ပြည်ပကုန်သွယ်မှုသတင်းများ

      Telangana ပြည်နယ်အစိုးရသည် ပြည်နယ်အတွင်း နှစ်စဉ်ဆန်စပါး ထွက်ရှိမှုမှာ ပြည်တွင်းစားသုံးမှုထက် များစွာပိုလျှံနေသဖြင့် နိုင်ငံတကာဈေးကွက်တွင် ပြည်နယ်၏ အခန်းကဏ္ဍကို မြှင့်တင်ရန်အတွက် ဆန်းစပါးတင်ပို့မှုဆိုင်ရာ သီးသန့်မူဝါအသစ်တစ်ရပ်ကို ရေးဆွဲလျက်ရှိကြောင်း သိရပါသည်။

        Telangana ပြည်နယ်၊ ဆည်မြောင်းနှင့် စိုက်ပျိုးရေးမြေများ ဖွံ့ဖြိုးတိုးတက်ရေး စားနပ်ရိက္ခာနှင့် အရပ်ဘက်ဆိုင်ရာ ထောက်ပံ့ရေးဝန်ကြီး N.Uttam Kumar Reddy က အဆိုပါမူဝါဒအကြောင်း ကြေညာရာတွင် ပြည်နယ်ဖြင့် Kharif နှင့် Rabi စိုက်ပျိုးရာသီနှစ်ခုလုံးတွင် ဆန်စပါး တန်ချိန်ပေါင်း ၃၀ နီးပါးထွက်ရှိသော်လည်း နှစ်စဉ်စားသုံးမှုမှာ တန်ချိန် ၃.၆ သန်း ခန့်သာရှိကြောင်းနှင့် Telangana ပြည်နယ်မှာ ထွက်ရှိတဲ့ဆန်၏ ဆယ်ပုံတစ်ပုံလောက်ကိုသာ စားသုံးကြကြောင်းပြောကြားခဲ့သည်။ ထို့ပြင် ပြည်နယ်၏ ဆန်စပါးလုပ်ငန်းအတွက် ပို့ကုန်က အဓိကတိုးတက်မှု အခွင့်အလမ်းတစ်ခုဖြစ်ပြီး အစိုးရအနေဖြင့် ဆန်တင်ပို့မှုများ လွယ်ကူချောမွေ့စေရန် ဆန်စက်လုပ်ငန်းရှင်များအား ပြည်တွင်းမှာသာမက နိုင်ငံတကာဈေးကွက်မှာပါ ဝင်ရောက်နိုင်စေရန် ကူညီပေးဖို့ မူဝါဒသစ်တစ်ရပ်ကို ရေးဆွဲနေသည်ဟု ပြောကြားခဲ့ကြောင်း သိရပါသည်။

            ထို့အပြင် Telangana ပြည်နယ်သည် ဖိလစ်ပိုင်နိုင်ငံအပါအဝင် အခြားနိုင်ငံများသို့ ဆန်စပါးများ စတင်တင်ပို့နေပြီဖြစ်ကြောင်းနှင့် ပြည်ပဈေးကွက်သို့ ချဲ့ထွင်နေသည့် ဆန်စက်လုပ်ငန်းကဏ္ဍကို အစိုးရမှ ဆက်လက်ကူညီသွားမည်ဖြစ်ကြောင်း အတည်ပြုပြောကြားပြီး ဝန်ကြီး၏ ပြောကြားချက်အရ Telangana ပြည်နယ်သည် လက်ရှိတွင် အိန္ဒိယနိုင်ငံ၏ ဆန်စပါးထုတ်လုပ်မှုနှင့် အစိုးရ၏ ဝယ်ယူစုဆောင်းမှုအများဆုံးပြည်နယ်ဖြစ်ပြီး ပို့ကုန်အခွင့်အလမ်းများ တိုးတက်လာသည်နှင့်အမျှ ကမ္ဘာ့ဆန်စပါး ကုန်သွယ်မှုတွင် ပိုမိုကြီးမားသော အခန်းကဏ္ဍမှ ပါဝင်လာနိုင်မည်ဖြစ်ပြီး အဆိုပါကြေညာချက်ကို “အာဟာရဖြည့်ဆန်များ မြှင့်တင်ခြင်း” ခေါင်းစဉ်ဖြင့်ပြုလုပ်သော အလုပ်ရုံဆွေးနွေးတွင် ပြောကြားခဲ့ ခြင်းဖြစ်သည်။ အဆိုပါပွဲ၌ ဆန်စက်လုပ်ငန်းရှင်များ၊ အစားအစာ ပြုပြင်ထုတ်လုပ်ရေးကဏ္ဍ၊ အာဟာရပညာရှင်များနှင့် အစိုးရတာဝန်ရှိသူများက တန်ဖိုးမြှင့်ဆန်ဈေးကွက်ကို အားကောင်းလာစေရန် ဆွေးနွေးခဲ့ကြောင်း သိရသည်။

