ပြည်တွင်းကုန်သွယ်မှုသတင်း

နာနတ်သီး၏အရသာကို လူအများကြိုက်နှစ်သက်ကြပြီး အသီး၏အရောင်အဆင်းမှာလည်း ဆွဲဆောင်မှုရှိသောကြောင့် စားသုံးသူများကြိုက်နှစ်သက်စွာ စားသုံးလေ့ရှိသည့် ရာသီပေါ်သီးနှံတစ်မျိုး ဖြစ်ပါသည်။ နာနတ်သီးသည် ဗီတာမင်စီများစွာပါဝင်သောကြောင့် ခုခံစွမ်းအားကို မြင့်မားစေပြီး ရေဓာတ်ကိုလည်း ပြန်လည်ဖြည့်တင်းပေးသည့်အပြင် ကျန်းမာရေးနှင့်အလှအပရေးရာအတွက်လည်း ကောင်းမွန်သောအသီးဖြစ်ပါသည်။ မိုးရာသီအစ ဇွန်လနှောင်းပိုင်းတွင် ရာသီပေါ်သီးနှံတစ်မျိုးဖြစ်သည့် မြစ်ကြီးနားနာနတ်သီးများ လှိုင်လှိုင်ထွက်ပေါ်လာပြီး ဈေးကွက်အတွင်းတွင်ရောင်းချလျက်ရှိပါသည်။ မြစ်ကြီးနားဒေသထွက် နာနတ်သီးသည် အရသာချိုမွှေး၍ မျက်ဆံတိမ်သောကြောင့် ဈေးကွက်အတွင်းတွင် နာမည်ရသော သီးနှံ တစ်မျိုးဖြစ်ပါသည်။ မြစ်ကြီးနားဒေသထွက်နာနတ်သီးကို မန်ခိန်၊ ရွှေပြည်သာ၊ နန်ကျင်၊ နောင်နန်း၊ ရွှေစက်ဒေသများရှိ စိုက်ပျိုးရေးခြံများယာခင်းများတွင် တစ်နိုင်တစ်ပိုင်စိုက်ပျိုးကြပါသည်။ မြစ်ကြီးနား နာနတ်သီးများ ထွက်ပေါ်လာသည်နှင့် သီးနှံကုန်သည်များအနေဖြင့် အခင်းပြတ် ဝယ်ယူမှုရှိသလို အလုံးလိုက်ဝယ်ယူမှုများလည်း ရှိပါသည်။ အခင်းပြတ်ဝယ်ယူရာတွင် အခင်းအတွင်း အသီးအရေအတွက်အပေါ် မူတည်၍ အပင်ရေ(၂၀၀၀)ပါ အခင်းကွက်အား (၅,၅၀၀,၀၀၀)ကျပ်မှ (၆,၀၀၀,၀၀၀)ကျပ် အထိ ဝယ်ယူနေကြောင်း၊ အလုံးလိုက်ဝယ်ယူရာတွင် အလုံးအကြီးအသေး ရောရာတစ်လုံး (၃၀၀၀) ကျပ်မှ (၄၀၀၀) ကျပ်အထိ ဝယ်ယူရရှိကြောင်း သီးနှံကုန်သည် တစ်ဦးထံမှ သိရပါသည်။ ဈေးကွက်အတွင်းတွင် မြစ်ကြီးနားဒေသထွက် နာနတ်သီး အကြီးတစ်လုံးလျှင် (၄၅၀၀) ကျပ်မှ (၅၀၀၀) ကျပ်အထိ၊ အသေးတစ်လုံးလျှင် (၃၅၀၀)ကျပ်မှ (၄၀၀၀)ကျပ်အထိ အရောင်းအဝယ်ဖြစ်လျက် ရှိကြောင်း၊ ဇူလိုင်လ လှိုင်လှိုင်ပေါ်ထွက်ချိန်တွင် နာနတ်သီးဈေးနှုန်း ယခုထက်ကျဆင်းနိုင်ကြောင်း သီးနှံ ဆိုင်ရှင်တစ်ဦးထံမှသိရပါသည်။ ယခုဈေးကွက်အနေဖြင့် မြစ်ကြီးနား နာနတ်သီးများကို ဈေးများ၊ လူစည်ကားရာနေရာများ၊ သစ်သီးဆိုင်များတွင်ရောင်းချလျက်ရှိပြီး ဖားကန့်၊ မိုးကောင်း၊ မိုးညှင်း၊ တနိုင်းမြို့များကိုလည်း တင်ပို့ရောင်းချလျက်ရှိကြောင်းသိရပါသည်။ DOCA(ကချင်)

