ပြည်တွင်းကုန်သွယ်မှုသတင်း

          မြင်းခြံမြို့နယ်သည် ဥယျာဉ်ခြံ မြေလုပ်ငန်းများကိုလည်း လုပ်ကိုင်လျက်ရှိရာ ငှက်ပျော စိုက်ပျိုးခြင်းလုပ်ငန်းကိုလည်းလုပ်ကိုင်ကြောင်းသိရှိရသည်။ဒေသတွင်းကျေးရွာများဖြစ်သော ပတ္တာရွာ၊  သင်္ဘောတင်ရွာ၊ ပိုက်တဲကုန်းနှင့် အနိမ့်ကျေးရွာများသည် ငှက်ပျောပင်များကို မိမိတို့၏ခြံဝန်း များ၌ တစ်နိုင်တစ်ပိုင် စိုက်ပျိုးထားကြကြောင်းနှင့် စီးပွားဖြစ်လည်းစိုက်ပျိုးကြကြောင်း သိရှိရသည်။ ငှက်ပျောပင်များကို မိုးဦးမကျမီ မေလဆန်းပိုင်းတွင် စိုက်ပျိုးထားရှိကြောင်း၊ စိုက်ဧကအနေဖြင့် (၁၁၅)ဧကခန့်စိုက်ပျိုးထားကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရသည်။ ငှက်ပျောစိုက်ပျိုးရာတွင် လှံစို့သားတက်အပင်မြင့်မျိုးကို စိုက်ပျိုးထားကြောင်း၊ရခိုင်ငှက်ပျော မျိုးနှင့် ဖီးကြမ်းငှက်ပျောမျိုးကိုစိုက်ပျိုးထားကြောင်း၊ ငှက်ပျောပင်ကို(၇)ပေပတ်လည်အထိပင်ကြား တန်းကြား အကွာအဝေးထား စိုက်ပျိုးရကြောင်း၊ အထွက်နှုန်းကောင်းစေရန် တစ်ဧကငှက်ပျောပင် (၁၃၀၀) ခန့်စိုက်ပျိုးထားကြောင်း စိုက်ပျိုးပြီး (၅-၆)လအကြာတွင် ငှက်ပျောဖူးများမထွက်မီအချိန်၌ အပင်ခြေတွင် ဓာတ်မြေဩဇာကို ထည့်သွင်းကျွေးရမည်ဖြစ်ကြောင်း၊ ပန်းပွင့်ပြီးနောက် သားတက် တစ်ခုသာထားရှိပြီး မိခင်အပင်မှ မလိုအပ်သော သားတက်အားလုံးကို ဖယ်ရှားရန်လိုအပ်ကြောင်း၊ ငှက်ပျောကြီးထွားရန် ငှက်ပျောဖူး(အဖိုဖူး)အားဖြတ်ပေးရကြောင်း၊ မိုးရာသီတွင် ရေစိမ့်ဆင်းမှု ကောင်းရန်နှင့် အပင်ခြေရေမဝပ်စေရန် အပင်ခြေကိုမြေဖို့ပေးပါက အပင်ဖြစ်ထွန်းကြောင်း၊ စိုက်ပျိုး ချိန်မှ(၈)လအကြာတွင် ငှက်ပျောသီးများရင့်မှည့်၍ စတင်ခုတ်ယူပြီး ဈေးကွက်သို့တင်ပို့ ရောင်းချ ကြောင်း၊  တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၉)သိန်းကျပ်ခန့်ကုန်ကျကြောင်း၊ အထွက်နှုန်းအနေဖြင့် (၉၀၀) အခိုင်ထွက်ရှိကြောင်း၊ မြင်းခြံမြို့ မြို့မစည်ပင်သာယာဈေးကြီးအတွင်း ရောင်းချနေသော ၂၀၂၅ ခုနှစ်၊ အောက်တိုဘာလ တတိယ ပတ်တွင် ငှက်ပျောသီးဖီးကြမ်း တစ်ဖီးလျှင် (၃၀၀၀-၄၀၀၀)ကျပ်ခန့်၊ ရခိုင်ငှက်ပျောဖီး တစ်ဖီးလျှင် (၂၀၀၀) ကျပ်ပေါက်ဈေးများရှိကြောင်း၊ ငှက်ပျောအဖီး အရည်အသွေးပေါ်မူ တည်၍ဈေးနှုန်း ကွာခြားကြောင်း၊ ထွက်ရှိသောငှက်ပျောသီးများကို ဒေသတွင်းစားသုံးရန်နှင့် သာရေးနာရေး ပွဲများတွင် လည်း အသုံးပြုသောကြောင့်ရောင်းချရကြောင်း၊ ဈေးကွက်တင်ပို့မှုအနေဖြင့် တောင်သာမြို့ သို့တင်ပို့ရောင်းချကြောင်း၊ တစ်ဧကအကျိုး အမြတ်အနေဖြင့် (၃၄)သိန်းကျပ်ဝန်းကျင်ခန့်   ရရှိကြောင်း ငှက်ပျောစိုက် တောင်သူတစ်ဦး၏ ပြောပြချက်အရ သိရှိရသည်။

