ပြည်တွင်းကုန်သွယ်မှုသတင်း

         ရွှေဘိုမြို့ အမှတ်(၁၀)ရပ်ကွက်ရှိ ကုန်းဘောင်ဈေးတွင် မေလ ဒုတိယပတ် တွင် ဖြစ်ပေါ်ခဲ့သော သစ်သီးဝလံ ပန်းသီးတစ်လုံးလျှင် (၁၅၀၀)ကျပ်မှ (၃၅၀၀)ကျပ်ထိ၊ ပန်းသစ်တော်သီး တစ်ပိဿာလျှင် (၃၅၀၀)ကျပ်၊ တောပန်းသီးကျွတ် တစ်ပိဿာလျှင် (၁၅၀၀၀)ကျပ်၊ ဆားတောင်မြို့ နှင့် ရွှေပန်းကုန်းရွာမှ ထွက်ရှိသည့် ငှက်ပျောသီး ဖီးကြမ်း တစ်ဖီးလျှင်(၂၅၀၀)ကျပ်မှ (၂၇၀၀)ကျပ်၊သီးမွှေး ငှက်ပြောသီး တစ်ဖီးလျှင် (၂၅၀၀)ကျပ်မှ (၄၀၀၀)ကျပ်ထိ၊ ဖရဲသီး တစ်လုံးလျင် (၆၀၀၀)ကျပ်မှ (၁၅၀၀၀)ကျပ် ထိ၊  မာလကာသီး တစ်လုံးလျှင်(၄၀၀)ကျပ်မှ (၅၀၀)ကျပ်ထိ၊ဂျပန်သခွားသီး တစ်လုံးလျှင် (၁၅၀၀)ကျပ်၊ စပျစ်သီး တစ်ပိဿာလျှင် (၁၆၀၀၀)ကျပ်မှ (၂၀၀၀၀)ကျပ်၊ ဒူးရင်းသီး (ဗမာ)တစ်လုံးလျှင် (၁၃၀၀၀)ကျပ်မှ (၂၀၀၀၀)ကျပ်ထိ၊ဒူးရင်းသီး ချန်နီသီး (1kg)လျှင် (၃၅၀၀၀)ကျပ်၊ စိန်တစ်လုံးသရက်သီး တစ်လုံးလျှင် (၄၀၀)ကျပ်မှ (၁၅၀၀)ကျပ်ထိ၊ မင်းကွတ်သီး တစ်လုံးလျှင် (၅၀၀)ကျပ်မှ (၇၀၀)ကျပ်ထိ၊ ဆန်းကစ်သီး တစ်လုံးလျှင် (၂၅၀၀)ကျပ်ဖြင့် အသီးသီး အရောင်းအဝယ် ဖြစ်နေကြောင်း ကုန်းဘောင်ဈေးအတွင်း ရောင်းချသော သစ်သီးဆိုင်များမှ သတင်းရရှိသည်။

DOCA(စစ်ကိုင်း)

          မြန်မာနိုင်ငံစက်သုံးဆီ တင်သွင်း/သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီ ရည်ညွှန်း လက်ကားဈေးနှုန်းများအား နေ့စဉ် ထုတ်ပြန်ပေးလျက်ရှိပါသည်။

          ‌ရွှေဘိုမြို့တွင် စက်သုံးဆီဆိုင် (၂၂)ဆိုင် ပုံမှန် ဖွင့်လှစ်ရောင်းချလျက်ရှိပြီး ၂၀၂၅ခုနှစ် မေလ ပထမပတ် စက်သုံးဆီဈေးနှုန်းများမှာ ဓါတ်ဆီ(92) တစ်လီတာလျှင် (၃၀၂၅)ကျပ်၊ ဓါတ်ဆီ(95)တစ်လီတာလျှင် (၃၀၈၅)ကျပ် ၊ ဒီဇယ်(ရိုးရိုး) တစ်လီတာလျှင် (၂၆၁၅)ကျပ်၊ ဒီဇယ်(ပရီမီယမ်)တစ်လီတာလျှင် (၃၁၉၅)ကျပ်ဖြင့် ရောင်းချလျက်ရှိကြောင်း သိရသည်။

