စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းသော စားသုံးဆီများကို သင့်တင့်သောဈေးနှုန်းဖြင့် ဝယ်ယူစားသုံးနိုင်စေရန်နှင့် ပြည်တွင်းလိုအပ်ချက် များကို ဖြည့်ဆည်းပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်း လုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိ ကြောင်း သိရပါသည်။

          ပြည်တွင်းလိုအပ်ချက်ကိုဖြည့်ဆည်းပေးနိုင်ရေးစားအုန်းဆီကို ပြည်ပမှဝယ်ယူတင်သွင်း ရာတွင် စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်လျက်ရှိသည်။

ပြည်ပမှ စားအုန်းဆီထုတ်လုပ်တင်ပို့သည့် နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဇန်နဝါရီလ  23  ရက်နေ့မှ  29  ရက်နေ့အထိ ရန်ကုန်အထိုင်ဈေး အခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၆,၁၅၀ ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါ​သည်။       

          ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက်  ဈေးနှုန်း မြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင် ရွက်သွားမည် ဖြစ်ကြောင်း သိရှိရသည်။

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

     မြန်မာနိုင်ငံတွင် နှမ်းစိုက်ပျိုးဧကစုစုပေါင်းမှာ နှစ်စဉ်ပျမ်းမျှ (4.05)သန်းကျော်ရှိရှာ မိုးနှမ်း စိုက်ဧက(၂.၈၇)ဧကသန်း၊ ဆောင်းနှမ်း(၀.၉၁)ဧကသန်း၊ နွေနှမ်း (၀.၂၇)ဧကသန်း စိုက်ပျိုးလျက်ရှိပါသည်။ နှမ်းသီးနှံကို မြန်မာနိုင်ငံအလယ်ပိုင်း အပူပိုင်းဒေသများဖြစ်တဲ့ စစ်ကိုင်း၊ မကွေး၊ မန္တလေးတိုင်းဒေသကြီးများနှင့် အောက်မြန်မာနိုင်ငံ ပဲခူးတိုင်းဒေသကြီးများတွင် အများဆုံး စိုက်ပျိုးလျက်ရှိပါသည်။

          နှမ်းသီးနှံအတွက် မြေရွေးချယ်ရာတွင် ရေမဝပ်သောနုန်းမြေ၊ သဲနုမြေ၊ နုန်းစနယ် မြေမျိုးနှင့် မြေနီသဲဝန်းမြေများကို ရွေးချယ်စိုက်ပျိုးသင့်ပါသည်။ ရေသွင်းရေထုတ် ကောင်းမွန်သော မြေအမျိုးအစားများတွင် ရွေးချယ်စိုက်ပျိုးသင့်ပါသည်။ နှမ်းသီးနှံများကို မိုး၊ မိုးနှောင်းနှင့် မိုးကြိုရာသီများတွင် စိုက်ပျိုးနိုင်ပါသည်။မြေဆီလွှာ အာဟာရဓါတ်ပြည့်ဝနေစေရန် မြေဩဇာကျွေးခြင်းနှင့် ရွက်ဖျန်းမြေဩဇာ ကျွေးခြင်းများလည်း ပြုလုပ်ပေးရပါမည်။ မြေကြီး၏ ရုပ်ဂုဏ်သတ္တိနှင့် ဓါတ်ဂုဏ်သတ္တိများတိုးပွားစေရန် ကောင်းစွာဆွေးမြေ့နေသော သဘာဝမြေဩဇာ(နွားချေး)နှင့် သစ်စိမ်းမြေဩဇာများကို တစ်ဧကလျှင် (၃-၅)တန် အထိ မြေဆီလွှာအတွင်း နှစ်စဉ်ထည့်ပေးသင့်ပါသည်။ ရောဂါကင်းသော နှမ်းရိုးပြတ်များကို ဆွေးမြေ့အောင်ပြုလုပ်၍ သဘာဝမြေဩဇာအဖြစ်လည်း ပြုလုပ်၍အသုံးပြုလေ့ရှိပါသည်။ မြေဆောင် ရောဂါများကာကွယ်ရန် မျိုးစေ့ကို မှိုူသတ်ဆေးတစ်မျိုးမျိုးနှင့် လူးနယ်စိုက်ပျိုးသင့်ပါသည်။ ပန်းစပွင့်ချိန်နှင့် အပွင့်တက်စအချိန်တွင် ရေလိုအပ်လျှင် တစ်ကြိမ်စီပေးသွင်းနိုင်ပါသည်။ 

