ပြည်တွင်းကုန်သွယ်မှုသတင်း

             ကြောင်လျှာသီးတွင် အစိမ်းသီးနှင့် အညိုသီးဟူ၍ (၂)မျိုးခွဲခြားထားပါသည်။ အရသာသည်ခါးသက်သက်နှင့် ပူရှိန်းရှိန်းအရသာရှိပါသည်။ ကြောင်းလျှာသီးအစိမ်းကိုပါးပါးလှီးပြီး သုတ်စား၍လည်းကောင်း၊ အချဉ်စိမ်၍ ချဉ်ဖတ်အဖြစ်လည်းကောင်း၊ မီးဖုတ်၍လည်းကောင်း၊ ကြော်ချက်၍လည်းကောင်း စားသုံးကြပါသည်။ ကြောင်လျှာသီးသည် ဘက်တီးရီးယားများကိုတိုက်ဖျက်ပေးခြင်း၊ ဓာတ်တိုးဆန့်ကျင်အာနိသင်ရှိခြင်း၊ ရောင်းရမ်းမှုကိုသက်သာစေခြင်း၊ အသည်းကိုကျန်းမာစေခြင်း၊ ကျောက်ကပ်ကိုကျန်းမာစေခြင်း၊ ဆီးချိုကိုသက်သာစေခြင်း၊ ကိုယ်ခံအားကောင်းစေခြင်း၊ အစာခြေစနစ်ကိုကောင်းမွန်စေခြင်း၊ ကင်ဆာရောဂါကိုကာကွယ်ပေးခြင်းစသည့် ကျန်းမာရေးကိုများစွာ အထောက်အကူပြုသည့် သီးနှံတစ်မျိုးဖြစ်ပါသည်။ ဆေးဖက်ဝင်သည့်သီးနှံဖြစ်သော်လည်း ရောဂါအခံရှိသူများ၊ ကျန်းမာရေးအခြေအနေတစ်ခုခုကြောင့် ပုံမှန်ဆေးသောက်သုံးသူများ၊ နို့တိုက်မိခင်နှင့် ကိုယ်ဝန်ဆောင်များအနေဖြင့် ချင့်ချိန်စားသုံးပေးသင့်ပါသည်။ ဆီးချိုရှိသူများအနေဖြင့် ဆီးချိုဆေးသောက်သုံးနေရပါက အလွန်အကျွံမစားမိစေရန် သတိပြုသင့်ပါသည်။

                ပြည်ဈေးကွက်အတွင်းမှာ နိုဝင်လာလဆန်းမှစ၍ ကြောင်လျှာသီးတစ်တောင့်လျှင် (၃၀၀-၄၀၀)ကျပ်ဖြင့် ရောင်းဝယ်နေကြောင်းသိရှိရပါသည်။ ကြောင်လျှာသီးကိုပြည်မြို့အနီးရှိ မှော်ဇာ၊ ကင်ပွန်းခြုံကျေးရွာနှင့် အခြားကျေးရွာများမှ ဝင်ရောက်ရောင်းချကြောင်း သိရှိရပါသည်။

DOCA(ပဲခူး)

     တန်ဆောင်မုန်း လဆန်းအချိန်တွင် မုန့်ဆန်းလှိုင်လှိုင်ပေါ်နေပြီး ဖြစ်သည်အတွက် ဘားအံမြို့ပေါ်ရှိ ရေပေါ်ဈေးတွင် ကရင်ပြည်နယ်ဒေသထွက် မုန့်ဆန်းများ စတင်ရောင်းချ‌နေကြောင်း သိရသည်။

     မုန့်ဆန်းပြုလုပ်ပုံမှာ မောင်းညိုမဖြစ်တဖြစ်အချိန်တွင် ရိတ်ထားသောကောက်ညှင်းကို တုတ်ဖြင့် ရိုက်ချွေပြီး ရလာသည့် ကောင်ညှင်းကို ဒယ်အိုးဖြင့်ဆယ်မိနစ်ခန့် လှော်ပေးရသည်။ လှော်ထားသော ကောက်ညှင်းဆန်ပူပူကို ဆုံတွင်ထည့်ထောင်းပြီး ရရှိလာသော မုန့်ဆန်းပြားကို ဆန်ကွဲနှင့်အမှိုက်များစင်အောင် စကောဖြင့် ပြာပေးရပါသည်။ မုန့်ဆန်းကို အုန်းသီး၊သကြား၊ဆားအနည်းငယ်ဖြင့် ရောနယ်ပြီး ဆွမ်းတော်ကပ်ခြင်း၊ဦးရှင်ကြီးတင်ခြင်းတို့ ပြုလုပ်စားသုံးကြပါသည်။

    ဘားအံမြို့ပေါ်ရှိ ရေပေါ်ဈေးတွင် ကရင်ပြည်နယ်ဒေသထွက် မုန့်ဆန်းဈေးနှုန်းများမှာ မုန့်ဆန်းတစ်ဘူးလျှင် (၈၀၀၊၁၀၀၀)ကျပ်၊ မုန့်ဆန်း တစ်ပြည်လျှင် (၇၀၀၀) ကျပ်နှုန်းတို့ဖြင့် ရောင်းချလျက်ရှိကြောင်း သိရသည်။

