ပြည်တွင်းကုန်သွယ်မှုသတင်း

             ပြည်ခရိုင်၊ ပြည်မြို့နယ် ပြည်ကုန်စည်ဒိုင်၏ ပဲမျိုးစုံ‌ရောင်းဝယ်လျက်ရှိရာ မတ်ပဲ၊ ပဲတီစိမ်း၊ ကုလားပဲ၊ ပဲကြီးသီးနှံများအရောင်းအဝယ်ဖြစ်လျက်ရှိပါသည်။

          နိုဝင်ဘာလပထမပတ်တွင်မတ်ပဲတစ်တင်းကို (၁၂၀၀၀၀-၁၂၀၅၀၀)ကျပ်ဖြင့် ရန်ကုန်အဝယ်တစ်ရက်လျင်အိတ်(၁၅၀/၂၀၀)ခန့်အဝယ်ရှိနေပါသည်။ နိုဝင်ဘာဒုတိယပတ်တွင် မတ်ပဲ တစ်တင်းကို (၁၁၇၀၀၀)ကျပ်ဖြင့် တစ်ရက်ကိုအိတ် (၂၀၀)ခန့်ရန်ကုန်အဝယ်ရှိပါသည်။ တတိယပတ်တွင် မတ်ပဲတစ်တင်းကို (၁၁၈၀၀၀ - ၁၁၉၀၀၀)ကျပ်၊ စတုတ္ထပတ်တွင် မတ်ပဲတစ်တင်းကို (၁၁၇၅၀၀/၁၁၈၀၀၀)ကျပ် ဖြင့်ရန်ကုန်အဝယ်တစ်ရက်ကို အိတ်(၁၅၀/၂၀၀)ခန့်ရှိပါသည်။

           နိုဝင်ဘာပထမပတ်တွင် ပဲတီစိမ်းအသစ်များပန်းတောင်း၊ ပေါက်ခေါင်း၊ ဝက်ထီးကန်ဘက်မှ တစ်ရက်လျှင်အိတ်(၃၀၀/၄၀၀)အဝင်ရှိပြီး ပဲတီစိမ်းတစ်တင်းကို (၉၀၀၀၀)ကျပ်ဖြင့် တစ်ရက်ကို အိတ်(၃၀၀-၄၀၀)ခန့် အရောင်းအဝယ်ရှိသည်ကိုတွေ့ရပါသည်။ နိုဝင်ဘာဒုတိယပတ်တွင် ပဲတီစိမ်း တစ်တင်းကို (၉၃၀၀၀)ကျပ်ဖြင့်တစ်ရက်ကို အိတ်(၃၀၀)ခန့် ရန်ကုန်အဝယ်ရှိပါသည်။ တတိယပတ်တွင် ပဲတီစိမ်းတစ်တင်းကို (၉၆၀၀၀-၉၇၀၀၀)ကျပ်ဖြင့် တစ်ရက်ကိုအိတ် (၄၀၀)ခန့်အရောင်းအဝယ်ဖြစ် လျက်ရှိပါသည်။ စတုတ္ထပတ်တွင် ပဲတီစိမ်းဈေးအေးနေပြီး တစ်တင်းကို (၉၆၀၀၀-၉၇၀၀၀)ကျပ်ဖြင့် တစ် ရက်ကို အိတ် (၇၀၀/၈၀၀)ခန့်အဝယ်ရှိနေပါသည်။

          ပြည်ကုန်စည်ဒိုင်၏ နိုဝင်ဘာလပထမပတ်တွင်ကုလားပဲ (HL)တစ်တင်းကို (၁၀၂၀၀၀)ကျပ်၊ မြကြေးမှုံတစ်တင်းကို (၁၂၂၀၀၀)ကျပ်ဖြင့် မြို့တွင်းခွဲဆက်သမားများနှင့် နယ်စုံအဝယ်တစ်ရက်ကို အိတ် (၁၅၀/၃၀၀)ခန့်အဝင်ရှိပါသည်။ နိုဝင်ဘာဒုတိယပတ်တွင် ကုလားပဲ (HL)တစ်တင်းကို (၁၀၁၅၀၀-၁၀၂၀၀၀)ကျပ်၊ မြို့တွင်းခွဲစက်သမားများ တစ်ရက်ကိုအိတ် (၂၅၀)ခန့် အဝယ်ရှိပါသည်။ နိုဝင်ဘာတတိယပတ်တွင် ကုလားပဲ(HL) တစ်တင်းကို (၁၀၂၀၀၀)ကျပ်ဖြင့် မြို့တွင်းအဝယ်တစ်ရက် ကိုအိတ် (၃၀၀)ခန့် အဝယ်ရှိပါသည်။ စတုတ္ထပတ်တွင် ကုလားပဲ (HL)တစ်တင်းလျှင် (၁၀၂၀၀၀)ကျပ်ဖြင့် မြို့တွင်းခွဲစက်သမားများ တစ်ရက်ကို အိတ် (၃၀၀)ခန့်အဝယ်ရှိပါသည်။

