တနင်္သာရီတိုင်း‌ဒေသကြီး၊ မြိတ်ခရိုင်တွင် စက်မှုလုပ်ငန်းများနှင့် သယ်ယူပို့ဆောင်ရေးအတွက် အရေးပါလျက်ရှိသော စက်သုံးဆီများကို ရန်ကုန်မြို့နှင့် မလေး၊ ထိုင်း၊ စင်္ကာပူနိုင်ငံတို့မှ  ပြန်လည် တင်သွင်းလျက်ရှိပြီး မြိတ်မြို့ စက်သုံးဆီအရောင်းဆိုင်များ၊ လျှပ်စစ်မီးရရှိရေးနှင့် စက်မှုလုပ်ငန်းများ တွင် ပြန်လည်အသုံးပြုလျက်ရှိပါသည်။ နိုဝင်ဘာလလက်ကားစျေးနှုန်းအရ ဓါတ်ဆီတစ်ပေပါမှာ ၅၇၀၀၀၀ကျပ်နှင့် ဒီဇယ်တစ်ပေပါ မှာ ၆၀၀၀၀၀ ကျပ်ခန့်စျေးရှိကြောင်းသိရှိရပါသည်။

      မြိတ်မြို့ရှိ စက်သုံးဆီအရောင်းဆိုင်တွင် ရောင်းချနေသော နိုဝင်ဘာလလက်လီစျေးနှုန်းအရ ၉၂ ဓါတ်ဆီ တစ်လီတာ (၂၈၀၀) ကျပ်၊ ဒီဇယ် ၉၅ ဓါတ်ဆီ တစ်လီတာ (၂၉၀၀) ကျပ်၊ ဒီဇယ် တစ်လီတာ (၂၉၅၀)ကျပ်နှင့် ပရီမီယံဒီဇယ် တစ်လီတာ စျေးနှုန်းမှာ (၃၀၀၀)ကျပ် ဖြစ်ကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်း၊ မြိတ်ခရိုင်တွင် ကွမ်းသီး၊ ရာဘာ၊ သီဟိုဠ် များစိုက်ပျိုးကြသလို ဆီးဖြူသီး ကိုလည်း စိုက်ပျိုးလျက်ရှိကြပါသည်။ ဆီးဖြူသီးဟာ ဗီတာမင် စီ အလွန်ကြွယ်ဝတဲ့ အသီးဖြစ်ပြီး ကျန်းမာရေးအရ စားသုံးရန်သင့်သောအသီးဖြစ်သည်။ အရသာမှာ ချို၊ ချဉ်၊ ဖန်အရသာရှိပြီး သီးစုံ အချဉ်ပေါင်းများနှင့် ဖျော်ရည်များတွင် သုံးစွဲကြလေ့ရှိပါသည်။

     မြိတ်မြို့၊ နိုဝင်ဘာလပထမပတ်စျေးနှုန်းအရ ဒေသထွက် ဆီးဖြူသီး(ခေါ်)ဆားဖြူးသီး တစ် ပိဿာလျှင် (၈၀၀၀)ကျပ်ရှိပြီး တစ်ဆယ်သားလျှင်(၁၀၀၀)ကျပ်ဖြင့်ရောင်းချလျက်ရှိကြောင်း သိရှိရ ပါသည်။

DOCA(တနင်္သာရီ)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်တွင် ဥစားကြက်မွေးမြူရေးလုပ်ငန်း လုပ်ကိုင်မှု နည်းပါးခြင်းကြောင့် ဒေသတွင်းစားသုံးမှု မလုံလောက်၍ မန္တလေးတိုင်းဒေသကြီး၊ ပြင်ဦးလွင်မြို့နှင့် ရှမ်းပြည်နယ် တောင်ကြီးမြို့တို့မှ ဝယ်ယူ၍ အရောင်းအဝယ်ဖြစ်လျက်ရှိပါသည်။

