ပဲစောင်းလျားသီးသည် အပူပိုင်းဒေသတွင်ပေါက်ရောက်သော ပဲပင်အမျိုးအစားဖြစ်ပြီး မြန်မာနိုင်ငံရှိအညာ ဒေသများတွင်အများဆုံးစိုက်ပျိုးပြီး ပဲမြစ်အပင်မှထွက်ရှိကာ နုန်းမြေအမျိုးအစားတွင် ကောင်းစွာရှင်သန် ပေါက်ရောက်ပါသည်။ ပဲစောင်းလျားသီးသည် အတိုမျိုးနှင့်အရှည်မျိုးဟူ၍ အမျိုးအစား ၂ မျိုးရှိပြီး ဈေးကွက်ထဲတွင် အတိုမျိုးကိုသာ အများဆုံးတွေ့ရလေ့ရှိပါသည်။ ပဲစောင်းလျားသီးကို စိုက်ပျိုးပြီး ရက် ၁၀၀ အကြာတွင် ခူးဆွတ်နိုင်ပြီး ပဲစောင်းလျားသီးများအား အနုအရင့်ခွဲခြားပြီး ဈေးကွက်အတွင်းသို့ တင်ပို့ရောင်းချကြပါသည်။ ပဲစောင်းလျားသီးသည် ဆေးဖက်ဝင်သည့်အပြင် သတ္တုဓာတ်များစွာပါဝင်ပြီး အာရုံကြောစနစ်ကို ကောင်းမွန်စေပါသည်။
ပဲစောင်းလျားသီးကို ပြုတ်စားခြင်း၊ သုတ်စားခြင်း၊ ငါးပိရည်နှင့်တွဲဖက်၍ အတို့အမြှုပ် အဖြစ်စားသုံးခြင်း၊ အချဉ်ရည်ဟင်းအဖြစ်ချက်စားခြင်းဖြင့် အမျိုးမျိုးပြုလုပ် စားသုံးနိုင်ပါသည်။ ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်၊ စည်ပင်သာယာဈေးအတွင်းတွင် ပဲစောင်းလျား သီးများကို ၅၀ ကျပ်သားလျှင် ၁၅၀၀ ကျပ်၊ ၁ ပိဿာ လျှင် ၃၀၀၀ ကျပ်ဖြင့်ရောင်းချလျက်ရှိနေပြီး အရောင်းအဝယ်သွက်လျက်ရှိကြောင်း သိရသည်။
DOCA(ပဲခူး)