ပြည်တွင်းကုန်သွယ်မှုသတင်း

            အပူပိုင်းမိုးနည်းရပ်ဝန်းဒေသဖြစ်သော မြင်းခြံမြို့နယ်သည် မြန်မာနိုင်ငံအလယ်ပိုင်း တွင်တည်ရှိ၍  မိုးကောင်းသောက်ဧရိယာများတွင် ဆန်စပါး၊ ပဲမျိုးစုံ၊ ဆီထွက်သီးနှံနှင့် ဆေးရွက်ကြီး၊ပြောင်းနှင့် ကြက်သွန်နီများစိုက်ပျိုးလျက်ရှိကြောင်းသိရှိရသည်။ ပဲကြီး(ဆောင်း)ကို အောက်တိုဘာလနှင့် နိုဝင်ဘာလတို့တွင်စတင်စိုက်ပျိုးပြီး၊ ဒီဇင်ဘာလနှင့် ဇန်နဝါရီလတို့တွင် ရိတ်သိမ်းထွက်ပေါ် ကြောင်း သိရှိရသည်။ ၂၀၂၅/၂၀၂၆ ခုနှစ်တွင် ပဲကြီး (ဆောင်း) သီးနှံ စီမံကိန်း (၁၆၅၃) လျာထားဧက တွင် (၄၁၀)ဧက စိုက်ပျိုးထားရှိကြောင်း၊ စိုက်ပျိုးရန်ကျန်ရှိသော ဧကများလျာထားချက်မီအောင် ဆက်လက်စိုက်ပျိုးမည် ဖြစ်ကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရှိရသည်။ ပဲကြီး (ဆောင်း)ကို လေးအိမ်တန်းကျေးရွာ၊ ဓါးကျွန်းရွာ၊ ဖိုးတုတ်ဖြူရွာနှင့် သဲဖြူဝရွာများတွင်စိုက်ပျိုးထားကြောင်း၊ ယခင်နှစ် အထွက်နှုန်းအနေဖြင့်ပဲကြီးတစ်ဧကလျှင် (၈-၉)ခန့်ထွက်ရှိကြောင်း၊ ပင်ကြား၊တန်းကြား (၃ပေ×၃ပေ) စနစ်ဖြင့်စိုက်ပျိုးထားရှိ၍ နှစ်ပတ်ခြားတစ်ခါ ရေသွင်းပေးရကြောင်း၊ ပင်ကြား၊တန်းကြား အကွာအဝေးတွင် ကြားသီးနှံအဖြစ် နှံစားပြောင်းသီးနှံ စိုက်ပျိုးထားရှိကြောင်း၊ဆောင်းရာသီစိုက်ပဲကြီးစိုက်ခင်းများကို ပုံမှန်အတိုင်း ရေသွင်းပေးခြင်း၊ သွင်းအားစုနှင့် အပင်ပြုစုစောင့်ရှောက်မှုများ ပြုလုပ်ခြင်းဖြင့် ယခင်ထက်အထွက်နှုန်းကောင်း နိုင်ကြောင်း ပဲကြီးစိုက်တောင်သူတစ်ဦး၏ ပြောပြချက် အရသိရှိရသည်။

DOCA(မန္တလေး)  

        ပြင်ဦးလွင်ဒေသတွင် ကျေးလက်နေဒေသခံ ပြည်သူများစိုက်ပျိုးသော မုန်ညှင်းစိမ်း၊ မုန်ညှင်းဖြူ၊ကြက်စိတ်မုန်ညှင်း၊ ဇွန်းမုန်ညှင်းစသည်ဖြင့် မိမိတို့အိမ်ဝန်းခြံများတွင် စိုက်ပျိုးလေ့ရှိကြပါသည်။စိုက်ပျိုးစရိတ်အရင်းအနှီးနည်းပြီး မိသားစုဝင်ငွေရရှိသော လုပ်ငန်းများအနက်မှ မုန်ညှင်းစိမ်း စိုက်ပျိုးလုပ်ကိုင်ခြင်းမှာ တစ်ခုအပါအဝင်ဖြစ်သည်။ မုန်ညှင်းစိမ်းကို မိုးအကုန်ဆောင်းဦးကာလများတွင် စိုက်ပျိုးပြီး ရက်ပေါင်း(၂၅-၃၀)ရက်ကြာလျှင် စတင်ခူးဆွတ်စားသုံးနိုင်ပါသည်။ မုန်ညှင်းကို အစီးလိုက်ရောင်းချခြင်း၊ အပင်လိုက်ခုတ်၍ ပိဿာချိန်ဖြင့်လည်း ရောင်းချကြကြောင်း၊ မုန်ညှင်းစိမ်းကို အချဉ်သိပ်၍ရောင်းချခြင်း၊ သိပ်ထားသောအချဉ်များကို စွန်တန်ခြောက်အဖြစ် ထုတ်ပိုးရောင်းချခြင်းများလည်း စီးပွားဖြစ်ရောင်းချလျက်ရှိပါသည်။ ပြင်ဦးလွင်ဒေသရှိ ပြည်သူများအနေဖြင့် အရင်းအနှီးနည်းပြီး အမြတ်အစွန်းရရှိသော စိုက်ပျိုးရေးလုပ်ငန်းတစ်ခုဖြစ်သည့်အတွက် ဒေသခံများပိုမိုစိုက်ပျိုးလာကြပါသည်။ မုန်ညှင်းစိမ်းမှာ လူသားအကျိုးပြုဓါတ်များစွာရရှိပြီး မျက်စိကျန်းမာရေး၊ ကိုယ်ခံအားစနစ်၊အရိုးများကျန်းမာစေပြီး နာတာရှည်ရောဂါများကို ကာကွယ်ပေးပါသည်။ ယခုအချိန်တွင် မုန်ညှင်းစျေးနှုန်းအနေဖြင့် (၁)ပိဿာလျှင်(၃၀၀၀-၄၅၀၀)ကျပ် စျေးနှုန်းများဖြင့်အရောင်းအဝယ်ဖြစ်နေပြီး ပြည်တွင်းရှိမြို့ကြီးများသို့ တင်ပို့ရောင်းချလျက်ရှိကြောင်း သိရှိရပါသည်။