     နှမ်းသီးနှံ၏ သက်တမ်းအလိုက်သော်လည်းကောင်း၊ နှမ်းခင်းတစ်ခုလုံး အဝါရောင်ပြောင်းချိန်၌လည်းကောင်း အချိန်ကိုက်ရိတ်သိမ်းပြီး နှမ်းစည်း၊ နှမ်းထောင်ခြင်းများ ပြုလုပ်သင့်သည်။ ဇန်နဝါရီလ တတိယအပတ်တွင် ဈေးကွက်အတွင်း နှမ်းဖြူ (၁)တင်းလျှင် ၁၁၀၀၀၀ကျပ်၊ နှမ်းညို (၁)တင်း လျှင် ၉၇၀၀၀ကျပ်နှင့် နှမ်းနက် (၁)တင်းလျှင် ၂၄၅၀၀၀ကျပ်တို့ဖြင့် ရောင်းဝယ်လျက်ရှိပါကြောင်း သိရှိရပါသည်။

DOCA(စစ်ကိုင်း)

      ကယားပြည်နယ်သည် တောင်ပေါ်ဒေသဖြစ်သည့်အလျောက် ချက်ပြုတ်စားသောက်ရာတွင် ဟင်းခတ် အမွှေးအကြိုင်များအစား ငရုတ်သီးများအားထည့်၍ ချက်ပြုတ်တတ်ကြပါသည်။ အစပ်ပါမှ ထမင်းမြိန်သည့် ကျွန်ုပ်တို့တိုင်းရင်းသူ/သားများသည် ဟင်းခတ်အမွှေးအကြိုင် များ အား အသုံးပြုမှုနည်းပါးပြီး မိမိတို့နှစ်ခြိုက်စွာ စားသုံးခဲ့သည့် ငရုတ်သီးကိုသာထည့်၍ ချက်ပြုတ် စားသောက်ကြပါသည်။

     ကယားပြည်နယ်၊ လွိုင်ကော်မြို့အတွင်းရှိ အခြေခံစားသောက်ကုန်အများစုသည် အများ အားဖြင့် ရှမ်းပြည်နယ်တောင်ပိုင်း၊ တောင်ကြီး၊ အောင်ပန်း၊ ကလောတို့မှ အများဆုံးမှာယူ တင်သွင်းရောင်းချကြပြီး အချို့အသီးနှံများကိုမူ ဒေသတွင်းတစ်နိုင်တစ်ပိုင်စိုက်ပျိုး ရောင်းချကြ ပါသည်။ လွိုင်ကော်မြို့ဈေးကွက်အတွင်း ငရုတ်သီးခြောက်များကို ဗမာသီး(ငရုတ်သီးရှည်)၊ကုလားအော်သီး(ငရုတ်သီးပု)၊ ဆီးဘူးငရုတ်သီး (ငရုတ်သီး အသေး)ဟူ၍ အမျိုးအစား(၃)မျိုး တွေ့ရှိရပြီး ဒေသတွင်းထွက်ရှိသော ဆီးဘူးငရုတ်သီး မှာလူကြိုက်များပါသည်။ ဆီးဘူးငရုတ်သီး ခြောက်များ ကိုရှမ်း၊ကယားနယ်စပ်မြို့ဖြစ်သည့် ဆီးဘူးမြို့၌ အများဆုံးစိုက်ပျိုးကြပြီး ဈေးနှုန်း မှာလည်း ကောင်းမွန်ပါသည်။ဆီးဘူးငရုတ်သီးခြောက်မှာ လက်သည်းခွံအရွယ်အစားမျှသာရှိ၍ အလွန်စပ်ပြီး အသွင်သဏ္ဍာန်မှာ လိမ္မော်ရင့်ရောင်ရှိပါသည်။ ယခင်က မြန်မာ-ထိုင်း (မယ်ဟောင် ဆောင်)နယ်စပ်ကုန်သွယ်ရေး လမ်းကြောင်းမှတဆင့် ကုန်သွယ်မှုပြုသော ငရုတ်သီး အမျိုးအစားလည်းဖြစ်ပါသည်။ လွိုင်ကော်မြို့၊ သီရိမင်္ဂလာ ဈေးကွက်အတွင်း ဆီးဘူးငရုတ်သီးခြောက် တစ်ပိဿာလျှင် ကျပ်(၃၅၀၀၀)မှ (၃၈၀၀၀)ခန့် အရောင်းအဝယ် ဖြစ်လျက်ရှိကြောင်း ငရုတ်သီးခြောက် ရောင်းချနေသည့် ဈေးသည်တစ်ဦးထံမှ  သိရှိရပါသည်။

