ပြည်တွင်းကုန်သွယ်မှုသတင်း

       ၂၀၂၅ခုနှစ်၊ ဩဂုတ်လ ပထမပတ်တွင် ရွှေဘိုမြို့ရှိ  ငါး၊ပုဇွန် ရောင်းချသောဒိုင်များတွင် ငါးမုတ်တစ်ပိဿာလျှင် (၁၀၀၀၀)ကျပ်၊ ငါးမြစ်ချင်း တစ်ပိဿာလျှင် (၁၃၀၀၀)ကျပ်၊ ငါးကြင်း တစ်ပိသာလျှင် (၁၃၀၀၀)ကျပ်၊ ငါးအုံတုံ တစ်ပိဿာလျှင် (၁၄၀၀၀)ကျပ်၊ ငါးကြင်းရွှေဝါ တစ်ပိဿာလျှင် (၁၁၀၀၀)ကျပ်၊ငါးတန်တစ်ပိဿာလျှင် (၈၀၀၀)ကျပ်၊ တီလားဗီးလားငါး တစ်ပိဿာလျှင် (၁၅၀၀၀)ကျပ်၊ငါးဥ တစ်ပိဿာလျှင် (၁၃၀၀၀)ကျပ်၊  ငါးကြင်းခြစ် တစ်ပိသာလျှင် (၁၈၀၀၀)ကျပ်နှင့် ပုဇွန်ထုပ် အလတ်ဆိုဒ်‌ တစ်ပိဿာလျှင် (၆၀၀၀၀)ကျပ် ပေါက်ဈေးဖြင့် နေ့စဉ်အရောင်းအဝယ် ဖြစ်လျက်ရှိပါသည်။

          ငါးဒိုင်များမှ ငါး၊ပုဇွန်များကို ရွှေဘိုမြို့ပေါ်ရှိ ဈေးများသို့လည်း လက်လီလက္ကား ရောင်းချသည့်အပြင် မြန်မာနိုင်ငံ အထက်ပိုင်းဒေသ ကချင်ပြည်နယ်အတွင်းရှိ မြို့များသို့လည်း တင်ပို့ရောင်းချလျက်ရှိကြောင်း ၊ယခင်အပတ်နှင့်နှိုင်းယှဉ်ကြည့်ပါက လမ်းပမ်းဆက်သွယ်ရေး အခက်အခဲများ အနည်းငယ်ရှိသဖြင့် ငါး၊ပုဇွန်များ ကုန်ဝင်ရောက်မှု နည်းပါးသဖြင့် ဈေးနှုန်းအနည်း ငယ်မြင့်တက် လျက်ရှိကြောင်း သိရှိရပါသည်။

DOCA(စစ်ကိုင်း)

      ရွှေဘိုခရိုင်တွင်  ဖူးစားပြောင်းကို   မိုး/ဆောင်း ဧက (၂)သောင်းကျော် နှစ်စဉ် စိုက်ပျိုး လျက်ရှိပြီး ဖူးစားပြောင်း အများဆုံး စိုက်ပျိုးသော  ဝက်လက်၊ရေဦးစသည့် မြို့နယ်များမှ ဖူးစားပြောင်း(သကြားပြောင်း)များ ဇူလိုင်လနောက်ဆုံးပတ်မှ စတင်၍  ရွှေဘိုမြို့ပေါ်ရှိ သီးနှံပွဲရုံများသို့ လှိုင်လှိုင် ဝင်ရောက်လျက်ရှိပါသည်။

      ယခု ဩဂုတ်လ ပထမပတ်တွင် ဖူးစားပြောင်း (သကြားပြောင်း) (၁၁၀)ဖူးပါ တစ်အိတ်လျှင် (၄၀၀၀၀)ကျပ်မှ (၅၀၀၀၀)ကျပ်ထိပေါက်ဈေးရှိပြီး တစ်နေ့လျှင် ဖူးစားပြောင်း(သကြားပြောင်း) အိတ်ရေ (၁၀၀)ခန့် ပုံမှန်ဝင်ရောက်လျက်ရှိကြောင်း၊ ဝင်ရောက်လာသော ဖူးစားပြောင်း များကို ရွှေဘိုမြို့ပေါ်ဈေးများရှိ လက်လီ ပြန်လည်ရောင်းချသော ဈေးသည်များကို ဖောက်သည် ပြန်ပေးသည့်အပြင် စားသောက်ဆိုင်များ၊မာလာရှမ်းကောဆိုင်များ၊ ဆိုင်ကယ်ဖြင့် လှည့်လည် ရောင်းချသော ဈေးသည်များနှင့် စားသုံးသူများမှ ဝယ်ယူကြပြီး ဝင်ရောက်သမျှ အရောင်းအဝယ် ဖြစ်လျက်ရှိကြောင်း ရွှေဘိုမြို့ စည်ပင်သာယာဈေးအနီးရှိ သီးနှံပွဲရုံတစ်ခုမှ သတင်းရရှိပါသည်။