DOCA(မန္တလေး)

            ဧရာဝတီမြစ်၏ အရှေ့ဘက်ကမ်းတွင်တည်ရှိသော မြင်းခြံမြို့နယ်သည် အပူပိုင်းမိုးနည်း ရပ်ဝန်း ဒေသတစ်ခုဖြစ်ပြီး ဆည်ရေသောက်အသင့်အတင့်ရှိ၍ လယ်ယာမြေများတွင် ဆီထွက်သီးနှံ၊ ပဲမျိုးစုံ၊ ပြောင်းတို့စိုက်ပျိုးထားရှိသည်သာမက မတ်ပဲ(ဆောင်း)သီးနှံကိုလည်း စိုက်ပျိုးထားကြောင်း၊ စိုက်ပျိုး ချိန်မှာ အောက်တိုဘာလနှင့် နိုဝင်ဘာလတို့တွင် စတင်စိုက်ပျိုးပြီး  ဇန်နဝါရီလနှင့် ဖေဖော်ဝါရီလ တို့တွင် စတင်ရိတ်သိမ်းထွက်ပေါ်မည် ဖြစ်ကြောင်း၊ ၂၀၂၅/၂၀၂၆ ခုနှစ်တွင် မတ်ပဲ (ဆောင်း) စိုက်ပျိုးထားရှိမှုမှာ (၁၂၉) ဧကစိုက်ပျိုးထားရှိကြောင်း၊ စိုက်ပျိုးရန် ကျန်ရှိသော ဧကများ လျာထား ချက်ပြည့်မီအောင် ဆက်လက်စိုက်ပျိုးမည်ဖြစ်ကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်း များအရသိရှိရသည်။ မတ်ပဲသီးနှံကို လယ်သစ်ရွာ၊ ဂေါင်းကွဲရွာ၊ အနိမ့်ရွာနှင့် လေးအိမ်တန်းကျေးရွာများတွင်စိုက်ပျိုးထားရှိကြောင်းသိရှိရသည်။

DOCA(မန္တလေး)  

       မန္တလေးတိုင်းဒေသကြီး၊ ပြင်ဦးလွင်ခရိုင်သည် တောင်ပေါ်မြို့လေးဖြစ်ပြီး ခရီးသွားဧည့်သည်များ၊ လည်ပတ်သူများဖြင့် အမြဲမပြတ်စည်းကားလျက်ရှိပါသည်။ ခရီးသွားများ များလာသည်အမျှ ဒေသထွက်ကုန်ဖြစ်သော ပန်းမာန်၊ နေကြာ၊ မက်မန်း၊ ထောပတ် စသည့် သီးနှံများအပြင် ဒေသထွက်ကုန်ဖြစ်သော စတော်ဘယ်ရီမှာလည်း လူကြိုက်များပြီး အရောင်းအဝယ်ဖြစ်လျက်ရှိပါသည်။ ပြင်ဦးလွင်မြို့သည် နှစ်ရှည်သီးနှံအပြင် ရာသီအလိုက် သီးနှံမျိုးစုံစိုက်ပျိုးပြီး ခြံစိုက်တောင်သူများ မိသားစုဝင်ငွေရရှိလျက်ရှိပါသည်။ စတော်ဘယ်ရီသီးနှံကို မိရိုးဖလာစိုက်ပျိုးသူများ လည်းရှိပါသည်။ စတော်ဘယ်ရီ သီးနှံကို ယို၊ ဝိုင်၊ တော်ဖီ စတော်ဘယ်ရီဖျော်ရည်အပြင် သကြားဖြူး၍လည်း အလွယ်တကူစားသောက်နိုင်ပါသည် ။ ယခုအချိန် စတော်ဘယ်ရီသီးများ စတင်ရောင်းချနေပြီး စျေးနှုန်းအနေဖြင့် အကြွပ်သီး (၁)ပိဿာလျှင် (၃၅၀၀၀/-)ကျပ် နှင့် ချိုမွှေးသီး (၁)ပိဿာလျှင် (၄၀၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(မန္တလေး)

