B60 သို့ မတိုးမြှင့်မီ B50 ကို ဦးစွာ အခြေခိုင်အောင် လုပ်ဆောင်ရန် အင်ဒိုနီးရှားအစိုးရအား တိုက်တွန်း
အင်ဒိုနီးရှားစားအုန်းဆီအသင်း (GAPKI) ဥက္ကဋ္ဌ Mr. Eddy Martono က အစိုးရက ၂၀၂၇ ခုနှစ်၊ ဇန်နဝါရီလတွင် အကောင်အထည်ဖော်နိုင်ရေး ဦးတည်ဆောင်ရွက်နေသည့် စားအုန်းဆီ အချိုးအစား ၆၀ % ပါဝင်သော ဇီဝဒီဇယ်ဆီ (B60) အစီအစဉ်သို့ အဆင့်မြှင့်တင်ထုတ်လုပ်ခြင်း မပြုမီ စားအုန်းဆီ အချိုးအစား ၅၀ % ပါဝင်သည့် ဇီဝဒီဇယ်ဆီ(B50) အကောင်အထည်ဖော်မှုကို ပိုမို တိုးတက်ကောင်းမွန်အောင် ဖော်ဆောင်သင့်ကြောင်း အကြံပြုပြောချက်များကို အင်ဒိုနီးရှား စားအုန်းဆီအသင်း (GAPKI) ၏ website ၌ စက်တင်ဘာလ ၁၄ ရက်နေ့တွင် ဖော်ပြထားပါသည်။
အင်ဒိုနီးရှား စားအုန်းဆီအသင်း (GAPKI) ဥက္ကဋ္ဌ Eddy Martono က Metro TV ၏ "Zona Bisnis" အစီအစဉ်တွင် B60 ဇီဝဒီဇယ်ဆီ ဖော်ဆောင်ရေး အခွင့်အလမ်းနှင့် စိန်ခေါ်မှုများကို အင်တာဗျူးဖြေကြားခဲ့ပြီး စားအုန်းဆီအခြေခံစွမ်းအင်ကဏ္ဍအရှိန်မြှင့်ရန် အစိုးရ၏တွန်းအားပေးမှု ကြောင့် ဤအင်တာဗျူး ဖြစ်ပေါ်လာခြင်းဖြစ်ကြောင်း၊ ၎င်းက FAME ထုတ်လုပ်မှု လိုအပ်ချက် အတွက် စားအုန်းဆီကြမ်း (CPO)၊ စားအုန်းဆီ သို့မဟုတ် စွန့်ပစ်ဆီ (HVO) တို့ကို ရောစပ်မည့် B60 ဖော်မြူလာ ရွေးချယ်မှုများ အပါအဝင် မီသနော ထုတ်လုပ်ရန် ကျောက်မီးသွေးမှ ပြောင်းလဲရေး ကြိုးပမ်းမှုများကို ပြောကြားခဲ့ပြီး၊ လက်ရှိတွင် စားအုန်းဆီ ထောက်ပံ့နိုင်မှု လိုအပ်ချက်မှာ တန်ချိန် ၂ သန်းမှ ၃ သန်းကြား ရှိကြောင်း ရင်းနှီးမြှုပ်နှံမှု ဒုတိယဝန်ကြီး၏ အဆိုကို ကိုးကား၍ ထုတ်ဖော် ပြောဆိုခဲ့သည်။
Eddy က ၂၀၂၆ ခုနှစ်တွင် B50 အကောင်အထည်ဖော်မှုသည် သိသိသာသာပြဿနာများ မရှိဘဲ ဆက်လက်လုပ်ဆောင်နေကြောင်း၊ ၂၀၂၆ ခုနှစ်၊ ဇူလိုင်လတွင် စတင်ထုတ်လုပ်ပြီးနောက် နှစ်လ အကူးအပြောင်းကာလအတွင်း စားအုန်းဆီကြမ်းလိုအပ်ချက် လုံလောက်မှုရှိသည်ဟူသော အချက်ကို အလေးပေးပြောကြားခဲ့သည်။ သို့သော်လည်း မီသိုင်းလ် အက်စတာ အဆီအက်ဆစ် (Fatty Acid Methyl Ester- FAME) ထုတ်လုပ်မှု စွမ်းရည်သည် ကောင်းမွန်စွာ မလည်ပတ်နိုင်သေးဘဲ လက်ရှိသုံးစွဲမှုနှုန်းအရ FAME ထုတ်လုပ်မှုစွမ်းရည်သည် အမြင့်ဆုံး ၇၀ % နှင့် ၈၀ % ကြားရှိပြီး ယင်းအခြေအနေသည် ၂၀၂၇ ခုနှစ်တွင် အမှန်တကယ်သိသာလာမည်ဖြစ်ကြောင်း ၎င်းက မှတ်ချက် ပြုပြောကြားခဲ့သည်။
