ပြည်ပကုန်သွယ်မှုသတင်းများ

        ဗီယက်နမ်နိုင်ငံဟနွိုင်းမြို့၏ စိုက်ပျိုးရေးနှင့် သစ်တောထွက်ကုန် ပို့ကုန်တန်ဖိုးသည် ၂၀၂၅ ခုနှစ်တွင် အမေရိကန်ဒေါ်လာ ၂ ဘီလီယံ ကျော်အထိ ရောက်ရှိရန်ခန့်မှန်းရပြီး၊ တည်ငြိမ် သောတိုးတက်မှုကို ဆက်လက်ထိန်းသိမ်းနိုင်ကာ နိုင်ငံအဆင့် စိုက်ပျိုးရေး ထောက်ပံ့မှုကွင်းဆက်အတွင်း မြို့တော်၏ အရေးပါသော အခန်းကဏ္ဍကို ထပ်မံပြသနိုင်ခဲ့ကြောင်း ဟနွိုင်း စိုက်ပျိုးရေးနှင့် ပတ်ဝန်းကျင်ဦးစီးဌာနထံမှအဆိုအရ သိရသည်။ စုစုပေါင်းပို့ကုန်တန်ဖိုးအနက် အဓိကစိုက်ပျိုးရေးနှင့် အစားအသောက်ထုတ်ကုန်များတင်ပို့မှုတန်ဖိုးသည် အမေရိကန်ဒေါ်လာ ၁.၄ ဘီလီယံခန့် ရှိပြီး ကဏ္ဍအတွင်း ပို့ကုန်ဝင်ငွေ အချိုးအစားအများဆုံးရရှိခဲ့ကြောင်း သိရပါသည်။ ဤရလဒ်မှာ နိုင်ငံခြားဈေးကွက်များကိုချဲ့ထွင်ခြင်း၊ အရည်အသွေးစံချိန်စံညွှန်းများ တိုးတက်ကောင်းမွန်စေရန် ဆောင်ရွက်ခြင်း၊ ထုတ်ကုန်ခြေရာခံစနစ်များကို ခိုင်မာစေရန်နှင့် တင်းကျပ်လာသောသွင်းကုန် စည်းမျဉ်းများကို ကိုက်ညီစေရန်အတွက် အပြည်ပြည်ဆိုင်ရာ စံနှုန်းအတိုင်း ထုတ်လုပ်မှုမော်ဒယ်များကို မြှင့်တင်ဆောင်ရွက်ခဲ့သည့် ဟနွိုင်း၏ ကြိုးပမ်းအားထုတ်မှုများ ထိရောက်မှုရှိကြောင်းကို ပြသနေကြောင်း သိရပါသည်။ ပို့ကုန်တိုးတက်မှုနှင့်အတူ ဟနွိုင်း၏ စိုက်ပျိုးရေး၊ သစ်တောနှင့် ငါးလုပ်ငန်းကဏ္ဍလည်း ကောင်းမွန်သော ရလဒ်များကို ဆက်လက်ရရှိနေကြောင်း သိရပါသည်။ ၂၀၂၅ ခုနှစ်တွင် ကဏ္ဍ၏ ဒေသဆိုင်ရာ စုစုပေါင်းကုန်ထုတ်လုပ်မှုတန်ဖိုး (GRDP) သည် ယခင်နှစ် နှင့်နှိုင်းယှဉ်ပါက ၃.၅၅ ရာခိုင်နှုန်း တိုးတက်မည်ဟု ခန့်မှန်းထားကြောင်း သိရပါသည်။ လက်ရှိစျေးနှုန်းများအရ ၂၀၂၅ ခုနှစ်တွင် စိုက်ပျိုးရေး၊ သစ်တောနှင့် ငါးလုပ်ငန်းကဏ္ဍ၏ စုစုပေါင်း ကုန် ထုတ်လုပ်မှုတန်ဖိုးမှာ အမေရိကန်ဒေါ်လာ ၇၀.၄ ထရီလီယံနီးပါးရှိမည်ဟု ခန့်မှန်းထားပြီး ၎င်းအနက် စိုက်ပျိုးရေးကဏ္ဍသည် စုစုပေါင်းတန်ဖိုး၏ ၉၁.၀၂ ရာခိုင်နှုန်းကို ကိုယ်စားပြုကြောင်း သိရပါသည်။ ထိုအောင်မြင်မှုများသည် ဟနွိုင်းအနေဖြင့် အနာဂတ်နှစ်များတွင် စိုက်ပျိုးရေးကဏ္ဍ ကိုခေတ်မီပြီး တည်တံ့ခိုင်မြဲကာ တန်ဖိုးမြှင့်ထုတ်လုပ်မှုပုံစံသို့ ပြန်လည်ဖွဲ့စည်းတည်ဆောက်နိုင်ရန်၊ ယှဉ်ပြိုင်နိုင်စွမ်းကိုမြှင့်တင်ရန်နှင့် ပို့ကုန်ဈေးကွက်များကို ထပ်မံချဲ့ထွင်ရန်အတွက် ခိုင်မာသောအခြေခံအုတ်မြစ်တစ်ရပ်အဖြစ် ပံ့ပိုးပေးနိုင်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