DOCA(ကယား)

       ညောင်လေးပင်မြို့နယ်၊ ပြွန်တန်ဆာ ဘိုင်းဒါးနယ်မြေဒေသသည် စိုက်ပျိုးမြေကောင်းသည့် ဒေသဖြစ်သည့်အလျောက် ဖရဲ၊ ပြောင်း၊ ပန်းဂေါ်ဖီ၊ ဂေါ်ဖီ၊  ခရမ်းချဉ်သီး နှင့် ငရုတ် စသည့် မီးဖိုချောင်သုံးပစ္စည်းများ စိုက်ပျိုးဖြစ်ထွန်းအောင်မြင်သည့် ဒေသဖြစ်ပါသည်။

    ယခုအခါ အဆိုပါဒေသတွင် ဖရဲစိုက်ခင်းများ ဖြစ်ထွန်းအောင်မြင်လျက်ရှိရာ စိုက်ပျိုးထွက်ရှိမှုအခြေအနေနှင့် အကျိုးအမြတ်ရရှိမှု အခြေအနေများအား စိုက်ခင်းများသို့ ကွင်းဆင်းလေ့လာ တွေ့ဆုံမေးမြန်းခဲ့ပါသည်။ ဖရဲ (၁)ဧက စိုက်ပျိုးထွက်ရှိရန် စိုက်ပျိုးစရိတ် ကျပ် သိန်း(၄၀) ခန့် ပျမ်းမျှ ကုန်ကျကြောင်း၊ (၁)ဧက ကုန်ကျစရိတ်များမှာ ဖရဲမျိုးစေ့ဖိုး (၃.၅ ) သိန်း၊ စိုက်ပျိုးမြေထွန်ယက်ခနှင့် စိုက်ဘောင်ဖေါ်ခ (၄) သိန်း၊ မြေဩဇာ ပိုးသတ်ဆေးဖိုး (၁၇) သိန်း၊ အလုပ်သမားခ (၁၀) သိန်းနှင့် အထွေထွေကုန်ကျစရိတ် (၅) သိန်းခန့် ကုန်ကျပါကြောင်း သိရှိရပါသည်။  (၁)ဧက ဖရဲ သီး (၁၀၀၀-၁၂၀၀) လုံးခန့်ပျမ်းမျှ ထွက်ရှိပြီး (၁)လုံး (၇၀၀၀)ကျပ်ခန့် ရောင်းရပါကြောင်းနှင့် နောက်ကျဖရဲသီးများမှာ ဈေးကောင်းရရှိမှု လျှော့နည်းပါကြောင်း၊ တရုတ်ဘက်သို့ တင်ပို့မှုအဆင်ပြေလျင် သိန်းရာချီမြတ်ပါကြောင်းနှင့် ပြည်တွင်းသုံး ရောင်းချလျင် (၁) ဧက ကျပ်သိန်း (၈၀ ) ခန့် ပျမ်းမျှ ရရှိ၍ ကျပ်သိန်း(၄၀)ခန့် အကျိုးအမြတ်ရရှိပါကြောင်း စုံစမ်းသိရှိရပါသည်။

DOCA(ပဲခူး)

            ကန့်ဘလူခရိုင်သည် စစ်ကိုင်းတိုင်းဒေသကြီးအတွင်း ထောပတ်ပဲစိုက်ပျိုးမှု အရေးပါသည့် ဒေသတစ်ခုအဖြစ် ရပ်တည်နေပြီး မိုးရာသီနှင့် ဆောင်းရာသီအတွင်း စိုက်ပျိုးထုတ်လုပ်မှုများကို  ဆောင်ရွက်လျက်ရှိသည်။ ထောပတ်ပဲသည် ပြည်တွင်းစားသုံးမှုအပြင် ပြည်ပ ပို့ကုန်အတွက်ပါ အရေးပါသည့် သီးနှံဖြစ်သဖြင့် ဈေးကွက်အခြေအနေနှင့် ထုတ်လုပ်မှုကုန်ကျစရိတ်များအပေါ်မူတည်၍ တောင်သူများစိုက်ပျိုးလျက်ရှိကြောင်း၊ ယခုနှစ်တွင် ထောပတ်ပဲစိုက်ဧက သုံးထောင်ကျော် စိုက်ပျိုးထား ကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရသည်။

