ပြည်တွင်းကုန်သွယ်မှုသတင်း

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့် ကုန်စည်ဒိုင်များဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များ ပိုမိုခိုင်မာအားကောင်းလာစေရေး ပူးပေါင်းဆောင်ရွက်လျက်ရှိသည့်အပြင် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/ တန် စာရင်းတို့ကို အပတ်စဉ်၊ လစဉ်တင်ပြလျက်ရှိကြောင်းသိရသည်။

          ရွှေဘိုဈေးကွက်သို့ စက်တင်ဘာလ၊ တတိယအပတ်မှစတင်၍ နှမ်းဖြူများဝင်ရောက်ခဲ့ပြီး စက်တင်ဘာလ၊ စတုတ္ထအပတ်တွင် အရောင်းအဝယ်ဖြစ်သည့်ဈေးနှုန်းမှာ နှမ်းဖြူတစ်တင်းလျှင် (၁၂၆၅၀ဝိ/-)ကျပ် ပေါက်ဈေးရှိပြီး အရောင်းအဝယ်ဖြစ်မှုမှာ (၉၀၀၀)တင်း/ (၂၂၀)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်အပတ်၌ နှမ်းဖြူတစ်တင်းလျှင်(၁၁၈၅၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် နှမ်းဖြူတစ်တင်းလျှင်(၈၀၀ဝိ/-)ဈေးပိုမိုရရှိခဲ့ကြောင်း၊  ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်နှစ်ကာလတူ၌ နှမ်းဖြူတစ်တင်းလျှင် (၁၀၃၃၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် နှမ်းဖြူတစ်တင်းလျှင် (၂၃၂၀ဝိ/-)ကျပ် ဈေးပိုမိုရရှိခဲ့ကြောင်း ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း) 

                ဧရာဝတီတိုင်းဒေသကြီး ဓနုဖြူမြို့နယ်သည် အဓိက ဆန်စပါးကို စိုက်ပျိုးလျက်ရှိပြီး စိုက်ပျိုးရေး လုပ်ငန်းများအပြင် မွေးမြူရေးလုပ်ငန်း၊ တစ်ပိုင်တနိုင် SME စက်မှု လက်မှုလုပ်ငန်းများ လုပ်ကိုင်နေပြီး ဒေသထွက် သီးနှံများကို ရန်ကုန်သို့ တင်ပို့နေကြောင်းသိရသည်။ ဓနုဖြူမြို့နယ်တွင် စိုက်ပျိုးသော အုန်းသီးများကို ရန်ကုန်မှ ဝယ်ယူနေပြီး ရန်ကုန်သို့ တင်ပို့နေကြောင်းသိရသည်၊ ဓနုဖြူမြို့နယ်တွင် အုန်းသီးစိုက်ဧက ၁၀၁၀ စိုက်ပျိုးပြီး ဧက ၇၀၀ ထွက်ရှိနေပြီဖြစ်ကြောင်းသိရသည်။

              ရန်ကုန်ဈေးကွက်သို့ နိုဝင်ဘာလ အုန်းသီးအလုံးရေ ၅၀၀၀၀၀ ထိ တင်ပို့ရောင်းချနိုင်ခဲ့ကြောင်း ဓနုဖြူမြို့နယ်မှ ရန်ကုန်ဈေးကွက်သို့ စက်တင်ဘာလအတွင်းက အုန်းသီးအလုံးရေ ၄၀၀၀၀၀ ထိသာ တင်ပို့ရောင်းချနိုင်ခဲ့ပြီး နိုဝင်ဘာလ ၁ ရက်မှ ၃၀ ရက်ထိ အုန်းသီးအလုံးရေ ၅၀၀၀၀၀ ထိ တင်ပို့ရောင်းချ ခဲ့ရကြောင်း၊ အုန်းသီး တစ်ပင်ကို ၃၅၀၀ကျပ်ဖြင့် ဝယ်ယူပြိး တစ်ဧကကို ၂၀၀ ခန့်စိုက်ပျိုးကြောင်း၊ တစ်ဧက ကုန်ကျစရိတ်အနေဖြင့် ၁၀သိန်းခန့် ကုန်ကျကြောင်း၊ ထွက်ရှိမှု အနေဖြင့် ၁လကို အလုံးရေ ၅၀၀၀ ခန့်ထွက်ရှိပြီး အုန်းသီးတစ်လုံးကို ပြင်ပပေါက်ဈေး ၂၅၀၀ ကျပ်ရောင်းချနေကြောင်း၊ တစ်ဧက အကျိူးအမြတ်အနေဖြင့် ၁၂၅၀၀၀၀၀ကျပ် ရရှိ၍ ၂၅၀၀၀၀ကျပ် အကျိုးအမြတ်ရရှိကြောင်းကို အုန်းစိုက်ပျိုးသူ တောင်သူပြောပြချက် အရသိရသည်။

