ပြည်ပကုန်သွယ်မှုသတင်းများ

အယ်လ်ဂျီးရီးယားသမ္မတ Abdelmadjid Tebboune သည် စွမ်းအင်လုံခြုံရေးနှင့် ဒေသတွင်း ပူးပေါင်းဆောင်ရွက်ရေးဆိုင်ရာ အယ်လ်ဂျီးရီးယား၏ ကတိကဝတ်များကို မတ် ၂၃ ရက်တွင် ထပ်မံ အတည်ပြုခဲ့ပြီး ဓာတ်ငွေ့ထုတ်လုပ်မှုကို မြှင့်တင်ရန်၊ အာဖရိကနိုင်ငံများ၏ စီးပွားရေးကို ပံ့ပိုးရန်နှင့် ဥရောပ၏ စွမ်းအင်လိုအပ်ချက်များကို ဖြည့်ဆည်းပေးရန် ကတိကဝတ် ပြုခဲ့သည်။ မီဒီယာကိုယ်စား လှယ်များနှင့် တွေ့ဆုံစဉ်တွင် ၎င်းက နိုင်ဂျီးရီးယား၏ ဓာတ်ငွေ့ သိုက်များကို အယ်လ်ဂျီးရီးယားမှတစ် ဆင့် ဥရောပသို့ ဆက်သွယ်ပေးသည့် ကီလိုမီတာ ၄၀၀၀ ရှည်လျားသော Trans-Saharan Gas Pipeline (TSGP)ကို မီးမောင်းထိုးပြပြီး နှစ်စဉ် ကုဗမီတာ ၂၀ မှ ၃၀ ဘီလီယံအထိ ပို့ဆောင်ရန် စီစဉ် ထားသည်။ အယ်လ်ဂျီးရီးယားသည် ဟိုက်ဒရိုဂျင် စွမ်းအင်ကို ဂျာမနီနှင့် အီတလီသို့ တင်ပို့ရန် စီစဉ်နေ ပြီး အယ်လ်ဂျီးရီးယားနှင့် အီတလီသို့ ချိတ်ဆက်ထားသော လက်ရှိပိုက်လိုင်း အခြေခံအဆောက်အအုံ များမှတစ်ဆင့် တင်ပို့ရန် စီစဉ် နေကြောင်း ၎င်းက ပြောကြားခဲ့သည်။ တစ်ချိန်တည်းတွင်၊ Tebboune သည် ရေရှည်တည်တံ့ သောစွမ်းအင်အနာဂတ်အတွက် အယ်လ်ဂျီးရီးယား၏ ရေနံစိမ်းမှီခိုအားထားမှုမှ သဘာဝ ဓာတ်ငွေ့၊ ဟိုက်ဒရိုဂျင်နှင့် ပြန်လည်ပြည့်ဖြိုးမြဲစွမ်းအင်များဆီသို့ ပြောင်းလဲသွားကြောင်းအလေးပေး ပြောကြားခဲ့သည်။ "ကျွန်ုပ်တို့၏ အာရုံစူးစိုက်မှုသည် ရေနံစည်များပေါ်တွင်သာမက မျှတပြီး ရေရှည်တည်တံ့သော စွမ်းအင်မဟာဗျူဟာအပေါ် အာရုံစိုက်သည်" ဟု ၎င်းက ဆိုသည်။

DOCA(ရန်ကုန်)

          အီရတ်နိုင်ငံသည် ၂၀၂၉ ခုနှစ်တွင် ရေနံထုတ်လုပ်နိုင်စွမ်းကို တစ်ရက်လျှင် စည် ၆ သန်း ထိ တိုးမြှင့်ရန် စီစဉ်ထားကြောင်း အီရတ်ရေနံဝန်ကြီးဌာနက မတ်လ ၂၃ ရက်နေ့က ပြောကြားခဲ့ ပါသည်။ ရေနံဝန်ကြီးဌာန၏ အကြီးအကဲ Bassem Mohamed Khodeir က အီရတ်သည် Kirkuk ရေနံနှင့် ဂတ်စ်ကွင်း လေးခု ပြန်လည်တည်ထောင်ရန်  ဗြိတိန်ရေနံကုမ္ပဏီ BP plc နှင့် လတ်တလောစာချုပ်ထားပြီး နိုင်ငံတစ်ဝှမ်းရေနံများရှာဖွေဖော်ထုတ်သွားမည်ဟု ပြောကြားခဲ့ပါ သည်။ အီရတ်၏ လတ်တလော ရေနံထွက်ရှိမှုသည် တစ်ရက်လျှင်စည် ၄ သန်းခန့်ရှိကြောင်း သိရ ပါသည်။ ၎င်းတို့သည် ရုရှားပါဝင်သည့် ရေနံတင်ပို့သည့်နိုင်ငံများအဖွဲ့ချုပ် OPEC+ အဖွဲ့တွင် ဒုတိယအကြီးဆုံးထုတ်လုပ်သူဖြစ်ကြောင်း သိရပါသည်။ အီရတ်သည် ၎င်းတို့အနေဖြင့် ယခင် အလွန်အမင်းထုတ်လုပ်ခဲ့မှုများအတွက် ဖာထေးရန် နောက်ဆုံးပေါ်အစီအစဉ်ကို တင်ပြသွားမည် ဟု သိရပါသည်။ OPEC+ နိုင်ငံများသည် ၂၀၂၂ ခုနှစ်မှစ၍ များစွာသောအဆင့်များဖြင့်ရရှိထား သည့် သဘောတူညီချက်အရ ကမ္ဘာလုံးဆိုင်ရာရောင်းချမှု၏ ၅.၇ ရာခိုင်နှုန်းနှင့်ညီမျှသည့် ရေနံထုတ်လုပ်မှုကို တစ်ရက်လျှင် စည် ၅.၈၅ သန်း ထိ လျှော့ချခဲ့ပြီး ယခုနှစ် ဧပြီလမှစ၍ ရောင်းချမှုပြန်လည်မြှင့်တင်ရန် စီစဉ်ထားကြောင်း သိရပါသည်။

