ပြည်ပကုန်သွယ်မှုသတင်းများ

       ၂၀၂၅ ခုနှစ်  အိန္ဒိယနိုင်ငံ၏ ပဲမျိုးစုံတင်သွင်းမှုသည် ၂၀၂၄ခုနှစ်တွင် ၆၈.၇၅ သိန်းတန်ခန့် ရှိခဲ့ရာမှ ယခုနှစ်တွင် ၆၅.၆၉ သိန်းတန်သို့ အနည်းငယ် လျော့ကျသွားခဲ့ကြောင်းသိရပါသည်။ အဆိုပါတင်သွင်းမှု ၄.၄၅ ရာခိုင်နှုန်း လျော့ကျသွားခြင်းသည် အိန္ဒိယနိုင်ငံအစိုးရက ယခုနှစ် အတွင်း ပဲဝါတင်သွင်းမှု အပေါ် ၃၀ ရာခိုင်နှုန်း အခွန်စည်းကြပ်ရန် ဆုံးဖြတ်ခဲ့ခြင်းကြောင့်ဖြစ်ကြောင်း သိရပါသည်။ အိန္ဒိယပဲမျိုးစုံနှင့် နှံစားသီးနှံအသင်း (IPGA) မှ ထုတ်ပြန်သော အချက်အလက်များအရ ၂၀၂၅ ခုနှစ် ဇန်နဝါရီလမှ ဒီဇင်ဘာလအထိ ပဲဝါလေး တင်သွင်းမှုသည် ၁၂.၉၀ သိန်းတန်ရှိခဲ့ပြီး ယခင်နှစ် အလားတူကာလက ၂၉.၃၉ သိန်းတန်ရှိခဲ့ရာမှ ၅၆ ရာခိုင်နှုန်းအထိ သိသိသာသာ ကျဆင်းသွားခဲ့ကြောင်းသိရပါသည်။ အိန္ဒိယနိုင်ငံအစိုးရသည် ၂၀၂၅ ခုနှစ် နိုဝင်ဘာလအတွင်း ပဲဝါတင်သွင်းမှူအပေါ် ၃၀ ရာခိုင်နှုန်း အခွန်စည်းကြပ်ခဲ့ပါသည်။ ၂၀၂၅ ခုနှစ် အတွင်း အိန္ဒိယနိုင်ငံသို့ ပဲဝါအများဆုံး တင်ပို့သည့်နိုင်ငံမှာ ကနေဒါနိုင်ငံဖြစ်ပြီး ၈.၈၂ သိန်းတန် တင်ပို့ခဲ့ကြောင်းသိရပါသည်။ ၎င်းနောက်တွင် ရုရှားနိုင်ငံက ၃.၂၁ သိန်းတန်၊ လတ်ဗီးယားနိုင်ငံ က ၃၃,၅၃၂ တန်နှင့် အာဂျင်တီးနားနိုင်ငံက ၂၆,၂၆၁ တန်တို့ဖြင့် အသီးသီး တင်ပိုလျက်ရှိကြောင်း သိရပါသည်။ အိန္ဒိယနိုင်ငံ၏ ကုလားပဲတင်သွင်းမှုသည် ၂၀၂၅ ခုနှစ်အတွင်း ၁၅.၈၁ သိန်း တန်အထိ ရှိခဲ့ပြီး ၂၀၂၄ခုနှစ်တွင်တင်သွင်းခဲ့သော တန်ချိန် ၃.၉၄ သိန်းတန်နှင့် နှိုင်းယှဉ်လျှင်  ၃၀၁ ရာခိုင်နှုန်းအထိ အံ့အားသင့်ဖွယ် မြင့်တက်လာခဲ့ကြောင်း သိရပါသည်။ အိန္ဒိယသို့ ကုလားပဲ အဓိက တင်ပို့သည့်နိုင်ငံမှာ သြစတြေးလျနိုင်ငံဖြစ်ပြီး ၁၄.၂၃ သိန်းတန် တင်ပို့ခဲ့ကာ တန်ဇန်းနီး ယားနိုင်ငံက ၁.၄၈ သိန်းတန်နှင့် မြန်မာနိုင်ငံက ၃,၉၃၆ တန်တို့ အသီးသီး တင်ပို့လျက်ရှိကြောင်း သိရပါသည်။ ထို့အတူ ပြည်တွင်းလိုအပ်ချက် မြင့်မားနေခြင်းကြောင့် မတ်ပဲ တင်သွင်းမှုသည်လည်း ၂၀၂၅ခုနှစ်အတွင်း ၄၁ ရာခိုင်နှုန်း မြင့်တက်လာခဲ့ကြောင်းသိရပါသည်။ ၂၀၂၅ ခုနှစ်အတွင်း အိန္ဒိယသို့ မတ်ပဲအများဆုံး တင်ပို့သည့်နိုင်ငံမှာ မြန်မာနိုင်ငံဖြစ်ပြီး ၈.၀၉ သိန်းတန် တင်ပို့ခဲ့ကာ ဘရာဇီးနိုင်ငံက ၂.၃၇ သိန်းတန်ဖြင့် ဒုတိယအများဆုံး တင်ပို့ခဲ့ကြောင်းသိရပါသည်။ ပဲစဉ်းငုံ  တင်သွင်းမှုသည်လည်း ယခင်နှစ်က ၁၂.၅၇ သိန်းတန် ရှိခဲ့ရာမှ ၁၃.၂၅ သိန်းတန်သို့ ၅.၄၂ ရာခိုင်နှုန်း တိုးတက်လာခဲ့ကြောင်း သိရပါသည်။ ၂၀၂၅ ခုနှစ်အတွင်း ပဲစဉ်းငုံအများဆုံး တင်ပို့သည့်နိုင်ငံမှာ မိုဇမ်ဘစ်နိုင်ငံဖြစ်ပြီး ၅.၂၀ သိန်းတန် တင်ပို့ခဲ့ကာ မြန်မာနိုင်ငံက ၃.၄၆ သိန်းတန်၊ တန် ဇန်းနီးယားက ၃.၀၂ သိန်းတန်၊ မာလာဝီက ၆၆,၈၀၅ တန်နှင့် ဆူဒန်က ၃၈,၅၂၅ တန် အသီးသီးတင်ပို့ခဲ့ကြောင်း သိရပါသည်။ အခြားပဲမျိုးစုံအုပ်စု တင်သွင်းမှုမှာလည်း ၂၀၂၅ ခုနှစ် အတွင်း ၂.၄၂ သိန်းတန်သာ ရှိခဲ့ပြီး ၂၀၂၄ခုနှစ်တွင် တင်သွင်းမှုပမာဏ ၄.၆၄ သိန်းတန်ရှိခဲ့ရာမှ ၄၈ ရာခိုင်နှုန်းအထိ သိသိသာသာ လျော့ကျသွားခဲ့ကြောင်း သိရှိရပါသည်။