DOCA (မန္တလေး)

            မြင်းခြံမြို့နယ်အတွင်းရှိ လေးအိမ်တန်း၊ ခေါင်းကွဲနှင့် သင်္ဘောတင်ကျေးရွာများတွင် ဥယျာဉ် ခြံမြေများ စိုက်ပျိုးလျက်ရှိရာ စားဖိုဆောင်အုပ်စုဝင်ဖြစ်သော ကြက်ဟင်း ခါးသီး များကိုလည်း တစ်နိုင် တပိုင် စိုက်ပျိုးထားရှိကြောင်း သိရှိရသည်။ ကြက်ဟင်းခါးသီးတွင် အပုမျိုး၊ အရှည်မျိုးနှင့် အလုံးမျိုး ဟူ၍(၃)မျိုးရှိကြောင်းသိရှိရသည်။ ကြက်ဟင်းခါးသီးသည် ပူနွေးစို စွတ်သော ရာသီဥ တုကိုနှစ်သက်ပြီး မေလနှင့်ဇွန်လများတွင်စိုက်ပျိုးလေ့ရှိကြောင်း၊ ဘောင်ဖော်၍ စင်ထိုးစိုက် ပျိုးကာ စိုက်ပျိုးပြီးအပင်သက် (၂-၃)လကြာလျှင် အသီးများဆွတ်ခူးနိုင်၍ မိုးရာသီစိုက်ကြက်ဟင်းခါးပင်သည် ရေသွင်းပေးရန် မလိုအပ်ကြောင်း၊ ကြက်ဟင်းခါးပင်များအသီးအထွက် ကောင်းစေရန် ပန်းစပွင့်ချိန်တွင် အညွန့်များကို ဖြတ်ပေးသင့်ကြောင်း၊ စိုက်ပျိုးချိန်မှ ရိတ်သိမ်း ချိန်အထိ (၆)လခန့် ကြာမြင့်ကြောင်းသိရှိရသည်။ မြင်းခြံဒေသရှိ တောင်သူများသည် အလုံးမျိုးကိုစိုက်ပျိုးကြကြောင်း၊ အလုံးမျိုးမှာ ကြက်ဟင်းခါးသီး အရိုင်းမှသီးသောမျိုးဖြစ်၍ လေးသောအရသာရှိပြီး အထွက်နှုန်းကောင်းသောကြောင့် တောင်သူများ သည် ယင်းမျိုးကိုပိုမိုနှစ်သက် ကြောင်းသိရှိရသည်။ ကြက်ဟင်းခါးအလုံးမျိုးကို အစေ့မှတိုက်ရိုက် စိုက်ပျိုးသောနည်းဖြင့် စိုက်ပျိုးကြောင်း၊ စိုက်ကျင်းတွင် တစ်ပင်နှင့် တစ်ပင်(၂)ပေခွာပြီး မျိုးစေ့ တစ်ကျင်းလျှင်(၃-၄) စေ့ချပြီးစိုက်ပျိုးကြောင်း၊ တစ်ဧကကုန်ကျစရိတ်အနေဖြင့် မြေပြင်ခြင်း၊ မျိုး၊စိုက်ပျိုးစရိတ်၊ သွင်းအားစု၊ လုပ်သားခ စုစုပေါင်း (၆၀၀၀၀၀) ကျပ်ခန့် ကုန်ကျကြောင်း၊ ဒေသတွင်း ကုန်သည်များက ကျေးရွာရှိစိုက်ခင်းများသို့ လာရောက်ဝယ်ယူ ခြင်းများလည်းရှိသကဲ့သို့ တောင်သူများ ကိုယ်တိုင် မြို့ပေါ်ပွဲရုံနှင့်ဈေးများသို့လည်း တိုက်ရိုက်ရောင်းချခြင်းများလည်း ရှိကြောင်း သိရှိရသည်။ တစ်ဧကအထွက်နှုန်းအနေဖြင့် (၃၀၀)ပိဿာ ခန့်ထွက်ရှိကြောင်း၊ စိုက်ခင်းရောင်းဈေး တစ်ပိဿာ လျှင်(၄၀၀၀)ကျပ်ပေါက်ဈေးဖြင့် အရောင်းအဝယ်ဖြစ်ကြောင်း၊ တစ်ဧကအကျိုးအမြတ်အနေဖြင့် (၆၀၀၀၀)ကျပ်ခန့်ရရှိကြောင်း၊ ၂၀၂၅ခုနှစ်၊ အောက်တိုဘာလ တတိယပတ်တွင် မြင်းခြံမြို့ အေးမြသီတာဈေးတွင်ရောင်းချနေသော ကြက်ဟင်းခါးသီး လက်လီတစ်ပိဿာလျှင် (၅၅၀၀)ကျပ် ပေါက်ဈေးများဖြင့် ရောင်းချကြောင်း၊ ထွက်ရှိသော ကြက်ဟင်းခါးသီးများကို ဒေသတွင်း စားသုံးရန်နှင့် ရန်ကုန်မြို့သို့လည်း တင်ပို့ရောင်းချကြောင်း၊ ယခုအချိန်တွင် ဈေးကွက်တွင် ကြက်ဟင်းခါးသီးများ ရှားပါးချိန်ဖြစ်သောကြောင့် ဈေးကောင်းများရရှိကြောင်း၊ တောင်သူများအနေဖြင့် ဈေးကောင်းရရှိ၍ အကျိုးအမြတ် များရရှိကြောင်း ကြက်ဟင်းခါးစိုက်တောင်သူ တစ်ဦး၏ ပြောပြ ချက်အရ သိရှိရသည်။

