ပြည်ဈေးကွက်တွင်မိုးရာသီဝါတွင်းကာလတွင် ထွက်ရှိသော ဝါးယောင်းမှိုများ ဇူလိုင်လပထမ ပတ်မှစတင် ဝင်ရောက်မှုရှိပြီး ပြည်မြို့အနီးတဝိုက်ဒေသများဖြစ်သော မှော်ဇာ၊ သဇင်လှ၊ ပျဉ်းပင်ကိုင်း စသည့်ရွာများနှင့် ပြည်မြို့အနောက်ဘက်ကမ်းဖြစ်သော ရွှေဘုံသာ၊ ညောင်ပင်သာ၊ မန်ကျည်းစု၊ ဆင်တဲ ဒေသတို့မှထွက်ရှိပြီး ရာသီဥတုမှာမိုးရွာလိုက်၊ နေပူလိုက်နှင့် မှိုထွက်ရန် အကောင်းဆုံးရာသီဖြစ်သည့် အတွက် ထိုဒေသများမှ ဈေးကွက်သို့ဝင်ရောက်မှု ရှိနေကြောင်း သိရပါသည်။ ဝါးယောင်းမှိုကို ပြည်ဒေသတွင်အဓိကအားဖြင့် မှိုချဉ်တည်၍ စားသုံးကြပြီး မှိုခြောက် အဖြစ်လည်းကောင်း၊ သတ်သတ်လွတ်သမားများအတွက် ကန်စွန်းရွက်နှင့် ကြော်စားခြင်းမှိုခြောက်ကို ရေစိမ်ပြီး ငြုတ်သီးခြောက်၊ ငြုတ်သီးစိမ်းတို့နှင့်ချက်ပြုတ်စားသုံးကြပါသည်။ ပြည်ဈေးကွက်တွင်ရာသီစာ ဖြစ်တဲ့ဝါးယောင်းမှိုများကို ပေါ်ဦးပေါ်ဖျား များဖြစ်သည့်အတွက် ဈေးကောင်းရနေပြီး တစ်ဆယ်ကျပ်သား ကျပ်(၁၅၀၀-၁၈၀၀)ထိ ဈေးကောင်းရ၍ ရောင်းချကြောင်း သိရပါသည်။
DOCA(ပဲခူး)