DOCA(ရန်ကုန်)

          နည်းပညာမြင့် Chip များတရုတ်သို့တင်ပို့မှုအပေါ် အမေရိကန်၏စိုးရိမ်မှုများကြောင့် မလေးရှားက ဆီမီးကွန်ဒတ်တာစည်းမျဉ်းများကို တင်းကျပ်ရန်စီစဉ်နေကြောင်း သိရပါသည်။  အမေရိကန်က မလေးရှားအား Nvidia chip များ ၎င်းတို့၏ဦးတည်ရာနေရာသို့ ရောက်ရှိမှု သေချာစေရေးအတွက် ခြေရာကောက်ရန် တောင်းဆိုခဲ့ကြောင်း ကုန်သွယ်ရေးဝန်ကြီး Zafrul Aziz က ပြောကြားခဲ့ပါသည်။ ထိုထုတ်ပြန်ချက်သည် အမေရိကန်က တရုတ် AI လုပ်ငန်း DeepSeek က ကန့်သတ်ထားသည့် အမေရိကန်လုပ် chip များအား အသုံးပြုမပြုနှင့် ပတ်သတ်၍ စုံစမ်းစစ်ဆေးမှုပြုလုပ်ပြီးနောက် ပေါ်ပေါက်လာခြင်းဖြစ်ကြောင်း သိရပါသည်။ ထို့ပြင် မလေးရှား သည် စင်ကာပူတွင်ဖြစ်ပွားခဲ့သည့် အမေရိကန်ဒေါ်လာ သန်း ၃၉၀ တန်ဖိုးရှိ လိမ်လည်မှုနှင့် ချိတ်ဆက်သည့် အမေရိကန်တင်ပို့မှုထိန်းချုပ်ထားသည့်အဆင့်မြင့် chip များပါဝင်သော server တင်ပို့မှုနှင့်ပတ်သတ်သည့် ဥပဒေချိုးဖောက်မှုအပေါ် ပြန်လည်ဆန်းစစ် လျှက်ရှိကြောင်း သိရပါ သည်။ Nvidia သည် မှတ်ချက်ပြုရန်တောင်းဆိုမှုကို တုံ့ပြန်ခဲ့ခြင်း မရှိကြောင်း သိရပါသည်။

DOCA(ရန်ကုန်)