စိုက်ပျိုးထုတ်လုပ်မှုကုန်ကျစရိတ်

             ကန့်ဘလူခရိုင်အတွင်း ထောပတ်ပဲတစ်ဧကလျှင် စိုက်ပျိုးထုတ်လုပ်ရန် လိုအပ်သည့် ကုန်ကျစရိတ်မှာ မျိုးစေ့ကုန်ကျစရိတ်၊ မြေပြုပြင်ရေး၊ အလုပ်သမားခ၊ ဓာတ်မြေဩဇာနှင့် ပိုးသတ်ဆေး စရိတ်တို့ကို စုစုပေါင်းတွက်ချက်လျှင် တစ်ဧကလျှင် ကျပ် ၅ သိန်းခန့်မှ ၆ သိန်းခန့်အထိ ရှိလာ ကြောင်းသိရသည်။ အထူးသဖြင့် မျိုးစေ့နှင့် အလုပ်သမားခ စရိတ်များ မြင့်တက်လာခြင်းကြောင့် ယခင်နှစ်များနှင့်နှိုင်းယှဉ်ပါက စုစုပေါင်းကုန်ကျစရိတ် တိုးမြင့်လာကြောင်း တောင်သူများက ဆိုသည်။

အထွက်နှုန်းနှင့် တောင်သူအကျိုးအမြတ်

               ထောပတ်ပဲ၏ ပျမ်းမျှအထွက်နှုန်းမှာ တစ်ဧကလျှင် ပဲ ၁၅ တင်းမှ ၁၇ တင်းခန့်ထွက်ရှိပြီး ရာသီဥတုကောင်းမွန်ပါက ထွက်နှုန်းပိုမိုကောင်းမွန်သည်။ လက်ရှိ ဈေးနှုန်းအခြေအနေအရ တစ်တင်းလျှင် ကျပ် တစ်သိန်းမှ တစ်သိန်းသုံးသောင်းအထိ ရရှိနေသဖြင့် ထုတ်လုပ်မှုကုန်ကျ စရိတ်များကို နုတ်ပြီးနောက် တစ်ဧကလျှင် အမြတ် ကျပ် ၉ သိန်းခန့်မှ ၁၀ သိန်းခန့်အထိ ရရှိနိုင်ကြောင်း ခန့်မှန်းကြသည်။ သို့သော် ရာသီဥတုမညီမညာဖြစ်ခြင်းနှင့် ရောဂါပိုးဝင်ရောက်မှု များကြောင့် ထွက်နှုန်းကျဆင်းပါက အကျိုးအမြတ်လည်း လျော့နည်းနိုင်ကြောင်း တောင်သူတစ်ဦးကပြောသည်။

ဈေးနှုန်းနှင့် ဈေးကွက်အခြေအနေ

ကန့်ဘလူဒေသထွက် ထောပတ်ပဲများကို ဒေသတွင်းကုန်သည်များက ဝယ်ယူကာ မန္တလေး၊ ရန်ကုန်စသော မြို့ကြီးများသို့ ပို့ဆောင်ရောင်းချလျက်ရှိသည်။ လက်ရှိကာလတွင် ပြည်တွင်းစားသုံးမှုနှင့် ပြည်ပဝယ်လိုအား ရှိနေသော်လည်း သယ်ယူပို့ဆောင်ရေးကုန်ကျစရိတ်များ မြင့်တက်ခြင်းကြောင့် ဈေးနှုန်းတည်ငြိမ်မှု မရှိသေးကြောင်း ကုန်သည်များက ပြောကြသည်။

ကန့်ဘလူခရိုင်တွင် ထောပတ်ပဲစိုက်ပျိုးမှုသည် တောင်သူများအတွက် အကျိုးအမြတ်ရနိုင်သည့် သီးနှံတစ်မျိုးအဖြစ်ကြောင်း တောင်သူတစ်ဦး၏ ပြောပြချက်အရ သိရသည်။

DOCA(စစ်ကိုင်း)