ပြည်တွင်းကုန်သွယ်မှုသတင်း

      ရန်ကုန်တိုင်းဒေသကြီး၊ ဗိုလ်တထောင်ခရိုင်၊ မင်္ဂလာတောင်ညွန့်မြို့နယ်၊ အထက်ပုဇွန် တောင်လမ်းနှင့်သံသုမာလမ်းထောင့်ရှိ ကြက်ဘဲဈေးဒိုင်၏ ၆.၈.၂၀၂၅ ရက်နေ့တွင် မင်္ဂလာ တောင်ညွန့်မြို့နယ်၊ ကြည့်မြင်တိုင်မြို့နယ်၊ လှိုင်သာယာမြို့နယ်၊ အင်းစိန်မြို့နယ်များရှိ ကြက်/ ဘဲဝင်ရောက်မှုများမှာ ယနေ့ရန်ကုန်တိုင်းအတွင်းရှိ ကြက်ခြံအသီးသီးမှာ ကြက်ကားစီးရေ (၂၇) စီး ၊ ဧရာဝတီတိုင်းမှ ကြက်ကားစီးရေ (၁၈)စီး ၊ ပဲခူးတိုင်းဒေသကြီးမှ ကြက်ကားစီး‌ရေ (၂၀)စီး ၊ စုစုပေါင်းကြက်ကားစီးရေ(၆၅)စီး အဝင်အထွက်ရောင်းချလျက်ရှိကြောင်းသိရှိရပြီး မင်္ဂလာ တောင်ညွန့်မြို့နယ်ရှိကြက်/ဘဲဈေးဒိုင်သို့ စုစုပေါင်းကြက်ကား (၄၅)စီး အဝင်/အထွက် ရောင်းချ လျက်ရှိကြောင်း သိရှိရပါသည်။

     ဩဂုတ်လ ပထမပတ်တွင် အရောင်းအဝယ်ဖြစ်သည့် အကောင်ပြတ် တစ်ပိဿာ ဈေးနှုန်းမှာ ဗမာကြက် (၁၉၀၀၀ မှ ၂၈၅၀၀)ကျပ်၊ ကြက်နီ (မွေးထီး/မွေးမ) (၁၂၅၀၀/၁၉၀၀၀) ကျပ်တို့ရှိပါသည်။ စီပီအသားတိုးကြက်မှာ တစ်ပိဿာ (၁၂၈၀၀/၁၂၈၀၀)ကျပ်နှင့် ချယ်ရီ/ဘယ်ရီ ဘဲတစ်ပိဿာ (၁၅၀၀၀/၁၇၀၀၀)ကျပ်၊ ဓာတ်ဘဲ တစ်ပိဿာ (၆၀၀၀/၉၀၀၀) ကျပ်တို့ရှိကြောင်း သိရှိရပြီး အထူးသဖြင့် စီပီအသားတိုးကြက်မှာ အများဆုံးရောင်းချရကြောင်း တစ်ရက်လျှင် ပိဿာ (၅၆၂၀၀)ခန့်နှင့်ကြက်နီ (မွေးထီး/မ )များမှာ တစ်နေ့လျှင် ပိဿာ (၁၂၇၄၀)ခန့်အရောင်း အဝယ်ဖြစ်လျက်ရှိကြောင်း သိရှိရပါသည်။

DOCA (ရန်ကုန်)

     ကျွန်းလှမြို့၊ သစ်ရာမြိုင်ဈေးတွင် ဘုရားပန်း အမျိုးမျိုးဖြစ်သော ရွှေပန်း၊ ငွေပန်း၊ ဆောင်းစံပါယ် ပန်း၊ ဂန္ဓာမာပန်း၊ သစ္စာပန်း၊ နှင်းဆီ၊ ဇွန်ပန်း၊ ရှင်မွေးလွန်း၊ သပြေပန်း(အောင်သပြေ)အငုတ်၊ အောင်သပြေ အခက်များနှင့် အာစီယံသပြေ တို့ကို မိမိတို့ ဒေသထွက်နှင့် မန္တလေးမြို့၊ ပြင်ဦးလွင်မြို့တို့မှ မှာယူရောင်းချကြောင်း သိရှိရပါသည်။

           ၂၀၂၅ ခုနှစ်၊ ဩဂုတ်လ(ပထမပတ်)တွင် ကျွန်းလှမြို့နယ်အတွင်း ရောင်းချနေသော ရွှေပန်း၊ ငွေပန်း ဈေးနှုန်းအနေဖြင့် ရွှေပန်း/ငွေပန်း(၅)ပွင့်ပါ တစ်ကုံးလျှင်(၁၀၀)ကျပ်၊ ဆောင်စံပါယ်ပန်း တစ်ကုံးလျှင်(၂၀၀)ကျပ်၊ ဆောင်းစံပါယ်ကန်း(၃)ကုံးလျှင်(၅၀၀)ကျပ် ဈေးနှုန်းတို့ဖြင့် ရောင်းချလျက်ရှိကြောင်း ပန်းသည်ထံမှ သိရှိရပါသည်။

DOCA(စစ်ကိုင်း)