          ဈေးနှုန်းများအနေဖြင့်၂၀၂၅ ခုနှစ် အောက်တိုဘာလတွင် ကြက်ဥအကြီးအသေးမူတည်၍ ကြက်ဥ(၁၀)လုံးလျှင် ကျပ်(၄၁၀၀၊ ၄၃၀၀၊ ၄၅၀၀)ဈေးရှိပြီး တစ်ပိဿာလျှင် ကျပ်(၁၁၀၀၀)၊ ယခင် စက်တင်ဘာလတွင် ကြက်ဥတစ်ပိဿာလျှင် ကျပ်(၁၂၀၀၀)ဈေးဖြင့် အရောင်းအဝယ်ရှိခဲ့ရာ ယခင် ယခုဈေးနှုန်းနှိုင်းယှဉ်ပါက တစ်လအတွင်း ကြက်ဥတစ်ပိဿာလျှင် ကျပ်(၁၀၀၀)ခန့်ဈေးကျ၍ အရောင်း အဝယ်ဖြစ် လျက်ရှိကြောင်း သိရှိရပါသည်။

          ကြက်ဥသည် ကျန်းမာရေးနှင့် ညီညွှတ်ပြီး အာဟာရပြည့်ဝသော အစားအစာတစ်မျိုးဖြစ်ပြီး စားသုံးပြည်သူများအနေဖြင့် လူတန်းစားမရွေး ဝယ်ယူစားသုံးနိုင်ပြီး အလွယ်တကူ စားသုံးရသော အစားအစာတစ်မျိုးဖြစ်ခြင်းအပြင် စားသောက်ဆိုင်လုပ်ငန်းရှင်များမှလည်း ဝယ်ယူမှုများခြင်း ကြောင့် အရောင်းအဝယ်သွက်ကြောင်း ကြက်ဥရောင်းဝယ်ရေးလုပ်ငန်းရှင်ထံမှ သိရှိရပါသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်အတွင်းရှိ မြို့နယ်များတွင် မိုးကြက်သွန် (ခေါ်) ဥစိုက် ကြက်သွန်နီနှင့် ဆောင်းကြက်သွန်နီ (ခေါ်) အပင်စိုက်များကို နှစ်စဉ်မပျက် အများအပြား စိုက်ပျိုး ထုတ်လုပ်ပြီး ပြည်တွင်းနှင့် ပြည်ပသို့ တင်ပို့ရောင်းချလျက်ရှိပါသည်။ မကွေးတိုင်းဒေသကြီးကို မြန်မာနိုင်ငံ၏ ဆီအိုးကြီးဟု ပြည်သူများကအသိအမှတ်ပြု ခေါ်ဆိုခဲ့ကြပါသည်။ မကွေးတိုင်းဒေသ ကြီးတွင် ဆီထွက်သီးနှံများဖြစ်သည့် နှမ်း၊ မြေပဲနှင့် နေကြာများကို ရာသီအလိုက် စိုက်ပျိုးလျက်ရှိ သည့်အပြင် ပခုက္ကူခရိုင်တွင်လည်း စားဖိုဆောင်သီးနှံဖြစ်သော ကြက်သွန်နီကို ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူမြို့နယ်များတွင် စိုက်ပျိုးထုတ်လုပ်လျက်ရှိပါသည်။ ကြက်သွန်နီဈေးကွက်တွင် လည်း ဆိပ်ဖြူ ကြက်သွန်၊ ပခုက္ကူကြက်သွန်နှင့် ပေါက်ယောချောင်းကြက်သွန်များမှာ အရည်အသွေးကောင်း၍  နာမည်တစ်လုံးရရှိခဲ့ပါသည်။