            ထို့အပြင် အဆိုပါပွဲတွင် မရှိမဖြစ်လိုအပ်သော Vitamins, Iron, Zincဓာတ်များ ကြွယ်ဝစွာပါဝင်သည့် “KCP Nutri Poshan” ဟုခေါ်သော အာဟာရဖြည့် ဆန်အမျိုးအစားသစ်ကို မိတ်ဆက်ခဲ့သည်။ Kolam, HMT နှင့် Sona Masoori စသည့် လူကြိုက်များသော ဆန်အမျိုးအစားများဖြင့် ရရှိနိုင်သည့် အဆိုပါထုန်ကုန်သည် လူတို့၏ စားသောက်မှုပုံစံကို မပြောင်းလဲစေဘဲ အာဟာရဆိုင်ရာ ရလာဒ်များကို မြှင့်တင်ပေးရန် ရည်ရွယ်သည့် တန်ဖိုးမြှင့် အခြေခံစားသောက်ကုန်များအပေါ် လုပ်ငန်းကဏ္ဍ၏ စိတ်ဝင်စားမှု တိုးလာခြင်းကိုပြသနေပြီး အာဟာရဖြည့်ဆန်သည် စားသုံးသူများအတွက် ရင်းနှီးပြီးသား အရသာနှင့် ချက်ပြုတ်မှုပုံစံကို ထိန်းသိမ်းထားခြင်းဖြင့် အာဟာရလုံခြုံမှုကို မြှင့်တင်ပေးနိုင်သည့် အရေးကြီးသော ခြေလှမ်းတစ်ခုဖြစ်ကြောင်း ဝန်ကြီး Uttam Kumar Reddy က ပြောကြားခဲ့ကြောင်း သိရသည်။

           ကမ္ဘာ့တစ်ဝန်းတွင် အစားအစာများ၌ အာဟာရဓာတ်ဖြည့်ဆည်းခြင်းသည် ကုန်ကျစရိတ်သက်သာပြီး ထိရောက်သော ပြည်သူ့ကျန်းမာရေးဆိုင်ရာကြားဝင် ဆောင်ရွက်မှုတစ်ခုအဖြစ် အသိအမှတ်ပြုထားသည်။ဆယ်စုနှစ်များစွာအတွင်း နိုင်ငံအများအပြားတွင် အခြေခံစားသောက် ကုန်များ၌ အာဟာရဖြည့်စွက်ခြင်းကို အသုံးပြုခဲ့ကြသော်လည်း၊ အာဟာရဖြည့်ဆန်မှာမူ အိန္ဒိယကဲ့သို့ ဆန်စားသုံးမှုများသည့် ဒေသများတွင် အလားအလာကောင်းများဖြင့် ထွက်ပေါ်လာသော နယ်ပယ်သစ်တစ်ခု ဖြစ်နေဆဲဖြစ်ကြောင်း သိရှိရပါသည်။

Source : Dailyhunt                                                                                 

DOCA (ရန်ကုန်)