DOCA(စစ်ကိုင်း)

       ပန်းတိမ်ငိုပန်းသည် မိုးရာသီကာလတွင် ပွင့်လန်းသည့် ပန်းတစ်မျိုးဖြစ်ပြီး ဘုရားပန်း အဖြစ်သာမက အခမ်းအနားများတွင်လည်း တန်ဖိုးထား အလှဆင်၍၊ အရောင်အဆင်းမှာ အဖြူရောင် ၊ခရမ်းရောင်၊ပန်းရောင် စသည့်အရောင်များရှိပြီး ပန်းစိုက်ပျိုးသူများအတွက်လည်း တွက်ခြေကိုက်သည့် ပန်းတစ်မျိုးဖြစ်ကြောင်း သိရသည်။

      ဇူလိုင်လနောက်ဆုံးပတ်မှစတင်၍ ပြင်ဦးလွင်မြို့ အနီးရှိ ကျေးရွာများမှ ခူးဆွတ် ရောင်းချသော   ပန်းတိမ်ငိုပန်းများ ရွှေဘိုမြို့   ဈေးကွက်အတွင်းသို့ လှိုင်လှိုင်ဝင်ရောက်လာကာ ယခု ဩဂုတ်လ ပထမပတ်တွင် ပန်းတိမ်ငိုပန်း အဖြူရောင်နှင့် ပန်းရောင်  (၁၀)ခက်ပါ တစ်စည်းလျှင် (၂၃၀၀)ကျပ်၊ခရမ်းရောင် (၁၀)ခက်ပါ တစ်စည်းလျှင် (၂၈၀၀)ကျပ်နှုန်းဖြင့် ရွှေဘိုမြို့ပေါ်ရှိ ပန်းရောင်းချသောလက္ကားဒိုင်များသို့ ဖောက်သည်ပေးရောင်းချလျက်ရှိပြီး ဝင်ရောက်သမျှ အရောင်းအဝယ်ဖြစ်လျက်ရှိကြောင်း သတင်း ရရှိသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ မုံရွာမြို့၊ မကျည်းပင်ဈေးအတွင်းတွင်  ဂေါ်ရခါးညွှန့်နှင့် ဂေါ်ရခါးသီးများရောင်းချ လျက်ရှိကြောင်း  သိရှိရပါသည်။

      ဈေးကွက်အတွင်းရောင်းချနေသော ဂေါ်ရခါးညွှန့်နှင့် ဂေါ်ရခါးသီးများကို ရှမ်းပြည်နယ် ကလော၊ ပင်းတယ၊ ပင်လောင်း စသည့်ဒေသများမှ ဝင်ရောက်လာသည့် ဂေါ်ရခါးညွှန့်များ အရောင်းအဝယ်ကောင်းနေကြောင်း သိရှိရပါသည်။

     ယခုဩဂုတ်လအတွင်း ဖြစ်ပေါ်နေသော ဂေါ်ရခါးညွှန့်ဈေးနှုန်းမှာ ဂေါ်ရခါးရွက် (၁၀)ကျပ် သားလျှင် ၁၂၀၀ကျပ်နှုန်းဖြင့် ရောင်းချလျက်ရှိပြီး အလားတူပင် ဈေးကွက် ဂေါ်ရခါးသီးများကို ယခု ဩဂုတ်လအတွင်း ဖြစ်ပေါ်နေသော ဂေါ်ရခါးသီးဈေးနှုန်းမှာ ဂေါ်ရခါးသီးအကြီး (၁)လုံး လျှင်(၁၂၀၀)ကျပ်၊ အသေး (၁) လုံးလျှင် (၈၀၀)ကျပ်ဖြင့် ရောင်းချလျက်ရှိကြောင်း သိရသည်။

DOCA(စစ်ကိုင်း)

      ယခု သြဂုတ်လ မိုးရာသီအချိန်ကာလသည် မကွေးတိုင်းဒေသကြီး သရက်ခရိုင်၊ သရက်မြို့၊ မြို့နယ်အတွင်း ဒေသထွက်သီးနှံများဖြစ်ထွန်းသည့် အချိန်ကာလဖြစ်သည့်အလျောက် မြို့မစည်ပင် သာယာဈေးသို့ သရက်မြို့အတွင်းရှိ ကျေးရွာများဖြစ်ကြသော သဲတောကျေးရွာ၊ မြင်ဘာခြံကျေးရွာ၊ ကံသာစုကျေးရွာနှင့် မီးသွေးဖုတ်ကျေးရွာတို့မှ တနိုင်တပိုင်ခြံထွက် ဟင်းသီးဟင်းရွက်များမှ ချဥ်ပေါင်ရွက်များထွက်ရှိ၍ နေ့စဥ် အရောင်းအဝယ်ဖြစ်လျက်ရှိနေပါသည်။

