ပြည်တွင်းကုန်သွယ်မှုသတင်း

                   ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် တည်ထားကိုးကွယ်သော တန်ခိုးကြီးရွှေဆံတော်စေတီတော်မြတ်ကြီးအား ဗုဒ္ဓပူဇနိယပွဲတော်ကို (၈.၁၁.၂၀၂၄)ရက်နေ့မှ (၁၇.၁၁.၂၀၂၄) ရက်နေ့အထိ (၁၀)ရက်တိုင်တိုင် စည်ကားသိုက်မြိုက်စွာ ကျင်းပပြုလုပ်သွားမည်ဖြစ်ပါသည်။

                  ထိုသို့ဘုးရာပွဲဈေးတွင် လူသုံးကုန်ပစ္စည်းအမျိုးမျိုး၊ စားသောက်ကုန်ပစ္စည်းအမျိုးမျိုး၊ ကလေးကစားစရာအရုပ်အမျိုးမျိုး တို့အားတည်ခင်းရောင်းချသွားမည်ဖြစ်ပါသည်။ ထိုဘုရားပွဲဈေးအား ဗိုလ်ချုပ်လမ်းတစ်လျှောက် နှင့် ဘုရားကြီးမြောက်စောင်းတန်းလမ်းတစ်လျှောက်တွင် ကျင်းပပြုလုပ်သွားမည်ဖြစ်ပါသည်။ ထိုသို့ တန်ဆောင်တိုင်ဘုရားပွဲဈေးနှင့်အတူ ဗိုလ်ချုပ်မြင်းစီးကျောက်ရုပ်နားရှိ MSMEsအရောင်းစင်တာလည်း ဒေသထုတ်ကုန်စုံလင်စွာဖြင့် နေ့စဉ်ပိတ်ရက်မရှိရောင်းချလျက်ရှိပါသည်။ ထိုဒေသထုတ်ကုန် အရောင်းစင်တာတွင် ပစ္စည်းအမျိုးအမည်ပေါင်း (၂၂၂)မျိုးဖြင့် ရောင်းချမှုရှိပါသည်။ ယခင်နှစ် ပြည်အရောင်းစင်တာအားဖွင့်ကာစတွင် ပစ္စည်းအမျိုးအမည်ပေါင်း (၁၆၁)မျိုးဖြင့်ရောင်းချခဲ့ပြီး ယခုအချိန်တွင် လုပ်ငန်းများဖွံ့ဖြိုးတိုးတက်လာ၍ (၆၁)မျိုးထပ်မံတိုးချဲ့ရောင်းချလာနိုင်ခဲ့ပါသည်။ ထိုသို့ကုန်ပစ္စည်းများထပ်မံတိုးချဲ့၍ ရောင်းချလာနိုင်ခဲ့ခြင်းမှာ ပြည်ခရိုင်ဦးစီးမှူးနှင့် ဝန်ထမ်းများအဖွဲ့က ဈေးကွက်များချိက်ဆတ်ပေးခြင်း၊ ဒေသထုတ်ကုန်များကို ရှာဖွေခြင်းများပြုလုပ် ဆောင်ရွက်ပေးနိုင်ခဲ့ပါသည်။

                    ပဲခူးတိုင်းဒေသကြီးအတွင်းတွင် ဒေသထုတ်ကုန်အရောင်းစင်တာများကို ပဲခူးမြို့တွင်တစ်ဆိုင်၊ ပြည်မြို့တွင်တစ်ဆိုင်၊ နောက်ပိုင်းတောင်ငူမြို့တွင်လည်း ထပ်မံတိုးချဲ့ဖွင့်လှစ်သွားရန် အစိုးရအဖွဲ့မှ စီစဉ်ဆောင်ရွက်လျက်ရှိပါသည်။ ထိုသို့ဒေသထုတ်ကုန်အရောင်းစင်များအား ဖွင့်လှစ်ရခြင်း၏ရည်ရွယ်ချက်မှာ တိုင်းဒေသကြီးအတွင်းရှိ အသေးစား၊ အငယ်စားနှင့် အလတ်စား MSMEs စီးပွားရေးလုပ်ငန်းများဖွံ့ဖြိုးတိုးတက်စေရန်နှင့် ပြည်တွင်းပြည်ပဈေးကွက် ရရှိစေမည်ဖြစ်ပါသည်။ အားသာချက်အနေဖြင့် ဒေသထုတ်ကုန်နှင့် ဒေသထွက်အစားအစာများကို တစ်နေရာတည်းတွင် တစ်စုတစ်စည်းတည်း ဒေသခံပြည်သူများနှင့် ဘုရားဖူးခရီးသွားဧည့်သည်များ အလွယ်တစ်ကူဝယ်ယူသုံးစွဲနိုင်မည်ဖြစ်ပါသည်။

