ပြည်တွင်းကုန်သွယ်မှုသတင်း

     ရန်ကုန်တိုင်းဒေသကြီး လှိုင်မြို့နယ်  သီရိမင်္ဂလာဈေးအတွင်းသို့ နေ့စဉ်အနယ်နယ်အရပ်ရပ်မှ သစ်သီးများ၊ ပန်းနှင့် ကုန်စိမ်းများ ဝင်ရောက်လျက်ရှိရာ အောင်ပန်း၊ တောင်ကြီး၊ ကလော၊ ဟဲဟိုး၊ အင်းလေး၊ မှော်ဘီ၊ တိုက်ကြီး၊ တွံတေး၊ ကျောင်းကုန်း၊ ရွှေညောင်၊ ညောင်နှစ်ပင်၊ ခရမ်း၊ သုံးခွ၊ ဝါးနက်ချောင်း၊ ဧရာဝတီတိုင်း၊ ပဲခူးတိုင်း၊ မန္တလေးတိုင်းတို့မှ ၂.၉.၂၀၂၅ ရက်နေ့တွင် ကုန်စိမ်းကုန်ချိန် ပိဿာချိန်ပေါင်း (၈၇၂၀၀၀) ကား (၉၆) စီးဝင်ရောက်လျက်ရှိကြောင်း၊ ပြင်ဦးလွင်၊ ကလော၊ မိုးကုတ်၊ တောင်ကြီး၊ အောင်ပန်း၊ ဘီးလင်း၊ တပ်ကုန်း၊ ရဲမွန်၊ ရေး၊ အင်းမ၊ မှော်ဘီ၊ တိုက်ကြီး၊ မန္တလေး ၊ သီပေါ၊ ကျိုက်ကော်၊ မော်လမြိုင်၊ ပုပ္ပါး၊ ကျောက်ဆည်၊ တောင်ငူ၊ တွံတေး၊ ထားဝယ်၊ ကြံခင်း၊ ခရမ်းတို့မှ သစ်သီးများ ကုန်ချိန်ပိဿာချိန်ပေါင်း (၂၃၆၀၀၀) ကား (၃၂) စီးဝင်ရောက်ပြီး  ကလော၊ ဟဲဟိုး၊ တောင်ကြီး၊ ပြင်ဦးလွင်၊ ရွှေတောင်၊ ငွေတောင်၊ လှည်းကူး၊ ကျွန်းကလေး၊ ဇီးဖြူကုန်း၊ တွံတေး၊ ကော့မှူး၊ ညောင်တုန်းတို့မှ ပန်းများ ကုန်ချိန်ပိဿာပေါင်း (၄၈၆၀၀)  ကား (၃၉) စီး ဝင်ရောက်ကြောင်း သိရှိရပါသည်။

DOCA (ရန်ကုန်)

   တနင်္သာရီတိုင်းဒေသကြီး၊ မြိတ်ခရိုင်တွင် ဒေသထွက်ကုန်ဖြစ်သော ကွမ်းသီး၊ ရာဘာ ၊ သီဟိုဠ်များစိုက်ပျိုးလျက်ရှိပြီး ပြည်တွင်း၊ ပြည်ပ တင်ပို့ရောင်းချလျက်ရှိသည်။ ပို့ကုန်များထဲမှ ကွမ်းသီးသည် တင်ပို့အားကောင်းလျက်ရှိပြီး တောင်သူများအတွက် စျေးကောင်းရလျက်ရှိ သည်။ ၂၀၂၅ခုနှစ်၊ သြဂုတ်လ(၂၂)ရက်နေ့တွင်ကွမ်းသီးစျေးနှုန်းစုံစမ်းချက်အရ ကွမ်းသီးနုစျေး နှုန်းများကျဆင်းသွားကြောင်းသိရှိရပါသည်။ ယခင်အပတ်တွင် ကွမ်းသီးနုစျေးနှုန်း (၅၂၀၀) ကျပ်ရှိရာမှ ယနေ့ကွမ်းသီးစျေးနှုန်းမှာ (၄၂၀၀)ထိကျဆင်းသွား‌ကြောင်းသိရှိရပါသည်။ ဝယ် ယူမှုလျော့နည်းခြင်းကြောင့် စျေးအနည်းငယ်ကျဆင်းခြင်းဖြစ်ကြောင်းသိရှိရပါသည်။ စျေး ကွက်တွင် ကွန်းသီးနုစျေးနှုန်းကျဆင်းနေသော်လည်း ကွန်းသီးခြောက်စျေးနှုန်းမှာ တည်ငြိမ် လျက်ရှိကြောင်းသိရှိရပါသည်။ ကွမ်းသီးခြောက်(အလုံး)စျေးနှုန်းမှာတစ်ပိဿာလျှင်(၂၄၀၀၀) ကျပ်နှင့် ခွဲခြမ်းစျေးနှုန်းမှာ (၁၈၀၀၀)ကျပ်ခန့်ရှိကြောင်းသိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့ပေါ်ရှိ ကျေးရွာများနှင့်ရပ်ကွက်ဈေးငယ်များတွင် စိုက်ပျိုးရေးလုပ်ငန်းများကို အဓိကထားလုပ်ကိုင်ကြပြီး စာဖိုဆောင်သီးနှံတစ်မျိုးဖြစ်သည့် ကန်စွန်းဥ ကိုလည်း တစ်နိုင်တစ်ပိုင်စိုက်ပျိုးကြပြီး ဈေးကွက်အတွင်းရောင်းချနေကြောင်း သိရှိရပါသည်။ ကန်စွန်းဥကို ပြုတ်စားခြင်း၊ ကြော်စားခြင်း၊ မုန့်မျိုးစုံများကိုလည်း ပြုလုပ်စားကြပါသည်။ ကန်စွန်းဥသည်စားကောင်းရုံသာမကကျန်းမာရေးအတွက် လွန်စွာအထောက်အကူပြုပါသည်။ ကန်စွန်းဥမှာ အာဟာဓာတ်များစွာပါဝင်သည့်အတွက် ကိုယ်ခံအားကောင်းမွန်စေခြင်း၊ အမြင် အာရုံများကိုကောင်းမွန်စေခြင်း၊ ဦးနှောက်လုပ်ဆောင်မှုများကိုကောင်းမွန်စေခြင်း၊ ကိုယ်အလေးချိန်ကိုကောင်းမွန်စေခြင်းစသည့် အကျိုးကျေးဇူးများရရှိနိုင်သည့်အတွက် ကန်စွန်းဥများကို စားသုံးသင့်ပါသည်။