      ဗီယက်နမ်နိုင်ငံ၏ စားသုံးသူဈေးနှုန်းညွှန်းကိန်း (CPI) သည် ဇန်နဝါရီလတွင် ယခင်နှစ်ထက် ၂.၅၃ ရာခိုင်နှုန်း မြင့်တက်လာကြောင်း အမျိုးသားစာရင်းအင်းရုံးက ဖေဖော်ဝါရီလ ၆ ရက်နေ့တွင် ပြောကြားခဲ့သည်။

         CPI တွက်ချက်မှုစာရင်းရှိ အမျိုးအစား ၁၁ မျိုးအနက် ၉မျိုးတွင် ဈေးနှုန်းမြင့်တက်မှုများ ဖြစ်ပေါ်နေသည်။ အိမ်ရာ၊ လျှပ်စစ်၊ ရေ၊ လောင်စာဆီနှင့် ဆောက်လုပ်ရေးပစ္စည်းများအတွက် ကုန်ကျစရိတ်များ မြင့်တက်လာခြင်းအပြင် အဖျော်ယမကာများ၊ ဆေးရွက်ကြီး၊ အိမ်သုံးပစ္စည်း များ၊ အထည်အလိပ်နှင့် သားရေထုတ်ကုန်များ၏ ဈေးနှုန်းများ မြင့်တက်လာခြင်းကြောင့် အဓိကအားဖြင့် မြင့်တက်လာခဲ့သည်။

         အစားအသောက်ဝန်ဆောင်မှုများသည်လည်း CPI တိုးတက်မှုအတွက် အထောက်အကူ ဖြစ်စေခဲ့သည်။ ဇန်နဝါရီလတွင် ဗီယက်နမ်၏ ပျမ်းမျှ အဓိကငွေကြေးဖောင်းပွမှုသည် ယခင်နှစ် ထက် ၃.၁၉ ရာခိုင်နှုန်း မြင့်တက်လာခဲ့ကြောင်း အမျိုးသားစာရင်းအင်းရုံးက ပြောကြားခဲ့သည် ။

Source : Xinhua                                                                                 

DOCA (ရန်ကုန်)

         TikTok သည် ထိုင်းနိုင်ငံတွင် ဘတ် ၂၇၀ ဘီလီယံတန်ဖိုးရှိ ရေရှည်ရင်းနှီးမြှုပ်နှံမှု အစီအစဉ်အား အတည်ပြုခဲ့ကြောင်း ယာယီဘဏ္ဍာရေးဝန်ကြီး Ekniti Nitithanprapas က ပြောကြားခဲ့ပါသည်။