         ကျောက်ဆည်ခရိုင်အနေဖြင့် စိုက်ပျိုးရေးကိုအခြေခံပြီး ရေမြေသဘာဝကောင်းမွန်သည့် ခရိုင်တစ်ခုဖြစ်သည့်နှင့် အညီ သစ်သီးဝလံနှင့်ဟင်းသီးဟင်းရွက်များ စိုက်ပျိုးထုတ်လုပ်ရာတွင် ဟင်းသီးဟင်းရွက်များအနက်မှ ဆူးပုတ်ပင်များကိုလည်း အလေးထားစိုက်ပျိုးလာကြသည်ကိုလည်း တွေ့ရှိရပါသည်။ ဆူးပုပ်ပင်တွင် ဆူးပုပ်ကြီးနှင့် ဆူးပုပ်ကလေး (၂)မျိုးရှိရာ ဆူးပုပ်ကြီးမျိုးမှာ ဆူးပုပ်ကလေးမျိုးထက် အပင်နှင့် အရွက် အရွယ်အစားပိုကြီးပါကြောင်း၊ အရွက်အနံ့မှာလည်း ဆူးပုပ်ကလေးထက် ပို၍ပြင်းကြောင်း၊ ဒုတိယတစ်မျိုးအနေဖြင့် ဆူးပုပ်ကလေးမျိုးမှာ ဆူးပုပ်ကြီးမျိုးထက် အရွက်နှင့် အပင်အရွယ်အစားသေးငယ်ပြီး အရွက်အနံ့မှာလည်း ဆူးပုပ်ကြီးအပင်လောက် အနံ့မပြင်းကြောင်း၊ ဆူးပုပ်ကလေးအပင်များကို ကျောက်ပန်းတောင်း၊ မကွေးကဲ့သို မြေလတ်ဒေသများတွင် အများဆုံးစိုက်ပျိုးကြပြီး ထိုဒေသများတွင် ဆူးပုပ်ကြီးထက်ဆူးပုပ်ကလေးကိုပို၍ အသုံးများကြပါကြောင်း၊ ဆူးပုပ်ကလေး စိုက်ပျိုးရေးလုပ်ငန်းသည် (နွေ၊ မိုး၊ ဆောင်း) တစ်နှစ်ပတ်လုံး မိသားစုအပိုဝင်ငွေ ရရှိသည့် သီးနှံဖြစ်သည့်အတွက် စိုက်ပျိုးရာ၌ အစေ့ချစိုက်နည်းစနစ်နှင့် အပင်ပျိုးထောင်စိုက် နည်းစနစ်ဟူ၍ စိုက်ပျိုးနိုင်ပါကြောင်း၊ စိုက်ပျိုးပြီးတစ်နှစ်သားအရွယ်တွင် ဆူးပုပ်ညွန့်များကို ဆွတ်ခူးရောင်းချရပါကြောင်း၊ အခြားသီးနှံများနှင့် သီးထပ်သီးညှပ် ရောနှောစိုက်ပျိုးနိုင်ပြီး နှစ်သီးစား သီးနှံဝင်ငွေရရှိကာ စိုက်ပျိုးသည့်တောင်သူများအနေဖြင့် အားထားလုပ်ကိုင်စိုက်ပျိုးကြပါကြောင်း၊ ဆူးပုပ်ကလေး စိုက်ပျိုးရာတွင် ကိုင်းမြေနဲ့မြေနုကျွန်း ပတ်ပတ်လည်တွေမှာ စည်းရိုးသဖွယ် အတန်းလိုက်စိုက်ပျိုးကြပါကြောင်း၊ ဆူးပုပ်ကလေး ဈေးနှုန်းအနေဖြင့် လက်လီ(၁၀)သားလျှင် (၇၀၀-၈၀၀) ကျပ်၊ လက်ကား (၁)ပိဿာလျှင် (၅၀၀၀/-) ကျပ်ဖြင့် ရောင်းချကြကြောင်း၊ ယခုအချိန်တွင် ဆူးပုပ်ထွက်ရှိမှု နည်းသောကြောင့် ဈေးနှုန်းအနည်းငယ်မြင့်တက်လျက်ရှိကြောင်း၊ ဆူးပုပ်ကလေးအား အခြားသောဟင်းသီး ဟင်းရွက်များနှင့် အတူ အရည်သောက်ဟင်းဖြင့်လည်းကောင်း၊ ကြော်စားခြင်းဖြင့်လည်းကောင်း စားသုံးသူများ ကြိုက်နှစ်သက်ကြသဖြင့် ဈေးကွက်တွင် ရောင်းလိုအားကောင်းပြီး အကျိုးအမြတ်ရရှိသော ဆူးပုပ်ပင်အား စိုက်ပျိုးပြီး နေ့စဉ်ဝင်ငွေရရှိအောင် စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)