       ကမ္ဘောဒီးယား-ဗီယက်နမ် စီးပွားရေးကိုယ်စားလှယ်အဖွဲ့သည် ပြီးခဲ့သည့်အပတ်က Kratie ပြည်နယ်ရှိ Snoul အထူးစီးပွားရေးဇုန် (SEZ) တွင် ရင်းနှီးမြှုပ်နှံမှုအခွင့်အလမ်းများကို လေ့လာခဲ့ပြီး စိုက်ပျိုးရေးပြုပြင်မွမ်းမံခြင်း၊ ထောက်ပံ့ပို့ဆောင်ရေးနှင့် စက်မှုလုပ်ငန်းပူးပေါင်း ဆောင်ရွက်မှုတို့ကို အဓိကထားဆွေးနွေးခဲ့ကြသည်။ ဗီယက်နမ်နိုင်ငံ၊ ဟိုချီမင်းမြို့ရှိ ကမ္ဘောဒီးယား ကုန်သွယ်ရေးရုံးမှ ၃-၇-၂၀၂၆ ရက်နေ့တွင် ထုတ်ပြန်ခဲ့သော ကြေညာချက်တစ်ခုအရ ဗီယက်နမ်နိုင်ငံရှိ ကမ္ဘောဒီးယားသံရုံးမှ စီးပွားရေးသံမှူး Ho Daret ဦးဆောင်သော ဗီယက်နမ် ရင်းနှီးမြှုပ်နှံသူများ၏ ကိုယ်စားလှယ်အဖွဲ့သည် ကမ္ဘောဒီးယားနိုင်ငံ၊ Kratie ပြည်နယ်ရှိ Snoul အထူးစီးပွားရေးဇုန် (SEZ) သို့ သွားရောက်လေ့လာခဲ့ကြသည်။ Kratie ပြည်နယ်အုပ်ချုပ်ရေးနှင့် ပူးပေါင်းစီစဉ်သော လေ့လာရေးခရီးစဉ်တွင် ကမ္ဘောဒီးယားနှင့် ဗီယက်နမ်စီးပွားရေးလုပ်ငန်းများနှင့် ပုဂ္ဂလိကကဏ္ဍအဖွဲ့အစည်းများမှ ကိုယ်စားလှယ်များက ရင်းနှီးမြှုပ်နှံမှု အခွင့်အလမ်းများကို  လေ့လာရန်နှင့် နှစ်နိုင်ငံစီးပွားရေးပူးပေါင်းဆောင်ရွက်မှုကို အားကောင်းစေရန် စုပေါင်းလေ့လာခဲ့ကြသည်။  ခရီးစဉ်အတွင်း ကိုယ်စားလှယ်များသည် SEZ ၏ အခြေခံအဆောက်အအုံ၊ ရင်းနှီးမြှုပ်နှံမှု ပံ့ပိုးမှုဝန်ဆောင်မှုများ၊ သယ်ယူပို့ဆောင်ရေးချိတ်ဆက်မှု၊ ထောက်ပံ့ပို့ဆောင်ရေးနှင့် ရင်းနှီးမြှုပ်နှံမှုမူဝါဒများကို ပြန်လည်သုံးသပ်ခဲ့ကြသည်။ နှစ်ဖက်စလုံးသည် Kratie ပြည်နယ်ရှိ သီဟိုဠ်စေ့နှင့် သရက်သီးပြုပြင်ထုတ်လုပ်သည့် စက်ရုံများကို ပူးတွဲတည်ဆောက်ရန် အစီအစဉ်များနှင့်အတူ ထောက်ပံ့ပို့ဆောင်ရေးနှင့် နယ်စပ်ဖြတ်ကျော် သယ်ယူပို့ဆောင်ရေးကဏ္ဍတွင် ရင်းနှီးမြှုပ်နှံမှုများကိုလည်း ဆွေးနွေးခဲ့ကြသည်။  အထူးစီးပွားရေးဇုန်တွင် အဆိုပြုထားသော စီမံကိန်းများသည် ကမ္ဘောဒီးယား၏ စိုက်ပျိုးရေးထွက်ကုန်များကို တန်ဖိုးမြှင့်တင်ပေးမည်ဖြစ်ပြီး ပြည်တွင်းတန်ဖိုးကွင်းဆက်များကို အားကောင်းစေကာ ဒေသတွင်းနှင့် ကမ္ဘာ့ဈေးကွက်များသို့ တင်ပို့မှုများကို တိုးချဲ့နိုင်မည်ဟု မျှော်လင့်ထားကြသည်။  ထို့အပြင် ကမ္ဘောဒီးယားအရာရှိများက Snoul အထူးစီးပွားရေးဇုန် (SEZ)အတွင်း လည်ပတ်လျက်ရှိသော တာယာထုတ်လုပ်ရေးနှင့် ပြုပြင်ထုတ်လုပ်ရေးစက်ရုံသို့ သဘာဝရော်ဘာထောက်ပံ့မှုများ တိုးမြှင့်ခြင်းဖြင့် ရော်ဘာကဏ္ဍတွင် ပူးပေါင်းဆောင်ရွက်မှုကို တိုးချဲ့ရန် စိတ်ဝင်စားကြောင်း ဖော်ပြခဲ့ကြသည်။ အဆိုပါ လေ့လာရေးခရီးစဉ်သည် ဒေသထွက်ကုန်ကြမ်းများကို အသုံးပြုမှုကိုမြှင့်တင်ရန်၊ တန်ဖိုးမြှင့်တင်ထားသော ထုတ်လုပ်မှုကို မြှင့်တင်ရန်နှင့် ကမ္ဘောဒီးယား-ဗီယက်နမ် စက်မှုလုပ်ငန်းထောက်ပံ့ရေး ကွင်းဆက်များကို ပိုမိုပေါင်းစည်းရန် မျှော်လင့်ရကြောင်း ထုတ်ပြန်ချက်တွင် ဖော်ပြထားကြောင်း သိရှိရပါသည်။  

Source: Khmer Times

DOCA(ရန်ကုန်)

        ၂၀၂၆ ခုနှစ် ပထမငါးလအတွင်း အမေရိကန်နိုင်ငံသည် ဗီယက်နမ်လိုင်ချီးသီး ဝယ်ယူမှုအတွက် ၂၀၂၅ ခုနှစ် ကာလတူထက် နှစ်ဆကျော် ပိုမိုသုံးစွဲခဲ့ပြီး ကုန်သွယ်မှုတန်ဖိုး အမေရိကန် ဒေါ်လာ ၁.၂၆ သန်းအထိရှိခဲ့သည်။ ၎င်းသည် ယခင်နှစ်ထက် ၁၂၅ ရာခိုင်နှုန်း တိုးတက်လာခြင်းဖြစ်ပြီး အမေရိကန်သည် တရုတ်နိုင်ငံပြီးလျှင် ဒုတိယအကြီးဆုံး ပို့ကုန်စျေးကွက် ဖြစ်လာခဲ့ကြောင်း သိရသည်။