Eddy က ၂၀၂၇ ခုနှစ်တွင် အမှန်တကယ် ကြုံတွေ့လာရမည့် စိန်ခေါ်မှုမှာ B60 ကို အကောင်အထည်ဖော်ရေး မဟုတ်ဘဲ လက်ရှိ B50 အသုံးပြုရန် သတ်မှတ်ထားသည့် မူဝါဒကို ရေရှည်တည်တံ့စွာ ဆက်လက်အကောင်အထည်ဖော်နိုင်ရေး ဖြစ်ကြောင်း ရှင်းပြခဲ့သည်။
အယ်လ်နီညိုရာသီဥတု၏ သက်ရောက်မှုသည် ဆီအုန်းစိုက်ခင်းအများအပြားတွင် မျိုးအောင်ရန် ကြိုးပမ်းမှုကို အဟန့်အတားဖြစ်စေကြောင်း ၎င်းက မှတ်ချက်ပြုပြောကြားခဲ့သည်။ သို့သော်လည်း အာချေး (Aceh)၊ မြောက် ဆူမားတြား (North Sumatra)၊ အနောက် ဆူမတြား (West Sumatra)၊ ဘန်ကူလူ(Bengkulu)နှင့် ကလီမန်တန် မြောက်ပိုင်းစသည့် ဒေသများတွင် မိုးရွာသွန်းမှု ဆက်လက် ဖြစ်ပေါ်နေသောကြောင့် ထုတ်လုပ်မှုကျဆင်းမှုသည် ကနဦးခန့်မှန်းထား သလောက် ဆိုးရွားခြင်း မရှိနိုင်ကြောင်း ၎င်းက ဆိုသည်။
အစောပိုင်း ခန့်မှန်းချက်များအရ ထုတ်လုပ်မှု တန်ချိန် ၅ သန်းအထိ ကျဆင်းသွားသည်ဟု ခန့်မှန်းထားသော်လည်း နောက်ဆုံးထွက်ရှိချက်များအရ ကျဆင်းမှုသည် တန်ချိန် ၃ သန်းအထိ ရှိနိုင် ကြောင်း ၎င်းက ပြောကြားခဲ့သည်။ ၂၀၂၅ ခုနှစ်တွင် ထုတ်လုပ်မှုသည် တန်ချိန် ၃၂ သန်း ရှိခဲ့ပြီး ၂၀၂၆ ခုနှစ်တွင် ထုတ်လုပ်မှု အတော်လေးတည်ငြိမ်နေကာ ၂၀၂၇ ခုနှစ်တွင်မူ ထုတ်လုပ်မှု အနည်း ငယ် တိုးတက်လာမည် မျှော်လင့်ထားသော်လည်း ၂၀၂၇ ခုနှစ်တွင် တန်ချိန် ၂၇ သန်းဝန်းကျင်အထိ ကျဆင်းသွားနိုင်ကြောင်း ခန့်မှန်းထားသည်။
ထုတ်လုပ်မှုကျဆင်းခြင်းသည် ပို့ကုန်ပမာဏအတွက် တိုက်ရိုက်သက်ရောက်မှု ရှိကြောင်း၊ ဇီဝဒီဇယ်ဆီ ထုတ်လုပ်ရေးအစီအစဉ်များအတွက် လိုအပ်သော ထောက်ပံ့ကြေးများအတွက် အဓိက ရန်ပုံငွေအရင်းအမြစ်ဖြစ်သည့် ပို့ကုန်ခွန်ကောက်ခံမှုမှရရှိသည့်၀င်ငွေကို ထိခိုက်စေမည်ဖြစ်ကြောင်း Mr. Eddy က မှတ်ချက်ပြုပြောကြားသည်။ ထို့ပြင် B60 အစီအစဥ်ကို အကောင်အထည်ဖော်မည် ဆိုပါက တင်ပို့မှုကျဆင်းနိုင်ပြီး ပို့ကုန်တန်ချိန် ၂၃ သန်းခန့်အထိ ကျဆင်းသွားနိုင်သည်ဟု ခန့်မှန်း ထားသောကြောင့် ပို့ကုန်အခွန်စည်းကြပ်မှုမှရရှိသော၀င်ငွေမှာ ပိုမိုကျဆင်းသွား မည်ဖြစ်ကြောင်း ၎င်းက ခန့်မှန်းပြောကြားထားသည်။
