ပြည်ပကုန်သွယ်မှုသတင်းများ

          ဗီယက်နမ်-ကမ္ဘောဒီးယားစီးပွားရေးဖိုရမ် ၂၀၂၅ ကို ဟိုချီမင်းမြို့တော်တွင် အောက်တိုဘာလ ၁၁ ရက်နေ့က ကျင်းပပြုလုပ်ခဲ့ပြီး နှစ်နိုင်ငံစလုံးမှစီးပွားရေးလုပ်ငန်းများအကြား စီးပွားရေးချိတ်ဆက်မှုများအရှိန်မြှင့်တင်ရန်နှင့် ရင်းနှီးမြှုပ်နှံမှုအခွင့်အလမ်းများတိုးချဲ့ရန် ရည်ရွယ်ကြောင်း သိရပါသည်။ အခမ်းအနားကို ဗီယက်နမ်-ကမ္ဘောဒီးယားချစ်ကြည်ရေးအသင်းနှင့် ဗီယက်နမ်နှင့် ကမ္ဘောဒီးယားအေဂျင်စီများက ပူးတွဲကျင်းပခြင်းဖြစ်ကြောင်း သိရပါသည်။ အခမ်းအနားတွင်  အမျိုးသားညီလာခံ ဒုတိယဥက္ကဌနှင့် ဗီယက်နမ်-ကမ္ဘောဒီးယားချစ်ကြည်ရေးအသင်း၏ ဥက္ကဌ ဖြစ်သူ Nguyen Thi Thanh က နှစ်နိုင်ငံဆက်ဆံရေးသည် လတ်တလောနှစ်များအတွင်း ဘက်ပေါင်းစုံအားကောင်းစွာ ဆက်လက်တိုးတက်ခဲ့ပြီး အထူးသဖြင့်စီးပွားရေး၊ကုန်သွယ်ရေးနှင့် ရင်းနှီးမြှုပ်နှံမှုတို့ဖွံ့ဖြိုးတိုးတက်ခဲ့ကြောင်း၊ သို့သော် နှစ်နိုင်ငံ၏အလားအလာနှင့်နှိုင်းယှဉ်ပါက အပြန်အလှန်ပူးပေါင်းဆောင်ရွက်မှုသည် သင့်ရုံမျှသာရှိသေးပြီး အထူးသဖြင့် အစိမ်းရောင်စီးပွား ရေး၊ ပြည့်ဖြိုးမြဲစွမ်းအင်၊ နည်းပညာမြင့်စိုက်ပျိုးမွေးမြူရေး၊ ခရီးသွားကဏ္ဍနှင့် ကုန်သွယ်ရေးတို့တွင်ဖြစ်ကြောင်းနှင့် ဗီယက်နမ်သည် ကမ္ဘောဒီးယားစီးပွားရေးလုပ်ငန်းများ ရင်းနှီးမြှုပ်နှံရန်နှင့် ထိရောက်စွာလည်ပတ်နိုင်ရန် သင့်လျော်ကောင်းမွန်သောအခြေအနေများကို ဖန်တီးပေးထားပြီး ကမ္ဘောဒီးယားအစိုးရသည်လည်း အပြန်အလှန်အကျိုးရှိသောဖွံ့ဖြိုးတိုးတက်ရေးအတွက် ကမ္ဘောဒီးယားတွင် ရင်းနှီးမြှုပ်နှံနေသည့် ဗီယက်နမ်လုပ်ငန်းများအား ဆက်လက်ပံ့ပိုးပေးရန် မျှော်လင့်ကြောင်း ပြောကြားခဲ့ပါသည်။ ဖိုရမ်သည် နှစ်နိုင်ငံစလုံးမှ စီးပွားရေးလုပ်ငန်းများအတွက် တွေ့ဆုံဆွေးနွေးရန်၊ အတွေ့အကြုံဝေမျှရန်နှင့် ပူးပေါင်းဆောင်ရွက်မှုအခွင့်အလမ်းသစ်များ ရှာဖွေရန် စင်မြင့်တစ်ခုဖြစ်ခဲ့ကြောင်း သိရပါသည်။ ကမ္ဘောဒီးယားနိုင်ငံကုန်သည်များအသင်း၏ ဒုတိယ ဥက္ကဌ Neak Oknha Lav Kang က ဖိုရမ်သည်လုပ်ငန်းရှင်များနှင့် ရင်းနှီးမြှုပ်နှံသူများက