ပြည်တွင်းကုန်သွယ်မှုသတင်း

        မြင်းခြံမြို့နယ်အတွင်းရှိ ရပ်ကွက်များနှင့် ကျေးရွာများတွင် မိသားစုတစ်နိုင်တစ်ပိုင် စားဝတ်နေရေးအတွက် ပဲနီပြားပင်ဖောက် လုပ်ငန်းများလုပ်ကိုင်ကြကြောင်း၊ ပဲပင်ဖောက်ရာတွင် ပဲများကို တစ်ညရေစိမ်ရကြောင်း၊ ထို့နောက် ပဲခင်းကို အလျား ၅ ပေအရှည်၊ အနံ ၂ ပေခန့်၊ အနက် ၇ လက်မခန့်တူးထားသော ကျင်းထဲသို့ သဲများထည့်ရကြောင်း၊ အဆိုပါကျင်းထဲသို့ ပဲစေ့များ ထည့်ပြီး သဲများဖြင့်ဖုံးအုပ်၍ ပဲစေ့ကိုအညှောင့်ဖောက် ရကြောင်း၊ ပဲခင်းကို နံနက်တစ်ကြိမ်၊ ညနေတစ်ကြိမ် ရေလောင်းပေးရကြောင်း၊ (၄-၅) ရက်ခန့်ကြာသော် ပဲစေ့များ အညှောင့် ထွက်လာကြောင်း၊ သဲခင်းထဲတွင် ပျိုးထားသော ပဲပင်ဖောက်များကို တူးဖော်ကာ ပဲပင် ဖောက်များရရှိကြောင်း၊ ပဲခင်းများမှထွက်ရှိသော ပဲပင်ဖောက်များကို ဈေးကွက်သို့ လက်လီ၊ လက်ကားရောင်းချရကြောင်း၊ ၂၀၂၅ ခုနှစ်၊ ဇူလိုင်လနောက်ဆုံးပတ်တွင် ပဲပင်ဖောက်လက်လီဈေး နို့ဆီတစ်ဗူးလျှင်(၈၀၀) ကျပ်၊ လက်ကားဈေး နို့ဆီတစ်ဗူးလျှင် (၇၅၀) ကျပ်ပေါက်ဈေးများရှိကြောင်း၊ ရောင်းချမှုအနေဖြင့် နေ့စဉ်  (၁၀-၁၂) ပြည်ခန့်ရောင်းချရကြောင်း၊ ဒေသတွင်းစားသုံးမှုများ၍ အရောင်းအဝယ်ဖြစ် လျက်ရှိ ကြောင်း ပဲပင်ဖောက်ရောင်းချသူ၏ ပြောပြချက်အရသိရှိရသည်။

Doca(မန္တလေး)

   မန္တလေးတိုင်းဒေသကြီး မြင်းခြံမြို့နယ်သည် ဆည်ရေသောက် အသင့်အတင့်ရှိပြီး ကျေးရွာများတွင် လယ်ယာစိုက်ပျိုးရေးလုပ်ငန်းကို လုပ်ကိုင်ကြကြောင်း၊ ဆီထွက်သီးနှံ၊ ပဲမျိုးစုံ၊ ကြက်သွန်နီများကို စိုက်ပျိုးလျက်ရှိရာ အစေ့ထုတ်ပြောင်းသီးနှံကိုလည်း စိုက်ပျိုးကြကြောင်း၊ မြင်းခြံမြိုနယ်တွင်၂၀၂၄-၂၀၂၅ခုနှစ်၊ ဆောင်းစေ့ထုတ်ပြောင်းစိုက်ဧကကို (၉၄၀၀) ဧကစိုက်ပျိုး ထားကြောင်း၊ ထိုစိုက်ဧက အားလုံးမှာ ရာနှုန်းပြည့် ရိတ်သိမ်းခဲ့ပြီးဖြစ်ကြောင်း ကြေးတိုင်နှင့် မြေစာရင်း ဦးစီးဌာန၏ စာရင်းများအရသိရှိရသည်။

