ပြည်တွင်းကုန်သွယ်မှုသတင်း

                            မြင်းခြံမြို့ရှိ ပွဲရုံများ၌ လယ်ယာထွက်ကုန် ပဲမျိုးစုံသီးနှံများကိုရောင်းဝယ်လျက်ရှိသည့်အနက် ပြည်တွင်း၌စားသုံးမှုမြင့်မားသော ကုလားပဲများကိုလည်း အရောင်းအဝယ်ဖြစ်လျက်ရှိကြောင်း၊ ၂၀၂၅ခုနှစ်၊ ဒီဇင်ဘာလတွင် ကုလားပဲV2တစ်တင်းလျှင် (၇၈၀၀၀)ကျပ်၊ ကုလားပဲ929တစ်တင်းလျှင် (၇၇၀၀၀)ကျပ်ခန့်ပေါက်ဈေးများဖြင့်‌ ရောင်းချလျက်ရှိကြောင်း၊ ယခင်လ နိုဝင်ဘာလ၌ ကုလားပဲ V2တစ်တင်းလျှင် (၇၉၀၀၀)ကျပ်၊ ကုလားပဲ929တစ်တင်းလျှင် (၇၈၅၀၀)ကျပ်ခန့် ပေါက်ဈေး များဖြင့်‌ အရောင်းအဝယ်ဖြစ်ခဲ့ကြောင်း ၊  ယခင်လနှင့် နှိုင်းယှဉ်ပါက  ယခုလတွင် ကုလားပဲ V2တစ်တင်းလျှင် (၁၀၀၀) ကျပ်၊ ကုလားပဲ929 တစ်တင်းလျှင်(၁၅၀၀)ကျပ်ခန့်  ဈေးနှုန်းများကျဆင်းခဲ့ကြောင်း၊ နေ့စဉ်အိတ်ရေ ၁၀၀ အိတ်မှ ၂၀၀ အိတ်ခန့်အရောင်းအဝယ် ပြုလုပ်ကြကြောင်း၊ ကုလားပဲသည် ပရိုတင်းဓာတ်ပါဝင်မှု မြင့်မားသောကြောင့် မြို့နယ်အတွင်းရှိ ရပ်ကွက်ကျေးရွာများ၌ စားသုံးမှု များပြားသလို  ဒေသအတွင်းရှိ ပဲကြော်လုပ်ငန်းများမှလည်း ဝယ်ယူသုံးစွဲကြသလို  ပိုလျှံသောပဲကြီး များကို ရန်ကုန်မြို့နှင့် မန္တလေးမြို့များသို့လည်း တင်ပို့ရောင်း ချကြောင်း၊ ပွဲရုံလုပ်ငန်းလုပ်ကိုင်သူတစ်ဦး ပြောပြချက် အရသိရှိရသည်။

DOCA(မန္တလေး)