          ယခု၂၀၂၅ခုနှစ်၊ သြဂုတ်လတတိယပတ်တွင် မြိတ်မြို့ပေါ်ရှိ ကန်စွန်းဥဈေးနှုန်းမှာ တစ်ပိသာလျှင် (၄၀၀၀)ကျပ်နှင့် (၄၅၀၀)ကျပ်ခန့် ရှိကြောင်းသိရှိရပါသည်။ ကန်စွန်းဥအပြုတ် (၃)လုံးလျှင် (၁၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်မြို့ပေါ်တွင် စိုက်ပျိုးရေးနှင့် မွေးမြူရေးလုပ်ငန်းကို ရာသီအလိုက် စားဖိုဆောင်သီးနှံများကိုစိုက်ပျိုးလျက်ရှိရာမှ ပူစီနံများကို အနည်းငယ်မျှသာ စိုက်ပျိုးကြပြီး ခူးဆွတ်ရောင်းချကြကြောင်းလည်း သိရှိရပါသည်။ ပူစီနံများကို မြန်မာဟင်းများတွင် သာမက မုန့်ဟင်းခါးအသုပ်စုံတို့တွင်လည်း တွဲဖက်စားသုံးကြပါသည်။ ဆောင်းရာသီများတွင်သာ အထွက်များသောကြောင့် ကျန်ရာသီများမှာ ဈေးကြီးပေးကာဝယ်ယူကြရကြောင်း သိရှိရပါသည်။

     ၂၀၂၅ခုနှစ်၊ ယခုသြဂုတ်လတတိယပတ်တွင် မြိတ်မြို့ပေါ်တွင် ရောင်းချနေသော ပူစီနံ ဈေးနှုန်းမှာ တစ်စည်းလျှင် (၅၀၀)ကျပ်ရှိပြီး နံနံပင်တစ်စည်းလျှင်လည်း (၅၀၀)ကျပ်သာရှိကြောင်း သိရှိရပါသည်။

DOCA(တနင်္သာရီ)

        ပြည်ဈေးကွက်အတွင်း ငွေနှင်းမှိုသည် တစ်နှစ်ပတ်လုံးထွက်ရှိသည့် မှိုအမျိုးအစားဖြစ်ပြီး ပြည်မြို့ပေါ် ရွာဘဲရပ်၊ နဝဒေးရပ်၊ ခေတ္တရာရပ်ကွက်အစုံနှင့် မြို့နယ်နေရာအချို့တွင် တစ်နိုင်တစ်ပိုင် စိုက်ပျိုးရောင်းချနေကြပါသည်။ ပြည်မြို့ပေါ်လက်လီဈေးများသို့ တစ်ပတ်လျှင် ရက်ခြား (၈)ပိဿာမှ (၁၀)ပိဿာခန့်အဝင်ရှိပြီး ဈေးကွက်အတွင်း အဝင်ရှိသလောက် အရောင်းအဝယ် ဖြစ်ကြောင်းသိရသည်။ ငွေနှင်းမှိုကို ကန်စွန်းရွက်နှင့်ရော၍ ချက်စားခြင်း၊ ငရုတ်သီးစိမ်း၊ မျှင်ငပိတို့နှင့် ငပိချက် ချက်၍ စားသောက်ကြပါသည်။ ပြည်မြို့ပေါ် ဈေးကွက်တွင် ငွေနှင်းမှို (၁၀)ကျပ်သားလျှင် (၁၀၀၀)ကျပ်မှ (၁၂၀၀)ကျပ်နှုန်းဖြင့် ရောင်းချလျက်ရှိကြောင်းသိရပါသည်။

DOCA(ပဲခူး)