            နိုဝင်ဘာပထမပတ်တွင် ပဲကြီး(ရွှေကျွန်း)တစ်တင်းကို (၉၂၀၀၀)ကျပ်၊ ပဲကြီး (ကုန်းပဲ) တစ်တင်း ကို (၈၇၀၀၀)ကျပ်ဖြင့် မြို့တွင်းပဲကြော်သမားများနှင့် ရန်ကုန်အဝယ်တစ်ရက်ကိုအိတ် (၂၅၀)ခန့် အဝယ်ရှိနေပါသည်။ ဒုတိယပတ်တွင် ပဲကြီး(‌ရွှေကျွန်း)တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ) တစ်တင်းကို (၈၅၀၀၀)ကျပ်ဖြင့် မြို့တွင်းပဲကြော်သမားများအဝယ်ရှိပါသည်။ တတိယပတ် တွင် ပဲကြီး (ရွှေကျွန်း)တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ)တစ်တင်းကို (၈၅၀၀၀)ကျပ်ဖြင့် ပဲကြော်သမားများအဝယ်တစ်ရက်ကိုအိတ် (၂၅၀)ခန့်ရှိပါသည်။ စတုတ္ထပတ်တွင် ပဲကြီး(‌ရွှေကျွန်း) တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ)တစ်တင်းကို (၈၅၀၀၀)ကျပ်ဖြင့် အရောင်း အဝယ် ဖြစ်လျက်ရှိနေပါသည်။

           ပြည်ကုန်စည်ဒိုင်တွင်ပဲလက်ကျန်နည်းနေပြီဖြစ်သောကြောင့် ပဲစဉ်းငုံ၊ ဘိုကိတ်ပဲများမှာ အ‌ရောင်းအဝယ်နည်းနေကြောင်းသိရှိရပါသည်။

DOCA(ပဲခူး)

          ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ တောင်ခွေးရဲကျေးရွာမှ တောင်သူဦးချင်း၏ လယ်ယာမြေ (၀.၂၅)ဧကတွင် သခွားသီးများကို တစ်နိုင်တစ်ပိုင် စိုက်ပျိုးရောင်းချခြင်းဖြင့် မိသားစုစားဝတ်နေရေးအတွက် ဝင်ငွေများတိုးပြီး စီးပွားရေးအဆင်ပြေလျက်ရှိကြောင်း သိရပါသည်။

          ဟင်းသီးဟင်းရွက်အုပ်စုဝင်ဖြစ်သော သခွားသီးများကို စားသုံးသူများမှ အများအပြားစားသုံးကြပါသည်။ သခွားမျိုးမှာ (၃၉၅)မျိုးကို ဝယ်ယူစိုက်ပျိုးပြီး မျိုးထုတ်တစ်ထုတ်လျှင် (၁၂၀၀၀)ကျပ်ပေးရကြောင်းသိရသည်။ စက်တင်ဘာလတွင် စတင်စိုက်ပျိုးခဲ့ပြီး ယခု နိုဝင်ဘာလတွင် ခူးဆွတ်ရောင်းချနေပြီဖြစ်ကြောင်းသိရသည်။ သခွားသီးများကို တစ်ရက်ချန်ခူး၍ရောင်းချပြီး တစ်ခါခူးလျှင် အလုံးရေ (၈၀၀ - ၁၀၀၀)လုံးခန့်ရရှိပါသည်။ ဈေးနှုန်းများမှာ တစ်လုံးလျှင် (၁၅၀-၂၀၀)ကျပ်ဖြင့် ရောင်းချကြောင်းသိရသည်။ သခွားသီးများကို ပြည်မြို့၊ ဈေးကြီးအပါအဝင် အခြားဈေးများတွင်လည်း ရောင်းချလျက်ရှိကြောင်းသိရသည်။

          သခွားသီးများ ရောင်းချရာတွင် ကျေးရွာအတွင်းမှ ဈေးသည်များမှ လာရောက်ဝယ်ယူကြသလို ပြည်မြို့ပေါ်ရှိ ဈေးများသို့လည်း သွားရောက်ရောင်းချမှုများရှိပါသည်။ ယခုအချိန်သည် သခွားသီးများ စတင်ထွက်ပေါ်ချိန်ဖြစ်သောကြောင့် စိုက်ပျိုးသူတောင်သူများ ဈေးကောင်းရကာ  အရောင်းသွက်ကြောင်း သိရှိရပါသည်။

DOCA(ပဲခူး)

      ထန်းမြစ်ဆိုသည်မှာ ထန်းသီးအရင့်များကို မြေကြီးထဲတွင် မြှုပ်ထားပြီး သုံးလခန့်အကြာတွင် ထွက်လာသည့် ထန်းပင်ပေါက်ကလေးများကို ခေါ်ပါသည်။ အရသာမှာ ဆိမ့်ပြီး အနည်းငယ်သက်သည်။ မီးဖုတ်၍ဖြစ်စေ၊ ပြုတ်၍ဖြစ်စေ ဆီဆမ်းစားရသည်။ အချို့ကလည်း ကြော်စားကြပါ သည်။