      အကောက်ခွန်ဦးစီးဌာန၏ အချက်အလက်များအရ ဗီယက်နမ်နိုင်ငံ၏ လိုင်ချီးသီး ပြည်ပတင်ပို့မှုသည် အမေရိကန်ဒေါ်လာ ၁၆.၀၃ သန်း (ဗီယက်နမ်ဒေါင် ၄၂၁ ဘီလီယံခန့်) ရှိခဲ့ပြီး ယခင်နှစ် ကာလတူထက် ၄၃ ရာခိုင်နှုန်း တိုးတက်လာခဲ့သည်။ တရုတ်နိုင်ငံသည် အမေရိကန် ဒေါ်လာ ၈.၀၇ သန်းဖြင့် အကြီးဆုံးစျေးကွက်အဖြစ် ဆက်လက်ရပ်တည်နေပြီး စုစုပေါင်း ပို့ကုန်တန်ဖိုး၏ ထက်ဝက်ကျော်ကို အဓိကယူထားကြောင်း သိရသည်။

       အမေရိကန်နိုင်ငံသည် အမေရိကန်ဒေါ်လာ ၁.၂၆ သန်းဖြင့် ဒုတိယနေရာတွင် ရှိနေပြီး ယခင်နှစ် ကာလတူထက် ၁၂၅ ရာခိုင်နှုန်းနီးပါး တိုးတက်လာခဲ့သည်။ စျေးကွက်ဝေစုမှာလည်း ၅ ရာခိုင်နှုန်းမှ ၈ ရာခိုင်နှုန်းနီးပါးအထိ မြင့်တက်လာခဲ့သည်။ ဥရောပတွင်လည်း ပင်မစျေးကွက် သုံးခုစလုံး၌ တင်ပို့မှု သိသိသာသာမြင့်တက်ခဲ့ရာ ပြင်သစ်နိုင်ငံသို့ ဒေါ်လာ ၈၄၅,၀၀၀  ဖြင့် အများဆုံးဖြစ်ပြီး၊ နယ်သာလန်နိုင်ငံသို့ ဒေါ်လာ ၇၂၅,၀၀၀ နှင့် ဗြိတိန်နိုင်ငံသို့ ဒေါ်လာ ၇၁၇,၀၀၀ တို့ဖြင့် နောက်မှလိုက်နေကြောင်း သိရသည်။

       တစ်ချိန်တည်းမှာပင် တရုတ်နိုင်ငံသို့ တင်ပို့သည့် အချိုးအစားမှာ ၅၅.၅၇ ရာခိုင်နှုန်းမှ ၅၀.၃၅ ရာခိုင်နှုန်းသို့ ကျဆင်းသွားခဲ့ရာ ၎င်းက ဗီယက်နမ်လိုင်ချီးသီးများသည် တန်ဖိုးမြင့်မားသော အခြားစျေးကွက်များသို့ တဖြည်းဖြည်း တိုးချဲ့နေရာယူလာနိုင်ခြင်းကို ပြသနေကြောင်း သိရသည်။

       ဗီယက်နမ် သစ်သီးဝလံနှင့် ဟင်းသီးဟင်းရွက်အသင်း (VINAFRUIT) ၏ အထွေထွေအတွင်းရေးမှူးချုပ် မစ္စတာ Dang Phuc Nguyen က ပြည်ပတင်ပို့မှု သိသိသာသာ မြင့်တက်လာခြင်းမှာ အချက်အလက်များစွာကြောင့်ဖြစ်သည်ဟု ပြောကြားခဲ့သည်။ ဗီယက်နမ်-ဥရောပလွတ်လပ်သော ကုန်သွယ်မှုသဘောတူညီချက် (EVFTA) မှရရှိသော အခွန်ကင်းလွတ်ခွင့် အားသာချက်များအပြင် စိုက်ပျိုးသည့် ဒေသအများအပြားသည် GlobalGAP စံနှုန်းများကို ရရှိထားကြသဖြင့် စျေးကွက်ကြီးများ၏ အရည်အသွေးနှင့် နောက်ကြောင်းပြန်ခြေရာခံနိုင်မှု လိုအပ်ချက်များကို ပြည့်မီစေခဲ့ခြင်းကြောင့်ဖြစ်ကြောင်း သိရှိရပါသည်။

​Source : VN Express                                                                           

DOCA (ရန်ကုန်)