Source: business line                                                                

DOCA(ရန်ကုန်)

         ၂၀၂၅ ခုနှစ်က Cholimex Food သည် အခွန်မဆောင်မီ အမြတ်ငွေ ၃၅၅ ဘီလီယံ ဗီယက်နမ်ဒေါင်ရရှိခဲ့ပြီး တစ်နေ့လျှင် ပျမ်းမျှအမြတ်ငွေ တစ်ဘီလီယံခန့် ရရှိခဲ့ကြောင်း ဆိုလိုသည်။ Cholimex Food Joint Stock Company ၏ ဘဏ္ဍာရေးအစီရင်ခံစာအရ ၂၀၂၅ ခုနှစ်က စုစုပေါင်းဝင်ငွေမှာ ဗီယက်နမ်ဒေါင် ၄,၀၇၅ ဘီလီယံအထိ ရောက်ရှိခဲ့ပြီး ၂၀၂၄ ခုနှစ်နှင့် နှိုင်းယှဉ်ပါက ၉% တိုးလာခဲ့သည်။ အသားတင်အမြတ်အစွန်းမှာ ၂၈% အထိ ရောက်ရှိခဲ့ပြီး ဝင်ငွေဗီယက်နမ်ဒေါင် ၁၀၀ တိုင်းအတွက် ရောင်းချသောကုန်ပစ္စည်းကုန်ကျစရိတ်ကို နုတ်ယူပြီးနောက် ဗီယက်နမ်ဒေါင် ၂၈ အမြတ်ရရှိခဲ့သည်ဟု ဆိုလိုသည်။