              အဆိုပါ တင်ပို့ရောင်းချခဲ့သည့် အုန်းသီးအလုံးရေ ၁၀၀ လျှင် ဖောက်သည်ဈေး ငွေကျပ် ၁၅၀၀၀၀ ထိ ပေါက်ဈေး ရှိနေကြောင်း သိရသည်။ ဓနုဖြူမြို့နယ်မှ လယ်ယာထွက်ကုန်တွေကော၊ ခြံထွက်သီးနှံတွေပါ ရန်ကုန်ဈေးကွက်ကို တင်ပို့ရောင်းချနေခြင်းကြောင့် စီးပွားဖြစ်ထွန်းလျက်ရှိပြီး  မြို့နယ်တွင်း အုန်းခြစ်သည့်လုပ်ငန်း၊ အုန်းနို့ညှစ်သည့်လုပ်ငန်းများလည်း အဆင်ပြေနေကြောင်း၊ ဓနုဖြူမြို့နယ်မှ ထွက်ရှိသည့် အုန်းသီးများကို အုန်းသီးခြောက်၊ အုန်းသီးအစိမ်း၊ အုန်းသီးအနု၊ အုန်းသီးအခွံခွာ၊ အုန်းသီးအခွံပါ စသည့်အမျိုး အစားများ စနစ်တကျဆောင်ရွက်ပြီး ကုန်တင်ကား၊ ကုန်တင်ရေယာဉ်များဖြင့် တင်ပို့ရောင်းချနေကြောင်း၊ အဆိုပါ ဒေသထွက်အုန်းသီးများ ဈေးကောင်းလာခြင်း၊ ဝယ်ယူမှုများပြားလာခြင်းကြောင့် အုန်းစိုက်ပျိုးသူများ၊ ကုန်ထမ်းလုပ်သားများ၊ ပွဲရုံလုပ်ငန်းရှင်များ၊ ကုန်တင်ကားအငှားလိုက်သူများ အဆင်ပြေနေကြောင်း သိရှိရပါသည်။

DOCA(ဧရာဝတီ)

DOCA (ဧရာဝတီ)

           ဧရာဝတီတိုင်းဒေသကြီး၊ မအူပင်မြို့နယ်၊ တလုပ်လပ်နောင် (၄)မိုင်ကျေးရွာတွင် အာတာလွတ်(ခ) သင်ဥကို နှစ်စဉ်စိုက်ပျိုးလျက်ရှိပြီး  တစ်နှစ်လျှင် နှစ်ကြိမ်စိုက်ပျိုးကြကြောင်း၊ အာတာလွတ်(ခ) သင်ဥကို ယခင်နှစ်က စိုက်ဧက ၅၀ ခန့် စိုက်ပျိုး၍ ယခုနှစ်တွင် စိုက်ဧက ၆၀ ကျော် စိုက်ပျိုးထားရှိကြောင်း သိရှိရပါသည်။

          မျိုးအနေဖြင့် သင်ဥကို ဝယ်ယူစိုက်ပျိုးကြပြီး၊ နောက်နှစ်တွင် အာတာလွတ်အပင်ကို ဆက်လက်မြေထိုး၍ နှစ်စဉ်ထပ်မံစိုက်ပျိုးကြကြောင်း၊ စိုက်ပျိုးရာတွင် မြေပြုပြင်၍ ၁၀လန် ၄ကွက် စိုက်ပျိုးကြပြီး  ဆယ်လန်တစ်ကွက်လျှင် အပင်၂ပင်ပူး ၆ပေ ၈ပေခြား၍ အပင်၁သောင်းကျော် စိုက်ပျိုးရ၍ တစ်ကတွင် အပင်ရေ ၄သောင်းလောက် စိုက်ပျိုး ရကြောင်း၊  သဘာဝမြေဩဇာ ကိုသာ ကျွေး၍ ဇွန်လကုန်တွင် စတင်စိုက်ပျိုးပြီး စက်တင်ဘာလတွင် ခူးဆွတ် ရောင်းချရကြောင်း၊ စိုက်ပျိုး ထုတ်လုပ်မှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ ထွန်ယက်ခ အပါအဝင်  တစ်ဧက လျှင် ငွေကျပ် ၈၀၀၀၀၀ ကျော် ကုန်ကျကြောင်း၊ အထွက်နှုန်း အနေဖြင့် အာတာလွတ် (ခ) သင်ဥ တစ်ဧကလျှင် ပိဿာချိန် ၄၀၀ ခန့်ထွက်ရှိကြောင်း သိရသည်။

