ပြည်တွင်းကုန်သွယ်မှုသတင်း

   မိတ္ထီလာမြို့နယ်၌ ဆီထွက်သီးနှံများဖြစ်သည့် မြေပဲ၊ နှမ်း၊ နေကြာသီးနှံများကို ဒေသတွင်း ဆီစက်များမှ တိရိစ္ဆာန်အစာဈေးကွက်ပေါ်မူတည်၍ ကြိတ်ခွဲထုတ်လုပ်မှုများလာပြီး ပဲဖက်၊ နှမ်းဖက်၊ နေကြာဖတ်များ ဈေးကောင်းရလာကြောင်းသိရပါသည်။ ဆီကြိတ်ဖတ်များကို ဒေသတွင်း တစ်နိုင် တပိုင်မွေးမြူရေးလုပ်ငန်များအပြင် မန္တလေးမြို့ တိရိစ္ဆာန်အစာတောင့်စက်ရုံများမှလည်း ဝယ်ယူလျက်ရှိ ကြောင်းသိရပါသည်။

   ယခု ဒီဇင်ဘာလပထမပတ် မိတ္ထီလာဈေးကွက်တွင် ဖြစ်ပေါ်နေသော ပဲဖတ်နှမ်းဖတ် ဈေးနှုန်း များမှာ ပဲဖတ်တစ်ပိဿာလျှင် (၆၇၀၀-၆၈၀၀)ကျပ်၊ နှမ်းဖတ်တစ်ပိဿာလျှင် (၄၄၀၀-၄၅၀၀)ကျပ်၊ နေကြာဖတ်တစ်ပိဿာလျှင်(၃၄၀၀-၃၅၀၀) ကျပ်ဈေးဖြင့် အရောင်းအဝယ်ဖြစ်လျက်ရှိကြောင်း၊ ယခင်လနှင့်ကာလတူနှိုင်းယှဉ်လျှင် ပဲဖတ်တစ်ပိဿာလျှင်(၄၅၀-၅၀၀)ကျပ်၊ နှမ်းဖတ်တစ်ပိဿာလျှင် (၄၀၀-၅၀၀)ကျပ်၊ နေကြာဖတ်တစ်ပိဿာလျှင်(၃၀၀)ကျပ်ခန့် ဈေးနှုန်းမြင့်တက်လာကြောင်း၊ ဈေးနှုန်းမြင့်တက်လာရခြင်းမှ မန္တလေးမြို့တိရိစ္ဆာန်အစာတောင့်စက်ရုံများမှ ဝယ်ယူမှုများလာခြင်းကြောင့်ဖြစ်သည် ဟု ဆီစက်လုပ်ငန်းရှင် တစ်ဦးထံမှသိရပါသည်။

DOCA(မန္တလေး)

   မိတ္ထီလာမြို့ ပဲမျိုးစုံဈေးကွက်တွင် ပဲလွမ်းပြာ၊ပဲလိပ်ပြာ၊ ပဲကြား၊  စွန်တာနီပဲများကို မိတ္ထီလာမြို့နယ်တွင်းရှိ မြင်းတဲ၊ သဖန်းပင်ရိုး၊ မြေတိုင်ကုန်း၊ အလယ်ရွာ၊ ရေဝေစသည့် ကျေးရွာများနှင့်သာစည်၊ မလှိုင်၊ ဝမ်းတွင်းမြို့နယ်များမှလည်း ရာသီချိန်တွင် ဝင်ရောက်လျက်ရှိပြီး ယခုဒီဇင်ဘာ လဆန်းတွင်  ဒေသတွင်းထွက်ရှိမှုမရှိသေး၍ မန္တလေးမှ ပဲလွမ်းပြာ၊ ပဲလိပ်ပြာ၊ ပဲကြား၊  စွန်တာနီ၊ နှင့်ပဲနီလေးများဝင်ရောက်လျက်ရှိကြောင်း သိရှိရပါသည်။  

   မိတ္ထီလာဈေးကွက်၌ ဒီဇင်ဘာလပထမပတ်တွင် ပဲလွန်းပြာ၊ ပဲလိပ်ပြာ၊ ပဲကြား၊  စွန်တာနီပဲ ပဲနီလေးဈေးနှုန်းများမှာ ပဲလွန်းပြာတစ်တင်းလျှင်(၁၀၀၀၀၀)ကျပ် ၊ ပဲလိပ်ပြာ တစ်တင်းလျှင် (၅၀၀၀၀) ကျပ်၊ ပဲကြားတစ်တင်းလျှင်(၅၀၀၀၀)ကျပ်၊ စွန်တာနီပဲတစ်တင်းလျှင် (၁၆၀၀၀၀)ကျပ်၊ပဲနီလေး တစ်ပိဿာလျှင်(၉၅၀၀)ကျပ် ဖြင့်အရောင်းအဝယ်ဖြစ်လျက်ရှိကြောင်း ယခင်လနှင့်ကာလတူ နှိုင်းယှဉ် လျှင်အရောင်းအဝယ်အေးသဖြင့် ဈေးနှုန်းတည်ငြိမ်နေကြောင်း ပဲလွန်းပြာကို ပဲပြုတ်လုပ်ငန်း၊ မုန့် လုပ်ငန်းများ၊ ပဲလိပ်ပြာနှင့်ပဲကြားကို ပဲလှော်လုပ်ငန်းများနှင့် စွန်တာနီပဲကို ပဲကြော်လုပ်ငန်းများမှ အများဆုံးဝယ်ယူကြောင်းသိရပါသည်။

