ပြည်တွင်းကုန်သွယ်မှုသတင်း

                       မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံအောင်မြင်ဖြစ်ထွန်းလျက်ရှိရာ၄င်းသီးနှံများအနက်ဆီထွက်သီးနှံ တစ်မျိုးဖြစ်သော နေကြာသီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။ မြစ်သားမြို့နယ်တွင် နေကြာ(ဆောင်း) ၂၀၂၅-၂၀၂၆ ဘဏ္ဍာနှစ်တွင်(၁၈၈၈)ဧကစိုက်ပျိုးပြီးစီးပြီဖြစ်ကြောင်းသက်ဆိုင်ရာဌာန၏စာရင်းများအရသိရှိရပါသည်။ စိုက်ပျိုးသောကျေးရွာများမှာကသဲကုန်းကျေးရွာ၊မသဲ‌ကျေးရွာ၊ ရွှေလေးကျေးရွာများတွင် အများဆုံးစိုက်ပျိုးကြကြောင်း၊ စိုက်ပျိုးမှုအနေဖြင့် မျိုး(၄-၅)ပြည်စိုက်ပျိုးရကြောင်း ၊ စိုက်ပျိုး သောမျိုးများမှာ ဆင်းရွှေကြာမျိုး-၁ ၊ ဆင်းရွှေကြာမျိုး-၂ မျိုးများကို အများဆုံးစိုက်ပျိုးကြကြောင်း၊ စိုက်ပျိုးနည်းမှာ ဘောင်ကြောင်းပေးစနစ်နှင့် ပတ်ကြဲစိုက်ပျိုးစနစ်ဟူ၍ (၂)မျိုး စိုက်ပျိုးကြကြောင်း ၊ စိုက်ပျိုးမှု ကုန်ကျစရိတ် အနေဖြင့် မျိုး ၊ သွင်းအားစု ၊ လုပ်သားခ အပါအဝင်(၄၅၀၀၀၀/-) ကျပ်ခန့် ကုန်ကျကြောင်း ၊ ယခင်နှစ် နေကြာထွက်ပေါ်ချိန်တွင် အထွက်နှုန်းအနေဖြင့် (၂၀-၂၅)တင်းခန့် ထွက်ရှိကြောင်း၊နေကြာစျေးနှုန်းအနေဖြင့်တစ်တင်းလျှင်(၅၅၀၀၀/-)ကျပ်‌စျေးနှုန်းများဖြင့် အရောင်း အဝယ်ဖြစ်ခဲ့ပြီး၊စိုက်ပျိုးစရိတ်နှုတ်ပြီး အကျိုးအမြတ်အနေဖြင့် (၉၇၅၀၀၀/-)ကျပ် မြတ်ခဲ့ကြောင်း၊ ယခု လက်ရှိပေါက်စျေးအနေဖြင့် နေကြာတစ်တင်း လျှင်(၆၃၀၀၀/-)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း၊နေကြာထွက်ပေါ်ချိန်တွင် တောင်သူများမှာ မြို့ပေါ်ပွဲရုံများသို့ ကိုယ်တိုင်ရောင်းချကြကြောင်း၊ပွဲရုံများမှတဆင့် မန္တလေး၊ရန်ကုန်မြို့များသို့ တင်ပို့ရောင်းချလျက်ရှိကြောင်း စိုက်ပျိုးစရိတ်သက်သာပြီး မိသားစုစားသုံးဆီဖူလုံရုံသာမက စီးပွားဖြစ်ဝင်ငွေတိုးသော ကြောင့်နေကြာသီးနှံကိုလည်း တောင်သူဦးကြီးများမှတစ်နှစ်ထက်တစ်နှစ် မိုပိုတိုးချဲ့စိုက်ပျိုးလာကြောင်း၊နေကြာစိုက်ပျိုးသောတောင်သူ တစ်ဦး၏ပြောကြားချက်အရသိရှိရပါသည်။

DOCA(မန္တလေး)                                                                             

       စစ်ကိုင်းတိုင်းဒေသကြီး၊ မုံရွာမြို့နယ်အတွင်ရှိ ကျေးရွာများတွင် ဟင်းသီးဟင်းရွက် စိုက်ပျိုးရေးလုပ်ငန်းများကို တစ်နိုင်တစ်ပိုင်သော်လည်းကောင်း၊ စီးပွားဖြစ်သော်လည်းကောင်း စိုက်ပျိုးလျက်ရှိကြောင်း သိရှိရပါသည်။  ဆလပ်ရွက်နှင့် ပျဉ်းတော်သိမ်းရွက်များကို အိမ်ရှင်မ များက ငပိရည်အတို့မြှုပ်အဖြစ်ဝယ်ယူကြသလို စားသောက်ဆိုင်များမှလည်း စီးပွားဖြစ်အသုံးပြုရန် ဝယ်ယူကြောင်း သိရှိရပါသည်။

         ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် ဈေးဟောင်းတွင် ရောင်းချနေသော ဆလပ်ရွက်ဈေးနှုန်းမှာ ဆလပ်ရွက်တစ်စည်းလျှင် (၂၀၀)ကျပ်မှ(၃)စည်း(၅၀၀)ကျပ်၊ ပျဉ်းတော်သိမ်းရွက်ဈေးနှုန်းမှာ အစည်းအကြီးအသေးပေါ်မူတည်၍ တစ်စည်းလျှင် (၃၀၀)ကျပ်မှ (၃၅၀) ကျပ်ထိ ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

