အစေ့ထုတ်ပြောင်းများကို ရှမ်းပြည်နယ်တောင်ပိုင်းတွင် အများအပြား စိုက်ပျိုးလျက် ရှိပါ သည်။ ရှမ်းပြည်နယ်တောင်ပိုင်းတွင် ၂၀၂၄-၂၀၂၅  စိုက်ဧကမှာ(၁၀၀၉၉၇၀) စိုက်ဧက ရှိပါသည်။ ရေရရှိသော နေရာများတွင်စိုက်ပျိုးသော အစေ့ထုတ်ပြောင်းများသည် စက်တင်ဘာလ တွင် စတင်ထွက်ရှိပြီး မိုးရေကိုအားထား၍ စိုက်ပျိုးသော အစေ့ထုတ်ပြောင်းများကို နိုဝင်ဘာလတွင် စတင်ထွက်ပေါ်လေ့ ရှိပါသည်။ ယခုနှစ်တွင် အစေ့ထုတ်ပြောင်း စတင်ထွက်ပေါ်ချိန်တွင် တစ်ပိသာလျှင်(၁၂၀၀)ကျပ်ခန့် ဒေသပေါက်ဈေး ရှိခဲ့ပါသည်။ လက်ရှိအချိန်တွင် အစေ့ထုတ် ပြောင်း တစ်ပိသာအနေဖြင့်(၁၄၅၀) မှ (၁၅၀၀) ကျပ်ခန့် ပေါက်ဈေးရှိပါသည်။ အစေ့ထုတ်ပြောင်း ကို မွေးမြူရေး အစားအစာ အဖြစ် ဝယ်ယူကြပြီး အခြားတိုင်းဒေသကြီး ပြည်နယ်များသို့လည်း တင်ပို့ရောင်းချလျှက် ရှိပါသည်။ လက်ရှိအချိန်တွင် အစေ့ထုတ်ပြောင်းများအား (၁၀) ဘီး၊(၁၂)ဘီး  (၂၂)ဘီး ကားများဖြင့် တစ်ရက်လျှင် ပျှမ်းမျှ (၂၀) စီး မှ (၃၀ ) စီး အထိ စီးထွက်လျှက်ရှိကြောင်း သတင်းရရှိပါသည်။

DOCA(ရှမ်း)

ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ  ဝန်ထမ်းများသည် ၂၀၂၄ ခုနှစ်၊ ဒီဇင်ဘာလ ၁၃ ရက်နေ့၊ နံနက်(၇:၃၀)နာရီချိန်တွင် ရှမ်းပြည်နယ်အတွင်းရှိ စားသုံးသူ ပြည်သူများအနေဖြင့် ကုန်ဈေးနှုန်းကြီးမြင့်မှုကြောင့် စားဝတ်နေရေးဆိုင်ရာ ဝန်ထုပ်ဝန်ပိုးမြင့်မားမှု မရှိစေရေးအတွက် ပြည်နယ်အတွင်းမှ ထုတ်လုပ်သောကြက်ဉများအား သင့်တင့်မျှတသော ဈေးနှုန်းဖြင့် စားသုံးသူပြည်သူများထံသို့ရောင်းချပေးရန် ရှမ်းပြည်နယ်ကုန်ဈေးနှုန်းတည်ငြိမ်ရေး လုပ်ငန်းအဖွဲ့ ဉက္ကဌမှ လမ်းညွှန်မှာကြားချက်အရ ကြက်မွေးမြူရေးလုပ်ငန်းများမှ တောင်ကြီးမြို့ပေါ်ရှိ စည်ပင်သာ ယာဈေးများဖြစ်သော မြို့မဈေး၊ အမှတ်(၅)ဈေး၊ စဝ်စံထွန်းဈေး၊ အဝေရာဈေး၊ အေးသာယာမြို့မှ အေးသီရိဈေး၊ ရွှေညောင်ဈေးတို့တွင် နေ့စဉ် (တနင်္လာ၊ ဗုဒ္ဓဟူး၊ သောကြာ)နေ့များတွင် တာဝန်ကျ ကြက်ဥဒိုင်များမှ အလှည့်ကျရောင်းချပေးသော နေရာများသို့ အမှန်တကယ်‌ရောင်းချမှု ရှိ/မရှိကို သွားရောက်၍  မြေပြင်ကွင်းဆင်း စစ်ဆေးဆောင်ရွက်ခဲ့ပါသည်။