DOCA(မန္တလေး)

     တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့နယ်တွင် ဆိပ်ငယ်ဈေးကြီးနှင့် ရှမ်းချောင်း ကုန်စိမ်းဈေးအတွင်း သံပရာသီးနှင့် သံပယိုသီးများမှာ ယခုပတ်တွင် ပိုမိုဝင်ရောက်၍ အ‌ရောင်း သွက်နေကြောင်း သိရှိရပါသည်။ သံပရာသီးနှင့် သံပယိုသီးသည် မိုးရာသီတွင် ပိုမိုထွက်ရှိ၍ ဆောင်းရာသီတွင် ထွက်ရှိမှုနည်းပါးသောကြောင့် ဈေးနှုန်းများအနည်းငယ်မြှင့်တက်ကြောင်း ကုန်စိမ်းရောင်းသူတစ်ဦးထံမှ သိရှိရပါသည်။ သံပရာသီးနှင့် သံပယိုသီးများကို သံပရာဖျော်ရည်၊ သံပရာယို၊ အသုပ်မျိုးစုံနှင့် သရေစာတို့တွင် ထည့်သွင်းစားသုံးပြီး လူသုံးကုန်နှင့် ကျန်းမာရေး အတွက်လည်းသုံးစွဲခြင်းကြောင့် သံပရာသီးကို သုံးစွဲသူများ များပြားကြကြောင်းလည်း သိရှိရပါသည်။

    ၂၀၂၅ခုနှစ် ယခုဒီဇင်ဘာလပထမပတ်တွင် မြိတ်မြို့ပေါ်တွင် သံပရာသီးတစ်လုံးလျှင် (၄၀၀)ကျပ်ထိရှိပြီး ဈေးနှုန်းမြှင့်တက်နေကြောင်း ကုန်စိမ်းရောင်းသူတစ်ဦးထံမှ သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့နယ်တွင် သစ်သီးမျိုးစုံဖြစ်သည့် ပန်းသီး၊ ဇီးသီး၊ နဂါးမောက်သီး၊ သရက်သီး၊ ငှက်ပျောသီး၊ နာနတ်သီး၊ လိမ္မော်သီး၊ စပျစ်သီး၊ သခွားမွေး သီး၊ ပန်းသစ်တော်၊ လိုင်ချီးသီး၊ စိမ်းစားဥနှင့် အစရှိသည့်သီးနှံများကို မြိတ်မြို့ဈေးကြီးများနှင့် လမ်းဘေးသစ်သီးဆိုင်များတွင် ရောင်းချလျက်ရှိပြီး လိမ္မော်သီးကို ဖျော်ရည်များတွင် အများဆုံးသုံးစွဲ ကြသည်။ လိမ္မော်သီးတွင် ပျား လိမ္မော်သီးသည် အချိုဆုံးဖြစ်သည့်အတွက် လူကြိုက်များပြီး အရောင်း အဝယ်ကောင်းလျက်ရှိသည်။ ဒေသတွင်းမစိုက်ပျိုးနိုင်ခြင်းကြောင့် အခြားနေရာများမှ မှာယူလျက် ရှိကြောင်းသိရှိရပါသည်။

          ယခု၂၀၂၅ခုနှစ် ဒီဇင်ဘာလပထမပတ်တွင် မြိတ်မြို့ပေါ်ရှိ ဈေးနှုန်းမှာ ပျားလိမ္မော်သီး တစ်လုံးလျှင် (၅၀၀)ကျပ်နှင့် ရိုးရိုးလိမ္မော်သီးတစ်လုံးလျှင် (၁၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