         နယူးဇီလန်နိုင်ငံ၏ အမဲသား၊ သိုးသားနှင့် ဆိတ်သားတင်ပို့မှုသည် မေလတွင် ဒေါ်လာ ၁.၆ ဘီလီယံအထိ ရောက်ရှိခဲ့ပြီး၊ ယင်းမှာ ပြီးခဲ့သည့်နှစ် အလားတူလထက် ၄၄ ရာခိုင်နှုန်း ပိုမိုများပြားကာ နှစ်လဆက်တိုက် လအလိုက် စံချိန်သစ်တင်နိုင်ခဲ့ခြင်းဖြစ်ကြောင်း သိရပါသည်။ အသားထုတ်လုပ်ရေး လုပ်ငန်းရှင်များအသင်း (Meat Industry Association - MIA) ၏ အဆိုအရ ယခုပမာဏသည် ဧပြီလက တင်ထားခဲ့သည့် ယခင်လအလိုက် စံချိန်ဟောင်းဖြစ်သော ဒေါ်လာ ၁.၄ ဘီလီယံကိုပါ ကျော်လွန်သွားခဲ့ခြင်းဖြစ်ကြောင်း သိရပါသည်။

         MIA ၏ မေလဆိုင်ရာ အချက်အလက်များအရ သိုးသားနှင့်ဆိတ်သား တင်ပို့မှုတန်ဖိုးမှာ ဒေါ်လာ ၅၉၀.၄ သန်းရှိခဲ့ပြီး၊ ဧပြီလ၏ စံချိန်တင်ပမာဏထက် ဒေါ်လာ ၁၇ သန်းခန့် ပိုမိုမြင့်မားခဲ့သလို ၂၀၂၅ ခုနှစ် မေလထက်လည်း ၃၃ ရာခိုင်နှုန်း ပိုမိုမြင့်မားခဲ့ကြောင်း သိရပါသည်။ အမဲသားတင်ပို့မှုမှာမူ တန်ဖိုးအားဖြင့် ဒေါ်လာ ၇၇၁ သန်း ရှိခဲ့ပြီး ဧပြီလ၏ စံချိန်တင်ပမာဏထက် ဒေါ်လာ ၁၆၃ သန်း တိုးတက်လာခဲ့ကာ၊ ပြီးခဲ့သည့် မေလက မှတ်တမ်းတင်ထားခဲ့သည့် တန်ဖိုးထက် ၅၁ ရာခိုင်နှုန်း ပိုမိုမြင့်မားခဲ့ကြောင်း သိရပါသည်။

        MIA ၏ စီအီးအို ဖြစ်သူ Nick Beeby က ယခုအခြေအနေမှာ အထူးထူးခြားဆန်းပြားလှသည်ဟု ပြောကြားခဲ့ပါသည်။ ယခုအခြေအနေသည် စီးပွားရေးအတွက် သတင်းကောင်းတစ်ခုဖြစ်ပြီး နယူးဇီလန်နိုင်ငံထုတ် အမဲသား၊ သိုးသားနှင့်ဆိတ်သားအပေါ် နိုင်ငံတကာဝယ်လိုအား ဆက်လက်အားကောင်းနေမှုကို ထင်ဟပ်စေကြောင်း ၎င်းက ပြောကြားခဲ့ပါသည်။ ပထမသုံးလပတ်တွင်မူ နယူးဇီလန်နိုင်ငံသည် ပြီးခဲ့သည့်နှစ် အလားတူ ကာလနှင့် နှိုင်းယှဉ်ပါက အမဲသား တန်ချိန် ၁၈,၀၀၀ နီးပါးနှင့် သိုး/ဆိတ်သား တန်ချိန် ၁၀,၀၀၀ ခန့် ပိုမိုလျော့နည်း၍ ထုတ်လုပ်ခဲ့ကြောင်း သိရပါသည်။ တရုတ်နိုင်ငံသို့ တင်ပို့မှုတန်ဖိုးများသည် နှစ်အတော်ကြာအတွင်း အမြင့်ဆုံးအဆင့်သို့ ရောက်ရှိခဲ့ပြီး၊ ပင်လယ်ကွေ့ ပူးပေါင်း ဆောင်ရွက်ရေးကောင်စီ (GCC) နိုင်ငံများသို့ တင်ပို့မှုမှာလည်း အရှေ့ အလယ်ပိုင်းပဋိပက္ခနှင့် ဆက်စပ်ပြီး အစောပိုင်းက ကြုံတွေ့ခဲ့ရသည့် အနှောင့်အယှက်များနောက်ပိုင်း ပြန်လည်ဦးမော့လာခဲ့ကြောင်း သိရပါသည်။