ကုန်စည်နှင့် ဝန်ဆောင်မှုများ ကုန်သွယ်မှုမြှင့်တင်ရန်နှင့် အလားအလာရှိသော ပူးပေါင်းဆောင်ရွက်မှုအတွက် အထူးအခွင့်အလမ်းဖြစ်ကြောင်းနှင့် ၂၀၂၅ ခုနှစ်တွင် အပြန်အလှန်ကုန်သွယ်ရေးကို အမေရိကန်ဒေါ်လာ ၂၀ ဘီလီယံထိမြှင့်တင်လိုကြောင်း ပြောကြားခဲ့ပါသည်။ ဖိုရမ်တွင် ကိုယ်စားလှယ်များသည် နှစ်နိုင်ငံကြားလတ်တလော ရင်းနှီးမြှုပ်နှံမှုနှင့်ကုန်သွယ်ရေးပူးပေါင်း ဆောင်ရွက်မှု အထူးသဖြင့် စိုက်ပျိုးမွေးမြူရေးထုတ်ကုန်တင်ပို့မှု၊ အစားအစာပြုပြင်ထုတ်လုပ်မှု၊ ခရီးသွာကဏ္ဍ၊ အခြေခံအဆောက်အအုံနှင့် နည်းပညာတို့နှင့် ပတ်သတ်၍ ဆွေးနွေးခဲ့ကြကြောင်း သိရပါသည်။ ဖိုရမ်တွင် ဗီယက်နမ်၏ Visan ကုမ္ပဏီနှင့် ကမ္ဘောဒီးယား၏ Degrand Group တို့ကြား ကုန်ထုတ်လုပ်မှုနှင့် ဖြန့်ဖြူးမှုတို့တွင် ပူးပေါင်းဆောင်ရွက်ရန်အတွက် MoU လက်မှတ်ရေးထိုးခဲ့ကြောင်း သိရပါသည်။ ၂၀၂၄ ခုနှစ်တွင် ၂ နိုင်ငံအပြန်အလှန်ကုန်သွယ်မှုတန်ဖိုးမှာ အမေရိကန် ဒေါ်လာ ၁၀.၁ ဘီလီယံရှိခဲ့ပြီး ၂၀၂၃ ခုနှစ်နှင့်နှိုင်းယှဉ်ပါက ၁၇.၅ ရာခိုင်နှုန်းမြင့်တက်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          လွန်ခဲ့သည့်နှစ်ထက်တန်ဖိုး ၄၀ ရာခိုင်နှုန်းကျဆင်းသော်လည်း ယခုနှစ်တွင် ထိုင်းနိုင်ငံ၏ ဆန်တင်ပို့မှုသည် ရည်မှန်းချက်ဖြစ်သည့် တန်ချိန် ၇.၅ သန်း ပြည့်မီနိုင်သည့်လမ်းကြောင်းပေါ်တွင် ရှိနေကြောင်း ထိုင်းနိုင်ငံဆန်တင်ပို့သူများအသင်းက ပြောကြားခဲ့ပါသည်။ အသင်း၏ဂုဏ်ထူး ဆောင်ဥက္ကဌဖြစ်သူ Chookiat Ophaswongse က ယခုနှစ်၏ ပထမ ၉ လတွင် နိုင်ငံသည် ဆန်တန်ချိန် ၅.၉ သန်းတင်ပို့ခဲ့ပြီး နှစ်စဉ်ပို့ကုန်ရည်မှန်းချက်ပြည့်မီရန် ယခုနှစ်၏ စတုတ္ထ ၃ လ ပတ်ကာလတွင် တစ်လလျှင်ပျမ်းမျှ တန်ချိန် ၅၀၀၀၀၀ ကျော်တင်ပို့ရန်လိုအပ်ကြောင်း ပြောကြား ခဲ့ပါသည်။ အကယ်၍ထိုင်းသည် ထိုကာလအတွင်း တစ်လလျှင်တန်ချိန် ၆၀၀၀၀၀ တင်ပို့နိုင်ပါက စုစုပေါင်းတင်ပို့မှုမှာ တန်ချိန် ၈ သန်းအထိရောက်ရှိနိုင်ကြောင်း သိရပါသည်။ သို့သော် ရောင်းလို အားများပြားသော်လည်း ဝယ်လိုအားကျဆင်းမှုကြောင့် ယခုနှစ်ကမ္ဘာ့ဆန်ဈေးကွက်သည် ၂၀၂၄ ခုနှစ်ကထက်ဆိုးရွားနိုင်ကြောင်း သိရပါသည်။ ဒေသတွင်းအဓိကဆန်တင်သွင်းသူများဖြစ်သည့် အင်ဒိုနီးရှားနှင့် ဖိလစ်ပိုင်တို့သည် ပြည်တွင်းထုတ်လုပ်မှုလုံလောက်မှုနှင့် ပြည်တွင်းဆန်ဈေးကွက် များတည်ငြိမ်ရန်လိုအပ်သောကြောင့် ၎င်းတို့၏တင်သွင်းမှုများကို ရပ်တန့်ထားကြောင်း သိရပါသည်။ ဖိလစ်ပိုင်သည် ၂၀၂၆ ခုနှစ် ဇန်နဝါရီလတွင် ဆန်တန်ချိန် ၃၀၀၀၀၀ တင်သွင်းရန်စီစဉ်ခဲ့သော်လည်း ယခုအခါဖေဖော်ဝါရီလမှ ဧပြီလထိ ၃ လတင်သွင်းမှုပိတ်ပင်ခဲ့ကြောင်း သိရပါသည်။ ထိုအချက်များသည် ကမ္ဘာ့ဈေးကွက်တွင် ဆန်ဈေးနှုန်းများကျဆင်းမှုကိုဖြစ်ပေါ်စေခဲ့ကြောင်း သိရပါသည်။ ထိုင်းနိုင်ငံ၏ ၅% ဆန်ဖြူသည် တစ်တန်လျှင် အမေရိကန်ဒေါ်လာ ၃၄၀၊ မြန်မာဆန်က အမေရိကန်ဒေါ်လာ ၃၁၀၊ ပါကစ္စတန်ဆန်က အမေရိကန်ဒေါ်လာ ၃၃၀၊ အိန္ဒိယဆန်က အမေရိ ကန်ဒေါ်လာ ၃၃၀ နှင့် ဗီယက်နမ်ဆန်က အမေရိကန်ဒေါ်လာ ၃၆၀ ဈေးနှုန်းရှိကြောင်း သိရပါသည်။ ယခုနှစ်၏ ပထမ ၉ လတွင် ဗီယက်နမ်သည်ဆန်တန်ချိန် ၆.၈ သန်းတင်ပို့ခဲ့ပြီး အိန္ဒိယက တန်ချိန် ၁၈ သန်းတင်ပို့ခဲ့ကြောင်း သိရပါသည်။ အိန္ဒိယနိုင်ငံသည် ယခုနှစ်တွင် တန်ချိန် ၂၂-၂၃ သန်းနှင့် ဗီယက်နမ်သည် တန်ချိန် ၈.၅ သန်းတင်ပို့ရန် မျှော်မှန်းရကြောင်း သိရပါသည်။ ထိုင်းဆန်သည် ၂၀၂၄ ခုနှစ်တွင် တစ်တန်လျှင် ပျမ်းမျှအမေရိကန်‌ဒေါ်လာ ၅၀၀ မှ ယခုနှစ်တွင် အမေရိကန် ‌ဒေါ်လာ ၃၄၀ ပတ်လည်အထိကျဆင်းခဲ့ကြောင်း သိရပါသည်။ Mr Chookiat က ထိုင်း hom mali ဆန်နှင့် ပေါင်းဆန်တို့သည် ယခုနှစ်တွင် စွမ်းရည်ကောင်းနေကြောင်း ပြောကြားခဲ့ပါသည်။ အမေရိကန်ဈေးကွက်တွင် ထိုင်း hom mali ဆန်အတွက် ဝယ်လိုအားကောင်းနေပြီး ဝယ်ယူသူများသည် ထရမ့်အကောက်ခွန်သက်ရောက်မှုအလားအလာကိုစိုးရိမ်မှုကြောင့် ဝယ်ယူစုဆောင်းနေကြောင်း သိရပါသည်။ အမေရိကန်သည် နှစ်စဉ်ထိုင်းနိုင်ငံထံမှ ဆန်တန်ချိန် ၈၃၀၀၀၀ တင်သွင်းပြီး ထိုပမာဏထဲမှ တန်ချိန် ၆၅၀၀၀၀ သည် hom mali ဆန်ဖြစ်ကြောင်း သိရပါသည်။ ၂၀၂၄ ခုနှစ်တွင် ထိုင်းနိုင်ငံသည် ဆန်တန်ချိန် ၉.၉၅ သန်းတင်ပို့ရာမှ ဝင်ငွေ အမေရိကန်‌ဒေါ်လာ၆.၄၃ သန်း ရရှိခဲ့ကြောင်း သိရှိရပါသည်။