                  ထို့ကြောင့်ဘုရားဖူးလာပြည်သူများနှင့် ဒေသခံပြည်သူများအနေဖြင့် ပြည်အရောင်းစင်တာတွင် ပဲခူးတိုင်းဒေသကြီးအတွင်းရှိ ဒေသထုတ်ကုန်များအား ဘုရားဖူးလာရင်းဝင်ရောက်ကြည့်ရှု ဝယ်ယူသုံးစွဲနိုင်ပါကြောင်း အသိပေးအပ်ပါသည်။

DOCA(ပဲခူး)

    မကွေးတိုင်းဒေသကြီး၊ မကွေးခရိုင်၊ မကွေးမြို့ပေါ်ရှိ ဈေးများတွင် ဒေသတွင်းပန်းများနှင့် မန္တလေးတိုင်းဒေသကြီး၊ ပြင်ဦးလွင်မြို့မှ ပန်းမျိုးစုံတို့ ဝင်ရောက်အရောင်းအဝယ်ဖြစ်လျက်ရှိကြောင်း ပန်းမျိုးစုံ ရောင်းချသူများထံမှ  သိရသည်။

    ၂၀၂၄ ခုနှစ်၊ နိုဝင်ဘာလ (ပထမပတ်)တွင် မကွေးမြို့၌ ဖြစ်ပေါ်နေသော ပန်းဈေးနှုန်းများမှာ နှင်းဆီပန်း(၁၀ပွင့်) တစ်စီးလျှင် ငွေကျပ်(၄၀၀၀-၅၀၀၀)၊ သစ်ခွပန်းခိုင် တစ်စီးလျှင် ငွေကျပ် (၅၀၀၀-၇၀၀၀)၊ သစ္စာပန်း(၅ ပင်) တစ်စီးလျှင် ငွေကျပ် (၃၀၀၀-၃၅၀၀)၊ ဂန္ဓမာပန်း(ပွင့်သေး) တစ်စီးလျှင် ငွေကျပ် (၂၅၀၀-၃၀၀၀)၊ ဂန္ဓမာပန်း(ပွင့်ကြီး)တစ်စီးလျှင် ငွေကျပ် (၅၀၀၀-၆၀၀၀)၊ နှင်းပန်း တစ်စီးလျှင် ငွေကျပ် (၂၀၀၀-၂၅၀၀)၊ ပန်းတိမ်ငိုပန်း တစ်စီးလျှင် ငွေကျပ်(၃၀၀၀-၃၅၀၀)၊ သပြေငုတ် တစ်ပင်လျှင် ငွေကျပ် (၃၀၀၀-၅၀၀၀)၊ သပြေညွန့် တစ်စီးလျှင် ငွေကျပ် (၅၀၀)နှင့် ရေမွှေးပန်း တစ်စီးလျှင် ငွေကျပ် (၁၅၀၀-၂၀၀၀)တို့ဖြင့် အရောင်းအဝယ်ဖြစ်လျက်ရှိကြောင်း၊ ယခင်တစ်ပတ်နှင့် ဈေးနှုန်းနှိုင်းယှဉ်ပါက မြင့်တက်လာကြောင်း၊ မိုးရွာသွန်းမှုများကြောင့် လမ်းပန်းဆက်သွယ်ရေးခက်ခဲပြီး သယ်ယူစရိတ်မြင့်မား၍ ဈေးမြင့်တက်ရခြင်းဖြစ်ကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီးသည် ဆီထွက်သီးနှံနှင့် ပဲမျိုးစုံတို့ကို အဓိကစိုက်ပျိုးထွက်ရှိရာ အပူပိုင်းဒေသတစ်ခုဖြစ်ပြီး အခြားဒေသများမှ ထွက်ရှိသည့် သစ်သီးဝလံများကို ဝယ်ယူစားသုံးရကြောင်း၊ မကွေးမြို့တွင် မွန်ပြည်နယ်ဒေသထွက် မော်လမြိုင်ကျွဲကောသီးများ လှိုင်လှိုင်ဝင်ရောက်ကာ အရောင်းအဝယ်ဖြစ်လျက်ရှိကြောင်း သိရသည်။