ထိုသို့ ကွင်းဆင်းဆောင်ရွက်မှုအနေဖြင့် (၁၃.၁၂.၂၀၂၄)ရက်နေ့တွင် တောင်ကြီးမြို့ပေါ်ရှိ မြို့မဈေး၌ တာဝန်ကျသော ကောင်းထက်ကြက်ဥဒိုင်မှ အလုံးရေ(၂၂၈၀)လုံး၊ အမှတ်(၅)ဈေး၌ ဧရာနဒီ ကြက်ဥဒိုင်မှ အလုံးရေ(၂၁၅၀)လုံး၊ စဝ်စံထွန်းဈေး၌ ခိုင်ခိုင်ကျော် ကြက်ဥဒိုင်မှ အလုံးရေ(၂၂၄၅)လုံး၊ အဝေရာဈေး၌ တက်ချောင် ကုမ္ပဏီမှ အလုံးရေ(၄၉၀၀)လုံး၊ အေးသာယာမြို့ အေးသီရိဈေး၌ ပွင့်ကြက်ဥဒိုင်မှ အလုံးရေ (၇၃၀)လုံး၊ ရွှေညောင်ဈေး၌ မကွေးကြက်ဥဒိုင်မှ အလုံးရေ(၁၈၆၀)လုံးများကို တစ်လုံးလျှင်(၃၈၀)ကျပ် ဖြင့်ရောင်းချနေကြောင်း သတင်းရရှိပါသည်။

DOCA(ရှမ်း)

             ပြည်ခရိုင်၊ ရွှေတောင်မြို့နယ်၊ ဝါးတောအုပ်စု၊ ဖားအိုင့်ရွာရှိ တောင်သူဒေါ်နွယ်နွယ်ဝင်း၏ ပင်ဆိုင်စိုက်ခင်းသို့ (၆.၁၂.၂၀၂၄)ရက်နေ့ နံနက်(၁၀:၃၀)နာရီ အချိန်တွင် သွားရောက်လေ့လာခဲ့ရာ ပင်ဆိုင်ပင်များကို သီတင်းကျွတ်လတွင် စိုက်ပျိုးပြီး တစ်လကြာလျင် ပင်ဆိုင်ပင်များကိုနုတ်ယူ ရောင်းချ၍ရပါသည်။ ပင်ဆိုင်ပင်ကို တစ်ပင်နှင့်တစ်ပင် ၁ပေ အကွာတွင် စိုက်ပျိုးပြီး မြောင်း(၁၀) မြောင်းတူး၍ မြောင်း(၁၀)မြောင်းကို မျိုးစေ့ ၁ထုပ် ဖြင့်စိုက်ပျိုးရပါသည်။ ပင်ဆိုင်ပင်များသည် တစ်လလုံးအတွက် အစာကို ၂ပြည် အနည်းဆုံးကျွေးရပြီး ပင်ဆိုင်အပင်မှာ အားကောင်းလျင် အပင် ရေ(၅၀၀၀)ထွက်ရှိပါသည်။ ပင်ဆိုင်ပင်များကို နှုတ်ယူရောင်းချချိန်တွင် တစ်နေ့လျင် အပင်ရေ၁၀၀ပင်မှ အပင်ရေ ၁၅၀ အထိနုတ်လို့ရရှိကြောင်း သိရပါသည်။ ပင်ဆိုင်ပင်များကို ဒိုင်များမှ အပင်အကြီးအသေးကို တစ်ပင်လျှင် ၁၅၀ ကျပ်နှုန်းဖြင့် လာရောက်ဝယ်ယူကြောင်း သိရှိရပါသည်။ ကုန်စိမ်းဒိုင်များမှတစ်ဆင့် လက်လီပြန်လည်ရောင်းဈေးမှာ ပင်ဆိုင်တစ်ပင်ကို (၂၀၀-၃၀၀) ကျပ်ဖြင့် ရောင်းချကြပါသည်။ ပင်ဆိုင်မျိုးစေ့ တစ်ထုပ်စိုက်ပျိုးခြင်း၏ ကုန်ကျစရိတ်မှာ ၅၀၀၀၀ ကျပ်ခန့်ကုန်ကျပြီး တစ်နေ့ကို အနည်းဆုံးအပင်ရေ (၁၀၀)ထွက်ပါက တစ်နေ့ဝင်ငွေမှာ ၂၀၀၀၀ ကျပ်ရရှိသောကြောင့် တစ်လကြာစိုက်ပျိုးရသောအပင်ဖြစ်ပြီး အကျိုးအမြတ်များများရရှိကြောင်း သိရှိရပါသည်။