DOCA (မန္တလေး)

   မြင်းခြံမြို့၊ အေးမြသီတာဈေး၌ ရာသီပေါ်ဟင်းခက်အမွှေးအကြိုင်မျိုးစုံ ရောင်းဝယ်လျက်ရှိရာ အသားဟင်းလျာများတွင် မွှေးကြိုင်စေရန် အဓိကထည့်လေ့ရှိသော ဂျင်းအစိုများကိုလည်း ရောင်းချလျက်ရှိကြောင်းသိရှိရသည်။ ရာသီပေါ်ဂျင်းအစိုများကို ရှမ်းပြည်နယ်တောင်ပိုင်း အောင်ပန်း မြို့မှ တင်သွင်းပြီး ဒေသတွင်းဖြန့်ဖြူးရောင်းချကြောင်း၊ ၂၀၂၅ခုနှစ်၊ အောက်တိုဘာလ ဒုတိယပတ် တွင် ‌ဂျင်းအစို ၂၅ ကျပ်သားလျှင် (၈၀၀) ကျပ်၊ တစ်ပိဿာလျှင် (၃၀၀၀) ကျပ်ခန့်ပေါက် ဈေးများဖြင့်ရောင်းချကြောင်း၊ ရာသီပေါ်ဂျင်းအစိုများသည် သိုလှောင်ရာတွင်အထား မခံခြင်း၊ အသားပွခြင်းတို့ကြောင့် ၎င်းသည်အသားကျစ်သော အရည်အသွေးကောင်းသော ဂျင်း(ဟောင်း) ထက် ဈေးနှုန်း လျော့နည်းခြင်းဖြစ်ကြောင်း၊  ရာသီပေါ်ဂျင်းအစိုများသည် လက်လီ ဈေး ကွက်တွင်သုံးစွဲသူများပြား၍  ရောင်းချရကြောင်း ကုန်စိမ်းရောင်းချသူ၏ ပြောပြချက်အရသိရှိရ သည်။

DOCA(မန္တလေး)