     မွန်ပြည်နယ်ဒေသမှ ထွက်ရှိသည့် ကျွဲကောသီးများကို အလုံးအကြီးအသေး ပေါ်မူတည်၍ ကျွဲကောသီး(ပန်းရောင်) တစ်လုံးလျှင် ငွေကျပ်(၃၅၀၀-၅၀၀၀)၊ ကျွဲကောသီး(အဝါရောင်) တစ်လုံးလျှင် ငွေကျပ်(၃၀၀၀-၄၀၀၀) တို့ဖြင့် ရောင်းချကြောင်း၊ လမ်းပန်းဆက်သွယ်ရေးအခက်အခဲများကြောင့် ယခင်နှစ်ကထက် ဈေးနှုန်းပိုသော်လည်း ကျွဲကောသီးများ၏ အရည်အသွေး ကောင်းမွန်မှုကြောင့် ဝယ်ယူသူများ အကြိုက်တွေ့၍ ရောင်းအားကောင်းလျက်ရှိကြောင်း မကွေးမြို့ပေါ်ရှိ သစ်သီးမျိုးစုံ ရောင်းချသည့်ဆိုင်များမှ သိရသည်။

DOCA(မကွေး)

   ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်၌ မိုးစပါးစိုက်ဧက (၉၃၉၁၂) ဧက နှစ်စဉ်စိုက်ပျိုးကြောင်းသိရပြီး၊ ၂၀၂၄-၂၀၂၅ ခုနှစ် မိုးစပါးရိတ်သိမ်းခြင်းလုပ်ငန်းကို အောက်တိုဘာလ  (၁၈) ရက်နေ့တွင် စတင်ရိတ်သိမ်းနေကြပြီး အထွက်နှုန်းကောင်း၍ အရောင်းအဝယ်ဖြစ်နေပြီး ယနေ့ နိုဝင်ဘာလ (၈)ရက်နေ့အထိ မိုးစပါး ပန်းတနော်မြို့နယ်ရိတ်ဧက (၃၄၃၄၉) ဧကဖြစ်ပြီး ၎င်းအပေါ်  အထွက်နှုန်း( ၂၈၇၁၂၀၉)တင်းထွက်ရှိကြောင်းသိရသည်။

        ၂၀၂၄-၂၀၂၅ ခုနှစ် မိုးစပါးထွက်ရှိမှုများကို (၁၁-၁၁-၂၀၂၄)ရက်နေ့တွင် ကွင်းဆင်းလေ့လာခဲ့ရာ ပန်းတနော်မြို့ နယ်၊ အင်းမကျေးရွာ၊ တောင်သူ ဦးဇော်မင်းဦး၏လယ်မှ မိုးစပါး  ဆင်းသုခ၊ မနောသုခ၊ ဧရာမင်း၊ GW 11 စပါးမျိုးကို ဧက.၂၀ခန့်စိုက်ပျိုးရာ တစ်ဧကလျှင် စပါးတင်း၄၀ခန့်ထွက်ရှိပြီး စပါးတစ်တင်းလျှင် ပေါင်(၅၀) ဖြင့် အစို စပါးတင်း (၁၀၀) လျှင် (၁၅၀၀၀၀၀)ကျပ်စျေးနှုန်းဖြင့်ရောင်းချရပြီး စိုက်ပျိုးမှုကုန်ကျစရိတ်မှာ ကြဲခင်းဖြစ်၍ တစ်ဧကလျှင် (၉၀၀၀၀၀)ကျပ်ခန့်ကုန်ကျပြီး အကျိုးအမြတ်အနေဖြင့် (၆၀၀၀၀၀)ကျပ်ခန့်ရရှိကြောင်းသိရှိရပါသည်။

DOCA(ဧရာဝတီ)