DOCA(ပဲခူး)

အညာဒေသ လယ်တွင်းကိုးခရိုင်တွင် တစ်ခုအပါအဝင်ဖြစ်သည့် ကျောက်ဆည်မြို့နယ်တွင် ငှက်ပျောသီးနှံ စိုက်ပျိုးမှုအား တစ်နိုင်တစ်ပိုင် စိုက်ပျိုးမှုမှ စီးပွားဖြစ်စိုက်ပျိုးမှုများလာကြပါသည်။ ငှက်ပျော စိုက်ပျိုးရာတွင် အရင်းအနှီးများသော်လည်း အမြတ်များများကျန်ပြီး တွက်ခြေကိုက်သဖြင့်  စီးပွားဖြစ် စိုက်ပျိုးသူများလာကြောင်း ငှက်ပျောစိုက် တောင်သူများထံမှ သိရပါသည်။

ငှက်ပျောကို မေလ နှင့် ဇွန်လများတွင် စတင်စိုက်ပျိုးကြပြီး ငှက်ပျောဆို့ (ခေါ်) ငှက်ပျောပင် ပေါက်ကလေးများကို တစ်ပင်နှင့်တစ်ပင် ရှစ်ပေခြားကာ စိုက်ပျိုး၍ (၉-၁၀)လအကြာတွင် ငှက်ပျောဖူးများ စတင်ထွက်ရှိလာပါသည်။ ငှက်ပျောဖူးထွက်ပြီး (၃)လကြာလျှင် ရောင်းတန်းဝင် ငှက်ပျောခိုင်တစ်ခိုင်ကို ရရှိကာ ငှက်ပျောခိုင် တစ်ခိုင်လျှင် ၉ ဖီး မှ တစ်ဖီးလျှင် အသီး (၁၀ မှ ၁၅)လုံး အထိထွက်ရှိတတ်ပါသည်။ ငှက်ပျောတစ်ဧကလျှင် အပင်(၈၀၀)စိုက်ပျိုးကြပြီး တစ်ဧကကုန်ကျစရိတ်အနေဖြင့် ငှက်ပျောအပင်ပေါက် ဝယ်ယူခ၊ ကျင်းတူးခ၊ စိုက်ခ၊ စက်မောင်းခ၊ သွင်းအားစု၊ လုပ်သားခ စုစုပေါင်း (၁၀၀၀၀၀ဝိ/-)ကျပ် ဝန်းကျင်ခန့် ကုန်ကျကြောင်းနှင့် တစ်ဧကအထွက်နှုန်းအနေဖြင့် ငှက်ပျောခိုင်(၄၀)ပါ လှည်းအစီး ပျမ်းမျှ(၁၆-၁၇)စီးခန့် ထွက်ရှိကြောင်း ငှက်ပျောစိုက်တောင်သူများထံမှ လေ့လာသိရှိရပါသည်။

            ငှက်ပျောပင်များသည် စိုက်ပျိုးပြီး တစ်နှစ်နည်းပါး အချိန်ကြာကြာစောင့်ရသော်လည်း ရောင်းတန်းဝင် အပင်များ ဖြစ်လာပါက ငှက်ပျောခိုင်၊ ငှက်ပျောဖူး၊ အရွက်၊ ပင်စည်ထဲမှ ငှက်ပျောအူများပါ ရောင်းချရပြီး ထွက်ရှိသည့် အသီးအရွယ်အစားပေါ်မူတည်၍ ဖီးကြမ်းငှက်ပျောတစ်ဖီးလျှင် (၁၀၀၀/- မှ ၄၀၀၀/-)ကျပ်၊ သီးမွှေးငှက်ပျောတစ်ဖီးလျှင် (၃၀၀၀/- မှ ၇၀၀၀/-)ကျပ်၊ ရွှေနီငှက်ပျောတစ်ဖီးလျှင် (၄၀၀၀/- မှ ၅၀၀၀/-)၊ ရခိုင်ငှက်ပျောတစ်ဖီးလျှင်(၁၀၀၀/- မှ ၂၀၀၀/-)ကျပ်၊ ငှက်ပျောဖူး တစ်ဖူးလျှင် (၅၀၀/-)ကျပ်တို့ဖြင့် ဈေးကွက် အတွင်း အရောင်းအဝယ်ဖြစ်လျက်ရှိကြောင်း သိရှိရပါသည်။  