            အစေ့ထုတ်ပြောင်း(ဆောင်း)သီးနှံကို အောက်တိုဘာလနှင့် နိုဝင်ဘာလများတွင် စိုက်ပျိုး ပြီး လေးလခန့်အကြာ ဖေဖော်ဝါရီ၊ မတ်လနှင့် ဧပြီလ တို့တွင် ရိတ်သိမ်းရကြောင်း၊ အစေ့ထုတ် ပြောင်း (ဆောင်း)သီးနှံအား ထယ်ရေး (၂-၃) ကြိမ်ထိုးပြီး သဘာဝမြေဩဇာဖြစ်သော နွားချေး ထည့်ပြီး တန်းကြား စနစ်ဖြင့်ချစိုက်ပျိုးကြောင်း၊ မြေပြုပြင်ခြင်း၊ သွင်းအားစု၊ မျိုး၊ လုပ်အားခ အပါအဝင် တစ်ဧကလျှင် စုစုပေါင်းငွေကျပ် (၁၀၈၀၀၀၀) ကျပ်ခန့်ကုန်ကျကြောင်း၊ တစ်ဧကလျှင် အထွက်နှုန်း အနေဖြင့် (၇၅) တင်း နှုန်းခန့်ထွက်ရှိကြောင်း၊ ထွက်ပေါ်ချိန် ရောင်းဈေးမှာ တစ်တင်းလျှင်(၂၆၆၄၀)ကျပ်၊  တစ်ဧကအကျိုး အမြတ်အနေဖြင့် (၉၁၈၀၀၀) ကျပ် ခန့်ရရှိကြောင်း၊ တောင်သူများက မြင်းခြံမြို့ရှိ သီးနှံပွဲရုံများသို့ တင်ပို့ရောင်းချကာ အကျိုး အမြတ် ရရှိကြောင်း အစေ့ထုတ်ပြောင်းစိုက်တောင်သူတစ်ဦး၏ ပြောပြချက်အရသိရှိရသည်။ မြင်းခြံမြို့နယ် တွင် ၂၀၂၅-၂၀၂၆ခုနှစ် မိုးအစေ့ထုတ်ပြောင်း စိုက်ဧကကို ယခုဇူလိုင်လတွင် စိုက်ပျိုးမှု မရှိသေးကြောင်း၊ ရှေ့လာမည့် ဩဂုတ်လတွင်စိုက်ပျိုးမည်ဖြစ်ကြောင်း တောင်သူ၏ ပြောပြချက် အရသိရရှိသည်။ ၂၀၂၅ ခုနှစ်၊     ဇူလိုင်လနောက်ဆုံးပတ်တွင် အစေ့ထုတ်ပြောင်းတစ်တင်းလျှင် (၂၇၃၆၀) ကျပ် ပေါက်ဈေး များရှိကြောင်း၊ ဈေးကွက်တင်ပို့မှုအနေဖြင့် ရန်ကုန်မြို့သို့တင်ပို့ကြောင်း မြင်းခြံ ကုန်စည် ဒိုင်၏တာဝန်ရှိသူ၏ ပြောပြချက်အရသိရှိရပါသည်။

Doca(မန္တလေး)

     ၂၀၂၅ ခုနှစ်၊ ဩဂုတ်လပထမပတ်အတွင်း ကရင်ပြည်နယ်၊ ဘားအံမြို့ရေပေါ်ဈေးတွင်  ကြောင်လျှာသီးများ အရောင်သွက်လျက်ရှိကြောင်း  သိရသည်။

