ပြည်တွင်းကုန်သွယ်မှုသတင်း

                    မန္တလေးတိုင်းဒေသကြီး ၊ညောင်ဦးခရိုင်၊ ကျောက်ပန်းတောင်းမြို့နယ်တွင် မိုးစပါးသီးနှံကို ဩဂုတ်လနှင့် စက်တင်ဘာလတို့တွင် စတင်စိုက်ပျိုးပြီး၊ ဒီဇင်ဘာလလည်နှင့် ဇန်နဝါရီလတို့တွင်စတင် ရိတ်သိမ်းကြကြောင်း ၊ ၂၀၂၅-၂၀၂၆ ခုနှစ်တွင် မိုးစပါးသီးနှံကို  (၁၆၈၅၀)ဧက လျာထားပြီး (၁၆၉၆၅) ဧကစိုက်ပျိုးပြီး (၃၆၂၄ )ဧကရိတ်သိမ်း၍ အထွက်နှုန်း(၅၈.၈၀ )တင်း အထွက်စုစုပေါင်း (၂၁၃၀၇၄ ) တင်းထွက်ရှိကြောင်းနှင့် ကြက်မောက်တောင်ဆည်ရေသောက် နွေစပါးကို (၁၄၀၆)ဧက လျာထား ကြောင်း စိုက်ပျိုး‌ရေးဦးစီးဌာန၏ စာရင်းများအရသိရှိရသည်။ မိုးစပါးကို လျာထားဧကထက် ( ၁၁၅ )ဧက ပိုမိုစိုက်ပျိုးနိုင်ခဲ့ကြောင်း ၊ ကျောက်ပန်းတောင်းမြို့တွင် မိုးစပါးစိုက်ဧကများကို  ကိုင်းကျေးရွာ ၊ မကျီးတိုင်းကျေးရွာ ၊ သရက်တောကျေးရွာ ၊ စီးကန်ကျေးရွာ ၊အိုးအိုင်ကျေးရွာ ၊ အိမ်အိုကျေးရွာ စသည့်ကျေးရွာများ၌ အများဆုံးစိုက်ပျိုးထားကြောင်း သိရှိရသည်။ စိုက်ပျိုးသည့် စပါးမျိုးများမှာ  မနောသုခနှင့် အောင်နိုင်တိုး စပါးမျိုးများကိုသာ  စိုက်ပျိုးထားကြောင်း ၊ ပျိုးထောင်ရက် (၂၁)ရက် အကြာတွင် စိုက်ပျိုးမည့်လယ်မြေအတွင်း ရွေ့ပြောင်းစိုက်ရပြီး စပါးတစ်သီးရင့်မှည့်ချိန်အထိ ငါးလ ကြာမြင့်ကြောင်း ယခု ၂၀၂၅ခုနှစ်၊ ဒီဇင်ဘာလတွင် မိုးစပါးများ စတင်ရိတ်သိမ်းပြီဖြစ်ကြောင်း ၊ မိုးလေဝသမှန်ကန်သည့် နှစ်များတွင် မိုးစပါးများကို စောစောစိုက်ပျိုးလေ့ရှိကြောင်း  သိရှိရသည်။ ယခင် ၂၀၂၄-၂၀၂၅ခုနှစ်တွင် တစ်ဧက အထွက်နှုန်းအနေဖြင့် ၆၆ တင်းခန့်ထွက်ရှိခဲ့၍ ၊ စပါးစတင် ထွက်ပေါ် ချိန်တွင် စပါးတစ်တင်းလျှင် ဒေသပေါက်ဈေး (၁၈၀၀၀-၂၀၀၀၀) ကျပ်ခန့်ပေါက်ဈေးရှိပြီးယခု ၂၀၂၅-၂၀၂၆ ခုနှစ် စပါးစပေါ်ချိန်တွင် စပါးအသစ်တစ်တင်းလျှင် (၁၂၅၀၀)ကျပ်ခန့်ရှိပြီး စပါးအဟောင်း တစ်တင်းလျှင် (၁၅၀၀၀ ) ကျပ်ခန့်ရှိကြောင်း ၊ စပါးတစ်ဧကစိုက်ပျိုးလျှင်ကုန်ကျစရိတ် (၅၉၇၀၀၀)ကျပ်ခန့် ကုန်ကျသဖြင့် စပါးတစ်ဧကစိုက်တောင်သူအနေဖြင့် (၁၃၈၀၀၀)ကျပ်ခန့်အကျိုး အမြတ်ရရှိနိုင်ကြောင်း ၊ ဒေသထွက်စပါးများကို အခြားသို့တင်ပို့ အရောင်းအဝယ်ပြုလုပ်ခြင်းမရှိဘဲ၊ ထွက်ရှိ သောစပါးများကို ကျေးရွာအတွင်းရှိစက်များ၌ ကြိတ်ခွဲပြီး ရရှိလာသောဆန်များကို မိမိတို့၏မိသားစု ဝမ်းစာနှင့် တိရိစ္ဆာန်အစာအဖြစ် အသုံးပြုကြကြောင်း၊ ဒေသတွင်း‌ပေါက်ဈေးအနေဖြင့် မနောသုခ ဆန်တစ်တင်းခွဲ တစ်အိတ်လျှင် (၇၅၀၀၀-၈၀၀၀၀) ကျပ်ခန့်ရှိကြောင်းသိရှိရသည်။ 