DOCA(ရှမ်း)

             ပြည်ခရိုင်၊ ရွှေတောင်မြို့နယ်၊ မီးလောင်အုပ်စုတွင် ကျောက်ဖရုံသီးစိုက်ပျိုးသူတောင်သူ (၈)ဦးရှိပြီး ကျောက်ဖရုံစင်ပေါင်း (၈)စင်ရှိပါသည်။ ထို့ကြောင့် ကျောက်ဖရုံစိုက်ပျိုးထုတ်လုပ်မှုအား သိရှိနိုင်ပါရန် စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံရုံးမှ ဝန်ထမ်းများအဖွဲ့သည် (၃.၁၂.၂၀၂၄) ရက်နေ့တွင်သွားရောက်လေ့လာခဲ့ကြောင်းသိရသည်။

          ရွှေတောင်မြို့နယ်၊ မီးလောင်အုပ်စု၊ ထိုးတွင်းစဉ်ကျေးရွာတွင် ကျောက်ဖရုံသီး စိုက်ပျိုးသူတောင်သူ ဦးဘိုနိုင်ဝင်း နှင့်တွေ့ဆုံ၍ မေးမြန်းရာ စင်တစ်စင်ကုန်ကျစရိတ်အနေဖြင့် (၂)သိန်းကျပ် ခန့်ကုန်ကျပြီး ကျောက်ဖရုံစင်တစ်စင်လျှင် (၃)နှစ်ခန့် အသုံးပြုရပါသည်။ ထိုအပြင် အခြား မျိုးဖိုးနှင့် သွင်းအားစုအပါအဝင် စုစုပေါင်းကုန်ကျစရိတ်မှာ ၅၀၀၀၀၀ကျပ်ခန့် ကုန်ကျကြောင်း သိရပါသည်။ ကျောက်ဖရုံသီးထွက်ပေါ်ချိန်တွင် တစ်လလျှင် (၄)ကြိမ်ခူးဆွတ်ရပြီး တစ်ကြိမ်ခူးဆွတ် လျှင် အနည်းဆုံးအလုံးရေ(၅၀)ခန့် ခူးဆွတ်ရရှိပါသည်။ ထို့ကြောင့်စင်တစ်စင်လျှင် အလုံးပေါင်း ၆၀၀ ကျော်ခူးဆွတ်ရရှိသည်ဟု သိရပါသည်။ ရောင်းချသောဈေးနှုန်းများအနေဖြင့် တစ်လုံးလျှင် ၂၀၀၀ ကျပ်ဖြင့်ရောင်းချသဖြင့် ဝင်ငွေအနေဖြင့်(၁၂)သိန်းကျပ်ခန့်ရရှိ၍ တောင်သူအသားတင် အမြတ်အနေ ဖြင့် (၇၀၀၀၀၀)ကျပ်ခန့်ရရှိကြောင်း သိရပါသည်။ ပထမစတင်စိုက်ပျိုးသောနှစ်တွင် စင်ဘိုးကုန် ကျပြီး နောက်နှစ်များတွင် စင်ဘိုးကုန်ကျမှုမရှိသည့်အတွက် အကျိုးအမြတ်များ ပိုမိုရရှိမည်ဖြစ်ပါသည်။ ထွက်ရှိလာသော ကျောက်ဖရုံသီးများကို ရောင်းချသောဈေးကွက်အနေဖြင့် ရန်ကုန်မြို့နှင့် ပြည်မြို့အနီးရှိ ဖရုံယိုလုပ်ငန်းလုပ်ကိုင်သူများအား ရောင်းချလျက်ရှိသလို ဈေးကွက်များသို့လည်း တင်သွင်းရောင်းချလျက်ရှိကြောင်း သိရှိရပါသည်။

DOCA(ပဲခူး)