         GCC သို့ တင်ပို့မှုများသည် ပြီးခဲ့သည့်နှစ် မေလနှင့် နှိုင်းယှဉ်ပါက ပမာဏအားဖြင့် ၁၆ ရာခိုင်နှုန်းနှင့် တန်ဖိုးအားဖြင့် ၂၆ ရာခိုင်နှုန်း ကျဆင်းခဲ့သော်လည်း၊ ၂၀၂၂ ခုနှစ်မှ ၂၀၂၅ ခုနှစ်အထိ မေလများ၏ ပျမ်းမျှပမာဏနှင့် နှိုင်းယှဉ်ပါက တင်ပို့မှုပမာဏတွင် ၂ ရာခိုင်နှုန်းသာ လျော့နည်းခဲ့ပြီး တန်ဖိုးတွင် ၉ ရာခိုင်နှုန်းသာ ပြန်လည်ကျဆင်းခဲ့ခြင်းဖြစ်ကြောင်း သိရပါသည်။

         သိုးသားနှင့် ဆိတ်သား တင်ပို့မှုပမာဏမှာ ပြီးခဲ့သည့်နှစ် မေလထက် ၁၇ ရာခိုင်နှုန်း တိုးတက်လာပြီး တန်ချိန် ၃၉,၄၇၂ တန် ရှိခဲ့ကာ ငါးနှစ်တာ မေလများ၏ ပျမ်းမျှပမာဏထက် ၇ ရာခိုင်နှုန်း ပိုမိုမြင့်မားခဲ့ပါသည်။ သိုးသားနှင့်ဆိတ်သား တင်ပို့မှု၏ ပျမ်းမျှတန်ဖိုးမှာလည်း တစ်ကီလိုဂရမ်လျှင် ၁၄.၉၆ ဒေါ်လာအထိရှိခဲ့ပြီး စံချိန်သစ်များ တင်နိုင်ခဲ့ကြောင်း သိရပါသည်။ အဆိုပါ တန်ဖိုးများသည် အဓိကစျေးကွက်များသို့ တင်ပို့ရာတွင်လည်း စံချိန်တင်အဆင့်များသို့ ရောက်ရှိခဲ့ရာ အမေရိကန် ပြည်ထောင်စုသို့ တစ်ကီလိုဂရမ်လျှင် ၂၃.၅၆ ဒေါ်လာ၊ ဥရောပသမဂ္ဂ (EU) သို့ ၂၃.၀၉ ဒေါ်လာနှင့် UK သို့ ၁၆.၇၃ ဒေါ်လာ အသီးသီး ရှိခဲ့ကြောင်း သိရပါသည်။

          တရုတ်နိုင်ငံသို့ တင်ပို့မှုမှာမူ တစ်ကီလိုဂရမ်လျှင် ပျမ်းမျှ ၈.၇၇ ဒေါ်လာ ရှိခဲ့ပြီး ၎င်းမှာ လေးနှစ်အတွင်း အမြင့်ဆုံးအဆင့်ဖြစ်ကြောင်း သိရပါသည်။ ပြီးခဲ့သည့်နှစ် မေလနှင့် နှိုင်းယှဉ်ပါက EU နှင့် ဆော်ဒီအာရေဗျနိုင်ငံတို့မှလွဲ၍ အဓိကစျေးကွက်အများစုသို့ တင်ပို့မှုပမာဏ တိုးတက်လာခဲ့ပြီး၊ အဆိုပါ နှစ်နိုင်ငံသို့ တင်ပို့မှုမှာမူ ၅ ရာခိုင်နှုန်းနှင့် ၄၂ ရာခိုင်နှုန်း အသီးသီး ကျဆင်းခဲ့ကြောင်းနှင့် အမဲသား တင်ပို့မှုပမာဏမှာ ပြီးခဲ့သည့်နှစ် မေလထက် ၂၆ ရာခိုင်နှုန်း တိုးတက်လာပြီး လအလိုက် စံချိန်တင်စုစုပေါင်းပမာဏ တန်ချိန် ၅၇,၈၉၉ တန် သို့ ရောက်ရှိခဲ့ကြောင်း သိရှိရပါသည်။

         ကနေဒါ၊ ကိုရီးယားနှင့် ထိုင်ဝမ်နိုင်ငံများသို့ တင်ပို့မှုပမာဏမှာ ပြီးခဲ့သည့်နှစ် မေလထက် လျော့နည်းခဲ့သော်လည်း၊ အဆိုပါ ကျဆင်းမှုကို နယူးဇီလန်၏ အကြီးဆုံး အမဲသားစျေးကွက်ကြီးနှစ်ခုဖြစ်သည့် အမေရိကန်နှင့် တရုတ်နိုင်ငံတို့သို့ ပိုမိုအလုံးအရင်းဖြင့် တင်ပို့နိုင်မှုက အဖတ်ဆယ် ပိုလျှံစေခဲ့ကြောင်း သိရပါသည်။