          ကုန်ကျစရိတ်အားလုံးကို နုတ်ယူပြီးနောက် Cholimex Food သည် အခွန်မဆောင်မီ အမြတ်ငွေ ဗီယက်နမ်ဒေါင် ၃၅၅ ဘီလီယံ ရရှိခဲ့ပြီး ယခင်နှစ်နှင့် နှိုင်းယှဉ်ပါက ၁၃% နီးပါး တိုးလာခဲ့သည်။ Cholimex Food သည် ယခင်က ဟိုချီမင်းမြို့၊ အမှတ် (၅) ရပ်ကွက်ဟောင်းရှိ Truc Dung Import-Export Joint Venture Company ဖြစ်သည်။ ၁၉၈၁ ခုနှစ်တွင် စတင် တည်ထောင်ခဲ့ပြီး အစပိုင်းတွင် ကွဲပြားသောစီးပွားရေးလုပ်ငန်းများကို လုပ်ကိုင်ခဲ့သော်လည်း တဖြည်းဖြည်းနှင့် ပင်လယ်စာနှင့် အစားအစာပြုပြင်ထုတ်လုပ်ခြင်းတွင် အထူးပြုလုပ်ဆောင်ခဲ့သည်။

         ကုမ္ပဏီတွင် အဓိကအားဖြင့် တို့စရာဆော့စ်များ၊ အချဉ်ရည်များနှင့် အေးခဲထားသော အစားအစာများဖြစ်သည့် ထုတ်ကုန်ရာပေါင်းများစွာရှိသည်။ ၎င်း၏ ၂၀၂၄ ခုနှစ် နှစ်ပတ်လည်  အစီရင်ခံစာတွင် စီမံခန့်ခွဲမှုအဖွဲ့က ၎င်းတို့သည် ပြည်တွင်းတို့စရာဆော့စ်နှင့် အချဉ်ရည်လုပ်ငန်း တွင် ဦးဆောင်ကုမ္ပဏီတစ်ခုဖြစ်ကြောင်း ဖော်ပြခဲ့သည်။

          Cholimex Food ၏ ထုတ်ကုန်များကို နိုင်ငံပေါင်း ၃၀ ခန့်သို့လည်း တင်ပို့လျက်ရှိသည်။ EU သည် ကုမ္ပဏီ၏ အကြီးဆုံးဈေးကွက်ဖြစ်ပြီး ၎င်း၏ ပို့ကုန်ရောင်းချမှု၏ ၈၀% ကို ရယူထားပြီး အရှေ့ဥရောပနှင့် ဩစတြေးလျတို့ကလည်း နောက်မှလိုက်ခဲ့ကျသည်။

        Cholimex Food သည် လွန်ခဲ့သော ၁၀ နှစ်အတွင်း အဓိကဘဏ္ဍာရေးညွှန်းကိန်းနှစ်ခု ဖြစ်သည့် ဝင်ငွေနှင့် အမြတ်အစွန်းတို့တွင် တည်ငြိမ်သောတိုးတက်မှုကို ထိန်းသိမ်းထား နိုင်ခဲ့သည်။ ပြီးခဲ့သည့်နှစ်ကုန်တွင် ကုမ္ပဏီသည် အခွန်ပြီးနောက် ဖြန့်ဝေခြင်းမပြုရသေးသော အမြတ်ငွေ ဗီယက်နမ်ဒေါင်ငွေ ၁,၁၄၀ ဘီလီယံကျော် ရရှိခဲ့သည်။ ကုမ္ပဏီ၏ စုစုပေါင်းပိုင်ဆိုင်မှုမှာ လက်ရှိတွင် ဗီယက်နမ်ဒေါင်ငွေ ၂,၀၀၀ ဘီလီယံနီးပါးရှိကြောင်း သိရှိရပါသည်။

Source : VN Express                                                                           

DOCA (ရန်ကုန်)