B60 ကို ချက်ခြင်းတိုးမြှင့်မည့်အစား ၂၀၂၇ ခုနှစ်အထိ စားအုန်းဆီ စွမ်းဆောင်ရည်၊ FAME ထုတ်လုပ်မှုနှင့် ဖြန့်ဖြူးရေးအခြေခံအဆောက်အအုံများ ပြတ်တောက်မှုအပါအဝင် B50 အကောင် အထည်ဖော်မှုကို အစိုးရက ကျစ်ကျစ်လစ်လစ်စုစည်းဆောင်ရွက်သင့်သည်ဟု Mr. Eddy က ၎င်း၏ ခိုင်မာသော သဘောတူညီချက်ကို ဖော်ပြပြောဆိုခဲ့သည်။
ပြည်တွင်းလုပ်ပိုင်ခွင့်များကို ဦးစားပေးလုပ်ဆောင်ခြင်းကြောင့် အင်ဒိုနီးရှား၏ စားအုန်းဆီ ရောင်းလိုအားသည် ကမ္ဘာ့ဈေးကွက်သို့ ကျဆင်းသွားပါက စားအုန်းဆီအပါအဝင် ကမ္ဘာ့စားသုံးဆီ ဈေးနှုန်းများ မြင့်တက်လာနိုင်ကြောင်း ၎င်းကရှင်းပြသည်။ ဤအခြေအနေက ကမ္ဘာ့စားအုန်းဆီ အများဆုံးထုတ်လုပ်သူလည်းဖြစ် အများဆုံးသုံးစွဲသူလည်းဖြစ်သည့် အင်ဒိုနီးရှားနိုင်ငံအပေါ် သက်ရောက်မှုရှိလာမည်ဖြစ်ပြီး ဟင်းချက်ဆီဈေးနှုန်းများ မြင့်တက်လာစေသည့်အပြင် စားအုန်း ဆီအား ကုန်ကြမ်းအဖြစ်မှီခိုအားထားနေရသည့် အခြားသောထုတ်ကုန်အမျိုးမျိုး၏ ကုန်ကျစရိတ် များလည်း မြင့်တက်လာနိုင်မည်ဖြစ်သည်။
သို့ရာတွင် B60 ကို ကျယ်ကျယ်ပြန့်ပြန့် ဘက်စုံစမ်းသပ်ခြင်းမရှိဘဲ ချက်ခြင်းအကောင် အထည် ဆက်လက်မဖော်ဆောင်သင့်ကြောင်း၊ အထူးသဖြင့် စီစဉ်ထားသော B60 ဇီဝဒီဇယ်ဆီ ထုတ်လုပ်ရေးဖော်မြူလာသည် စားအုန်းဆီကြမ်း (CPO) တစ်မျိုးတည်းမှ ထုတ်လုပ်ခြင်း မဟုတ်ဘဲ Hydrotreated Vegetable Oil (HVO) လည်း ပါ၀င်သောကြောင့် ဖြစ်ကြောင်း ၎င်းက အလေးပေး ပြောကြားခဲ့သည်။ ရောစပ်ဖွဲ့စည်းမှုတွင် ထိုသို့သော ပြောင်းလဲမှုများသည် အင်ဂျင်စက် စွမ်းဆောင်ရည်ကို ထိခိုက်စေနိုင်သောကြောင့် ရှည်လျားသောစမ်းသပ်မှုကာလတစ်ခု လိုအပ်ပါ သည်။
B60 ဇီဝဒီဇယ်ဆီထုတ်လုပ်ရေးအစီအစဉ်ကို ၂၀၂၇ ခုနှစ်၊ ဇန်နဝါရီလတွင် အကောင် အထည်ဖော်ရန်မဖြစ်နိုင်သည်ဟု ယူဆပါကြောင်း၊ စမ်းသပ်မှုကိုဦးစွာပြုလုပ်ရမည် ဖြစ်သောကြောင့် လက်တွေ့အကောင်အထည်ဖော်ရန် မဖြစ်နိုင်သေးကြောင်း အင်ဒိုနီးရှား စားအုန်းဆီအသင်း (GAPKI) ဥက္ကဋ္ဌ Mr. Eddy က အခိုင်အမာပြောကြားခဲ့သည်။
Source: Indonesia Palm Oil Association (GAPKI), September 14, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)
