ယခုဘဏ္ဍာနှစ် ဒုတိယခြောက်လတွင် ပြည်ပသို့ ဆန်နှင့်ဆန်ကွဲ တိုးမြှင့်တင်ပို့ရန် လျာထား
မြန်မာနိုင်ငံဆန်စပါး အသင်းချုပ်သည် ပြည်ပနိုင်ငံများသို့ ဆန်နှင့်ဆန်ကွဲများ တိုးမြှင့်တင်ပို့ နိုင်ရန် ဆောင်ရွက် လျက်ရှိရာ ယခုဘဏ္ဍာနှစ် ဒုတိယခြောက်လတွင် ပြည်ပသို့ ဆန်နှင့်ဆန်ကွဲ တန်ချိန် ၁၈သိန်း တင်ပို့ရန်လျာထားကြောင်း မြန်မာနိုင်ငံ ဆန်စပါးအသင်းချုပ်မှ သိရသည်။ ယခု ဘဏ္ဍာနှစ် ပထမခြောက်လအတွင်း ဆန်နှင့်ဆန်ကွဲတန်ချိန် ၁၂ သိန်း တင်ပို့ရန် လျာထားသည့်အနက် စက်တင်ဘာလ ၃၀ ရက်အထိ လျာထားချက်အတိုင်း ပြည့်မီစွာ တင်ပို့ နိုင်ခဲ့ကာ ပို့ကုန်ဝင်ငွေ အမေရိကန်ဒေါ်လာ ၄၀၈ သန်းခန့်ရရှိခဲ့သည်။
၂၀၂၅ ခုနှစ် အောက်တိုဘာလမှ ၂၀၂၆ ခုနှစ် မတ်လကုန်အထိ ဒုတိယ ခြောက်လတာ ကာလအတွင်း တစ်လ လျှင် ဆန်နှင့်ဆန်ကွဲတန်ချိန် သုံးသိန်းနှုန်း ဖြင့် စုစုပေါင်း တန်ချိန် ၁၈ သိန်း တင်ပို့ရန်လျာထားကြောင်း သိရသည်။ ယခုဘဏ္ဍာနှစ်တွင် ဆန်နှင့်ဆန်ကွဲတန်ချိန် သုံးသန်း တင်ပို့ရန် မြန်မာနိုင်ငံဆန်စပါးအသင်းချုပ်နှင့် ပို့ကုန်ကုမ္ပဏီများမှ ကြိုးပမ်းဆောင်ရွက်လျက်ရှိ ပြီး ဒုတိယခြောက်လတွင် တစ်လလျှင် တန်ချိန် သုံးသိန်းဝန်းကျင်အထိ တိုးမြှင့်တင်ပို့မည် ဖြစ်သည်။
၂ဝ၂၄-၂၀၂၅ ဘဏ္ဍာနှစ်က ဆန်နှင့် ဆန်ကွဲတန်ချိန် ၂ ဒသမ ၄၈ သန်း တင်ပို့နိုင်ခဲ့ ကြောင်း၊ ပြည်တွင်းဆန်၊ စပါး ဈေးကွက်တွင် တချို့ဒေသများ၌ ကောက်စောစပါးများ စတင် ပေါ်ထွက်နေပြီဖြစ်၍ စပါးစိုက်တောင်သူများအတွက် သင့်တင့်မျှတသော ဈေးနှုန်းများဖြင့် ဆန်၊စပါး ဝယ်ယူရေးများကို ဆောင်ရွက်ရန်ညီနောင် အသင်းအဖွဲ့များ၊ ကုန်စည်ဒိုင်များ၊ ကုမ္ပဏီ များ၊ ဆန်စက်များနှင့်ပူးပေါင်းဆောင်ရွက်လျက်ရှိကြောင်း သိရသည်။ မြန်မာနိုင်ငံဆန်စပါးအသင်းချုပ် အနေဖြင့် ဈေးကွက်ဝယ်လိုအား မြှင့်တင်နိုင်မည့် နည်းလမ်းများကိုလည်း ဦးစားပေးဆောင်ရွက် လျက်ရှိကြောင်း သိရသည်။
DOCA(ဧရာဝတီ)