          ထိုင်းနိုင်ငံ၏ ဇန်နဝါရီလအတွင်း နယ်စပ်နှင့် Transit ကုန်သွယ်ရေးစုစုပေါင်းတန်ဖိုးသည် ဘတ် ၁၆၁.၁ ဘီလီယံရှိခဲ့ပြီး ယခင်နှစ်တူညီသည့်ကာလနှင့်နှိုင်းယှဉ်ပါက ၁၀.၉ ရာခိုင်နှုန်း တိုးတက်ခဲ့ကာ တရုတ်နိုင်ငံသည် အဓိက Transit ဈေးကွက်အဖြစ် ဆက်လက်ရပ်တည်နေသည် ဟု ဒုတိယအစိုးရပြောရေးဆိုခွင့်ရှိသူ Lalida Persvivatana ကပြောကြားခဲ့ပါသည်။ ဇန်နဝါရီလအတွင်း ပို့ကုန်တန်ဖိုးမှာ ဘတ် ၈၇.၉ ဘီလီယံ ဖြင့် ၁၂.၆ ရာခိုင်နှုန်း တိုးတက်ခဲ့ပြီး သွင်းကုန် တန်ဖိုးမှာ ဘတ် ၇၃.၁ ဘီလီယံ ဖြင့် ၉.၀ ရာခိုင်နှုန်း မြင့်တက်ခဲ့ကာ ကုန်သွယ်ရေးပိုငွေ ဘတ် ၁၄.၈ ဘီလီယံ ရရှိခဲ့ကြောင်း သိရပါသည်။ မလေးရှား၊ လာအို၊ မြန်မာနှင့် ကမ္ဘောဒီးယားစသည့် အိမ်နီးချင်နိုင်ငံ ၄ နိုင်ငံနှင့် နယ်စပ်ကုန်သွယ်မှုစုစုပေါင်းတန်ဖိုးမှာ ဘတ် ၆၈.၆ ဘီလီယံ ရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၁၈.၂ ရာခိုင်နှုန်း ကျဆင်းခဲ့ကြောင်း သိရပါသည်။ နယ်စပ်ကုန်သွယ်ရေးတွင် ပို့ကုန်တန်ဖိုးမှာ ဘတ် ၃၈.၇ ဘီလီယံဖြင့် ၂၃.၄ ရာခိုင်နှုန်း ကျဆင်းခဲ့ပြီး သွင်းကုန်တန်ဖိုးမှာ ဘတ် ၂၉.၈ ဘီလီယံ ဖြင့် ၁၀.၃ ရာခိုင်နှုန်း လျော့နည်းခဲ့ကာ ထိုင်းနိုင်ငံသည် နယ်စပ်ကုန်သွယ်ရေးတွင် ဘတ် ၈.၈ ဘီလီယံ ကုန်သွယ်ရေးပိုငွေ ရရှိခဲ့ကြောင်း သိရပါ သည်။ မလေးရှားနိုင်ငံသည် ဘတ် ၃၀.၀၄၃ ဘီလီယံဖြင့် ထိုင်းနိုင်ငံ၏ အကြီးဆုံး နယ်စပ်ကုန်သွယ်ဖက်နိုင်ငံဖြစ်ပြီး လာအိုသည် ဘတ် ၂၄.၁ ဘီလီယံဖြင့် ဒုတိယ၊ မြန်မာသည် ဘတ် ၁၄.၄ ဘီလီယံဖြင့် တတိယနေရာတွင် ရပ်တည်ခဲ့ကြောင်း သိရပါသည်။ ဇန်နဝါရီလအတွင်း ထိုင်း–ကမ္ဘောဒီးယား နယ်စပ်ကုန်သွယ်မှုတန်ဖိုးမှာ စံချိန်တင် သုညဖြစ်ခဲ့ကြောင်း သိရပါသည်။ အဓိကနယ်စပ်ပို့ကုန်များတွင် ဒီဇယ်လောင်စာ ဘတ် ၃.၆ ဘီလီယံ၊ Integrated Circuits ဘတ် ၁.၂ ဘီလီယံနှင့် အခြား သန့်စင်ထားသော လောင်စာများ ဘတ် ၁.၂ ဘီလီယံ ပါဝင်ကြောင်း သိရပါသည်။ တတိယနိုင်ငံများသို့ Transit ကုန်သွယ်ရေးသည် တိုးတက်မှုအားကောင်းခဲ့ပြီး စုစုပေါင်း ဘတ် ၉၂.၅ ဘီလီယံရှိကာ ယခင်နှစ်တူညီသည့်ကာလနှင့် နှိုင်းယှဉ်ပါက ၅၀.၇ ရာခိုင်နှုန်း တိုးတက်ခဲ့ကြောင်း သိရပါသည်။ Transit ပို့ကုန်များသည် ဘတ် ၄၉.၂ ဘီလီယံ ဖြင့် ၇၈.၉ ရာခိုင်နှုန်းမြင့်တက်ခဲ့ပြီး Transit သွင်းကုန်များမှာ ဘတ် ၄၃.၂ ဘီလီယံ ဖြင့် ၂၇.၈ ရာခိုင်နှုန်း တိုးတက်ခဲ့ကြောင်း သိရပါသည်။ တရုတ်နိုင်ငံသည် ဘတ် ၅၀.၅ ဘီလီယံဖြင့် ထိုင်း၏ အကြီးဆုံး Transit ဈေးကွက် ဖြစ်နေဆဲဖြစ်ပြီး ၄၅.၈ ရာခိုင်နှုန်း တိုးတက်ခဲ့ကြောင်း သိရပါသည်။ စင်္ကာပူသည် ဘတ် ၁၈.၉ ဘီလီယံဖြင့် ၁၁၅.၉ ရာခိုင်နှုန်း တိုးတက်ကာ ဒုတိယ၊ ဗီယက်နမ်သည် ဘတ် ၇.၃ ဘီလီယံဖြင့် ၄၁.၁ ရာခိုင်နှုန်း တိုးတက်ကာ တတိယနေရာတွင် ရပ်တည်နေကြောင်း သိရပါသည်။ အဓိက Transit ပို့ကုန်များတွင် Hard Disk Drives ဘတ် ၈.၃ ဘီလီယံ၊ ဖုန်းနှင့် ဆက်စပ်ပစ္စည်းများ ဘတ် ၆.၈ ဘီလီယံနှင့် သစ်သီး ဒူးရင်း (Fresh Durian) ဘတ် ၆.၅ ဘီလီယံ ပါဝင်ကြောင်း သိရပါသည်။ Lalida က ၎င်းကိန်းဂဏန်းများသည် ထိုင်းနိုင်ငံအား ဒေသတွင်း ထောက်ပံ့ပို့ဆောင်ရေးနှင့် ကုန်သွယ်ရေးဗဟိုအဖြစ် အခန်းကဏ္ဍ ခိုင်မာနေမှုကို ပြသနေကြောင်း ပြောကြားခဲ့ပါသည်။

