ပြည်တွင်းကုန်သွယ်မှုသတင်း

                 နှင်းပန်းပင်သည် အသင့်အတင့်အကြမ်းခံနိုင်သည့် နှစ်ရှည်ခံဥပင်မျိုးဖြစ်သည်။ နှင်းပန်းဥ သည် ကြက်သွန်ဖြူဥကဲ့သို့ အကြေးရွက်များပါသည့်ဥ အမျိုးအစားဖြစ်ကာ ပင်စည်ကို အကြေးရွက်များဖြင့် ဖုံးအုပ်ထားပါသည်။ အမြစ်များသည် မြေပေါ်ပိုင်းတွင်ရှိနေပြီးမြေထဲသို့ နက်နက်ထိုးဆင်းမှု မရှိပါ။ ပန်းပွင့်များသည်အလွန်မွှေးပျံ့၍ စိတ်ကိုကြည်လင်လန်းဆန်းစေပြီး စိတ်ချမ်းမြေ့ မှုကိုရစေပါသည်။ ယခုလို မိုးဦးကျရာသီတွင် နှင်းပန်းဥများမှ ရိုးတံများထိုးထွက် လာပြီး ဖြစ်ပါသည်။ ဇွန်လဒုတိယပတ်တွင် မြင်းခြံမြို့ အေးမြသီတာဈေး၊ မြို့မစည်ပင်သာယာ ဈေးနှင့်မြို့ပေါ်ရှိ ဘုရားစောင်းတန်း ပန်းအရောင်းဆိုင်များတွင် နှင်းပန်းများ စတင်ရောင်းချ နေပြီဖြစ်ရာ နှင်းပန်း (၅)ခက်ပါတစ်စည်းလျှင် (၅၀၀)ကျပ်နှုန်းဖြင့် အရောင်းအဝယ်ဖြစ်လျက် ရှိကြောင်း၊ နှင်းပန်းကို ဘုရားပန်းကပ်လှူရာတွင်လည်းကောင်း၊ အလှပန်းအိုးထိုးရာတွင်လည်း ကောင်း၊ရနံ့ကလည်း မွှေးပျံ့နေသာကြောင့်  အသုံးပြုမှုများသဖြင့်  အရောင်းသွက်သောပန်းတစ်မျိုး ဖြစ်ကြောင်း ပန်းအရောင်းဆိုင်မှ သိရှိရပါသည်။

DOCA(မန္တလေး)        

                       ပေါက်ပန်းဖြူရွက်သည် ဆီးနီ၊ဆီးနည်းရောဂါများအတွက် ဟင်းချက်စား၍လည်းကောင်း၊ အပွင့်ကိုကြော်စားသော်လည်းကောင်း၊ ချက်စားခြင်းဖြင့်လည်းကောင်း ဆီးရောဂါသက်သာ စေနိုင်ခြင်း၊ အရွက်နှင့်အပွင့်ကို မကြာခဏ ပြုတ်ပြီးတို့စားပေးလျှင် သည်းခြေရောဂါ၊ ကျောက်ကပ် တွင်ကျောက်ရှိသူများ သက်သာစေခြင်း၊ ပေါက်ပန်းဖြူပွင့်ကို သုပ်စားခြင်းဖြင့် မီးယပ်ဖြူဆင်းရောဂါ၊ သွေးအန်သွေးကျရောဂါ သက်သာစေခြင်း ပေါက်ပန်းဖြူရွက် သတ္တုရည်ကိုအုံပေးပါက အပူလောင် တာသက်သာစေခြင်း၊ ပေါက်ပန်းဖြူအပွင့်၏ သတ္တုရည်ကိုမျက်စိခပ်ပေးပါကမျက်စိမှုန်၊ မျက်စိဝေ သက်သာစေခြင်း၊ အဆစ်ရောင်ရောဂါဝေဒနာခံစားနေရပါက ပေါက်ပန်းနီ၏အမြစ်ကို သွေးလိမ်း ပေးခြင်းဖြင့် သက်သာစေခြင်း၊အပွင့်သို့မဟုတ်အရွက်ကိုအရည်ညှစ်ယူ၍ အရည်ကိုခေါင်းမကိုက်သော တစ်ဘက်ရှိ နှာခေါင်းမှရှူပေးပါကပျောက်ကင်းစေခြင်း၊ အပွင့်ကိုပြုတ်စားပါက ကြက်မျက် သင့်ရောဂါပျောက် ကင်းစေခြင်း၊ အရွက်၏သတ္ထုရည်တွင် ဂျင်းခြောက်၊ ပိတ်ချင်း၊ ကြံသကာတို့ကို အတူရော၍ ရှူပေးပါက စိတ်ပျံ့လွင့်မှုသက်သာစေခြင်း တုတ်ကွေးဖျားရိုးရိုးဖျားခြင်းများအတွက် ပေါက်ပန်းဖြူ အရွက် ကို ကြက်သွန်နီနှင့် ကြော်စားပေးပါက သက်သာစေနိုင်ကြောင်း စာပေများမှ ဖတ်ရှုလေ့လာသိရှိရပြီး၊ မြင်းခြံမြို့ အေးမြသီတာဈေးတွင် ရောင်းချသော ပေါက်ပန်းဖြူဈေးနှုန်းမှာ (၁၀) ကျပ်သားလျှင် (၁၀၀၀) ကျပ်ဖြင့် ရောင်းချကြောင်း သိရသည်။