Bangkok Post 

DOCA (ရန်ကုန်)                                                                          

           ကမ္ဘောဒီးယား စိုက်ပျိုးရေးဝန်ကြီး Dith Tina သည် မလေးရှားနိုင်ငံ ဒုတိယဝန်ကြီး Datuk Dr Abdul Rahman Junaidi နှင့် ကမ္ဘောဒီးယားနှင့် Sarawak ပြည်နယ်အကြား ပူးပေါင်းဆောင်ရွက်ရေးနှင့် ကုန်သွယ်မှုအခွင့်အလမ်းများကို ဆွေးနွေးခဲ့ကြသည်။ ကမ္ဘောဒီးယားနှင့် မလေးရှားနိုင်ငံတို့သည် စားနပ်ရိက္ခာဖူလုံရေးနှင့် စျေးကွက်ချဲ့ထွင်ရေးတို့ကို အဓိကထား၍ စိုက်ပျိုးရေးကဏ္ဍတွင် ပူးပေါင်းဆောင်ရွက်မှုကို တိုးမြှင့်လုပ်ဆောင်ရန် ကတိပြုခဲ့ကြသည်။ ဝန်ကြီး Tina သည် Sarawak ပြည်နယ်၏ စားနပ်ရိက္ခာ ထောက်ပံ့မှုကိုမြှင့်တင်ရန် ကမ္ဘောဒီးယား ဆန်နှင့် အသားထွက်ကုန်များ တင်သွင်းနိုင်ခြေကို Sarawak ပြည်နယ်၏ စိတ်ဝင်စားမှုကို ကြိုဆိုကြောင်း၊ ကမ္ဘောဒီးယား၏ လယ်ယာလုပ်ငန်းနှင့် ပို့ကုန်များတွင် အလားအလာကောင်းများနှင့်နှစ်နိုင်ငံအတွက် အားသာချက်များကို အလေးပေးပြောကြားခဲ့ သည်။ ဆန်စပါးထုတ်လုပ်မှုနှင့် ကုန်သွယ်မှု အားကောင်းစေရန်၊ လယ်ယာတန်ဖိုးကွင်းဆက်များတွင် ရေရှည်ပူးပေါင်းဆောင်ရွက်မှုများ ဖွံ့ဖြိုးတိုးတက်စေရန်နှင့် စီးပွားရေးချိတ်ဆက်မှုများ အဆင်ပြေချောမွေ့စေရန် သဘောတူညီချက်များ ရယူခဲ့သည်။  ကမ္ဘောဒီးယားသည် Sarawak ပြည်နယ်သို့ စိုက်ပျိုးရေးထွက်ကုန်များ ထောက်ပံ့ပေးရန်နှင့် ၎င်း၏ စိုက်ပျိုးရေးကဏ္ဍတွင် မလေးရှားရင်းနှီးမြှုပ်နှံမှုကို ထောက်ပံ့ရန် အဆင်သင့်ရှိနေကြောင်း Dith Tina က ထပ်လောင်း ပြောကြားခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)

