ရုရှားဒုတိယဝန်ကြီးချုပ် Dimitri Chernyshenko က ရုရှားနှင့် ဗီယက်နမ်နိုင်ငံတို့ အနေဖြင့် နှစ်နိုင်ငံရေရှည်ဖွံ့ဖြိုးတိုးတက်မှုအတွက် အရှိန်အဟုန်သစ်များဖန်တီးနိုင်ရေးအတွက် အလားအလာကောင်းမွန်သည့် ပူးပေါင်းဆောင်ရွက်မှု နယ်ပယ်သစ်များကို တိုးချဲ့ဆောင်ရွက်သင့်ကြောင်း အဆိုပြုပြောကြားခဲ့ပါသည်။ ရုရှားနိုင်ငံဆိုင်ရာ ဗီယက်နမ်သံအမတ်ကြီး Dang Minh Khoi နှင့် ဩဂုတ် ၂၆ ရက်တွင် တွေ့ဆုံစဉ် ချာနီရှန်ကိုက ဗီယက်နမ်သည် အရှေ့တောင် အာရှဒေသတွင် ရုရှား၏အရေးပါသော မိတ်ဖက်နိုင်ငံများအနက်တစ်နိုင်ငံဖြစ်ကြောင်း အတည်ပြု ပြောကြားခဲ့ပါသည်။ ဗီယက်နမ်-ရုရှား ဘက်စုံမဟာဗျူဟာမြောက်မိတ်ဖက်ဆက်ဆံရေးကိုအခြေခံ၍ နှစ်နိုင်ငံအကြား ကာလရှည်ကြာချစ်ကြည်ရင်းနှီးမှု၊ နီးကပ်သောဆက်ဆံရေးနှင့် နိုင်ငံရေးအရအပြန်အလှန်ယုံကြည်မှုမြင့်မားမှုတို့မှာ ဆက်လက်တိုးတက်လျက်ရှိကြောင်း ၎င်းကပြောကြား ခဲ့ပါသည်။ နှစ်နိုင်ငံဆက်ဆံရေးတွင် အနှစ်သာရရှိသည့်တိုးတက်မှုများရရှိနေခြင်းကိုလည်း ဒုတိယဝန်ကြီးချုပ်ကကြိုဆိုခဲ့ပြီး ၂၀၂၆ ခုနှစ်သည် ဗီယက်နမ်နှင့် ယူရေးရှားစီးပွားရေးသမဂ္ဂ (EAEU) အကြား လွတ်လပ်သောကုန်သွယ်ရေးသဘောတူညီချက် စတင်အသက်ဝင်ခဲ့သည့် ၁၀ နှစ်မြောက်နှစ်ဖြစ်ကြောင်း ထောက်ပြပြောကြားခဲ့ပါသည်။ ယင်းသဘောတူညီချက်သည် ထိရောက်မှုရှိကြောင်းသက်သေပြနိုင်ခဲ့ပြီး နှစ်နိုင်ငံကုန်သွယ်မှုတိုးတက်ရေးအတွက် အရေးပါ သည့် အထောက်အကူပြုမှုများပေးစွမ်းခဲ့ကြောင်း ၎င်းကဆိုပါသည်။ တွေ့ဆုံဆွေးနွေးမှုတွင် ခရီးသွားကဏ္ဍပြန်လည်နာလန်ထူလာမှုနှင့် အရှိန်အဟုန်ဖြင့်တိုးတက်လာမှုကို အဓိကအချက် အဖြစ် ထည့်သွင်းဆွေးနွေးခဲ့ကြကြောင်း သိရပါသည်။ ရုရှားနိုင်ငံမှ ဗီယက်နမ်သို့လာရောက်သည့် ခရီးသွားဦးရေမှာ နှစ်ဆနီးပါးတိုးမြင့်လာခဲ့ကြောင်း သိရပါသည်။ ဗီယက်နမ်နိုင်ငံသည် ၂၀၂၅ ခုနှစ်တွင် ရုရှားခရီးသွား ၆၉၀,၀၀၀ ကို လက်ခံခဲ့ပြီး ၂၀၂၆ ခုနှစ် ပထမနှစ်ဝက်အတွင်း၌ပင် ရုရှားခရီးသွား ၈၆၃,၀၀၀ အထိ ရောက်ရှိခဲ့ကြောင်း သိရပါသည်။ ယင်းကိန်းဂဏန်းများသည် ရုရှားခရီးသွားများအတွက် ဗီယက်နမ်နိုင်ငံ၏ ခရီးသွားလာရေးနေရာအဖြစ် ဆွဲဆောင်မှုပိုမို မြင့်တက်လာနေခြင်းကို ထင်ရှားစွာဖော်ပြနေကြောင်း နှစ်ဖက်ကပြောကြားခဲ့ပါသည်။ တစ်ချိန် တည်းမှာပင် ရုရှားနိုင်ငံသို့သွားရောက်လည်ပတ်သည့် ဗီယက်နမ်ခရီးသွားဦးရေမှာလည်း သိသိ သာသာ တိုးတက်လာခဲ့ကြောင်း သိရပါသည်။ ခရီးသွားကဏ္ဍ အရှိန်အဟုန်ဖြင့် ပြန်လည်နာလန် ထူလာမှုကို လေကြောင်းဆက်သွယ်မှု တိုးတက်ကောင်းမွန်စေရေးအတွက် နှစ်ဖက်ပူးပေါင်း ဆောင်ရွက်မှုများက အထောက်အကူပြုခဲ့ကြောင်း သိရပါသည်။ လက်ရှိတွင် နှစ်နိုင်ငံမြို့များကို ဆက်သွယ်ပြေးဆွဲနေသည့် ခရီးစဉ်လမ်းကြောင်း ၁၅ ခု၌ လေယာဉ်ခရီးစဉ် ၃၁ ခု ပြေးဆွဲ လျက်ရှိရာ လေကြောင်းကွန်ရက်ကို ဆက်လက်တိုးချဲ့နိုင်ရေးအတွက် အခြေခံကောင်းတစ်ရပ် ဖြစ်လာစေကြောင်း သိရပါသည်။ ဗီယက်နမ်သံအမတ်ကြီး Dang Minh Khoi က ဗီယက်နမ်-ရုရှား ဘက်စုံမဟာဗျူဟာမြောက်မိတ်ဖက်ဆက်ဆံရေးသည် ကဏ္ဍပေါင်းစုံတွင် အပြုသဘော ဆောင်စွာ ဆက်လက်ဖွံ့ဖြိုးတိုးတက်လျက်ရှိကြောင်း ပြောကြားခဲ့ပါသည်။ ဗီယက်နမ်နိုင်ငံသည် ရုရှားနှင့် ဆက်ဆံရေးကို အလွန်အရေးထားပြီး နိုင်ငံရေး၊ စွမ်းအင်နှင့် ရေနံနှင့်သဘာဝ ဓာတ်ငွေ့ကဲ့သို့ ရိုးရာပူးပေါင်းဆောင်ရွက်မှုနယ်ပယ်များသာမက သိပ္ပံ၊ ပညာရေး၊ ယဉ်ကျေးမှု၊ အားကစားနှင့် ခရီးသွားကဏ္ဍများတွင်ပါ လက်တွေ့ကျပြီး ထိရောက်သော ပူးပေါင်း ဆောင်ရွက်မှုများကို ဆက်လက်မြှင့်တင်လိုကြောင်း ၎င်းကအတည်ပြုပြောကြားခဲ့ပါသည်။ ယင်းကဲ့သို့ ပူးပေါင်းဆောင်ရွက်မှုများသည် နှစ်နိုင်ငံဆက်ဆံရေးကို ပိုမိုနက်ရှိုင်းခိုင်မာစေမည့် အပြင် နှစ်နိုင်ငံပြည်သူများအတွက်လည်း လက်တွေ့ကျသည့် အကျိုးကျေးဇူးများ ဆောင်ကြဉ်း ပေးနိုင်မည်ဖြစ်ကြောင်း ၎င်းက ပြောကြားခဲ့ပါသည်။
DOCA (ရန်ကုန်)