          ဈေးနှုန်းအနေဖြင့် ဒီဇင်ဘာလဆန်းပိုင်းတွင် ၁ပိဿာ ငွေကျပ် ၃၅၀၀ ဖြင့်လည်းကောင်း ရောင်းချရကြောင်း၊ အာတာလွတ်(ခ)သင်ဥ စိုက်တောင်သူများအနေဖြင့် တစ်ဧကလျှင် ငွေကျပ် ၁၄၀၀၀၀၀ ခန့်ရရှိ၍ ငွေကျပ် ၆၀၀၀၀၀ ခန့် အကျိုးအမြတ်ရရှိကြောင်း၊ ဈေးကွက်အနေဖြင့် ပုသိမ်၊ အိမ်မဲ၊ ရန်ကုန်မြို့သို့ အဓိက တင်ပို့ရောင်းချကြောင်း၊ သင်ဥသီးနှံစိုက်ပျိုးရာတွင် ကုန်ကျစရိတ် သက်သာပြီး အကျိုး အမြတ်များ ပိုမိုရရှိသောကြောင့် နှစ်စဉ်တိုးချဲ့ စိုက်ပျိုးလျက်ရှိကြောင်းလည်း သိရသည်။

DOCA (ဧရာဝတီ)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် စိုက်ပျိုးရေး လုပ်ငန်းကို စီးပွားဖြစ် လုပ်ကိုင်ကြပြီး သီးနှံမျိုးစုံအနက်မှ (ကျွန်း)စားတော်ပဲ စိုက်ပျိုးမှု ကိုလည်း တစ်ပိုင်တစ်နိုင် စိုက်ပျိုးကြကြောင်း၊ ဧရာဝတီမြစ်ရိုးတစ်လျှောက်ရှိ ကိုင်းကျွန်းမြေများတွင် သီးညှပ် စိုက်ခင်းအပြင် သီးသန့်စိုက်ပျိုးမှုကိုလည်း နှစ်စဉ်မပြတ်စိုက်ပျိုးကြောင်း၊ မြေပဲခင်းများတွင် လည်းသီးညှပ်အဖြစ် စိုက်ပျိုးမှုများကြောင်း သိရှိရသည်။

     စိုက်ပျိုးမြေအနေဖြင့် မြစ်‌ရေဝင်ကျွန်းမြေများတွင် စိုက်ပျိုးခြင်းဖြစ်၍ ယခုနှစ်မြစ်‌ရေတက်ချိန် တွင် စိုက်ခင်းများအတွင်း သဲနုန်းမြေတင်မှုများခြင်း၊ မြေသားကောင်းမွန်ခြင်းကြောင့် တောင်သူများအနေဖြင့် ယခင်နှစ်ထက် တိုးချဲ့စိုက်ပျိုးလာကြောင်း သိရှိရသည်။ ယခင်နှစ်တွင် စားတော်ပဲ စိုက်ဧက (၁၀၀၀)ခန့် စိုက်ပျိုးခဲ့ပြီး ယခုနှစ်တွင် ဧက(၁၅၀၀)ခန့်ထိ တိုးချဲ့စိုက်ပျိုးလာကြောင်း၊  စားတော်ပဲ သီးနှံကို အအေးဓာတ်ဝင်ချိန် တန်ဆောင်မုန်းလဆန်းပိုင်းတွင် စတင်၍ ကြဲပက်စိုက်ပျိုးပြီး တပေါင်း လဆန်းပိုင်းတွင် ရိတ်သိမ်းကြောင်း၊ မြေအောက်ရေအပြင် လိုအပ်ပါက ရေသွင်းရေဖျန်းစနစ်ဖြင့် စိုက်ပျိုးကြောင်း၊ စားတော်ပဲသီးနှံသည် ရေလိုအပ်သော အပင်ဖြစ်၍ ရေသွင်းစိုက်ပျိုးပါက သီးနှံ အထွက်နှုန်းကောင်းကြောင်း၊ ပြည်တွင်း သုံးစွဲမှုများပြီး ဈေးကွက်ခိုင်မာမှုရှိ၍ စိုက်တောင်သူများမှ နှစ်စဉ်မပြတ်စိုက်ပျိုးကြောင်း သိရှိရသည်။