      ကြက်သွန်နီဈေးကွက်တွင် ယခင်နှစ်က စိုက်ပျိုးထွက်ရှိခဲ့သည့် အပင်စိုက် ကြက်သွန်နီများ မှာ ကြက်သွန်ဒိုင်ပြတ်ဈေးအနေဖြင့် (၁) ပိဿာ ကျပ်(၁၁၀၀)မှ ကျပ်(၄၀၀)ဖြင့်သာ အရောင်း အဝယ်ဖြစ်လျက်ရှိပါသည်။ ယခုလက်ရှိဈေးကွက်အတွင်း အရောင်းအဝယ်ဖြစ်နေသည့် ကြက်သွန်နီ များမှာ ဒီဇင်ဘာ၊ ဇန်နဝါရီလများတွင် အညှောင့်များထွက်လာ၍ သက်တမ်းကုန်ဆုံးမည်ဖြစ်သည့် အတွက် ကြက်သွန်နီစိုက်တောင်သူများအနေဖြင့် ဈေးကောင်းကိုမျှော်လင့်၍ မိုးစိုက် (ခေါ်) ဥစိုက် ကြက်သွန်နီများကို ပခုက္ကူ၊ရေစကြို၊ဆိပ်ဖြူမြို့များတွင် ဧရာဝတီမြစ်နှင့် ချင်းတွင်းမြစ်ရေဝင်ရောက် ရာကျေးရွာများတွင် မြစ်ရေကျချိန် စက်တင်ဘာလ၊ အောက်တိုဘာလများတွင် စိုက်ပျိုးလျှက်ရှိပါ သည်။ ယခုနှစ် (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ ထွန်ယက်စိုက်ပျိုးကုန်ကျစရိတ် ကျပ်(၂၅) သိန်းခန့်ကုန်ကျပြီး ခန့်မှန်းအထွက်အနေဖြင့် ပိဿာ (၃၀၀၀)ခန့် ထွက်လျှင် ယခု လက်ရှိ ဈေးအတိုင်း ရောင်းချပါက အကျိုးအမြတ်မရရှိသော်လည်း အရှုံးမရှိကြောင်း၊ အကယ်၍ ကြက်သွန်နီ ပေါ်ချိန် ဒီဇင်ဘာ၊ ဇန်နဝါရီလများတွင် ဈေးနှုန်း (၁) ပိဿာကို ကျပ်(၂၀၀၀)ခန့် ရောင်းချရလျှင် ကြက်သွန်စိုက်တောင်သူများ အကျိုးအမြတ်များစွာရရှိနိုင်မည်ဖြစ်ကြောင်း ကြက်သွန်နီစိုက် တောင်သူတစ်ဦး၏ ပြောကြားချက်အရ သိရှိရပါသည်။

DOCA(မကွေး)

         မကွေးတိုင်းဒေသကြီး၊ သရက်ခရိုင်၊ သရက်မြို့နယ်ရှိ ထီးရိုး၊ ရွှေပန်းကိုင်းကျေးရွာနှင့် မင်းတုန်းမြို့နယ်ရှိ ယော၊ သမ္ဗူလ၊ မြို့ဟောင်း၊ အလယ်ချောင်းကျေးရွာများမှ ထွက်ရှိသည့် ဖီးကြမ်း ငှက်ပျောနှင့် ရခိုင်ငှက်ပျောသီးများမှာ သရက်မြို့ပေါ်ရှိ ငှက်ပျောသီးဆိုင်များသို့ အများဆုံးဝင် ရောက်လျက်ရှိကြောင်း သိရသည်။

     ၂၀၂၅ခုနှစ်၊ အောက်တိုဘာလ(စတုတ္ထပတ်)တွင် ငှက်ပျောသီး တစ်ဖီးဈေးနှုန်းအနေဖြင့် ဖီးကြမ်း ကျပ်(၃၀၀၀-၃၅၀၀)၊ ရခိုင်ငှက်ပျောသီး ကျပ်(၁၃၀၀-၁၅၀၀)ဖြင့် ရောင်းချကြောင်း၊ ယခင် (တတိယပတ်)နှင့် နှိုင်းယှဉ်ပါက ပြောင်းလဲမှုမရှိဘဲ ပုံမှန်အရောင်းအဝယ်ဖြစ်လျက်ရှိကြောင်း ငှက် ပျောသီးရောင်းချသည့် ဈေးသည်များထံမှ သိရှိရပါသည်။

DOCA(မကွေး)