     ပြည်ခရိုင်အတွင်းစိုက်ပျိုးထုတ်လုပ် ရောင်းချလျက်ရှိသော ဒေသထုတ်ကုန်များမှာ ဆန်စပါး၊ ပဲမျိုးစုံနှင့် ဆီထွက်သီးနှံများ နှင့် ရာသီပေါ် ဟင်းသီးဟင်းရွက်များ နှင့် အသီးအနှံ များဖြစ်ကြ ပါသည်။ ထိုသီးနှံများကို မြို့နယ်များတွင် စိုက်ပျိုးကြပြီး ဒေသတွင်းစားသုံးမှုပိုလျှံမှသာ အခြားတိုင်း များနှင့် မြို့များသို့ တင်ပို့ရောင်းချကြပါသည်။ ပဲမျိုးစုံမှာ ဒေသအတွင်း စားသုံးမှုအပြင် ရန်ကုန် ဝယ်လက်များနှင့် မန္တလေးဝယ်လက်များက ဝယ်ယူမှုရှိပြီး ဆီထွက်သီးနှံမှာ ဒေသတွင်းရှိ ဆီစက် လုပ်ငန်းရှင်များက ဆီကြိတ်ရန် ဝယ်ယူမှုရှိပြီး ပိုလျှံပါက နယ်ဝယ်လက်များက ဝယ်ယူမှုရှိ၍ ပြည်မြို့တွင် ဒေသတွင်း စိုက်ပျိုးထုတ်လုပ်သောထုတ်ကုန်များမှာနေ့စဉ် အရောင်းအဝယ်ဖြစ်လျက်ရှိပါသည်။

ပဲလွမ်းဖြူ

     ပြည်ဈေးကွက်တွင် ရောင်းချလျက်ရှိသော ပဲလွမ်းဖြူဈေးမှာ နိုဝင်ဘာလ နောက်ဆုံး ပတ်တွင် တစ်တင်းလျှင် (၈၅၀၀၀)ကျပ် မှ (၈၆၀၀၀)ကျပ်ဖြင့် မြို့တွင်း လက်လီသမားများမှ ဝယ်ယူမှုရှိ၍ တစ်နေ့လျှင် အိတ် (၂၀/၂၅) အရောင်းအဝယ်ဖြစ်လျက်ရှိပါသည်။

ထောပတ်ပဲ

     ပြည်ဈေးကွက်တွင် ရောင်းချလျက်ရှိသော ထောပတ်ပဲဈေးမှာ နိုဝင်ဘာလ နောက်ဆုံး ပတ်တွင် တစ်တင်းလျှင် (၉၅၀၀၀)ကျပ် ဖြင့် မြို့တွင်းလက်လီသမားများမှ ဝယ်ယူမှုရှိ၍ တစ်နေ့လျှင် အိတ် (၂၀/၂၅) အရောင်းအဝယ်ဖြစ်လျှက်ရှိပါသည်။ ထောပတ်ပဲမှာ ပဲပြုတ်ရောင်းချသူများက ဝယ်ယူမှုရှိသလို စားသုံးသူများကလည်း ဝယ်ယူမှုရှိကြောင်း သိရပါသည်။

ပဲနီပြား

   ပြည်ဈေးကွက်တွင် ရောင်းချလျှက်ရှိသော ပဲနီပြားဈေးမှာ နိုဝင်ဘာလ နောက်ဆုံး ပတ်တွင် တစ်တင်းလျှင် (၁၀၅၀၀၀)ကျပ် မှ (၁၁၀၀၀၀)ကျပ် ဖြင့် မြို့တွင်းလက်လီသမားများမှ ဝယ်ယူမှုရှိ၍ တစ်နေ့လျှင် အိတ် (၂၀/၂၅) ခန့်နှင့် လက်ကားသများမှ ဝယ်ယူမှုရှိ၍ တစ်နေ့လျှင် အိတ် (၂၀/၂၅) အရောင်းအဝယ်ဖြစ်လျက်ရှိပါသည်။

ပဲပုတ်

     ပြည်ဈေးကွက်တွင် ရောင်းချလျှက်ရှိသော ပဲပုတ်ဈေးမှာ နိုဝင်ဘာလ နောက်ဆုံးပတ်တွင် တစ်တင်းလျှင် (၁၅၀၀၀၀)ကျပ် ဖြင့် မြို့တွင်းလက်လီသမားများမှ ဝယ်ယူမှုရှိ၍ တစ်နေ့လျှင် အိတ် (၂၀/၂၅)ခန့်နှင့် လက်ကားသများမှ ဝယ်ယူမှုရှိ၍ တစ်နေ့ လျှင် အိတ် (၁၀၀/၂၀၀) ခန့်အရောင်းအဝယ်ဖြစ်လျက်ရှိပါသည်။

   အဆိုပါပဲများသည် ဒေသတွင်းသာ အရောင်းအဝယ်ဖြစ်လျှက်ရှိပြီး အရောင်းအဝယ်မှာလည်း နေ့စဉ်ဖြစ်လျက်ရှိပါသည်။ 

DOCA(ပဲခူး)