     ကျွန်းစားတော်ပဲသီးနှံ(၁)ဧကစိုက်ပျိုးလျှင် မျိုးစေ့(၂)တင်း(၈)ပြည်ခန့် ကုန်ကျကြောင်း၊ ယခုနှစ် စိုက်ပျိုးချိန်တွင် ကျပ်(၁၄၀၀၀)ဈေးဖြင့် ဝယ်ယူစိုက်ပျိုးရကြောင်း၊ သီးညှပ်အပြင် သီးသန့်စိုက်ပျိုးမှုများလည်း များလာကြောင်း၊ (၁)ဧက ကုန်ကျစရိတ်အနေဖြင့် သီးညှပ်စိုက်ခင်းများတွင် ကုန်ကျစရိတ်နည်းသော်လည်း သီးသန့်စိုက်ပျိုးပါက (၁)ဧက ကျပ်(၇၀၀၀၀၀)ခန့် ကုန်ကျကြောင်း၊ ယခင်နှစ် အထွက်နှုန်း အနေဖြင့် (၁)ဧကလျှင် စားတော်ပဲ တင်း(၁၀-၁၅)အထိ ထွက်ရှိကြောင်း၊ အကျိုးအမြတ်အနေဖြင့် စားတော်ပဲသီးနှံ ပေါ်ချိန် ဒေသတွင်းဈေးကွက်တွင် စားတော်ပဲတစ်တင်းလျှင် ကျပ်(၁၅၀၀၀၀)ဈေးဖြင့် ရောင်းချရကြောင်း၊ အကျိုးအမြတ်အနေဖြင့် (၁)ဧက ကျပ်(၁၂၀၀၀၀၀)ခန့် ရရှိကြောင်း၊ ယခုအချိန်တွင် စားတော်ပဲ စိုက်ခင်းများ အောင်မြင်ဖြစ်ထွန်းလျက်ရှိကြောင်း၊ သီးနှံပေါ်ချိန်တွင် စားတော်ပဲ အထွက်ကောင်းပြီး ဈေးကွက် ကျဆင်းခြင်းမရှိ ဈေးကောင်းရရှိပါက တောင်သူများ အဆင်ပြေမည်ဖြစ်ကြောင်း ဒေသခံတောင်သူထံမှ သိရှိရသည်။

      စားတော်ပဲသီးနှံသည် ပြည်တွင်းစားသုံးမှုပဲများတွင် တစ်မျိုးအပါအဝင်ဖြစ်ပြီး စားသုံးရာတွင်လည်း အရသာအကောင်းဆုံး ပဲတစ်မျိုးဖြစ်၍ မြန်မာ့ဓလေ့အစဉ်အလာအရ စားတော်ပဲပြုတ် စားသုံးမှုများခြင်းကြောင့် နေ့စဉ်သုံးစွဲလျက်ရှိသော သီးနှံတစ်မျိုးဖြစ်၍ ပြည်တွင်းဈေးကွက် ခိုင်မာလျက်ရှိသည်။ ပြည်တွင်းသုံးစွဲမှုများပြီး စိုက်ပျိုးမှုနည်းပါးခြင်းကြောင့် စားသုံးမှုလိုအပ်ချက်အရ ပြည်ပနိုင်ငံများမှ ဝယ်ယူတင်သွင်းရ၍ ဒေသတွင်း စိုက်တောင်သူများအနေဖြင့် ဈေးကွက်ခိုင်မာမှုရှိ၍ စိုက်ပျိုးရာတွင် ကုန်ကျစရိတ်နည်း၍ အလွယ်တကူရရှိပြီး အကျိုးအမြတ်ရရှိသော စားတော်ပဲသီးနှံကို တိုးချဲ့စိုက်ပျိုးသင့်ပါကြောင်း ရေးသားလိုက်ရပါသည်။

DOCA(မကွေး)

             ဧရာဝတီတိုင်းဒေသကြီး၊ မအူပင်မြို့တွင် ဒေသထွက်ကုန်အနေဖြင့် ငါးချဉ်နှင့် ငါးခုံးမချဉ်လုပ်ငန်းအား တစ်နိုင်တစ်ပိုင်လုပ်ကိုင်လျက်ရှိပြီး မအူပင်မြို့အခြေပြု စီးပွားဖြစ်ထုတ်လုပ်ရောင်းချ လျက်ရှိသည်။ ငါးဖယ်ချဉ်၊ ပုစွန်ချဉ်များကို အမှတ်တံဆိပ်အသီးသီးဖြင့် ထုတ်လုပ်ရောင်းချလျက်ရှိပြီး လုပ်ငန်းပေါင်း ၁၂ခုရှိကြောင်းသိရသည်။ ငါးဖယ်ချဉ်၊ ပုစွန်ချဉ်ပြုလုပ်သလို ငါးခုံးမချဉ်ကိုလည်းပြုလုပ်ကြောင်း၊ ငါးခုံးမချဉ်ပြုလုပ်သူ ကျေးရွာများမှ ၂၀ဦးခန့်ရှိကြောင်း၊ မအူပင် ငါးခုံးမချဉ်သည် သန့်ရှင်းလပ်ဆပ်ပြီး ဈေးအတွင်း ဝယ်ယူသူများကို အချိန်ဖြင့် ရောင်းချခြင်းများသာဖြစ်ကြောင်း သိရသည်။

