ပြည်တွင်းကုန်သွယ်မှုသတင်း

              မြင်းခြံခရိုင်အတွင်းရှိ ကျေးရွာများဖြစ်သော တလုပ်ရွာ၊ တောပု၊ နနွင်းတော်ဘိုး၊ကံဆွယ်၊ ကံဆင့်၊လက်ဝဲနှင့် မြင်းနီကျေးရွာတို့သည် ဆောင်းကြက်သွန်နီများကို စီးပွားဖြစ်စိုက်ပျိုး ကြကြောင်း၊  ၎င်းကျေးရွာမှ ထွက်ရှိသော ဆောင်းကြက်သွန်နီများသည် အရည်အသွေးကောင်ပြီး၊ သိုလှောင်ခံ၍ ပထမတန်းစား ကြက်သွန်နီဖြစ်ပြီး ဈေးကွက်တွင် ဈေးကောင်းလည်းရရှိကြောင်း၊ဆောင်းကြက်သွန်နီများကိုဧပြီလမှစက်တင်ဘာလအထိသိုလှောင်ကြပြီး၊ သိုလှောင်ကာလ(၆)လကြာသိုလှောင်နိုင်၍ ဒီဇင်ဘာလတွင်ဆောင်းကြက်သွန်နီများ ရာသီချိန်ကုန်ဆုံးမည် ဖြစ်ကြောင်း သိရှိရသည်။

            မြင်းခြံမြို့ရှိ ပွဲရုံများတွင်  ၂၀၂၅ခုနှစ်၊ အောက်တိုဘာလတတိယပတ်၌ ရောင်းချလျှက် ရှိသော ကြက်သွန်နီကြီးစတစ်ပိဿာလျှင်(၉၀၀-၁၀၀၀)ကျပ်၊ အလတ်စတစ်ပိဿာလျှင် (၇၀၀-၈၀၀)ကျပ်ခန့် ၊အသေးစတစ်ပိဿာလျှင် (၅၀၀-၆၀၀)ကျပ် ပေါက်ဈေးများဖြင့် အရောင်းအဝယ် ဖြစ်လျက်ရှိကြောင်း၊ ယခင်လနှင့် နှိုင်းယှဉ်ပါကယခုလတွင်ဆောင်းကြက်သွန်နီ ဈေးနှုန်းများ အနည်းငယ်ကျဆင်းခဲ့ကြောင်း၊ ရာသီချိန်ကုန်ဆုံးခါနီးပြီဖြစ်သောကြောင့် အရည်အသွေးကျဆင်းပြီး ဈေးနှုန်းများကျဆင်းခြင်းဖြစ် ကြောင်းသိရှိရသည်။စိုက်ပျိုးထွက်ရှိရာကျေးရွာများမှမြို့ပေါ်ရှိပွဲရုံများသို့နေ့စဉ်ကုန်ချိန်  (၅၀၀၀၀-၇၀၀၀၀)  ပိဿာခန့် တောင်သူများကိုယ်တိုင်လာရောက် ရောင်းချကြောင်း၊ ထိုပွဲရုံများမှ တဆင့် မန္တလေး၊ ရန်ကုန်၊ နေပြည်တော်၊ မော်လမြိုင်မြို့နှင့် တောင်ကြီးမြို့များသို့တင်ပို့ကြောင်း၊ ယခု အောက်တိုဘာလ၊ တတိယပတ်တွင်ကုန်ချိန်ပေါင်း (၁၈၇၃၉၁) ပိဿာခန့်၊ တန်ချိန် (၃၀၆) တန် တင်ပို့နိုင်ခဲ့ကြောင်း ကြက်သွန်အရောင်းအဝယ် လုပ်ကိုင်သူကုန်သည်တစ်ဦး၏ ပြောပြချက် အရသိရှိရသည်။

DOCA(မန္တလေး)