     ရာသီစာဖြစ်သည့် ဒေသထွက်ကြောင်လျှာသီးကို ဘားအံမြို့ အနီးတဝိုက်ကျေးရွားများမှ ဘားအံမြို့ပေါ်ဈေးသို့ လာရောက်ရောင်းချကြပါသည်။ ဒေသခံတောင်သူများသည် ကြောင်လျှာသီးပင်ကို အပိုဝင်ငွေရရှိရန်အတွက် အိမ်ခြံဝန်းအတွင်း တနိုင်တပိုင်စိုက်ပျိုးကြသည်။ ကြောင်လျှာသီးသည် ဓာတ်တိုးဆန့်ကျင်အာနိသင်ကြွယ်တာကြောင့် ခန္ဓာကိုယ်တွင်းက အဆိပ်အတောက်ဖြစ်စေခြင်းကိုလည်း ဖယ်ရှားပေးနိုင်သည့် အာနိသင်ရှိ၍ စာသုံးသင့်သော အစားအစာဖြစ်သည်။ ကြောင်လျှာသီးဈေးနှုန်းမှာ အရွယ်အစားလိုက်၍ ဈေးနှုန်းကွာဟချက်ရှိသည် ကြောင်လျှာသီး အနုကြီး တစ်ထောင့်လျှင်(၁၅၀၀)ကျပ်၊ကြောင်လျှာသီး အနုသေး တစ်ထောင့်လျှင်(၁၀၀၀)ကျပ်တို့ဖြစ် ရောင်းချကြသည်။ယခင်ဇူလိုင်လ ကြောင်လျှာသီးဈေးနှုန်းမှာ ကြောင်လျှာသီးအနုကြီး တစ်ထောင့်လျှင်(၂၀၀၀/၂၅၀၀) ကျပ်နှင့် ကြောင်လျှာသီးအနုသေး တစ်ထောင့်လျှင် (၁၅၀၀)ကျပ် ဖြစ်ကြောင်းနှင့် ယခုလို ဈေးနှုန်းကွာဟခြင်းမှာ ပေါ်ဦးပေါ်ဖျားထွက်ခြင်းနှင့် လိုင်လိုင်ထွက်ခြင်းကြောင့်ဖြစ်ကြောင်း သိရသည်။

DOCA(ကရင်)

  ၂၀၂၅ ခုနှစ်၊ ဩဂုတ်လပထမပတ်အတွင်း ကရင်ပြည်နယ်၊ ဘားအံမြို့ပေါ်ဈေးများတွင် ငရုတ်သီးစိမ်းဈေး အနည်းကျနေကြောင်း သိရသည်။

    ငရုတ်သီးစိမ်းကို ဘားအံမြို့ အနီးတဝိုက် ကျေးရွားများတွင် တနိုင်တပိုင်စိုက်ပျိုးကြသည့် အပြင် စီးပွားဖြစ်လည်း စိုက်ပျိုးကြပါသည်။ ငရုတ်သီးစိမ်းမှာလည်း မိုးမျှော်ငရုတ်သီး၊ ငရုတ်သီး အရှည်၊ ငရုတ်သီးအပု၊ ငရုတ်သီးအပွဆိုပြီး အမျိုးမျိုးရှိကြသည်။ ငရုတ်သီးပင်သည် နွေ၊မိုး၊ဆောင်း ရာသီမရွေး ဖူးဖွင့်ကာအသီးသီးလျက် ရှိသည်။ ငရုတ်သီးစိမ်းဈေးနှုန်းများမှာ မိုးမျှော်ငရုတ်သီး လက်ကားဈေးနှုန်း  တစ်ပိဿာလျှင် (၇၀၀၀)ကျပ်နှင့်လက်လီဈေးနှုန်း(၉၀၀၀)ကျပ်၊ ငရုတ်သီးစိမ်း အရှည် လက်ကားဈေးနှုန်း တစ်ပိဿာလျှင်(၄၀၀၀)ကျပ်နှင့် လက်လီဈေးနှုန်း တစ်ပိဿာလျှင် (၅၀၀၀/၆၀၀၀)ကျပ်၊ ငရုတ်ပွ လက်ကားဈေး တစ်ပိဿာလျှင် (၃၀၀၀)ကျပ်နှင့်လက်လီဈေးနှုန်း တစ်ပိဿာလျှင်(၄၅၀၀)ကျပ် တို့ဖြင့် အရောင်းအဝယ်ဖြစ်လျက်ရှိကြောင်း သိရသည်။