        မအူပင်ခရိုင်အတွင်းရှိ မြို့နယ်များတွင် စိုက်ပျိုးရေး၊ မွေးမြူရေးလုပ်ငန်းများအပြင် ဒေသတွင်းအိမ်တွင်းမှု၊ ပြည်တွင်းဒေသထွက်ကုန်လုပ်ငန်းများဖြစ်သော အသေးစား၊ အလတ်စား၊ အငယ်စား  စီးပွားဖြစ် တစ်နိုင်တစ်ပိုင်လုပ်ငန်းများကိုလည်းလုပ်ကိုင်လျက်ရှိသည်။ မအူပင်ခရိုင်အနေဖြင့် အသေးစား၊ အလတ်စား၊ အငယ်စား စီးပွားဖြစ်လုပ်ငန်းပေါင်း ခရိုင်ချုပ်(၈၀) ခုရှိပါသည်။ ဓနုဖြူမြို့နယ်ရှိ အိမ်တွင်းတစ်နိုင်တစ်ပိုင်လုပ်ကိုင်နေသော ဖယောင်းတိုင်လုပ်ငန်းသည် ဈေးကွက်ရရှိ၍ စီးပွားဖြစ်လုပ်ငန်းတစ်ခုဖြစ်ကြောင်းသိရသည်။

           ဓနုဖြူမြို့နယ်ရှိ ထွန်းလင်းအထွန်းခံဖယောင်းတိုင်ထုတ်လုပ်မှုမှာ တစ်နှစ်ကို ဖယောင်းတိုင်အထုပ်ရေ အစားစား(၂၀၀၀၀) ထိထုတ်ထုတ်လုပ်နိုင်ကြောင်း၊ ဖယောင်းတိုင် တစ်နေ့ကို (၁၀၀)မှ (၁၅၀)ထိထုတ်ခန့်ထုတ်လုပ်ပြီး  လုပ်ငန်းကို ၂၀၀၅ခုနှစ်မှစတင်လုပ်ကိုင်ခဲ့ပြီး လုပ်ငန်းရင်းနှီးမတည်မှုအနေဖြင့် (၁၅၀၀၀၀၀)ကျပ်ခန့်ရင်းနှီးမြုပ်နှံခဲ့ပြီး ဖယောင်းတိုင်အမျိုးအစား (၆)မျိုးထုတ်လုပ်ကြောင်း၊ ဖယောင်းတိုင်အကြီး လက်ကားဈေး(၂၈၀၀)ကျပ်၊ ဖယောင်းတိုင်အလတ် (၁၇၀၀)၊ ဖယောင်းတိုင်အသေးတစ်ထုပ်လျှင် (၁၂၀၀) ကျပ်ဈေးဖြင့်ရောင်းချပြီး၊ အကျိုးအမြတ်အနေဖြင့် တစ်လကို ၃၀၀၀၀၀ကျပ်ရရှိကြောင်း လုပ်ငန်းရှင်ကပြောပြသည်။ ဖယောင်းကြမ်းကြိုပြီး ပုံစံမိုတွင်လောင်းကာ ဖယောင်းတိုင်ထွက်ရှိလာပြီး ထုပ်ပိုး၍ ရောင်းတန်းဝင်ဖရောင်းတိုင်ရရှိကြောင်း၊ ၎င်းနောက် တံဆိပ်အမှတ်အသားထည့်ကာ ထုပ်ပိုး၍ ဓနုဖြူမြို့မဈေးအတွင်းနှင့် ဓနုဖြူကျေးရွာဘက်တို့ကိုသာဖြန့်ဖြူးရောင်းချကြောင်း၊ အသေးစားလက်မှုလုပ်ငန်းလိုင်စင်နှင့် စားသုံးသူရေးရာဦးစီးဌာန၏ ကုန်အညွှန်းအမှတ်အသားခွင့်ပြုချက်ရရှိပြီးဖြစ်ကြောင်း လုပ်ငန်းရှင်၏ပြောပြချက်အရသိရှိရပြီး စီးပွားဖြစ်သောလုပ်ငန်းတစ်ခုဖြစ်၍ ဈေးကွက်ပိုမိုအားကောင်းရန် ရှာဖွေလျက်ရှိကြောင်းသိရပါသည်။

DOCA(ဧရာဝတီ)