         ဇန်နဝါရီ ၁၉ ရက်မှ ၂၂ ရက်အထိ ဆွစ်ဇာလန်နိုင်ငံတွင် ကျင်းပသော ကမ္ဘာ့စီးပွားရေးဖိုရမ် ထိပ်သီးအစည်းအဝေးသို့ ထိုင်းကိုယ်စားလှယ်အဖွဲ့ကို ဦးဆောင်ခဲ့သော မစ္စတာ Mr Ekniti က ၎င်းနှင့် ရင်းနှီးမြှုပ်နှံမှုဘုတ်အဖွဲ့ (BoI) ၏ အထွေထွေအတွင်းရေးမှူးချုပ်တို့သည် TikTok ၏ ထိုင်းနိုင်ငံဆိုင်ရာ အများပြည်သူမူဝါဒဌာန အကြီးအကဲ Chanida Klaiphan နှင့် ကုမ္ပဏီ၏ စီးပွားရေးလုပ်ငန်းများ၊ အထူးသဖြင့် ၎င်း၏ ဒစ်ဂျစ်တယ်အခြေခံအဆောက်အအုံ ရင်းနှီးမြှုပ်နှံမှု အစီအစဉ်၊ ဒစ်ဂျစ်တယ်စီးပွားရေးနှင့် ထိုင်းစွန့်ဦးတီထွင်သူများကို ပံ့ပိုးရာတွင် ပလက်ဖောင်း၏ အခန်းကဏ္ဍ တိုးချဲ့မှုတို့ကို နောက်ဆက်တွဲလုပ်ဆောင်ရန် ဆွေးနွေးခဲ့ကြသည်ဟု ပြောကြားခဲ့သည်။

         ကုမ္ပဏီသည် စုစုပေါင်း ဘတ် ၂၇၀ ဘီလီယံကျော်တန်ဖိုးရှိ ၎င်း၏ ရေရှည်ရင်းနှီးမြှုပ်နှံမှု အစီအစဉ်ကို ပြန်လည်အတည်ပြုခဲ့ပြီး အသေးစားနှင့် အလတ်စားစီးပွားရေးလုပ်ငန်းများ (SMEs) ၏ စွမ်းရည်များကို မြှင့်တင်ရန်၊ ဈေးကွက်များသို့ ပိုမိုကောင်းမွန်စွာ ဝင်ရောက်နိုင်စေရန်နှင့် ဝင်ငွေပိုမိုရှာဖွေနိုင်စေရန် ပလက်ဖောင်းကို အသုံးချနိုင်မည့်နည်းလမ်းများကို ဆွေးနွေးခဲ့သည်။

          TikTok သည် တရုတ်နိုင်ငံ ByteDance မှ တီထွင်ထားသော ကမ္ဘာလုံးဆိုင်ရာ ဗီဒီယိုတို များနှင့် လူမှုကုန်သွယ်ရေးပလက်ဖောင်းတစ်ခုဖြစ်သည်။ အရှေ့တောင်အာရှတွင် အသုံး ပြုသူ ၃၆၈ သန်းနှင့် စီးပွားရေးလုပ်ငန်းသုံး အသုံးပြုသူ ၁၅ သန်းကျော် အပါအဝင် ကမ္ဘာတစ်ဝှမ်းတွင် အသုံးပြုသူ ၂ ဘီလီယံကျော်ရှိသည်။ Tik tok သည် ၂၀၂၁ ခုနှစ်တွင် ထိုင်းနိုင်ငံဆိုင်ရာ လုပ်ငန်းအဖွဲ့အစည်းဖြစ်သည့် Tik Tok Technologies ကုမ္ပဏီကို ဒေသဆိုင်ရာ လည်ပတ်ရေးရုံးအဖြစ် တည်ထောင်ခဲ့ပြီး နိုင်ငံတကာ စီးပွားရေး ဗဟိုလုပ်ငန်းများအတွက် ရင်းနှီးမြှုပ်နှံမှု‌ ထောက်ပံ့မှုသည် Bol မှ ရရှိခဲ့ခြင်းဖြစ်သည်။

        ၂၀၂၅ ခုနှစ်တွင် စုစုပေါင်းရင်းနှီးမြှုပ်နှံမှုတန်ဖိုး ဘတ် ၁၂၇ ဘီလီယံရှိခဲ့သည်။ အဓိက အားဖြင့် စင်ကာပူရှိ TikTok Pte Ltd သို့ server-based data storage ဝန်ဆောင်မှုပေးရန် data-hosting လုပ်ငန်းအတွက် BoI ၏ ခွင့်ပြုချက်ကို ရရှိခဲ့သည်။