      ကျောက်ပန်းတောင်းမြို့နယ်တွင် ကျေးရွာပေါင်း(၃၉၉)ရွာရှိသည့်အနက်မှ ဆည်ပေါက်၊ ညောင်ကန်၊ အင်ချောင်း၊ ရေထွက်၊ ညောင်ဖြူပင်၊ လဲဂွ စသည့်ကျေးရွာများ၌ ကင်ပွန်းချဉ်ပင်ကို အိမ်ခြံစည်းရိုးများတွင် စိုက်ပျိုးကြပြီး ဒေသဈေးကွက်သို့ရောင်းချလျက်ရှိသလို မကွေးတိုင်းဒေသကြီး၊ တောင်တွင်းကြီးမြို့နယ်နှင့်ရေနံချောင်းမြို့နယ်များဘက်မှလည်း မှာယူပြီး မြို့မစည်ပင်သာယာဈေးတွင် ရောင်းချလျက်ရှိပါသည်။ အောက်တိုဘာလ ဒုတိယပတ်တွင် ကင်ပွန်းချဉ်တစ်ဆယ်ကျပ်သားလျှင် (၂၀၀၀)ကျပ်၊ တစ်ပိဿာလျှင်(၁၇၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး ယခုအောက်တိုဘာလ တတိယပတ်တွင် ကင်ပွန်းချဉ်တစ်ဆယ်ကျပ်သားလျှင်(၁၅၀၀)ကျပ်၊ တစ်ပိဿာလျှင်(၁၃၀၀၀)ကျပ် ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တလေး)

   ယခုနှစ်တွင် ပြည်တွင်းမှထွက်ရှိမည့် အရည်အသွေးမြင့် Hass ထောပတ်သီး များ ကို   စင်ကာပူနှင့်   ထိုင်းနိုင်ငံတို့သို့ အဓိကထား တင်ပို့မည်ဖြစ်ကြောင်း မြန်မာနိုင်ငံ ထောပတ်သီး စိုက်ပျိုးထုတ်လုပ် တင်ပို့ရောင်းချသူများအသင်းမှ သိရသည်။

ပြည်တွင်း၌  Hass  ထောပတ်သီးစိုက် ဧကပေါင်း  ၂၀၀၀၀   ခန့်ရှိပြီး   နှစ်စဉ် စက်တင်ဘာလ မှ  ဒီဇင်ဘာလအတွင်း Hass ထောပတ်သီးများ လှိုင်လှိုင်ထွက်ရှိကာ ပြည်တွင်း စားသုံးမှုအပြင် ပြည်ပနိုင်ငံများသို့လည်း တင်ပို့လျက်ရှိသည်။ ထိုသို့ ထောပတ်သီး များ တင်ပို့ရာတွင်    Hass ထောပတ်သီးများအပြင် Buccaneer၊ 034၊ Booth 7  နှင့် အမရာ စသော ထောပတ် သီးမျိုးများကို လည်း တင်ပို့ရောင်းချလျက် ရှိကြောင်း သိရသည်။

"မြန်မာနိုင်ငံမှာ  Hass  ထောပတ်သီး ကို ဧက ၂၀၀၀၀ လောက် စိုက်ပျိုးထား တာဖြစ်တဲ့ အတွက်  ပြည်ပစျေးကွက်ကို ကြိုးစားရှာဖွေရပါတယ်။   ဒီနှစ်မှာထွက် မယ့်  Hass ထောပတ်သီး တွေကိုတော့ စင်ကာပူနဲ့ထိုင်းနိုင်ငံကို အဓိကထားတင်ပို့ ဖို့ စီစဉ်ထား တယ်။ တရုတ်နိုင်ငံကိုလည်း မြန်မာ့ထောပတ်သီးအများအပြား တရားဝင်တင်ပို့နိုင်အောင် GACC လက်မှတ်ရရှိဖို့ စိုက်ပျိုးရေး ဦးစီးဌာနနဲ့  မြန်မာနိုင်ငံ ထောပတ်သီး    စိုက်ပျိုးထုတ်လုပ်တင်ပို့ ရောင်းချသူများအသင်းတို့    ပူးပေါင်း ဆောင်ရွက်နေပါတယ်" ဟု မြန်မာနိုင်ငံ ထောပတ် သီး   စိုက်ပျိုးထုတ်လုပ်တင်ပို့ ရောင်းချသူများ အသင်းမှ     တာဝန်ရှိသူ တစ်ဦးကပြောသည်။

ပြီးခဲ့သည့်နှစ် ထောပတ်သီးရာသီက အရည်အသွေးမြင့်  Hass  ထောပတ်သီး တန်ချိန်  ၃၀၀၀  ခန့်ထွက်ရှိခဲ့ပြီး   ယခုနှစ်တွင် ပိုမိုထွက်ရှိရန် မျှော်မှန်းထားကာ ပြည်တွင်း စားသုံးမှုအပြင်  ပြည်ပနိုင်ငံ များသို့လည်း  တင်ပို့ရောင်းချမည်ဖြစ် ကြောင်း၊  ပြည်တွင်း၌ အများအားဖြင့် ကိုင်းဆက်စိုက်ပျိုးထားသည့် Hass ထော ပတ်သီးများနှင့် Buccaneer ထောပတ်သီး များကို ရန်ကုန်၊ မန္တလေး စသည့်မြို့ကြီး များက  အဓိကထား   စားသုံးကြသဖြင့် နှစ်စဉ် အမြောက်အမြားတင်ပို့ရောင်းချရ ကြောင်း သိရသည်။