               မန္တလေးတိုင်းဒေသကြီး၊ညောင်ဦးခရိုင်၊ကျောက်ပန်းတောင်းမြို့နယ်တွင်ဆီထွက်သီးနှံဖြစ်သည့် မိုးနှမ်းကိုအဓိကထားစိုက်ပျိုးလျှက်ရှိပြီး နွေနှမ်းနှင့်ဆောင်းနှမ်းကို အနည်းငယ်သာစိုက်ပျိုးကြပါသည်။ ကျောက်ပန်းတောင်းမြို့နယ်တွင်  နှမ်းသီးနှံကို သီးသန့်စိုက်ပျိုးကြသလို ပဲစဉ်းငုံသီးနှံနှင့်သီးညှပ် စိုက်ပျိုးမှုမှာ ပို၍များကြောင်းသိရသည်။၂၀၂၅-၂၀၂၆ ခုနှစ်တွင် မိုးနှမ်းကို (၁၂၁၁၅၁)ဧကလျာထားခဲ့ပြီး စိုက်ဧက(၁၃၄၆၁၇)ဧက စိုက်ပျိုးခဲ့ပြီး တစ်ဧကအထွက်နှုန်းအနေဖြင့် (၄.၇၈)တင်းနှုန်းထွက်ရှိ၍ စုစု ပေါင်း (၆၅၅၅၈၅)တင်း ထွက်ရှိခဲ့ပါသည်။ လျာထားဧကထက် (၁၃၄၆၆ )ဧက ပိုမိုစိုက်ပျိုးခဲ့ကြသည်။ ဇွန်လ မိုးဦးကျချိန်တွင် စတင်စိုက်ပျိုး၍ ဇူလိုင်လကုန် ဩဂုတ်လ ပထမပတ်တွင် လှိုင်လှိုင်ထွက်ရှိပြီး  နွေနှမ်းကို မတ်၊ဧပြီလတို့တွင် စတင်စိုက်ပျိုး၍ ဇွန်၊ ဇူလိုင်လများတွင် ထွက်ရှိပါသည်။ ဇူလိုင်လကုန်နှင့် ဩဂုတ်လများတွင် ကျောက်ပန်းတောင်းမြို့နှင့် ထိဆက်လျက်ရှိသောကျေးရွာများမှ မြို့ပေါ်ရှိ ပွဲရုံများ၊ ဆီစက်များသို့ လာရောက်၍ရောင်းဝယ်မှု ပြုလုပ်ကြသည်။ ယခုနှစ်နှမ်းသီးနှံစတင်ထွက်ပေါ်ချိန်တွင် နှမ်းနီတစ်တင်းလျှင် (၉၅၀၀၀)ကျပ်၊နှမ်းဖြူတစ်တင်းလျှင် (၁၀၂၀၀၀)ကျပ်ဈေးဖြင့် ရောင်းဝယ်စတင်ခဲ့ပြီး ဩဂုတ်လနောက်ဆုံးပတ်တွင် နှမ်းနီတစ်တင်း (၈၈၀၀၀)ကျပ် ၊ နှမ်းဖြူတစ်တင်း (၉၁၀၀၀)ကျပ် ၊ ဒီဇင်ဘာလတွင်လည်း နှမ်းနီတစ်တင်းလျှင် (၈၈၀၀၀)ကျပ် ၊ နှမ်းဖြူတစ်တင်းလျှင် ( ၉၁၀၀၀ /၉၀၀၀၀ )ကျပ်ဖြင့်‌ ဈေးနှုန်းတည်ငြိမ်စွာ အရောင်းအဝယ်ဖြစ်လျှက်ရှိသည်။ ကျောက်ပန်းတောင်းမြို့နယ်တွင် မိုးနှမ်းစိုက်ပျိုးမှု တစ်ဧကကုန်ကျစရိတ်အနေဖြင့်(၂၆၉၀၀၀)ကျပ် ကျသင့်ပြီး တစ်ဧကပျှမ်းမျှအထွက် နှုန်းမှာ (၄.၈၇)တင်းနှုန်းထွက်ရှိ၍ တစ်တင်းရောင်းဈေး (၉၁၀၀၀) ကျပ်ဖြင့် ရောင်းချခဲ့ရသောကြောင့် တစ်ဧကအကျိုးအမြတ်မှာ (၁၇၄၁၇၀)ကျပ်ရရှိစေပါသည်။ ဒေသထွက်နှမ်းများကို ယခင်က အခြားဒေသများသို့ တင်ပို့ရောင်းချမှုများ ရှိခဲ့သော်လည်း ယခုအချိန်တွင်ပြင်ပသို့ ရောင်းချမှုနည်းပါးလာပြီး ဒေသတွင်း၌သာ ဆီကြိတ်ခွဲသုံးစွဲမှုများ များလာကြပါသည်။ တောင်သူအကျိုးအမြတ်ရရှိသော ဆီထွက်သီးနှံကို ပိုမိုစိုက်ပျိုးပြီး ပြည်ပသို့ရောင်းချခြင်း မပြုပဲပြည်တွင်း၌ သုံးစွဲခြင်း၊ ဆီကြိတ်ခွဲ ရောင်းချခြင်းများ ပြုလုပ်ပါက ဒေသတွင်းဆီစားသုံးမှုဖူလုံ လာခြင်း၊တိရစ္ဆာန်အစာများ ပေါများလာခြင်း၊ ဒေသတွင်းလုပ်သားများ အလုပ်အကိုင်အခွင့်အလမ်း များပိုမိုရရှိစေလာခြင်းအပြင် ဘေးအန္တရာယ်ကင်းသော ဆီများစားသုံးရခြင်းကြောင့် ကျန်းမာရေးညီညွတ်ကောင်းမွန်လာစေခြင်း စသည့်အကျိုးကျေးဇူးများရရှိစေသည့်အတွက် နှမ်းအပါအဝင် ဆီထွက်သီးနှံများအား ပိုမိုတိုးချဲ့စိုက်ပျိုး သင့်ပါကြောင်း ရေးသားတင်ပြလိုက်ပါသည်။

