ပြည်တွင်းကုန်သွယ်မှုသတင်း

    စပါးလင်ပင်သည် မြက်ပင်မျိုးနွယ်ဝင် အပင်တစ်မျိုးဖြစ်ပြီးတစ်ပင်နှင့်တစ်ပင် စုပြုံပေါက် လေ့ရှိပါသည်။ စပါးလင်ကို အထူးတလည် ဂရုစိုက်ရန် မလိုပဲ ပေါင်းမြက် ရှင်းလင်းပေးရန်သာ လိုအပ်ပါသည်။ အပင်တစ်အုံလုံးကို တူးဖော်ရောင်းချပြီး တစ်နှစ်တစ်ခါမိုးရာသီတွင် ပြန်လည် စိုက်ပျိုးကြပါသည်။ စပါးလင်ပင်သည် ဆေးဘက်ဝင်ပြီး အများအားဖြင့် ဟင်းလျာများတွင် အနံ့ကောင်းစေရန် အသုံးပြုကြပါသည်။

    ထားဝယ်မြို့အတွင်းရှိ ကျေးရွာအချို့တွင် စပါးလင်ကို တစ်ပိုင်တစ်နိုင်  စိုက်ပျိုးကြသလို ခြံစိုက်တောင်သူ အချို့မှာ မာလကာပင်များအကြားတွင် ကြားသီးနှံအဖြစ် စိုက်ပျိုးကြပါသည်။ ဈေးနှုန်းအနေဖြင့် ယခုစက်တင်ဘာလ တတိယပတ်တွင် ခြံပေါက်ဈေး  အပင်(၁၀၀)လျှင် (၆၀၀၀) ကျပ်နှုန်းရောင်းချရကြောင်း စပါးလင်စိုက်တောင်သူများထံမှ သိရပြီး ဈေးကွက်အတွင်း စပါးလင်ပင် သုံးပင်ပါ တစ်စီး  (၁၀၀၀)ကျပ်ဖြင့် ရောင်းချနေကြောင်း သိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ ထားဝယ်မြို့သည် စိုက်ပျိုးရေးလုပ်ငန်းများဖြစ်သည့် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။ယခုအခါ ထားဝယ်မြို့ပေါ်ကျေးရွာနှင့် အခြားသောကျေးရွာများတွင် ကန်စွန်းရွက်များကို စိုက်ပျိုးကြကြောင်း၊ ကန်စွန်းရွက်များကို ကမ်းနားဈေးနှင့်အခြားဈေးငယ်များတွင်ရောင်းချကြောင်း၊ ၂၀၂၅ ခုနှစ်၊ စက်တင်ဘာလ တတိယပတ်အတွင်း ကန်စွန်းရွက်(၁)စည်းလျှင်(၃၀၀)ကျပ်၊ ကန်စွန်းရွက်(၂)စည်း လျှင်(၅၀၀) ကျပ်ဖြင့် ရောင်းချကြောင်း ၊ကန်စွန်းရွက်များကို  အိမ်ရှင်မများဟင်းချက်ရာတွင်လည်းကောင်း၊ စားသောက်ဆိုင်များနှင့် အ ထောင်းစုံရောင်းသည့်ဆိုင်များမှ ဝယ်ယူကြသဖြင့်ကန်စွန်းရွက်များ အရောင်းအဝယ်သွက်လျက်ရှိကြောင်း ကုန်စိမ်းရောင်းချသူတစ်ဦးထံမှ သိရှိရပါသည်။

DOCA(တနင်္သာရီ)

    ထားဝယ်မြို့နယ်အတွင်းရှိ ကျေးရွာများနှင့် ထားဝယ်မြို့ပေါ်ရပ်ကွက်များတွင် စိုက်ပျိုးရေး လုပ်ငန်းများကို လုပ်ကိုင်စားသောက်ကြရာမှာ နှစ်ရှည်သီးနှံ ဖြစ်သည့် သရက်သီးပင်၊ နဂါးမောက်သီးပင်၊ ပိန္နဲသီးပင်၊ အုန်းသီးပင်၊ မန်ကျည်းသီးပင် နှင့် မာလကာသီးပင်များကိုလည်း မိမိတို့နေအိမ်ခြံစည်းရိုးများနှင့် တောင်ယာများထဲတွင် တစ်ပိုင်တစ်နိုင်စိုက်ပျိုးလျက်ရှိပြီး အုန်းသီးများကို ထားဝယ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များမှ ရပ်ကွက်ဈေးများနှင့် မိမိတို့ ကျေးရွာများတွင်  ရောင်းချလျက်ရှိကြောင်းသိရသည်။

