ပြည်တွင်းကုန်သွယ်မှုသတင်း

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့် ဆီထွက်သီးနှံများအပြင် ပဲမျိုးစုံကိုလည်းစိုက်ပျိုးကြောင်းသိရသည်။ ယခုအခါ မတ်ပဲသီးနှံများ ဈေးကွက်အတွင်း ဝင်ရောက်လျက်ရှိပြီး အောက်တိုဘာလ ပထမပတ်အတွင်း၌ ဈေးနှုန်းများမှာ မတ်ပဲထွက်တိုးတစ်တင်းလျှင် (၁၁၀၀၀၀)ကျပ်၊ မတ်ပဲ(ဂျပန်)တစ်တင်းလျှင် (၉၅၀၀၀)ကျပ်ဖြင့်အရောင်းအဝယ်ဖြစ်လျက်ရှိကြောင်း၊  ဈေးကွက်အနေဖြင့် ကန့်ဘလူခရိုင်မှထွက်ရှိသော မတ်ပဲများကို ရွှေဘိုမြို့နှင့် မန္တလေးမြို့ ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချလျက်ရှိကြောင်းသိရသည်။

        မတ်ပဲသီးနှံများသည် ကန့်ဘလူမြို့နယ်အတွင်းရှိ ကျေးရွာများမှ အဓိကဝင်ရောက်လျက်ရှိပြီး စက်တင်ဘာလ နောက်ဆုံးပတ်ဈေးနှုန်းများနှင့်နှိုင်းယှဉ်ပါက ယခုအပတ်အတွင်း  မတ်ပဲထွက်တိုးတစ်တင်းလျှင် ငွေကျပ်(၁၀၀၀၀) မြင့်တက်လာကြောင်း၊ မတ်ပဲ(ဂျပန်)မှာ ဈေးနှုန်းတည်ငြိမ်၍ အရောင်းအဝယ်ဖြစ်လျက်ရှိကြောင်း သီးနှံရောင်းဝယ်ရေးလုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)

     မကွေးတိုင်းဒေသကြီး၊ မကွေးခရိုင်၊ မကွေးမြို့နယ်၊ မကြီးကန်ကျေးရွာအုပ်စုရှိ ပုထိုးစမ်း ကျေးရွာသည် နှမ်း၊ မြေပဲ၊ ကုလားပဲ၊ ပဲတီစိမ်း၊ မတ်ပဲနှင့် ပဲစဉ်းငုံသီးနှံများကို စိုက်ပျိုးကြပြီး မြေပဲစိုက်တောင်သူမှာ(၆၀)ဦးခန့်ရှိပြီး စိုက်ဧကမှာ (၄၀၀၀)ဧကနီးပါး စိုက်ပျိုးကြောင်း သိရသည်။ ပုထိုးစမ်းကျေးရွာနေ မြေပဲစိုက်တောင်သူ ဦးလှမြင့်က မိုးမြေပဲ(၁)ဧကခွဲခန့် စိုက်ပျိုးထားပြီး မျိုးကို ရွာရှိတောင်သူအချင်းချင်းထံမှ (၁)ပြည်လျှင် ကျပ်(၉၀၀၀)ဖြင့်ဝယ်ယူကာ ထွန်‌ကြောင်းဆွဲ အစေ့ချစနစ်ဖြင့် စိုက်ပျိုးကြောင်း၊ (၁)ဧကလျှင် မျိုး(၂)တင်းခန့် အသုံးပြုရကြောင်း၊ ၂၀၂၄ခုနှစ်၊ မေလ(စတုတ္ထပတ်)တွင် စတင်စိုက်ပျိုးပြီး ရက်ပေါင်း(၉၀)အကြာတွင် ခူးဆွတ်ပါကြောင်း၊ ကုန်ကျစရိတ်အနေဖြင့် (၁)ဧကလျှင် မြေပြုပြင်ခ၊ လုပ်အားခအပါအဝင် စုစုပေါင်းကုန်ကျစရိတ်မှာ ကျပ် (၇၀၀၀၀၀)ခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် တင်း(၁၀၀)နီးပါးထွက်ရှိပြီး ဈေးနှုန်း အနေဖြင့် ၂၀၂၄ခုနှစ်၊ စက်တင်ဘာလ(စတုတ္ထပတ်)တွင် မြေပဲတောင့်(၁)တင်းလျှင် ကျပ်(၂၈၀၀၀) ဈေးဖြင့်ရောင်းချရပြီး အကျိုးအမြတ်အနေဖြင့် ကျပ်(၂၁)သိန်းခန့်ရရှိကြောင်း၊  ဈေးကွက်အနေဖြင့် မကွေးမြို့ရှိ ပွဲရုံများသို့တင်ပို့ရောင်းချပြီး ထိုပွဲရုံများမှတဆင့် ရန်ကုန်မြို့သို့တင်ပို့ကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၊ ကျွဲသိုးမြှောင်၊ ထောက်ရှာပင်၊ ကျောက်တန်းနှင့် ရေမြက်ကျေးရွာတို့တွင် နှစ်ရှည်သီးနှံဖြစ်သည့် ဩဇာပင်ကို တစ်နိုင်တစ်ပိုင် စီးပွားဖြစ် စိုက်ပျိုးကြကြောင်း သိရသည်။