ယခုအခါ    မြန်မာ့ထောပတ်သီးများ သည် ပြည်တွင်းပြည်ပဈေးကွက်တွင် ဝယ်လိုအား ကောင်းလာ၍ ထောပတ်သီး စိုက်ပျိုးသော   တောင်သူများအနေဖြင့် ဈေးကွက်လိုအပ်ချက် ရှိသော ထောပတ်မျိုးကို ဦးစားပေးစိုက်ပျိုးကြရန် မြန်မာနိုင်ငံ  ထောပတ်သီးစိုက်ပျိုးထုတ်လုပ် တင်ပို့ရောင်းချ သူများအသင်းမှ တိုက်တွန်းထားကြောင်း သိရသည်။

DOCA(ဧရာဝတီ)

      မြိတ်မြို့တွင်ဒေသထွက်ကုန်များနှင့် ပင်လယ်ထွက်ကုန်များအပြင် ရိုးရာအစားအစာမုန့်အချို များလည်း ပြုလုပ်ရောင်းချလျက်ရှိပါသည်။ လက်လုပ်မုန့်များထဲ့မှ မုန့်ဖက်စလစ်သည် လူကြိုက် များလျက်ရှိသည်။ ရိုးရာမုန့်ဖက်စလစ် (မုန့်ပြားသလက်)ပြုလုပ်ရာတွင်ဂျုံ၊ကြက်ဥ၊ပျား ၊သကြား၊ အုန်းသီး၊ပဲစေ့၊ ကောက်ညှင်းတို့ပါဝင်၍ လူကြီးလူငယ်မရွေး ကြိုက်နှစ်သက်ကြသော ရိုးရာအစား အစာမုန့်တစ်မျိုးဖြစ်ပါသည်။

          ၂၀၂၅ ခုနှစ်၊ နိုဝင်ဘာလပထမပတ် မြိတ်မြို့တွင် ရောင်းချလျက်ရှိသော ရိုးရိုးမုန့်ဖက်စလက် (၁)ခုလျှင်(၅၀၀)ကျပ်နှင့် ကြက်ဥမုန့်ဖက်စလက်(၁)ခုလျှင်(၁၅၀၀)ကျပ် တို့ဖြင့် အရောင်းအဝယ် ဖြစ်လျက်ရှိကြောင်း သိရှိရပါသည်။    

DOCA(တနင်္သာရီ)

    တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ဝန်ထမ်းများ သည် (၅.၁၁.၂၀၂၅)ရက်နေ့၊ နံနက်(၁၁း၀၀)နာရီအချိန်တွင် ဘိလပ်မြေနှင့် အိမ်ဆောက်ပစ္စည်း ရောင်းချနေသည့် အရောင်းဆိုင်များသို့သွားရောက်၍ ပစ္စည်းဝင်ရောက်နေမှု အခြေအနေနှင့် စျေးနှုန်းများအား  ကွင်းဆင်းစုံစမ်းစစ်ဆေးခြင်းများဆောင်ရွက်ခဲ့ကြောင်း သိရှိရပါသည်။

     ကွင်းဆင်းစုံစမ်းချက်အရ မြိတ်မြို့တွင်  ဘိလပ်မြေ ကြံ့နှင့် အယ်လ်ဖာ တံဆိပ်များအား ရန်ကုန်မြို့မှ မှာယူရောင်းချလျက်ရှိပြီး ကြံ့ဘိလပ်မြေ တစ်အိတ်လျှင် (၂၇၀၀၀)ကျပ်နှင့် အယ်လ်ဖာ ဘိလပ်မြေ တစ်အိတ်လျှင် (၂၇၅၀၀) ကျပ်ရှိကြောင်း၊ ဘိလပ်မြေ ပြတ်လပ်မှုမရှိစေရေးနှင့် ဒေသတွင်းဖြစ်သင့် ဖြစ်ထိုက်သောစျေးနှုန်းများဖြင့် ရောင်းချမှုရှိစေရေးပြောကြားခဲ့ကြောင်း သိရှိရပါသည်။

DOCA(တနင်္သာရီ)