          တရုတ်အခြေစိုက်ထိပ်တန်းကားထုတ်လုပ်သူဖြစ်သည့် Geely Auto သည် မော်တော် ယာဉ်မော်ဒယ်သစ်များနှင့် အမှတ်တံဆိပ်မိတ်ဆက်ခြင်းနှင့် နိုင်ငံတစ်ဝှမ်း၎င်းတို့ဖြန့်ဖြူးရေး ကွန်ယက်ကြေညာမှုနှင့်အတူ မတ်လ ၂၁ ရက်နေ့က ဗီယက်နမ်ဈေးကွက်သို့ တရားဝင် ဝင်ရောက်ခဲ့ကြောင်း သိရပါသည်။ Geely Coolray မော်ဒယ်ကို ယှဉ်ပြိုင်နိုင်စွမ်းရှိသောဈေးနှုန်း အမျိုးအစား ၃ မျိုးကို တရားဝင်မိတ်ဆက်ခဲ့ကြောင်း သိရပါသည်။  ထိုမိတ်ဆက်ပွဲတွင် Standard အမျိုးအစားကို ဗီယက်နမ်ဒေါင် ၅၃၈ သန်း၊ Premium အမျိုးအစားကို ဗီယက်နမ်ဒေါင် ၅၇၈ သန်းနှင့် Flagship အမျိုးအစားကို ဗီယက်နမ်ဒေါင် ၆၂၈ သန်းဖြင့် ရောင်းချခဲ့ကြောင်း သိရပါသည်။ ထိုအမျိုးအစားများအပြင် Geely သည် Geely Monjaro SUV နှင့် Geely EX5 တို့ကို လည်း တရားဝင်မိတ်ဆက်ပြသခဲ့ကြောင်း သိရပါသည်။ ထိုပွဲတွင် Geely သည် အရောင်း ကိုယ်စားလှယ် ၁၅ ခုနှင့် နိုင်ငံတစ်ဝှမ်းအရောင်းစင်တာ ၁၅ ခုတို့ကို မိတ်ဆက်ခဲ့ကြောင်း သိရပါသည်။ ၎င်းတို့သည် ၂၀၂၅ ခုနှစ်အတွင်း အရောင်းကိုယ်စားလှယ် ၅၀ ထိတိုးချဲ့သွားရန် စီစဉ်ထားကြောင်း သိရပါသည်။ ယခင်ကလည်း Geely သည် Tasco Auto နှင့်ပူးပေါင်း၍  ဗီယက်နမ်နိုင်ငံ Thai Binh ပြည်နယ်တွင် အမေရိကန်ဒေါ်လာ ၁၆၈ သန်းတန်ကြေးရှိသော မော်တော်ယာဉ်တပ်ဆင်သည့်စက်ရုံ တည်ဆောက်ရန် မိတ်ဖက်ဖွဲ့ခဲ့ ကြောင်း သိရပါသည်။ ထိုပြည်တွင်း၌ တပ်ဆင်သည့်မော်ဒယ်အမျိုးအစားများကို ၂၀၂၆ ခုနှစ်တွင် စတင်ဖြန့်ဖြူးနိုင်ရန် မျှော်လင့်ရကြောင်း သိရပါသည်။

DOCA(ရန်ကုန်)

          ပြည်တွင်းအိမ်ရာဆောက်လုပ်ရေးလုပ်ငန်းဖြစ်သည့် Futa Land joint-stock ကုမ္ပဏီ သည် ဗီယက်နမ်အလယ်ပိုင်းတွင် ၉၇.၆ ဟတ်တာကျယ်ဝန်းသော Thuan Phuoc မြို့ပြစီမံကိန်း ကို စတင်ဆောက်လုပ်လျှက်ရှိကြောင်း သိရပါသည်။ ရင်းနှီးမြှုပ်နှံမှုတန်ဖိုး အမေရိကန်ဒေါ်လာ သန်း ၄၆၀ ရှိသည့် ထိုစီမံကိန်းသည် ဗီယက်နမ်အလယ်ပိုင်းတွင် ပထမဆုံး စံပြ အဆင့်မြင့်လူနေ အိမ်ရာနှင့် ဖျော်ဖြေရေးစင်တာဖြစ်လာမည်ဟု သိရပါသည်။ Thuan Phuoc Bay Urban Investment Company ၏ ညွှန်ကြားရေးမှူးချုပ်ဖြစ်သူ Truong Dinh Trung ကထိုစီမံကိန်း တွင် အဆင့်မြင့်မြို့ပြနေရာ၊ ဖျော်ဖြေရေးစင်တာ၊ ကြယ်ငါးပွင့်နှင့် ခြောက်ပွင့်ဟိုတယ်များ၊ ကျောင်း၊ ဆေးရုံ၊ ဈေးဝယ်စင်တာ၊ ဘဏ်နှင့် ၁၆.၅ ဟတ်တာကျယ်ဝန်းသော ပန်းခြံတို့ပါဝင်မည် ဟု သိရပါသည်။ ထိုစီမံကိန်းကို Sai Gon Ha Noi Commercial SHB bank ကငွေကြေး ပံ့ပိုး ပေးသည်ဟု သိရပါသည်။ ထိုစီမံကိန်းတည်ရှိသည့် Da Nang မြို့တော် ပြည်သူ့ကော်မတီသည် ၂၀၂၀-၂၀၃၀ တွင် အိမ်ရာစီမံကိန်းသစ်များအတွက် အခန်းပေါင်း ၁၀၀၀၀ ရောင်းချရန် ကမ်းလှမ်းထားကြောင်း သိရပါသည်။ ထို့ပြင် နိုင်ငံခြားသားများအိမ်ရာပိုင်ဆိုင်နိုင်မည့် အိမ်ရာစီမံကိန်း ၁၇ ခုကိုလည်း စာရင်းပြုစုထားကြောင်း သိရပါသည်။ Da Nang မြို့တော်သည် ၎င်းတို့၏ ပထမဆုံး လွတ်လပ် သောကုန်သွယ်ရေးဇုန်၊ နိုင်ငံတကာဘဏ္ဍာရေးစင်တာနှင့် ကမ္ဘာလုံးဆိုင်ရာ ဆီမီးကွန်ဒတ်တာနှင့် AI ထုတ်လုပ်ရာအခြေစိုက်အဖြစ် ဖန်တီးမှုကို အရှိန်မြှင့်တင်လျှက်ရှိကြောင်း သိရပါသည်။

DOCA(ရန်ကုန်)