DOCA(မန္တလေး)       

   ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်များ ပုံမှန်ပြန်လည်ဖွင့်လှစ် ရောင်းချနေကြပြီး ၂၀၂၅ခုနှစ်၊ နိုဝင်ဘာလ (၂၁)ရက်နေ့တွင် ဖြစ်ပေါ်နေသော စက်သုံးဆီ ဈေးနှုန်း များမှာ Octane(92) တစ်လီတာလျှင် (၃၄၆၀)ကျပ်၊ Octane(95) တစ်လီတာလျှင် (၃၅၃၅)ကျပ်၊ ပရိမီယမ်ဒီဇယ် တစ်လီတာလျှင် (၃၉၅၅)ကျပ်၊ ရိုးရိုးဒီဇယ် တစ်လီတာလျှင် (၃၄၁၅) ကျပ်ဖြင့် ရောင်းချနေကြောင်းသိရပါသည်။

    ယခင်တစ်ပတ်ဈေးနှုန်းများမှာ Octane(92) တစ်လီတာလျှင် (၃၄၇၀)ကျပ်၊ Octane(95) တစ်လီတာလျှင် (၃၅၅၀)ကျပ်၊ ပရိမီယမ်ဒီဇယ် တစ်လီတာလျှင် (၃၉၀၅)ကျပ်၊ ရိုးရိုးဒီဇယ် တစ်လီ တာလျှင် (၃၃၇၀) ကျပ်ဖြင့် ရောင်းချခဲ့ကြပြီး ဈေးနှုန်းများနှိုင်းယှဉ်ကြည့်လျှင် Octane(92) တစ်လီ တာလျှင် (၁၀)ကျပ်၊ Octane(95)တစ်လီတာလျှင်(၁၅)ကျပ်၊ ရိုးရိုးဒီဇယ်တစ်လီတာလျှင် (၄၅) ကျပ်စီဖြင့် ဈေးနှုန်းများကျဆင်းလာပြီး ပရီမီယမ်ဒီဇယ် တစ်လီတာ လျှင်(၅၀)ကျပ်အနည်းငယ် တက်လာကြောင်း စက်သုံးဆီရောင်းချသူများထံမှ သိရှိရပါသည်။

DOCA(ကယား)