DOCA(မန္တလေး)

                    မန္တလေးတိုင်းဒေသကြီး ၊ညောင်ဦးခရိုင်၊ ကျောက်ပန်းတောင်းမြို့နယ်တွင် မိုးစပါးသီးနှံကို ဩဂုတ်လနှင့် စက်တင်ဘာလတို့တွင် စတင်စိုက်ပျိုးပြီး၊ ဒီဇင်ဘာလလည်နှင့် ဇန်နဝါရီလတို့တွင်စတင် ရိတ်သိမ်းကြကြောင်း ၊ ၂၀၂၅-၂၀၂၆ ခုနှစ်တွင် မိုးစပါးသီးနှံကို  (၁၆၈၅၀)ဧက လျာထားပြီး (၁၆၉၆၅) ဧကစိုက်ပျိုးပြီး (၃၆၂၄ )ဧကရိတ်သိမ်း၍ အထွက်နှုန်း(၅၈.၈၀ )တင်း အထွက်စုစုပေါင်း (၂၁၃၀၇၄ ) တင်းထွက်ရှိကြောင်းနှင့် ကြက်မောက်တောင်ဆည်ရေသောက် နွေစပါးကို (၁၄၀၆)ဧက လျာထား ကြောင်း စိုက်ပျိုး‌ရေးဦးစီးဌာန၏ စာရင်းများအရသိရှိရသည်။ မိုးစပါးကို လျာထားဧကထက် ( ၁၁၅ )ဧက ပိုမိုစိုက်ပျိုးနိုင်ခဲ့ကြောင်း ၊ ကျောက်ပန်းတောင်းမြို့တွင် မိုးစပါးစိုက်ဧကများကို  ကိုင်းကျေးရွာ ၊ မကျီးတိုင်းကျေးရွာ ၊ သရက်တောကျေးရွာ ၊ စီးကန်ကျေးရွာ ၊အိုးအိုင်ကျေးရွာ ၊ အိမ်အိုကျေးရွာ စသည့်ကျေးရွာများ၌ အများဆုံးစိုက်ပျိုးထားကြောင်း သိရှိရသည်။ စိုက်ပျိုးသည့် စပါးမျိုးများမှာ  မနောသုခနှင့် အောင်နိုင်တိုး စပါးမျိုးများကိုသာ  စိုက်ပျိုးထားကြောင်း ၊ ပျိုးထောင်ရက် (၂၁)ရက် အကြာတွင် စိုက်ပျိုးမည့်လယ်မြေအတွင်း ရွေ့ပြောင်းစိုက်ရပြီး စပါးတစ်သီးရင့်မှည့်ချိန်အထိ ငါးလ ကြာမြင့်ကြောင်း ယခု ၂၀၂၅ခုနှစ်၊ ဒီဇင်ဘာလတွင် မိုးစပါးများ စတင်ရိတ်သိမ်းပြီဖြစ်ကြောင်း ၊ မိုးလေဝသမှန်ကန်သည့် နှစ်များတွင် မိုးစပါးများကို စောစောစိုက်ပျိုးလေ့ရှိကြောင်း  သိရှိရသည်။ ယခင် ၂၀၂၄-၂၀၂၅ခုနှစ်တွင် တစ်ဧက အထွက်နှုန်းအနေဖြင့် ၆၆ တင်းခန့်ထွက်ရှိခဲ့၍ ၊ စပါးစတင် ထွက်ပေါ် ချိန်တွင် စပါးတစ်တင်းလျှင် ဒေသပေါက်ဈေး (၁၈၀၀၀-၂၀၀၀၀) ကျပ်ခန့်ပေါက်ဈေးရှိပြီးယခု ၂၀၂၅-၂၀၂၆ ခုနှစ် စပါးစပေါ်ချိန်တွင် စပါးအသစ်တစ်တင်းလျှင် (၁၂၅၀၀)ကျပ်ခန့်ရှိပြီး စပါးအဟောင်း တစ်တင်းလျှင် (၁၅၀၀၀ ) ကျပ်ခန့်ရှိကြောင်း ၊ စပါးတစ်ဧကစိုက်ပျိုးလျှင်ကုန်ကျစရိတ် (၅၉၇၀၀၀)ကျပ်ခန့် ကုန်ကျသဖြင့် စပါးတစ်ဧကစိုက်တောင်သူအနေဖြင့် (၁၃၈၀၀၀)ကျပ်ခန့်အကျိုး အမြတ်ရရှိနိုင်ကြောင်း ၊ ဒေသထွက်စပါးများကို အခြားသို့တင်ပို့ အရောင်းအဝယ်ပြုလုပ်ခြင်းမရှိဘဲ၊ ထွက်ရှိ သောစပါးများကို ကျေးရွာအတွင်းရှိစက်များ၌ ကြိတ်ခွဲပြီး ရရှိလာသောဆန်များကို မိမိတို့၏မိသားစု ဝမ်းစာနှင့် တိရိစ္ဆာန်အစာအဖြစ် အသုံးပြုကြကြောင်း၊ ဒေသတွင်း‌ပေါက်ဈေးအနေဖြင့် မနောသုခ ဆန်တစ်တင်းခွဲ တစ်အိတ်လျှင် (၇၅၀၀၀-၈၀၀၀၀) ကျပ်ခန့်ရှိကြောင်းသိရှိရသည်။ 