      ဩဇာပင်ကို ၂၀၁၉ ခုနှစ်၊ ဇွန်လတွင် စိုက်ပျိုးပြီး ၅ နှစ်အကြာတွင် စတင်ခူးဆွတ်ရကြောင်း၊ မျိုးအနေဖြင့် ဩဇာသီး(အညိုရောင်) နှင့် (အစိမ်းရောင်)တို့ဖြစ်ပြီး အစိမ်းရောင်ကို  အများဆုံး စိုက်ကြောင်း၊  စိုက်ပျိုးရာတွင် ဩဇာစေ့ကို ပျိုးထောင်ကာ (၆)လသားအရွယ်တွင် မြေချ၍ စိုက်ကျင်း တစ်ကျင်းနှင့် တစ်ကျင်း(၈)ပေခြားကာ စိုက်ပျိုးရကြောင်း၊ တစ်ဧကလျှင် ဩဇာပင် (၂၅၀-၃၀၀)ခန့် စိုက်ပျိုးပြီး နှစ်ရှည်သီးပင်စားပင်ဖြစ်သောကြောင့် နှစ်စဉ်ပြုစုပျိုးထောင်ပြီး စတင်စိုက်ပျိုးသည်မှ အသီးခူးဆွတ်ရသည်အထိ တစ်ဧကလျှင် ငွေကျပ် ကုန်ကျစရိတ်အနေဖြင့် သိန်း(၃၅)ခန့် ကုန်ကျကြောင်း၊ စိုက်ပျိုးပြီး ၅ နှစ်ခန့်အကြာတွင် ဩဇာပင် တစ်ပင်လျှင် အလုံးရေ (၆၀-၈၀) ထွက်ရှိပြီး တစ်ဧကလျှင် အလုံးရေ(၂၄၀၀၀)ခန့် ထွက်ရှိ၍ ငွေကျပ် ၂၅၀၀၀၀၀ ခန့် အကျိုးအမြတ်ရရှိကြောင်း၊ ၂၀၂၄ ခုနှစ်၊ စက်တင်ဘာလ(စတုတ္ထပတ်)တွင် ဩဇာသီး တစ်ပိဿာလျှင် လက်ကားဈေး ငွေကျပ် ၃၀၀၀-၄၀၀၀၊ ဩဇာသီးတစ်လုံးလျှင် အလုံးအကြီးအသေးပေါ် မူတည်၍ လက်ကားဈေး ငွေကျပ် ၂၅၀-၃၀၀ ဖြင့် မကွေး၊ မင်းဘူး၊ ပွင့်ဖြူမြို့များသို့ ရောင်းချပြီး ရန်ကုန်၊ မန္တလေးနှင့် နေပြည်တော်မြို့ များသို့လည်း တင်ပို့ကြောင်း၊ ယခုနှစ်တွင် မိုးရွာသွန်းမှုကြောင့် အထွက်နှုန်း အနည်းငယ်လျော့နည်းသော်လည်း ဈေးကောင်းရ၍ အဆင်ပြေလျက်ရှိကြောင်း ဥယျာဉ်ခြံစိုက်ပျိုးသူထံမှ သိရှိရသည်။