          အစည်းအဝေးအတွင်း Mr Ekniti နှင့် BoI အကြီးအကဲတို့သည် စားသုံးသူကာကွယ်ရေး မြှင့်တင်ရန်၊ ငွေကြေးဆိုင်ရာ အသိပညာပေးမှုကို အားကောင်းစေရန်နှင့် အွန်လိုင်းလိမ်လည်မှု များကို တိုက်ဖျက်ရန် မူဝါဒပူးပေါင်းဆောင်ရွက်မှုနှင့်ပတ်သက်၍ TikTok နှင့် အမြင်ချင်းဖလှယ်ခဲ့ကြသည်။ TikTok သည် သက်ဆိုင်ရာ အကျိုးတူပါဝင်သူများနှင့် လက်တွဲလုပ်ဆောင်နေပြီဖြစ်ပြီး အထူးသဖြင့် ထိုင်းနိုင်ငံက အိမ်ရှင်အဖြစ် လက်ခံကျင်းပရန် စီစဉ်ထားသည့် IMF-ကမ္ဘာ့ဘဏ် နှစ်ပတ်လည်အစည်းအဝေးများ မတိုင်မီ နောက်ထပ်မိတ်ဖက်များနှင့် ပူးပေါင်းဆောင်ရွက်မှုကို တိုးချဲ့ရန် အသင့်ရှိနေကြောင်း TikTok က ပြောကြားခဲ့သည်။

           TikTok သည် ထိုင်းနိုင်ငံတွင် ရင်းနှီးမြှုပ်နှံမှုကို ပြန်လည်အတည်ပြုခြင်းသည် ဒစ်ဂျစ် တယ်စီးပွားရေး၏ အလားအလာအပေါ် ကမ္ဘာလုံးဆိုင်ရာ ရင်းနှီးမြှုပ်နှံသူများ၏ ယုံကြည်မှု ကို ထင်ဟပ်စေကြောင်း Mr Ekniti က ပြောကြားခဲ့ကြောင်း သိရှိရပါသည်။

Source : Bangkok Post                                                                      

DOCA (ရန်ကုန်)

            ဗီယက်နမ်နိုင်ငံ၏ စိုက်ပျိုးရေး၊ သစ်တောနှင့် ရေထွက်ပစ္စည်းများကို တရုတ်နိုင်ငံသို့ တင်ပို့မှုသည် ဇန်နဝါရီလအတွင်း ယခင်နှစ် အလားတူကာလနှင့် နှိုင်းယှဉ်ပါက ၆၆ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၁.၅ ဘီလီယံအထိ ရှိလာခဲ့သည်။ စိုက်ပျိုးရေးနှင့် ပတ်ဝန်း ကျင်ဝန်ကြီးဌာန၏ ထုတ်ပြန်ချက်အရ တရုတ်နိုင်ငံသည် ဗီယက်နမ်၏ အကြီးဆုံး စျေးကွက်ဖြစ်ခဲ့ပြီး၊ ကဏ္ဍတစ်ခုလုံး၏ စုစုပေါင်းတင်ပို့မှုတန်ဖိုး အမေရိကန်ဒေါ်လာ ၆.၅ ဘီလီယံ (ယခင်ထက် ၂၉.၅ ရာခိုင်နှုန်း မြင့်တက်လာခဲ့သည့် ပမာဏ) ၏ ၂၃ ရာခိုင်နှုန်းကို တရုတ်နိုင်ငံက ဝယ် ယူခဲ့ခြင်း ဖြစ်သည်။ ဒူးရင်းသီး၊ ငှက်ပျောသီး၊ နဂါးမောက်သီးနှင့် ပိန္နဲသီးတို့သည် တရုတ်နိုင်ငံသို့ အများဆုံး တင်ပို့ခဲ့သည့် အဓိကထွက်ကုန်များ ဖြစ်ကြပြီး၊ ၎င်းတို့၏ စုစုပေါင်း တင်ပို့မှုတန်ဖိုးမှာ အမေရိကန်ဒေါ်လာ ၄၈၀ သန်း ရှိခဲ့သည်။ တရုတ်နိုင်ငံသည် ဗီယက်နမ်မှ တင်ပို့သော ပီလောပီနံ၏ (၉၂.၆ ရာခိုင်နှုန်း)၊ ရော်ဘာ၏ (၇၅ ရာခိုင်နှုန်း) နှင့် သီဟိုဠ်စေ့၏ (၅၀ ရာခိုင်နှုန်း) တို့ကို အများဆုံး ဝယ်ယူခဲ့သည်။ ရေထွက်ကုန် တင်ပို့မှုတွင်မူ တရုတ်နိုင်ငံ သည် အမေရိကန်နှင့် ဂျပန်နိုင်ငံတို့၏ နောက်တွင် တတိယမြောက် အများဆုံးဝယ်ယူသည့် နိုင်င ဖြစ်လာခဲ့သည်။ သစ်သီးဝလံနှင့် ဟင်းသီးဟင်းရွက် တင်ပို့မှုသည် ထွက်ကုန်အားလုံးထဲတွင် တိုးတက်မှုအမြင့်ဆုံးဖြစ်ခဲ့ပြီး၊ အမေရိကန်နှင့် မလေးရှားနိုင်ငံတို့သို့ တင်ပို့မှုအား ကောင်းခဲ့ခြင်းကြောင့် ပမာဏမှာ နှစ်ဆတိုးကာ ဒေါ်လာ ၇၅၀ သန်းအထိ ရှိလာခဲ့ကြောင်း ဝန်ကြီးဌာနက ဆိုသည်။ ဒုတိယအဆင့် တွင် သီဟိုဠ်စေ့ တင်ပို့မှုမှာ ၇၀ ရာခိုင်နှုန်း တိုးတက်ခဲ့ပြီး ဒေါ်လာ ၄၃၄ သန်း ရှိခဲ့ကာ၊ ၎င်း နောက်တွင် ၅၃ ရာခိုင်နှုန်း တိုးတက်ခဲ့သည့် ငရုတ်ကောင်း တင်ပို့မှုက ဒေါ်လာ ၁၃၃ သန်းဖြင့် အသီးသီး ရှိကျောင်း သိရှိရပါသည်။