DOCA(ကရင်)

              ယခုနိုဝင်ဘာလတွင် ပြည်ဈေးကွက်သို့ရှမ်းပြည်နယ်၊ ပင်းတယ၊ ကလော၊ ပင်လောင်းစသည့်မြို့နယ်များမှ ဂေါ်ရခါးသီးနှင့်ပန်းဂေါ်ဖီထုပ်များ ဝင်ရောက်လျက်ရှိပါသည်။ ဂေါ်ရခါးသီးနှင့်ပန်းဂေါ်ဖီများ ဝင်ရောက်မှုမှာ အနည်းငယ်နည်းပါးသွားပြီး တစ်ပတ်လျင်ကားအဝင်နည်းကြောင်းလည်း သိရှိရပါသည်။ အရောင်းအဝယ်အနေဖြင့် ဝင်ရောက်မှုရှိသလောက် အရောင်းအဝယ်ဖြစ်နေပြီး အဝင်နည်းသည့်အတွက် ဂေါ်ရခါးသီးတစ်လုံးလျှင် (၅၀၀)ကျပ်ခန့်နှင့် ပန်းဂေါ်ဖီတစ်ထုပ်လျှင် (၁၂၀၀-၁၅၀၀)ကျပ် ရှိကြောင်းသိရပါသည်။ ယခင်နှစ်တွင် ဂေါ်ရခါးသီးဈေးနှုန်းမှာ တစ်လုံးလျှင် (၂၀၀-၃၀၀) ကျပ်၊ ပန်းဂေါ်ဖီတစ်ထုတ်လျှင် ၈၀၀-၁၀၀၀ကျပ်ဖြင့် ရောင်းချခဲ့ပါသည်။ ထို့ကြောင့် ယခုနှစ်တွင် ပန်းဂေါ်ဖီနှင့် ဂေါ်ရခါးသီးဈေးနှုန်းများအနည်းငယ်မြင့်တက်လာသော်လည်း အရောင်းအဝယ်ဖြစ်လျက်ရှိပါသည်။

DOCA(ပဲခူး)

         ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်၌ ငါးရှဉ့်ရောင်းဝယ်ရေးလုပ်ငန်းများလုပ်ကိုင်လျက်ရှိပြီး  ချောင်း၊ အင်းအိုင်၊ မြောင်းလယ်ကွင်းများမှ သဘာဝအတိုင်း ရှာဖွေဖမ်းဆီးပြီး ဖမ်းစီးရရှိသော ဒေသထွက်ငါးရှဉ့်များကို ရန်ကုန်ဈေးကွက်သို့ အဓိကတင်ပို့ရောင်းချပြီးလျက်ရှိ ကြောင်း ငါးရှဉ့်ရောင်းဝယ်ရေးလုပ်ကိုင်သူတစ်ဦး၏ ပြောပြချက်အရသိရသည်။

      မအူပင်မြို့နယ်မှ ငါးရှဉ့်များကို ရန်ကုန်ဈေးကွက်သို့ အောက်တိုဘာလအတွင်း ငါးရှဉ့်ပိဿာချိန် ၇၅၀၀၀ ထိတင်ပို့ရောင်းချနိုင်ခဲ့ကြောင်း မအူပင်မြို့နယ်ရေထွက်ကုန်ပစ္စည်းများရောင်းဝယ်ရေးပွဲရုံ မြင့်မိုရ်ငါးရှဉ့်ဒိုင်၏ ပြောပြချက်အရသိရသည်။ စက်တင်ဘာလအတွင်း ရန်ကုန်သို့ ငါးရှဉ့်ပိဿာချိန် ၅၅၀၀၀ ထိသာတင်ပို့ရောင်းချနိုင်ခဲ့ပြီး အောက်တိုဘာလတစ်လတာအတွင်း ငါးရှဉ့်ပိဿာချိန် ၇၅၀၀၀ ထိတင်ပို့ရောင်းချနိုင်ခဲ့ကြောင်း၊ မအူပင် ထနီး၊ မလတ်တို၊ ရေလဲ၊ အောင်ဟိတ်၊  စစ်ချောင်း၊ နတ်စဉ်၊ ငါးဖားအိုင် ကျေးရွာဘက်တို့မှ တစ်နေ့ကို ငါးရှဉ့်ပိဿာချိန် ၁၅၀၀ မှ ၂၀၀၀၊ ၂၅၀၀ ထိဝယ်ယူရရှိကြောင်း၊ ငါးရှဉ်ဆိုဒ်အမျိုးအစားအခွဲခြားဘဲ ဝယ်ယူပြီး၊ ရန်ကုန်သို့တင်ပို့ကာ ငါးရှဉ့်များကို ရန်ကုန်ဈေးကွက်က ဝယ်ယူမှုအားကောင်းလာခြင်းဖြစ်ကြောင်းသိရသည်။