DOCA(မကွေး)

    တနင်္သာရီတိုင်းဒေသကြီးသည် မြန်မာနိုင်ငံတောင်ဘက်စွန်း ပင်လယ်ထွက်ပေါက်ရှိရာ တိုင်းဒေသကြီးဖြစ်သဖြင့် ဒေသခံအများစုသည် ပင်လယ်ပြင်သို့ ငါးဖမ်းစက်လှေ အကြီး/ အလတ်/အငယ်များ တစ်နိုင်တစ်ပိုင်လှေများဖြင့် ပင်လယ်ပြင်သို့ထွက်ကာ ငါး၊ ပုစွန်များအား ဖမ်းယူကာ ငါး၊ ပုစွန်အစိုများအား ပြည်ပသို့တင်ပို့ခြင်း၊ ပြည်တွင်းစျေးကွက်များတွင် ရောင်းချခြင်းများ၊ နေလှန်းကာ ငါးခြောက်၊ ပုစွန်ခြောက်များ ပြုလုပ်ခြင်းများ၊ ပုစွန်အသေး(ခေါ်) ဂွေးကောင်လေးများအား ဖမ်းယူကာ ဂွေးငပိ ပြုလုပ်ကာ မြန်မာနိုင်ငံနေရာအနှံ့အပြားသို့ တင်ပို့ရောင်းချလျက်ရှိပါသည်။

    ယခုအောက်တိုဘာလ ပထမအပတ်အတွင်း ထားဝယ်စျေးကွက်တွင် ဒေသတွင်း စားသုံးမှုများသော ငါးရောင်ခြောက်(ခေါ်)ဒလုံးခြောက် တစ်ပိဿာလျှင် (၄၅၀၀၀ ကျပ်)၊ ငါး လက်ဝါးခြောက်(ခေါ်)စာဗျန့်ခြောက် တစ်ပိဿာလျှင်(၃၄၀၀၀ ကျပ်)နှင့် ငါးအူမျှင်းခြောက်(ခေါ်) အူကြီးခြောက် တစ်ပိဿာလျှင် (၆၀၀၀၀ ကျပ်)၊ ပုစွန်ခြောက်စျေးနှုန်းများမှာ အကောင်သေး တစ်ပိဿာလျှင်(၉၀၀၀၀/၁၀၀၀၀၀ ကျပ်)၊ အလတ်ဆိုဒ် တစ်ပိဿာလျှင်(၁၂၀၀၀၀/၁၃၀၀၀၀ ကျပ်)၊ အကောင်ကြီး တစ်ပိဿာလျှင် (၁၅၀၀၀၀/၁၆၀၀၀၀ ကျပ်)နှင့် ဂွေးငပိမှာ ရိုးရိုး တစ်ပိဿာလျှင်(၆၀၀၀ ကျပ်)၊ ရှယ်တစ်ပိဿာလျှင်(၈၀၀၀ ကျပ်) အသီးသီးရှိကြောင်း ထားဝယ်မြို့မ စျေးကြီးနှင့် ကမ်းနားပျံကျစျေးများရှိ ငါးခြောက်ကုန်သည်များထံမှ သိရှိရပါသည်။

     မိုးတွင်းကာလဖြစ်သဖြင့် ပင်လယ်ပြင်သို့ ငါးဖမ်းလှေ ထွက်ရှိမှုအနည်းငယ်သာရှိပြီး ငါး/ပုစွန်များ ရရှိမှုနည်းသဖြင့် ငါးခြောက်၊ ပုစွန်ခြောက်၊ ငပိ စျေးနှုန်းများမှု အနည်းငယ်မြင့် တက်လျက်ရှိပါသည်။

DOCA(တနင်္သာရီ)