       ချဥ်ပေါင်ပင်မှာ ရိုးရိုးချဥ်ပေါင်၊ ချဥ်ပေါင်(ဖြူ)နှင့် ချဥ်ပေါင်(ခါး)ဟူ၍ အမျိုးအစား (၃)မျိုး ရှိသည့်အနက်မှ မိမိတို့ဒေသခံ စားသုံးသူပြည်သူများမှာ ရိုးရိုးချဥ်ပေါင်ကိုသာ ရွေးချယ်စားသုံးမှုများ ကြသည်။ ၎င်းချဥ်ပေါင်မှာ ဟင်းချက်ရာတွင် ယခုရာသီစာ ပဲကြီးနှပ်၊ ပဲကြီးဟင်းချိုတို့နှင့် လိုက်ဖက်မှုရှိခြင်း၊ အချဥ်ဓါတ်ရရှိခြင်းကြောင့် အစာကြေလွယ်ခြင်း၊ အအီပြေလွယ်ခြင်း၊ အဆိပ် အရမ်းမပျင်းသည့် အင်းစက်ပိုးမွှားများကိုက်ခံရလျှင် ကိုက်ခံရသည့် နေရာတွင် ချဥ်ပေါင်ရွက်အား ကြိတ်ချေ၍ ပွတ်တိုက်လိုက်ပါက အဆိပ်ပြေလွယ်ခြင်း၊ အသက်ကြီးအဘိုးအဘွားများပင် စားသုံး နိုင်ခြင်းစသည့် ကောင်းကျိုးများရရှိစေသော်လည်း ရင်ကြပ်ရောဂါအခံ ရှိသူများအနေဖြင့် သတိပြု စားသုံးသင့်ပါသည်။ မိမိတို့ဒေသသည် သီးနှံ/ဟင်းသီးဟင်းရွက်များကို တစ်နှစ်ပတ်လုံးရရှိမှု နည်း ပါး၍ ရာသီပေါ်သီးနှံများကိုသာ နှစ်ခြိုက်စွာစားသုံးကြသည့်အတွက် ဝယ်လိုအားများသည်ဟု လည်း သိရပါသည်။ ချဥ်ပေါင်ပင်များသည် နွေရာသီမြေအောက်ရေဓါတ်နည်းပါး၍ ရေသွင်းစိုက် ရသည့် အချိန်တွင် ချဥ်ပေါင်ညွန့်(၉)ညွန့်၊(၁၀)ညွန့်ပါ တစ်စီးလျှင် ကျပ်(၂၀၀မှ ၂၅၀)အထိ ဈေးနှုန်းဖြင့် အရောင်းအဝယ်ဖြစ်ခဲ့ကြောင်း၊ ဇွန်လ၊ ဇူလိုင်လတို့ကဲ့သို့ မြေအောက်ရေဓါတ်များချိန် မိုးရာသီ တို့တွင် ချဥ်ပေါင်ညွန်(၉)ညွန့်၊ (၁၀)ညွန့်ပါတစ်စီးလျှင် ကျပ်(၁၀၀)ဖြင့်သာ အရောင်းအဝယ်ရှိ ကြောင်း သိရသည်။ ထို့အပြင် ရပ်ကွက်အတွင်း တစ်အိမ်ဝင်တစ်အိမ်ထွက် ဆိုင်ကယ်/စက်ဘီးတို့ဖြင့် ရောင်းချသူတို့တွင် ဒေသခေါ် ချဥ်ပေါင်စုံအထုပ်များလဲ ရောင်းချကြပါသည်။ ၎င်းချဥ်ပေါင်စုံထုပ် တွင် ခရမ်းသီး(အသေး)၁လုံး၊ ရုံးပတီသီး(အသေး)၂တောင့်၊ နံနံပင်(၂)ပင်၊ ကန်စွန်းရွက်အနည်း ငယ်နှင့် ချဥ်ပေါင်ရွက်အနည်းငယ်ထည့်၍ထုတ်ထားသော (၁)ထုပ်လျှင် ကျပ်(၅၀၀)ဖြင့် ရောင်းချ လျက်ရှိကြောင်း ဈေးသည်များထံမှ သိရပါသည်။

DOCA(မကွေး)