    ကျွန်းလှမြို့နယ်တွင် ကုန်ဈေးနှုန်းများ အနည်းငယ်မြင့်တက်လျက်ရှိရာမှ အသား/ငါး ဈေးနှုန်း များထဲမှ ပုဇွန်ထုတ် ဈေးနှုန်းသည်လည်း မြင့်တက်လျက်ရှိရာမှ ပုဇွန်ထုတ်များကို  ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးတို့မှ  ဝယ်ယူရောင်းချကာ အရောင်းအဝယ် ဖြစ်လျက်ရှိကြောင်းသိရသည်။

   ယခု ဩဂုတ်လ ပထမပတ်တွင် ရောင်းချနေသော ပုဇွန်ထုတ် ဈေးနှုန်းများမှာ ပုဇွန်ထုတ် လက္ကားဈေး (၁)ပိဿာလျှင်(၆၀၀၀၀)ကျပ်၊ လက်လီဈေး(၁)ပိဿာလျှင်(၆၄၀၀၀)ကျပ်၊ (၅၀)ကျပ်သား လျှင်(၃၂၀၀၀)ကျပ်၊ (၂၅)ကျပ်သားလျှင်(၁၆၀၀၀)ကျပ် ဈေးနှုန်းဖြင့်ရောင်းချလျက်ရှိပြီး ပုဇွန်ထုတ်များ သည် ဈေးကောင်းသော်လည်း ထမင်းဆိုင်များ ၊ စားသောက်ဆိုင်များနှင့် စားဖွယ်စုံ ရောင်းချသည့် ဆိုင်များမှ ဝယ်ယူအသုံးပြုလျက်ရှိကြောင်း သိရသည်။

DOCA(စစ်ကိုင်း)

    ကျွန်းလှမြို့နယ်အတွင်းရှိ ကျေးရွာများတွင် စိုက်ပျိုးရေး လုပ်ငန်းများကို လုပ်ကိုင်လျက်ရှိရာ နှစ်ရှည်သီးနှံပင်ဖြစ်သည့် သရက်သီးပင်၊ နဂါးမောက်သီး ပင်၊ ပိန္နဲသီးပင်၊ ဂွေးသီးပင်၊ စောင်းလျှားသီးပင်၊ မန်ကျည်းသီးပင်၊ အုန်းသီးပင် နှင့် မာလကာသီးပင်များ စိုက်ပျိုးကြသည့်အနက် ဂွေးသီးပင်နှင့် စောင်းလျှားသီးပင်များကိုလည်း စိုက်ပျိုးလျက်ရှိကြောင်း သိရသည်။

  ၂၀၂၅ ခုနှစ်၊ ဩဂုတ်လ ပထမပတ်အတွင်း ရောင်းချနေသော ဂွေးသီးဈေးနှုန်းမှာ ဂွေးသီး အကြီး တစ်လုံးလျှင်(၅၀)ကျပ်၊ (၁၁)လုံး(၅၀၀)ကျပ် အသေးတစ်လုံး လျှင်(၃၅)ကျပ်တို့ဖြင့် ရောင်းချလျက်ရှိပြီး အလားတူပင် စောင်းလျှားသီးအကြီး တစ်လုံးလျှင်(၅၀)ကျပ်၊ (၅)လုံးလျှင်(၂၀၀)ကျပ်၊ အသေး တစ်လုံးလျှင်(၃၅)ကျပ် ငွေကျပ်(၁၀၀)ဖိုး (၃)လုံးဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ဂွေးသီး နှင့် စောင်းလျှားသီးများကို ကျောင်း မုန့်ဈေးဆိုင်တန်းမှ ဈေးသည်များ၊ အချဉ်ပေါင်းသည်များ နှင့် ရပ်ကွက်ဈေးတန်းများမှ ဝယ်ယူလျက်ရှိကြောင်း သိရသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်ရှိ ချင်းတွင်းရတနာဈေး၊ မန်းကျည်းပင်ဈေး၊ သာစည်ဈေး၊ ဗန္ဓုလဈေး၊ ပြည်ထောင်စုဈေးနှင့်  ဝန်ထမ်းအိမ်ရာရှိ နန္ဒဝန်ဈေးသစ်တို့တွင် ဩဂုတ်လ ပထမပတ်တွင် ရောင်းချနေသော ဒေသထွက် ကြက်ဥများ၊ ငုံးဥများ ဘဲဥဈေးနှုန်းများ အနေဖြင့် ဗမာ ကြက်ဥ ( ၁ )လုံးလျှင် ( ၈၀၀)ကျပ်မှ ( ၁၀၀၀) ကျပ်ဖြင့် လည်းကောင်း၊ ကြက်ဥ အလုံးသေး ( ၁ )လုံးလျှင် ( ၃၀၀)ကျပ်၊ အလတ် (၁ )လုံးလျှင် ( ၃၅၀) ကျပ်၊ အကြီး ( ၁) လုံးလျှင် ( ၄၀၀ )ကျပ်ဖြင့်လည်းကောင်း၊ ဘဲဥ တစ်လုံးလျှင် ( ၆၀၀)ကျပ်၊ ငုံးဥ (၂၈)လုံးပါတစ်ထုပ်လျှင် ( ၁၀၀၀ )ကျပ်ဖြင့်လည်းကောင်း ဈေးနှုန်း အသီးသီးဖြင့် ရောင်းချလျက်ရှိရာ ဈေးနှုန်းတည်ငြိမ်နေကြောင်း သိရသည်။

DOCA(စစ်ကိုင်း)