             ငါးခုံးမချဉ်ပြုလုပ်ရာတွင် အဓိကအသုံးပြုသည့် ငါးခုံးမအကောင်သေးအမျိုးအစားဖြစ်ပြီး မအူပင် တိုးမြစ်အတွင်းမှ ဖမ်းစီးရမိသော ငါးခုံးမငါးကလေးများကိုသာ ကုန်ကြမ်းအဖြစ်အသုံးပြူပြီး ငါးများကို မအူပင်မြို့ရှိ မြစ်ငါးသီးသန့်ရောင်းချသူများထံမှ ပိဿာလိုက်ဝယ်ယူအသုံးပြုလျက်ရှိကြောင်း၊  ငါးခုံးမချဉ်ထုပ်ပိုးရာတွင် သန့်ရှင်းသော ငှက်ပျောဖတ်ဖြင့် ထုတ်ပြီးအပေါ်မှ ဖျင်ပါးပိတ်စသန့်သန့်ဖြင့် အချဉ် ၃ရက်မှ ၅ရက်ထိ အချဉ်ခံထားသိပ်ပြီး အချိန်ဖြင့်လှီးဖြတ်ရောင်းချကြောင်း သိရသည်။

              ငါးခုံးမချဉ်ပြုလုပ်ရာတွင် ငါးခုံးမ ပိသာချိန် ၁၀ ကို ဆန် ၁ပြည်နှင့် ဆား ၁ပိသာသုံးရကြောင်း၊ ငါးခုံးမချဉ်ထုတ်လုပ်သည့် လုပ်ငန်းငယ်တစ်ခုတွင် တစ်ရက်လျှင် ငါးပိဿာချိန် ၁၀ မှ ၅၀ အထိ အသုံးပြု၍ထုတ်လုပ်သည်။ ငါးပိဿာချိန် ၁၀ လျှင် ငါးခုံးမချဉ် ၇ပိဿာ ခန့်ထွက်ရှိကြောင်း၊ ငါးပိဿာချိန် ၁၀ လျှင် ငါးခုံးမချဉ်ထုတ်လုပ်မှုကုန်ကျစရိတ် ၅၅၀၀၀ ခန့်သာ ကုန်ကျကြောင်း၊ စျေးနှုန်းအနေဖြင့် ငါးခုံးမချဉ် ၁၀ ကျပ် ငွေကျပ် ၁၅၀၀  နှုန်းဖြင့် ရောင်းချ လျက်ရှိကြောင်း၊ တစ်ရက်လျင် ငါးပိဿာချိန် ၁၀ အသုံးပြုရပြီး ငါးချဉ်ထုတ်လုပ်နိုင်ပါက ငွေကျပ် ၅၀၀၀၀ နှင့် ငါးပိဿာချိန် ၅၀ အသုံးပြုရပြီး ငါးချဉ်ထုတ်လုပ်နိုင်ပါက ငွေကျပ် ၂၅၀၀၀၀ အကျိုးအမြတ်ရရှိကြောင်း၊စျေးကွက်အနေဖြင့် ဒေသတွင်းရှိဈေးများ၊ ကျိုတ်လတ်၊ ဖျာပုံ၊ မော်ကျွန်း၊ မြောင်းမြ၊ အိမ်မဲနှင့် ရန်ကုန်မြို့မှ မှာယူပါကလည်း တစ်ပါတ်လျင် အချိန်၁၀ပါ ငါးခုံးမချဉ်  အချိန် ၃၀ တင်ပို့ပြီး တစ်လလျှင် ၁၂၀ ပိဿာ တင်ပို့ပေးရကြောင်း၊ ငါးခုံမ ပေါပေါများများထွက်ရှိချိန်တွင်  ရန်ကုန်သို့ ပိဿာ ၂၀၀ နီးပါးမှာယူ၍ တင်ပို့ရပြီး ဝယ်ယူသုံးစွဲမှု မြင့်တက် လျက်ရှိကြောင်း သိရှိရပါသည်။          

DOCA (ဧရာဝတီ)