 DOCA(မန္တလေး)                                                                                                       

              မုံရွာမြို့နယ်အတွင်းရှိ ကျေးရွာများတွင်  အပိုဝင်ငွေရရှိရန် မိမိပိုင်အိမ်ခြံဝင်းများနှင့် ယာကွက်များတွင် ဒန့်ဒလွန်ပင်များကို တစ်ပိုင်တစ်နိုင် စိုက်ပျိုးလျက်ရှိကြောင်း သိရှိရပါသည်။ ဒန့်ဒလွန်ပင်သည် မြန်မာနိုင်ငံနေရာအနှံ့အပြားတွင် ပေါက်ရောက်သော အပင်တစ်မျိုးဖြစ်ပါသည်။ ဒန့်ဒလွန်ပင်မှ အသီးအပြင် အရွက်များကိုလည်း ကြော်စားခြင်း၊ ဟင်းခါးရည်ချက်၍ ချက်ပြုတ်စားသောက်လေ့ရှိကြောင်း သိရှိရပါ သည်။

          ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် သာစည်ဈေးတွင် ဒန့်ဒလွန်သီး (၃)တောင့်ပါ တစ်စည်းလျှင် (  ၈၀၀ )ကျပ်၊ ဒန့်ဒလွန်ရွက်ဈေးနှုန်းမှာ တစ်စည်းလျှင် (၄၀၀)ကျပ်မှ (၅၀၀) ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုးရောင်းချလျက်ရှိရာ ယခုအခါ ပဲစောင်းလျားသီးနှင့် ဟင်းနုနွယ်ရွက်များကို မိမိတို့နေအိမ် ခြံဝင်းများတွင်လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ မုံရွာမြို့ပေါ်ရှိ မန်ကျည်းပင်ဈေးနှင့် ရပ်ကွက်ဈေးများတွင် လာရောက်ရောင်းချကြကြောင်း သိရှိရပါသည်။  

          ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် မုံရွာမြို့၊ သာစည်ဈေးတွင် ပဲစောင်းလျားသီး(၂၅)ကျပ်သားလျှင် (၇၀၀)ကျပ်၊ ၁ ပိသာလျှင် (၂၈၀၀)ကျပ်နှင့် ဟင်းနုနွယ်ရွက်ဈေးနှုန်းမှာ အစီးသေးတစ်စီးလျှင် (၅၀၀) ကျပ်ဖြင့် ရောင်းချလျက်ရှိကြောင်း ကုန်စိမ်းရောင်းချသူမျးထံမှ သိရှိရပါသည်။

DOCA(စစ်ကိုင်း)