 DOCA(မန္တလေး)                                                                                                       

              မုံရွာမြို့နယ်အတွင်းရှိ ကျေးရွာများတွင်  အပိုဝင်ငွေရရှိရန် မိမိပိုင်အိမ်ခြံဝင်းများနှင့် ယာကွက်များတွင် ဒန့်ဒလွန်ပင်များကို တစ်ပိုင်တစ်နိုင် စိုက်ပျိုးလျက်ရှိကြောင်း သိရှိရပါသည်။ ဒန့်ဒလွန်ပင်သည် မြန်မာနိုင်ငံနေရာအနှံ့အပြားတွင် ပေါက်ရောက်သော အပင်တစ်မျိုးဖြစ်ပါသည်။ ဒန့်ဒလွန်ပင်မှ အသီးအပြင် အရွက်များကိုလည်း ကြော်စားခြင်း၊ ဟင်းခါးရည်ချက်၍ ချက်ပြုတ်စားသောက်လေ့ရှိကြောင်း သိရှိရပါ သည်။

          ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် သာစည်ဈေးတွင် ဒန့်ဒလွန်သီး (၃)တောင့်ပါ တစ်စည်းလျှင် (  ၈၀၀ )ကျပ်၊ ဒန့်ဒလွန်ရွက်ဈေးနှုန်းမှာ တစ်စည်းလျှင် (၄၀၀)ကျပ်မှ (၅၀၀) ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုးရောင်းချလျက်ရှိရာ ယခုအခါ ပဲစောင်းလျားသီးနှင့် ဟင်းနုနွယ်ရွက်များကို မိမိတို့နေအိမ် ခြံဝင်းများတွင်လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ မုံရွာမြို့ပေါ်ရှိ မန်ကျည်းပင်ဈေးနှင့် ရပ်ကွက်ဈေးများတွင် လာရောက်ရောင်းချကြကြောင်း သိရှိရပါသည်။  

          ၂၀၂၅ ခုနှစ်၊ ဒီဇင်ဘာလ စတုတ္ထပတ်တွင် မုံရွာမြို့၊ သာစည်ဈေးတွင် ပဲစောင်းလျားသီး(၂၅)ကျပ်သားလျှင် (၇၀၀)ကျပ်၊ ၁ ပိသာလျှင် (၂၈၀၀)ကျပ်နှင့် ဟင်းနုနွယ်ရွက်ဈေးနှုန်းမှာ အစီးသေးတစ်စီးလျှင် (၅၀၀) ကျပ်ဖြင့် ရောင်းချလျက်ရှိကြောင်း ကုန်စိမ်းရောင်းချသူမျးထံမှ သိရှိရပါသည်။

DOCA(စစ်ကိုင်း)