         ဩဇာပင်များကို အစေ့ပျိုး၍လည်းကောင်း၊ အကိုင်းကို မြေထုပ်ဆွဲနည်းဖြင့်လည်းကောင်း၊ ကိုင်းကူးနည်းဖြင့်လည်းကောင်း အပင်ပျိုး၍ရသော်လည်း မြန်မာနိုင်ငံ၌ အစေ့ပျိုး၍ စိုက်ခြင်းသာ ပြုကြသည်။ ဩဇာပင်တို့သည် နှစ်စဉ် တပေါင်းလရောက်လျှင် အရွက်များကြွေ၍ ရိုးတံကျဲကျဲရှိနေတတ်သော်လည်း တန်ခူးလရောက်သည်နှင့် အစို့အကိုက်၊ အညွန့်အဖူးကလေးများ ထွက်ပြူစပြုလာပြီးလျှင် မကြာမီ ပြန်လည်၍ စိမ်းလန်းစိုပြည်လာသည်။ ကဆုန်၊ နယုန်၌ အပွင့်များပွင့်၍ ဝါဆိုလတွင် သီးကင်းကလေးများထွက်သည်။ တော်သလင်းလ၊ သီတင်းကျွတ်လများတွင် ဩဇာသီးများလှိုင်လေသည်။ ဩဇာသီးသည် အမှည့်မြန်သောအသီးမျိုးဖြစ်၍ အပင်တွင် အက်ကွဲလာသည်အထိမထားရချေ။ အထူးသဖြင့် နယ်များသို့ပို့ရန် ဩဇာသီးများကို အသီးရင့်ရင့်အနေအထား၌ ဆွတ်ခူးကြရသည်။ ဩဇာခြံအတွင်း အမှည့်ရောင်သမ်းလာသည့် အသီးများအားလုံးကို အိမ်ရှိ လူများ နေကုန်သည်အထိ နိုင်အောင်ခူးကြရသည်။ သို့မဟုတ်ပါက အက်ကွဲလာလျှင် အပင်မှ ပြုတ်ကျ၍ စားသုံးမရတော့ချေ။

        ရာသီအလိုက်ပေါ်သော သစ်သီးဝလံမျိုးဖြစ်သည့်ပြင် ချိုချိုအေးအေး၊ အရသာလေးသော ဩဇာသီးကို အများပြည်သူတို့က ခုံခုံမင်မင်ဝယ်ယူစားသုံးကြသည်။ ဩဇာသီးတွင် ရွှေဒင်္ဂါးရောင်၊ နွယ်သာကီရောင်၊ မရမ်းရောင်ဟူ၍ အရောင်သုံးမျိုးရှိသည်။ အဓိကအားဖြင့် သြဇာသီးများကို ပြည်ခရိုင်တွင် စီးပွားရေးလုပ်ငန်းတစ်ရပ်အနေဖြင့် ကြီးကြီးကျယ်ကျယ်စိုက်ပျိုးလုပ်ကိုင်ကြသည်။ မေမြို့အနီးရှိ အနီးစခန်း၊ ကရင်ပြည်နယ်အတွင်းရှိ သံတောင်တို့၌လည်း ဩဇာပင်များ ကောင်းစွာဖြစ်ထွန်းသည်။ ပြည်ခရိုင်အတွင်း ဧရာဝတီမြစ်ရိုးတစ်လျှောက်ရှိ တောင်ကုန်းတောင်စွယ်များ၏ အရှေ့ဘက်တောင်စောင်းတစ်လျှောက်တွင် ဩဇာခြံများကို အစီအရီတွေ့ရတတ်ပါသည်။

      ပုသိမ်မြို့တွင်းရှိ သစ်သီးဝလံရောင်းချနေသောဆိုင်များတွင် ဩဇာသီးများကို ယခုလ စက်တင်ဘာလပိုင်းမှစ၍ အများအပြားတွေ့ရပြီး ရာသီစာသီးနှံအဖြစ် စတင်ရောင်းချလျက်ရှိရာ ဩဇာသီး အလုံးလှလှ (အကြီး) တစ်လုံးလျှင် ၁၀၀၀ကျပ်နှင့် ဩဇာသီး (အသေး) တစ်လုံးလျှင် ၅၀၀ကျပ်နှုန်းဖြင့် ဈေးကွက်အတွင်း အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ဧရာဝတီ)