          ယခု ၂၀၂၅ခုနှစ် မေလ ဒုတိယပတ်တွင် စက်သုံးဆီဈေးနှုန်းများမှာ ဓါတ်ဆီ(92) တစ်လီတာလျှင် (၂၉၆၅)ကျပ်၊ ဓါတ်ဆီ(95)တစ်လီတာလျှင် (၃၀၂၅)ကျပ် ၊ ဒီဇယ်(ရိုးရိုး) တစ်လီတာလျှင် (၂၅၅၅)ကျပ်၊ ဒီဇယ်(ပရီမီယမ်)တစ်လီတာလျှင် (၃၁၂၅)ကျပ်ဖြင့် ရောင်းချ နေသောကြောင့် ယခင်အပတ်နှင့် နှိုင်းယှဉ်ပါက ဓါတ်ဆီ(92) တစ်လီတာလျှင် (၆၀)ကျပ် ဈေးနှုန်း၊ ဓါတ်ဆီ(95)တစ်လီတာလျှင် (၆၀)ကျပ်၊ ဒီဇယ် (ရိုးရိုး) တစ်လီတာလျှင် (၆၀)ကျပ်၊ ဒီဇယ် (ပရီမီယမ်) တစ်လီတာလျှင် (၇၀)ကျပ် ဈေးနှုန်းကျဆင်းလျက်ရှိကြောင်း စက်သုံးဆီ အရောင်းဆိုင်များမှ သတင်း ရရှိသည်။

DOCA(စစ်ကိုင်း)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ ကုန်စိမ်းသီးနှံဈေးကွက်သို့ ရှမ်းပြည်နယ် အောင်ပန်း နှင့် ပေါက်ဒေသထွက် အာလူးများ ဝင်ရောက်အရောင်းအဝယ် ဖြစ်လျက်ရှိပါသည်။ အာလူးသီးနှံသည် ပြည်သူအများ စားသုံးမှုမြင့်မားလျက်ရှိပြီး စားဖိုဆောင်သီးနှံအဖြစ် စားသုံးမှုအပြင် ဒေသတွင်း ကုန်ကြမ်း အာလူးသီးနှံမှတစ်ဆင့် တန်ဖိုးမြှင့်ထုတ်ကုန်အဖြစ် အာလူးကြော်ထုတ်လုပ်မှု လုပ်ငန်းများလည်း တွင်ကျယ် စွာ ဆောင်ရွက်လျက်ရှိ၍ အာလူးသီးနှံမှာ ဒေသတွင်းသုံးစွဲမှုများ၍ အရောင်းအဝယ်သွက်လျက်ရှိကြောင်း ဈေးကွက်မှသိရသည်။