       ဖြူးမြို့မှ ထန်းမြစ်ရောင်းသူများသည် အညာဒေသမှလာသော ထန်းမြစ်များနှင့် တောင်ငူဒေသမှထွက်သော ထန်းမြစ်များကို ရောင်းချကြပါသည်။ အညာထန်းမြစ်သည် အခါးဓါတ်ပိုသဖြင့် လူကြိုက်နည်းပြီး တောင်ငူထန်းမြစ်မှာ အခါးဓါတ်နည်းသဖြင့် လူကြိုက်များသည်။ အညာထန်းမြစ်မှာ သယ်ယူစရိတ်ပို၍ ကုန်ကျသဖြင့် တောင်ငူထန်းမြစ်မှာ ပို၍အရောင်းကောင်းပါသည်။

      တောင်ငူထန်းမြစ်ကို ၁၀ ချောင်းပါ တစ်စည်းလျှင် ၁၄၀၀ ကျပ်မှ ၁၆၀၀ ကျပ်အထိ ဝယ်ယူရပြီး မီးဖုတ်၍ဖြစ်စေ၊ ပြုတ်၍ဖြစ်စေ အသင့်စား၍ရအောင်ပြုလုပ်ပြီးလျှင် အနုအရင့်ခွဲပြီး တစ်ချောင်းလျှင် ၂၀၀ ကျပ်မှ ၂၅၀ ကျပ်အထိဖြင့် ပြန်လည်ရောင်းချကြောင်း သိရပါသည်။

DOCA(ပဲခူး)

    တောင်ငူမြို့၊ ညောင်ပင်ဈေးတွင် ကြက်ပေါင်သီးများကို ပေါများစွာ ရောင်းချလျက်ရှိသည်ကို တွေ့ရပါသည်။ ကြက်ပေါင်သီးများကို ကြော်၍လည်းကောင်း၊ ထောင်း၍လည်းကောင်း၊ ချက်၍လည်းကောင်း အမျိုးမျိုးပြုလုပ်စားသုံးနိုင်ပါသည်။

   တောင်ငူမြို့ရှိ ဈေးများတွင် ကြက်ပေါင်သီး တစ်ပိဿာလျှင် ၃၅၀၀ ကျပ်မှ ၄၅၀၀ ကျပ်အထိ ရောင်းချနေသည်ကို တွေ့ရပါသည်။ ကြက်ပေါင်သီးထောင်း၊ ကြက်ပေါင်သီးဟင်းနှင့် ထမင်းစားလျှင် ခံတွင်းလိုက်၍ ထမင်းမြိန်စေသောကြောင့် လူအများကြိုက်နှစ်သက်ကြောင်း သိရပါသည်။

DOCA(ပဲခူး)

    တောင်ငူမြို့၊ မြို့မဈေးကြီးအတွင်းရှိ ငါးခြောက်ဆိုင်များတွင် ရောင်းချနေသော အာဗြဲခြောက်များသည် လူကြိုက်များသော ငါးခြောက်တစ်မျိုးဖြစ်ပါသည်။ အရသာမှာချိုပြီး ဆားလည်းပေါ့သဖြင့် စားကောင်းသည့် ငါးခြောက်တစ်မျိုးဖြစ်ပါသည်။

     ယခင်အောက်တိုဘာလတွင် အာဗြဲခြောက် တစ်ဆယ်ကျပ်သားလျှင် ၃၅၀၀ ကျပ်၊ တစ်ပိဿာယူလျှင် ၃၂၀၀၀ ကျပ်ရှိရာမှ ယခုအပတ်တွင် တစ်ဆယ်ကျပ်သားလျှင် ၄၅၀၀ ကျပ်၊ တစ်ပိဿာယူလျှင် ၄၀၀၀၀ ကျပ်ဖြင့် ရောင်းချလျက်ရှိပါသည်။

    ထို့အတူ အသင့်စားအာဗြဲခြောက်များကိုလည်း ရောင်းချလျက်ရှိရာ ယခင်က တစ်ထုပ်လျှင် ၈၀၀ ကျပ်ရှိရာမှ ယခုအခါတွင် တစ်ထုပ်လျှင် ၁၂၀၀ ကျပ်ဖြင့် ရောင်းချလျက်ရှိပါသည်။ အသင့်စား အာဗြဲခြောက်ပြုလုပ်ရာတွင် အာဗြဲခြောက်ကို အမြီးညှပ်၊ ခေါင်းဖြတ်သန့်စင်ပြီး အနည်းငယ် ထုထောင်း၍ မီးကင်စက်ဖြင့် ကင်ရပါသည်။ ထို့နောက် နောက်တစ်ကြိမ် ထပ်မံထုထောင်းပြီး ဆီဆမ်း၍ အသင့်စားသုံးနိုင်သည့်အာဗြဲခြောက်ဖုတ်များကို ပလတ်စတစ်ဖြင့် ထုပ်ပိုး၍ ဈေးကွက်အတွင်း ရောင်းချကြောင်း သိရပါသည်။

DOCA(ပဲခူး)