Bangkok Post                                                                           

DOCA (ရန်ကုန်)

          စိုက်ပျိုးရေးနှင့် ဆည်မြောင်းကဏ္ဍ ဖွံ့ဖြိုးရေးအတွက် ရဝမ်ဒါနှင့် IFAD တို့ အမေရိကန် ဒေါ်လာ ၇၈.၅ သန်း တန်ဖိုးရှိ သဘောတူညီချက် လက်မှတ်ရေးထိုး ကီဂါလီ ရဝမ်ဒါအစိုးရနှင့် အပြည် ပြည်ဆိုင်ရာ စိုက်ပျိုးရေးဖွံ့ဖြိုးမှု ရန်ပုံငွေအဖွဲ့ (IFAD) တို့သည် နိုင်ငံ၏ စိုက်ပျိုးရေး ကဏ္ဍ ကို အဆင့်မြှင့်တင်ရန်အတွက် အမေရိကန်ဒေါ်လာ ၇၈.၅ သန်း တန်ဖိုးရှိ ဘဏ္ဍာရေးဆိုင်ရာ သဘောတူညီချက်တစ်ရပ်ကို လက်မှတ်ရေးထိုးခဲ့ကြကြောင်း ရဝမ်ဒါ ဘဏ္ဍာရေးနှင့် စီးပွားရေး စီမံကိန်းဝန်ကြီးဌာနက ထုတ်ပြန်ခဲ့သည်။ ဆည်မြောင်းစီမံကိန်း ပံ့ပိုးခြင်း ယခုရန်ပုံငွေကို ရဝမ်ဒါ အရှေ့ပိုင်းရှိ Kayonza တောင်စောင်း ဆည်မြောင်းစီမံကိန်းအတွက် အဓိက အသုံးပြုသွားမည်ဖြစ်သည်။ အဆိုပါစီမံကိန်းသည် စိုက်ပျိုးမြေဧရိယာချဲ့ထွင်နိုင်ခြင်း၊ ရေစီမံခန့်ခွဲမှု ကောင်းမွန်စေခြင်းနှင့် သီးနှံအထွက်နှုန်း တိုးတက်စေခြင်းတို့အတွက် အသိအမှတ် ပြုခံထားရသော စီမံကိန်းဖြစ်သည်။ မိုးခေါင်မှုဒဏ်ကို ဖြေရှင်းခြင်း: Kayonza ခရိုင်သည် ပြီးခဲ့သည့်သုံးနှစ်အတွင်း မိုးရေချိန်အလွန်နည်းပါးခဲ့ပြီး ရေရှည်မိုးခေါင်မှုဒဏ်ကို ခံစားခဲ့ရသည်။ ယင်းကိုဖြေရှင်းရန်အတွက် ရေကုဗမီတာ ၁ သန်းဆံ့သော ဆည်တစ်ခုကို တည်ဆောက်ကာ စိုက်ပျိုးရေးအတွက် ရေ ပေးဝေသွားရန် စီစဉ်ထားသည်။ စိုက်ပျိုးရေးအပြင် အသေးစားမွေးမြူရေးကဏ္ဍ (Small livestock value chains) ဖွံ့ဖြိုးတိုးတက်ရေးကိုလည်း ပံ့ပိုးကူညီသွား မည်ဖြစ်သည်။ ဤစီမံကိန်း မှတစ်ဆင့် ဆင်းရဲနွမ်းပါးမှုလျှော့ချရန်၊ ရာသီဥတုပြောင်းလဲမှု ဒဏ်ကိုခံနိုင်ရည်ရှိသော စိုက်ပျိုးရေး စနစ်ပေါ်ထွန်းလာစေရန်၊ စားနပ်ရိက္ခာဖူလုံမှုရှိစေရန်၊ ကျေးလက်နေ အိမ်ထောင်စုများ၏ ဝင်ငွေတိုးတက်လာစေရန် စသောအကျိုးကျေးဇူးများကိုရရှိရန် ရည်ရွယ်ထားခြင်းဖြစ်ကြောင်း သိရှိရပါသည်။