     ၂၀၂၅ခုနှစ်၊ မေလ(ဒုတိယပတ်)တွင် အာလူးအလုံးအရွယ်အစားနှင့် အရည်အသွေးလိုက်၍ အာလူး (အလုံးကြီး)ရှယ် တစ်ပိဿာလျှင် ကျပ်(၄၀၀၀)၊ အာလူး(အလုံးလတ်) တစ်ပိဿာလျှင် ကျပ်(၃၀၀၀)၊ အာလူး(အလုံးသေး) တစ်ပိဿာလျှင် ကျပ်(၂၀၀၀)ဈေးဖြင့် အရောင်းအဝယ်ဖြစ်လျက်ရှိပြီး ယခင် ဧပြီလ (စတုတ္ထပတ်)တွင် အာလူး(အလုံးကြီး)ရှယ် တစ်ပိဿာလျှင် ကျပ်(၅၅၀၀)၊ အာလူး(အလုံးလတ်) တစ်ပိဿာလျှင် ကျပ်(၄၅၀၀)၊ အာလူး(အလုံးသေး) တစ်ပိဿာလျှင် ကျပ် (၃၅၀၀)ဈေးဖြင့် အရောင်းအဝယ်ဖြစ်၍ ဈေးနှုန်းနှိုင်းယှဉ်ပါက အာလူးတစ်ပိဿာလျှင် ကျပ်(၁၅၀၀)ခန့် ဈေးတက်ပြီး အရောင်းအဝယ်ဖြစ်လျက် ရှိကြောင်း၊ ဒေသတွင်းစိုက်ခင်းများမှ သီးနှံလှိုင်လှိုင်ပေါ်ချိန်မဟုတ်၍ ဈေးကွက်တွင် ကုန်ဝင်ရောက်မှုနည်း ခြင်းအပြင် သယ်ယူစရိတ်ကြီးမြင့်ခြင်းကြောင့် ဈေးတက်ကြောင်း သီးနှံဈေးကွက်မှ သိရှိရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ အနောက်ပိုင်း ရွာသစ်ရပ်ကွက် နှင့် ကိုးတောင့်၊ အောက်ဆိပ်အုပ်စုနှင့် ဧရာဝတီမြစ်ရိုးတစ်လျှောက် ယောချောင်း၊ ချစ်ချောင်းနံဘေး ရှိ ကျေးရွာများတွင် ကြက်သွန်နီသီးနှံကို မိုးစိုက်(ဥစိုက်)၊ ဆောင်းစိုက် (ပင်စိုက်) မျိုးစေ့အနှံယူ စိုက်ခင်းများအပြင် မျိုးစေ့မှ တစ်ဆင့် မျိုးဥယူ(ဇော်မွှား) စိုက်ခင်းများကို ဒေသတွင်းရှိ တောင်သူ များမှာ တစ်ပိုင်တစ်နိုင် အဖြစ်လည်းကောင်း စီးပွားဖြစ်လည်းကောင်း စိုက်ပျိုးကြကြောင်း၊ ယခင်နှစ် က ကြက်သွန်နီ မျိုးဥ(ဇော်မွှား) စိုက်ဧက (၁၅၀) ခန့် စိုက်ပျိုးခဲ့ရာ ယခုနှစ်၌ ကြက်သွန်နီ မိုးစိုက် (ဥစိုက်) စိုက်ပျိုးချိန်တွင် ဈေးကွက်ဝယ်လိုအား ကောင်းမွန်ခြင်းကြောင့် ကြက်သွန်နီများ အရောင်း အဝယ် ဖြစ်၍ မျိုးဥဈေးနှုန်းများလည်း မြင့်တက်လာသည့်အတွက် ကြက်သွန်နီမျိုးဥ (ဇော်မွှား) စိုက်ဧက (၂၀၀)ခန့်အထိ ပိုမိုတိုးချဲ့စိုက်ပျိုးလာကြကြောင်း ဒေသခံတောင်သူတစ်ဦးထံမှ သိရသည်။