       ရန်ကုန်ဈေးကွက်မှတစ်ဆင့် အခြားပြည်တွင်း၊ ပြည်ပဈေးကွက်များဆီသို့ ဆက်လက်ဖြန့်ဖြူးရောင်းချကြောင်း၊ မအူပင်မြို့နယ်မှ ရန်ကုန်သို့ အဓိကထားတင်ပို့ပြီး ရန်ကုန်မြို့ ငါးရှဉ်ဒိုင်ကြီးများက ပြည်တွင်း၊ ပြည်ပဈေးကွက်ထိတင်ပို့နေကြောင်း မအူပင်မြို့နယ်ရေထွက်ကုန်ပစ္စည်းများရောင်းဝယ်ရေး မြင့်မိုရ်နှင့် မြင့်မြတ်သူလုပ်ငန်းပိုင်ရှင်တို့ကပြောသည်။ မအူပင်မြို့နယ်တွင် အောက်တိုဘာလအတွင်း တင်ပို့ရောင်းချခဲ့သည့် ငါးရှဉ့် ၁၀ပိဿာလျှင် ငွေကျပ်၁၃၅၀၀၀မှ ငွေကျပ်၁၅၀၀၀၀ထိဈေးပေါက်ခဲ့ကြောင်း၊ ယနေ့နိုဝင်ဘာလ (၁၁)ရက်နေ့ ပေါက်ဈေးအနေဖြင့်  ငါးရှဉ့် ၁ပိဿာကို ၁၈၀၀၀ကျပ်၊ ၁၉၀၀၀ကျပ်ထိဈေးပေါက်၍ ဈေးကောင်းနေပြီး ဝယ်ယူနေသည်။ ကထိန်လ အလှူရက်ဖြစ်၍ လာရောက်ရောင်းချမှုနည်းပါးသော်လည်း အလှူပြီးရက်များတွင် ပိဿာချိန်ပိုမိုရရှိနိုင်ကြောင်း ငါးရှဉ့်ရောင်းဝယ်ရေးလုပ်ကိုင်သူ ပွဲရုံလုပ်ငန်းရှင်ကပြောပြသည်။ အဆိုပါဒေသတွင် ရန်ကုန်ဈေးကွက်မှတစ်ဆင့် ပြည်ပနိုင်ငံများဖြစ်သည့် တရုတ်နိုင်ငံနှင့် ထိုင်းနိုင်ငံ တို့သို့ တင်ပို့ရောင်းချလျက်ရှိကြောင်းသိရပါသည်။

DOCA(ဧရာဝတီ)

                ပြည်မြို့ရှိ လိမ္မော်သီးဈေးကွက်မှာ ဈေးနှုန်းများကျဆင်းခြင်းမရှိဘဲ ပုံမှန်ဈေးအတိုင်း အရောင်းအဝယ်ဖြစ်လျက်ရှိပါသည်။ လိမ္မော်ပင်များသည် ဒေသတစ်ခုနှင့် တစ်ခုစိုက်ပျိုးချိန်၊ မြေအနေအထား၊ ရာသီဥတုအခြေအနေ၊ ဒေသအနေအထားအရ အသီးသီးကွဲပြားပါသည်။ မတ်လနှင့် ဧပြီလတွင် စတင်အသီးသီးပြီး အောက်တိုဘာလတွင်အသီးများလှိုင်လှိုင်ထွက်ရှိပါသည်။ လိမ္မော်သီးအား တောင်ကြီးနှင့်လားရှိုးမြို့တို့တွင်စိုက်ပျိုးပြီး ဧရာဝတီတိုင်းဒေသကြီး၊ ဟင်္သာတမြို့နယ်များတွင်လည်း စီးပွားဖြစ်စိုက်ပျိုးကြပါသည်။ ပြည်မြို့နယ်အတွင်း ဝင်ရောက်လာသောလိမ္မော်သီးများမှာ တောင်ကြီး၊ အောင်ပန်းဒေသများမှဝင်ရောက်ပြီး၊ ဟင်္သာတမြို့နယ်များမှ ဝင်ရောက်သောအသီးများမှာ ပိဿာချိန်ဖြင့်ရောင်းချရသောအသီးများဖြစ်ပြီး ပြည်မြို့မှတစ်ဆင့် အခြားမြို့နယ်များသို့ပြန်လည်၍ လက်လီ/ လက်ကားရောင်းချကြောင်းသိရပါသည်။ ဈေးကွက်အတွင်း ရောင်းချလျက်ရှိသောလိမ္မော်သီးဈေးနှုန်းများမှာ အလုံးချောတစ်လုံးလျှင် (၁၅၀၀-၂၀၀၀)ကျပ်နှင့် အချိန်နှင့်ရောင်းချသော လိမ္မော်သီးဈေးနှုန်းများမှာ တစ်ပိဿာလျှင် (၁၅၀၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)