Source : Xinhua                                                                        

DOCA(ရန်ကုန်)

        ၂၀၂၅ ခုနှစ်အတွင်း ဂျပန်နိုင်ငံသို့ ဗီယက်နမ်၏ လယ်ယာထွက်ကုန် တင်ပို့မှုသည် ဂန္ဓာမာပန်း၊ ငှက်ပျောသီးနှင့် ကန်စွန်းဥတို့၏ ဝယ်လိုအားကြောင့် ၁၈ ရာခိုင်နှုန်းအထိ ခုန်တက်သွားပြီး အမေရိကန်ဒေါ်လာ ၂၃၇.၈ သန်းအထိ ရှိလာခဲ့သည်။

​          ဗီယက်နမ်အကောက်ခွန်ဌာန၏ အဆိုအရ အဆိုပါထွက်ကုန်သုံးမျိုးသည် စုစုပေါင်း တင်ပို့မှု၏ ဒေါ်လာ ၁၁၁.၆ သန်းအထိ ရှိခဲ့ကြောင်း သိရသည်။ ဂန္ဓာမာပန်း တင်ပို့မှုသည် ဒေါ်လာ ၄၃.၆ သန်းဖြင့် အများဆုံးဖြစ်ပြီး ၂၀၂၄ ခုနှစ်ထက် ၇.၀၁ ရာခိုင်နှုန်း မြင့်တက်လာခဲ့သည်။ ငှက်ပျောသီးတင်ပို့မှုမှာမူ ၃၃ ရာခိုင်နှုန်း တိုးတက်လာပြီး ဒေါ်လာ ၄၂.၆ သန်း ရှိခဲ့သည်။

​          ယခုကဲ့သို့ တိုးတက်လာခြင်းမှာ ပုံမှန်ကုန်ပစ္စည်းပေးသွင်းနိုင်မှုနှင့် စံနှုန်းမြင့်မားသည့် စိုက်ပျိုးရေးနယ်မြေများကို ဖော်ဆောင်သည့် မဟာဗျူဟာကြောင့် ဖြစ်သည်။ Hoang Anh Gia Lai စိုက်ပျိုးရေးကုမ္ပဏီ၏ ဥက္ကဋ္ဌ ဖြစ်သူ Doan Nguyen Duc က ၎င်းတို့ကုမ္ပဏီအနေဖြင့် ဂျပန်သို့ တင်ပို့သည့် ငှက်ပျောသီးဈေးနှုန်းကို နှစ်ပေါင်းများစွာကြာအောင် တည်ငြိမ်စွာ ထိန်းထားနိုင်ခဲ့ကြောင်း ပြောကြားခဲ့သည်။