တနင်္သာရီတိုင်းဒေသကြီး၊ မြိတ်မြို့တွင် ဒေသခံပြည်သူများသည် နှစ်ရှည်သီးနှံများနှင့် ရာသီပေါ်သီးနှံများကို အသက်မွေးဝမ်းကျောင်းဖြင့် စိုက်ပျိုးရောင်းချကြပါသည်။ ယခုလရာသီ တွင် ဌက်ပျောသီးဈေးကောင်းရရှိ၍ ဝင်ငွေများပိုမိုရရှိကြောင်း သိရှိရပါသည်။ ဌက်ပျောသီး အမျိုးအစားတွင် ဆင်အံသီး၊ ဖီးကြမ်း၊ ရခိုင်နှင့် ရွှေဌက်ပျောတို့သည် လူကြိုက်များသည်အတွက် ရောင်းအားအလွန်ကောင်းကြောင်း သိရှိရပါသည်။ အိမ်ခြံဝန်းများတွင်လည်း အသီးသီးစိုက်ပျိုး ကြပြီး စည်ပင်သာယာဈေးနှင့် ရပ်ကွက်ဈေးငယ်များတွင် တစ်နိုင်တစ်ပိုင် တင်ပို့ရောင်းချကြပါ သည်။ ဌက်ပျောသီးအမှည့်များကို ဌက်ပျောကြော်များပြုလုပ်၍ မနက်စာအနေဖြင့် လက်ဖက်ရည်များနှင့် စားသုံးကြပါသည်။ ဌက်ပျောသီးအစိမ်းများကို သရေစာဌက်ပျောကြော်ခြောက်များ ပြုလုပ်ပြီး ရောင်းချကြကြောင်း သိရှိရပါသည်။ ယခုဇွန်လပထပတ်တွင် မြိတ်မြို့နယ်ရှိ ဌက်ပျောသီးဈေးနှုန်းမှာ ဖီးကြမ်းသီးတစ်ဖီးလျှင် (၄၅၀၀) ကျပ်ရှိပြီး ရွှေဌက်ပျောသီးတစ်ဖီးလျှင် (၅၀၀၀)ကျပ်ရှိကြောင်း သိရှိရပါသည်။ DOCA(တနင်္သာရီ)  

တနင်္သာရီတိုင်းဒေသကြီး၊ မြိတ်မြို့ရှိ ဆိပ်ငယ်စည်ပင်သာယာဈေးနှင့် စမ်းချောင်းကုန်စိမ်းဈေးများတွင် နေ့စဉ်ဈေးရောင်းသူဝယ်သူများနှင့် စည်ကားလျက်ရှိပြီး ရာသီပေါ်သီးနှံများဒေသ ထွက်ကုန်များအပြင်တခြားဒေသမှ ဝင်ရောက်သည့် လူသုံးကုန်နှင့်စားသောက်ကုန်ပစ္စည်းများကို ရောင်းချလျက်ရှိပါသည်။ ယခုလ ရာသီပေါ်စာသီးနှံဖြစ်သည့်ခဝဲသီးကိုလည်း ရောင်းချလျက်ရှိကြောင်း သိရှိရပါသည်။ ယခုဇူလိုင်လပထမပတ်တွင် ဈေးကွက်အတွင်းဝင်ရောက်လာသော ခဝဲသီးမှာ လက်လီ တစ်ပိဿာလျှင်(၅၀၀၀)ကျပ်၊ လက်ကားတစ်ပိဿာလျှင် (၄၅၀၀)ကျပ်ရှိပြီး တစ်တောင့်လျှင် (၁၁၀၀)ကျပ်နှင့် (၁၂၀၀)ကျပ်ရှိကြောင်း ကုန်စိမ်းဈေးရောင်းချနေသူတစ်ဦးထံမှ သိရှိရပါသည်။ DOCA(တနင်္သာရီ)