          ဖိလစ်ပိုင်ကဆန်တင်သွင်းမှုယာယီပိတ်ပင်ပြီးနောက် ဂါနာနိုင်ငံသည် စက်တင်ဘာလတွင် ဗီယက်နမ်၏ အကြီးမားဆုံးဆန်ဝယ်ယူသူဖြစ်လာပြီး စုစုပေါင်းတင်ပို့မှု၏ ၂၂ ရာခိုင်နှုန်းနီးပါးရှိကြောင်း သိရပါသည်။ ၂၀၂၅ ခုနှစ်၏ ပထမ ၉ လတွင် ဗီယက်နမ်သည် ဆန်တန်ချိန် ၆.၈၃ သန်း တင်ပို့ရာမှ ဝင်ငွေအမေရိကန်ဒေါ်လာ ၃.၄၉ ဘီလီယံရရှိခဲ့ပြီး ၂၀၂၄ ခုနှစ်တူညီသည့်ကာလနှင့် နှိုင်းယှဉ်ပါကပမာဏတွင် ၂.၀၅ ရာခိုင်နှုန်းကျဆင်းခဲ့ပြီး တန်ဖိုးတွင် ၁၉.၉၈ ရာခိုင်နှုန်းမြင့်တက်ခဲ့ကြောင်း သိရပါသည်။ စက်တင်ဘာလတစ်လတည်းတွင် ဗီယက်နမ်သည် အမေရိကန်ဒေါ်လာ ၂၃၂.၃၈ သန်းတန်ဖိုးရှိသောဆန်တန်ချိန် ၄၆၆၈၀၀ တန်တင်ပို့ခဲ့ကြောင်း သိရပါသည်။ ဂါနာ၏ နောက်တွင် Cote d’Ivoire နှင့် မလေးရှားတို့က ဗီယက်နမ်ဆန် ဒုတိယနှင့် တတိယတင်သွင်းသူများအဖြစ် ရပ်တည်နေပြီး ဈေးကွက်ဝေစု၏ ၂၁ ရာခိုင်နှုန်းနှင့် ၁၀ ရာခိုင်နှုန်းနီးပါးအသီးသီးရှိကြောင်း သိရပါသည်။ ဩဂုတ်လတွင် ဖိလစ်ပိုင်အစိုးရသည် ပြည်တွင်းဆန်ဈေးနှုန်းများကျဆင်းနေသောကြောင့် ဆန်တင်သွင်းမှုကို စက်တင်ဘာလ ၁ ရက်နေ့မှစတင်၍ ၂ လပိတ်ပင်မည်ဟု ကြေညာခဲ့ပါသည်။ သို့သော်ဈေးကွက်လေ့လာသူများက အခြားဒေသများတွင် ဝယ်လိုအားကြီးထွားလာမှုကြောင့် စုစုပေါင်းတင်ပို့မှုမှာ ဆက်လက်မြင့်တက်နိုင်ကြောင်း ခန့်မှန်းခဲ့ကြပါသည်။ ရက် ၆၀ အတွင်း ဗီယက်နမ်ဆန်အဓိကဝယ်ယူသူများထဲမှ တစ်ခုဖြစ်သည့် ဖိလစ်ပိုင်သည် တင်သွင်းမှုပြန်လည်ဖွင့်လှစ်မည့်ဆုံးဖြတ်ချက်မချမီ အခြေအနေကိုပြန်လည်ဆန်းစစ်မည်ဖြစ်ပြီး ဗီယက်နမ်အား တင်ပို့မှုလမ်းကြောင်း ပြန်လည်ချိန်ညှိရန် အချိန်အများပြားဖန်တီးပေးထားကြောင်း သိရပါသည်။ ဖိလစ်ပိုင်မှဆန်တင်သွင်းမှုယာယီရပ်တန့်ထားသော်လည်း ဘင်္ဂလား‌ဒေ့ရှ်၊ တရုတ်နှင့် တောင်အာဖရိက အစရှိသည့်ဈေးကွက်များသို့တင်ပို့မှုမြင့်တက်လာသောကြောင့် ဗီယက်နမ်သည် ယခုနှစ်တစ်နှစ်လုံးတွင် ဆန်တန်ချိန် ၈.၂ သန်းကျော်တင်သွင်းနိုင်ရန် ခန့်မှန်းရကြောင်း သိရှိရပါသည်။