      ၂၀၂၅ ခုနှစ်၊ စက်တင်ဘာလ တတိယပတ်အတွင်း ဖြစ်ပေါ်နေသော ထားဝယ်မြို့၏ ဒေသ ထွက် အုန်းသီးဈေးနှုန်းများမှာ နတ်ကန်တော့ရန် အုန်းသီးတစ်လုံးလျှင်(၅၀၀၀)ကျပ်၊ အုန်းသီးအရင့် အလုံးအကြီး၊ အသေးပေါ်မူတည်၍ တစ်လုံးလျှင်(၃၅၀၀ မှ ၅၀၀၀)အထိ ဈေးနှုန်းအသီးသီး တို့ဖြင့် ရောင်းချလျက်ရှိကြောင်း ကမ်းနားဈေး၌ အုန်းသီးရောင်းချနေသော ဈေးသည်ထံမှ သိရသည်။

DOCA(တနင်္သာရီ)

    ထားဝယ်မြို့အတွင်း ကုန်ဈေးနှုန်းများ အနည်းငယ်မြင့်တက်လျက်ရှိရာမှ အသား/ငါး ဈေးနှုန်း များထဲမှ ရေချိုပုဇွန်ထုတ် ဈေးနှုန်းသည်လည်း မြင့်တက်လျက်ရှိရာမှပုဇွန်ထုတ်များကို ငါးဒိုင်များမှ ဝယ်ယူ ရောင်းချကာ အရောင်းအဝယ် ဖြစ်လျက်ရှိကြောင်း သိရသည်။

   ၂၀၂၅ခုနှစ်၊ စက်တင်ဘာတွင် ထားဝယ်မြို့၏ ရေချိုပုဇွန်ထုတ် ဈေးနှုန်းများအနေဖြင့် လက္ကား ဈေး(၁)ပိဿာလျှင်(၆၀၀၀၀)ကျပ်၊ လက်လီဈေး(၁)ပိဿာလျှင်(၆၃၀၀၀)ကျပ်၊ (၅၀)ကျပ်သားလျှင် (၃၁၅၀၀)ကျပ်၊ (၂၅)ကျပ်သားလျှင်(၁၆၀၀၀)ကျပ် ဈေးနှုန်းဖြင့် ရောင်းချပါကြောင့် ယခင်အပတ်ထက် ပုဇွန်ထုတ်ဈေး အနည်းငယ်ကျဆင်းလာပြီး အရောင်းအဝယ်ဖြစ်လျက်ရှိကြောင်း ငါး/ပုဇွန် ရောင်းချသူထံမှ သိရပါသည်။

DOCA(တနင်္သာရီ)

     ထားဝယ်စျေးကွက်တွင် ယခုပတ်အတွင်း ကြက်သွန်နီစျေးနှုန်းမြင့် တက်နေကြောင်း ပွဲရုံနှင့် အိမ်ရှင်များထံမှ သိရှိရပါသည်။ ကြက်သွန်နီစျေးမှာ ပြီးခဲ့သည့်လပိုင်းက ၁၀ ပိဿာဝင် တစ်အိတ်လျှင် အများဆုံးကျပ် ၂၂၀၀၀ကျော်အထိသာရှိသော်လည်း ယနေ့ ထားဝယ်စျေးကွက်တွင် သုံးသောင်းကျပ်အထိ ရောင်းချနေကြကြောင်း ထားဝယ်မြို့နယ်မှ အိမ်ရှင်မတစ်ဦးထံမှသိရှိရ ပါသည်။ ထားဝယ်မြို့အတွင်းရှိ စည်ပင်သာယာစျေးနှင့် ရပ်ကွက်စျေးငယ်များတွင် ယခုနှစ်တွင် ကြက်သွန်နီစျေးနှုန်းမှာ တစ်ပိဿာလျှင် (၃၀၀၀)ကျပ် နှင့်(၃၅၀၀)ထိ ရှိကြောင်း သိရှိရပါသည်။  ထားဝယ်မြို့အတွင်းရှိ ကြက်သွန်နီ ဝယ်လိုအားမှာလည်း ယခင်နှစ်ထက် များလျက်ရှိကြောင်း စားသုံး ကုန်စည်ရောင်းချသူများမှ သိရှိရပါ သည်။

DOCA(တနင်္သာရီ)