    မြင်းခြံမြို့ပေါ်ရှိ ရပ်ကွက်များနှင့် ကျေးရွာအသီးသီး၌ ဂျုံဖြင့်ပြုလုပ်ထားသော အီကြာကွေးမုန့်များ ကို‌ရောင်းချကြောင်း၊ အီကြာကွေးများကို လဘက်ရည်၊ ကော်ဖီ၊ နွားနို့၊ ပဲပြုပ်၊ သကြား များနှင့်တွဲဖက်၍စားသုံးကြကြောင်း၊ ၂၀၂၅ ခုနှစ်၊ အောက်တိုဘာလ ဒုတိယပတ်၌ အီကြာကွေးတစ်ချောင်းလျှင် (၈၀၀-၁၀၀၀) ကျပ်ခန့်ဖြင့် အသီးသီးရောင်းချကြောင်း၊ နံနက်ခင်း အစာပြေ breakfast အဖြစ်စားသုံးကြသောကြောင့် အရောင်းအဝယ်ကောင်းကြောင်း၊ နေ့စဉ် မုန့်အရေ အတွက်  (၂၀၀-၃၀၀) ချောင်းခန့်ကြော်ရကြောင်း၊ တဆင့်ပြန်လည်ရောင်းချရန် ဖောက်သည် များကလည်း ဝယ်ယူကြောင်း၊ မုန့်အော်ဒါအမှာရှိပါ အရေအတွက် တိုး၍ကြော်ရကြောင်း၊ မိသားစုစားဝတ်နေရေးအဆင်ပြေကြောင်း အီကြာကွေးပြုလုပ်ရာတွင် ဂျုံ၊  Breaking  powder ၊ နွားနို့၊ ဆား၊ သကြား၊ ဆီနှင့် ကြက်ဥများထည့်သွင်းအသုံးပြုကြောင်း အီကြာကွေးရောင်းချ သူ၏ပြောပြချက်အရ သိရှိရသည်။

DOCA(မန္တလေး)

   မြင်းခြံမြို့နယ်အတွင်းရှိရပ်ကွက်နှင့် ကျေးရွာများတွင်ဥစားကြက်မွေးမြူရေးလုပ်ငန်းများကို မိသားစုစားဝတ်နေရေးအတွက် စီးပွားဖြစ်တစ်နိုင်တစ်ပိုင် လုပ်ကိုင်ကြသော်လည်း မြို့နယ်အတွင်းရှိ လူဦးရေအရလိုအပ်သော ကြက်ဥများကို ပခုက္ကူမြို့နှင့် ပြင်ဦးလွင်မြို့တို့မှမှာယူ၍ ဒေသတွင်း ဖြန့်ဖြူးရောင်းချကြောင်းသိရှိရသည်။ ၂၀၂၅ခုနှစ်၊ အောက်တိုဘာလ ဒုတိယပတ်၌ အေးမြသီတာ ဈေးတွင် ‌ရောင်းချနေသော ကြက်ဥ (၅၀) ကျပ်သားလျှင် (၆၀၀၀) ကျပ်၊ တစ်ပိဿာလျှင် (၁၂၀၀၀) ကျပ်ခန့်ပေါက်ဈေးများဖြင့်ရောင်းချလျက်ရှိကြောင်း၊ ယခင်လ စက်တင်ဘာ ဒုတိယပတ်တွင် ကြက်ဥ (၅၀) ကျပ်သားလျှင် (၅၅၀၀) ကျပ်၊ တစ်ပိဿာလျှင် (၁၀၅၀၀) ကျပ်ပေါက်ဈေးများဖြင့် ရောင်းချခဲ့ကြောင်းသိရှိရသည်။ ကာလတူနှိုင်းယှဉ်ပါက ယခင်လထက် ယခုလတွင် ကြက်ဥ (၅၀) ကျပ်သားလျှင် (၅၀၀) ကျပ်၊ တစ်ပိဿာလျှင် (၁၅၀၀) ကျပ်ခန့်ဈေးနှုန်းများ မြင့်တက်ခဲ့ကြောင်း၊ ဥစားကြက်အစာဈေးများ ဈေးနှုန်းအနည်းငယ်မြင့် တက်ခဲ့၍ ကြက်ဥဈေးနှုန်းများ အနည်းငယ်မြင့် တက်ခဲ့ခြင်းဖြစ်ကြောင်း၊ လူမျိုးဘာသာမရွေး စားသုံးသော ကြက်ဥသည် ဈေးကွက်တွင်နေ့စဉ် အရောင်းအဝယ်ဖြစ်လျက်ရှိကြောင်း၊ နေ့စဉ် ကြက်ဥ လက်လီလက်ကားအလုံးရေ (၁၀၀၀-၁၅၀၀) လုံးခန့်ရောင်းချရကြောင်း ကြက်ဥရောင်းချ သူ၏ ပြောပြချက်အရ သိရှိရသည်။

DOCA(မန္တလေး)