပန်းဖြစ်သည့် ရွက်ကျပင်ပေါက် (သို့) ဘောက်သီးဘုရားပန်းတစ်စီးလျှင် ကျပ် (၃၀၀၀) ရှိပြီး ရေလဲပေးပါက ကြာရှည်ခံသော ပန်းတစ်မျိုး ဖြစ်၍ လူကြိုက်များပြီး အရောင်းအဝယ်လည်း ဖြစ်ကြောင်း သိရှိ ရပါသည်။

DOCA(ပဲခူး)

      ကွမ်းစိုက်ပျိုးရာတွင် မျိုးအဖြစ် ကွမ်းညွန့်များကို အပိုင်းများဖြတ်တောက်ပြီး စိုက်ပျိုးကြပါသည်။ ကွမ်းခြံစိုက်တောင်သူများမှ မိမိတို့ကွမ်းခြံများမှလည်း ပြန်လည်မျိုးယူပြီး ကွမ်းညွန့်များကို တစ်ပေခွဲစီဖြတ်ယူပြီး ပြန်လည်စိုက်ပျိုးပါသည်။ ကွမ်းပင်စိုက်ပျိုးရာတွင် ဘောင်အလျားလိုက် မြောင်း(၂)မြောင်းဖေါ်ယူကာ (၁)မြောင်းနှင့်(၁)မြောင်းအကြား အကွာအဝေး(၁)ပေခွာစိုက်ပျိုးရ ပါသည်။ စိုက်ပျိုးပြီးတက်လာသည့် အညွန့်များကို အပေါ်သို့ အညွန့်များတက်ရန်အတွက် ကွမ်းပင်ကို (၇)ပေအမြင့် ဆောက်ထားရပြီး ဝါးလုံးများကိုသာ တိုင်အဖြစ်အသုံးပြုပြီး အပေါ်တွင် အမိုးအကာအဖြစ် အုန်းလက်၊ မြက်ခြောက်များကို အသုံးပြုပြီးနေမပူစေရန် အမိုးအဖြစ် အသုံးပြုကြပါသည်။

    စိုက်ပျိုးထားပြီး ကွမ်းပင်များအား ပိုးမကျစေရန်အတွက် သဘာဝအတိုင်းဆေးရွက်ကြီး၊ ထုံးမှုန့်တို့ဖြင့် ရောစပ်ပြီး ပိုးမကျစေရန် ဖြန်းပက်ရာတွင် အသုံးပြုရပါသည်။ ကွမ်းပင်များပိုးကျလျှင် တစ်ခြံလုံးပြုတ်သည့်အတွက်ကြောင့် နေ့စဉ်ကွမ်းပင်များအား ပိုးမကျစေရန် စစ်ဆေးပေးရပါသည်။

    ကွမ်းပင်များအား စိုက်ပျိုးသည့်ဒေသများမှာ ပြည်မြို့ဒေသအတွင်းရှိ ဖုမ္မသိမ်ကျေးရွာမှ ကွမ်းရွက်များအား (၁၅)ရက် တစ်ပတ်ခူးကြရပါသည်။

    ကွမ်းရွက်များသည် ယခုရာသီတွင် တောင်သူများအခေါ် ကွမ်းခွေသည့် ရာသီဖြစ်သည့်အတွက် ကွမ်းဈေးနှုန်းမှာ ယခင်လများထက် ဈေးနှုန်းအနည်းငယ်မြင့်တက်ကြောင်း သိရှိရပါသည်။ ဈေးကွက်အတွင်း ရောင်းချနေသည့် ကွမ်းဈေးများမှာ ကွမ်းရွက် တစ်ပိဿာလျှင် ၈၀၀၀- ၁၀၀၀၀ ကျပ်ဖြစ်သော်လည်း ယခုလများမှာ တစ်ပိဿာလျှင် ၂၀၀၀၀ ကျပ်မှ ၂၂၀၀၀ ကျပ်ထိဈေးနှုန်း မြင့်တက်ကြောင်း သိရှိရပါသည်။

DOCA(ပဲခူး)