DOCA(ရန်ကုန်)

         ဖိလစ်ပိုင်နိုင်ငံ၏ ငါးလုပ်ငန်းထွက်ကုန် စုစုပေါင်း၏ ထက်ဝက်ကျော်ကို ကိုယ်စားပြုနေသည့် ရေသတ္တဝါမွေးမြူရေးကဏ္ဍသည် ငါးသားပေါက်ထုတ်လုပ်မှု တိုးတက်လာခြင်းကြောင့် ပိုမိုအားကောင်းလာမည်ဖြစ်ကြောင်း ငါးလုပ်ငန်းနှင့် ရေသယံဇာတဦးစီးဌာန (BFAR) ၏ ပြောကြားချက်အရ သိရပါသည်။

           BFAR မှ ထုတ်ပြန်သော ထုတ်ပြန်ချက်များအရ ဖိလစ်ပိုင်နိုင်ငံ၏ ရေသတ္တဝါမွေးမြူရေး နည်းပညာစင်တာများမှ ငါးမှုန်နှင့် ငါးသန် (Fry and Fingerlings) ထုတ်လုပ်မှုမှာ ၂၀၂၅ ခုနှစ် တွင် ငါးအကောင်ရေ ၃၃၅.၃ သန်းခန့်ရှိခဲ့ပြီး ၎င်းသည် ၂၀၂၄ခုနှစ်က ထွက်ရှိခဲ့သည့် ၃၂၅.၉ သန်း ထက် ၃ ရာခိုင်နှုန်းနီးပါး တိုးတက်လာခြင်းဖြစ်ကြောင်း သိရပါသည်။ ယခုကဲ့သို့ ထုတ်လုပ်မှု တိးတက်လာခြင်းမှာ ရေရှည်တည်တံ့သော မွေးမြူရေးနည်းပညာများကို အထိရောက်ဆုံး အသုံးချခြင်းနှင့် အမျိုးသားမျိုးငါးဖွံ့ဖြိုးရေး အစီအစဉ်အောက်တွင် မျိုးငါး (Broodstocks) များကို စနစ်တကျ ထိန်းသိမ်းစောင့်ရှောက်နိုင်ခြင်းတို့ကြောင့်ဖြစ်သည်ဟု BFAR ၏ သုံးသပ်ချက်အရ သိရပါသည်။