        အမေရိကန်သို့ တင်ပို့မှုမှာ ၅၉ ရာခိုင်နှုန်း တိုးတက်လာပြီး တန်ချိန် ၂၈,၁၉၈ တန် ရှိခဲ့ကာ၊ တရုတ်နိုင်ငံသို့ တင်ပို့မှုမှာ ၂၉ ရာခိုင်နှုန်း တိုးတက်လာပြီး တန်ချိန် ၁၄,၆၁၂ တန် ရှိခဲ့ကြောင်း သိရပါသည်။ ကနေဒါ၊ ကိုရီးယားနှင့် ဖိလစ်ပိုင်နိုင်ငံများသို့ တင်ပို့မှုတန်ဖိုး ကျဆင်းသွားခြင်းကို အမေရိကန်နှင့် တရုတ်နိုင်ငံတို့သို့ အဆမတန် တိုးတက်တင်ပို့နိုင်မှုက လွှမ်းမိုးကျော်လွန်သွားခဲ့ရာ၊ အမေရိကန်သို့ တင်ပို့မှုမှာ ၈၈ ရာခိုင်နှုန်း တိုးတက်ပြီး စံချိန်တင် ဒေါ်လာ ၄၁၃ သန်းအထိ ရှိခဲ့ကာ၊ တရုတ်နိုင်ငံသို့ တင်ပို့မှုမှာလည်း ၄၇ ရာခိုင်နှုန်း တိုးတက်၍ ဒေါ်လာ ၁၂၉ သန်းအထိရှိခဲ့ကြောင်း သိရှိရပါသည်။

        အမဲသားတင်ပို့မှု၏ ပျမ်းမျှတန်ဖိုးမှာ တစ်ကီလိုဂရမ်လျှင် ၁၃.၃၂ ဒေါ်လာရှိခဲ့ပြီး ဧပြီလ၏ စံချိန်တင်ပမာဏထက် အနည်းငယ်သာ လျော့နည်းခဲ့ပြီး တရုတ်နိုင်ငံသို့ တင်ပို့မှုမှာမူ တစ်ကီလိုဂရမ်လျှင် ပျမ်းမျှ ၈.၈၆ ဒေါ်လာ ရှိခဲ့ပြီး ၎င်းမှာ လေးနှစ်နီးပါးကာလအတွင်း အမြင့်ဆုံးအဆင့်ဖြစ်ကြောင်း သိရှိရပါသည်။

Source: Farmersweekly                                                              

DOCA (ရန်ကုန်)

​          ၂၀၂၆ ခုနှစ် နှစ်ဆန်းပိုင်းက အမြင့်ဆုံးဖြစ်ခဲ့သည့် စျေးနှုန်းများနှင့် နှိုင်းယှဉ်ပါက ဝက်သားစျေးနှုန်းများသည် ၁၃ ရာခိုင်နှုန်းမှ ၁၄ ရာခိုင်နှုန်းအထိ ကျဆင်းသွားခဲ့သော်လည်း ဟိုချီမင်းစီးတီးရှိ ရပ်ကွက်စျေးအများစုတွင် လက်လီအသားစျေးနှုန်းများမှာ ပြောင်းလဲမှုမရှိသ လောက် ဖြစ်နေသဖြင့် စားသုံးသူများမှာ စျေးနှုန်းသက်သာမှု အကျိုးကျေးဇူးကို မခံစားရသေးကြောင်း သိရသည်။

​          ဇူလိုင်လ ၁ ရက်နေ့ အစီရင်ခံစာများအရ တစ်နိုင်ငံလုံးအတိုင်းအတာဖြင့် ဝက်အရှင် စျေးနှုန်းများသည် ယခင်နေ့ကထက် ၁,၀၀၀ မှ ၂,၀၀၀ ဗီယက်နမ်ဒေါင် (VND) ခန့် ဆက်လက်ကျ ဆင်းခဲ့ပြီး တစ်ကီလိုဂရမ်လျှင် ၆၀,၀၀၀ မှ ၆၆,၀၀၀ ဒေါင်အထိ ဖြစ်လာခဲ့သည်။ တောင်ပိုင်းဒေသသည် စျေးအနည်းဆုံးဖြစ်ပြီး Dong Thap နှင့် Ca Mau တို့တွင် ၆၀,၀၀၀ ဒေါင်၊ Tay Ninh၊ An Giang၊ Vinh Long နှင့် Can Tho တို့တွင် ၆၁,၀၀၀ ဒေါင် ရှိပြီး၊ Dong Nai နှင့် ဟိုချီမင်းစီးတီးတို့တွင်မူ တစ်ကီလိုဂရမ်လျှင် ၆၀,၀၀၀ မှ ၆၂,၀၀၀ ဒေါင်ကြား အတက်အကျရှိနေကြောင်း သိရသည်။