​          ကုမ္ပဏီအနေဖြင့် တစ်နှစ်ပတ်လုံး ကုန်ပစ္စည်းပေးသွင်းနိုင်ရန်အတွက် ဗီယက်နမ်အလယ်ပိုင်းရှိ စိုက်ခင်းများအပြင် လာအိုနိုင်ငံတွင်လည်း စိုက်ပျိုးရေးခြံများကို တိုးချဲ့ဖော်ဆောင်ထားသည်။ ကုန်းမြင့်ဒေသများတွင် စိုက်ပျိုးသည့် ထွက်ကုန်များသည် နေ့နှင့်ည အပူချိန်ကွာခြား ချက် ကြီးမားခြင်း၏ အကျိုးကျေးဇူးကို ရရှိကြသည်။ ထိုအချက်က အသီးအနှံများကို ဖြည်းဖြည်းချင်း ကြီးထွားစေပြီး ကစီဓာတ် စုဆောင်းမှုကို အားကောင်းစေကာ အနေတော် ချိုမြိန်မှုနှင့် မွှေးရနံ့ကို ရရှိစေသည်။ သင့်တော်သော မြေဆီလွှာအခြေအနေများက အသီးခွံများကို တောက်ပသော အဝါရောင်ရှိစေပြီး အနာအဆာ နည်းပါးစေသဖြင့် ဂျပန်နိုင်ငံ၏ တင်းကျပ်သော စံနှုန်းများကို ပြည့်မီစေသည်။

​          ခရမ်းသီး တင်ပို့မှုသည် ၁၇.၇ ရာခိုင်နှုန်း တိုးတက်ပြီး ဒေါ်လာ ၁၉.၉ သန်းကျော်ရှိခဲ့ကာ သရက်သီးတင်ပို့မှုမှာ ၁၃.၆ ရာခိုင်နှုန်း တိုးတက်ပြီး ဒေါ်လာ ၁၆.၈ သန်း ရှိခဲ့သည်။ ဂျပန်နိုင်ငံသည် အစားအသောက် ဘေးကင်းလုံခြုံမှု၊ ထုတ်ကုန်ဇစ်မြစ်ကို ပြန်လည်ခြေရာခံနိုင်မှု နှင့် ထုပ်ပိုးမှုစံနှုန်းများတွင် အလွန်မြင့်မားသည့် ဈေးကွက်ဖြစ်သော်လည်း ဝယ်လိုအားမှာမူ အမြဲတစေ တည်ငြိမ်ကြောင်း ဗီယက်နမ် သစ်သီးဝလံနှင့် ဟင်းသီးဟင်းရွက်အသင်းကဆိုသည်။

​           ဂျပန်စားသုံးသူများသည် တည်ငြိမ်သော အရည်အသွေး၊ ဆွဲဆောင်မှုရှိသော အသွင်အပြင်နှင့် တစ်နှစ်ပတ်လုံး ပုံမှန်ရရှိနိုင်မှုကို အဓိက လိုလားကြသည်။ ကိန်းဂဏန်းအချက်အလက်များအရ ဂျပန်နိုင်ငံသည် အပူပိုင်းဒေသထွက် သစ်သီးဝလံများကိုသာမက ဟင်းသီးဟင်းရွက်နှင့် ပန်းမန်များကိုပါ အများအပြား လိုလားလျက်ရှိသည်။ ၎င်းမှာ ဗီယက်နမ်လုပ်ငန်းရှင်များအတွက် အရည်အသွေးမြင့် ထုတ်လုပ်မှုတွင် ဆက်လက်ရင်းနှီးမြှုပ်နှံရန်၊ ထုတ်ကုန်တန်ဖိုးမြှင့်တင်ရန်နှင့် အမျိုးအစားစုံလင်စွာ ထုတ်လုပ်ခြင်းဖြင့် ဂျပန်ဈေးကွက်ဝေစုကို ထိန်းသိမ်းရန်အတွက် တွန်းအားတစ်ရပ်ဖြစ်စေကြောင်း သိရှိရပါသည်။

Source : VN Express                                                                           

DOCA (ရန်ကုန်)