       အဆိုပါလုပ်ဆောင်ချက်သည် တစ်နိုင်ငံလုံးအတိုင်းအတာဖြင့် အရည်အသွေးမြင့် မျိုးငါးသားပေါက်များကို ပိုမိုလွယ်ကူစွာ ရရှိနိုင်စေရန်နှင့် မွေးမြူရေးကဏ္ဍ၏ ထုတ်လုပ်မှုစွမ်းအားကို မြှင့်တင်ပေးနိုင်ရန် ဖြစ်ကြောင်း သိရပါသည်။ အဆိုပါငါးသားပေါက်မွေးမြူထုတ်လုပ်ခြင်း တိုးတက်မှုများကို ရေရှည်ထိန်းသိမ်းထားနိုင်ရန်အတွက် ဒေသအလိုက် အဓိကငါးအမယ်များကို ဦးစားပေးဖော်ထုတ်ရန်နှင့် ကွင်းဆင်းစစ်ဆေးမှုများ ပိုမိုတိုးမြှင့်လုပ်ဆောင်ရန် ဒေသဆိုင်ရာရုံးများနှင့် နည်းပညာစင်တာများကို ညွှန်ကြားထားကြောင်း အရာရှိဖြစ်သူ Salilig က ပြောကြားခဲ့ပါသည်။ ထို့အပြင် ဒေသခံငါးမွေးမြူရေးလုပ်ငန်းများကို ပိုမိုပံ့ပိုးကူညီနိုင်ရန်အတွက် ဥပဒေအရ သတ်မှတ်ထားသော လူထုအခြေပြု သားဖောက်စခန်းများ၏ လုပ်ငန်းလည်ပတ်မှုများကိုလည်း အရှိန်အဟုန်မြှင့် လုပ်ဆောင်သွားမည်ဖြစ်ကြောင်း သိရပါသည်။

          ဖိလစ်ပိုင်စာရင်းအင်းအာဏာပိုင်အဖွဲ့ (PSA) မှ ထုတ်ပြန်သောအချက်အလက်များအရ ၂၀၂၅ ခုနှစ်တွင် ငါးထုတ်လုပ်မှု စုစုပေါင်းမှာ ၂.၅ ရာခိုင်နှုန်းခန့် ကျဆင်းခဲ့ကြောင်း သိရပါသည်။ PSA ၏ဖော်ပြချက်များအရ ဖိလစ်ပိုင်နိုင်ငံ၏ ငါးထုတ်လုပ်မှုသည် ၂၀၂၂ ခုနှစ်မှစတင်၍ ဆက်တိုက် ကျဆင်းမှုများရှိခဲ့ပြီး ၂၀၀၄ ခုနှစ်နောက်ပိုင်းကာလများမှစတင်၍ စုစုပေါင်း ထုတ်လုပ်မှုပမာဏမှာ မက်ထရစ်တန် ၃ သန်းဝန်းကျင်အထိ ပထမဆုံးအကြိမ် ရောက်ရှိသွားခြင်းဖြစ်ကြောင်း သိရပါသည်။

           ၂၀၂၄ ခုနှစ်အတွင်း ဖိလစ်ပိုင်နိုင်ငံရေသတ္တဝါမွေးမြူရေးကဏ္ဍမှ ထွက်ကုန် မက်ထရစ် တန် ၂.၁၈ သန်း ရရှိခဲ့ပြီး ၁.၉ ရာခိုင်နှုန်း ကျဆင်းခဲ့သော်လည်း စုစုပေါင်းဈေးကွက်ဝေစု၏ ၅၅.၁ ရာခိုင်နှုန်းကို ရယူထားနိုင်ဆဲဖြစ်ကြောင်း သိရပါသည်။ စီးပွားဖြစ်ငါးဖမ်းလုပ်ငန်းမှာမူ ၂.၂ ရာခိုင်နှုန်း ကျဆင်းခဲ့ပြီး စုစုပေါင်းထုတ်လုပ်မှု၏ ၂၁.၅ ရာခိုင်နှုန်းရှိခဲ့ကြောင်းသိရပါသည်။ ပင်လယ်ပြင် ဒေသန္တရငါးဖမ်းလုပ်ငန်းမှာ ၆.၇ ရာခိုင်နှုန်းအထိ ကျဆင်းခဲ့သော်လည်း ကုန်းတွင်းပိုင်း ငါးဖမ်းလုပ်ငန်းမှာမူ ၇.၇ ရာခိုင်နှုန်း တိုးတက်လာခဲ့ကြောင်း သိရှိရပါသည်။

Source: Inquirer Net                                                                  

DOCA (ရန်ကုန်)