                       မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံအောင်မြင်ဖြစ်ထွန်းလျက်ရှိရာ၄င်းသီးနှံများအနက်ဆီထွက်သီးနှံ တစ်မျိုးဖြစ်သော နေကြာသီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။ မြစ်သားမြို့နယ်တွင် နေကြာ(ဆောင်း) ၂၀၂၅-၂၀၂၆ ဘဏ္ဍာနှစ်တွင်(၁၈၈၈)ဧကစိုက်ပျိုးပြီးစီးပြီဖြစ်ကြောင်းသက်ဆိုင်ရာဌာန၏စာရင်းများအရသိရှိရပါသည်။ စိုက်ပျိုးသောကျေးရွာများမှာကသဲကုန်းကျေးရွာ၊မသဲ‌ကျေးရွာ၊ ရွှေလေးကျေးရွာများတွင် အများဆုံးစိုက်ပျိုးကြကြောင်း၊ စိုက်ပျိုးမှုအနေဖြင့် မျိုး(၄-၅)ပြည်စိုက်ပျိုးရကြောင်း ၊ စိုက်ပျိုး သောမျိုးများမှာ ဆင်းရွှေကြာမျိုး-၁ ၊ ဆင်းရွှေကြာမျိုး-၂ မျိုးများကို အများဆုံးစိုက်ပျိုးကြကြောင်း၊ စိုက်ပျိုးနည်းမှာ ဘောင်ကြောင်းပေးစနစ်နှင့် ပတ်ကြဲစိုက်ပျိုးစနစ်ဟူ၍ (၂)မျိုး စိုက်ပျိုးကြကြောင်း ၊ စိုက်ပျိုးမှု ကုန်ကျစရိတ် အနေဖြင့် မျိုး ၊ သွင်းအားစု ၊ လုပ်သားခ အပါအဝင်(၄၅၀၀၀၀/-) ကျပ်ခန့် ကုန်ကျကြောင်း ၊ ယခင်နှစ် နေကြာထွက်ပေါ်ချိန်တွင် အထွက်နှုန်းအနေဖြင့် (၂၀-၂၅)တင်းခန့် ထွက်ရှိကြောင်း၊နေကြာစျေးနှုန်းအနေဖြင့်တစ်တင်းလျှင်(၅၅၀၀၀/-)ကျပ်‌စျေးနှုန်းများဖြင့် အရောင်း အဝယ်ဖြစ်ခဲ့ပြီး၊စိုက်ပျိုးစရိတ်နှုတ်ပြီး အကျိုးအမြတ်အနေဖြင့် (၉၇၅၀၀၀/-)ကျပ် မြတ်ခဲ့ကြောင်း၊ ယခု လက်ရှိပေါက်စျေးအနေဖြင့် နေကြာတစ်တင်း လျှင်(၆၃၀၀၀/-)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း၊နေကြာထွက်ပေါ်ချိန်တွင် တောင်သူများမှာ မြို့ပေါ်ပွဲရုံများသို့ ကိုယ်တိုင်ရောင်းချကြကြောင်း၊ပွဲရုံများမှတဆင့် မန္တလေး၊ရန်ကုန်မြို့များသို့ တင်ပို့ရောင်းချလျက်ရှိကြောင်း စိုက်ပျိုးစရိတ်သက်သာပြီး မိသားစုစားသုံးဆီဖူလုံရုံသာမက စီးပွားဖြစ်ဝင်ငွေတိုးသော ကြောင့်နေကြာသီးနှံကိုလည်း တောင်သူဦးကြီးများမှတစ်နှစ်ထက်တစ်နှစ် မိုပိုတိုးချဲ့စိုက်ပျိုးလာကြောင်း၊နေကြာစိုက်ပျိုးသောတောင်သူ တစ်ဦး၏ပြောကြားချက်အရသိရှိရပါသည်။

DOCA(မန္တလေး)                                                                             

       စစ်ကိုင်းတိုင်းဒေသကြီး၊ မုံရွာမြို့နယ်အတွင်ရှိ ကျေးရွာများတွင် ဟင်းသီးဟင်းရွက် စိုက်ပျိုးရေးလုပ်ငန်းများကို တစ်နိုင်တစ်ပိုင်သော်လည်းကောင်း၊ စီးပွားဖြစ်သော်လည်းကောင်း စိုက်ပျိုးလျက်ရှိကြောင်း သိရှိရပါသည်။  ဆလပ်ရွက်နှင့် ပျဉ်းတော်သိမ်းရွက်များကို အိမ်ရှင်မ များက ငပိရည်အတို့မြှုပ်အဖြစ်ဝယ်ယူကြသလို စားသောက်ဆိုင်များမှလည်း စီးပွားဖြစ်အသုံးပြုရန် ဝယ်ယူကြောင်း သိရှိရပါသည်။

         ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် ဈေးဟောင်းတွင် ရောင်းချနေသော ဆလပ်ရွက်ဈေးနှုန်းမှာ ဆလပ်ရွက်တစ်စည်းလျှင် (၂၀၀)ကျပ်မှ(၃)စည်း(၅၀၀)ကျပ်၊ ပျဉ်းတော်သိမ်းရွက်ဈေးနှုန်းမှာ အစည်းအကြီးအသေးပေါ်မူတည်၍ တစ်စည်းလျှင် (၃၀၀)ကျပ်မှ (၃၅၀) ကျပ်ထိ ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)