  ဧရာဝတီတိုင်းဒေသကြီး ကျောင်းကုန်းမြို့နယ်၌   ပိန်းဥများ   ဝယ်လိုအားကောင်းပြီး အရောင်း အဝယ်ကောင်းမွန်နေကြောင်း ကျောင်းကုန်းမြို့နယ်မှ ကုန်စိမ်းရောင်းဝယ်ရေး ပွဲရုံလုပ်ငန်း လုပ်ကိုင်သူ များထံမှ သိရှိရပါသည်။ကျောင်းကုန်းမြို့နယ်မှ  ဒေသထွက် ပိန်းဥများ   အရောင်းအဝယ်ကောင်းမွန် နေကြောင်း၊ အဆိုပါပိန်းဥများ  တစ်ရက်လျှင် ပိဿာ  ၂၅၀၀ မှ ၅၅၀၀ အထိ အရောင်းအဝယ် ကောင်းမွန် နေကြောင်း  သိရသည်။

          ကျောင်းကုန်းမြို့နယ်မှထွက်ရှိသည့် လယ်ယာသီးနှံများသည် ဒေသဈေးကွက်၌ အရောင်း အဝယ် ရှိပြီးသားဖြစ်ပြီး လက်ရှိ ဝယ်လိုအားများနေကြောင်း၊ လက်ရှိရောင်းချနေသည့် ပိန်းဥများမှာ အရည်အသွေးကောင်းမွနသောကြောင့် ဒေသထွက်ပိန်းဥများကို ရန်ကုန် ဈေးကွက်မှ   ဝယ်လိုအားများ နေသဖြင့်   တင်ပို့အားတက်နေကြောင်း သိရှိရပါသည်။ကျောင်းကုန်းမြို့နယ်၌  ပိန်းဥများ အရောင်းအဝယ် ကောင်းလာသည့်အတွက် တောင်သူ များ၊ ကုန်သည်များ၊ ကုန်တင်၊ ကုန်ချလုပ်သားများ၊ ကုန်တင်ယာဉ်အငှား လိုက်သူများ အလုပ် အကိုင် အခွင့်အလမ်း ရလျက်ရှိကြောင်း သိရသည်။

DOCA(ဧရာဝတီ)

      ဧရာဝတီတိုင်းဒေသကြီး၊ ဟင်္သာတမြို့နယ်အတွင်းရှိ ကျေးရွာများတွင် ဆောင်းရာသီစာ ပန်းဂေါ်ဖီများကို မိမိဥယျာဉ်ခြံမြေများတွင် တစ်နိုင်တစ်ပိုင်စိုက်ပျိုးလျက်ရှိပါသည်။ နိုဝင်ဘာလတွင် စတင်အရောင်းသွက်လာသော ပန်းဂေါ်ဖီပွင့်များကို ရန်ကုန်မြို့ သီရိမင်္ဂလာဈေးမှ မှာယူရောင်းချကြသလို ဒေသထွက် ပန်းဂေါ်ဖီပွင့်များကိုလည်း ရောင်းချလျက်ရှိပါသည်။ပန်းဂေါ်ဖီသည် အမျှင်ဓာတ်နှင့်အာဟာရ ဓာတ်များစွာ ကြွယ်ဝပြီး ဟင်းလျာမျိုးစုံတွင် အသုံးပြု နိုင်သော ဟင်းသီးဟင်းရွက်တစ်မျိုးဖြစ်ပါသည်။ အေးမြသောဆောင်းဦးရာသီအစတွင် ပန်းဂေါ်ဖီကို ဈေးကွက်ထဲတွင် အများအပြားတွေ့ရှိနိုင်ပြီး ပန်းဂေါ် ဖီများကို ဈေးဝယ်သူအိမ်ရှင်မများ၊ မြန်မာထမင်းဆိုင်နှင့်အကြော်အလှော်များ ရောင်းချနေသော စား သောက်ဆိုင်များမှ ဝယ်ယူလျက်ရှိပြီး ရာသီစာ အစားအစာအဖြစ် အရောင်းသွက်လျက်ရှိကြောင်း၊ ပန်းဂေါ်ဖီအသေး ၁ ထုပ်လျှင် ၁၀၀၀ ကျပ်၊ အလတ် ၁ ထုပ်လျှင် ၁၅၀၀ ကျပ်၊ ပန်းဂေါ်ဖီပွင့်အကြီး ၁ ထုပ်လျှင် ၂၀၀၀ ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA (ဧရာဝတီ)