​         မွေးမြူရေးအသင်း၏ ဒုတိယဥက္ကဋ္ဌ Nguyen Kim Doan ၏ ပြောကြားချက်အရ ဝက်အရှင်စျေးနှုန်းများ ကျဆင်းရခြင်းမှာ အချက်အလက်များစွာ ပေါင်းစပ်နေခြင်းကြောင့် ဖြစ်သည်။ ပူပြင်းသည့် ရာသီဥတုကြောင့် ဝက်သားဝယ်လိုအား နှေးကွေးသွားသော်လည်း ကုန်ပစ္စည်း ထောက်ပံ့မှုမှာမူ တည်ငြိမ်နေသည်။ ဝက်အုပ်များတွင် ရောဂါကျရောက်နိုင်ခြေရှိသောကြောင့် မွေးမြူရေးသမားအများစုသည် ဆုံးရှုံးနိုင်ခြေကို လျှော့ချရန်အတွက် ၎င်းတို့၏ ဝက်များကို စောစီးစွာ ထုတ်ရောင်းခဲ့ကြောင်း သိရသည်။

​         ထို့အပြင် မကြာသေးမီက အာဏာပိုင်များက မွေးမြူရေးအခြေအနေ၊ ပတ်ဝန်းကျင်နှင့် အစားအသောက်ဘေးကင်းလုံခြုံမှုဆိုင်ရာ စစ်ဆေးမှုများကို တိုးမြှင့်လုပ်ဆောင်ခဲ့ခြင်းကြောင့် အချို့သောမွေးမြူရေးခြံများသည် ဆက်လက်မွေးမြူခြင်းမပြုတော့ဘဲ ဝက်အုပ်များကို စောစီးစွာ ထုတ်ရောင်းခဲ့ကြသဖြင့် ရေတိုတွင် ဝက်သားအဝင် ပိုမိုများပြားလာခဲ့ကြောင်း သိရသည်။

​          ရောင်းစျေးများ ကျဆင်းသွားသော်လည်း ကုန်ထုတ်လုပ်မှုစရိတ်များမှာမူ မြင့်တက်လာခဲ့သည်။ နှစ်ဆန်းပိုင်းကတည်းက တိရစ္ဆာန်အစာစျေးနှုန်းများ အကြိမ်ကြိမ် မြင့်တက်ခဲ့ရာ ဝက်ကီလိုဂရမ် ၁၀၀ မွေးမြူရန်အတွက် ကုန်ကျစရိတ်မှာ ၃၀၀,၀၀၀ ဒေါင်ခန့် ထပ်မံတိုး လာခဲ့သည်။ လက်ရှိတွင် စျေးနှုန်းမှာ တစ်ကီလိုဂရမ်လျှင် ၆၀,၀၀၀ ဒေါင်ခန့်သာရှိသဖြင့် မွေးမြူရေးသမားအများစုမှာ အရှုံးပေါ်နေကြပြီး စျေးနှုန်းများ ဆက်လက်ကျဆင်းနေခြင်းနှင့် ရောဂါဘေးအန္တရာယ် ခြိမ်းခြောက်မှုများ ရှိနေခြင်းတို့ကြောင့် ဆုံးရှုံးမှု သက်သာစေရန် စောစီးစွာ အတင်းအကျပ် ထုတ်ရောင်းနေကြရကြောင်း သိရသည်။

​        ပြည်တွင်းထောက်ပံ့မှုအပြင် အသားတင်သွင်းမှု များသည်လည်း သိသိသာသာ မြင့်တက်လာခဲ့သည်။ စိုက်ပျိုးရေးနှင့် ကုန်သွယ်ရေးဝန်ကြီးဌာန၏ အဆိုအရ ၂၀၂၆ ခုနှစ် ပထမငါးလ အတွင်း မွေးမြူရေးကဏ္ဍ သွင်းကုန်ပမာဏသည် အမေရိကန်ဒေါ်လာ ၂.၂ ဘီလီယံအထိ ရှိခဲ့ပြီး ယခင်နှစ် ကာလတူထက် ၃၀ ရာခိုင်နှုန်းနီးပါး တိုးတက်လာခဲ့သည်။ အသားနှင့် စားသုံးနိုင်သော ဘေးထွက်ပစ္စည်းများ တင်သွင်းမှုမှာ အမေရိကန်ဒေါ်လာ ၉၁၀ သန်းကျော် ရှိခဲ့ပြီး ၂၆ ရာခိုင်နှုန်း တိုးတက်လာခဲ့သည်။ ပြည်တွင်းအသားစျေးနှုန်းများသည် ဒေသတွင်းစျေးကွက်အများစုထက် ၃၀ ရာခိုင်နှုန်းမှ ၄၀ ရာခိုင်နှုန်းခန့် ပိုမိုမြင့်မားနေသဖြင့် ပြည်ပမှ တင်သွင်းလာသော အသားများသည် ပြည်တွင်းဝက်သားစျေးကွက်အပေါ် နောက်ထပ် ယှဉ်ပြိုင်မှုဆိုင်ရာ ဖိအားများကို ဆက်လက်ဖြစ်ပေါ်စေလျက်ရှိကြောင်း သိရှိရပါသည်။

​Source : VN Express                                                                           

DOCA (ရန်ကုန်)