အိန္ဒိယနိုင်ငံတွင် ဝါဂွမ်းနှင့် ချည်မျှင်ဈေးနှုန်းများ အတက်အကျ ဆက်လက်ဖြစ်ပေါ်နေ သောကြောင့် တမီးနာဒူးလ်ပြည်နယ်ရှိ ချည်မျှင်နှင့်အထည်ချုပ်စက်ရုံများက ဝါဂွမ်းပိုမိုရရှိနိုင် ရေးအတွက် အစီအမံများ ချမှတ်ဆောင်ရွက်ပေးရန် တောင်းဆိုလျက်ရှိကြောင်း သိရသည်။
ကမ္ဘာ့ဈေးကွက်တွင် ဝါချည်မျှင်ဝယ်လိုအား သိသိသာသာမြင့်တက်လာခြင်းသည် ဈေးနှုန်း မတည်ငြိမ်မှုကို အဓိကအကြောင်းအရင်းဖြစ်စေခဲ့ကြောင်း အိန္ဒိယအထည်အလိပ်လုပ်ငန်းအဖွဲ့ချုပ် ဥက္ကဋ္ဌ Ashwin Chandran က ပြောကြားခဲ့သည်။ နိုင်ငံတကာဈေးကွက်တွင် ဝါချည်မျှင် ဝယ်လိုအား သည် ယခင်နှစ်များနှင့် နှိုင်းယှဉ်ပါက တိုးတက်လာခဲ့ကြောင်း၊ ၂၀၂၃-၂၀၂၄ ခုနှစ်တွင် ဝါချည်မျှင် ဝယ်လိုအားလျော့နည်းခဲ့သော်လည်း အထည်အလိပ်ထုတ်ကုန်လုပ်ငန်း တန်ဖိုးကွင်းဆက် တစ်လျှောက် ဝယ်လိုအားမှာ ယခင်နှစ် ဒီဇင်ဘာလမှစ၍ ပြန်လည်မြင့်တက် လာခဲ့သည်။
တရုတ်နိုင်ငံနှင့် ဘင်္ဂလားဒေ့ရှ်နိုင်ငံတို့မှ ချည်မျှင်ဝယ်လိုအား မြင့်တက်လာခြင်းကြောင့် ပြည်တွင်းအထည်အလိပ်လုပ်ငန်းများ ပြန်လည်ကောင်းမွန်လာပြီး ချည်မျှင်ဈေးကွက်များ တိုးတက် လာမည့်အခြေအနေသို့ ဦးတည်နေကြောင်း သိရသည်။ အဝတ်အထည်နှင့် ခြေအိတ်လုပ်ငန်းများ တွင် အသုံးပြုသည့် Hosiery ချည်ပို့ကုန်ကို ဂူဂျာရတ်ပြည်နယ်ရှိ စက်ရုံများမှ အဓိကတင်ပို့လျက် ရှိပြီး တမီးနာဒူးလ်ပြည်နယ်ရှိ စက်ရုံများမှ အနည်းငယ်သာ ပါဝင်ကြောင်း သိရသည်။
အဝတ်အထည်နှင့် ခြေအိတ်လုပ်ငန်းများတွင် အသုံးပြုသည့် Hosiery ချည်သည် ဈေးကွက် တွင် တစ်ပေါင်လျှင် ၉၂ ဆင့် (၀.၉၂ အမေရိကန်ဒေါ်လာ) အထိ ဈေးတက်ခဲ့ပြီး လက်ရှိကာလတွင် ၈၆ ဆင့်( ၀.၈၆ အမေရိကန်ဒေါ်လာ) သို့ ဈေးနှုန်းပြန်လည်ကျဆင်းခဲ့ကြောင်း သိရသည်။ အရည် အသွေး သန့်စင်ထားသော ချည်ကြမ်း၏ အိန္ဒိယနိုင်ငံအရောက် ကုန်ကျစရိတ်သည် ယခင်နှစ်နှင့် နှိုင်းယှဉ်ပါက တစ်ကီလိုလျှင် ၇၀ ရူပီးခန့် မြင့်တက်လာခဲ့ပြီး ချည်မျှင်ဈေးနှုန်းမှာလည်း တစ်ကီလို လျှင် ၉၅ ရူပီးခန့် မြင့်တက်ခဲ့ကြောင်း သိရသည်။
တစ်ချိန်တည်းမှာပင် Tiruppur Exporters and Manufacturers Association က ဗဟိုအစိုးရနှင့် ပြည်နယ်အစိုးရများထံသို့ ချည်ကြမ်းတင်ပို့မှုကို တားမြစ်ပေးရန် တောင်းဆိုခဲ့ သည်။ အဆိုပါအဖွဲ့က ဇန်နဝါရီလမှစတင်၍ အချို့သော အကြီးစားချည်မျှင်ထုတ်လုပ်ရေး စက်ရုံ များနှင့် ကုန်သည်များသည် ချည်ကြမ်းရောင်းချထောက်ပံ့မှုကို ရည်ရွယ်ချက်ရှိရှိ ကန့်သတ်ထားခြင်း ကြောင့် ချည်မျှင်ဈေးနှုန်း များ မြင့်တက်လာပြီး အသေးစားနှင့် အလတ်စားလုပ်ငန်းများ (SMEs) အပေါ် ဖိအားများ ပိုမိုမြင့်တက်လာကြောင်း ပြောဆိုခဲ့သည်။
အိန္ဒိယနိုင်ငံ၏ နှစ်စဉ်ချည်ကြမ်းလိုအပ်ချက်မှာ ဝါဂွမ်း အထုပ်ရေ သိန်း ၃၅၀ ခန့်ရှိသော် လည်း ပြည်တွင်းထုတ်လုပ်မှုမှာ အထုပ်ရေ သိန်း၂၉၀ ခန့်သာ ရှိကြောင်း အဆိုပါအဖွဲ့၏ ပြောကြား ချက်အရ သိရသည်။ အစိုးရက ချည်ကြမ်းတင်သွင်းမှုအပေါ် ကောက်ခံသည့် ၁၁ ရာခိုင်နှုန်း တင်သွင်းခွန်ကို ဖယ်ရှားပေးခဲ့ပြီး ချည်ကြမ်းအထုပ်ရေ ၆၂ သိန်းခန့် တင်သွင်းနိုင်ရေး ဆောင်ရွက် ပေးခဲ့သော်လည်း ချည်ကြမ်းဈေးနှုန်းများမှာ ဆက်လက်မြင့်တက်နေဆဲဖြစ်သည်။ ထို့ကြောင့် အဆိုပါအဖွဲ့က ဈေးကွက်အတွင်း ရည်ရွယ်ချက်ရှိရှိ ဈေးကစားခြင်းများပြုလုပ်နေကြောင်း သုံးသပ်ပြီး အစိုးရအနေဖြင့် ဝင်ရောက်ထိန်းကျောင်း၍ လိုအပ်သည့် အရေးယူဆောင်ရွက်မှုများ ပြုလုပ်ပေးရန် တောင်းဆိုထားကြောင်း သတင်းဖော်ပြချက်အရ သိရသည်။
Source: Smartinfoindia, September 9, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)