မိုးရာသီတွင် ပေါများစွာထွက်ရှိသော မျှစ်များကို မြိတ်မြို့ပေါ်ရှိစျေးများတွင် အရောင်းသွက်လျက်ရှိကြောင်း သိရှိရပါသည်။ မြိတ်မြို့သည် ပင်လယ်ကမ်းရိုးတန်းဒေသဖြစ်သည့်အပြင် စားဖိုဆောင်သီးနှံများလည်း ပေါများသောဒေသဖြစ်ပါသည်။ မျှစ်ကိုမိုးရာသီ၌သာ ရရှိသောကြောင့် ကျန် ကာလများတွင် အလွယ်တကူရရှိနိုင်ရန် အချဥ်ဖောက်၍စားသုံးကြသလို ကြော်ချက်၊အပြုတ်၊ အတို့အမြုပ်အဖြစ်လည်း စားသုံးကြသည်။ ချဉ်သောအရသာရှိ၍အနံ့ ပျင်းသောကြောင့် မျှစ်ချဥ်ကို ဟင်းခပ်အမွှေးအကြိုင်များများဖြင့် ချက်စားလျှင် ကောင်းမွန်သော ဟင်းတစ်ခွက်ရရှိမည် ဖြစ်ပါ သည်။ ရာသီပေါ်သီးနှံဖြစ်သောကြောင့်ဈေးကွက်အတွင်း အရောင်းအဝယ်ဖြစ်လျက်ရှိသော မျှစ်ချဉ် ကို တစ်ပိဿာလျှင်(၁၀၀၀၀)ကျပ်၊ငါးဆယ်သားလျှင်(၅၅၀၀)ကျပ်ဖြင့်ရောင်းချလျက်ရှိကြောင်း သိရှိရပါသည်။ DOCA(တနင်္သာရီ)

ကော့သောင်းမြို့နယ်သည် ဥယျာဉ်ခြံစိုက်ပျိူးကြသည့် ကျေးရွာများတွင် ဟင်းသီးဟင်းရွက် နှင့် ရာသီ စာ သီးနှံများရောင်းချရာ ထွက်ရှိလာသည့် သီးနှံများတွင် ကော့သောင်းမြို့အတွင်းရှိ စျေးများသို့ လာရောက် တင်ပို့ရောင်းချလျက်ရှိပါသည်။ ၁၂လ ရာသီစာ သီးနှံဖြစ်သည့် ကန်စွန်းရွက် သည် လူကြိုက်အများဆုံး ဟင်း သီးဟင်းရွက် တစ်မျိုးဖြစ်ပြီး အကြော်၊ အချဉ်ဟင်း၊ အတို့အအပြုတ် စသည်တို့ အမျိုးမျိုးစားသုံးလေ့ရှိကြပါ သည်။ ကော့သောင်းမြို့ပေါ်ရှိ စျေးများ၊ မြို့မစျေးကြီးများတွင် ကန်စွန်းရွက် ရောင်းချမှု ၂၀၂၅ ခုနှစ်၊ ဇူလိုင် လ ပထမပတ်အတွင်း စျေးနှုန်းမှာ ကန်စွန်းရွက် တစီး (၂၀၀၀ိ/-)ကျပ် နှုန်းဖြင့် ရောင်းချလျက်ရှိပြီး ကန်စွန်း ရွက်သည် အရောင်းအဝယ်‌ကောင်းလျက်ရှိကြောင်း ကုန်စိမ်းရောင်းချသူများထံမှ သိရှိရပါသည်။ DOCA(တနင်္သာရီ)