      စိုက်ပျိုးမှုအနေဖြင့် မြစ်ချောင်းတစ်လျှောက်ရှိ သဲနုန်းမြေများတွင် အများဆုံးစိုက်ပျိုးကြပြီး အစေ့ကြဲပက်၊ အကန့်ဖော်ဘောင်တင်ပြီး ရေဖျန်းစနစ်ဖြင့် စိုက်ပျိုးကြကြောင်း၊ အထွက်နှုန်း အနေဖြင့် တစ်ဧကလျှင် ကြက်သွန်နီမျိုးစေ့ (၁၆) ပြည်ခန့် ကြဲပက်စိုက်ပျိုးရပြီး မျိုးစေ့(၁) ပြည်လျှင် အပင်ပေါက်စုံပြီး ကြီးထွားမှုပေါ်မူတည်၍ (ဇော်မွှား)မျိုးဥ ပိဿာ (၁၀၀ မှ ၁၅၀)ခန့် ထွက်ရှိခြင်း ကြောင့် (၁)ဧကလျှင် ပျမ်းမျှ ပိဿာချိန် (၁၆၀၀) ခန့် ထွက်ရှိကြောင်း၊ ဈေးနှုန်းအနေဖြင့် ယခင်နှစ် ကြက်သွန်နီမျိုးဥ(ဇော်မွှား)တစ်ပိဿာလျှင် ကျပ်(၅၀၀၀-၅၅၀၀)ပေါက်ဈေးဖြင့် ဒေသတွင်း၌ အရောင်းအဝယ်ဖြစ်ခဲ့ကြောင်း၊ (၁)ဧကစိုက်ပျိုးကုန်ကျစရိတ်မှာ ကျပ်(၃၅)သိန်းခန့် ကုန်ကျပြီး ကျပ်(၄၅)သိန်းခန့် အကျိုးအမြတ်ရရှိခဲ့ကြောင်း၊ ယခုနှစ်တွင် တောင်သူများမှ (ဇော်မွှား)မျိုးဥ ရောင်းချချိန် မရောက်ရှိသေး၍ လေဝင်လေထွက်ကောင်းပြီး အထားခံသော ဝါးထရံအဆောင်များ တွင် သိုလှောင်ထားရှိကြောင်း၊ လာမည့် စက်တင်ဘာလကုန် အောက်တိုဘာလဆန်းပိုင်းတွင် မျိုးဥ စိုက်ပျိုးချိန်ရာသီ၌ ရောင်းချရမည်ဖြစ်ပြီး တောင်သူများအနေဖြင့် ယခင်နှစ်ထက် မျိုးဥဈေးကွက် ကောင်းမွန်ရန် မျှော်လင့်လျက်ရှိကြောင်း၊ ယခုနှစ်တွင် (ဇော်မွှား)မျိုးဥ တစ်ဧကလျှင် ကျပ်သိန်း(၄၀) ခန့် ကုန်ကျကြောင်း၊ မျိုးဥရောင်းချချိန်တွင် ကြက်သွန်နီဈေးကွက်ကောင်းမွန်ပြီး (ဇော်မွှား)မျိုးဥ တစ်ပိဿာလျှင် ကျပ်(၅၀၀၀)၊ ပိဿာ(၁၀၀)လျှင် ကျပ်(၅)သိန်းဈေးဖြင့် ရောင်းချရပါက တောင်သူ အဆင်ပြေမည်ဖြစ်ကြောင်း၊ ဈေးကွက်အနေဖြင့် စိုက်ပျိုးထွက်ရှိသော (ဇော်မွှား)မျိုးဥများကို ဒေသ တွင်း ကြက်သွန်နီမျိုးဥစိုက်တောင်သူများနှင့် ချောက်၊ စလင်း၊ ပွင့်ဖြူမြို့နယ်အတွင်းရှိ တောင်သူ များမှလည်း လာရောက်ဝယ်ယူကြောင်း ဒေသခံတောင်သူများထံမှ သိရသည်။

      ကြက်သွန်နီသည် အခြားသီးနှံများအနက် တွက်ချေကိုက်သော သီးနှံတစ်မျိုးဖြစ်ရာ ကြက်သွန်နီမျိုးဥ(ဇော်မွှား)စိုက်ခင်းများ စိုက်ပျိုးခြင်းဖြင့် ကြက်သွန်နီဈေးကွက်ကောင်းမွန်ပြီး ဈေးကွက်ခိုင်မာမှုရှိပါက အကျိုးအမြတ်များစွာရရှိသည့်အပြင် မျိုးစေ့မှတစ်ဆင့် မျိုးဥယူခြင်းဖြစ်၍ (နွေ) ကြက်သွန်နီ ဥစိုက်စိုက်ပျိုးရာတွင် အထွက်နှုန်းကောင်းမွန်ပြီး ဈေးကွက်ဝင် ကြက်သွန်ဥများ ရရှိခြင်းကြောင့် တောင်သူများအနေဖြင့် နှစ်စဉ်မပြတ် စိုက်ပျိုးကြကြောင်း သိရှိရသည်။

DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်သည် စိုက်ပျိုးရေးကို အခြေပြုပြီး ဒေသစီးပွားဖြစ် လုပ်ကိုင်လျက်ရှိရာ နှစ်စဉ်သီးနှံမျိုးစုံစိုက်ပျိုးရာမှ အစေ့ထုတ်ပြောင်း(CP)သီးနှံကိုလည်း ဒေသ စီးပွားဖြစ် စိုက်ပျိုးလျက်ရှိသည်။ ပခုက္ကူ၊ မြစ်ခြေ၊ ကမ္မ၊ ပေါက်၊ ရေစကြိုမြို့များတွင် စိုက်ဧက အများဆုံးစိုက်ပျိုးပြီး နှစ်စဉ်စိုက်ဧက(၁၅၀၀၀)ခန့် စိုက်ပျိုးကြောင်း သိရှိရသည်။

    အစေ့ထုတ်ပြောင်း(CP)ကို ပြည်တွင်းမွေးမြူရေးလုပ်ငန်းများမှ ကုန်ကြမ်းတိရိစ္ဆာန် အစား အစာအဖြစ်အသုံးပြုပြီး အပင်များကိုလည်း ကျွဲနွားများအတွက် အစာအဖြစ် အသုံးဝင်သည့်အပြင် ပြည်ပပို့ကုန်အဖြစ် ထိုင်း၊ တရုတ်နိုင်ငံများသို့လည်း နှစ်စဉ်တင်ပို့နိုင်၍ ပြည်တွင်းဈေးကွက် ခိုင်မာပြီး အရောင်းအဝယ်ဖြစ်လျက်ရှိကြောင်း သိရှိရသည်။ ပခုက္ကူဈေးကွက်၌လည်း နေ့စဉ် အရောင်းအဝယ် ဖြစ်လျက်ရှိသည်။ ၂၀၂၅ခုနှစ်၊ မေလ(ဒုတိယပတ်)တွင် အစေ့ထုတ်ပြောင်း(CP) ဝင်ရောက်မှု အနေဖြင့် နေ့စဉ် တစ်ရက်လျှင် ပိဿာ(၃၀)ဝင်အိတ်(၁၀၀-၁၅၀)ခန့် အရောင်းအဝယ်ဖြစ်ကြောင်း သိရှိရသည်။ ယခုအချိန်တွင် သီးနှံပေါ်ချိန်မဟုတ်၍ ဈေးကွက်သို့ ကုန်ဝင်ရောက်မှုနည်းပြီး ဈေးအေး၍ အရောင်းအဝယ်ဖြစ်ကြောင်း သိရှိရသည်။

     ဈေးနှုန်းအနေဖြင့် မေလ(ဒုတိယပတ်)တွင် အစေ့ထုတ်ပြောင်း(CP) တစ်တင်းလျှင် ကျပ် (၂၆၀၀၀-၂၅၀၀၀)ဈေးဖြင့် အရောင်းအဝယ်ဖြစ်ကြောင်း၊ သီးနှံပေါ်စ ဖေဖော်ဝါရီလမှစ၍ ယနေထိ ဈေးအတက်အကျနည်းပြီး ဈေးငြိမ်၍ အရောင်းအဝယ်ဖြစ်ကြောင်း၊ အစေ့ထုတ်ပြောင်း(CP)ကို ပြည်တွင်းသုံးစွဲမှု နည်းသော်လည်း ပြည်ပပို့ကုန်အဖြစ် အများဆုံးတင်ပို့ပြီး ထိုင်း၊ တရုတ်နိုင်ငံမှ တိရိစ္ဆာန် အစားအစာကုန်ကြမ်းအဖြစ် ပြည်ပနိုင်ငံများမှ ဝယ်ယူလျက်ရှိကြောင်း သိရှိရသည်။

   ပြည်ပပို့ကုန်သီးနှံတစ်မျိုးဖြစ်သည့် အစေ့ထုတ်ပြောင်း(CP)သည် ပြည်တွင်းသုံးစွဲမှုနည်း သော်လည်း ပြည်ပ ပို့ကုန်သီးနှံတစ်မျိုးဖြစ်၍ ဈေးကွက်ခိုင်မာခြင်းကြောင့် စိုက်တောင်သူများမှ အကျိုးအမြတ်ရရှိ၍ နှစ်စဉ်မပြတ် ဒေသစီးပွားဖြစ် စိုက်ပျိုးကြောင်း သိရှိရသည်။

DOCA(မကွေး)