            မန္တလေးတိုင်းဒေသကြီး ငါန်းဇွန်မြို့သည် မြစ်ကမ်းဘေးရှိ စိုက်ပျိုးရေးကို အခြေခံသော မြို့လေးတစ်မြို့ဖြစ်ပြီး ကျေးရွာများ စားဖိုဆောင်သီးနှံများ အပိုဝင်ငွေရရှိရန် စိုက်ပျိုးကြပြီး မြို့မစည်ပင်သာယာဈေးသို့ လာရောက်ရောင်းချကြပါသည်။ ငါန်းဇွန်မြို့ရှိ မြို့မစည်ပင်သာယာဈေး သည် နံနက်ခင်းဈေးဖြစ်ပြီး ကုန်စိမ်း၊ သားငါး၊ ကုန်ခြောက်၊ ဆန်၊ ဆီ၊အဝတ်အထည် စသည့်ဖြင့် အစုံအလင်ရောင်းချသောဈေးဖြစ်ပါသည်။ ၂၀၂၅ ခုနှစ် နိုဝင်ဘာလတတိယပတ်တွင် ဖြစ်ပေါ်နေသော သားငါး ဈေးနှုန်းများမှာ ဆိတ်သားတစ်ပိဿာလျှင် (၃၄၀၀၀ )ကျပ်၊ ဝက်သားတစ်ပိဿာလျှင် (၃၂၀၀၀ )ကျပ်၊ အမဲသားတစ်ပိဿာလျှင် (၃၂၀၀၀ )ကျပ်၊ ကြက်သား(CP) တစ်ပိဿာလျှင် (၂၈၀၀၀ )ကျပ်နှင့် ကြက်သား(ဗမာ) တစ်ပိဿာလျှင် (၂၉၀၀၀ )ကျပ်ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တလေး)       

       ကယားပြည်နယ် လယ်ယာထွက်ကုန်သီးနှံဖြစ်သည့် စပါး၊ အစေ့ထုတ်ပြောင်း၊ နှမ်းနှင့် ပဲအမျိုးမျိုးတို့ကို စိုက်ပျိုးကြပါသည်။ အဆိုပါ လယ်ယာထွက်ကုန်သီးနှံဖြစ်သည့် စပါးများကို ၂၀၂၅ ခုနှစ်၊ အောက်တိုဘာလ ၃၀ ရက်နေ့အထိ စပါး(မိုး)စိုက်ဧကမှာ ၇၁၂၃ ဧက၊ ရိတ်ဧကမှာ ၂၅၂၃၆ ဧက၊ ၁ ဧကအထွက်နှုန်းမှာ ၆၇ တင်းခန့်နှင့် စုစုပေါင်း အထွက်မှာ ၁၇၀၈၈၄၅ တင်းခန့် ထွက်ရှိပြီး စပါး(မိုး) ၁ ဧက စိုက်ပျိုးထုတ်လုပ်မှု ကုန်ကျစရိတ်များအနေဖြင့် ၈၃၀၀၀၀ ကျပ်ခန့် ကုန်ကျလျက်ရှိပါကြောင်း သက်ဆိုင်ရာဌာနများ၏ စာရင်းများအရသိရှိရပါသည်။

          ၂၀၂၅ ခုနှစ်၊ နိုဝင်ဘာလ ၂၁ ရက်နေ့တွင် ဖြစ်ပေါ်နေသော စပါးဈေးနှုန်းမှာ ရွှေရင်အေး စပါး(အဟောင်း) တစ်ပိဿာလျှင် ၁၈၀၀ ကျပ်၊ တစ်တင်းလျှင် ၂၃၄၀၀ ကျပ်ခန့်၊ ရွှေအပ်စပါး (အဟောင်း) တစ်ပိဿာလျှင် ၁၆၀၀ ကျပ်၊ တစ်တင်းလျှင် ၂၀၈၀၀ ကျပ်ခန့်၊ ရွှေအပ်စပါး (အသစ်) တစ်ပိဿာလျှင် ၁၄၀၀ ကျပ်၊ တစ်တင်းလျှင် ၁၈၂၀၀ ကျပ်ခန့် ဖြင့်အရောင်းအဝယ်ဖြစ် လျက်ရှိပြီး ယခင်အပတ်ဈေးနှုန်းနှင့် နှိုင်းယှဉ်ကြည့်လျှင် ဈေးနှုန်းတည်ငြိမ်လျက်ရှိပါကြောင်း ဆန်စက်ပိုင်ရှင် တစ်ဦးထံမှ သိရှိရပါသည်။

DOCA(ကယား)