    ကရင်ပြည်နယ် ဘားအံမြို့အတွင်းဖြစ်ပေါ်နေသော ဇူလိုင်လနောက်ဆုံးပတ်နှင့်ဩဂုတ်လ ပထမပတ်ဈေးနှုန်း နှိုင်းယှဉ်မှုများအရ ကရင်ပြည်နယ်အတွင်း ငရုတ်သီးဈေးနှုန်းအနည်းငယ်ကျလျက် ရှိကြောင်းနှင့် ယခုလို ငရုတ်သီးစိမ်းဈေးနှုန်းအနည်းငယ်ကျရခြင်းမှာ ငရုတ်သီးပေါ်ချိန်တွင် မိုးများ၍ ရေကြီးခြင်းတို့ကြောင့် ဖြစ်ကြောင်း သိရသည်။

DOCA(ကရင်)                                                                                                

    ဖရုံစေ့လှော်စားသုံးခြင်းသည် ကျန်းမာရေးအတွက် အထောက်အကူဖြစ်စေပြီး အာဟာရ ဓာတ်များလည်း ကြွယ်ဝစွာပါဝင်ကြောင်း၊   မြင်းခြံမြို့နယ်အတွင်း ရောင်းချနေသော ဖရုံစေ့လှော် များကို မုံရွာမြို့နှင့် ပခုက္ကူမြို့တို့မှ မှာယူရောင်းချကြောင်းသိရှိရသည်။ ၂၀၂၅ခုနှစ်၊ ဇူလိုင် နောက်ဆုံးပတ်တွင် ဖရုံစေ့လှော်  နို့ဆီဗူးတစ်ဗူးလျှင် (၃၀၀၀)ကျပ်၊ တစ်ပြည်လျှင် (၁၁၅၀၀)ကျပ် ပေါက်ဈေးများရှိကြောင်း၊ ဒေသတွင်းစားသုံးမှုများပြီး ဈေးကွက်တွင် အရောင်းအဝယ် သွက်လျက် ရှိကြောင်း၊ ဖရုံစေ့လှော်ကို တစ်နေ့လျှင် လက်တစ်ဆုပ်စာခန့် စားသုံးပေးခြင်းဖြင့် ပရိုတင်း ဓာတ်ကြွယ်ဝကြောင်း၊ ကြွက်သား နှင့် ဆဲလ်များ အားကောင်းစေပြီး အရိုးကျန်းမာရေး၊ နှလုံးကျန်းမာရေး ကိုအထောက် အကူပြုကြောင်း၊ ဦးနှောက်လုပ်ဆောင်မှုနှင့် အရေပြား ကျန်းမာရေးကို လည်းအထောက်အကူ ပြုကြောင်း သိရှိရသည်။ အမျှင်ဓာတ်ပါဝင်သောကြောင့် အစာခြေစနစ်ကို ကောင်းမွန်စေပြီး ဝမ်းမှန်စေကာ အူလမ်းကြောင်းကျန်းမာရေးကို ကောင်း မွန်ကြောင်း၊ ဖရုံစေ့လှော်စားသုံးခြင်းဖြင့် ဆီးကျိတ်ရောင်ရမ်းခြင်း လက္ခဏာတွေကို သက်သာ စေကြောင်း၊ ညအိပ်မပျော် ဖြစ်နေသော သူများအတွက် မအိပ်ခင် ဖရုံစေ့လှော် နည်းနည်းစားပေးပါက ၎င်းတွင်အမိုင်နိုအက်ဆစ် ပါဝင် သောကြောင့် အိပ်စက်ခြင်းကို အထောက် အကူပြုကြောင်း  ဖရုံစေ့လှော်သည် အာဟာရဓာတ် များစွာပါဝင်သောကြောင့် လူတိုင်းစား သုံးသင့်ကြောင်း သိရှိရသည်။

Doca(မန္တလေး)