Vietnam Plus                                                                            

DOCA (ရန်ကုန်)

      ၂၀၂၅ ခုနှစ် ဇန်နဝါရီလမှ သြဂုတ်လအတွင်း ဥဇဘက်ကစ္စတန်နိုင်ငံမှ ကြက်သားတင်သွင်းမှုသည် တစ်နှစ်ထက်တစ်နှစ် ၁၄.၂ ရာခိုင်နှုန်း တိုးတက်ခဲ့ကြောင်း အမျိုးသားစာရင်းအင်းကော်မတီက အောက်တိုဘာလ ၁၀ ရက်နေ့တွင် ထုတ်ပြန်ခဲ့သည်။ အမျိုးသားစာရင်းအင်းကော်မတီ၏ ပဏာမ အချက်အလက်များအရ ၂၀၂၅ ခုနှစ် ဇန်နဝါရီမှ သြဂုတ်လအတွင်း ပြည်ပနိုင်ငံ ၁၆ နိုင်ငံမှ ကန် ဒေါ်လာ ၅၉.၁ သန်းတန်ဖိုးရှိ ကြက်သားတန်ချိန် ၅၄၆၀၀ တန် ဥဇဘက်ကစ္စတန်သို့ တင်သွင်းခဲ့ကြောင်း ထုတ်ပြန်ချက်တွင် ဖော်ပြထားသည်။

         တင်သွင်းမှု ပမာဏသည် မနှစ်ကအလားတူကာလနဲ့ နှိုင်းယှဉ်ပါက တန်ချိန် ၆၈၀၀ ခန့် ပမာဏအားဖြင့် ၁၄.၂ ရာခိုင်နှုန်း တိုးလာကြောင်း ကော်မတီက မှတ်ချက်ပြုခဲ့သည်။

         ကော်မတီ၏အဆိုအရ ရုရှားသည် ဤကာလအတွင်း ဥဇဘက်ကစ္စတန်၏ ထိပ်တန်း ကြက်သားတင်သွင်းသူဖြစ်ပြီး တန်ချိန် ၁၃,၉၀၀၊ ၎င်း၏နောက်တွင် တန်ချိန် ၉,၈၀၀ နှင့် ဘီလာရုစ် နိုင်ငံတို့မှ ရပ်တည်လျက်ရှိသည်။

         ၂၀၂၅ ခုနှစ် ပထမ ၈ လတွင် Uzbekistan ၏ နိုင်ငံခြားကုန်သွယ်မှုပမာဏသည် ဒေါ်လာ ၅၁.၄ ဘီလီယံအထိရှိပြီး တစ်နှစ်ထက်တစ်နှစ် ၁၉.၈ ရာခိုင်နှုန်း တိုးလာကြောင်း ကော်မတီက စက်တင်ဘာလတွင် ပြောကြားခဲ့ကြောင်း သိရှိရပါသည်။

Source : Xinhua                                                                                  

DOCA(ရန်ကုန်)