             မုံရွာမြို့ရှိ ချင်းတွင်းရတနာဈေးတွင် အသား၊ ငါးများ၊ သစ်သီးဝလံများအပြင် ဒေသထွက် ပဲလိပ်ပြာများ ရောင်းချလျက်ရှိပါသည်။ ပဲလိပ်ပြာများကို မုံရွာမြို့နယ်အတွင်းရှိ ကျေးရွာများမှ မိမိပိုင်ယာခင်းများတွင် စီးပွားဖြစ်သော်လည်း၊ တပိုင်တနိုင်သော်လည်းကောင်း စိုက်ပျိုးကြပြီး ချင်းတွင်းရတနာဈေးတွင် လာရောက်ရောင်းချကြကြောင်း သိရှိရပါသည်။

           ပဲလိပ်ပြာသည် ချိုဆိမ့်အရသာရှိပြီး ပဲဟင်းရည်ချက်စားရာတွင်လည်းကောင်း ခရမ်းချဉ်သီးကို အနှစ်ပြုလုပ်ပြီး ရော၍ချက်စားလျှင်လည်း အရသာကောင်းမွန်သဖြင့် လူကြိုက်များ၍ ရောင်းအားကောင်းကြောင်း သိရပါသည်။ ၂၀၂၅ ခုနှစ်၊ ဒီဇင်ဘာလ စတုတ္တပတ်တွင် ချင်းတွင်းရတနာဈေးတွင် ရောင်းချနေသော ပဲလိပ်ပြာဈေးနှုန်းမှာ ပဲလိပ်ပြာ (၁) ဘူးလျှင် (၁၅၀၀)ကျပ်၊  တစ်ပြည်လျှင် (၁၂၀၀၀) ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

             မန္တလေးတိုင်းဒေသကြီး၊ ကျောက်ဆည်မြို့နယ်ရှိ အေးမြကြည်လင်ဈေးတွင် အဝတ် အထည်များ၊ ဆန်၊ ဆီ၊ ပဲ၊ ပြောင်း၊ နှမ်းနှင့် အသားငါးများအပြင် ကုန်စိမ်းသီးနှံများလည်း ရောင်းချ လျက်ရှိပါသည်။ အေးမြကြည်လင်ဈေးတွင် ရောင်းချလျက်ရှိသော ဒီဇင်ဘာလတွင် အသား ဈေးနှုန်းများမှာ ဝက်သားတစ်ပိဿာလျှင်(၃၈၀၀၀/-)ကျပ်၊ အမဲသားတစ်ပိဿာလျှင်(၃၆၀၀၀/-) ကျပ်၊ ဆိတ်သားတစ်ပိဿာလျှင်(၄၀၀၀၀/- )ကျပ်၊ CPကြက်သားတစ်ပိဿာလျှင်(၂၀၀၀၀/-) ကျပ်၊ ဗမာကြက်သားတစ်ပိဿာလျှင် (၃၀၀၀၀/-)ကျပ်နှင့် ငါးဈေးနှုန်းများမှာ ငါးမြင်းတစ်ပိဿာလျှင် (၁၂၀၀၀/-)ကျပ်၊ ငါးကြင်းတစ်ပိဿာလျှင်(၁၆၀၀၀/-)ကျပ်၊ ငါးခူတစ်ပိဿာလျှင်(၂၀၀၀၀ ) ကျပ်၊ ငါးရံ့တစ်ပိဿာလျှင်(၂၀၀၀၀/-)ကျပ်၊ ငါးဝက်မတစ်ပိဿာလျှင်(၁၆၀၀၀/-)ကျပ်၊ ငါးအုံတုံ တစ်ပိဿာ လျှင်(၃၀၀၀၀/-)ကျပ်၊ ငါးသဲလဲထိုးတစ်ပိဿာလျှင်(၃၀၀၀၀/-)ကျပ်၊ ငါးမြွေနီ တစ်ပိဿာလျှင် (၂၈၀၀၀/-)ကျပ်နှင့် ငါးခုံးမတစ်ပိဿာလျှင်(၆၀၀၀/-)ကျပ်တို့ဖြင့် အသီးသီး အရောင်းအဝယ် ဖြစ်လျက်ရှိပါသည်။

DOCA(မန္တလေး) 

          ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ပြီး ဒေသတွင်းစားသုံးဆီဖူလုံစေရေးအတွက် ကန့်ဘလူမြို့နယ် တောက္ကရှပ်ကျေးရွာ၊ မြေထူးကျေးရွာ၊ နတ်ပေးကျေးရွာနှင့် အခြားသောကျေးရွာများတွင် ဆောင်းနှမ်းကိုအဓိက စိုက်ပျိုးကြောင်း၊ နှမ်းသီးနှံကို ဒေသတွင်း၌ဆီကြိတ်သော်လည်း ပိုလျှံသောသီးနှံများကို ရွှေဘိုမြို့နှင့် မန္တလေးမြို့ရှိပွဲရုံများသို့ အဓိကတင်ပို့ကြောင်း သိရသည်။

        ၂၀၂၅ ခုနှစ်၊ ဒီဇင်ဘာလ စတုတ္ထပတ်အတွင်း နှမ်းနက်(စမုံ)တစ်တင်းလျှင် (၂၂၅၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၇၇၀၀၀)ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိရာ  ဒီဇင်ဘာ လတတိယပတ်၏ ဈေးနှုန်းနှင့်နှိုင်းယှဉ်ပါက ယခုစတုတ္ထပတ်အတွင်း နှမ်းနက်တစ်တင်းလျှင် (၈၀၀၀)ကျပ်ဈေးနှုန်းကျဆင်းသွားကြောင်း ဒေသတွင်းသီးနှံပွဲရုံများထံမှ သိရှိရပါသည်။

DOCA(စစ်ကိုင်း)